ᓗᒃ 5 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᒥᔅᑎᐱᑕᐅᔭᒡ ᐊᓐᒡ ᓂᔅᑎᒻ ᑲ ᐅᑎᓇᑭᓄᐎᒡ ᒋᔅᒋᓄᐊᒧᐛᑭᓐᒡ Luke 5.1-11 (Epiphany-5 Year C)

¹ ᐸᐃᒂᐤ ᒋᓴᔅ ᒪᒂᒡ ᐊ ᓂᐳᐅᑦ ᓯᓱᒡ ᓴᑲᐃᑭᓂᒡ ᑲᓇᓴᕆᑦ ᐊ ᐃᓯᓂᐧᑲᑕᔨᒡ, ᒥᒐᑦ ᒪᒃ ᐃᔪᐛ ᐊ ᐛᔅᑲᑲᐳᔅᑕᑯᑦ ᐊ ᓂᑐᑎᒥᔨᒋ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ,

² ᒋ ᐅᒋ ᐛᐸᑎᒻ ᓂᓱ ᐊ ᒥᓴᔨᒋ ᐅᐤᑕ ᐊᓐᑕ ᓯᓱᒡ, ᐊᒋ ᓂᑭᑎᒥᒂᓂ ᑲ ᓄᑎᒪᓴᔨᒋ ᒐᒋ ᒋᔅᑕᐸᐅᔭᔨᒋ ᐅᑦ ᐊᐃᐱᔨᐛ᙮

³ ᒋ ᐳᓱᐤ ᒪᒃ ᒋᓴᔅ ᐸᐃᒄ ᐅᐤᑎᔪᐤ, ᐊᓂᔭ ᓴᐃᒥᓐ ᐱᑕᕋ ᑲ ᑎᐱᔨᐛᐅᓯᔨᒋ᙮ ᒂ ᑯᒂᒋᒪᑦ ᓴᐃᒥᓐ ᐱᑕᕋ ᒐᒋ ᐊᐱᓯᔅ ᒧᓴᐅᐊᒥᔨᒋ᙮ ᐊᑯ ᒪᒃ ᒂ ᐛᐛᔨᐱᑦ ᒋᓴᔅ ᑲ ᒋᔅᑯᑎᒪᒐᑦ ᐊᓐᑕ ᐊ ᒥᓴᔨᒡ ᐅᐤᑎᒡ ᐅᒡ᙮

⁴ ᐃᔅᐱ ᒪᒃ ᑲᒋ ᐃᓯ ᐃᔨᒥᑦ ᒋᓴᔅ ᒋ ᐃᑕᐤ ᐊᓂᔭ ᓴᐃᒥᓇ, “ᒧᓴᐅᐊᒧᒄ ᐊᓐᑕ ᐊ ᒋᔅᑲᔪᐛᒡ ᒐ ᐱᑭᔅᑐᐛᐊᑯᒡ ᒋᑦ ᐊᐃᐱᐛᐅᒡ᙮”

⁵ ᓴᐃᒥᓐ ᒪᒃ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᒋᔅᑯᑎᒪᒐᓱᐤ, ᐃᔅᑭᓐ ᑎᐱᔅᑲᐛ ᓂᒋ ᓄᑎᒪᓴᓇᓐ, ᓇᒪ ᒪᒃ ᓂ ᐅᒋ ᐱᑕᐅᔭᓇᓐ᙮ ᐊᔪᐛᒡ ᒪᒃ ᓂᑭ ᐱᑭᔅᑐᐛᐛᓇᓂᒡ ᓂᑦ ᐊᐃᐱᓇᓐᒡ ᐛᔅ ᐊᐅᑯᓐ ᐊ ᐃᓯᔭᒡ ᒐᒋ ᑎᔭᒡ᙮”

⁶ ᐃᔅᐱ ᒪᒃ ᑲ ᐱᑭᔅᑐᐛᐛᒡ ᐅᑦ ᐊᐃᐱᐛᐛ ᒋ ᐊᑎ ᐱᑯᐱᔪᐛ ᐅᑦ ᐊᐃᐱᐛᐛ ᑲ ᐃᔅᐱᔅ ᒋ ᒥᔅᑎᐱᑕᐅᔭᒡ᙮

⁷ ᐊᑯ ᒂ ᐛᔅᑕᒧᐛᒡ ᐎᒋᓄᑎᒪᓴᐛ, ᑯᑎᒋᔪᐤ ᐅᐤᑎᔪᐤ ᑲ ᑕᔨᒋ ᒐᒋ ᐸᒋ ᐎᒋᐃᑯᒡ, ᐊᑯ ᒂ ᐸᒋ ᐃᔅᒋᒪᔨᒋ᙮ ᑕᐱᔅᑯᓐ ᒪᒃ ᐊᓂᔭᔪᐛ ᐊ ᒥᓴᔨᒋ ᐅᐤᑕ ᒋ ᐎ ᑯᓴᐸᐛ ᑲ ᐃᔅᐱᔅ ᓴᑭᔅᒋᓇᒡ ᓂᒪᓯᒡ᙮

⁸ ᐃᔅᐱ ᒪᒃ ᓴᐃᒥᓐ ᐱᑕᕐ ᐎᔭᐸᑕᐧᒃ ᐊ ᐃᔅᐱᔨᒡ ᒋ ᐅᒋᒋᐧᑯᓂᐱᔪᐤ ᐅᑎᔅᑯᐤ ᒋᓴᓴ ᐊ ᑕᔨᒋ, ᐊ ᐃᔅᒋᔄᑦ, “ᓇᑭᓯ, ᐅᑎᐸᔨᒋᒐᐤ, ᐛᔅ ᓂ ᒥᒐᑎᓯᓐ᙮”

⁹ ᒋ ᒥᔅᑲᑕᔨᑎᒧᒡ ᓴᐃᒥᓐ ᑭᔭ ᐊᓂᔭ ᐎᒋᓄᑎᒪᓴᐛ ᐊᓂᔭ ᑲ ᐃᔅᐱᔅ ᒋ ᒥᔅᑎ ᐱᑕᐅᔭᒡ᙮

¹⁰ ᑭᔭ ᐊᓂᔭ ᐎᒋᓄᑎᒪᓴᐛ ᒋᒥᓴ ᑭᔭ ᒠᓇ, ᓴᐱᑎ ᐅᑯᓴ ᒋ ᒥᔅᑲᑕᔨᑎᒧᒡ ᑭᔭ ᐎᔨᐛᐤ᙮ ᒋᓴᔅ ᒪᒃ ᒋ ᐃᑕᐤ ᐊᓂᔭ ᓴᐃᒥᓇ, “ᐊᑲᐎᔾ ᓴᒋᓯ᙮ ᐛᔅ ᒧᔭᒻ ᐃᔪᒡ ᐊ ᐱᑕᐅᔭᔭᒄ ᐊᐅᑯᓐ ᒐ ᐃᑎᔭᒄ ᐊᑯ ᒐ ᐊᑎ ᑭᒐᔅᒋᒪᑯᒡ᙮”

¹¹ ᒋ ᓴᔅᒋᐱᑎᒧᒡ ᒪᒃ ᐅᑦ ᐅᐤᑐᐛᐛ ᒂ ᓂᑭᑕᒡ ᐊᓐᑕ ᒥᓯᐛ ᒐᒂᔪᐤ, ᐊᑯ ᒂ ᐎᒐᐛᒡ ᒋᓴᓴ᙮

ᑲ ᒥᓏᒋᐊᑭᓄᐅᑦ ᓇᐸᐤ ᑲ ᐊᐧᑯᓯᑦ ᐅᓯᑲᒡ

¹² ᒪᒂᒡ ᒪᒃ ᒋᓴᔅ ᐊ ᑕᑦ ᐊᓐᑕ ᐸᐃᒄ ᐊᓂᔭ ᐅᑕᓇᔪᐤ ᒋ ᑕᐤ ᓇᐸᐤ ᐊᓐᑕ ᐅᒥᒋᐛᔅᐱᓇᐅᓂᔪᐤ ᐊ ᒪᔭᑎᓂᔨᒡ ᐊ ᐊᔭᑦ ᒥᓯᐛ ᐊ ᐃᔅᐱᑎᑦ᙮ ᐃᔅᐱ ᒪᒃ ᐎᔭᐱᒪᑦ ᒋᓴᓴ ᒋ ᐅᑎᑎᐱᔪᐤ ᐊᓐᑕ ᐊ ᑕᔨᒡ, ᐊᑯ ᓇᔅᒡ ᒂ ᓂᑐᐛᔨᒪᑦ ᒐᒋ ᐎᒋᐃᑯᑦ, ᐊ ᐃᑕᑦ, “ᐅᑎᐸᔨᒋᒐᐤ, ᐎ ᐸᒋ ᐎᒋᐃᓇ ᒋᑭ ᒋ ᐃᑐᑕᓐ ᒐᒋ ᐸᔭᒋᓯᔭᓐ᙮”

¹³ ᒋᓴᔅ ᒪᒃ ᒋ ᓱᐅᓂᔅᒐᔪᐤ ᒂ ᑕᒋᓇᑦ ᐊ ᐃᑕᑦ, “ᒋ ᐎ ᐎᒋᐃᑎᓐ᙮ ᐸᔭᒋᓯ ᒪᒃ᙮” ᑎᐛᒡ ᒪᒃ ᒋ ᒥᓏᑎᓯᐤ ᐊᓂᔭ ᑲ ᐃᑕᔅᐱᓇᑦ ᐊᓐ ᓇᐸᐤ᙮

¹⁴ ᒋᓴᔅ ᒪᒃ ᒋ ᐃᑎᓱᒪᐤ ᐊ ᐃᑕᑦ, “ᐊᑲᐎᔾ ᐎᑎᒧᐤ ᐊᐛᓐ ᑕᓐ ᑲ ᐃᔅᐱᔨᓐ᙮ ᒪᒋ, ᓄᑯᐃᓱᐤ ᐊᓄᒡ ᒍᐤ ᐊᔭᒥᐊᐅᒋᒪᐤ ᐊ ᑕᑦ ᒐ ᐛᐱᒥᔅᒃ ᐊᒋ ᒥᓏᒋᐃᑯᔨᓐ᙮ ᑭᔭ ᒐ ᐱᔅᑎᓂᒐᔨᓐ ᐊᓐ ᒐᒂᓐ ᐊᓂᔭ ᒧᓱᔅ ᑲ ᐃᑎᓱᐛᑦ ᒐ ᐱᔅᑎᓂᑲᓄᐎᒡ᙮ ᐅ ᒪᒃ ᐃᑎᔨᓇ ᒥᓯᐛ ᐊᐛᓐ ᒋᑭ ᒋᔅᒐᔨᑎᒻ ᑕᑈ ᓇᔅᒡ ᐊᒋ ᐸᔭᒋᐃᑯᔨᓐ᙮”

¹⁵ ᒋ ᒥᓯᑕᐱᔪᐤ ᒪᒃ ᒋᓴᔅ ᐊ ᐃᑕᒋᒪᑭᓄᐅᑦ᙮ ᒥᒐᑦ ᒪᒃ ᐊᐛᔪᐛ ᒋ ᐸᒋ ᓂᑐᐛᐱᒥᑯᐤ ᐊ ᐎ ᓂᑐᑕᑯᑦ ᑭᔭ ᐊ ᐎ ᒥᓏᒋᐃᑯᓯᔨᒋ᙮

¹⁶ ᒋ ᐃᑐᑕᐤ ᒪᒃ ᒪᓐ ᒋᓴᔅ ᐊᓐᑕ ᐸᐧᑯᑎᔅᑭᒥᑲᒡ ᐊᑯ ᑲᒋ ᐊᔭᒥᐊᑦ᙮

ᑲ ᒥᓏᒋᐊᑭᓄᐅᑦ ᓇᐸᐤ ᐊᑲ ᐅᒋ ᐊᑎᓂᓱᑦ

¹⁷ ᐸᐃᒂᐤ ᒋᓴᔅ ᐊ ᒋᔅᑯᑎᒪᒐᑦ ᒋ ᑕᔪᐛ ᐊᓐᑕ ᐸᕆᓯᐊ ᑭᔭ ᐊᓂᔭ ᑲ ᒋᔅᑯᑎᒪᒐᔨᒋ ᐊᔭᒥᐊᐅ ᐎᓱᐛᐅᓂᔪᐤ᙮ ᐅᒡ ᒪᒃ ᓇᐸᐅᒡ ᒥᓯᐛ ᐅᑕᓇᒡ ᒋ ᐅᑐᑕᐅᒡ, ᐊᓐᑕ ᑲᓕᓕᒡ ᑭᔭ ᒍᑎᔭ ᐊᔅᒋᒡ ᑲ ᑎᑯᓂᔨᒋ ᑭᔭ ᐊᓐᑕ ᐅᑕᓇᒡ ᒋᕈᓯᓕᒥᒡ ᒋ ᐅᑐᑕᐅᒡ᙮ ᒋᓴᔅ ᒪᒃ ᒋ ᐊᔭᐛᐤ ᒋᓴᒪᓂᑐᐛ ᐅᑭᔅᒋᐅᓂᔪᐤ ᒐᒋ ᒥᓏᒋᐃᐛᑦ᙮

¹⁸ ᒪᒂᒡ ᒪᒃ ᐊ ᒋᔅᑯᑎᒪᒐᑦ ᒋᓴᔅ ᒋ ᐅᒋ ᐸᓱᐛᐅᒡ ᓇᐸᐅᒡ ᐎᑕᐸᐛᐛ ᐊᑲ ᓂᔅᑐᓯᔨᒋ ᐊᔅᐱᓯᒧᓂᒡ ᐊ ᐱᒥᓯᓂᔨᒋ᙮ ᒋ ᐎ ᐱᑎᑲᐊᐅᒡ ᐊᓐᑕ ᒥᒋᐛᐱᒡ ᐊᒋ ᐎ ᐱᒥᓯᒪᒡ ᑎᐱᔅᑯᒡ ᒋᓴᓴ ᐊ ᑕᔨᒋ᙮

¹⁹ ᓇᒪ ᒪᒃ ᐅᒋ ᐱᑎᑲᐊᐅᒡ ᐛᓴ ᐊᒋ ᒥᒐᑎᓇᓄᐎᒡ ᐱᑎᑭᒥᒡ᙮ ᐊᑯ ᒪᒃ ᑲ ᐊᑯᓯᑕᐊᒡ ᐊᓂᔭ ᒥᒋᐛᐱᔪᐤ, ᒂ ᐱᑯᓇᐱᑕᒡ ᐸᐧᑯᔪᐤ ᐊᓐᑕ ᑕᐧᑯᒡ ᐊᓐᑕ ᑲ ᐅᒋ ᐱᔅᑕᐱᒐᓇᒡ ᐊᓂᔭ ᓇᐸᐛ, ᐊᓐᑕ ᑕᑕᐅᒡ ᓇᑕ ᐊ ᑕᓄᐎᒡ, ᑎᐱᔅᑯᒡ ᒋᓴᓴ ᐊ ᑕᔨᒋ ᒂ ᐱᔅᑎᓇᒡ᙮

²⁰ ᐃᔅᐱ ᒪᒃ ᒋᓴᔅ ᐎᔭᐸᑎᒺᑦ ᐅᑕᑈᑎᒧᐅᓂᔪᐤ ᐊᓂᔭᔪᐛ ᓇᐸᐛ ᐊᑯ ᒂ ᐃᑕᑦ ᐊᓂᔭ ᓇᐸᐛ ᑲ ᐱᒥᓯᓂᔨᒋ, “ᓂᐎᒐᐛᑭᓐ, ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ᙮”

²¹ ᐊᑯ ᐊᓐᒡ ᐸᕆᓯᔨᒡ ᑭᔭ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᒂ ᐊᑎ ᐊᔨᒧᑎᒺᒡ ᐅᔭ ᑲ ᐃᔅᒋᔄᔨᒋ ᐊ ᐃᔅᒋᔄᒡ᙮ “ᐸᔅᑕᒧᐤ ᐅ ᓇᐸᐤ ᐊ ᐃᔅᒋᔄᑦ, ‘ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ᙮’ ᓇᒪ ᐊᐛᓐ ᒋᑭ ᒋ ᐛᐸᔨᑎᒧᐛᐤ ᐊᐛᔪᐛ ᐅᒥᒋᑥᐅᓂᔪᐛ, ᒥᒄ ᒋᓴᒪᓂᑐᐤ᙮”

²² ᐃᔅᐱ ᒋᓴᔅ ᒐᔅᒐᔨᒪᑦ ᐊ ᐃᓯ ᐃᔨᒥᐃᑐᔨᒋ ᒋ ᐃᑕᐤ, “ᒐᒂᓐ ᐛᒋ ᒪᒥᑐᓇᔨᑎᒥᐃᑯᔭᒄ ᐊᓐ ᑲ ᐃᔅᒋᔄᔭᓐ ?

²³ ᑕᓐ ᒪᒃ ᐃᐛᒃ ᐎᔭᑎᓂᔨᒡ ᒐᒋ ᐃᑕᑭᓄᐅᑦ, ‘ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ,’ ᑭᔭ ᒪᒃ ᒐᒋ ᐃᑕᑭᓄᐅᑦ, ‘ᐅᓂᔾ, ᑭᔭ ᐱᒧᑕ’ ?

²⁴ ᒋᑭ ᐛᐸᑎᔨᑎᓇᐛᐤ ᐃᔪᐤ ᐅᑯᓯᓴᓐ ᑕᑈ ᐎᔾ ᐊ ᐊᔭᑦ ᑎᐸᔨᒋᒐᐅᓂᔪᐤ ᐅᑕ ᐊᔅᒋᒡ ᒐᒋ ᐛᐸᔨᑎᒪᒐᑦ ᒥᒋᑥᐅᓇ᙮” ᐊᑯ ᒋᓴᔅ ᒂ ᐃᑕᑦ ᐊᓂᔭ ᓇᐸᐛ ᐊᑲ ᐅᒋ ᓂᔅᑐᓯᔨᒋ, “ᐱᓯᑯ, ᐅᑎᓇ ᒋᑦ ᐊᔅᐱᓯᒧᓐ, ᒐ ᒋᐛᔨᓐ᙮”

²⁵ ᑎᐛᒡ ᒪᒃ ᒋ ᐱᓯᑯᐤ ᐊᓐ ᓇᐸᐤ ᒪᒂᒡ ᐊᓐᑕ ᐊ ᒥᒐᑎᓇᓄᐎᒡ, ᒂ ᐊᑎ ᐅᑎᓇᐧᒃ ᐊᓂᔭᔪᐤ ᐅᑦ ᐊᔅᐱᓯᒧᓐ ᐊᑯ ᒂ ᐊᑎ ᒋᐛᑦ ᐊ ᒪᒥᒋᒪᑦ ᒋᓴᒪᓂᑐᐛ᙮

²⁶ ᒥᓯᐛ ᒪᒃ ᐊᓐᒡ ᑲ ᐛᐸᑕᒡ ᑕᓐ ᑲ ᐃᔅᐱᔨᒡ ᒋ ᒥᔅᑲᑕᔨᑎᒥᐃᑯᐅᒡ ᑭᔭ ᒋ ᓴᒋᓱᐅᒡ᙮ ᒋ ᒋᔅᑕᒋᒪᐅᒡ ᒋᓴᒪᓂᑐᐛ ᐊ ᐃᔅᒋᔄᒡ, “ᑕᑈ ᒪᒥᔅᑲᒡ ᒋ ᐊᑎ ᐃᓯ ᐛᐸᑕᓇᓄᐤ ᒐᒂᓐ ᐊᓄᒡ ᐊ ᐃᔅᐱᔨᒡ᙮”

ᓕᐸᐃ ᑲ ᑎᐸᒋᒪᑭᓄᐅᑦ

²⁷ ᐃᔅᐱ ᒪᒃ ᑲ ᒋᔅᐱᔨᒡ ᐅ ᒋ ᐎᐎᐤ ᒋᓴᔅ ᐊᓂᔭ ᒥᒋᐛᐱᔪᐤ ᐊᑯ ᒂ ᔅᑐᑕᑦ᙮ ᒋ ᐛᐱᒪᐤ ᒪᒃ ᓇᐸᐛ ᐊ ᐊᐱᔨᒋ ᐅᒥᓯᓇᐃᒐᐅᒋᐛᐱᒡ, ᓕᐸᐃ ᐊ ᐃᓯᓂᐧᑲᓱᔨᒋ, ᑲ ᒪᒧᓴᒋᓇᐧᒃ ᒋᓴᐅᒋᒪᐤ ᓱᓇᔭᔪᐤ ᐊ ᐃᑕᐱᑎᓯᔨᒋ᙮ ᐊᑯ ᒋᓴᔅ ᒂ ᐃᑕᑦ, “ᐸᒋ ᐛᐎᒐᐎ᙮”

²⁸ ᒂ ᐱᓯᑯᑦ ᓕᐸᐃ ᒂ ᓂᑭᑕᐧᒃ ᒥᓯᐛ ᒐᒂᔪᐤ ᑲ ᐃᓯ ᐊᔭᑦ ᐊᑯ ᒂ ᐛᐎᒐᐛᑦ ᒋᓴᓴ᙮

²⁹ ᐸᑎᒪ ᒪᒃ ᒋ ᒥᑯᓴᐊᐤ ᒋᓴᓴ ᐊᓐᑕ ᐎᒋᒡ᙮ ᒋ ᒥᒐᑎᔪᐛ ᒪᒃ ᑯᑎᑲ ᑲ ᒪᒧᓴᒋᓂᒥᔨᒋ ᒋᓴᐅᒋᒪᐤ ᓱᓇᔭᔪᐤ ᐊ ᐃᑕᐱᑎᓯᔨᒋ ᑭᔭ ᑯᑎᑲ ᐊᐛᔪᐛ ᒋ ᑕᔪᐛ ᐊᒋ ᐎᒋᒥᒋᓱᒥᑯᒡ᙮

³⁰ ᐊᑯ ᒪᒃ ᐸᕆᓯᔨᒡ ᑭᔭ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᒂ ᐃᔨᒪᐊᒡ ᒋᓴᓴ ᐅᒋᔅᒋᓄᐊᒧᐛᑭᓂᔪᐛ ᐊ ᐃᑕᒡ, “ᒐᒂᓐ ᐛᒋ ᐎᒋᒥᒋᓱᒪᑯᒡ ᐊᓐᒡ ᑲ ᒪᒧᓴᒋᓇᒡ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᒡ ᑭᔭ ᐊᓐᒡ ᑯᑎᑭᒡ ᐅᒥᒋᑥᐅᒡ ?”

³¹ ᒋᓴᔅ ᒪᒃ ᒋ ᐎᑎᒪᐛᐤ ᐊ ᐃᔅᒋᔄᑦ, “ᓇᒪ ᓂᑐᐛᔨᒪᐅᒡ ᓂᑐᐧᑯᐃᔨᓴ ᐊᓐᒡ ᐊᐛᓐᒋ ᐊᑲ ᐊᐧᑯᓯᒡ, ᒥᒄ ᐊᓐᒡ ᑲ ᐊᐧᑯᓯᒡ ᐊᐅᑯᓐᒡ ᓇᑐᐛᔨᒪᒡ ᓂᑐᐧᑯᐃᔨᓴ᙮

³² ᓇᒪᔭᐤ ᐊᓐᒡ ᑲ ᑯᐃᔅᑯᑕᑎᓯᒡ ᐛᒋ ᑎᑯᓯᓂᔭᓐ᙮ ᓂᒋ ᑎᑯᓯᓐ ᒐᒋ ᓂᑐᒥᒂᐤ ᐅᒥᒋᑥᐅᒡ ᒐᒋ ᒂᔅᑲᑎᓯᒡ᙮”

ᐊᑲ ᐊᓯᑯᒻ ᒥᒋᓱᓇᓄᐅᒡ ᐊ ᐊᔨᒧᑕᒡ

³³ ᐸᕆᓯᔨᒡ ᒪᒃ ᒋ ᐃᑕᐅᒡ ᒋᓴᓴ, “ᒐᒂᔪᐤ ᐛᒋ ᒥᒐᑥᐤ ᐃᑐᑎᒥᔨᒋ ᒠᓐ ᐅᒋᔅᒋᓄᐊᒧᐛᑭᓇ ᐊᑲ ᐊᓯᑯᒻ ᒥᒋᓱᔨᒋ ᒥᒄ ᒐᒋ ᐊᔭᒥᐊᔨᒋ᙮ ᑭᔭ ᓂᔭᓐ ᓂᒋᔅᒋᓄᐊᒧᐛᑭᓇᓐᒡ ᐊᐅᒄ ᐊ ᐃᑎᒡ᙮ ᒋᔾ ᒪᒃ ᒋᒋᔅᒋᓄᐊᒧᐛᑭᓐᒡ ᓇᒪ ᐃᑐᐅᒡ᙮”

³⁴ ᒋᓴᔅ ᒪᒃ ᒋ ᐃᔅᒋᔄᐤ, “ᒧᔭᒻ ᐊ ᓂᐳᐅᓇᓄᐅᒡ, ᒋᑭ ᒋ ᐃᑐᐅᒡ ᐊ ᒐ ᐊᑲ ᒋ ᒥᒋᓱᒡ ᐊᓐᒡ ᑲ ᐎᓴᒪᑭᓄᐎᒡ ᐊ ᒥᑯᓴᓄᐎᒡ ? ᓇᒪ ᒂᔄᓐ᙮ ᐛᔅ ᒧᔭᒻ ᐊ ᑕᔨᒋ ᐊᓐᑕ ᐊ ᑕᒡ ᐊᓂᔭ ᐅᔅᒋᓂᒋᓱᐛ ᓇᒪ ᐛᐛᒡ ᒋᑭ ᐅᒋ ᐃᑕᔨᑎᒧᒡ ᒐ ᐊᑲ ᒋ ᒥᒋᓱᒡ᙮

³⁵ ᐃᔅᐱ ᒪᒃ ᐅᑎᒋᐱᔨᒐ ᒐ ᐸᒋ ᒥᔅᑭᒪᑭᓄᐎᒡ ᐅᔅᒋᓂᒋᓱᐛ ᑭᔭ ᐃᔭᒄ ᓇᒪ ᒋᑭ ᐅᒋ ᒥᒋᓱᐅᒡ᙮”

³⁶ ᐊᑯ ᒋᓴᔅ ᒂ ᐎᑎᒧᐛᑦ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᓇᒪ ᐊᐛᓐ ᒋᐸ ᒋ ᐅᒋ ᐱᑯᐱᑎᒻ ᐊ ᐅᔅᑲᔨᒡ ᐅᑦ ᐊᑯᑉ ᒐᒋ ᒥᓴᐊᒃ ᐛᔅᑭᒡ ᐊᑯᐱᔅᒋᓯᔪᐤ᙮ ᐛᔅ ᐅᔭᔪᐤ ᐃᑐᑕᒐ, ᒋᑭ ᓂᓱᐅᓇᒋᑕᐤ ᐊᓂᔭ ᑲ ᐅᔅᑲᔨᒡ ᐅᑦ ᐊᑯᑉ᙮ ᐊᓐ ᒪᒃ ᑲ ᐅᔅᑲᒡ ᒥᓴᐃᑭᓐ, ᓇᒪ ᒋᑭ ᐅᒋ ᓂᐃᔅᑲᒐᒥᑭᓐ ᐊᓐᑕ ᐛᔅᑭᒡ ᐊᑯᐱᔅᒋᓯᒡ᙮

³⁷ ᓇᒪ ᑭᔭ ᐊᐛᓐ ᐱᑕᐸᐅᑕᐤ ᐊ ᐅᔅᑲᑭᒥᔨᒡ ᓱᒥᓇᐳᔪᐤ ᐊᓐᑕ ᐃᓯ ᐊ ᐛᔅᑭᒍᓂᔨᒡ ᐅᓯᑭᔾ ᐳᑕᒡ᙮ ᐛᔅ ᐊᓐᑕ ᐃᔅ ᐱᑕᐸᐅᑕᒐ ᐃᔅᐱ ᒪᒃ ᐅᓯᐅᒥᑭᓂᔨᒐ, ᓇᔅᒡ ᒋᑭ ᑕᑐᐱᔪᐤ ᐊᓂᔭ ᐅᓯᑭᔾ ᐳᑕᔪᐤ᙮ ᐊᑯ ᒪᒃ ᓇᒪ ᒋᑭ ᐅᒋ ᐊᔭᐤ ᓱᒥᓇᐳᔪᐤ ᑭᔭ ᐊᓂᔭ ᐅᓯᑭᔾ ᐳᑕᔪᐤ ᓇᒪ ᓴᔅ ᒋᑭ ᐅᒋ ᐃᓯᓇᑯᓂᔪᐤ ᒥᓐ ᒐᒋ ᐊᐱᑎᓂᔨᒡ᙮

³⁸ ᐊ ᐅᔅᑲᑭᒥᔨᒡ ᓱᒥᓇᐳᔪᐤ ᐊᓐᑕ ᐊ ᐅᔅᑲᔨᒡ ᐅᓯᑭᔾ ᐳᑕᒡ ᒋᐸ ᐃᓯ ᐱᑕᐸᐅᑕᐤ᙮

³⁹ ᐊᐛᓐ ᓴᔅ ᐊᒋ ᑯᒋᔅᑕᐧᒃ ᐛᔅᑭᒡ ᓱᒥᓇᐳᔪᐤ ᓇᒪ ᒋᑭ ᐅᒋ ᐎ ᒥᓄᐤ ᐊ ᐅᔅᑲᑭᒥᔨᒡ ᓱᒥᓇᐳᔪᐤ᙮ ᐛᔅ ᐊᓂᔭ ᐛᔅᑭᒡ ᓱᒥᓇᐳᔪᐤ ᐃᐛᒃ ᒋᑭ ᐎᔅᑎᒻ᙮”