ᒪᑎᔪᐤ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᓂᔭᔪᐛ ᐊᐛᔪᐛ ᐊ ᑕᔨᒋ ᑲ ᐅᒋ ᐊᓂᔅᒐ ᐱᒪᑎᓯᑦ ᒋᓴᔅ

¹ ᒋᓴᔅ ᙭ ᓂᑭ ᐊᔨᒧᒪᐤ᙮ ᓂᔅᑎᒻ ᐅᑦ ᐊᓂᔅᒐᓯᒪ ᐊ ᑕᔨᒋ ᓂᑭ ᐅᒋ ᒋᒋᐱᔨᓐ ᐊ ᐊᔨᒧᒥᒃ᙮ ᐊᓂᔭᐧᑲ ᒋᓴᐅᒋᒪᐛ ᑎᐱᑕ ᑭᔭ ᐊᓂᔭᐧᑲ ᐊᑉᕋᐊᒪ ᐊ ᑕᔨᒋ ᒋ ᐅᒋ ᐊᓂᔅᒐ ᐱᒪᑎᓯᐤ᙮

² ᐊᑉᕋᐊᒪ ᒪᒃ ᐊᐃᓯᑲ ᒋ ᐅᑯᓱᐤ, ᑭᔭ ᐊᐃᓯᒃ ᒐᑭᐸ ᒋ ᐅᑯᓱᐤ, ᒐᑭᑉ ᒪᒃ ᒍᑕᔨᒋ ᒋ ᐅᑯᓱᐤ ᑭᔭ ᐊᓂᔭ ᐎᐧᑲᓂᓯᔨᔪᐛ,

³ ᒍᑕ ᒪᒃ ᒋ ᐅᑯᓱᐤ ᐸᕋᓴ ᑭᔭ ᓯᕋᔨᒋ, ᑕᐃᒪᕆᔨᒋ ᒪᒃ ᒋ ᐅᑲᐎᐅᒡ᙮ ᐸᕋᔅ ᒪᒃ ᒋ ᐅᑯᓱᐤ ᐊᔅᕈᓇ, ᐊᔅᕈᓐ ᒪᒃ ᒋ ᐅᑯᓱᐤ ᕋᒪᔨᒋ᙮

⁴ ᕋᒻ ᒪᒃ ᒋ ᐅᑯᓱᐤ ᐊᒥᓂᑕᐸ, ᐊᒥᓂᑕᑉ ᒪᒃ ᒋ ᐅᑯᓱᐤ ᓇᓱᓇ, ᓇᓱᓐ ᒪᒃ ᒋ ᐅᑯᓱᐤ ᓴᓪᒧᓇ᙮

⁵ ᓴᓪᒧᓐ ᒪᒃ ᒋ ᐅᑯᓱᐤ ᐳᐊᓴ, ᕋᐊᐸ ᒋ ᐅᑲᐎᐤ᙮ ᐳᐊᔅ ᒪᒃ ᒋ ᐅᑯᓱᐤ ᐅᐸᑕ, ᕈᑕ ᒋ ᐅᑲᐎᐤ᙮ ᐅᐸᑦ ᒪᒃ ᒋ ᐅᑯᓱᐤ ᒐᓯᔨᒋ,

⁶ ᒐᓯᔾ ᒪᒃ ᒋᓴᐅᒋᒪᐛ ᑎᐱᑕ ᒋ ᐅᑯᓱᐤ᙮ ᑎᐱᑦ ᒪᒃ ᓴᓚᒥᓇ ᒋ ᐅᑯᓱᐤ, ᐅᕆᐊᔨᒋ ᐎᐎᔪᐛ ᒪᒃ ᒋ ᐅᑲᐎᐤ ᓴᓚᒥᓐ᙮

⁷ ᓴᓚᒥᓐ ᒪᒃ ᒋ ᐅᑯᓱᐤ ᕋᐅᐳᒪ, ᕋᐅᐳᒻ ᒪᒃ ᒋ ᐅᑯᓱᐤ ᐊᐸᐃᒐᔨᒋ᙮ ᐊᐸᐃᒐ ᒪᒃ ᒋ ᐅᑯᓱᐤ ᐊᓴᔨᒋ,

⁸ ᐊᓴ ᒪᒃ ᒋ ᐅᑯᓱᐤ ᒐᐅᓴᐸᑕ, ᒐᐅᓴᐸᑦ ᒪᒃ ᒋ ᐅᑯᓱᐤ ᒐᐊᕋᒪ᙮ ᒐᐊᕋᒻ ᒪᒃ ᒋ ᐅᑯᓱᐤ ᔪᓴᔭᔨᒋ,

⁹ ᔪᓴᔭ ᒪᒃ ᒋ ᐅᑯᓱᐤ ᒠᑕᒪ, ᒠᑕᒻ ᒪᒃ ᒋ ᐅᑯᓱᐤ ᐊᐊᓴ᙮ ᐊᐊᔅ ᒪᒃ ᒋ ᐅᑯᓱᐤ ᐊᓯᑲᔭᔨᒋ,

¹⁰ ᐊᓯᑲᔭ ᒪᒃ ᒋ ᐅᑯᓱᐤ ᒪᓇᓴᔨᒋ᙮ ᒪᓇᓴ ᒪᒃ ᒋ ᐅᑯᓱᐤ ᐊᒧᓇ, ᐊᒧᓐ ᒪᒃ ᒍᓴᔭᔨᒋ ᒋ ᐅᑯᓱᐤ᙮

¹¹ ᒍᓴᔭ ᒪᒃ ᒋ ᐅᑯᓱᐤ ᒐᑯᓇᔭ ᑭᔭ ᐊᓂᔭ ᐎᐧᑲᓂᓯᔪᐛ᙮ ᐊᐅᒄ ᐅᔭ ᒪᒂᒡ ᐊᓐᒡ ᐃᔅᕋᐃᓪ ᐃᔪᒡ ᐊᓐᑕ ᐸᐱᓗᓐ ᑲ ᐃᑐᑕᐊᑭᓄᐎᒡ ᐊ ᒪᑯᓇᑭᓄᐎᒡ᙮

¹² ᓴᔅ ᒪᒃ ᐊᓐᒡ ᐃᔪᒡ ᐊᓐᑕ ᐸᐱᓗᓐ ᒋ ᑕᐅᒡ ᐊᓐᑕ ᑲ ᐃᑐᑕᐊᑭᓄᐎᒡ, ᐊᑯ ᒐᑯᓇᔭ ᑲ ᐅᑯᓯᑦ, ᓴᓪᑎᔭᓪ ᒋ ᐃᓯᓂᐧᑲᑕᐤ᙮ ᓴᓪᑎᔭᓪ ᒪᒃ ᓯᕈᐸᐸᓪ ᒋ ᐃᓯᓂᐧᑲᓱᔪᐛ ᐅᑯᓴ᙮

¹³ ᓯᕈᐸᐸᓪ ᒪᒃ ᒋ ᐅᑯᓱᐤ ᐊᐱᔪᑕ, ᐊᐱᔪᑦ ᒪᒃ ᒋ ᐅᑯᓱᐤ ᐃᓚᔭᑭᒪ, ᐃᓚᔭᑭᒻ ᒪᒃ ᒋ ᐅᑯᓱᐤ ᐊᓴᕋ,

¹⁴ ᐊᓴᕐ ᒪᒃ ᒋ ᐅᑯᓱᐤ ᓴᑕᑲ, ᓴᑕᒃ ᒪᒃ ᒋ ᐅᑯᓱᐤ ᐊᑭᒪ, ᐊᑭᒻ ᒪᒃ ᒋ ᐅᑯᓱᐤ ᐃᓕᔪᑕ,

¹⁵ ᐃᓕᔪᑦ ᒪᒃ ᒋ ᐅᑯᓱᐤ ᐃᓕᐊᓴᕋ, ᐃᓕᐊᓴᕐ ᒪᒃ ᒋ ᐅᑯᓱᐤ ᒪᑕᓇ, ᒪᑕᓐ ᒪᒃ ᒋ ᐅᑯᓱᐤ ᒐᑭᐸ,

¹⁶ ᒐᑭᑉ ᒪᒃ ᒍᓯᑉ ᒋ ᐃᓯᓂᐧᑲᓱᔪᐛ ᐅᑯᓴ, ᐊᐅᒄ ᒪᒃ ᐅᔭ ᒪᕆ ᑲ ᐅᓇᐸᒥᑦ᙮ ᐊᐅᒄ ᐅᔭ ᒪᕆᔨᒋ ᑲ ᐅᑲᐎᑦ ᒋᓴᔅ ᐊᓐ ᙭ ᑲ ᐃᓯᓂᐧᑲᑕᑭᓄᐅᑦ᙮

¹⁷ ᓇᐅᓴᑉ ᒪᒃ ᒋ ᐃᑕᑎᓱᐅᒡ ᐅᒡ ᐅᑕᐎᒪᐅᒡ ᑭᔭ ᐅᑯᓯᓯᒪᐅᒡ ᐊᓐᑕ ᐊᑉᕋᐊᒪ ᐊ ᑕᔨᒋ ᐊᒋ ᐅᒋ ᐊᓂᔅᒐ ᐱᒪᑎᓯᒡ ᐊᓐᑕ ᑎᐱᑦ ᐊ ᑕᑦ ᐃᔅ᙮ ᓇᐅᓴᑉ ᑭᔭ ᒋ ᐃᑕᑎᓱᐅᒡ ᑎᐱᑕ ᐊ ᑕᔨᒋ ᐊᒋ ᐅᒋ ᐊᓂᔅᒐ ᐱᒪᑎᓯᒡ ᐅᑕᐎᒪᐅᒡ ᐊᓐᑕ ᐃᓯ ᐃᔅᐱᔅ ᑲ ᒪᑯᓇᑭᓄᐎᒡ ᐃᔪᒡ ᐊᓐᑕ ᐸᐱᓗᓂᒡ ᑲ ᐃᑐᑕᐊᑭᓄᐎᒡ᙮ ᐊᑯᑕ ᒥᓐ ᓇᐅᓴᑉ ᑲ ᐅᒋ ᐊᓂᔅᒐ ᐱᒪᑎᓯᒡ ᐅᑕᐎᒪᐅᒡ ᐊᓐᑕ ᐅᒋ ᐊᓐᑕ ᒪᒃ ᐃᔅ ᙭ ᑲ ᐱᒪᑎᓯᑦ᙮

ᒋᓴᔅ ᑲ ᐱᒪᑎᓯᑦ Matthew 1.18-25 (Advent-4 Year A)

¹⁸ ᒪᐅ ᒪᒃ ᑲ ᐃᔅᐱᔨᒡ ᐃᔅᐱ ᒐ ᐱᒪᑎᓯᑦ ᒋᓴᔅ ᙭᙮ ᒪᕆ, ᐊᓂᔭᔪᐛ ᒋᓴᔅ ᒐ ᐅᑲᐎᑦ ᒋᐸ ᓂᐳᐅᒡ ᐊᓂᔭᔪᐛ ᒍᓯᐸ, ᒥᒄ ᒪᒃ ᐊᔅᒄ ᐊᑲ ᐅᒋ ᓂᐳᐅᒡ ᒋᔅᒐᔨᑎᒻ ᒪᕆ ᐊ ᑭᓄᐛᔨᒪᐅᓱᑦ᙮ ᐊᓂᔭ ᒪᒃ ᐊᐛᓴ ᑲ ᐊᔭᐛᑦ ᑲ ᐸᔭᒋᓯᔨᒋ ᐊᒐᒂ ᒋ ᐃᑐᑕᑯᐤ ᒐᒋ ᐊᔭᐛᑦ᙮

¹⁹ ᐊᓐ ᒪᒃ ᓇᐸᐤ ᒍᓯᑉ ᒧᔅ ᑯᐃᔅᒄ ᑲ ᐎ ᐃᑎᑦ ᒋ ᐃᑕᔨᑕᑯᓱᐤ᙮ ᐃᔅᐱ ᒪᒃ ᒐᔅᒐᔨᒪᑦ ᒪᕆᔨᒋ ᐊ ᑭᓄᐛᔨᒪᐅᓱᔨᒋ ᓇᒪ ᐅᒋ ᓂᑐᐛᔨᒪᐤ ᓂᑐᐎᔾ ᒐᒋ ᐃᑕᒋᒪᑭᓄᔨᒋ ᐊᓐᑕ ᐊ ᒥᒐᑎᓇᓄᐎᒡ, ᐊᑯ ᑲ ᑯᒂᑕᔨᑕᐧᒃ ᒋᔭᒻ ᒐᒋ ᓂᑭᑕᑦ᙮

²⁰ ᒪᒂᒡ ᐅᔭ ᐊ ᒪᒥᑐᓇᔨᑕᐧᒃ, ᐃᔅᐱ ᒪᒃ ᓇᐸᑦ, ᐅᑎᐸᔨᒋᒐᐛ ᐅᑦ ᐊᓐᒋᓂᒥᔪᐛ ᒋ ᓄᑯᓯᔅᑕᑯᐤ ᐅᐳᐛᒧᐅᓂᒡ ᐊ ᐃᑎᑯᑦ, “ᒍᓯᑉ, ᒋᔾ ᐊᓂᔭ ᑎᐱᑦ ᐊᓂᔅᒐ ᐅᑯᓯᓴ, ᐊᑲᐎᔾ ᑯᔅᑕᒋ ᒐᒋ ᐎᒋᒥᑦ ᒪᕆ ᐛᔅ ᑲ ᐸᔭᒋᓯᔨᒋ ᐊᒐᒂ ᒋ ᐃᑐᑕᑯᐤ ᒐᒋ ᐊᔭᐛᑦ ᐊᓂᔭᔪᐛ ᐊᐛᓴ᙮

²¹ ᒋᑭ ᓇᐸᓯᐎᔪᐛ ᐊᓂᔭ ᐅᑦ ᐊᐛᓯᒪ, ᒋᓴᔅ ᒋᑭ ᐃᓯᓂᐧᑲᑕᐛᐤ, ᐛᔅ ᐊᐅᒄ ᐅ ᒐ ᐱᒪᒋᐊᑦ ᐅᑦ ᐃᔨᒪ ᐅᒥᒐᑎᓯᐅᓂᔨᒡ ᐅᒡ᙮” ᐊᐅᑯᐤ ᐅᔭ ᑲ ᐃᑎᑯᑦ ᒍᓯᑉ ᐊᓂᔭ ᐊᓐᒋᓇ᙮

²² ᐊᐅᑯᓐ ᐊᓐ ᑲ ᐃᔅᐱᔨᒡ ᑕᓐ ᑲ ᐸᒋ ᐃᔅᒋᔄᔨᒋ ᐅᑎᐸᔨᒋᒐᐤ ᐅᒋᔅᒋᐛᐃᒐᓯᒪ ᑲ ᐃᔅᒋᔄᔨᒋ,

²³ “ᐃᔎᔅ ᐊᑲ ᐊᔅᒄ ᐅᒋ ᒋᔅᒐᔨᒥᑯᑦ ᓇᐸᐛ ᒋᑭ ᐊᔭᐛᐤ ᐊᐛᓴ, ᒋᑭ ᓇᐸᓯᐎᔪᐛ ᒪᒃ, ᐃᒪᓄᐃᓪ ᒋᑭ ᐃᓯᓂᐧᑲᑕᑭᓄᐤ᙮” ᒋᓴᒪᓂᑐᐤ ᐊ ᐸᒋ ᑕᑦ ᐅᑕ ᐊ ᑕᔭᐧᒄ ᐃᔅᒋᔄᒥᑭᓐ ᐅ ᐃᓯᓂᐧᑲᓱᐅᓐ᙮

²⁴ ᐃᔅᐱ ᒪᒃ ᐱᔭᑯᐱᔨᑦ ᒍᓯᑉ ᐊᒋ ᓂᐸᑦ, ᒋ ᐃᑐᑎᒻ ᑕᓐ ᑲ ᐃᑎᓱᒥᑯᑦ ᐊᓂᔭ ᐅᑎᐸᔨᒋᒐᐛ ᐅᑦ ᐊᓐᒋᓂᒥᔪᐛ, ᒋ ᐎᒋᒪᐤ ᐊᓂᔭ ᒪᕆᔨᒋ᙮

²⁵ ᒥᒄ ᒪᒃ ᓇᒪ ᐊᔅᒄ ᐅᒋ ᐎᐸᒪᐤ ᐸᑐᔅ ᑲ ᐱᒪᑎᓯᔨᒋ ᐊᓂᔭᔪᐛ ᐅᑦ ᐊᐛᓯᒥᔪᐛ᙮ ᒍᓯᑉ ᒪᒃ, ᒋᓴᔅ ᒋ ᐃᓯᓂᐧᑲᑕᐤ ᐊᓂᔭᔪᐛ ᐊᐛᓴ᙮