ᒪᑎᔪᐤ 18 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᐊᓐ ᐊᐛᓐ ᒪᐅᒡ ᓇᑲᓇᔨᑕᑯᔅᑦ ᒪᕐᒃ 9.33-37 ; ᓗᒃ 9.46-48 1 ᓇᓇᒐᓯᔅ ᒪᒃ ᐊᑯ ᒋᓴᔅ ᒂ ᐸᒋ ᓂᑐᐛᐱᒥᑯᑦ ᐊᓂᔭ ᐅᒋᔅᒋᓄᐊᒧᐛᑭᓇ, ᒂ ᑯᒂᒋᒥᑯᑦ ᐊ ᐃᑎᑯᑦ, “ᐊᐛᓐ ᒪᐅᒡ ᓇᑲᓇᔨᑕᑯᔅᑦ ᐊᓐᑕ ᒋᒋᒋᓯᒄ ᒋᓴᐅᒋᒪᐅᓂᒡ ?” 2 ᐊᑯ ᒋᓴᔅ ᒂ ᐎᓴᒪᑦ ᐊᐛᓴ, ᒂ ᐅᑎᔅᑯᑲᐳᐊᑦ ᐊᓐᑕ ᐊ ᑕᒡ᙮ 3 ᐊᑯ ᒂ ᐃᔅᒋᔄᑦ, “ᑕᑈ ᒋ ᐎᑎᒪᑎᓇᐛᐤ, ᒧᔭᒻ ᐊᑲ ᒂᔅᑲᑎᓯᔭᒂ ᐊᑲ ᐃᑕᔨᑕᑯᓯᔭᒂ ᒧᔭᒻ ᐊᐛᔅ ᐊ ᐃᑕᔨᑕᑯᓯᑦ, ᓇᒪ ᓂᑕ ᒋᑭ ᒋ ᐱᒐᓇᐛᐤ ᒋᒋᒋᓯᒄ ᒋᓴᐅᒋᒪᐅᓂᒡ᙮ 4 ᐊᓐ ᐊᐛᓐ ᒐ ᑎᐱᑕᔨᒥᓱᒂ ᑭᔭ ᒧᔭᒻ ᐊᐛᓴ ᒐ ᐃᑕᔨᑕᑯᓯᒂ ᐊᐅᒄ ᐊᓐ ᒪᐅᒡ ᒐ ᓂᑲᓇᔨᑕᑯᓯᑦ ᐊᓐᑕ ᒋᒋᒋᓯᒄ ᒋᓴᐅᒋᒪᐅᓂᒡ᙮ 5 ᐊᐛᓐ ᐊ ᐅᑎᓇᑦ ᐸᐃᒄ ᐊᐛᓴ ᓂᑦ ᐃᓯᓂᐧᑲᓱᐅᓂᒡ ᐅᒋ, ᒧᔭᒻ ᑭᔭ ᓂᔾ ᐊ ᐅᑎᓂᑦ ᐊᑯᓐ ᐊ ᐃᓯᓇᑯᓂᔨᒡ᙮” ᑕᓐ ᐊ ᐃᓯ ᑯᒂᒋᐃᑯᔭᐧᒄ ᒐᒋ ᒥᒋᑐᑎᒪᐧᒄ ᒪᕐᒃ 9.42-48 ; ᓗᒃ 17.1 , 2 6 “ᐊᓐ ᐊᐛᓐ ᒐ ᐃᑐᑐᐛᒂ ᒐᒋ ᒥᒋᑐᑎᒥᔨᒋ ᐸᐃᒄ ᐅᔭ ᐊᐛᓴ ᑲ ᑕᑈᔭᔨᒥᔨᒋ ᐃᐛᒃ ᒋᑭ ᒥᔽᔪᐤ ᒐᒋ ᒪᑯᐱᑕᑭᓄᔨᒋ ᐊ ᒥᒐᐱᔅᒋᓯᔨᒋ ᐊᓯᓂᔭ ᐅᑯᔭᒡ ᑭᔭ ᒐᒋ ᓂᔅᑕᐸᐛᑦ ᐊᓐᑕ ᐊ ᒋᔅᑲᑎᒥᔨᒡ ᐎᓂᐸᑯᒡ᙮ 7 ᑕᑈ ᒪᔭᑎᓇ ᒐᒂᔪᐛ ᐊ ᐃᓯ ᑎᒂᒋ ᐅᑕ ᐊᔅᒋᒡ ᐊᓐᑕ ᒐᒋ ᐅᒋ ᒥᒋᑐᑕᒡ ᐊᐛᓐᒋ᙮ ᒧᔅ ᒋᑭ ᑎᑯᓂᔪᐛ ᒐᒂᔪᐛ ᒐ ᑯᒂᒋᐃᑯᒡ ᐊᐛᓐᒋ ᒐᒋ ᒥᒋᑐᑕᒡ, ᒥᒄ ᒪᒃ ᒋᓴᒪᓂᑐᐤ ᒋᑭ ᐛᐛᓯᐊᐤ ᐊᓂᔭ ᑲ ᐃᑐᑐᐛᔨᒋ ᑯᑎᑲ ᐊᐛᔪᐛ ᒐᒋ ᒥᒋᑐᑎᒥᔨᒋ᙮” 8 “ᐃᑐᑕᑯᔨᓇ ᐸᐃᒄ ᔅᑎᒋᔾ ᑭᔭ ᒪᒃ ᒋᓯᑦ ᒐᒋ ᐅᓂᑐᑎᒥᓐ, ᒥᓂᓴ, ᒐ ᐛᐱᓂᒥᓐ᙮ ᐃᐛᒃ ᒥᔽᐤ ᒐᒋ ᐱᒐᔨᓐ ᐱᒪᑎᓯᐅᓂᒡ ᐊ ᒪᔅᒋᐱᔨᓐ ᑭᔭ ᒪᒃ ᐊ ᒪᔅᒋᓯᔨᓐ ᐃᔅᐱᔅ ᐎ ᒐᒋ ᐊᔭᔨᓐ ᓂᓱ ᒥᑎᒋᔭ ᑭᔭ ᓂᓱ ᒥᓯᑕ ᒐ ᐃᓯ ᐛᐱᓂᑯᔨᓐ ᒪᒃ ᐊᓐᑕ ᐃᔅ ᐊᓐ ᐃᔅᑯᑕᐤ ᒐ ᐊᑲ ᓂᑕ ᐊᔅᑐᐛᒡ᙮ 9 ᒪᒃ ᑭᔭ ᐃᑐᑕᑯᔨᓇ ᐸᐃᒄ ᒋᔅᒋᓯᒄ ᒐᒋ ᒥᒋᑐᑎᒥᓐ ᑯᐃᑯᐱᑕ, ᒐ ᐛᐱᓂᒥᓐ ᐊᓐ ᒋᔅᒋᓯᒄ᙮ ᐃᐛᒃ ᒥᔽᓱᐤ ᒐᒋ ᐱᒐᔨᓐ ᐱᒪᑎᓯᐅᓂᒡ ᐊ ᓂᐱᑕᔭᐱᔨᓐ, ᐃᔅᐱᔅ ᐎ ᑕᐱᔅᑯᓐ ᒋᔅᒋᓯᒂ ᒐᒋ ᐊᔭᔨᓐ ᒥᒋ ᐃᔅᑯᑕᒡ ᐊ ᐃᓯ ᐛᐱᓂᑯᔨᓐ᙮” ᒋᔅᑯᑎᒪᒐᐤ ᑎᐸᒋᒧᐅᓐ ᑲ ᐅᓂᓯᐧᒃ ᒪᔭᑕᓂᔅ ᑲ ᐊᔨᒧᒪᑭᓄᐅᑦ ᓗᒃ 15.3-7 10 “ᐃᔭᒂᒥᒄ ᒪᒃ ᒐ ᐊᑲ ᒋ ᐊᑐᐛᔨᒪᑯᒡ ᐅᒡ ᐊᐛᓯᒡ, ᐛᔅ ᒋ ᐎᑎᒪᑎᓇᐛᐤ, ᐅᑦ ᐊᓐᒋᓂᒧᐛᐛ ᒋᒋᒋᓯᑯᒡ ᐊ ᑕᔨᒋ ᒧᔅ ᐃᔨᒥᔅᑎᒪᑯᐅᒡ ᐊ ᐅᑎᔅᑯᑲᐳᔅᑐᐛᔨᒋ ᓄᑕᐎᔭ ᒋᒋᒋᓯᑯᒡ ᐊ ᑕᔨᒋ᙮ 11 ᐸᒋ ᓇᓂᑐᐛᐱᒪᐤ ᐃᔪᐤ ᐅᑯᓯᓴᓐ ᐊᓂᔭᔪᐛ ᐊᐛᔪᐛ ᑲ ᐅᓂᓯᓂᔨᒋ ᒐᒋ ᐱᒪᒋᐊᑦ᙮” 12 “ᒪᒥᑐᓇᔨᑎᒧᒄ ᒪ ᐅ, ᓇᐸᐤ ᐊᓐ ᐊᔭᐛᑦ ᐸᐃᑯ ᒥᑕᓯᒥᑎᓄᐤ ᒪᔭᑕᓂᓴ ᐸᐃᒄ ᒪᒃ ᐊᓂᔭ ᐅᓂᓯᓂᔨᒋ᙮ ᒋᑭ ᓂᑭᑕᐤ ᐊᓂᔭ ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᐊᓐᑕ ᐊ ᐱᔅᑯᑕᐅᐧᑲᔨᒡ, ᒐ ᓇᓂᑐᐛᐱᒪᑦ ᐊᓂᔭ ᐸᐃᒄ ᑲ ᐅᓂᓯᓂᔨᒋ ᒪᔭᑕᓂᓴ᙮ 13 ᐃᔅᐱ ᒪᒃ ᒪᔅᑯᐛᑦ, ᒋ ᐎᑎᒪᑎᓇᐛᐤ ᐅᔅᑕ ᒥᔽᔨᑎᒻ ᐅᔭ ᐸᐃᒄ ᐅᒪᔭᑕᓂᓯᒪ ᑲ ᐅᓂᓯᓂᔨᒋ ᐊ ᒥᔅᑯᐛᑦ ᐃᔅᐱᔅ ᐎ ᐊᒋ ᐊᔭᐛᑦ ᐊᓂᔭ ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᒪᔭᑕᓂᓴ ᐊᑲ ᐅᒋ ᐅᓂᓯᓂᔨᒋ᙮ 14 ᐊᐅᑯᓐ ᒪᒃ ᒧᔭᒻ ᑭᔭ ᓄᑕᐎᔾ ᒋᒋᒋᓯᑯᒡ ᐊ ᑕᑦ ᐊ ᐃᑎᑦ, ᓇᒪ ᓂᑐᐛᔨᒪᐤ ᐛᐛᒡ ᐸᐃᒄ ᐅᔭ ᐊᐛᓴ ᒐᒋ ᐅᓂᓯᓂᔨᒋ᙮” ᑕᓐ ᒐ ᐃᑐᑐᐅᑦ ᒋᐧᑲᓂᔅ ᐊ ᐅᓂᑐᑕᔅᒃ Matthew 18.15-20 (Proper-18 Year A) 15 “ᐅᓂᑐᑕᔅᒐ ᒋᐧᑲᓂᔅ, ᓂᑐᐛᐱᒻ ᒐ ᐎᑎᒧᐅᑦ ᑕᓐ ᐊ ᐃᓯ ᐅᓂᑐᑕᔅᒃ, ᒥᒄ ᒋᔨᐛᐤ ᐊ ᓂᓯᔭᒄ ᒐ ᐎᑎᒧᐅᑦ ᐅᔭ᙮ ᓂᑐᑕᔅᒐ ᒪᒃ, ᐊᑯ ᑭᑈ ᒥᓐ ᒐ ᒥᔪᐱᔭᒄ ᐊ ᐎᐧᑲᓂᓯᑕᑐᔭᒄ᙮ 16 ᐊᑲ ᒪᒃ ᓂᑐᑕᔅᒐ ᐊᑯ ᒥᓐ ᑯᑎᒃ ᐊᐛᓐ ᑭᔭ ᒪᒃ ᓂᓱ ᐊᐛᓐᒋ ᒐ ᐎᓴᒥᑥᐤ ᒐᒋ ᐎᒐᐅᔅᒡ ᒐᒋ ᐸᑕᔅᒡ ᑕᓐ ᐊ ᐃᓯ ᐃᔨᒥᐃᒥᑎ, ᐊᑯ ᑭᔭ ᐎᔨᐛᐤ ᒐᒋ ᐃᔨᒪᐊᒡ᙮ ᐛᔅ ᒥᓯᐛ ᑕᓐ ᐊᑎᔅᑕᒡ ᐊᓐᑕ ᒥᓯᓇᐃᑭᓂᒡ ᒥᓯᐛ ᒐᒂᓐ ᐊᑯᓐ ᒐ ᐃᓯᓇᒂᒡ ᑕᓐ ᐊᓂᔭ ᑲ ᐃᔅᒋᔄᒡ ᐊᓐᒡ ᓂᓱ ᑭᔭ ᒪᒃ ᓂᔅᑐ ᑲ ᐎᓴᒪᑭᓄᐎᒡ ᒐᒋ ᓂᑐᑐᐛᒡ᙮ 17 ᐊᑲ ᒪᒃ ᓂᑐᑕᒐ ᑭᔭ ᐊᑲ ᓂᑐᑐᐛᒐ ᐊᓂᔭ ᑯᑎᑲ ᐊᐛᔪᐛ, ᐊᑯ ᒐ ᐎᑎᒧᒥᑎ ᐅᒪᒧᐊᔭᒥᐊᐛ ᑕᓐ ᑲ ᐃᓯ ᒥᒋᑐᑕᔅᒃ, ᐊᑲ ᒪᒃ ᓂᑐᑐᐛᒐ ᑭᔭ ᐊᓂᔭ ᐅᒪᒧᐊᔭᒥᐊᐛ ᐊᑲ ᐎ ᒋᑭ ᐅᒋ ᐊᐱᑕᔨᒪᑭᓄᐤ ᒧᔭᒻ ᐊᐛᓐ ᐊᑲ ᒋᔅᒐᔨᒪᑦ ᒋᓴᒪᓂᑐᐛ ᐊᑯᓐ ᒐ ᐃᓯ ᑭᓄᐛᐱᒪᑭᓄᐅᑦ ᑭᔭ ᒪᒃ ᐊᐛᓐ ᐊᑲ ᐎ ᒂᔅᑲᑎᓯᑦ ᐊᑯᓐ ᒐ ᐃᓯ ᑭᓄᐛᐱᒪᑭᓄᐅᑦ᙮” 18 “ᐛᔅ ᑕᑈ ᒋ ᐎᑎᒪᑎᓇᐛᐤ, ᐊᓐ ᒐᒂᓐ ᒐ ᒪᑯᐱᑎᒧᐎᓇ ᐅᑕ ᐊᔅᒋᒡ ᒋᑭ ᒪᑯᐱᑕᑭᓄᐤ ᐊᓐᑕ ᒋᒋᒋᓯᑯᒡ, ᑭᔭ ᐊᓐ ᒐᒂᓐ ᒐ ᐊᐱᐧᑯᓂᒧᐎᓇ ᐅᑕ ᐊᔅᒋᒡ ᒋᑭ ᐊᐱᐧᑯᓇᑭᓄᐤ ᐊᓐᑕ ᒋᒋᒋᓯᑯᒡ᙮” 19 “ᒥᓐ ᒋ ᐎᑎᒪᑎᓇᐛᐤ, ᓂᓱ ᐊᐛᓐᒋ ᑕᐱᔅᑯᓐ ᐊ ᐃᑕᔨᑎᒥᐃᑯᒡ ᒐᒂᔪᐤ ᑕᓐ ᐊ ᐃᓯ ᓂᑐᑎᒪᒡ ᐊᐅᑯᓐ ᐊᓐ ᒐ ᐃᓯ ᐃᑐᑎᒪᑯᒡ ᓄᑕᐎᔭ ᒋᒋᒋᓯᑯᒡ ᐊ ᑕᔨᒋ᙮ 20 ᐛᔅ ᐊᑎ ᒥᒄ ᓂᓱ ᑭᔭ ᒪᒃ ᓂᔅᑐ ᐊᐛᓐᒋ ᒪᐅᒋᐃᑐᑥᐛ ᓂᑦ ᐃᓯᓂᐧᑲᓱᐅᓂᒡ ᐅᒋ, ᐊᑯᑕ ᑭᔭ ᓂᔾ ᒐ ᑕᔭᓐ᙮” ᒋᓴᔅ ᑲ ᑎᐸᒋᒪᑦ ᐊᐱᒋᐊᑭᓇ ᐊᑲ ᐎ ᐛᐸᔨᑎᒧᐛᔨᒋ ᐎᒋ ᐊᐱᒋᐊᑭᓂᔪᐛ Matthew 18.21-35 (Proper-19 Year A) 21 ᐊᑯ ᐱᑕᕐ ᒂ ᐸᒋ ᓂᑐᐛᐱᒪᑦ ᒋᓴᓴ ᒋ ᐃᑕᐤ, “ᐅᑎᐸᔨᒋᒐᐤ, ᓂᐧᑲᓂᔅ ᒪᒃ ᐎᔾ ᐊᑲ ᐳᓂᒐ ᐊ ᐸᒋ ᐅᓂᑐᑐᐅᑦ, ᑕᓐ ᑕᑥᐤ ᒐ ᐛᐸᔨᑎᒧᐅᒃ, ᓂᔄᐅᑕᒡ ᑕᑥᐤ ᐊ ?” 22 ᐊᑯ ᒋᓴᔅ ᐊᑕᑦ, “ᓇᒪ ᓂᔄᐅᑕᒡ ᑕᑥᐤ, ᒥᒄ ᒋᑦ ᐃᑎᓐ ᒪᒃ, ᓂᔄᐅᑕᒡ ᑕᑐᔪᐤ ᐊᓱ ᓂᔄᐅᑕᒡ ᑕᑥᐤ ᒋᐸ ᐛᐸᔨᑎᒧᐛᐤ ᑕᓐ ᐊ ᐃᓯ ᐅᓂᑐᑕᔅᒃ᙮” 23 “ᐛᔅ ᒪᐅ ᐊ ᐃᓯᓇᒂᒡ ᒋᒋᒋᓯᒄ ᒋᓴᐅᒋᒪᐅᓐ᙮ ᒧᔭᒻ ᒋᓴᐅᒋᒪᐤ ᐊᒋ ᓂᑐᐛᔨᒪᑦ ᐅᑦ ᐊᐱᒋᐊᑭᓇ ᑲ ᒥᓯᓇᐊᒪᑯᑦ ᒐᒋ ᐱᑯᓯᓇᐃᒐᔨᒋ, 24 ᐊᓂᔭ ᒪᒃ ᑲ ᐎ ᐃᑐᑕᐧᒃ ᒥᓯᐛ ᒋ ᐎᓴᒪᐤ ᐊᓂᔭ ᑲ ᒥᓯᓇᐊᒪᑯᑦ ᐅᑦ ᐊᐱᒋᐊᑭᓇ᙮ ᐊᑯ ᒂ ᐅᒋ ᐸᓱᐛᑭᓄᔨᒋ ᐸᐃᒄ ᐊᓂᔭ ᐅᑦ ᐊᐱᒋᐊᑭᓇ ᐸᐃᑯᔪᐤ ᑕᑥᐤ ᒐᓯᐱᔪᐤ ᑲ ᐃᔅᐱᔅ ᒥᓯᓇᐊᒪᑯᑦ᙮ 25 ᐊᓂᔭ ᒪᒃ ᐅᑦ ᐊᐱᒋᐊᑭᓇ ᐊᑲ ᐅᒋ ᐃᔅᐱᔅ ᐊᔭᔨᒋ ᓱᓇᔭᔪᐤ ᒐᒋ ᐱᑯᓯᓇᐊᒪᑯᑦ ᐊᓂᔭ ᑲ ᒥᓯᓇᐊᒪᑯᑦ, ᐊᑯ ᒂ ᐃᑎᓱᐛᑦ ᐊᓐ ᒋᓴᐅᒋᒪᐤ ᒐᒋ ᐊᑕᐛᒐᓄᔨᒋ ᐊᓂᔭ ᐅᑦ ᐊᐱᒋᐊᑭᓇ ᑭᔭ ᒥᓯᐛ ᑕᓐ ᐊ ᐃᓯ ᑎᐱᔨᐛᐅᓯᔨᒋ ᑭᔭ ᐅᑦ ᐊᐛᓯᒥᔪᐛ ᑭᔭ ᐎᒋᒪᑭᓂᔪᐛ ᐊᓐᑕ ᑯᑎᑲ ᐊᐛᔪᐛ ᒐᒋ ᐅᑎᓂᑯᔨᒋ ᒐᒋ ᐅᑦ ᐊᐱᒋᐊᑭᓂᑐᑕᑯᔨᒋ᙮ ᐊᑯᑕ ᒋᐸ ᐅᒋ ᐱᑯᓯᓇᐃᒐᔪᐛ ᐊᓂᔭ ᓱᓇᔭᔪᐤ ᑕᓐ ᑲ ᐃᔅᐱᔅ ᒥᓯᓇᐊᒪᑯᑦ ᐊᓐ ᒋᓴᐅᒋᒪᐤ᙮” 26 “ᐊᑯ ᐊᓂᔭ ᐅᑦ ᐊᐱᒋᐊᑭᓇ ᒂ ᐅᒋᒋᐧᑯᓂᐱᔪᐅᔨᒋ ᐊᓐᑕ ᐅᑎᔅᑯᐤ ᐊᑕᑦ ᒋᓴᐅᒋᒪᐤ, ᐊᑯ ᒂ ᐃᑎᑯᑦ, ‘ᐅᒋᒪᐤ ᐊᑲᐎᔾ ᐸᑎᒪ ᐸᒋ ᒋᔄᓯᔅᑐᐎ ᐊᓱᐛᐱᒥ ᒪ, ᒥᓐ ᐛᐃᐱᔅᒋᔅ ᐊᑯ ᒥᓯᐛ ᒐ ᐱᑯᓯᓇᒪᑕᓐ ᑕᓐ ᐊᔅᐱᔅ ᒥᓯᓇᐊᒥᑕᓐ ᒐᒂᓐ᙮’ ” 27 ᐊᑯ ᐊᓐ ᒋᓴᐅᒋᒪᐤ ᒋ ᒋᔅᑎᒪᒐᔨᒪᐤ ᐊᓂᔭ ᐅᑦ ᐊᐱᒋᐊᑭᓇ ᑭᔭ ᒋ ᐃᑕᐤ ᐊᑲ ᐊᑯᔅ ᒐ ᐱᑯᓯᓇᐊᒪᑯᑦ ᐊᓂᔭ ᑕᓐ ᑲ ᐃᔅᐱᔅ ᒥᓯᓇᐊᒪᑯᑦ, ᐊᑯ ᑭᔭ ᒂ ᐱᔅᑎᓇᑦ᙮ 28 ᐊᑯ ᐊᓐ ᐊᐱᒋᐊᑭᓐ ᒂ ᔅᑐᑕᑦ, ᒂ ᓂᒋᔅᑯᐛᑦ ᐎᒋ ᐊᐱᒋᐊᑭᓇ ᐊᒋ ᒥᓯᓇᐊᒪᑯᑦ ᐊᐱᓯᔅ ᓱᓇᔭᔪᐤ᙮ ᐊᑯ ᒂ ᒪᑯᓇᑦ ᐊ ᐎ ᒋᐳᑕᒥᓇᑦ ᒂ ᐃᑕᑦ, “ᒪᒋ ᐸᒋ ᒋᐛ ᒥᔾ ᐊᓐ ᓱᓇᔭᐤ ᑕᓐ ᑲ ᐃᔅᐱᔅ ᒥᓯᓇᐊᒧᔨᓐ᙮” 29 ᐊᑯ ᐊᓂᔭ ᐎᒋ ᐊᐱᒋᐊᑭᓇ ᒋ ᐅᒋᒋᐧᑯᓂᐱᔪᐅᔪᐛ ᐅᑎᔅᑯᐤ ᐊ ᑕᑦ ᐊ ᐃᑎᑯᑦ, “ᐊᑲᐎᔾ ᐸᑎᒪ ᐸᒋ ᒋᔄᓯᔅᑐᐎ ᐊᓱᐛᐱᒥ ᒪ, ᒥᓐ ᐛᐃᐱᔅᒋᔅ ᒐᒋ ᒋᐛᒥᔨᑕᓐ ᐊᓐ ᑕᓐ ᑲ ᐃᔅᐱᔅ ᒥᓯᓇᐊᒪᑕᓐ᙮” 30 ᒥᒄ ᒪᒃ ᓇᒪ ᐅᒋ ᓂᑐᑐᐛᐤ ᐊᓂᔭ ᐎᒋ ᐊᐱᒋᐊᑭᓇ, ᐊᑯ ᒂ ᐃᑎᓱᐛᑕᑦ ᒐᒋ ᒪᑯᓇᑭᓄᔨᒋ ᐸᑐᔅ ᒋ ᐱᑯᓯᓇᐊᒪᑯᒐ ᑕᓐ ᐊᓂᔭ ᑲ ᐃᔅᐱᔅ ᒥᓯᓇᐊᒪᑯᑦ᙮ 31 ᐃᔅᐱ ᒪᒃ ᐊᓐᒡ ᑯᑎᑭᒡ ᐊᐱᒋᐊᑭᓐᒡ ᐎᔭᐸᑕᒡ ᐅᔭ ᐊ ᐃᔅᐱᔨᒡ, ᓇᔅᒡ ᒋ ᒥᑯᔅᑲᑕᔨᑎᒥᐃᑯᐅᒡ ᐊᑯ ᒂ ᐎᑎᒧᐛᒡ ᐊᓂᔭ ᒋᓴᐅᒋᒪᐛ ᒥᓯᐛ ᑕᓐ ᑲ ᐃᔅᐱᔨᒡ᙮ 32 ᐊᑯ ᐊᓐ ᒋᓴᐅᒋᒪᐤ ᒂ ᐎᓴᒪᑦ ᐊᓂᔭ ᐅᑦ ᐊᐱᒋᐊᑭᓇ, ᒂ ᐃᑕᑦ, “ᒋᔾ ᐊᐱᒋᐊᑭᓐ ᑕᑈ ᒋᒥᒋᑐᑕᓐ, ᓇᒪ ᓇᔅᒡ ᒋ ᐅᒋ ᒋᐛ ᓂᑐᐛᔨᑎᒪᑎᓐ ᐛᔅ ᒋᔾ ᔅᒋ ᐱᑯᓴᔨᒥᓐ ᒐᒋ ᒋᔅᑎᒪᒐᔨᒥᑕᓐ᙮ 33 ᓇᒪᐎᔾ ᐊ ᒪᒃ ᒋᐸ ᐅᒋ ᒋᔅᑎᒪᒐᔨᒪᐤ ᐊᓐ ᐊᐱᒋᐊᑭᓐ ᒧᔭᒻ ᓂᔾ ᑲ ᐃᓯ ᒋᔅᑎᒪᒐᔨᒥᑕᓐ ?” ᐊᔪᐅᒄ ᐅᔭ ᑲ ᐃᑕᑦ ᒋᓴᐅᒋᒪᐤ ᐊᓂᔭ ᐅᑦ ᐊᐱᒋᐊᑭᓇ᙮ 34 ᓇᔅᒡ ᒪᒃ ᒋ ᒋᔄᓯᔪᐛ ᒋᓴᐅᒋᒪᐛ ᐊᑯ ᒂ ᐃᑎᓱᐛᔨᒋ ᒐᒋ ᒪᑯᓇᑭᓄᐅᑦ ᐊᐱᒋᐊᑭᓐ ᒐᒋ ᓂᓇᐧᑲᒋᐊᑭᓄᐅᑦ ᐸᑐᔅ ᒥᓯᐛ ᒋ ᐱᑯᓯᓇᐃᒐᒐ ᑕᓐ ᒥᓯᐛ ᑲ ᐃᓯ ᒥᓯᓇᐃᒐᑦ᙮ 35 ᐊᑯ ᒋᓴᔅ ᒥᓐ ᒂ ᐃᔅᒋᔄᑦ, “ᐊᐅᑯᓐ ᒪᒃ ᒧᔭᒻ ᒐ ᐃᑐᑕᑕᐧᒄ ᓄᑕᐎᔾ ᒋᒋᒋᓯᑯᒡ ᐊ ᑕᑦ, ᐊᑲ ᐛᐸᔨᑎᒧᐛᒂᓂᒋ ᒋᐧᑲᓂᓱᐛᐅᒡ ᒋᑕᐃᐛᒡ ᐅᒡ᙮” |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.