ᒪᑎᔪᐤ 20 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᒡ ᑲ ᐊᑐᔅᒐᒡ Matthew 20.1-16 (Proper-20 Year A)

¹ “ᒪᐅ ᐊᓯᓇᒂᒡ ᒋᒋᒋᓯᒄ ᒋᓴᐅᒋᒪᐅᓐ᙮ ᒋ ᑕᐤ ᐸᐃᒂᐤ ᐅᒋᒪᐤ ᐊ ᑎᐱᔨᐛᐅᓯᑦ ᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᔪᐤ᙮ ᐸᐃᒂᐤ ᒪᒃ ᐎᐱᒡ ᐊ ᒐᒋᓴᐸᔭᔨᒡ ᒋ ᐎᐎᔪᐤ ᐊ ᓇᓂᑐᐛᔨᒪᑦ ᐊᐛᔪᐛ ᒐᒋ ᐅᑎᓇᑦ, ᒐᒋ ᐊᑐᔅᒐᔨᒋ ᐊᓐᑕ ᐅᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᒡ᙮

² ᒋ ᐃᑕᐤ ᑭᑈ ᐊᓐ ᐅᒋᒪᐤ ᒐᒋ ᒋᓯᐧᑯᐛᑦ ᐊᓂᔭ ᑲ ᐅᑎᓇᑦ, ᐸᐃᒄ ᓱᓇᔭᐱᔎ ᒐ ᒋᓯᐧᑯᐛᑦ ᐸᐃᒄ ᒋᓯᑲᐛ ᒪᒃ ᐊᔅᐱᔅ ᐊᑐᔅᒐᔨᒋ᙮ ᒋ ᓂᔅᑯᒧᔪᐛ ᒪᒃ, ᐊᑯ ᒂ ᐃᑎᓴᐛᑦ ᒐᒋ ᐊᑐᔅᒐᔨᒋ ᐊᓐᑕ ᐅᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᒡ᙮”

³ “ᐊᑯ ᒥᓐ ᒂ ᔅᑐᑕᑦ ᓴᓯᑲᓐ ᐸᐃᑯᔅᑕᐤ ᐊᔅᐱᔨᒋ ᐊ ᒐᒋᓴᐸᔭᔨᒡ, ᒂ ᐛᐱᒪᑦ ᐊᓐᑕ ᓇᐸᐛ ᒥᒄ ᐊ ᓇᓂᐳᔨᒋ ᐊᑲ ᐎᔭᔅ ᐃᑕᐱᑎᓯᔨᒋ ᐊᓐᑕ ᐊ ᒪᒧᐎᒡ ᐊᐛᓐᒋ᙮

⁴ ᐊᑯ ᐊᑕᑦ, ‘ᐃᑐᑕᒄ ᑭᔭ ᒋᔨᐛᐤ ᐊᓐᑕ ᓂᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᒡ᙮ ᒥᓯᐛ ᐛᔅ ᒋᑭ ᒥᔪ ᒋᓯᐧᑲᑎᓇᐛᐤ ᐊᑐᔅᑯᔭᒂ᙮’ ᐊᑯ ᒪᒃ ᒂ ᐃᑐᑕᔨᒋ ᒐᒋ ᐊᑐᔅᒐᔨᒋ ᐊᓐᑕ ᐅᓂᑕᐅᒋᑕᑭᓐ ᐊᔅᒋᒡ᙮”

⁵ “ᐃᔭᐱᑕᒋᓯᑲᔨᒡ ᒪᒃ, ᑭᔭ ᒥᓐ ᓂᔅᑐ ᐊ ᐃᔅᐱᔨᒋ ᑲᒋ ᐊᐱᑕᒋᓯᑲᔨᒡ, ᐅᒋᒪᐤ ᒥᓐ ᒋ ᐃᑐᑕᐤ ᐊᓐᑕ ᐊ ᒪᒧᐎᔨᒋ ᐊᐛᔪᐛ ᒥᓐ ᑯᑎᑲ ᐊᐛᔪᐛ ᒐᒋ ᐅᑎᓇᑦ᙮ ᐃᔭᐱᒡ ᑭᑈ ᐊᑯᓐ ᐊᑕᑦ, ᒐ ᒥᔪ ᒋᓯᐧᑯᐛᑦ᙮”

⁶ “ᒐᑲᑦ ᒪᒃ ᐱᑕᑕᒡ ᒋ ᐃᔅᐱᔨᒐ ᐊᑯ ᒥᓐ ᒂ ᐃᑐᑕᑦ ᐊᓐᑕ ᐊ ᒪᒧᐎᔨᒋ ᐊᐛᔪᐛ ᒥᓐ ᒪᒃ ᒋ ᐛᐱᒪᐤ ᓇᐸᓴ ᐊᓐᑕ ᐊ ᓇᓂᐳᔨᒋ, ᐊᑯ ᐊᑕᑦ, ‘ᒐᒂᓐ ᐛᒡ ᒥᒄ ᓇᓂᐳᐅᔭᒄ ᐅᑕ ᐃᔅᑭᓐ ᒋᓯᑲᐛ ᐊᑲ ᒐᒂᓐ ᐃᑐᑎᒪᒄ ?’ ”

⁷ ᐊᑯ ᐊᑎᑯᑦ, “ᓇᒪ ᐊᐛᓐ ᐊᔅᒄ ᓂ ᐅᒋ ᐅᑎᓂᑯᓇᓐ᙮” ᐊᑯ ᐊᑕᑦ, “ᑭᔭ ᒋᔨᐛᐤ ᒪ ᐊᑐᔅᒐᒄ ᐊᓐᑕ ᓂᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᒡ᙮”

⁸ ᐃᔅᐱ ᒪᒃ ᐛᑕᑯᓯᔨᒡ, ᐅᒋᒪᐤ ᒋ ᐃᑕᐤ ᐊᓂᔭ ᑲ ᓂᓇᑭᑐᐛᔨᒪᔨᒋ ᐊᓂᔭ ᑲ ᐊᑐᔅᒐᓯᔨᒋ, “ᐎᓴᒥᒡ ᐊᓐᒡ ᑲ ᐊᐱᒋᐃᒂᐤ, ᒥᓯᐛ ᒐ ᒋᓯᐧᑯᐅᑥᐤ ᐊᓐᒡ ᑲ ᐊᑐᔅᒐᒡ᙮ ᒪᔅᑕᔾ ᐊᓐᒡ ᑲ ᐅᑎᓇᑭᓄᐅᒡ ᓂᔅᑎᒻ ᒐ ᒋᓯᐧᑯᐅᑥᐤ, ᐊᑯ ᒥᓐ ᐊᓐᒡ ᑯᑎᑭᒡ ᑕᓐ ᒥᒄ ᑲ ᐊᑎ ᐃᑎᔅᑲᑐᒡ ᐊ ᐅᑎᓇᑭᓄᐅᒡ, ᒐ ᐊᑎ ᐅᑎᑕᐅᑥᐤ ᐊᓐᒡ ᓂᔅᑎᒻ ᑲ ᐅᑎᓇᑭᓄᐅᒡ᙮ ᐊᐅᑯᓐᒡ ᐅᒡ ᓂᔅᑎᒻ ᑲ ᐅᑎᓇᑭᓄᐅᒡ ᒪᔅᑕᔾ ᒐ ᒋᓯᐧᑯᐅᑥᐤ᙮”

⁹ ᐊᓐᒡ ᒪᒃ ᓇᐸᐅᒡ ᐱᑕᑕᒡ ᑲ ᐃᔅᐱᔨᒋ ᑲ ᐅᑎᓇᑭᓄᐅᒡ ᐊᐅᑯᓐᒡ ᓂᔅᑎᒻ ᑲ ᒋᓯᐧᑯᐛᑭᓄᐅᐅᒡ᙮ ᐸᐃᒄ ᓱᓇᔭᐱᔎ ᒋ ᒥᔭᑭᓄᐎᒡ᙮ ᐊᐅᑯᓐ ᒪᒃ ᑲ ᐃᔅᐱᔅ ᒋᓯᐧᑯᐛᑭᓄᐅᒡ ᒥᓯᐛ ᐊᓐᒡ ᑲ ᐅᑎᓇᑭᓄᐅᒡ ᐊᓂᔭ ᒐᓯᑲᔨᒡ, ᑭᔭ ᐊᓐᒡ ᓂᔅᑎᒻ ᑲ ᐅᑎᓇᑭᓄᐅᒡ᙮

¹⁰ ᐃᔅᐱ ᒪᒃ ᑲ ᒋᓯᐧᑯᐛᑭᓄᐅᒡ ᐊᓐᒡ ᓂᔅᑎᒻ ᑲ ᐅᑎᓇᑭᓄᐅᒡ, ᒋ ᐃᑕᔨᑎᒧᒡ ᐎᔨᐛᐤ ᐊᑐᐎᔅ ᒥᔅᑎ ᒐ ᒋᓯᐧᑯᐛᑭᓄᐅᒡ, ᒥᒄ ᒪᒃ ᐃᔭᐱᒡ ᐸᐃᒄ ᓱᓇᔭᐱᔎ ᒋ ᐃᔅᐱᔅ ᒋᓯᐧᑯᐛᑭᓄᐅᒡ᙮

¹¹ ᒋ ᐅᑎᓇᐅᒡ ᑭᑈ ᐊᓂᔭ ᓱᓇᔭᐱᔎ ᑲ ᒥᔭᑭᓄᐅᒡ, ᓇᒪ ᒥᒄ ᓇᔅᒡ ᐅᒋ ᐎ ᒥᔪ ᐊᔨᒧᒪᐅᒡ ᑕᓐ ᑲ ᐃᓯ ᐃᔭᔨᒺᐛᐃᑯᒡ ᐊᓂᔭ ᑲ ᑎᐱᔨᐛᐅᓯᔨᒋ ᓂᑕᐅᒋᑕᑭᓐ ᐊᔅᒋᔪᐤ᙮

¹² ᒋ ᐃᑕᐅᒡ, “ᐊᓐᒡ ᒪᔅᑕᔾ ᑲ ᐅᑎᓇᑭᓄᐎᒡ ᒐᒋ ᐊᑐᔅᒐᒡ ᒥᒄ ᐸᐃᒄ ᑎᐸᐃᑭᓇ ᒋ ᐊᑐᔅᒐᐅᒡ, ᓂᔭᓐ ᒪᒃ ᐎ ᐃᔅᑭᓐ ᒋᓯᑲᐛ ᓂᒋ ᐊᑐᔅᒐᓇᓐ ᐊᑎ ᒪᒂᒡ ᑲ ᒋᓯᑕᒡ ᐃᔭᐱᒡ ᒪᒃ ᐸᐃᑯᓄᒡ ᒥᓯᐛ ᐊ ᐃᔅᐱᔅ ᒋᓯᐧᑯᐅᔭᒡ᙮”

¹³ ᐊᓐ ᒪᒃ ᑲ ᑎᐱᔨᐛᐅᓯᑦ ᐊᓂᔭ ᓂᑕᐅᒋᑕᑭᓐ ᐊᔅᒋᔪᐤ ᒋ ᐃᑕᐤ ᐊᓂᔭ ᐸᐃᒄ, “ᓂᐎᒐᐛᑭᓐ, ᓇᒪ ᒋ ᒋᒧᑎᒪᑎᓐ, ᐛᔅ ᔅᒋ ᐃᑎᑎᓐ ᐸᐃᒄ ᓱᓇᔭᐱᔅᒄ ᒐ ᐃᔅᐱᔅ ᒋᓯᐧᑲᑕᓐ ᐸᐃᒄ ᒋᓯᑲᐛ ᐃᔅᐱᔅ ᐊᐱᒋᔨᑕᓇ ? ᔅᒋ ᓂᔅᑯᒧᓐ ᒪᒃ᙮

¹⁴ ᓴᔅ ᔅᒋ ᒋᓯᐧᑲᑎᓐ᙮ ᔅᑐᑕ ᒪᒃ᙮ ᐛᔅ ᐅ ᑲ ᐅᑎᓂᑎᑯᒡ ᒥᓯᐛ ᑕᐱᑐᐤ ᔅᒋ ᐎ ᐃᔅᐱᔅ ᒋᓯᐧᑲᑎᓇᐛᐤ᙮

¹⁵ ᓇᒪᐎᔾ ᐊ ᒋ ᒋᔅᒐᔨᑕᓐ ᒥᒄ ᐛ ᐃᑐᑎᒪᓐ ᓂᓱᓇᔭᓂᒻ ᓂᑭ ᑐᑕᓐ ? ᓇᒪᐎᔾ ᒋ ᓇᐊᔨᑎᒥᐃᑎᓐ ᐊ ᐊ ᒥᔪᑥᔭᓐ ?”

¹⁶ ᐊᑯ ᒋᓴᔅ ᒂ ᐊᑎ ᐃᔅᒋᔄᑦ, “ᐊᐅᒄ ᒪᒃ ᒐ ᐅᒋ ᐅᑕᒡ ᐃᓯ ᐱᔅᑎᓇᑭᓄᐅᒡ ᐊᓐᒡ ᓂᑲᓄᒡ ᑲ ᐃᑕᐃᓱᒡ ᐊᑯ ᐊᓐᒡ ᒪᔅᑕᔾ ᑲ ᐃᓯ ᐱᔅᑎᓂᓱᒡ ᓂᑲᓄᒡ ᒋᑭ ᐃᓯ ᐱᔅᑎᓇᑭᓄᐅᒡ᙮ ᒥᒐᑦ ᒪᒃ ᑕᑈᑕᑭᓄᐎᒡ, ᒥᒄ ᓇᒪ ᒥᒐᑐᐅᒡ ᐛᑎᓇᑭᓄᐎᒡ᙮”

ᒋᓴᔅ ᒥᓐ ᑲ ᐊᔨᒧᑕᐧᒃ ᒐ ᓂᐱᑦ

¹⁷ ᒪᒂᒡ ᒪᒃ ᒋᓴᔅ ᒋᕈᓯᓕᒥᒡ ᐊ ᐃᑐᑕᑦ ᒋ ᐱᔅᒐᑕᐊᐤ ᐊᓂᔭ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ ᐊᓐᑕ ᑎᐸᓐ ᒐᒋ ᐃᑕᒡ, ᐊᑯ ᒂ ᐃᑕᑦ ᐊᓂᔭ ᐊ ᐊᑎ ᐱᒧᑕᒡ,

¹⁸ “ᓂᑐᑎᒧᒄ ᒪ,” ᒋ ᐃᑕᐤ, “ᒋᕈᓯᓕᒥᒡ ᒋᑦ ᐃᑐᑕᓇᓄᐤ, ᐊᑯᑕ ᐅᑕ ᒐ ᒪᑯᓇᑭᓄᐅᑦ ᐃᔪᐤ ᐅᑯᓯᓴᓐ ᐊᓐᑕ ᒐᒋ ᐃᓯ ᐱᔅᑎᓇᑭᓄᐅᑦ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᐊ ᑕᔨᒋ ᑭᔭ ᐎᓱᐛᐅᓂᔪᐤ ᑲ ᒋᔅᑯᑎᒪᒐᔨᒋ ᐊ ᑕᔨᒋ ᒐᒋ ᑎᐸᔅᑯᓂᑯᑦ᙮ ᐊᐅᑯᓐᒡ ᐅᒡ ᒐ ᐃᑎᓱᐛᒡ ᒐᒋ ᓂᐸᐊᑭᓄᔨᒋ᙮

¹⁹ ᐊᑯ ᒪᒃ ᒥᓐ ᐊᓐᑕ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᐊ ᑕᔨᒋ ᒐ ᐃᑐᑕᐊᒡ ᒐᒋ ᒪᔭᔨᒪᑭᓄᔨᒋ ᑭᔭ ᒐᒋ ᐸᐱᓯᔅᑕᐛᑭᓄᔨᒋ ᑭᔭ ᒐᒋ ᒋᔅᑕᔎᑕᑭᓄᔨᒋ᙮ ᒥᒄ ᒪᒃ ᒋ ᓂᔅᑐ ᒋᓯᑲᔨᒐ ᑲᐤ ᒋᑭ ᐅᓂᐤ᙮”

ᑕᓐ ᑲ ᐃᓯ ᑯᒂᒋᒪᑦ ᐸᐃᒄ ᐅᑲᐎᒪᐤ ᒋᓴᓴ ᒐᒋ ᐃᑐᑎᒪᑯᑦ

²⁰ ᓴᐱᑎ ᒪᒃ ᐎᐛ ᒋ ᐸᒋ ᐎᒐᐛᐤ ᐅᑯᓴ, ᒂ ᐸᒋ ᓂᑐᐛᐱᒪᒡ ᒋᓴᓴ ᐊᑯ ᐊᓐ ᐃᔎᐤ ᒂ ᐊᑎ ᐅᒋᒋᐧᑯᓂᐱᔨᔅᑐᐛᑦ ᒋᓴᓴ ᐊ ᐎ ᓂᑐᐛᔨᑎᒧᐛᑦ ᒐᒂᔪᐤ᙮

²¹ ᐊᑯ ᒋᓴᔅ ᒂ ᐃᑕᑦ, “ᒐᒂᓐ ᓇᑐᐛᔨᑎᒥᓐ ?” ᒋ ᐃᑎᑯᐤ ᒪᒃ, “ᐅᒡ ᑕᐱᔅᑯᓐ ᓂᑯᓯᒡ ᒐᒋ ᐎᑎᐱᒥᔅᒡ ᐃᔅᐱ ᒋᓴᐅᒋᒪᐎᔨᓇ, ᐸᐃᒄ ᐊᓐᑕ ᒋᒥᔪᐅᓂᒡ ᒐᒋ ᐊᐱᑦ ᐊᑯ ᐊᓐ ᑯᑎᒃ ᐊᓐᑕ ᒋᓂᔅᐸᒋᐅᓂᒡ᙮”

²² ᐊᑯ ᒋᓴᔅ ᒂ ᐃᑕᑦ ᐊᓂᔭ ᐅᑯᓯᔪᐛ, “ᓇᒪ ᒋ ᒋᔅᒐᔨᑕᓇᐛᐤ ᐊᓐ ᒐᒂᓐ ᑲ ᐃᓯ ᓂᑐᑎᒪᔭᒄ᙮ ᒋᑭ ᒋ ᑎᓇᐛᐤ ᐊ ᒐᒋ ᒥᓂᔭᒄ ᑕᓐ ᐊ ᐃᓯ ᑎᒂᒡ ᓂᒥᓂᒂᑭᓂᒡ ᒐ ᒥᓂᔭᓐ ᐊᓄᒡ᙮ ᒋᑭ ᒋ ᑎᓇᐛᐤ ᐊ ᒐᒋ ᓯᑲᐃᑕᑯᔭᒄ ᒧᔭᒻ ᓂᔾ ᑕᓐ ᒐ ᐃᓯ ᓯᑲᐃᑕᑯᔭᓐ ?” ᐊᑯ ᒂ ᐃᑎᑯᑦ, “ᓂᐦᐃ, ᓂᑭ ᒋ ᑎᓇᓐ᙮”

²³ ᐊᑯ ᒋᓴᔅ ᒂ ᐃᑕᑦ, “ᓂᐦᐃ, ᑕᑈ, ᐊᓐ ᒐ ᐃᓯ ᒥᓂᔭᓐ ᐊᐅᑯᓐ ᑭᔭ ᒋᔨᐛᐤ ᒐ ᐃᓯ ᒥᓂᔭᒄ, ᒋᑭ ᐸᐃᑯᑕᓇᓄᐤ ᐊᓐ ᒥᓂᒂᑭᓐ᙮ ᑭᔭ ᐊᓐ ᓯᑲᐃᑕᒐᐅᓐ ᒐ ᓯᑲᐃᑕᑯᔭᓐ ᐊᐅᑯᓐ ᐊᓐ ᑭᔭ ᒋᔨᐛᐤ ᒐ ᓯᑲᐃᑕᑯᔭᒄ᙮ ᒥᒄ ᒪᒃ ᓇᒪ ᓂᔾ ᓂᑭ ᒋ ᐅᑎᓇᐤ ᐊᐛᓐ ᒐ ᐎᑎᐱᒥᑦ ᐊᓐᑕ ᓂᒥᔪᐅᓂᒡ ᒪᒃ ᐊᓐᑕ ᓂᓂᔅᐸᒋᐅᓂᒡ᙮ ᐛᔅ ᐎᔾ ᓄᑕᐎᔾ ᒋ ᐅᑎᓇᐤ ᐊᓂᔭ ᐊᐛᔪᐛ ᐊᓐᑕ ᒐ ᐊᐱᔨᒋ᙮”

²⁴ ᐃᔅᐱ ᒪᒃ ᐊᓐᒡ ᑯᑎᑭᒡ ᐸᐃᑯᔪᐤ ᒋᔅᒋᓄᐊᒧᐛᑭᓐᒡ ᐱᔭᑕᒡ ᐅᔭ, ᒋ ᒋᔄᐃᑯᐅᒡ ᐊᓂᔭ ᓂᓱ ᑲ ᐎᐧᑲᓂᓯᑕᑐᔨᒋ᙮

²⁵ ᒋᓴᔅ ᒂ ᐎᓴᒪᑦ ᒥᓯᐛ ᐊᑯ ᒂ ᐃᑕᑦ, “ᒋ ᒋᔅᒐᔨᒪᐛᐅᒡ ᐊᓐᒡ ᑲ ᓂᑲᓂᔅᑯᐛᒡ ᐊᑲ ᒍᐤ ᐃᑎᔅᑲᓇᓯᔨᒋ ᑕᓐ ᐛ ᐃᓯ ᑎᑎᐸᔨᒪᒡ ᐊᓂᔭᔪᐛ ᐃᔪᐛ᙮ ᑭᔭ ᐎᔨᐛᐤ ᒪᒃ ᐊ ᑕᔨᒋ ᐊᓂᔭᔪᐛ ᓇᑲᓂᔅᑲᑯᒡ᙮

²⁶ ᒥᒄ ᒪᒃ ᐊᑲᐎᔾ ᒋᑭ ᐅᒋ ᐃᓯᓇᑯᓯᓇᐛᐤ ᒋᔨᐛᐤ᙮ ᐊᓐ ᐊᐛᓐ ᐊᓐᑕ ᐊ ᑎᓯᔭᒄ ᓇᑐᐛᔨᑎᒧᒂ ᒋᒋᐛ ᒐᒋ ᐃᑕᔨᑕᑯᓯᑦ ᐊᑯᔅ ᒋᑭ ᐃᑐᑎᒻ ᒐᒋ ᐊᑐᔅᒐᔅᑕᒄ᙮

²⁷ ᐊᑯ ᐊᓐ ᐊᐛᓐ ᑲ ᐎ ᓂᑲᓂᐱᐃᓱᑦ ᐊᐅᒄ ᒥᓯᐛ ᐊ ᑎᓯᔭᒄ ᒐ ᐅᑦ ᐊᐱᒋᐊᑭᓂᔭᒄ᙮

²⁸ ᒧᔭᒻ ᐃᔪᐤ ᐅᑯᓯᓴᓐ ᓇᒪ ᐅᒋ ᐸᒋ ᑎᑯᓯᓐ ᒐᒋ ᐊᑐᔅᑯᐛᑭᓄᐅᑦ, ᒋ ᑎᑯᓯᓐ ᒐᒋ ᐊᑐᔅᑯᐛᑦ ᐃᔪᐛ᙮ ᑭᔭ ᒋ ᑎᑯᓯᓐ ᒐᒋ ᐱᔅᑎᓇᐧᒃ ᐅᐱᒪᑎᓯᐅᓐ ᒥᔅᑯᒡ ᒥᒐᑦ ᐊᐛᔪᐛ ᒐᒋ ᐊᐱᐧᑯᓇᑭᓄᔨᒋ᙮”

ᒋᓴᔅ ᑲ ᒥᓏᒋᐊᑦ ᓂᓱ ᓇᐸᐛ ᐊᑲ ᐅᒋ ᐛᐸᑎᒥᔨᒋ

²⁹ ᐊᓂᔭ ᒪᒃ ᐊ ᐊᑎ ᓂᑭᑕᒡ ᒐᕆᑯᐤ ᒋᓴᔅ ᑭᔭ ᐅᒋᔅᒋᓄᐊᒧᐛᑭᓇ, ᒥᒐᑦ ᐊᐛᔪᐛ ᒋ ᓇᓴᐅᑯᐅᒡ᙮

³⁰ ᓂᓱ ᒪᒃ ᓇᐸᐅᒡ ᐊᑲ ᐛᐸᑕᒡ ᐊᓐᑕ ᐅᐱᒪᔅᑭᓇᒡ ᐊ ᐊᐱᒡ, ᒋ ᐸᑎᒧᒡ ᐊ ᐃᓇᓄᐎᒡ ᒋᓴᓴ ᐊ ᐱᒧᑕᔨᒋ, ᐊᑯ ᒂ ᑕᑈᒡ ᐊ ᐃᔅᒋᔄᒡ, “ᐅᑎᐸᔨᒋᒐᐤ, ᒋᔾ ᑎᐱᑦ ᑲ ᐅᑯᓯᑐᑕᔅᒃ, ᓇᒪᐎᔾ ᐊ ᒋᔅᑎᒪᓯᓄᐅᓇᓐ ?”

³¹ ᐊᓐᒡ ᒪᒃ ᐃᔪᒡ ᐛᔅᑲ ᐊᓐᑕ ᑲ ᑕᒡ ᒋ ᒋᑕᐊᒧᐛᐅᒡ ᐊᓂᔭ ᓇᐸᐛ, ᐊ ᐃᑕᒡ, “ᐊᑲ ᒪ ᒋᔅᑐᒄ᙮” ᐊᑯ ᒥᒄ ᐊᑐᐎᔅ ᓱᒃ ᒂ ᑕᑈᒡ ᐊᓐᒡ ᓇᐸᐅᒡ ᐊ ᐃᔅᒋᔄᒡ, “ᐅᑎᐸᔨᒋᒐᐤ, ᑎᐱᑦ ᑲ ᐅᑯᓯᑐᑕᔅᒃ, ᓇᒪᐎᔾ ᐊ ᒋᔅᑎᒪᓯᓄᐅᓇᓐ ?”

³² ᒋᓴᔅ ᒪᒃ ᒋ ᒋᐱᒋᑲᐳᐤ, ᒂ ᐎᓴᒪᑦ ᐊᓂᔭ ᓇᐸᐛ, ᒂ ᐃᑕᑦ, “ᒐᒂᓐ ᓇᑐᐛᔨᑎᒪᒄ ᒐᒋ ᐃᑐᑎᒪᑎᑯᒡ ?”

³³ ᒋ ᐃᑕᐅᒡ ᒪᒃ, “ᐅᑎᐸᔨᒋᒐᐤ, ᐃᑐᑐᐅᓇᓐ ᒪ ᒐᒋ ᐛᐸᑎᒪᒡ᙮”

³⁴ ᒋᓴᔅ ᒪᒃ ᒋ ᒋᔅᑎᒪᒐᔨᒪᐤ, ᒂ ᑕᒋᓂᒺᑦ ᐅᔅᒋᓯᑯᔪᐛ, ᑎᐛᒡ ᒪᒃ ᒋ ᐛᐸᑎᒥᔪᐛ, ᐊᑯ ᒂ ᐊᑎ ᓇᓴᐅᑯᑦ᙮