ᓗᒃ 15 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᐅᓂᓯᐧᒃ ᒪᔭᑕᓂᔅ Luke 15.1-3, 11-32 (Lent-4 Year C) Luke 15.1-10 (Proper-19 Year C)

¹ ᐸᐃᒂᐤ ᐊᓐᒡ ᑲ ᒪᒧᓴᒋᓇᒡ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᒡ ᒋ ᐸᒋ ᓂᑐᑐᐛᐅᒡ ᒋᓴᓴ ᐊ ᐸᒋ ᒥᒐᑎᒡ᙮ ᑭᔭ ᑯᑎᑭᒡ ᐃᔪᒡ ᐊ ᒋᔅᒐᔨᒪᑭᓄᐎᒡ ᐊ ᒥᒐᑎᓯᒡ ᒋ ᐸᒋ ᑎᑯᓯᓄᐅᒡ᙮

² ᐸᕆᓯᔨᒡ, ᑭᔭ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᒋ ᐊᔨᒧᒪᐅᒡ ᒋᓴᓴ ᐊ ᐃᔅᒋᔄᒡ, “ᐅ ᓇᐸᐤ ᐎᒐᐛᑭᓂᑐᐛᐤ ᐊᓂᔭ ᑲ ᒥᒐᑎᓯᔨᒋ ᑭᔭ ᐎᒋ ᒥᒋᓱᒪᐤ᙮”

³ ᐊᑯ ᒋᓴᔅ ᒂ ᐎᑎᒧᐛᑦ ᐅᔭ ᑎᐸᒋᒧᐅᓂᔪᐤ᙮

⁴ “ᐃᓯᓇᑯᓯᑦ ᐊᐛᓐ ᐸᐃᑯ ᒥᑕᓯᒥᑎᓄᐤ ᐊᒋ ᐊᔭᐛᑦ ᒪᔭᑕᓂᓴ, ᐸᐃᒄ ᒪᒃ ᐊᓂᔭ ᐅᓂᓯᓂᔨᒋ, ᑕᓐ ᒋᐸ ᐃᑐᐤ ? ᓇᒪᐎᔾ ᐊ ᒋᐸ ᐅᒋ ᓂᑭᑕᐤ ᐊᓂᔭ ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᒪᔭᑕᓂᓴ ᒐᒋ ᓇᓂᑐᐛᐱᒪᑦ ᐊᓂᔭ ᑲ ᐅᓂᓯᓂᔨᒋ, ᐸᑐᔅ ᒥᔅᑯᐛᒐ ?

⁵ ᐃᔅᐱ ᒪᒃ ᒥᔅᑯᐛᒐ ᓇᔅᒡ ᑕᑈ ᒋᑭ ᒥᔽᔨᑎᒻ, ᐊᑯ ᐅᑎᑎᒥᓂᒡ ᐊᑯᑕ ᒐ ᑕᑕᔭᑦ, ᒐ ᒋᐛᑕᐊᑦ᙮

⁶ ᐊᑯ ᒐ ᐎᓴᒪᑦ ᐎᒐᐛᑭᓇ ᒐ ᐃᑕᑦ, ‘ᐎᒋ ᒥᔽᔨᑎᒧᒥᒄ ᐛᔅ ᓂ ᒥᔅᑯᐛᐤ ᐊᓐ ᓂᒪᔭᑕᓂᓯᒻ ᑲ ᐅᓂᐃᒃ᙮’ ”

⁷ ᒂ ᐃᔅᒋᔄᑦ ᒥᓐ ᒋᓴᔅ, “ᒋ ᐎᑎᒪᑎᓇᐛᐤ, ᒧᔭᒻ ᐊᐅᑯᓐ ᐊ ᐃᑕᔨᑕᒂᒡ ᒧᒋᒐᔨᑎᒧᐅᓐ ᐊᓐᑕ ᒋᒋᒋᓯᑯᒡ ᐃᔅᐱ ᐸᐃᒄ ᐅᒥᒋᑥᐤ ᐊ ᓇᑕᑦ ᒋᓴᒪᓂᑐᐛ ᐊ ᐎ ᒂᔅᑲᑎᓯᑦ, ᐅᔅᑕ ᐎᔾ ᒧᒋᒐᔨᑎᒥᐃᐛᐤ ᐃᔅᐱᔅ ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᑲ ᑯᐃᔅᑯᑕᑎᓯᒡ ᐊᐛᓐᒋ ᓴᔅ ᐊ ᒂᔅᑲᑎᓯᒡ᙮”

ᑲ ᐅᓂᓯᐧᒃ ᓱᓇᔭᐤ

⁸ ᐊᑯ ᒋᓴᔅ ᒂ ᐎᑎᒧᐛᑦ ᑯᑎᒋᔪᐤ ᒋᔅᒋᓄᐊᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᑕᓐ ᐊ ᐃᑎᑦ ᐃᔎᐤ ᐊ ᐊᔭᐛᑦ ᐸᐃᑯᔪᐤ ᓱᓇᔭᐱᔎ, ᐸᐃᒄ ᒪᒃ ᐊᓂᔭ ᐅᓇᐊᑦ ? ᓯᔅᑲᐊᒻ ᐛᔅᑕᓂᐱᒪᑭᓂᔪᐤ, ᐛᔭᓯᐃᒐᑦ ᑭᔭ ᐊᓐᑕ ᐎᒋᒡ, ᓇᔅᒡ ᓇᓂᑐᐛᐱᒪᐤ ᐸᑐᔅ ᒪᔅᑯᐛᑦ᙮

⁹ ᐃᔅᐱ ᒪᒃ ᒪᔅᑯᐛᑦ, ᐊᑯ ᒪᒧᐤ ᐛᓴᒪᑦ ᐎᒐᐛᑭᓇ ᑭᔭ ᐎᐧᑲᓂᓴ ᐊ ᐃᑕᑦ, ‘ᓇᔅᒡ ᑕᑈ ᓂ ᒥᔽᔨᑕᓐ ᐊᒋ ᒥᔅᑯᐅᒃ ᐊᓐ ᓱᓇᔭᐱᔅᒄ ᑲ ᐅᓂᐃᒃ᙮ ᐎᒋ ᒥᔽᔨᑎᒧᒥᒄ ᒪ᙮’ ”

¹⁰ ᐊᑯ ᒥᓐ ᒋᓴᔅ ᒂ ᐃᔅᒋᔄᑦ, “ᐊᓂᔭ ᒪᒃ ᑲ ᐃᔅᐱᔅ ᒥᔽᔨᑕᐧᒃ ᐊᓐ ᐃᔎᐤ ᐊᒋ ᒥᔅᑯᐛᑦ ᐊᓂᔭ ᑲ ᐅᓇᐊᑦ ᐅᓱᓇᔭᓂᒪ ᐊᐅᑯᓐ ᐊ ᐃᓯᓇᑯᓯᔨᒋ ᒋᓴᒪᓂᑐᐤ ᐅᑦ ᐊᓐᒋᓇᒪ, ᒥᔽᔨᑎᒥᔪᐛ ᐃᔅᐱᔅ ᐸᐃᒄ ᐅᒥᒋᑥᐛ ᐊ ᒂᔅᑲᑎᓯᔨᒋ᙮”

ᓇᐸᔅ ᑲ ᓂᑭᑕᑦ ᐅᑕᐎᔭ Luke 15.1-3, 11-32 (Lent-4 Year C)

¹¹ ᒋᓴᔅ ᒪᒃ ᒥᓐ ᒋ ᐎᑎᒻ ᑯᑎᒋᔪᐤ ᑎᐸᒋᒧᐅᓂᔪᐤ, ᐊ ᐃᔅᒋᔄᑦ, “ᒋ ᑕᐤ ᓇᐸᐤ ᐊᒋ ᓂᓯᔨᒋ ᐅᑯᓴ᙮

¹² ᐊᓐ ᒪᒃ ᐅᓯᒥᒪᐤ ᒋ ᐃᑕᐤ ᐅᑕᐎᔭ, ‘ᓄᑕ, ᐸᒋ ᒥᔾ ᐊᓄᒡ ᐊᓂᔭᔪᐛ ᒐᒂᔪᐛ ᐊᓂᔅᒐ ᒐ ᑎᐱᔨᐛᐅᓯᔭᓐ᙮’ ᐊᑯ ᐅᑕᐎᐛᐛ ᒂ ᑕᑕᐅᓂᒪᑯᒡ ᒥᓯᐛ ᑕᓐ ᑲ ᐃᓯ ᑎᐱᔨᐛᐅᓯᔨᒋ᙮

¹³ ᓇᒪ ᓇᐅᔅ ᒂ ᐊᑎ ᑎᒪᒋᓇᐧᒃ ᒥᓯᐛ ᑕᓐ ᑲ ᐃᓯ ᑎᐱᔨᐛᐅᓯᑦ ᐊᓐ ᐅᓯᒥᒪᐤ ᐊᑯ ᐊᓐᑕ ᐛᔪᐤ ᐊᔅᒋᒡ ᒂ ᐃᑐᑕᑦ᙮ ᐊᑯᑕ ᐊᓐᑕ ᑲ ᒪᔅᑎᓇᐧᒃ ᐅᓱᓇᔭᓂᒻ ᐊ ᒋᔎᐱᒪᑎᓯᑦ᙮

¹⁴ ᐃᔅᐱ ᒪᒃ ᒥᓯᐛ ᑲ ᒪᔅᑎᓇᐧᒃ ᐅᓱᓇᔭᓂᒻ ᐊᓐᑕ ᐊᓂᔭ ᐊᔅᒋᔪᐤ ᑲ ᑕᑦ ᒋ ᐱᒥᐱᔪᐤ ᐊ ᐛᐛᓇᐧᑭᑕᓄᐅᒡ᙮ ᒐᒃ ᑲ ᐛᐛᓇᐧᑭᑕᑦ ᑭᔭ ᐎᔾ᙮

¹⁵ ᐊᑯ ᒂ ᐊᑐᔅᑯᐛᑦ ᐸᐃᒄ ᓇᐸᐛ ᐊᓐᑕ ᐊ ᐅᒋᔨᒋ ᐊᓂᔭ ᐅᑕᓇᔪᐤ, ᒂ ᐃᑎᓴᐅᑯᑦ ᒐᒋ ᑭᓄᐛᔨᒪᑦ ᐅᑯᐧᑯᓯᒥᔪᐛ᙮

¹⁶ ᐊᔅᐱᔅ ᓯᐛᔨᑦ ᒪᒃ ᒐᒃ ᓇᔅᒡ ᒋ ᒧᔅᑕᓇᔨᑎᒻ ᒐᒋ ᒋᔅᐳᐃᓱᑦ ᐊᓂᔭ ᑯᐧᑯᓴ ᐅᒥᒋᒥᔪᐤ, ᓇᒪ ᒪᒃ ᐊᐛᔪᐛ ᐅᒋ ᐊᓯᒥᑯᐤ ᒐᒂᔪᐤ᙮

¹⁷ ᒐᒃ ᒪᒃ ᐃᔅᐱ ᑲ ᑯᐃᔅᑯᑯᑕᔨᒡ ᐅᒥᑐᓇᔨᒋᑭᓐ, ᒋ ᐃᑕᔨᑎᒻ, ‘ᐊᑎ ᐊ ᑕᑎᓯᔨᒋ ᓄᑕᐎᔾ ᐅᑦ ᐊᐱᒋᐊᑭᓇ ᒥᓯᐛ ᐊ ᑕᐱᔅᑯᔨᒋ ᐃᔭᐱᒡ ᐊᔪᐱᔨᒡ ᒥᒋᒥᔪᐤ, ᓂᔾ ᒪᒃ ᒐᑲᑦ ᓂ ᑯᐧᑭᑕᓐ᙮

¹⁸ ᓂᑭ ᔅᑐᑕᓐ ᒐ ᓂᑐᐛᐱᒥᒃ ᓄᑕᐎᔾ ᒐ ᐃᑎᒃ, “ᓄᑕ, ᓂᒋ ᒥᒋᑐᑐᐛᐤ ᒋᓴᒪᓂᑐᐤ ᑭᔭ ᒋᔾ ᔅᒋ ᒥᒋᑐᑕᑎᓐ᙮

¹⁹ ᓇᒪ ᓂ ᒋᔅᑕᔨᑕᑯᓯᓐ ᒐᒋ ᐅᑯᓯᑐᑐᐎᔨᓐ, ᐸᒋ ᐊᐱᒋᐃ ᒪᒃ ᒧᔭᒻ ᐊ ᐃᓯ ᐊᐱᒋᐃᑥᐤ ᒋᑦ ᐊᐱᒋᐊᑭᓐᒡ᙮” ’

²⁰ ᑭᔭ ᒂ ᐱᓯᑯᑦ ᑲᐤ ᒐ ᓂᑐᐛᐱᒪᑦ ᐅᑕᐎᔭ᙮ ᐊᑯ ᒪᒃ ᐊᔅᒄ ᐊ ᐊᔭᐅᓇᑯᓂᔨᒡ ᒐ ᐃᔅᐱᔅ ᑎᑯᓯᐧᒃ ᐊᓐᑕ ᐊ ᑕᒡ, ᒋ ᐛᐱᒥᑯᐤ ᐅᑕᐎᔭ ᐊᑯ ᓇᔅᒡ ᑲ ᒋᔅᑎᒪᒐᔨᒥᑯᑦ ᐊᑯ ᒂ ᐊᑈᔅᑲᑯᑦ, ᒂ ᐛᐛᐅᒋᐱᑎᑯᑦ ᒂ ᓱᐛᔨᒥᑯᑦ᙮

²¹ ᒂ ᐃᑕᑦ ᐊᓐ ᐅᑯᓯᓯᒪᐤ ᐊᓂᔭ ᐅᑕᐎᔭ, ‘ᓄᑕ, ᓂᒋ ᒥᒋᑐᑐᐛᐤ ᒋᓴᒪᓂᑐᐤ ᑭᔭ ᒋᔾ ᔅᒋ ᒥᒋᑐᑕᑎᓐ᙮ ᓇᒪ ᓂ ᒋᔅᑕᔨᑕᑯᓯᓐ ᒐᒋ ᐅᑯᓯᑐᑐᐎᔨᓐ᙮’

²² ᒥᒄ ᒪᒃ ᐊᓂᔭ ᐅᑕᐎᔭ ᑎᐛᒡ ᒋ ᐎᓴᒪᔪᐛ ᐅᑦ ᐊᐱᒋᐊᑭᓂᔪᐛ ᐊᑯ ᒂ ᐃᑕᔨᒋ, ‘ᐎ ᒋᐱᔨᒄ ᒐ ᐸᑕᔭᒄ ᐊᓐ ᓇᔅᒡ ᑲ ᒥᔽᓯᒡ ᐊᑯᑉ ᒐ ᐳᔅᑎᔅᑭᒧᑎᔭᒄ᙮ ᑭᔭ ᑕᐱᒋᒐᐱᓱᓇ ᒐ ᐳᔅᑎᔅᑭᒧᑎᔭᒄ ᑭᔭ ᒥᔅᒋᓇ᙮

²³ ᑭᔭ ᒐ ᓂᐸᐊᒄ ᐊᓐ ᑲ ᑕᒋᐳᐊᑭᓄᐅᑦ ᒥᔅᑐᔅ, ᒐ ᒥᔪᐧᑯᐛᒄ ᑭᔭ ᒐ ᒥᑯᓴᔭᐧᒄ᙮

²⁴ ᐛᔅ ᐅ ᓂᑯᔅ ᒧᔭᒻ ᐊᒋ ᓂᐱᑦ ᒋ ᐃᓯᓇᑯᓱᐤ ᐊᑯ ᒧᔭᒻ ᒥᓐ ᐊ ᐱᒪᑎᓯᑦ ᐊᐅᒄ ᐊ ᐃᓯᓇᑯᓯᑦ, ᒧᔭᒻ ᐊᒋ ᐅᓂᓯᓂᑦ ᑭᔭ ᒥᓐ ᐊ ᒥᔅᑯᐛᑭᓄᐅᑦ᙮’ ᑭᔭ ᒂ ᒧᒋᒐᔨᑕᒡ᙮

²⁵ ᐊᓐ ᒪᒃ ᐅᔅᑕᓯᒪᐤ ᐊᓐᑕ ᓂᑕᐅᒋᑕᑭᓐ ᐊᔅᒋᒡ ᒪᒂᒡ ᒋ ᑕᐤ᙮ ᐃᔅᐱ ᑲ ᐸᔄᐸᑕᐧᒃ ᐎᒋᐛᐤ ᒋ ᐸᑎᒻ ᐊ ᒋᔍᐛᐱᒐᓄᐎᒡ ᑭᔭ ᐊ ᓂᒥᓇᓄᐎᒡ᙮

²⁶ ᒂ ᐎᓴᒪᑦ ᐸᐃᒄ ᐊᓂᔭ ᐊᐱᒋᐊᑭᓇ ᐊᑯ ᒂ ᑯᒂᒋᒪᑦ, ‘ᑕᓐ ᐊ ᐃᑎᓇᓄᐅᒡ ?’

²⁷ ᐊᑯ ᒂ ᐃᑎᑯᑦ ᐊᓂᔭ ᐊᐱᒋᐊᑭᓇ, ‘ᒋᓯᒻ ᑲᐤ ᒋ ᑎᑯᓯᓄᐤ ᐊ ᒥᔪ ᐱᒪᑎᓯᑦ ᐊᑯ ᒍᑕᐎᔾ ᒂ ᐃᑎᓱᐛᑦ ᒐᒋ ᓂᐸᐊᑭᓄᔨᒋ ᐊᓂᔭᔪᐛ ᒥᔅᑐᓴ ᑲ ᑕᒋᐳᐊᑭᓄᔨᒋ ᒐᒋ ᒥᑯᓴᐊᑭᓄᐅᑦ ᐊᓐ ᒋᓯᒻ᙮’

²⁸ ᐃᔅᐱ ᒪᒃ ᐱᔭᑕᐧᒃ ᐅᔭ ᐊᓐ ᐅᔅᑕᓯᒪᐤ ᒋ ᒋᔄᓱᐤ, ᐊᑯ ᓇᒪ ᐅᒋ ᐎ ᐱᒐᐤ᙮ ᐅᑕᐎᔭ ᒂ ᐸᒋ ᓂᑐᐛᐱᒥᑯᑦ, ᒂ ᓯᒋᒥᑯᑦ ᒐᒋ ᐱᒐᑦ᙮

²⁹ ᐊᑯ ᒂ ᐃᑕᑦ ᐅᑕᐎᔭ, ‘ᑭᓄᐛᐸᑕ ᒪ, ᒥᒐᑐᐱᐳᓇ ᐊᑯ ᑲ ᐃᔅᐱᔅ ᐊᑐᔅᑲᑕᓐ ᓇᒪ ᒪᒃ ᓂᑕ ᓂ ᐅᒋ ᐃᑎᓐ ᒐ ᐊᑲ ᒋ ᓂᓇᐃᑎᒪᓐ ᑕᓐ ᑲ ᐃᑎᓱᐛᔨᓐ᙮ ᒐᒂᓐ ᒪᒃ ᐛᒡ ᐊᑲ ᐸᒋ ᒥᔨᓐ ᓂᔾ ᒐᒋ ᐅᒋ ᐎᒋᒥᑯᓴᒥᒂᐤ ᓂᐎᒐᐛᑭᓂᒡ᙮

³⁰ ᐅ ᒋᑯᔅ ᑲ ᒋᔎᐱᒪᑎᓯᐛᒐᑦ ᒋᓱᓇᔭᓂᒥᔪᐤ ᐃᔎᐛ ᐊᒋ ᒪᔭᔨᒪᑦ, ᐊᓄᒡ ᒋ ᑎᑯᓯᓄᐤ ᑭᔭ ᒋᑦ ᐃᑎᓱᐛᑎᒪᐛ ᒪᒃ ᒐᒋ ᓂᐸᐊᑭᓄᔨᒋ ᐊᓂᔭᔪᐛ ᑲ ᑕᒋᐳᐊᑭᓄᔨᒋ ᒥᔅᑐᓴ ᒐᒋ ᒥᑯᓴᐊᑭᓄᐅᑦ᙮’

³¹ ᐅᑕᐎᔭ ᒪᒃ ᒋ ᐃᑎᑯᐤ, ‘ᓂᑯᓴ, ᒧᔅ ᐊ ᑕᔭᓐ ᒋ ᑕᓐ, ᒥᓯᐛ ᐊ ᐃᓯ ᐊᔭᔭᓐ ᒋ ᑎᐱᔨᐛᐅᓯᓐ ᑭᔭ ᒋᔾ᙮

³² ᐃᓯᓇᑯᓐ ᑕᑈ ᒐᒋ ᒧᒋᒐᔨᑎᒪᐧᒄ ᐛᔅ ᒋᐧᑲᓂᔅ ᒧᔭᒻ ᐊᒋ ᓂᐱᑦ ᒋ ᐃᓯᓇᑯᓱᐤ ᑭᔭ ᐊᓄᒡ ᒧᔭᒻ ᒥᓐ ᐊ ᐱᒪᑎᓯᑦ ᐊᐅᑯᓐ ᐊ ᐃᓯᓇᑯᓯᑦ᙮ ᒧᔭᒻ ᐊᒋ ᐅᓂᓯᓂᑦ ᒋ ᐃᓯᓇᑯᓱᐤ ᑭᔭ ᒥᓐ ᐊ ᒥᔅᑯᐛᑭᓄᐅᑦ ᐊᐅᑯᓐ ᐊ ᐃᓯᓇᑯᓯᑦ᙮’ ”