ᒪᑎᔪᐤ 13 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᓇᐸᐤ ᑲ ᓂᑕᐅᒋᑕᑦ ᓂᑕᐅᒋᑕᑭᓇ ᑲ ᑎᐸᒋᒪᑭᓄᐅᑦ Matthew 13.1-9,18-23 (Proper-10 Year A) ᒪᕐᒃ 4.1-9 ; ᓗᒃ 8.4-8 1 ᐊᓂᔭ ᒪᒃ ᐸᐃᑯᑕᐤ ᐊ ᒋᓯᑲᔨᒡ ᒋᓴᔅ ᒋ ᓂᑭᑎᒻ ᐊᓂᔭ ᒥᒋᐛᐱᔪᐤ ᐊᓐᑕ ᑲ ᑕᑦ, ᐊᑯ ᐊᓐᑕ ᓇᓯᐸᑎᒥᒡ ᒂ ᐃᑐᑕᑦ ᐊᑯ ᐊᓐᑕ ᓯᓱᒡ ᒂ ᐛᐛᔨᐱᑦ᙮ 2 ᓇᔅᒡ ᒪᒃ ᒋ ᐊᑎ ᒥᒐᑎᔪᐛ ᐊᐛᔪᐛ ᐊ ᐸᒋ ᒪᒧᐎᔨᒋ ᐊᓐᑕ ᐊ ᑕᑦ, ᐊᑯᑕ ᒂ ᐳᓯᑦ ᐅᐤᑎᔪᐤ ᐊᑯᑕ ᒪᒃ ᐊᓐᑕ ᑲ ᐊᐱᑦ, ᐊᑯ ᐊᓂᔭ ᐊᐛᔪᐛ ᐊᓐᑕ ᓯᓱᒡ ᒋ ᓂᐳᔪᐛ᙮ 3 ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᒪᒃ ᒋ ᐊᐱᒋᑕᐤ ᒋᓴᔅ ᐊ ᐛᐎᑎᒧᐛᑦ ᒥᒐᑦ ᒐᒂᔪᐛ, ᐊᑯ ᐊᑕᑦ, “ᐸᐃᒂᐤ ᓇᐸᐤ ᒋ ᓂᑕᐅᒋᑕᐤ ᐊᓐᑕ ᐅᓂᑕᐅᒋᑕᑭᓐ ᐊᔅᒋᒡ᙮ 4 ᐊᓂᔭ ᒪᒃ ᐊ ᐛᓴᔄᐱᓇᐧᒃ ᓂᑕᐅᒋᑕᑭᓇ ᐱᔅᒐ ᐊᓐᑕ ᐱᑎᑕᔅᑭᓄᐤ ᒋ ᐸᐸᒋᑎᓂᔪᐛ, ᐊᑯ ᐱᔭᓯᓴ ᒥᓯᐛ ᑲ ᒥᒋᔨᒋ᙮ 5 ᑯᑎᑲ ᓂᑕᐅᒋᑕᑭᓇ ᐊᓐᑕ ᐊ ᐊᓯᓂᐅᔨᒡ ᒋ ᐸᐸᒋᑎᓂᔪᐛ, ᐊᓐᑕ ᐊᑲ ᒥᔅᑎ ᐊᔅᒋᐎᒡ, ᐎᐱᒡ ᒪᒃ ᒋ ᓴᒋᓂᑕᐅᒋᓂᔪᐛ ᐛᔅ ᑕᐸ ᐅᒋ ᒋᔅᐱᑲᐤ ᐊᓐᑕ ᐊᔅᒋᔾ᙮ 6 ᐃᔅᐱ ᒪᒃ ᓯᔭᑲᔅᑐᐛᒋ ᐱᓯᒻ ᒋ ᐃᔎᑕᔪᐛ ᐊᓂᔭᔪᐛ ᓂᑕᐅᒋᑕᑭᓇ᙮ ᒐᒃ ᒋ ᐊᑎ ᓂᐱᒥᑭᓇ ᐛᔅ ᑕᐸ ᐅᒋ ᐅᑎᐱᒥᑭᓇ᙮ 7 ᐊᑯ ᐱᔅᒐ ᐊᓂᔭ ᓂᑕᐅᒋᑕᑭᓇ ᑲ ᐸᐸᒋᑎᓂᔨᒋ ᐊᓐᑕ ᑲ ᑲᓱᑕᐛᔅᑯᒋ ᓂᐱᓯᔭᑎᑯᒡ ᐊ ᑎᑯᓂᔨᒋ, ᐊᑯᑕ ᐊᓐᑕ ᒐᒃ ᑲ ᐊᑎ ᐊᓯᒡ ᓂᑕᐅᒋᒋ᙮ ᒐᒃ ᒪᒃ ᓇᒪ ᐅᒋ ᒥᔪ ᓂᑕᐅᒋᓇ ᐊᓂᔭ ᑲ ᓂᑕᐅᒋᑕᑭᓄᐅᒋ ᐊᒋ ᒋᐱᔅᑲᑐᒥᑲᒋ ᐊᓂᔭ ᑲ ᑲᓱᑕᐛᔅᑯᒋ ᓂᐱᓯᔭᑎᒂ᙮ 8 ᐱᔅᒐ ᒪᒃ ᐊᓂᔭ ᓂᑕᐅᒋᑕᑭᓇ ᐊ ᒥᔪᔅᑭᒥᑲᔨᒡ ᐊᑯᑕ ᑲ ᐃᓯ ᐸᐸᒋᑎᓂᔨᒋ, ᒋ ᒥᔪ ᓂᑕᐅᒋᓇ ᐅᔭ ᑭᔭ ᒂ ᒥᔪ ᒥᓂᓱᔨᒋ᙮ ᐱᔅᒐ ᒪᒃ ᐸᐃᑯ ᒥᑕᓯᒥᑎᓄᐤ ᒋ ᓂᑕᐅᒋᓇ ᐸᐃᒄ ᓂᑕᐅᒋᑕᑭᓐ ᐅᒋ, ᐊᑯ ᑯᑎᑲ ᐊᓱᑕᒡ ᑕᑐᔪᐤ ᒋ ᓂᑕᐅᒋᓇ ᐊᑯ ᑯᑎᑲ ᓂᔅᑐᔪᐤ ᒋ ᓂᑕᐅᒋᓇ ᐸᐃᒄ ᓂᑕᐅᒋᑕᑭᓐ ᐅᒡ᙮” 9 ᐊᑯ ᒋᓴᔅ ᒂ ᐊᑎ ᐃᑕᑦ, “ᐊᓐ ᐊᐛᓐ ᑲ ᐎᑐᐅᑲᑦ ᐊ ᓂᓇᐃᑕᐧᒃ ᒪᒃ, ᐃᔭᒂ ᒋᑭ ᐎ ᓂᑐᑎᒻ ᑭᔭ ᒋᑭ ᐎ ᓂᔅᑐᑎᒻ᙮” ᐊ ᐃᑎᑕᒂᒋ ᒋᔅᑯᑎᒪᒐᐤ ᑎᐸᒋᒧᐅᓇ ᒪᕐᒃ 4.10-12 ; ᓗᒃ 8.9 , 10 10 ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒂ ᓇᑕᒡ ᒋᓴᓴ ᐊᑯ ᒂ ᑯᒂᒋᒪᒡ, “ᒐᒂᓐ ᐛᒋ ᐎᑎᒥᓐ ᒋᔅᑯᑎᒪᒐᐤ ᑎᐸᒋᒧᐅᓇ ᐊ ᐃᔨᒥᐃᑥᐤ ᐊᐛᓐᒋ ?” 11 ᐊᑯ ᒋᓴᔅ ᐊᑕᑦ, “ᔅᒋ ᒥᔨᑯᓇᐛᐤ ᒋᔨᐛᐤ ᒐᒋ ᒋᔅᒐᔨᑎᒪᒄ ᐊᓐ ᒐᒂᓐ ᑯᑎᑭᒡ ᐊᐛᓐᒋ ᐊᑲ ᒪᔭᑭᓄᐎᒡ ᒐᒋ ᒋᔅᒐᔨᑕᒡ, ᐊᐅᒄ ᒐᒋ ᒋᔅᒐᔨᑎᒪᒄ ᒋᒋᒋᓯᒄ ᐅᒋᒪᐅᓐ᙮ ᐎᔨᐛᐤ ᒪᒃ ᓇᒪ ᐅᒋ ᐱᔅᑎᓇᑭᓄᐎᒡ ᐊᓂᔭ ᒐᒋ ᐃᓯ ᒋᔅᒐᔨᑕᒡ᙮ 12 ᐛᔅ ᐊᓐ ᐊᐛᓐ ᑲ ᐊᔭᑦ ᓂᔅᑐᑎᒧᐅᓂᔪᐤ ᐊᑐᐎᔅ ᒥᔅᑎ ᒋᑭ ᒥᔭᑭᓄᐤ ᒐᒋ ᓂᔅᑐᑕᐧᒃ ᐊᑯ ᐊᓐ ᐊᐛᓐ ᐊᑲ ᓂᔅᑐᑕᐧᒃ ᒋᑭ ᐅᑎᓇᑭᓄᐅᔪᐤ ᐛᐛᒡ ᐊᓂᔭ ᐊᐱᓯᔅ ᑲ ᐃᓯ ᓂᔅᑐᑕᐧᒃ᙮ 13 ᐊᐅᒄ ᒪᒃ ᐊᓂᔭ ᐛᒋ ᐎᑎᒧᐅᒂᐤ ᒋᔅᑯᑎᒪᒐᐤ ᑎᐸᒋᒧᐅᓇ ᐊ ᐃᔨᒥᐃᒂᐤ, ᐛᔅ ᐊᑎ ᐸᒋ ᑭᓄᐛᐱᒥᒡ ᑕᓐ ᐊ ᐃᑐᐅᒡ ᓇᒪ ᒋ ᓂᔅᑐᐅᓂᒧᒡ ᑭᔭ ᐊ ᐸᑐᐅᒡ ᑕᓐ ᐊ ᐃᔅᒋᔄᐅᒡ ᓇᒪ ᒋ ᓂᔅᑐᑎᒧᒡ᙮ 14 ᒧᔭᒻ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᑲ ᐃᔅᒋᔄᒂ, ᐅᒡ ᐃᔪᒡ ᒋᑭ ᐸᑎᒧᒡ, ᓇᒪ ᒥᒄ ᒋᑭ ᐅᒋ ᓂᔅᑐᑎᒧᒡ, ᒋᑭ ᐛᐸᑎᒧᒡ, ᓇᒪ ᒥᒄ ᒋᑭ ᐅᒋ ᓂᔅᑐᐅᓂᒧᒡ᙮ 15 ᐛᔅ ᓇᒪ ᐎ ᒪᒥᑐᓇᔨᑎᒥᐃᑯᐅᒡ ᑭᔭ ᓇᒪ ᐎ ᓂᑐᑎᒧᒡ ᑭᔭ ᓇᒪ ᐎ ᓂᔅᑐᑎᒧᒡ ᑭᔭ ᓇᒪ ᐎ ᐛᐸᑎᒧᒡ᙮ ᐊᑲ ᒪᒃ ᐅᒋ ᐃᑎᒡ ᐅᔭ ᒋᐸ ᐛᐸᑎᒧᒡ, ᒋᐸ ᐸᑎᒧᒡ ᑭᔭ ᒋᐸ ᓂᔅᑐᑎᒧᒡ, ᑭᔭ ᓂᐸ ᐸᒋ ᓂᑐᐛᐱᒥᑯᒡ, ᒋ ᐃᑕᐤ ᒋᓴᒪᓂᑐᐤ ᑭᔭ ᓂᐸ ᒥᓏᒋᐊᐅᒡ᙮” 16 “ᒋᔨᐛᐤ ᒪᒃ ᔅᒋ ᓱᐛᔨᒥᑯᐛᐤ ᒋᓴᒪᓂᑐᐤ ᐛᔅ ᒋ ᓂᔅᑐᓇᓇᐛᐤ ᑕᓐ ᐊ ᐃᓯ ᐛᐸᑎᒪᒄ ᑭᔭ ᒋ ᓂᔅᑐᑕᓇᐛᐤ ᑕᓐ ᐊ ᐃᓯ ᐸᑎᒪᒄ᙮ 17 ᒋ ᐎᑎᒪᑎᓇᐛᐤ, ᐊᓐᑕ ᐸᒡ ᒋ ᒥᒐᑐᐅᒡ ᐅᒋᔅᒋᐛᐃᒐᓱᒡ ᑭᔭ ᒋ ᒥᒐᑐᐅᒡ ᐅᑯᐃᔅᑯᑕᑎᓯᐅᒡ ᐊᒋ ᐱᑯᓴᔨᑕᒡ ᒐᒋ ᐛᐸᑕᒡ ᑕᓐ ᐊ ᐃᓯ ᐛᐸᑎᒪᒄ, ᓇᒪ ᒪᒃ ᐅᒋ ᐛᐸᑎᒧᒡ ᑭᔭ ᒋ ᐱᑯᓴᔨᑎᒧᒡ ᒐᒋ ᐸᑕᒡ ᑕᓐ ᐊ ᐃᓯ ᐸᑎᒪᒄ, ᓇᒪ ᒪᒃ ᐅᒋ ᐸᑎᒧᒡ᙮” ᐊ ᐃᓯ ᐎᑎᒪᒐᒥᑲᒡ ᐅ ᒋᔅᑯᑎᒪᒐᐤ ᑎᐸᒋᒧᐅᓐ Matthew 13.1-9,18-23 (Proper-10 Year A) ᒪᕐᒃ 4.13-20 ; ᓗᒃ 8.11-15 18 “ᒋᔨᐛᐤ ᓂᒋᔅᒋᓄᐊᒧᐛᑭᓐᒡ ᒋᑭ ᐎᑎᒪᑎᓇᐛᐤ ᑕᓐ ᓇᐊᐤ ᐊ ᐃᓯ ᐎᑎᒪᒐᒥᑲᒡ ᐊᓐ ᒋᔅᑯᑎᒪᒐᐤ ᑎᐸᒋᒧᐅᓐ ᑲ ᑎᐸᒋᒧᔭᓐ ᓇᐸᐤ ᑲ ᓂᑕᐅᒋᐊᑦ ᓂᑕᐅᒋᑕᑭᓇ᙮ 19 ᐊᓐ ᒪᒃ ᐊᐛᓐ ᑲ ᐸᑕᐧᒃ ᐊᓂᔭ ᒥᔽᒋᒧᐅᓂᔪᐤ ᐊ ᐊᔨᒧᑕᑭᓄᔨᒋ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᐊᑲ ᒪᒃ ᓂᔅᑐᑎᒧᒂ, ᒧᔭᒻ ᐊᓐ ᓂᑕᐅᒋᑕᑭᓐ ᐊᓐᑕ ᐅᐱᒪᔅᑭᓄᐤ ᑲ ᐸᒋᓯᐧᒃ ᐊᐅᑯᓐ ᐊ ᐃᓯᓇᑯᓯᑦ, ᒥᒋᒥᓂᑐᐛ ᒥᔅᑭᒥᑯᐤ ᑕᓐ ᑲ ᐃᓯ ᐸᑕᐧᒃ ᑭᔭ ᓇᒪ ᒋ ᓂᑕᐅᒍᐤ ᐊᓐᑕ ᒋᓴᒪᓂᑐᐛ ᐃᔅ ᐊ ᑕᔨᒋ᙮ 20 ᐊᑯ ᐊᓐ ᓂᑕᐅᒋᑕᑭᓐ ᐊᓐᑕ ᐊ ᐊᓯᓂᐅᔨᒡ ᑲ ᐸᒋᓯᐧᒃ ᒧᔭᒻ ᐊᐅᒄ ᐊ ᐃᓯᓇᑯᓯᒡ ᐃᔪᒡ ᐎᐱᒡ ᐊ ᐊᑎ ᐸᑕᒡ ᐊᓂᔭ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᑎᐛᒡ ᒂ ᐊᑎ ᐅᑎᓇᒡ, ᓇᔅᒡ ᒪᒃ ᒥᒧᒋᒐᔨᑎᒥᐃᑯᐅᒡ᙮ 21 ᒧᔭᒻ ᒪᒃ ᐊᓐ ᓂᑕᐅᒋᑕᑭᓐ ᐊᑲ ᔭᐃᒡ ᓂᑕᐅᒋᓂᔨᒋ ᐅᑎᐱᔭ ᐊᐅᒄ ᐊ ᐃᓯᓇᑯᓯᒡ ᐊᓐᒡ, ᓇᒪ ᓇᐅᔅ ᑕᑈᑎᒧᒡ᙮ ᐃᔅᐱ ᒪᒃ ᐊ ᒥᒋᐱᔨᓇᓄᐎᒡ ᒪᒃ ᐊ ᓂᓇᐧᑲᑕᔨᒧᓇᓄᐎᒡ ᐊ ᑎᑯᓂᔨᒡ ᐊᓂᔭ ᒥᔽᒋᒧᐅᓂᔪᐤ ᐅᒋ, ᑎᐛᒡ ᐳᓂᐅᒡ ᐊ ᑕᑈᑕᒡ᙮ 22 ᐊᑯ ᒪᒃ ᐊᓐ ᑯᑎᒃ ᓂᑕᐅᒋᑕᑭᓐ ᑲ ᐸᒋᓯᐧᒃ ᐊᓐᑕ ᐊ ᑎᑯᓂᔨᒋ ᑲ ᑲᓱᑕᐛᔅᑯᒋ ᓂᐱᓯᔭᑎᑯᒡ, ᐊ ᐊᑎ ᓂᑕᐅᒋᑦ ᒪᒃ ᒧᔭᒻ ᐊᐅᒄ ᐊ ᐃᓯᓇᑯᓯᒡ ᐃᔪᒡ ᑲ ᓂᑐᑕᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ ᐊᓂᔭ ᓇᔅᒡ ᐊ ᒥᑯᔅᑲᒋᑕᒡ ᐊᔅᒋᔪᐤ ᒐᒂᔪᐛ ᑭᔭ ᓇᔅᒡ ᒥᒄ ᐊ ᐎ ᐅᓱᓇᔭᓂᒥᒡ ᐊ ᐃᑎᒡ ᑭᔭ ᐱᓯᒄ ᐊ ᒧᔅᑕᓇᒡ ᒐᒂᔪᐛ ᒐᒋ ᐊᔭᒡ ᐊᔪᐅᒄ ᐅᔭ ᒐᒃ ᐛᒋ ᓂᓱᐅᓇᑎᓂᔨᒡ ᐅᑕᑈᑎᒧᐅᓄᐛᐤ᙮ ᐊᑯ ᒪᒃ ᓇᒪ ᒋ ᒥᓂᓱᐎᒡ ᐅᐱᒪᑎᓯᐅᓄᐛᒡ᙮ 23 ᐊᓐ ᒪᒃ ᓂᑕᐅᒋᑕᑭᓐ ᑲ ᐸᒋᓯᐧᒃ ᐊ ᒥᔽᓯᔨᒡ ᐊᔅᒋᒡ ᒧᔭᒻ ᐊᐅᒄ ᐊ ᐃᓯᓇᑯᓯᒡ ᐊᓐᒡ ᐃᔪᒡ ᑲ ᓂᑐᑕᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ ᓂᓇᐃᑎᒧᒡ, ᓄᑯᓂᔪᐤ ᐅᐱᒪᑎᓯᐅᓄᐛᒡ ᑕᓐ ᐊ ᐃᓯ ᒥᔪ ᓂᑕᐅᒋᐃᑯᒡ, ᒧᔭᒻ ᐱᔅᒐ ᒪᒃ ᐸᐃᑯ ᒥᑕᓯᒥᑎᓄᐤ ᒋ ᓂᑕᐅᒋᓇ ᐸᐃᒄ ᓂᑕᐅᒋᑕᑭᓐ ᐅᒋ, ᐊᑯ ᑯᑎᑲ ᐊᓱᑕᒡ ᑕᑐᔪᐤ ᒋ ᓂᑕᐅᒋᓇ ᐊᑯ ᑯᑎᑲ ᓂᔅᑐᔪᐤ ᒋ ᓂᑕᐅᒋᓇ ᐸᐃᒄ ᓂᑕᐅᒋᑕᑭᓐ ᐅᒡ᙮” ᒥᒋ ᓱᒥᓇ ᐊᓐᑕ ᐅᓂᑕᐅᒋᑕᑭᓂᒡ Matthew 13.24-30,36-43 (Proper-11 Year A) 24 ᐊᑯ ᒋᓴᔅ ᒂ ᐎᑎᒧᐛᑦ ᑯᑎᒋᔪᐤ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᒋᒋᒋᓯᒄ ᒋᓴᐅᒋᒪᐅᓐ ᐊᐅᒄ ᒧᔭᒻ ᐊ ᐃᓯᓇᒂᒡ ᓇᐸᐤ ᐊ ᓂᑕᐅᒋᑕᑦ ᐊ ᒥᔪᓯᔨᒋ ᓂᑕᐅᒋᑕᑭᓇ ᐊᓐᑕ ᐅᓂᑕᐅᒋᑕᑭᓐ ᐊᔅᒋᒡ᙮ 25 ᐸᐃᒂᐤ ᒪᒃ ᐊ ᑎᐱᔅᑲᔨᒡ ᒪᒂᒡ ᒥᓯᐛ ᐊᐛᓐ ᐊ ᓂᐸᑦ, ᐊᑲ ᓇᐊᔨᒥᑯᑦ ᐊᐛᔪᐛ ᐊᓐ ᓂᑕᐅᒋᒐᓱᐤ ᒋ ᑎᑯᓯᓂᔪᐛ, ᐊᑯ ᑲ ᐅᔄᐛᐱᓂᒥᔨᒋ ᒥᒋ ᓱᒥᓇ ᐊᓐᑕ ᐅᓂᑕᐅᒋᑕᑭᓂᒡ᙮ 26 ᐃᔅᐱ ᒪᒃ ᐱᔭᒋ ᓴᔭᒋᓂᑕᐅᒋᓂᔨᒋ ᐊᓂᔭ ᐅᓂᑕᐅᒋᑕᑭᓇ ᑭᔭ ᐃᔅᐱ ᐊ ᐊᑎ ᒥᓂᓱᔨᒋ, ᐊᑯᑕ ᑲ ᐅᒋ ᓄᑯᓂᔨᒋ ᑭᔭ ᐊᓂᔭ ᒥᒋ ᓂᑕᐅᒋᑕᑭᓇ᙮” 27 “ᐊᑯ ᐊᓐ ᓂᑕᐅᒋᒐᓱᐤ ᒂ ᐸᒋ ᓂᑐᐛᐱᒥᑯᑦ ᐅᑦ ᐊᐱᒋᐊᑭᓇ, ᒂ ᐃᑎᑯᑦ, ‘ᐅᒋᒪᐤ, ᓇᒪᐎᔾ ᐊ ᑲ ᒥᔽᓯᔨᒋ ᓂᑕᐅᒋᑕᑭᓇ ᒋ ᐅᒋ ᐅᔄᐛᐱᔨᑕᓐ ᑲ ᓂᑕᐅᒋᑕᔨᓐ ? ᑕᓐᑕ ᒪᒃ ᐛᒋ ᑎᒂᒋ ᐊᓂᔭ ᒥᒋ ᓂᑕᐅᒋᑕᑭᓇ ?’ ” 28 “ᐊᑯ ᒂ ᐃᔅᒋᔄᑦ ᐊᓐ ᐅᒋᒪᐤ, ‘ᐊᐛᓐ ᐊᑲ ᓇᐊᔨᒥᑦ ᐊᐅᒄ ᐊᓐ ᐊᓂᔭ ᑲ ᐃᑐᑕᐧᒃ᙮’ ᐊᑯ ᒂ ᐃᑎᑯᑦ ᐊᓂᔭ ᐅᑦ ᐊᐱᒋᐊᑭᓇ, ‘ᒋ ᓂᑐᐛᔨᒥᓇᓐ ᐊ ᒐᒋ ᒪᒥᓂᐱᑎᒪᒡ ᐊᓂᔭᔪᐛ ᒥᒋ ᓂᑕᐅᒋᑕᑭᓇ ?’ ” 29 “ᐊᑯ ᐊᑕᑦ ᐊᓐ ᐅᒋᒪᐤ ᐊᓂᔭᔪᐛ ᐅᑯᐸᓇᒪ, ‘ᓇᒪ, ᐛᔅ ᐊᓐ ᒥᓂᐱᑎᒪᒂ ᐊᓂᔭᔪᐛ ᒥᒋ ᓂᑕᐅᒋᑕᑭᓇ ᒋᑭ ᐊᔅᒋᐱᑕᓇᐛᐤ ᐊᓂᔭᔪᐛ ᑲ ᐎ ᓂᑕᐅᒋᑕᔭᓐ᙮ 30 ᐊᑯᔅ ᑕᐱᔅᑯᓐ ᐊᓂᔭ ᒥᒋ ᓂᑕᐅᒋᑕᑭᓇ ᑭᔭ ᐊᓂᔭᔪᐛ ᑲ ᐎ ᓂᑕᐅᒋᑕᔭᓐ ᒋᑭ ᒋᓯᓂᑕᐅᒋᓇ, ᐸᑐᔅ ᒪᒧᓴᒋᓂᑭᓄᒂᐛ᙮ ᐊᑯ ᒪᒃ ᒐ ᐃᑎᒂᐤ ᐊᓐᒡ ᒐ ᒪᒧᓴᒋᓇᒡ, ᓂᔅᑎᒻ ᐊᓂᔭᔪᐛ ᒥᒋ ᓂᑕᐅᒋᑕᑭᓇ ᒐᒋ ᒪᒧᓴᒋᓇᒡ, ᑭᔭ ᒐᒋ ᑕᐱᑐᐛᐱᐧᑲᑕᒡ ᒐ ᐃᔎᓴᒡ, ᐊᑯ ᐃᔭᒄ ᐊᓂᔭᔪᐛ ᐸᒂᓯᑭᓂᒥᓇᑎᒂ ᒐᒋ ᒪᒧᓴᒋᓇᒡ, ᐊᓐᑕ ᒐ ᐊᔅᑕᒡ ᓂᑦ ᐊᔅᑕᓱᐅᒋᐛᐱᒡ᙮’ ” ᑲ ᐊᐱᓯᓯᑦ ᓂᑕᐅᒋᑕᑭᓐ ᑲ ᑎᐸᒋᒪᑭᓄᐅᑦ ᑭᔭ ᓯᐅᔅᑎᒪᑭᓐ Matthew 13.31-33,44-52 (Proper-12 Year A) ᒪᕐᒃ 4.30-34 ; ᓗᒃ 13.18-21 31 ᐊᑯ ᒋᓴᔅ ᒂ ᐎᑎᒧᐛᑦ ᑯᑎᒋᔪᐤ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᒧᔭᒻ ᐊᓐ ᓂᑕᐅᒋᑕᑭᓐ ᑲ ᐊᐱᓯᓯᑦ ᒪᔅᑎᕐᑦ ᑲ ᐃᓯᓂᐧᑲᑕᑭᓄᐅᑦ ᐊᐅᑯᓐ ᐊ ᐃᓯᓇᒂᒡ ᒋᒋᒋᓯᒄ ᐅᒋᒪᐅᓐ᙮ ᐊᔪᐅᒄ ᐅᔭ ᐛᑎᓇᑦ ᓇᐸᐤ ᐊ ᐊᑎ ᓂᑕᐅᒋᑕᑦ ᐊᓐᑕ ᐅᓂᑕᐅᒋᑕᑭᓐ ᐊᔅᒋᒡ᙮ 32 ᐊᑎ ᒪᒃ ᒪᐅᒡ ᐊ ᐊᐱᓯᓯᔨᒋ ᐊᓂᔭ ᓂᑕᐅᒋᑕᑭᓐ ᐊ ᑕᑎᓯᔨᒋ ᑯᑎᑲ ᓂᑕᐅᒋᑕᑭᓇ, ᐃᔅᐱ ᒪᒃ ᐊᒋ ᐃᓯ ᓂᑕᐅᒋᑦ ᐎ ᓇᔅᒡ ᒥᔅᑎ ᐱᒂᓂᑕᐅᒍᐤ᙮ ᐊᓐᑕ ᒪᒃ ᐊ ᐅᑎᐧᑯᓄᔨᒋ ᐊᓂᔭ ᒥᔅᑎᒂ ᐊᑯᑕ ᐛᐅᔅᑎᓂᐧᑲᓱᐅᒡ ᐱᔭᓯᓯᒡ᙮” 33 ᒋᓴᔅ ᒪᒃ ᒥᓐ ᒋ ᐎᑎᒧᐛᐤ ᑯᑎᒋᔪᐤ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᒪᐅ ᐊ ᐃᑕᔨᑕᒂᒡ ᒋᒋᒋᓯᒄ ᒋᓴᐅᒋᒪᐅᓐ᙮ ᒧᔭᒻ ᓯᐅᔅᑎᒪᑭᓇ ᐊᓂᔭ ᑲᒋ ᒪᒧᐱᔭᑦ ᐃᔎᐤ ᒥᔅᑎ ᐸᒂᓯᑭᓂᒡ, ᒥᓯᐛ ᒪᒃ ᐅᐱᔪᐛ ᐸᒂᓯᑭᓇ᙮” 34 ᒧᔅ ᒋᔅᑯᑎᒪᒐᐤ ᑎᐸᒋᒧᐅᓇ ᒋ ᐊᐱᒋᑕᐤ ᒋᓴᔅ ᐊ ᐊᔨᒧᑕᐧᒃ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᐊᓐᑕ ᐊ ᒥᒐᑎᓇᓄᐎᒡ, ᐊᔪᐅᒄ ᐅᔭ ᐱᓯᒄ ᑲ ᐊᐱᒋᑕᑦ ᐊ ᐃᔨᒪᐊᑦ ᐊᐛᔪᐛ᙮ 35 ᐊᐅᒄ ᒪᒃ ᐅᔭ ᑲ ᐃᑎᑦ ᒐᒋ ᑕᑈᒥᑭᓂᔨᒡ ᑕᓐ ᑲ ᐃᔅᒋᔄᒂ ᐊᓐ ᐅᒋᔅᒋᐛᐃᒐᓱᐤ, ᒋᔅᑯᑎᒪᒐᐤ ᑎᐸᒋᒧᐅᓇ ᓂᑭ ᐊᐱᒋᑕᐛᓐ ᐊ ᐎᑎᒧᐅᒂᐤ ᐊᐛᓐᒋ ᑕᓐ ᐊᓂᔭᔪᐛ ᐊᔅᒄ ᐊᑲ ᐅᒋ ᒋᔅᒐᔨᑕᑯᓂᔨᒋ ᑲ ᐃᔅᐱᔅ ᐅᓯᑕᑭᓄᐅᒡ ᐅ ᐊᔅᒋᔾ᙮ ᑕᓐ ᐊ ᐃᓯ ᐎᑎᒪᒐᒥᑲᒡ ᐅ ᒋᔅᑯᑎᒪᒐᐤ ᑎᐸᒋᒧᐅᓐ ᒥᒋ ᓂᑕᐅᒋᑕᑭᓇ ᐊ ᐊᔨᒧᑕᒋ Matthew 13.24-30,36-43 (Proper-11 Year A) 36 ᐃᔅᐱ ᒪᒃ ᒋᓴᔅ ᑲ ᔅᑐᑕᑦ ᐊᓐᑕ ᐊ ᒥᒐᑎᓇᓄᐎᒡ ᐅᒋ, ᒂ ᐱᒐᑦ ᒪᒃ ᐊᓐᑕ ᒥᒋᐛᐱᒡ, ᐅᒋᔅᒋᓄᐊᒧᐛᑭᓇ ᒋ ᐸᒋ ᓂᑐᐛᐱᒥᑯᐤ ᐊᑯ ᒂ ᐃᑎᑯᑦ, “ᐸᒋ ᐎᑎᒧᐅᓇᓐ ᒪ ᑕᓐ ᐊ ᐃᓯ ᐎᑎᒪᒐᒥᑲᒡ ᐊᓐ ᒋᔅᑯᑎᒪᒐᐤ ᑎᐸᒋᒧᐅᓐ ᒥᒋ ᓂᑕᐅᒋᑕᑭᓐ ᑲ ᐊᔨᒧᑕᒡ᙮” 37 ᐊᑯ ᒋᓴᔅ ᐊᑕᑦ, “ᐊᓐ ᓇᐸᐤ ᑲ ᓂᑕᐅᒋᐊᑦ ᑲ ᒥᔪᓯᔨᒋ ᓂᑕᐅᒋᑕᑭᓇ ᐊᐅᒄ ᐃᔪᐤ ᐅᑯᓯᓴᓐ᙮ 38 ᐊᑯ ᐊᓐ ᓂᑕᐅᒋᑕᑭᓐ ᐊᔅᒋᔾ, ᐊᐅᒄ ᐊᔅᒋᔾ, ᐊᓐ ᒪᒃ ᑲ ᒥᔪᓯᑦ ᓂᑕᐅᒋᑕᑭᓐ ᐊᐅᑯᓐᒡ ᐊᓐᒡ ᐃᔪᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᒡ ᑲ ᐅᒋᒡ, ᐊᑯ ᐊᓐᒡ ᒥᒋ ᓂᑕᐅᒋᑕᑭᓐᒡ ᐊᐅᑯᓐᒡ ᐊᓐᒡ ᐃᔪᒡ ᐊᓐᑕ ᒥᒋᒥᓂᑐᐛ ᐊ ᑕᔨᒋ ᑲ ᐅᒋᒡ᙮ 39 ᐊᓐ ᒪᒃ ᐊᐛᓐ ᑲ ᐛᐧᑲᑕᑦ ᐊᓂᔭ ᑲ ᓂᑕᐅᒋᑕᔨᒋ ᐊᓐ ᑲ ᐛᐛᐱᓇᐧᒃ ᒥᒋ ᓱᒥᓇ ᐊᓐᑕ ᓂᑕᐅᒋᑕᑭᓐ ᐊᔅᒋᒡ ᐊᐅᒄ ᐊᓐ ᒥᒋᒥᓂᑐᐤ᙮ ᐊᓐ ᒪᒃ ᒐ ᐅᑎᒋᐱᔨᒡ ᒐᒋ ᒪᒧᓴᒋᓂᑭᓄᐅᒋ ᐊᓂᔭ ᓂᑕᐅᒋᑕᑭᓇ ᐊᐅᒄ ᐊᓐ ᒐ ᐃᔎᐱᔨᒡ ᐊᔅᒋᔾ᙮ ᐊᓐᒡ ᒪᒃ ᑲ ᒪᒧᓴᒋᓇᒡ ᐊᓂᔭ ᓂᑕᐅᒋᑕᑭᓇ ᑲ ᐃᔅᒋᔄᔭᓐ, ᐊᐅᑯᓐᒡ ᐊᓐᒡ ᐊᓐᒋᓐᒡ᙮” 40 “ᒧᔭᒻ ᒪᒃ ᐊᓐ ᒐ ᐃᓯᓇᒂᒡ ᒐ ᒪᒧᓴᒋᓂᑭᓄᐅᒋ ᐊᓂᔭ ᒥᒋ ᓂᑕᐅᒋᑕᑭᓇ, ᒐ ᐃᔎᓯᑭᓄᐅᒋ ᒪᒃ, ᐊᐅᑯᓐ ᒧᔭᒻ ᒐ ᐃᔅᐱᔨᒡ ᐃᔎᐱᔨᒐ ᐊᔅᒋᔾ᙮ 41 ᐃᔪᐤ ᐅᑯᓯᓴᓐ ᒋᑭ ᐃᑎᓴᐛᐤ ᐅᑦ ᐊᓐᒋᓂᒪ ᒐᒋ ᓇᒋ ᒪᒧᓴᒋᓂᒐᔨᒋ ᐊᓐᑕ ᐅᒋᓴᐅᒋᒪᐅᓂᔨᒡ ᐅᒡ ᐊᓂᔭ ᑲ ᐃᑐᑐᐛᔨᒋ ᑯᑎᑲ ᐊᐛᔪᐛ ᒐᒋ ᒥᒋᑐᑎᒥᔨᒋ ᑭᔭ ᒥᓯᐛ ᐊᓂᔭ ᐊᐛᔪᐛ ᑲ ᒥᒋᐱᒪᑎᓯᔨᒋ᙮ 42 ᐊᑯ ᒪᒃ ᒐ ᐃᓯ ᐛᐱᓇᒡ ᐊᓐᑕ ᒥᒋ ᐃᔅᑯᑕᒡ ᐊᓐᑕ ᐱᓯᒄ ᒐ ᒪᒡ ᑭᔭ ᒐ ᒪᒥᑥᐛᐱᑕᓯᓂᒡ᙮ 43 ᐊᑯ ᒪᒃ ᒋᓴᒪᓂᑐᐤ ᐅᑦ ᐃᔨᒪ ᒐ ᒋᐧᑲᔭᔅᑐᐛᔨᒋ ᐊᓐᑕ ᐅᑕᐎᒪᐛ ᐅᒋᓴᐅᒋᒪᐅᓂᔨᒡ ᒧᔭᒻ ᐱᓯᒻ ᐊ ᐃᓯ ᒋᐧᑲᔭᔅᑐᐛᑦ᙮ ᐊᓐ ᐊᐛᓐ ᑲ ᐸᑕᐧᒃ ᓱᒃ ᐎ ᓂᔅᑐᑎᒻ ᐅᔭ᙮” ᓇᐸᐤ ᑲ ᒥᔅᑲᐧᒃ ᒐᒂᔪᐤ ᐊ ᓱᓇᔭᐎᔨᒡ Matthew 13.31-33,44-52 (Proper-12 Year A) 44 “ᒪᐅ ᐊ ᐃᑕᔨᑕᒂᒡ ᒋᒋᒋᓯᒄ ᒋᓴᐅᒋᒪᐅᓐ, ᒧᔭᒻ ᐊ ᒥᔅᑎ ᓱᓇᔭᐎᔨᒋ ᒐᒂᔪᐛ ᐊᒋ ᐊᔭᐅᐧᑲᐃᑭᓄᐛᒂᓂ ᑭᔭ ᓇᐸᐤ ᐊ ᒥᔅᑲᐧᒃ ᐊᐅᑯᓐ ᐊ ᐃᓯᓇᒂᒡ᙮ ᒥᓐ ᐊ ᐊᑎ ᐊᔭᐅᐧᑯᐊᒃ᙮ ᐊᓂᔭ ᒪᒃ ᐊ ᐃᔅᐱᔅ ᒪᔽᔨᑕᐧᒃ ᐊᑯ ᓇᑐ ᐊᑕᐛᒐᑦ ᒥᓯᐛ ᑕᓐ ᐊ ᐃᓯ ᑎᐱᔨᐛᐅᓯᑦ, ᐊᑯ ᐛᑎᓇᐧᒃ ᐊᓂᔭ ᓂᑕᐅᒋᑕᑭᓐ ᐊᔅᒋᔪᐤ ᐊᓐᑕ ᑲ ᒥᔅᑲᐧᒃ ᐊᓂᔭᔪᐛ ᑲ ᓱᓇᔭᐎᔨᒋ ᒐᒂᔪᐛ᙮” 45 “ᒪᐅ ᑭᔭ ᐊ ᐃᓯᓇᒂᒡ ᒋᒋᒋᓯᒄ ᒋᓴᐅᒋᒪᐅᓐ, ᒧᔭᒻ ᓇᐸᐤ ᑲ ᓇᓂᑐᐛᔨᒪᑦ ᒥᒋᓴ ᑲ ᒥᔅᑎ ᓱᓇᔭᐎᔨᒋ᙮ 46 ᐃᔅᐱ ᒪᔅᑯᐛᑦ ᐸᐃᒄ ᓇᔅᒡ ᐊ ᒥᔪᓯᔨᒋ ᐊ ᓱᓇᔭᐎᔨᒋ, ᓂᑐᐤ ᐊᑕᐛᒐᐤ ᒥᓯᐛ ᒐᒂᔪᐤ ᐊ ᐃᓯ ᐊᔭᑦ ᐊᑯ ᐛᑎᓇᑦ ᐊᓂᔭ ᒥᒋᓴ᙮” ᒋᓴᔅ ᑲ ᐊᔨᒧᒪᑦ ᓇᐸᐛ ᐊ ᓄᑎᒪᓴᔨᒋ 47 “ᒪᐅ ᒥᓐ ᐃᔭᐱᒡ ᐊ ᐃᓯᓇᒂᒡ ᒋᒋᒋᓯᒄ ᒋᓴᐅᒋᒪᐅᓐ᙮ ᒧᔭᒻ ᓇᐸᐅᒡ ᐊᒋ ᐱᔅᑕᐛᒡ ᓴᑲᐃᑭᓂᒡ ᓂᓇᐧᑯᐤ ᒪᒃ ᐊ ᐃᓯᓇᑯᓯᔨᒋ ᓂᒪᓴ ᐊ ᐱᑕᐎᔭᒡ᙮ 48 ᐃᔅᐱ ᒪᒃ ᓯᔭᑭᔅᒋᓇᔨᒋ ᐊᓂᔭ ᐅᑦ ᐊᐃᐱᐛᐛ, ᐊᑯ ᐊ ᐊᒂᓯᐱᑕᒡ ᐊᓐᑕ ᓯᓱᒡ ᒐᒋ ᑎᐸᓇᐊᒡ ᐊᓂᔭ ᓂᒪᓴ, ᐊᓂᔭ ᑲ ᒥᔪᓯᔨᒋ ᐊᓐᑕ ᐊᔅᒋᐧᑯᒡ ᒋ ᐱᑕᐛᐅᒡ, ᐊᑯ ᐊᓂᔭ ᐊᑲ ᒥᔪᓯᔨᒋ ᒋ ᐛᐱᓇᐅᒡ᙮ 49 ᐊᐅᑯᓐ ᒪᒃ ᒧᔭᒻ ᒐ ᐃᓯᓇᒂᒡ ᐃᔅᐱ ᐃᔎᐱᔨᒐ ᐊᔅᒋᔾ, ᐊᓐᒋᓐᒡ ᒋᑭ ᑎᐸᓇᐅᒡ ᐊᓂᔭ ᑲ ᒥᒐᑎᓯᔨᒋ ᐊᓐᑕ ᐅᒋ ᒪᒂᒡ ᐊᓂᔭ ᑲ ᑯᐃᔅᑯᑕᑎᓯᔨᒋ ᐊ ᑕᔨᒋ᙮ 50 ᐊᑯ ᐊᓐᑕ ᒥᒋ ᐃᔅᑯᑕᒡ ᒐ ᐃᓯ ᐛᐱᓇᑭᓄᐎᒡ ᐊᓐᒡ ᑲ ᒥᒐᑎᓯᒡ, ᐊᑯᑕ ᒐ ᒪᒡ ᑭᔭ ᒐ ᒥᑥᐛᐱᑕᓯᓂᒡ ᒐ ᐃᔅᐱᔅ ᐎᓯᒐᔨᑕᒡ᙮” 51 ᐊᑯ ᒋᓴᔅ ᐊᑕᑦ, “ᒋ ᓂᔅᑐᑕᓇᐛᐤ ᐊ ᐅ ᑲ ᐃᓯ ᐎᑎᒪᑎᑯᒡ ?” “ᓂᐦᐃ,” ᒋ ᐃᑕᐅᒡ ᒪᒃ ᐊᓐᒡ ᒋᔅᒋᓄᐊᒧᐛᑭᓐᒡ᙮ 52 ᐊᑯ ᐊᑕᑦ, “ᒥᓯᐛ ᐊᓐᒡ ᑲ ᒋᔅᒐᔨᑕᒡ ᒋᓴᒪᓂᑐᐛ ᐅᐎᓱᐛᐅᓂᔪᐤ ᑭᔭ ᑲ ᒋᔅᑯᑎᒧᐛᑭᓄᐎᒡ ᒋᒋᒋᓯᒄ ᒋᓴᐅᒋᒪᐅᓂᔪᐤ ᑕᓐ ᐊ ᐃᑕᔨᑕᑯᓂᔨᒡ ᒧᔭᒻ ᐊᐛᓐ ᑲ ᑎᐱᔨᐛᐅᓯᑦ ᐊᔅᑕᓱᐅᒋᐛᐱᔪᐤ ᐊ ᑭᓄᐛᔨᑕᐧᒃ ᒐᒂᔪᐤ ᑕᐱᔅᑯᓐ ᐊ ᒥᔽᔨᒋ ᑭᔭ ᐊ ᒋᓴᔭᓯᓇᑯᓂᔨᒋ ᑭᔭ ᐊ ᐅᔅᑲᔨᒋ᙮ ᑕᐱᔅᑯᓐ ᒪᒃ ᐊ ᒥᔪ ᐊᐱᒋᑕᑦ᙮” ᒋᓴᔅ ᑲ ᐊᑐᐛᔨᒪᑭᓄᐅᑦ ᐊᓐᑕ ᓇᓴᕆᑎᒡ ᒪᕐᒃ 6.1-6 ; ᓗᒃ 4.16-30 53 ᐃᔅᐱ ᒪᒃ ᒋᓴᔅ ᑲᒋ ᐛᐎᑕᐧᒃ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᒋ ᔅᑐᑕᐤ ᐊᓐᑕ ᐅᒋ᙮ 54 ᐊᑯ ᐊᓐᑕ ᐊᓂᔭ ᐅᑕᓇᔪᐤ ᐛᒋᑦ ᐊᑯᑕ ᑲ ᐃᑐᑕᑦ᙮ ᐊᑯᑕ ᐊᓐᑕ ᑲ ᒋᔅᑯᑎᒪᒐᑦ ᐊᓐᑕ ᒍᐤ ᐊᔭᒥᐊᐅᒋᐛᐱᒡ, ᒥᓯᐛ ᒪᒃ ᐊᓂᔭ ᑲ ᐸᑕᑯᑦ ᒋ ᒥᔅᑲᓯᑕᑯᐤ ᐊ ᐃᑎᑐᔨᒋ, “ᑕᓐᑕ ᑲ ᐅᒋ ᐊᔭᑦ ᐅᔭ ᑭᒐᑕᐛᔨᑎᒧᐅᓂᔪᐤ, ᑕᓐᑕ ᑲ ᐅᒋ ᐊᔭᑦ ᑭᔭ ᐊᓂᔭ ᑭᔅᒋᐅᓂᔪᐤ ᒐᒋ ᐃᑐᑕᐧᒃ ᐊᓂᔭ ᒪᒥᔅᑲᒡ ᒐᒂᔪᐛ ? 55 ᓇᒪᔭᔪᐛ ᐊ ᐅᔭ ᒥᔅᑎᑯᓇᐸᐤ ᐅᑯᓴ ? ᓇᒪᐎᔾ ᐊ ᒪᕆ ᐃᓯᓂᐧᑲᓱᔪᐛ ᐅᑲᐎᔭ, ᑭᔭ ᓇᒪᔭᔪᐛ ᐊ ᐅᔭ ᒋᒥᔅ, ᒍᓯᑉ, ᓴᐃᒥᓐ ᑭᔭ ᒍᑎᔅ ᐎᐧᑲᓂᓱᐛᐛ ? 56 ᓇᒪᐎᔾ ᐊ ᑭᔭ ᒥᓯᐛ ᑲ ᐃᔎᐎᒋ ᐎᐧᑲᓂᓴ ᐅᒋᐱᔪᐛ ᐅᑕ ? ᑕᓐᑕ ᒪᒃ ᑲ ᐅᒋ ᐊᔭᑦ ᐅᔭ ᑭᔅᒋᐅᓂᔪᐤ ?” 57 ᒋ ᐊᑐᐛᔨᒪᐅᒡ ᒪᒃ ᐊᓂᔭ ᒋᓴᓴ᙮ ᒥᒄ ᒪᒃ ᒋᓴᔅ ᒋ ᐃᑕᐤ, “ᐊᓐ ᐊᐛᓐ ᑲ ᒋᔅᒋᐛᐃᒐᓱᐅᑦ ᒋᔅᑕᔨᒪᑭᓄᐤ ᐃᔭᒡ ᐅᑕᓇᒡ, ᐊᑯ ᐊᓐᑕ ᑎᐱᔨᐛ ᐅᑦ ᐊᔅᒋᒡ ᐊ ᑕᑦ ᓇᒪ ᐊᐱᑕᔨᒪᑭᓄᐤ᙮ ᐛᐛᒡ ᐊᓂᔭ ᐊᓐᑕ ᑲ ᐸᐃᑯᔅᑲᓇᓯᑦ ᑲ ᑕᔨᒋ ᓇᒪ ᒋᔅᑕᔨᒥᑯᐤ᙮” 58 ᐊᑯ ᒪᒃ ᐊᓂᔭ ᐊᑲ ᐅᒋ ᐊᔭᔨᒋ ᑕᑈᑎᒧᐅᓂᔪᐤ, ᓇᒪ ᒥᒐᑦ ᒪᒥᔅᑲᒡ ᒐᒂᔪᐛ ᐅᒋ ᐃᑐᑎᒻ ᐊᓐᑕ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.