ᓗᒃ 13 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐳᓂ ᐊ ᒥᒋᑐᑎᒥᓐ Luke 13.1-9 (Lent-3 Year C)

¹ ᐊᓐᑕ ᒪᒃ ᒪᒂᒡ ᒋ ᑕᐅᒡ ᐊᓐᑕ ᐃᔪᒡ ᐊᒋ ᐎᑎᒧᐛᒡ ᒋᓴᓴ ᑕᓐ ᑲ ᐃᑐᑐᐛᑭᓄᔨᒋ ᐱᔅᒐ ᐃᔪᐛ ᑲᓕᓕ ᐊᔅᒋᒡ ᑲ ᐅᒋᔨᒋ᙮ ᒋᓴᐅᒋᒪᐅᑯᐸᓇᐛ ᑈᓚᑦ ᐊ ᐃᓯᓂᐧᑲᓱᔨᒋ ᐊᒋ ᓂᐸᐊᔨᒋ ᐊᓂᔭ ᐃᔪᐛ ᒪᒂᒡ ᐊᒋ ᐎ ᒥᑐᔅᑕᐊᒧᐛᒡ ᒋᓴᒪᓂᑐᐛ ᐊᓐᒡ ᐃᔪᒡ ᐊᓂᔭ ᐊᐛᓯᓴ ᑲ ᓂᐸᐊᒡ᙮

² ᐊᑯ ᒋᓴᔅ ᒂ ᐃᑕᑦ, “ᒋᑦ ᐃᑕᔨᑕᓇᐛᐤ ᐊ ᐊᓂᔭ ᐊᒋ ᓂᐸᐊᑭᓄᐎᒡ ᐊ ᓄᑯᓂᔨᒡ ᐅᔅᑕ ᐎᔨᐛᐤ ᐊᒋ ᒥᒋᑐᑎᒧᐛᑯᐱᓇ ᐃᔅᐱᔅ ᑯᑎᑭᒡ ᐃᔪᒡ ᐅᑕ ᑲᓕᓕᒡ ?

³ ᓇᒪ, ᓂᑐᑎᒧᒄ ᒪ ᒐ ᐃᑎᑎᑯᒡ, ᒧᔭᒻ ᐊᑲ ᒂᔅᑲᑎᓯᔭᒂ ᐊᐅᑯᓐ ᒧᔭᒻ ᑭᔭ ᒋᔨᐛᐤ ᒐ ᐃᓯ ᓂᓱᐅᓇᒋᐃᑯᐅᔭᒄ᙮

⁴ ᒋ ᒋᔅᒋᓯᓇᐛᐤ ᐊ ᔭᓇᐤ ᑕᑐᓴᑉ ᐃᔪᒡ ᐊᓐᑕ ᐅᑕᓇᒡ ᓴᐃᓗᐊᒻ ᑲ ᐃᓯᓂᐧᑲᑕᔨᒡ ᑲ ᓂᐱᒡ ᐊᒋ ᐱᑎᔅᑕᐅᑯᒡ ᑲ ᐃᔅᐸᓇᔨᒡ ᐊᓱᐛᐳᐅᒋᐛᐱᔪᐤ ? ᒋᑦ ᐃᑕᔨᑕᓇᐛᐤ ᐊ ᐊᒋ ᓄᑯᓂᔨᒡ ᐎᔨᐛᐤ ᐅᔅᑕ ᐊᒋ ᒥᒐᑎᓯᒡ ᐃᔅᐱᔅ ᑯᑎᑭᒡ ᐊᐛᓐᒋ ᐊᓐᑕ ᒋᕈᓯᓕᒥᒡ ᑲ ᑕᒡ᙮

⁵ ᓇᒪ, ᓂᑐᑎᒧᒄ ᒪ, ᒧᔭᒻ ᐊᑲ ᒂᔅᑲᑎᓯᔭᒂ ᑭᔭ ᒋᔨᐛᐤ ᒋᑭ ᓂᓱᐅᓇᑎᓯᓇᐛᐤ᙮”

ᒥᔅᑎᒄ ᐊᑲ ᒥᓂᓱᐅᑦ

⁶ ᐊᑯ ᒋᓴᔅ ᒂ ᐎᑎᒧᐛᑦ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ᙮ ᒋ ᐃᑕᐤ, “ᒋ ᑕᐤ ᓇᐸᐤ ᐊᒋ ᐊᔭᐛᑦ ᒥᓯᓱᒥᓇᑎᒂ ᐊ ᓂᑕᐅᒋᔨᒋ ᐊᓐᑕ ᐅᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᒡ᙮ ᐊᑯ ᐸᐃᒂᐤ ᐊ ᒋᓯᑲᔨᒡ ᒋ ᓂᑐ ᒋᔅᒐᔨᒪᐤ ᒐ ᒥᓂᓱᐎᒂᓂ ᐊᓂᔭ ᒥᔅᑎᒂ᙮ ᓇᒪ ᒪᒃ ᒐᒂᔪᐤ ᐅᒋ ᒥᓂᓱᐅᔪᐤ᙮

⁷ ᐊᑯ ᐊᑕᑦ ᐊᓂᔭ ᓇᐸᐛ ᑲ ᓂᓇᑭᑐᐛᐸᑎᒥᔨᒋ ᐊᓂᔭᔪᐤ ᐅᓂᑕᐅᒋᑕᑭᓇ, ‘ᑭᓄᐛᐸᑕ ᒪ, ᐊᓯᑯᒻ ᐱᐳᓇ ᓂᒋ ᑎᑯᓯᓐ ᐅᑕ, ᓂᔅᑐ ᐱᐳᓇ ᐃᔅᐱᔅ, ᒐᒋ ᓂᑐ ᒋᔅᒐᔨᒥᒃ ᐅ ᒥᓯᓱᒥᓇᑎᒄ ᐊ ᒥᓂᓱᐅᒂ᙮ ᓇᒪ ᒪᒃ ᒐᒂᓐ ᓂ ᒥᔅᑲᓐ ᒐᒋ ᓂᑕᐅᒋᒡ ᐊᓐᑕ, ᓇᑥᑲᐅᐤ ᐊᑯᔅ, ᒐᔅᑲ ᑲ ᒋᒥᓱᑦ ᐊᓐᑕ ᐊᔅᒋᒡ ?’ ”

⁸ “ᐊᑯ ᒪᒃ ᐊᓐ ᑲ ᓂᓇᑭᑐᐛᔨᑕᐧᒃ ᐊᓂᔭᔪᐤ ᓂᑕᐅᒋᑕᑭᓇ ᒋ ᐃᑕᐤ, ‘ᐊᑲᐎᔾ ᐸᑎᒪ ᐱᔅᒐᔨᒻ, ᒥᓐ ᐸᐃᒄ ᐱᐳᓇ ᒋᑭ ᐃᓯᑲᐳᐤ᙮ ᓂᑭ ᒧᓇᐛᐤ ᐊᓐᑕ ᐛᔅᑲ, ᐊᑯ ᒐ ᐊᔅᑕᔭᓐ ᐊᓐᑕ ᒐᒂᓐ ᒐᒋ ᐅᒋ ᒥᔪ ᓂᑕᐅᒋᑦ᙮

⁹ ᒐᒃ ᒪᒃ ᒥᓂᓱᐅᒐ ᒥᓐ ᐱᐳᓂᔨᒐ ᒋᑭ ᒥᔽᔨᑕᓇᓄᐤ᙮ ᐊᑲ ᒪᒃ ᒥᓂᓱᐅᒐ, ᐊᑯᔅ ᒋᑭ ᓇᑥᑲᐛᑭᓄᐤ᙮’ ”

ᒋᓴᔅ ᑲ ᒥᓏᒋᐊᑦ ᑲ ᒪᔅᒋᓯᔨᒋ ᐃᔎᐛ ᐊ ᐊᔭᒥᐊᐅᒋᓯᑲᔨᒡ Luke 13.10-17 (Proper-16 Year C)

¹⁰ ᐸᐃᒂᐤ ᐊ ᒍᐤ ᐊᔭᒥᐊᐅᒋᓯᑲᔨᒡ, ᒋᓴᔅ ᒋ ᒋᔅᑯᑎᒪᒐᐤ ᐊᓐᑕ ᐊᔭᒥᐊᐅᒋᐛᐱᒡ᙮

¹¹ ᐃᔎᐤ ᒪᒃ ᐊᓐᑕ ᒋ ᑕᐤ ᒥᒋ ᐊᒐᒂ ᐊᒋ ᐱᒋᔅᑲᑯᑦ ᐊᒋ ᐃᑐᑕᑯᑦ ᔭᓇᐤ ᑕᑐᓴᑉ ᐱᐳᓇ ᒐᒋ ᐃᔅᐱᔅ ᐊᐧᑯᓯᑦ ᐊᒋ ᒪᔅᑲᒋᐱᔅᑯᓇᑦ ᐊᑲ ᐅᒋ ᑯᐃᔅᑯᑲᐳᐅᑦ᙮

¹² ᐃᔅᐱ ᒋᓴᔅ ᐎᔭᐱᒪᑦ ᐊᓂᔭ ᐃᔎᐛ ᒋ ᐎᓴᒪᐤ ᐊᑯ ᒂ ᐃᑕᑦ, “ᐃᔎᐤ, ᓴᔅ ᓇᔅᒡ ᒋ ᒥᓏᒋᐃᑯᓐ ᑕᓐ ᑲ ᐃᑕᔅᐱᓇᔨᓐ᙮”

¹³ ᒂ ᑕᒋᓇᑦ᙮ ᑎᐛᒡ ᒪᒃ ᒋ ᐅᒋ ᑯᐃᔅᑯᑲᐳᐤ ᐊᓐ ᐃᔎᐤ ᐊ ᒪᒥᒋᒪᑦ ᒋᓴᒪᓂᑐᐛ᙮

¹⁴ ᐊᑯ ᒪᒃ ᐊᓐ ᑲᓂᑲᓂᔅᑲᐧᒃ ᐊᓂᔭ ᐊᔭᒥᐊᐅᒋᐛᐱᔪᐤ ᓇᔅᒡ ᑕᑈ ᒋ ᒋᔄᓱᐤ ᒋᓴᓴ ᐊᒋ ᒥᓏᒋᐊᔨᒋ ᐊᐛᔪᐛ ᒪᒂᒡ ᐊ ᒍᐤ ᐊᔭᒥᐊᐅᒋᓯᑲᔨᒡ᙮ ᐊᑯ ᒂ ᐃᑕᑦ ᐊᓂᔭ ᑯᑎᑲ ᐃᔪᐛ ᐊᓐᑕ ᑲ ᑕᔨᒋ, “ᐊᓱᑕᒡ ᑕᑐᐤ ᒋᓯᑲᐛ ᑎᑯᓇ ᒐᒋ ᐊᑐᔅᒐᓇᓄᐅᒡ, ᐊᑯᑕ ᒋᐸ ᐸᒋ ᑎᑯᓯᓇᐛᐤ ᒪᒂᒡ ᐊᓂᔭ ᐊ ᒋᓯᑲᔨᒋ ᒐᒋ ᒥᓏᒋᐃᑯᐅᔭᒄ ᓇᒪ ᐎ ᒪᒂᒡ ᐊ ᒍᐤ ᐊᔭᒥᐊᐅᒋᓯᑲᒡ᙮”

¹⁵ ᐅᑎᐸᔨᒋᒐᐤ ᒂ ᐎᑎᒧᐛᑦ ᐊᓂᔭ ᑲ ᓂᑲᓂᔅᑭᒥᔨᒡ ᐊᓂᔭ ᐊᔭᒥᐊᐅᒋᐛᐱᔪᐤ ᐊ ᐃᑕᑦ, “ᒋᔾ ᑲ ᐊᔭᒥᐊᐧᑲᓱᔨᓐ, ᐊᑎ ᐊ ᒍᐤ ᐊᔭᒥᐊᐅᒋᓯᑲᒡ ᓇᒪᐎᔾ ᐊ ᐃᔭᐱᒡ ᒋᑦ ᐊᐱᐧᑯᓇᐤ ᒋᑦ ᐊᐛᓯᓯᒻ ᒪᒃ ᒋᒥᔅᑐᓯᒻ ᒐᒋ ᐃᑐᑕᐃᑦ ᐊᓐᑕ ᒐ ᒥᓐᑦ ?

¹⁶ ᐊᑯ ᒪᒃ ᐅ ᒍᐤ ᐃᔎᐤ ᔭᓇᐤ ᑕᑐᓴᑉ ᐱᐳᓇ ᒋᑦ ᐃᔅᐱᔅ ᒪᑯᐱᑎᑯᐤ ᒥᒋᒥᓂᑐᐛ, ᓇᒪᐎᔾ ᐊ ᐃᓯᓇᑯᓂᔪᐤ ᒐᒋ ᐊᐱᐧᑯᓇᑭᓄᐅᑦ ᐊᑎ ᐊ ᒍᐤ ᐊᔭᒥᐊᐅᒋᓯᑲᔨᒡ ?”

¹⁷ ᐊᑯ ᒪᒃ ᒥᓯᐛ ᐊᓂᔭ ᑲ ᐊᓏᔨᒥᑯᑦ ᐊᒋ ᒥᓏᒋᐊᑦ ᐊᓂᔭ ᐃᔎᐛ ᒪᒂᒡ ᐊ ᐊᔭᒥᐊᐅᒋᓯᑲᔨᒡ ᓇᔅᒡ ᑕᑈ ᒋ ᓯᓴᒂᔨᒧᔪᐛ᙮ ᐊᑯ ᐊᓐᒡ ᑯᑎᑭᒡ ᐃᔪᒡ ᒋ ᒥᔽᔨᑎᒧᒡ ᒥᓯᐛ ᐊᓂᔭ ᑲ ᐃᓯ ᒪᒥᔅᑲᒡ ᐃᑐᑎᒥᔨᒋ ᒋᓴᓴ᙮

ᑲ ᐊᐱᓯᓯᑦ ᓂᑕᐅᒋᑕᑭᓐ ᑭᔭ ᑲᐅᐱᔨᒡ

¹⁸ ᐊᑯ ᒋᓴᔅ ᑲ ᑯᒂᒋᒪᑦ ᐊᓂᔭ ᐊᓐᑕ ᑲ ᑕᔨᒋ, “ᑕᓐ ᐊ ᐃᑕᔨᑕᑯᓂᔨᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ ? ᑕᓐᑕ ᒐᒋ ᐅᒋ ᐎᑎᒪᑎᑯᒡ ᑕᓐ ᐊᓐ ᐊ ᐃᑕᔨᑕᑯᓂᔨᒡ ?

¹⁹ ᒧᔭᒻ ᐊᓐ ᓂᑕᐅᒋᑕᑭᓐ ᑲ ᐊᐱᓯᓯᑦ ᒪᔅᑎᕐᑦ ᑲ ᐃᓯᓂᐧᑲᑕᑭᓄᐅᑦ ᐊᐅᑯᓐ ᐊ ᐃᓯᓇᒂᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ᙮ ᐊᐅᒄ ᐅᔭ ᓂᑕᐅᒋᑕᑭᓇ ᐛᑎᓇᑦ ᓇᐸᐤ ᐊ ᓂᑕᐅᒋᑕᑦ ᐊᓐᑕ ᐅᓂᑕᐅᒋᑕᑭᓐ ᐊᔅᒋᒡ᙮ ᒐᒃ ᓇᑕᐅᒋᔨᒋ, ᒥᔅᑎᒄ ᓇᓂᑯᑎᓂᔾ ᐊᔪᐛᒡ ᐱᐱᔅᒐᓂᑕᐅᒋᔪᐛ ᐊᓐᑕ ᐊᓐ ᓂᑕᐅᒋᑕᑭᓐ ᐅᒡ᙮ ᐱᔭᓯᓯᒡ ᒪᒃ ᐊᑯᑕ ᐛᒋᔅᑐᓂᐧᑲᓱᒡ ᐊᓐᑕ ᐊ ᐎᑎᐧᑯᓄᔨᒋ ᐊᓂᔭ ᒥᔅᑎᒂ᙮”

²⁰ ᒥᓐ ᒪᒃ ᒋ ᐃᓯ ᑯᒂᒋᒪᐤ, “ᑕᓐ ᐊ ᐃᑕᔨᑕᒂᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ ?

²¹ ᒧᔭᒻ ᐸᒂᓯᑭᓐ ᑲᐅᐱᔨᒡ ᐊᐅᑯᓐ ᐊ ᐃᑕᔨᑕᒂᒡ, ᐊ ᒪᒧᐱᔭᑦ ᐃᔎᐤ ᐸᒂᓯᑭᓇ ᑲᐅᐱᔨᒋ ᒥᔅᑎ ᐸᒂᓯᑭᓂᒡ, ᒥᓯᐛ ᒪᒃ ᐅᐱᔪᐛ ᐊᓂᔭᔪᐛ ᐸᒂᓯᑭᓇ᙮”

ᑲ ᓴᑯᐊᒡ ᐃᔎᑕᒻ

²² ᒋᓴᔅ ᒋ ᐊᑎ ᒋᔅᑯᑎᒪᒐᐤ ᐊᓐᑕ ᑲ ᐊᑎ ᐛᐅᑎᑕᐧᒃ ᐊ ᐅᑕᓇᐅᓂᔨᒡ ᑭᔭ ᐊ ᐊᑎ ᑎᑯᓂᔨᒋ ᐅᑕᓇᓴ ᐊᔅᒄ ᐊᑲ ᐅᒋ ᐅᑎᑕᐧᒃ ᒋᕈᓯᓕᒥᔪᐤ ᐊᓐᑕ ᑲ ᐎ ᐃᑐᑕᑦ᙮

²³ ᒋ ᑯᒂᒋᒥᑯᐤ ᒪᒃ ᒋᓴᔅ ᐊᐛᔪᐛ ᐊ ᐃᑎᑯᑦ, “ᐅᑎᐸᔨᒋᒐᐤ, ᒥᒄ ᐊ ᐱᔅᒐ ᐊᐛᓐᒋ ᒋᑭ ᐱᒪᒋᐊᑭᓄᐅᒡ ?” ᒋ ᐃᑕᐤ ᒪᒃ ᒋᓴᔅ,

²⁴ “ᒥᒐᑦ ᐊᐛᓐᒋ ᒋᑭ ᑯᒋᑕᐅᒡ ᒐᒋ ᐱᒐᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ, ᓇᒪ ᒪᒃ ᒋᑭ ᒋ ᐃᑐᐅᒡ᙮ ᒋᔨᐛᐤ ᒪᒃ ᓱᒃ ᑯᒋᑕᒄ ᒐᒋ ᐱᒐᔭᒄ ᐊᓐᑕ ᐅᒋ ᐊᓐ ᑲ ᓴᑯᐛᒡ ᒋᐱᔎᐤ᙮

²⁵ ᐊᑲ ᒪᒃ ᐛᒋ ᐱᒐᐛᐛᒂ, ᐃᔅᐱ ᒋᐸᐊᒐ ᒋᐱᔎᔪᐤ ᐊᓐ ᑲ ᑎᐸᔨᑕᐧᒃ ᐊᓂᔭ ᒥᒋᐛᐱᔪᐤ, ᐎᐎᑎᒥᒡ ᓂᐳᔭᒂ ᐊ ᑎᑥᐛᐃᒐᔭᒄ ᒋᑭ ᐃᔅᒋᔄᓇᐛᐤ, ‘ᐅᑎᐸᔨᒋᒐᐤ, ᐸᒋ ᔪᑕᓂᒧᐅᓇᓐ᙮’ ᑭᔭ ᒐ ᐃᓯ ᐎᑎᒪᑕᒄ, ‘ᓇᒪ ᒋᑭ ᐅᒋ ᓴᓂᒪᑎᓇᐛᐤ ᐛᔅ ᓇᒪ ᒋ ᒋᔅᒐᔨᒥᑎᓇᐛᐤ, ᓇᒪ ᑭᔭ ᓂ ᒋᔅᒐᔨᑕᓐ ᑕᓐᑕ ᐛᒋᔭᒄ᙮’ ”

²⁶ “ᐊᑯ ᒪᒃ ᒐ ᐃᓯ ᓂᔎᐅᓯᐊᒄ, ‘ᔅᒋ ᐎᒋᒥᒋᓱᒥᑎᓇᓐ, ᔅᒋ ᐎᒋᒥᓂᒥᑎᓇᓐ ᑭᔭ ᔅᒋ ᑕᓐ ᓂᑦ ᐃᑕᐅᓇᒡ ᐊ ᒋᔅᑯᑎᒪᒐᔨᓐ᙮’ ”

²⁷ “ᒥᓐ ᒪᒃ ᐃᔭᐱᒡ ᒋᑭ ᐃᑎᑯᐛᐤ, ‘ᓇᒪ ᓂ ᒋᔅᒐᔨᑕᓐ ᑕᓐᑕ ᐛᒋᔭᒄ, ᐃᒐᑕᒄ ᓇᑕ ᒥᓯᐛ, ᒋᔨᐛᐤ ᑲ ᒥᒋᑐᑎᒪᒄ᙮’ ”

²⁸ “ᓇᔅᒡ ᑕᑈ ᓱᒃ ᒋᑭ ᒪᓇᐛᐤ ᑭᔭ ᒋᑭ ᒪᒥᑥᔭᐱᑕᓯᓇᐛᐤ ᐃᔅᐱ ᐛᐱᒪᒂᐛ ᐊᑉᕋᐊᒻ, ᐊᐃᓯᒃ, ᒐᑭᑉ, ᑭᔭ ᒥᓯᐛ ᐊᓂᔭᐧᑲ ᐅᒋᔅᒋᐛᐃᒐᓱᒡ ᐊ ᑕᒡ ᐎᔨᐛᐤ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ, ᒋᔨᐛᐤ ᒪᒃ ᐎᐎᐛᐱᓂᑯᐅᔭᒂ᙮

²⁹ ᒋᑭ ᑎᑯᓯᓄᐅᒡ ᐊᐛᓐᒋ ᐛᐱᓄᑕᒡ, ᐊᑎᒪᐱᓯᒧᒡ, ᒋᐛᑎᓄᒡ ᑭᔭ ᓴᐅᓄᒡ ᐊ ᐅᒋᒡ ᒐ ᐸᒋ ᒥᒋᓱᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ᙮

³⁰ ᐛᔅ ᐊᓐᒡ ᑲ ᐃᑕᔨᒪᑭᓄᐎᒡ ᐊᑲ ᒋᔅᑕᔨᑕᑯᓯᒡ ᒋᑭ ᒋᔅᑕᔨᑕᑯᓱᐅᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ, ᑭᔭ, ᐊᓐᒡ ᐊ ᒋᔅᑕᔨᑕᑯᓯᒡ ᑲ ᐃᑕᔨᒪᑭᓄᐎᒡ ᓇᒪ ᒋᑭ ᐅᒋ ᒋᔅᑕᔨᑕᑯᓱᐅᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ᙮”

ᒋᓴᔅ ᑕᓐ ᑲ ᐃᔅᐱᔅ ᓴᒋᑕᑦ ᒋᕈᓯᓕᒥᔪᐤ Luke 13.31-35 (Lent-2 Year C)

³¹ ᐊᓂᔭ ᒪᒃ ᒪᒂᒡ ᒋ ᑕᐅᒡ ᐸᕆᓯᔨᒡ ᐊ ᐸᒋ ᓂᑐᐛᐱᒪᒡ ᒋᓴᓴ᙮ ᒋ ᐃᑕᐅᒡ ᒪᒃ, “ᒪᒋ ᐃᒐᑕ ᐅᑕ ᐅᑕᓇᒡ, ᐃᔭᒡ ᓇᑕ ᐃᑐᑕ, ᐛᔅ ᐊᓐ ᒋᓴᐅᒋᒪᐤ ᐊᕈᑦ ᒋ ᐎ ᓂᐸᐃᒄ᙮”

³² ᒋ ᐃᑕᐤ ᒪᒃ ᒋᓴᔅ, “ᐎᑎᒧᐛᐧᒄ ᐊᓐ ᒪᒐᓱᐤ ᐊᕈᑦ, ᓂ ᐎᐎᑎᓴᐅᒪᐛ ᒥᒋ ᐊᒐᒂ ᑭᔭ ᓂ ᒥᓏᒋᐃᒪᐛ ᐃᔪᐛ ᐊᓄᒡ ᒐᓯᑲᔨᒡ ᑭᔭ ᐛᐸᒐ ᐊᐅᑯᓐ ᒐ ᐃᑎᔭᓐ᙮ ᒋ ᓂᔅᑐ ᒋᓯᑲᒐ, ᐊᑯ ᒐ ᒋᔅᑕᔭᓐ᙮”

³³ “ᐃᔭᐱᒡ ᓂᑭ ᐃᑐᑕᓐ ᑕᓐᑕ ᐛ ᐃᑐᑕᔭᓐ ᐊᓄᒡ ᒐᓯᑲᒡ ᒥᓐ ᐛᐸᒐ ᑭᔭ ᐅᓱᐛᐸᒐ ᓴᔅ ᓂᑭ ᑕᓐ ᐊᓐᑕ ᐛ ᐃᑐᑕᔭᓐ᙮ ᐛᔅ ᒥᓯᐛ ᐊᓂᔭᐧᑲ ᐅᒋᔅᒋᐛᐃᒐᓱᒡ ᑲ ᓂᐸᐊᑭᓄᐎᒡ ᐊᑯᑕ ᐊᓐᑕ ᒋᕈᓯᓕᒥᒡ ᑲ ᓂᓱᐅᓇᒋᐊᑭᓄᐎᒡ᙮ ᐊᐅᒄ ᒪᒃ ᐅ ᒐ ᐅᒋ ᐃᑐᑕᔭᓐ ᒋᕈᓯᓕᒥᒡ᙮”

³⁴ “ᒋᔨᐛᐤ ᒋᕈᓯᓕᒥᒡ ᑲ ᑕᔭᒄ, ᑲ ᓂᐸᐊᑯᒡ ᐊᓐᒡ ᐅᒋᔅᒋᐛᐃᒐᓱᒡ ᑭᔭ ᑲ ᐸᐱᐳᒧᓯᓇᑕᐛᑯᒡ ᐊᓂᔭᔪᐛ ᒋᓴᒪᓂᑐᐤ ᑲ ᐸᒋ ᐃᑎᓴᐊᒪᑕᒄ, ᑕᓐ ᑕᑥᐤ ᑲ ᐎ ᒪᐅᓯᑯᐱᑎᑎᑯᒡ ᐊᓐᑕ ᐃᔅ ᐊ ᑕᔭᓐ, ᒧᔭᒻ ᐱᑲᒂᓐ ᐊ ᐃᑐᑐᐛᑦ ᐅᐱᑲᒂᓂᓯᒪ, ᓯᐸ ᐅᑎᑎᑭᓂᒡ ᐊ ᐃᓯ ᒪᐅᓯᑯᓇᑦ ᐊ ᐎ ᓂᓇᑭᑐᐛᔨᒪᑦ᙮ ᐊᐅᑯᓐ ᒪᒃ ᒧᔭᒻ ᑲ ᐎ ᐃᑐᑕᑎᑯᒡ᙮ ᒥᒄ ᓇᒪ ᒋ ᐅᒋ ᐱᔅᑎᓇᐛᐤ ᐅ ᒐᒋ ᐃᑐᑕᑎᑯᒡ᙮

³⁵ ᒋᑭ ᓂᑭᑎᒪᑯᓇᐛᐤ ᒋᒋᐛᐛ ᓇᔅᒡ ᐊ ᓂᓱᐅᓇᑎᔨᒋ᙮ ᒋ ᐎᑎᒪᑎᓇᐛᐤ ᓇᒪ ᒋᑭ ᐅᒋ ᐛᐱᒥᓇᐛᐤ ᐸᑐᔅ ᐅᑎᒋᐱᔨᒐ ᒐᒋ ᐃᔅᒋᔄᔭᒄ, ᓱᐛᔨᑕᑯᓱᐤ ᐊᓐ ᑲ ᐸᒋ ᐃᑐᑕᑦ ᐅᑎᐸᔨᒋᒐᐛ ᐅᑦ ᐃᓯᓂᐧᑲᓱᓂᔨᒡ᙮”