ᒪᑎᔪᐤ 11 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒠᓐ ᑲ ᓯᑲᐃᑕᒐᑦ ᑲ ᓂᑐ ᒋᔅᒐᔨᒪᑦ ᒋᓴᓴ

¹ ᐃᔅᐱ ᒪᒃ ᑲᒋ ᐃᓯ ᐛᑎᓱᒪᑦ ᒋᓴᔅ ᐅᒋᔅᒋᓄᐊᒧᐛᑭᓇ, ᐊᑯ ᒐ ᔅᑐᑕᑦ, ᒐᒋ ᒋᔅᑯᑎᒪᒐᑦ ᑭᔭ ᒐᒋ ᑭᒐᔅᒋᒧᑦ ᐊᓐᑕ ᑯᑎᑲ ᐅᑕᓇᐛ ᐊᓐᑕ ᒥᒋᒪ ᑲ ᑎᑯᓂᔨᒋ᙮

Matthew 11.2-11 (Advent-3 Year A)

² ᒠᓐ ᐅᓯᑲᐃᑕᒐᐤ ᒪᒃ ᒋ ᒪᑯᓇᑭᓄᐤ ᐊᑯ ᑲ ᒋᐸᐛᑭᓄᐅᑦ ᑲᒪᑯᓄᐛᓯᐅᒋᐛᐱᒡ᙮ ᐊᑯᑕ ᒪᒃ ᐊᓐᑕ ᑲ ᐸᑕᐧᒃ ᐊ ᑎᐸᒋᒪᑭᓄᔨᒋ ᑕᓐ ᐊ ᐃᑎᔨᒋ ᙭ᑕ, ᐊᑯ ᒂ ᐃᑎᓴᐛᑦ ᓂᓱ ᐅᒋᔅᒋᓄᐊᒧᐛᑭᓇ ᐊᓐᑕ ᐊ ᑕᔨᒋ ᒋᓴᓴ᙮

³ ᐊᑯ ᒂ ᑯᒂᒋᒪᒡ ᒋᓴᓴ, “ᐸᒋ ᐎᑎᒧᐅᓇᓐ ᒪ, ᐊᐅᒄ ᐊ ᒋᔾ ᙭ ᐊᓐ ᒐ ᑎᑯᓯᓂᑯᐱᓇ ᑭᔭ ᒪᒃ ᐊᔅᒄ ᐊ ᓂᑭ ᐸᓱᐛᔨᒪᓇᓐ ᑯᑎᒃ ᒐᒋ ᑎᑯᓯᐧᒃ ?”

⁴ ᐊᑯ ᒋᓴᔅ ᐊᑕᑦ, “ᒋᐛᒄ, ᒐ ᐎᑎᒧᐛᒄ ᒠᓐ ᑕᓐ ᑲ ᐃᓯ ᐛᐱᒥᔭᒄ ᐊ ᐃᓯ ᐃᑐᑎᒪᓐ ᑭᔭ ᑕᓐ ᑲ ᐃᓯ ᐸᑎᒪᒄ᙮

⁵ ᐎᑎᒧᐛᐧᒄ ᒪᒃ ᐊ ᐛᐸᑎᒥᔨᒋ ᐊᓂᔭᔪᐛ ᐊᑲ ᐅᒋ ᐛᐸᑎᒥᔨᒋ, ᐊ ᐱᒧᑕᔨᒋ ᐊᓂᔭᔪᐛ ᐊᑲ ᐅᒋ ᐱᒧᑕᔨᒋ, ᑭᔭ ᐊ ᐸᔭᒋᓯᔨᒋ ᐊᓂᔭᔪᐛ ᑲ ᐊᔭᔨᒋ ᑲ ᒪᔭᑎᓂᔨᒡ ᐅᒥᒋᐛᔅᐱᓇᐅᓂᔪᐤ ᐊᒋ ᒥᓏᒋᐊᑭᓄᔨᒋ᙮ ᑭᔭ ᐊ ᐸᑎᒥᔨᒋ ᐊᓂᔭᔪᐛ ᐊᑲ ᐅᒋ ᐸᑎᒥᔨᒋ᙮ ᑭᔭ ᐊᒋ ᐅᓂᔅᑲᓇᑭᓄᔨᒋ ᐊᓂᔭᔪᐛ ᑲ ᓂᐱᔨᒋ᙮ ᑭᔭ ᒥᔽᒋᒧᐅᓂᔪᐤ ᐊ ᐛᐎᑎᒧᐛᑭᓄᔨᒋ ᑲ ᒋᔅᑎᒪᑎᓯᔨᒋ ᐊᐛᔪᐛ᙮

⁶ ᓱᐛᔨᑕᑯᓱᐤ ᒪᒃ ᐊᓐ ᐊᐛᓐ ᒐ ᐊᑲ ᐊᑐᐛᔨᒥᒂ᙮” ᐊᐅᑯᓐ ᑲ ᐃᑕᑦ ᒋᓴᔅ ᐊᓂᔭᔪᐛ ᒠᓇ ᐅᒋᔅᒋᓄᐊᒧᐛᑭᓂᔪᐛ᙮

⁷ ᐃᔅᐱ ᒪᒃ ᑲ ᔅᑐᑕᔨᒋ ᒠᓇ ᐅᒋᔅᒋᓄᐊᒧᐛᑭᓂᔨᐛ, ᒋᓴᔅ ᒋ ᐊᔨᒧᒪᐤ ᒠᓇ ᐊᓐᑕ ᐊ ᒥᒐᑎᓇᓄᐎᒡ ᐊ ᐃᔅᒋᔄᑦ, “ᐃᔅᐱ ᑲ ᓂᑐᐛᐱᒪᒄ ᒠᓐ ᐊᓐᑕ ᐸᐧᑯᑎᔅᑭᒥᑲᒡ ᑲ ᑭᒐᔅᒋᒧᑦ, ᐊᐛᓐ ᑲ ᐃᑕᔨᒪᒄ ᒐ ᐛᐱᒪᒄ ? ᒧᔭᒻ ᒥᔅᑯᓯᔭ ᑕᓐ ᐊ ᐃᑕᔅᑎᒋ ᒥᒄ ᐊᓐᑕ ᐊ ᐃᓯ ᔪᑎᒡ ᐊ ᐃᓯ ᓄᐛᔭᔅᑎᒋ ᐊᐅᑯᓐ ᐊ ᐃᑕᔨᑕᑯᓯᑦ ᐊᐛᓐ ᓇᔅᒡ ᐊ ᓂᓱᐅᓇᒋᒪᑭᓄᐅᑦ ? ᐊᐅᑯᓐ ᐊ ᑲ ᐃᑕᔨᒪᒄ ᒠᓐ ᐊ ᐃᑕᔨᑕᑯᓯᑦ᙮

⁸ ᒐᒂᓐ ᒪᒃ ᐛᒋ ᓂᑐᐛᐱᒪᒄ ? ᐊᐛᓐ ᑲ ᐃᑕᔨᒪᒄ ᒐ ᐛᐱᒪᒄ ? ᓇᐸᐤ ᐊ ᓇᔅᒡ ᐊ ᒥᔽᔅᐱᓱᑦ ? ᐊᓐᒡ ᐊᐛᓐᒋ ᑲ ᒥᔽᔅᐱᓱᒡ ᒋᓴᐅᒋᒪᐛ ᐎᒋᔨᒡ ᐊᑯᑕ ᐊᑕᒡ᙮

⁹ ᒐᒂᓐ ᒪᒃ ᐛᒋ ᓂᑐᐛᐱᒪᒄ ? ᔅᒋ ᐃᑕᔨᑕᓇᐛᐤ ᐊ ᐅᒋᔅᒋᐛᐃᒐᓱᐤ ᒐ ᐛᐱᒪᒄ ? ᓂᐦᐃ, ᒋ ᐎᑎᒪᑎᓇᐛᐤ ᐊᔪᐛᒃ ᐎᔾ ᒠᓐ ᒋ ᐃᑕᔨᑕᑯᓱᐤ ᐃᔅᐱᔅ ᑯᑎᑲ ᐅᒋᔅᒋᐛᐃᒐᓱᐛ᙮

¹⁰ ᐊᐅᒄ ᐅ ᒠᓐ ᑲ ᐊᔨᒧᒪᑭᓄᐅᑦ ᐊᓐᑕ ᒋᓴᒪᓂᑐᐛ ᐅᑦ ᐃᔨᒧᐅᓂᔨᒡ ᑲ ᐃᑎᔅᑕᔨᒡ, ᓂᑭ ᓂᑲᓂᑎᓴᐛᐤ ᐊᐛᓐ ᒐᒋ ᐊᔭᔅᑯᐎᐧᑲᐧᒃ ᐊᓂᔭᔪᐤ ᒪᔅᑭᓇᔪᐤ ᐊᓐᑕ ᒐ ᐱᒧᑕᐅᑦ᙮

¹¹ ᒋ ᐎᑎᒪᑎᓇᐛᐤ, ᑕᑐᐤ ᐊᐛᓐᒋ ᑲ ᐱᒪᑎᓯᒡ ᓇᒪ ᐊᔪᐛᒃ ᐃᑕᔨᑕᑯᓱᐅᒡ ᑕᓐ ᐊ ᐃᑕᔨᑕᑯᓯᔨᒋ ᒠᓐ ᐅᓯᑲᐃᑕᒐᐛ᙮ ᐃᔭᐱᒡ ᒪᒃ ᐊᓐ ᑕᓐ ᒪᐅᒡ ᓄᑕᔅ ᑲ ᐃᑕᔨᑕᑯᓯᑦ ᒋᒋᒋᓯᒄ ᒋᓴᐅᒋᒪᐅᓂᒡ ᐊᔪᐛᒃ ᐎᔾ ᒋᔅᑕᔨᑕᑯᓱᐤ ᐃᔅᐱᔅ ᒠᓇ᙮

¹² ᑲ ᐃᔅᐱᔅ ᒋᒋᐱᔨᑕᑦ ᒪᒃ ᒠᓐ ᐅᓯᑲᐃᑕᒐᐤ ᐊ ᑭᒐᔅᒋᒧᑦ, ᐅᑕ ᒪᒃ ᐃᔅ ᐊᓄᒡ, ᒧᔅ ᐎ ᓯᓱᒐᔨᒧᑕᑭᓄᐤ ᒋᒋᒋᓯᒄ ᒋᓴᐅᒋᒪᐅᓐ, ᑭᔭ ᑲ ᐊᒂᑕᔨᑕᑯᓯᒡ ᐊᐛᓐᒋ ᓇᔅᒡ ᓱᒃ ᐊ ᒪᓯᒐᒡ ᐎᔨᐛᐤ ᐊ ᐎ ᒪᑯᓂᒪᓱᒡ᙮

¹³ ᐛᔅ ᒥᓯᐛ ᐊᓂᔭᐧᑲ ᐅᒋᔅᒋᐛᐃᒐᓱᒡ ᒋ ᐎᑎᒧᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᒐ ᐅᑎᒋᐱᔨᒡ, ᐊᐅᑯᓐ ᒪᒃ ᑭᔭ ᑲ ᐃᓯ ᐸᒋ ᐎᑕᒂᒡ ᐊᓐᑕ ᐊᔭᒥᐊᐅ ᐎᓱᐛᐅᒥᓯᓇᐃᑭᓂᒡ ᐸᑐᔅ ᑲ ᑎᑯᓯᐧᒃ ᒠᓐ᙮

¹⁴ ᐅᒡ ᐅᒋᔅᒋᐛᐃᒐᓱᒡ ᒋ ᐃᔅᒋᔄᐅᒡ ᐊᔅᒄ ᒐ ᑎᑯᓯᓂᔨᒋ ᐃᓚᐃᒐᔨᒋ, ᑎᔭᑈᑎᐛᐛᒂ ᒪᒃ, ᐅ ᒠᓐ ᐊᐅᑯᓐ ᐊᓐ ᐃᓚᐃᒐ᙮ ᐊᐅᒄ ᐅ ᐅᒋᔅᒋᐛᐃᒐᓱᐤ ᒐ ᑎᑯᓯᓂᑯᐱᓇ᙮

¹⁵ ᐎ ᓂᔅᑐᑎᒧᒄ ᒪᒃ ᑕᓐ ᑲ ᐃᓯ ᐸᑎᒪᒄ᙮”

Matthew 11.16-19,25-30 (Proper-9 Year A)

¹⁶ “ᓂᑭ ᐊᔨᒧᒪᐅᒡ ᐃᔪᒡ ᐊᓄᒡ ᒪᒂᒡ ᑲ ᐱᒪᑎᓯᒡ ᑕᓐ ᐊ ᐃᑕᔨᑕᑯᓯᒡ᙮ ᒧᔭᒻ ᐊᐛᓯᒡ ᐊᑲ ᒋ ᓂᓇᐊᔨᑎᒥᐃᑐᒡ ᐊ ᐃᓯ ᒪᑐᐛᒡ ᐊᐅᑯᓐ ᐊ ᐃᑎᒡ᙮

¹⁷ ᐊ ᑕᑈᑎᑐᒡ, ᐊ ᐃᔅᒋᔄᒡ, ‘ᐊ ᓂᐳᐅᓇᓄᐅᒡ ᓂᒋ ᐎ ᐃᓯ ᒪᑐᐛᓇᓐ, ᐊ ᒋᔍᐛᐱᒐᔭᒡ ᐊ ᑎᔭᒡ, ᓇᒪ ᒪᒃ ᒋ ᐅᒋ ᓂᒥᓇᐛᐤ, ᑭᔭ ᓂᒋ ᓂᑭᒧᓇᓐ ᐊ ᒋᔅᑎᒪᒋᑕᒂᒋ ᓂᑭᒧᐅᓇ, ᓇᒪ ᒪᒃ ᒋ ᐅᒋ ᒪᓇᐛᐤ᙮’

¹⁸ ᐃᔅᐱ ᒪᒃ ᒠᓐ ᑲ ᑎᑯᓯᐧᒃ ᓇᒪ ᐊᓯᑯᒻ ᐅᒋ ᐅᑎᓂᒻ ᒥᒋᒥᔪᐤ, ᓇᒪ ᑭᔭ ᐅᒋ ᒥᓄᐤ ᓱᒥᓇᐳᔪᐤ, ᑭᔭ ᒂ ᐃᑕᑭᓄᐅᑦ ᒥᒋ ᐊᒐᒂ ᐱᔅᑲᑯᐤ᙮

¹⁹ ᐊᑯ ᒪᒃ ᐃᔪᐤ ᐅᑯᓯᓴᓐ ᒋ ᒥᒋᓱᐤ ᑭᔭ ᒋ ᒥᓄᐤ, ᒋ ᐃᔅᒋᔄᔪᐛ ᒪᒃ ᐊᐛᔪᐛ, ‘ᑭᓄᐛᐱᒪᐧᒄ ᒪ ᐅ ᓇᐸᐤ, ᑕᑈ ᒥᔅᑎ ᒥᒋᓱᐤ ᑭᔭ ᑕᑈ ᐎᒋᐸᐤ, ᐊ ᐅᐎᒐᐛᑭᓂᑦ ᐅᒥᒐᑎᓯᐛ, ᑭᔭ ᐊᓂᔭᔪᐛ ᓂᑎᒥᒄ ᑲ ᐃᑎᔨᒋ ᑲ ᒪᒧᓴᒋᓂᒥᔨᒋ ᒋᓴᐅᒋᒪᐤ ᓱᓇᔭᔪᐤ᙮’ ᒥᒄ ᒪᒃ ᑕᓐ ᐊ ᐃᓯ ᐱᒪᑎᓯᑦ ᐊᐛᓐ ᐊᑯᑕ ᐊ ᓄᑯᓂᔨᒡ ᑕᓐ ᐊ ᐃᓯ ᑭᒐᑕᐛᔨᑕᐧᒃ᙮”

ᐊᓂᔭ ᐅᑕᓇᐛ ᐊᓐᑕ ᐊᑲ ᑕᑈᔭᔨᒪᑭᓄᐅᑦ ᒋᓴᔅ

²⁰ ᐊᓐᑕ ᒪᒃ ᐊᓂᔭ ᐅᑕᓇᐛ ᒋᓴᔅ ᒪᐅᒡ ᑲ ᐃᑐᑕᐧᒃ ᒪᒥᔅᑲᒡ ᐃᑐᐅᓇ ᐊᓐᒡ ᒪᒃ ᐃᔪᒡ ᑲ ᑕᒡ ᐊᓐᑕ ᐊᓂᔭ ᐅᑕᓇᐛ ᐃᔭᐱᒡ ᓇᒪ ᐅᒋ ᒂᔅᑲᑎᓯᐅᒡ᙮ ᓇᒪ ᒪᒃ ᐅᒋ ᒥᓇᒋᒪᐤ ᐊ ᐃᑕᑦ,

²¹ “ᒋᔨᐛᐤ ᑲ ᑕᔭᒄ ᐊᓐᑕ ᐅᑕᓇᒡ ᑯᕋᓯᓐ ᑲ ᐃᓯᓂᐧᑲᑕᒡ ᐊᔪᐛᒡ ᒋᑭ ᒥᒋᐱᔨᓇᐛᐤ, ᑭᔭ ᒋᔨᐛᐤ ᐸᑦᓴᐃᑕ ᑲ ᑕᔭᒄ ᐊᐅᑯᓐ ᒧᔭᒻ ᒐ ᐃᓯ ᒥᒋᐱᔭᒄ ᑭᔭ ᒋᔨᐛᐤ᙮ ᐛᔅ ᐊᓂᔭ ᒪᒥᔅᑲᒡ ᒐᒂᔪᐛ ᑲ ᐃᓯ ᐃᑐᑎᒪᑯᐅᔭᒄ ᒋ ᐃᑐᑕᑭᓄᐎᒂᓂ ᐊᓐᑕ ᐛᔅᑭᒡ ᑕᐃᕋ ᑭᔭ ᓴᐃᑐᓐ ᑲ ᐃᓯᓂᐧᑲᑕᒋ ᐅᑕᓇᐛ, ᓴᔅ ᐛᔅᑭᒡ ᒋᐸ ᒂᔅᑲᑎᓱᐅᒡ ᐎᔨᐛᐤ ᐊᓐᒡ ᐃᔪᒡ᙮ ᐊᑯ ᒪᒃ ᐊ ᐎ ᓄᑯᑕᒡ ᐊᔅᐱᔅ ᒥᑕᒋᔨᐛᓯᒡ ᐅᒥᒋᑥᐅᓄᐛᐛ ᒋᐸ ᐱᔎᔭᑭᐳᐅᒡ ᐊ ᑲᐛᑭᓂᔨᒋ ᐊᐱᒋᑕᐅᓇ, ᐊᓐᑕ ᒪᒃ ᐃᔎᔅᒐᒡ ᒋᐸ ᐊᐳᐅᒡ᙮

²² ᒋ ᐎᑎᒪᑎᓇᐛᐤ ᐃᔅᐱ ᐅᑎᒋᐱᔨᒐ ᒐ ᑎᐸᔅᑯᓂᒐᐅ ᒋᓯᑲᒡ, ᒋᓴᒪᓂᑐᐤ ᒋᑭ ᐛᐛᓯᐊᐤ ᐊᓂᔭ ᑕᐃᕋ ᑭᔭ ᓴᐃᑐᓐ ᑲᒋ ᑕᔨᒋ᙮ ᒋᔨᐛᐤ ᒪᒃ ᐊᑐᐎᔅ ᒋᑭ ᐛᐛᓯᐃᑯᐅᓇᐛᐤ᙮

²³ ᐊᑯ ᒪᒃ ᒋᔨᐛᐤ ᐊᓐᑕ ᑲᐳᕐᓇᐊᒥᒡ ᑲ ᑕᔭᒄ ᓇᔅᒡ ᑕᑈ ᒋᑦ ᐊᔅᐸᔨᒧᓇᐛᐤ ᐊᓐᑕ ᒋᒋᒋᓯᑯᒡ ᒐᒋ ᐃᓯ ᐅᑎᓂᑯᐅᔭᒄ᙮ ᓇᒪ ᒪᒃ, ᒥᒋ ᐃᔅᑯᑕᒡ ᒋᑭ ᐃᓯ ᓂᑎᒋᐛᐱᓂᑯᓇᐛᐤ᙮ ᒪᒥᔅᑲᒡ ᒐᒂᔪᐛ ᒋ ᐃᓯ ᐃᑐᑕᑭᓄᐛ ᐊᓐᑕ ᒋᑦ ᐃᑕᐅᓄᐛᒡ ᐃᔭᐱᒡ ᒪᒃ ᓇᒪ ᒋ ᐅᒋ ᒂᔅᑲᑎᓯᓇᐛᐤ ᑭᔭ ᐊᓂᔭ ᒪᒥᔅᑲᒡ ᒐᒂᔪᐛ ᑲ ᐃᓯ ᐃᑐᑎᒪᑯᐅᔭᒄ, ᒋ ᐃᑐᑕᑭᓄᐎᒂᓂ ᐊᓐᑕ ᓱᑕᒻ ᐅᑕᓇᒡ ᒋᐸ ᒂᔅᑲᑎᓱᐅᒡ ᐊᓐᒡ ᐊᓐᑕ ᑲ ᑕᒡ ᑭᔭ ᐊᓄᒡ ᐊᔅᒄ ᒋᐸ ᑎᑯᓐ ᐊᓐ ᐅᑕᓇᐤ᙮

²⁴ ᒋ ᐎᑎᒪᑎᓇᐛᐤ ᒪᒃ ᐃᔅᐱ ᐅᑎᒋᐱᔨᒐ ᒐ ᑎᐸᔅᑯᓂᒐᐅ ᒋᓯᑲᒡ, ᒋᔨᐛᐤ ᐅᔅᑕ ᐊᒂᒡ ᒋᑭ ᐃᓯ ᑎᐸᔅᑯᓂᑯᓇᐛᐤ ᐃᔅᐱᔅ ᐊᓐᒡ ᐃᔪᒡ ᓱᑕᒻ ᑲ ᑕᒡ ᐊᑎ ᐊᓂᔭ ᐊᒋ ᐃᔅᐱᔅ ᒥᒐᑎᓯᒡ᙮”

ᒋᓴᔅ ᑲ ᐎᓴᒪᑦ ᐊᐛᔪᐛ ᒐᒋ ᓂᑐᐛᐱᒥᑯᑦ Matthew 11.16-19, 25-30 (Proper-9 Year A)

²⁵ ᐊᑯᑕ ᒪᒃ ᒋᓴᔅ ᑲ ᐊᔭᒥᐊᑦ ᐊ ᐃᔅᒋᔄᑦ, “ᓄᑕ, ᒋ ᓂᓇᔅᑯᒥᑎᓐ ᐊᒋ ᐛᐸᑎᔨᑥᐤ ᐊᓐᒡ ᐊᐛᓐᒋ ᐊᑲ ᐅᒋ ᒋᔅᑯᑎᒧᐛᑭᓄᐎᒡ ᐊᓂᔭᔪᐛ ᒐᒂᔪᐛ ᑲ ᑲᑐᐅᑥᐤ ᑲ ᑭᒐᑕᐛᔨᑕᒡ᙮

²⁶ ᓂᐦᐃ, ᓄᑕ ᒋ ᓂᓇᔅᑯᒥᑎᓐ ᐛᔅ ᐊᐅᑯᓐ ᐅ ᑲ ᐃᓯ ᓇᐊᔨᑎᒥᓐ᙮”

²⁷ ᐊᑯ ᐃᔅᐱ ᑲᒋ ᐃᓯ ᐊᔭᒥᐊᑦ ᒋᓴᔅ ᒋ ᐃᑕᐤ, “ᓄᑕᐎᔾ ᒥᓯᐛ ᒐᒂᔪᐤ ᓂᒋ ᒥᔨᒄ ᒐᒋ ᓂᓇᑭᑐᐛᔨᑎᒧᒡ᙮ ᐛᔅ ᓇᒪ ᐊᐛᓐ ᒋᔅᒐᔨᒪᐤ ᐅᑯᓯᓯᒪᐛ, ᒥᒄ ᐅᑕᐎᒪᐤ ᒋᔅᒐᔨᒪᐤ᙮ ᑭᔭ ᓇᒪ ᐊᐛᓐ ᒋᔅᒐᔨᒪᐤ ᐅᑕᐎᒪᐛ, ᒥᒄ ᐅᑯᓯᓯᒪᐤ ᒋᔅᒐᔨᒪᐤ, ᑭᔭ ᒥᒄ ᐎᔾ ᐅᑯᓯᓯᒪᐤ ᒋᑭ ᐅᑎᓇᐤ ᐊᐛᔪᐛ ᐊᓂᔭᔪᐛ ᒐᒋ ᒋᔅᒐᔨᒪᔨᒋ ᐅᑕᐎᒪᐛ᙮”

²⁸ “ᐸᒋ ᓇᓯᒄ ᒥᓯᐛ ᒋᔨᐛᐤ ᑲ ᐊᑐᔅᒐᔭᒄ ᑭᔭ ᑲ ᑈᒧᐅᑕᔭᒄ, ᒋᑭ ᒥᔨᑎᓇᐛᐤ ᒐᒋ ᐊᔽᓯᔭᒄ᙮

²⁹ ᐅᑎᓂᒪᓱᒄ ᓂᑦ ᐊᐱᔅᑲᑭᓐ, ᒋᔅᒋᓄᐛᐱᒥᒄ ᒪᒃ, ᐛᔅ ᓂᔪᔅᐸᑎᓯᓐ ᑭᔭ ᓂ ᑎᐱᑕᔨᒧᓐ ᓂᑕᐃᒡ᙮ ᑭᔭ ᒋᑭ ᒥᔅᑲᓇᐛᐤ ᒪᒃ ᒐ ᐃᓯ ᐊᔽᐱᒡ ᒋᑦ ᐊᒐᐧᑯᐛᐅᒡ᙮

³⁰ ᐛᔅ ᐛᑎᓐ ᓂᑦ ᐊᐱᔅᑲᒐᐅᓐ ᑭᔭ ᐃᔭᑭᓱᐤ ᓂᐎᐅᓱᐅᓐ᙮”