ᓗᒃ 14 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᔅ ᑲ ᒥᓏᒋᐊᑦ ᑲ ᐊᐧᑯᓯᔨᒋ ᓇᐸᐛ ᐊ ᐊᔭᒥᐊᐅᒋᓯᑲᔨᒡ Luke 14.1,7-14 (Proper-17 Year C)

¹ ᐸᐃᒂᐤ ᒪᒃ ᐊ ᒍᐤ ᐊᔭᒥᐊᐅᒋᓯᑲᔨᒡ ᒋᓴᔅ ᒋ ᐃᑐᑕᐤ ᒐᒋ ᒥᒋᓱᐛᑦ ᐊᓐᑕ ᐎᒋᔨᒡ ᐊᓂᔭ ᐸᐃᒄ ᑲ ᓂᑲᓇᔨᑕᑯᓯᔨᒋ ᐸᕆᓯᐊ᙮ ᐊᑯ ᒪᒃ ᒋ ᑕᐅᒡ ᐊᓐᑕ ᐃᔪᒡ ᓇᔅᒡ ᐊ ᓂᓇᑭᑐᐛᔨᒪᒡ ᒋᓴᓴ ᒐ ᐃᑎᒂᓂ᙮

² ᒋ ᑕᔪᐛ ᐊᓐᑕ ᓇᐸᐛ ᐊ ᐸᑕᔅᑎᐱᔅᑕᑯᑦ ᒋᓴᔅ᙮ ᐊᓐ ᒪᒃ ᓇᐸᐤ ᒋ ᑎᑯᓂᔪᐤ ᐊ ᐃᑕᔅᐱᓇᑦ᙮ ᐅᔅᐱᑐᓇ ᑭᔭ ᐅᔅᑲᑕ ᒋ ᐸᒋᐱᔪᐛ᙮

³ ᒋᓴᔅ ᒋ ᑯᒂᒋᒪᐤ ᐊᓂᔭ ᐸᕆᓯᐊ ᑭᔭ ᐊᓂᔭ ᑲ ᒋᔅᑯᑎᒪᒐᔨᒋ ᐊᔭᒥᐊᐅ-ᐎᓱᐛᐅᓂᔪᐤ, “ᐃᑎᔅᑕᐤ ᐊ ᐊᔭᒥᐊᐅ-ᐎᓱᐛᐅᒥᓯᓇᐃᑭᓂᒡ ᐊ ᑯᐃᔅᑯᓇᒂᒡ ᒐᒋ ᒥᓏᒋᐃᐛᓄᐅᒡ ᐊ ᒍᐤ ᐊᔭᒥᐊᐅᒋᓯᑲᒡ ᑭᔭ ᒪᒃ ᐊᑲ ᑯᐃᔅᑯᓇᒂᒡ ?”

⁴ ᓇᒪ ᒪᒃ ᐅᒋ ᐎ ᒋ ᔅᑐᑎᑯᐤ᙮ ᐊᑯ ᒋᓴᔅ ᒂ ᐅᑎᓂᒺᑦ ᐅᑎᒋᔪᐤ ᐊᓂᔭ ᓇᐸᐛ, ᑲ ᒥᓏᒋᐊᑦ ᐊᑯ ᒂ ᐃᑕᑦ ᒐᒋ ᔅᑐᑕᔨᒋ᙮

⁵ ᐊᑯ ᒋᓴᔅ ᒂ ᐃᑕᑦ ᐊᓂᔭ ᐸᕆᓯ, “ᐅᑕ ᐊ ᑎᓯᔭᒄ, ᐊᐛᓐ ᐅᑯᓴ ᑭᔭ ᒪᒃ ᐅᒥᔅᑐᓯᒪ, ᐳᒋᐱᔨᒐ ᐊᓐᑕ ᐊ ᐛᐅᔭᔭᔨᒡ, ᐱᓯᒄ ᓂᐱᔪᐤ ᐊ ᑎᑯᓂᔨᒡ, ᓇᒪᐎᔾ ᐊ ᒋᐸ ᐎᐧᑯᒋᐊᐤ ᐊᑎ ᒪᒂᒡ ᒍᐤ ᐊᔭᒥᐊᐅᒋᓯᑲᔨᒡ ?”

⁶ ᓇᔅᒡ ᒪᒃ ᒋ ᒋᐳᑐᓇᐛᐤ ᐅᔭ ᑲ ᐃᑕᑦ᙮

ᒋᓴᒪᓂᑐᐤ ᒋᔅᑕᔨᒪᐤ ᐊᓂᔭ ᐊᐛᔪᐛ ᑲ ᑎᐱᑕᔨᒥᑎᓱᔨᒋ Luke 14.1,7-14 (Proper-17 Year C)

⁷ ᒋᓴᔅ ᒪᒃ ᒋ ᐛᐱᒪᐤ ᐱᔅᒐ ᐊᓂᔭ ᐊᐛᔪᐛ ᑲ ᐎᓴᒪᑭᓄᔨᒋ ᐊ ᐛᐛᔨᐱᔨᒋ ᐊᓐᑕ ᒪᐅᒡ ᐊ ᐅᒋᒪᐛᔨᑕᑯᓂᔨᒡ ᐊᑯ ᒂ ᐎᑎᒧᐛᑦ ᐅᔭ ᒋᔅᒋᓄᐊᒪᒐᐤ ᑎᐸᒋᒧᐅᓂᔪᐤ᙮

⁸ “ᐊᐛᓐ ᐎᓴᒥᔅᒐ ᐊ ᒥᑯᓴᓄᐎᒡ ᒧᔭᒻ ᐊᒋ ᓂᐳᐅᓇᓄᐅᒡ ᐊᑲᐎᔾ ᐛᐛᔨᐱᐃᓱᐤ ᐊᓐᑕ ᐊ ᐅᒋᒪᐅᐱᓇᓄᐅᒡ, ᐛᔅ ᒋᑭ ᒋ ᐃᓯᓇᑯᓐ ᒐᒋ ᑕᑦ ᐊᓐᑕ ᐊᐛᓐ ᐅᔅᑕ ᐊ ᒋᔅᑕᔨᑕᑯᓯᑦ ᐃᔅᐱᔅ ᒋᔾ᙮

⁹ ᒋᑭ ᒋ ᐸᒋ ᓂᑐᐛᐱᒧᒄ ᐊᓐ ᐊᐛᓐ ᑕᐱᔅᑯᓐ ᑲ ᐎᓴᒥᑕᒄ, ᒐᒋ ᐃᑎᔅᒃ, ‘ᐃᒐᑕ ᐊᓐᑕ, ᐊᑯ ᐊᓐ ᐅᔅᑕ ᑲ ᒋᔅᑕᔨᑕᑯᓯᑦ ᒐ ᐊᔭᑭᓄᐅᑦ ᐊᓐᑕ ᐊ ᐅᒋᒪᐅᐱᓇᓄᐎᒡ ᐊᓐᑕ ᑲ ᐊᐳᐅᑦ᙮’ ᑭᔭ ᒐ ᓴᒂᔨᒧᔨᓐ ᐊᑎᐱᔨᓇ᙮

¹⁰ ᐅ ᒪᒃ ᒋᐸ ᐃᓯ ᐃᑐᑕᓐ, ᐊᐛᓐ ᐎᓴᒥᔅᒐ ᐊ ᒥᑯᓴᑦ ᐊᓐᑕ ᓂᑐᐎᔾ ᒋᐸ ᐅᐛᑕᔨᑎᓱᓐ, ᑭᔭ ᐊᓐ ᐊᐛᓐ ᑲ ᒥᑯᓴᑦ ᒋᑭ ᒋ ᐃᑎᒄ, ‘ᓂᐎᒐᐛᑭᓐ, ᐊᔅᑎᒻ ᐅᑕ ᐊᑯᑕ ᐸᒋ ᐊᐱᔾ ᐊ ᐅᒋᒪᐅᐱᓇᓄᐅᒡ᙮’ ᑭᔭ ᒥᓯᐛ ᐊᓐᒡ ᐊᐛᓐᒋ ᑲ ᐎᓴᒪᑭᓄᐎᒡ ᒐ ᒋᔅᒐᔨᒥᔅᒡ ᐊ ᒋᔅᑕᔨᑕᑯᓯᔨᓐ᙮

¹¹ ᐛᔅ ᐊᐛᓐ ᒥᔅᑎ ᑲ ᐎ ᐃᑕᔨᒥᑯᓯᑦ ᒋᓴᒪᓂᑐᐛ ᒋᑭ ᑎᐱᑕᔨᒧᐃᑯᐤ᙮ ᐊᓐ ᒪᒃ ᑲ ᑎᐱᑕᔨᒥᑎᓱᑦ ᐊᐅᒄ ᐊᓐ ᒐ ᒋᔅᑕᔨᑕᑯᐃᑯᑦ ᒋᓴᒪᓂᑐᐛ᙮”

¹² ᐊᑯ ᒋᓴᔅ ᒂ ᐃᑕᑦ ᐊᓂᔭ ᓇᐸᐛ ᑲ ᐎᓴᒥᑯᑦ ᐊ ᒥᑯᓴᔨᒋ, “ᐊ ᒥᑯᓴᔨᓐ ᒪ, ᐊᑲᐎᔾ ᒥᒄ ᒋᐎᒐᐛᑭᓐᒡ ᐎᓴᒥᒡ ᑭᔭ ᒪᒃ ᒋᐧᑲᓂᓯᒡ ᑭᔭ ᒪᒃ ᒋᐛᐧᑯᒪᑭᓂᒡ ᑭᔭ ᒪᒃ ᐊ ᐛᔪᑎᓯᒡ ᐊᐛᓐᒋ ᐊᓐᑕ ᒥᒋᒪ ᐊ ᐎᒋᒥᔅᒡ, ᐛᔅ ᒋᑭ ᒋ ᐃᓯᓇᑯᓂᔪᐤ ᑭᔭ ᒋᔾ ᐊᔅᒄ ᒐᒋ ᐎᓴᒥᔅᒡ, ᒐᒋ ᐃᑐᑕᔅᒡ ᑭᔭ ᒋᔾ ᑕᓐ ᐊᓂᔭ ᑲ ᐃᓯ ᐃᑐᑐᐅᑥᐤ᙮

¹³ ᐃᔭᐱᒡ, ᐊᓐᒡ ᐊᐛᓐᒋ ᑲ ᒋᔅᑎᒪᑎᓯᒡ ᐎᓴᒥᒡ, ᑭᔭ ᐊᓐᒡ ᑲ ᒪᔅᒋᓂᑕᐅᒋᒡ ᑭᔭ ᐊᓐᒡ ᐊᑲ ᓂᑕᐅᑕᒡ, ᑭᔭ ᐊᓐᒡ ᐊᑲ ᐛᐸᑕᒡ᙮

¹⁴ ᐊᑯ ᒪᒃ ᒐ ᓱᐛᔨᒥᑯᔨᓐ ᐅᒋ ᐊᒋ ᐎᓴᒪᑥᐤ, ᐛᔅ ᑕᐸ ᒋᑭ ᒋ ᒋᐛ ᐃᑐᑕᑯᒡ ᑕᓐ ᐊᓂᔭᔪᐤ ᑲ ᐃᓯ ᐃᑐᑐᐅᑥᐤ᙮ ᒋᓴᒪᓂᑐᐤ ᒋᑭ ᑎᐸᐊᒪᒄ ᐃᔅᐱ ᐅᓂᔅᑲᑥᐛ ᓂᐳᐅᓂᒡ ᐅᒡ ᐊᓐᒡ ᑲ ᒂᔅᑲᑎᓯᒡ᙮”

ᒋᔅᒋᓄᐊᒪᒐᐤ ᑎᐸᒋᒧᐅᓐ ᒋᒋ ᒥᑯᓴᐅᓐ ᐊ ᑎᐸᑕᑭᓄᐅᒡ

¹⁵ ᒋ ᑕᔪᐛ ᓇᐸᐛ ᐊ ᐎᑎᐱᒥᑯᑦ ᐅᑎᐸᔨᒋᒐᐤ ᐊᓐᑕ ᒥᒋᓱᐛᑭᓇᑎᑯᒡ᙮ ᐸᐃᒄ ᒪᒃ ᐊᓂᔭ ᓇᐸᐛ, ᐃᔅᐱ ᐱᔭᑎᒥᔨᒋ ᐊᓂᔭ ᑲ ᐃᔅᒋᔄᑦ, ᒋ ᐃᑎᑯᐤ, “ᐊᔪᐛᒡ ᓱᐛᔨᑕᑯᓱᐅᒡ ᐊᓐᒡ ᒐ ᒥᒋᓱᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᒡ ᒥᑯᓴᓄᔨᒐ᙮”

¹⁶ ᒋᓴᔅ ᒂ ᐎᑎᒧᐛᑦ ᐊᓂᔭ ᓇᐸᐛ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ, “ᐸᐃᒂᐤ ᓇᐸᐤ ᐊᒋ ᐊᔭᔅᑯᔅᑕᑦ ᐊ ᒥᓴᔨᒡ ᒥᑯᓴᓂᔪᐤ, ᒥᒐᑦ ᐊᐛᔪᐛ ᒋ ᐎᓴᒪᐤ᙮

¹⁷ ᐃᔅᐱ ᒪᒃ ᐛᑎᒋᐱᔨᒡ ᒐ ᒥᒋᓱᓇᓄᐎᒡ ᒋ ᐃᑎᓴᐛᐤ ᐊᓂᔭ ᐅᑦ ᐊᐱᒋᐊᑭᓇ ᒐᒋ ᐃᑕᔨᒋ ᐊᓂᔭ ᑲ ᐎᓴᒪᑭᓄᔨᒋ, ‘ᐸᒋ ᑎᑯᓯᓂᒄ ᔅᑎᑯᓇᐛᐤ, ᓴᔅ ᒥᓯᐛ ᒐᒂᓐ ᐊᔭᔅᑯᔅᑕᐤ᙮’ ”

¹⁸ “ᒥᓯᐛ ᒪᒃ ᐊ ᑎᓯᒡ ᒋ ᐃᔅᒋᔄᐅᒡ ᒐ ᐊᑲ ᒋ ᑎᑯᓯᓂᒡ᙮ ᐊᓐ ᓇᐸᐤ ᓂᔅᑎᒻ ᑲ ᓂᑐᐛᐱᒪᑭᓄᐅᑦ ᒋ ᐃᔅᒋᔄᐤ, ‘ᓂ ᒥᑕᒋᔨᐛᓯᓐ ᐊᑲ ᒋ ᐃᑐᑕᔭᓐ ᐛᔅ ᓂᒋ ᐅᑎᓇᓐ ᓂᑕᐅᒋᑕᑭᓐ ᐊᔅᒋᔾ, ᐸᑎᒪ ᒪᒃ ᓂᑭ ᑭᓄᐛᐸᑕᓐ᙮’ ”

¹⁹ “ᐊᓐ ᑯᑎᒃ ᓇᐸᐤ ᒋ ᐃᔅᒋᔄᐤ, ‘ᓂ ᒥᑕᒋᔨᐛᓯᓐ ᐊᑲ ᒋ ᐃᑐᑕᔭᓐ, ᐊᓄᒡ ᐛᔅ ᐊᓐ ᐸᐃᑯᔪᐤ ᒥᔅᑐᓯᒡ ᑲᒋ ᐅᑕᐸᒡ ᓂᒋ ᐅᑎᓇᐅᒡ᙮ ᐸᑎᒪ ᒪᒃ ᓂᑭ ᐎᐧᑯᒋᐊᐅᒡ᙮ ᓇᒪ ᒪᒃ ᓂᑦ ᐃᔅᐱᓯᓐ ᒐᒋ ᐃᑐᑕᔭᓐ᙮’ ”

²⁰ “ᒥᓐ ᑯᑎᒃ ᓇᐸᐤ ᒋ ᐃᑕᐤ, ‘ᐊᓄᒡ ᐛᓱᐤ ᓂᒋ ᓂᐳᐅᓐ, ᐊᐅᒄ ᒪᒃ ᐅ ᐛᒋ ᐊᑲ ᒋ ᑎᑯᓯᓂᔭᓐ᙮’ ”

²¹ “ᐊᓐ ᒪᒃ ᐊᐱᒋᐊᑭᓐ ᒋ ᐎᑎᒧᐛᐤ ᐅᒋᒪᒪ ᑕᓐ ᑲ ᐃᔅᒋᔄᔨᒡ ᐅᔭ᙮ ᐊᑯ ᒪᒃ ᐊᓐ ᐅᒋᒪᐤ ᑲ ᐎ ᒥᑯᓴᑦ ᓇᔅᒡ ᑕᑈ ᒋ ᒋᔄᓱᐤ᙮ ᒂ ᐃᑕᑦ ᐊᓂᔭ ᐅᑦ ᐊᐱᒋᐊᑭᓇ, ‘ᒋᐱᔾ, ᒪᒋ ᒥᓯᐛ ᐃᑐᑕ ᐅᑕ ᐅᑕᓇᒡ, ᒐ ᐸᓱᐅᑥᐤ ᐊᓐᒡ ᑲ ᒋᔅᑎᒪᑎᓯᒡ, ᑲ ᒪᔅᒋᓂᑕᐅᒋᒡ ᐊᑲ ᐛᐸᑕᒡ ᑭᔭ ᐊᓐᒡ ᐊᑲ ᒋ ᐊᑎᓂᓱᒡ᙮’ ”

²² “ᐎᐱᒡ ᒪᒃ ᒋ ᑎᑯᓯᓐ ᐊᓐ ᐊᐱᒋᐊᑭᓐ ᐊᑯ ᒂ ᐃᑕᑦ ᐊᓂᔭ ᐅᒋᒪᒪ, ‘ᓴᔅ ᓂᒋ ᐃᑐᑕᓐ ᑕᓐ ᑲ ᐃᓯ ᓂᑐᐛᔨᒥᔨᓐ ᒐᒋ ᐃᑐᑎᒪᓐ ᐊᔅᒄ ᒪᒃ ᒥᔅᑎ ᑐᐛᐤ ᐊᑐᐎᔅ ᑯᑎᑭᒡ ᒐᒋ ᑎᑯᓯᓂᒡ᙮’ ”

²³ “ᒂ ᐃᑎᑯᑦ ᐅᒋᒪᒪ, ‘ᐊᓐᑕ ᐃᑐᑕ ᒪᔅᑭᓇᒡ ᑭᔭ ᐊᓐᑕ ᓄᒋᒥᒡ ᒐ ᓯᒋᒥᑥᐤ ᐃᔪᒡ ᒐᒋ ᑎᑯᓯᒡ ᒐᒋ ᐅᒋ ᓴᑭᔅᒋᓇᒡ ᐅᑕ ᓂᒋᒡ᙮

²⁴ ᒋ ᐎᑎᒪᑎᓐ, ᓇᒪ ᐛᐛᒡ ᐸᐃᒄ ᐊᓐᒡ ᓂᔅᑎᒻ ᑲ ᐎᓴᒥᒂᐤ ᒋᑭ ᐅᒋ ᑯᒋᔅᑎᒧᒡ ᐅᔭᔪᐤ ᓂᒥᑯᓴᓂᔪᐤ᙮’ ”

ᑕᓐ ᐊᓐ ᐊ ᐃᑕᔨᑕᒂᒡ ᐊ ᐎ ᓇᓴᐛᑭᓄᐅᑦ ᒋᓴᔅ Luke 14.25-33 (Proper-18 Year C)

²⁵ ᒋ ᒥᒐᑎᔪᐛ ᒪᒃ ᐊᐛᔪᐛ ᐊ ᐱᐸᐎᒐᐅᑯᑦ ᒋᓴᔅ, ᒋ ᑭᓄᐛᐱᒪᐤ ᒪᒃ ᐊᑯ ᒂ ᐃᑕᑦ,

²⁶ “ᐊᐛᓐ ᐛ ᓇᓴᐅᒂ ᑕᓐ ᐊ ᐃᓯ ᐱᒪᑎᓯᔭᓐ, ᓂᔾ ᐊᑐᐎᔅ ᓂᑭ ᓴᒋᐃᒄ ᐊᔅᐱᔅ ᓴᒋᐊᑦ ᐅᑕᐎᔭ ᑭᔭ ᐅᑲᐎᔭ, ᐎᐛ, ᐅᑦ ᐊᐛᓯᒪ ᑭᔭ ᑎᐱᔨᐛ ᐎᐧᑲᓂᓴ᙮ ᓂᔾ ᐅᔅᑕ ᓂᑭ ᓴᒋᐃᒄ ᐃᔅᐱᔅ ᐎᔾ ᐊ ᐃᔅᐱᔅ ᓴᒋᑕᑦ ᑎᐱᔨᐛ ᐅᐱᒪᑎᓯᐅᓐ᙮ ᐊᑲ ᒪᒃ ᒋ ᑎᒐ ᓇᒪ ᓂᑭ ᒋ ᐅᒋᔅᒋᓄᐊᒧᐛᑭᓂᑐᑐᐛᐤ᙮

²⁷ ᐊᐛᓐ ᐊᑲ ᐱᒪᐅᔭᒐ ᐅᒋᐱᔭᑎᑯᒪ ᐊ ᐸᒋ ᓇᓴᐅᑦ ᓇᒪ ᓂᑭ ᒋ ᐅᒋᔅᒋᓄᐊᒧᐛᑭᓂᑐᑐᐛᐤ᙮”

²⁸ “ᒧᔭᒻ ᐊ ᐃᓯᓇᑯᓯᑦ ᐊᐛᓐ ᐊ ᐎ ᐎᔨᑲᐳᐅᑕᑦ ᐊᓱᐛᐳᐅᒋᐛᐱᔪᐤ, ᓂᔅᑎᒻ ᒋᑭ ᐎᔭᔨᑎᒻ ᑕᓐ ᓴᓯᑲᓐ ᒐ ᐃᔅᐱᔅ ᐃᔅᐱᔨᐃᑯᑦ, ᑭᔭ ᑕᑈ ᑎᑉ ᐊ ᐃᔅᐱᔅ ᐃᔭᒂ ᓱᓇᔭᔪᐤ ᒐᒋ ᒋᔅᑕᑦ᙮

²⁹ ᐊᑲ ᒪᒃ ᓂᔅᑎᒻ ᓂᑐ ᒋᔅᒐᔨᑕᒐ ᑕᓐ ᒐ ᐃᔅᐱᔅ ᐃᔅᐱᔨᒡ ᒋᑭ ᒋ ᐃᓯᓇᑯᓱᐤ ᒐᒋ ᓄᑕᐱᔨᑦ ᓱᓇᔭᐤ ᑭᔭ ᓇᒪ ᒋᑭ ᒋ ᒋᔅᑕᐤ ᐊᓂᔭ ᑲ ᐅᓯᑕᑦ᙮ ᐛᐸᑎᒥᔨᒐ ᒪᒃ ᐊᐛᔪᐛ ᐊᓂᔭ ᐊ ᐃᔅᐱᔨᑦ ᒋᑭ ᒪᔭᔨᒥᑯᐤ᙮

³⁰ ᒋᑭ ᐃᑎᑯᐤ, ‘ᐅ ᓇᐸᐤ ᒋ ᒋᒋᐱᔨᑕᐤ ᐊ ᐎᔨᑲᐳᐅᑕᑦ ᒥᒋᐛᐱᔪᐤ, ᓇᒪ ᒪᒃ ᒋ ᒋᔅᑕᐤ᙮’ ”

³¹ ᐊᑯ ᒥᓐ ᐅᔭ ᑲ ᐊᑎ ᐃᔅᒋᔄᑦ ᒋᓴᔅ, “ᑭᔭ ᒧᔭᒻ ᐊ ᐃᓯᓇᑯᓯᑦ ᒋᓴᐅᒋᒪᐤ ᐸᐃᑯᔪᐤ ᑕᑥᐤ ᒐᓯᐱᔪᐤ ᐊ ᑕᑎᓯᔨᒋ ᐅᑦ ᐊᓯᒪᑭᓂᓯᒪ, ᐊ ᐎ ᓂᑐᐱᔨᑐᐛᑦ ᒪᒃ ᑯᑎᑲ ᒋᓴᐅᒋᒪᐛ ᓂᓱᔪᐤ ᑕᑥᐤ ᒐᓯᐱᔪᐤ ᐊ ᑕᑎᓯᔨᒋ ᐅᑦ ᐊᓯᒪᑭᓂᓯᒥᔪᐛ, ᐸᑎᒪ ᒋᑭ ᒪᒥᑐᓇᔨᑎᒥᐃᑯᐤ ᑕᑈ ᒐᒋ ᓴᒂᐊᒂ᙮

³² ᐊ ᐃᑕᔨᑎᒧᒂ ᒪᒃ ᒐ ᓴᑯᐃᑯᑦ ᐊᓂᔭ ᑯᑎᑲ ᒋᓴᐅᒋᒪᐛ ᒋᑭ ᐃᑎᓴᐛᐤ ᐱᔅᒐ ᓇᐸᐛ ᒐᒋ ᓂᒋᔅᑯᐛᔨᒋ ᐊᓂᔭ ᒋᓴᐅᒋᒪᐛ ᐊᔅᒄ ᐊ ᐊᔭᐅᓇᑯᓯᔨᒋ, ᐊᑯ ᒐ ᑯᒂᒋᒪᒡ ᑕᓐᑕ ᒐᒋ ᐃᑎᒡ ᒐ ᐊᑲ ᒋ ᓂᑐᐱᔨᑕᑐᒡ᙮

³³ ᐊᑯ ᒋᓴᔅ ᒥᓐ ᒂ ᐊᑎ ᐃᔅᒋᔄᑦ, ᐊᐅᑯᓐ ᒪᒃ ᒧᔭᒻ ᐊ ᐃᓯᓇᑯᓂᔨᒡ ᐊᐛᓐ ᑲ ᓂᑐᐛᔨᑕᐧᒃ ᒐᒋ ᐅᒋᔅᒋᓄᐊᒧᐛᑭᓂᑐᑐᐅᒃ, ᐸᑐᔅ ᒋᑭ ᐱᔅᑎᓂᒻ ᒥᓯᐛ ᒐᒂᔪᐤ ᐊ ᐃᓯ ᐊᔭᑦ᙮”

ᐊ ᐃᑕᔨᑕᒂᒡ ᓯᐅᑕᑭᓐ ᐊ ᐃᔭᔪᐛᒡ

³⁴ ᐊᑯ ᒪᒃ ᒥᓐ ᒋᓴᔅ ᐊᑐᐎᔅ ᒂ ᐊᑎ ᒋᔅᑯᑎᒧᐛᑦ ᐅᔭᔪᐤ ᑎᐸᒋᒧᐅᓂᔪᐤ ᐅᒋ, ᐊ ᐃᔅᒋᔄᑦ, “ᒥᔽᐤ ᓯᐅᑕᑭᓐ᙮ ᒥᒄ ᒪᒃ ᐊᑲ ᐎᔭᐱᒋᔅᐱᒂᒐ ᐊᓐ ᓯᐅᑕᑭᓐ ᓇᒪ ᑎᑯᓐ ᑕᓐᑕ ᒐᒋ ᐃᑐᑕᑭᓄᐅᒡ ᓯᐅᑕᑭᓐ ᒐᒋ ᐃᔅᐱᒂᒡ ?

³⁵ ᐊᑯ ᒪᒃ ᓇᒪ ᓇᔅᒡ ᒋᑭ ᒋ ᐎᔭᔅ ᐃᑕᐱᑎᓐ ᐛᐛᒡ ᑭᔭ ᐊᓐᑕ ᓂᑕᐅᒋᑕᑭᓐ ᐊᔅᒋᒡ᙮ ᐊᑯᔅ ᒪᒃ ᓂᑕᒡ ᒋᑭ ᐛᐱᓇᑭᓄᐤ᙮ ᐃᔭᒂ ᓂᑐᑕ ᒐᒋ ᓂᔅᑐᑎᒥᓐ ᑕᓐ ᐊᓐ ᐛ ᐃᓯ ᐎᑎᒪᑕᓐ᙮”