ᒠᓐ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲᐃᓇᒡ ᑲ ᓂᐳᐅᓇᓄᒡ John 2.1-11 (Epiphany-2 Year C)

¹ ᑲᒋ ᓂᓱ ᒋᓯᑲᒡ ᒪᒃ ᒋ ᓂᐳᐅᓇᓄᐤ ᐊᓐᑕ ᐊᓐ ᐅᑕᓇᐤ ᑲᐃᓇ ᑲ ᐃᓯᓂᐧᑲᑕᒡ ᐊᓐᑕ ᑲᓕᓕ ᐊᔅᒋᒡ ᑲ ᑎᒂᒡ᙮ ᐊᑯᑕ ᐊᓐᑕ ᑲ ᑕᔨᒋ ᒋᓴᔅ ᐅᑲᐎᔭ᙮

² ᒋᓴᔅ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓇ ᑭᔭ ᐎᔨᐛᐤ ᒋ ᐎᓴᒪᐊᑭᓄᐅᒡ ᐊᓂᔭ ᐊ ᓂᐳᐅᓇᓄᐎᒡ,

³ ᐃᔅᐱ ᒪᒃ ᒥᓯᐛ ᑲ ᒋᔅᑕᑭᓄᐅᒡ ᐊᓐ ᓱᒥᓇᐳᔾ, ᒋᓴᔅ ᒋ ᐃᑎᑯᐤ ᐅᑲᐎᔭ, “ᓴᔅ ᓄᑕᐱᔪᒡ ᓱᒥᓇᐳᔪᐤ᙮”

⁴ ᒋᓴᔅ ᒪᒃ ᒋ ᐃᑕᐤ, “ᐃᔎᐤ, ᒐᒂᓐ ᐛᒋ ᐎᑎᒧᔨᓐ ᐊᓐ ? ᑕᐸ ᐊᔅᒄ ᐅᑎᒋᐱᔪᐤ ᐊᓐ ᓂᑎᐸᐃᑭᓐ ᐊᓐᑕ ᒐ ᒋᔅᒐᔨᒥᑯᐅᔭᓐ ᐊᐛᓐ ᐊ ᐊᐎᔭᓐ᙮”

⁵ ᐊᑯ ᒋᓴᔅ ᐅᑲᐎᔭ ᒂ ᐃᑕᑦ ᐊᓂᔭ ᐊᐱᒋᐊᑭᓇ, “ᒥᒄ ᑕᓐ ᒐ ᐃᑎᓱᒥᑕᒂ ᐊᐅᒄ ᐊᓂᔭ ᐃᑐᑎᒺᐧᒄ᙮”

⁶ ᒋ ᑎᑯᓇ ᒪᒃ ᐊᓐᑕ ᐊᓱᑕᒡ ᐊᓯᓂᔪᐤ ᐳᑎᔭ᙮ ᐸᐸᐃᒄ ᒪᒃ ᐅᔭ ᐳᑎᔭ ᓴᓯᑲᓐ ᓂᓱᔪᐤ ᑭᔭ ᒪᒃ ᓂᔅᑐᔪᐤ ᑕᑐᔭᓇᑭᓐ ᒐᒋ ᐃᔅᐱᓯᐸᔭᒡ ᓂᐱᔾ ᒋ ᐊᔭᔅᐱᓴᐛ᙮ ᒍᐤ ᐃᔪᒡ ᒪᒃ ᐊ ᒋᔅᑕᐸᐅᐛᒐᒡ ᐃᑕᐱᒋᑕᐅᒡ ᐅᔭ ᓂᐱᔪᐤ ᐊ ᐃᑐᑕᒡ ᑕᓐ ᐊ ᐃᑎᓱᒥᑯᒡ ᐅᑦ ᐊᔭᒥᐊᐅ ᐎᓱᐛᐅᓄᐛᐤ᙮

⁷ ᐊᑯ ᒋᓴᔅ ᒂ ᐃᑕᑦ ᐊᓂᔭ ᐊᐱᒋᐊᑭᓇ, “ᓴᑭᔅᒋᓇᐱᑕᒄ ᓂᐱᔾ ᐅᑕ ᐅᔭ ᐳᑎᔭ᙮” ᓇᔅᒡ ᒪᒃ ᒋ ᓴᑭᔅᒋᓇᐱᑕᔪᐛ᙮

⁸ ᐊᑯ ᒥᓐ ᒂ ᐃᑕᑦ, “ᒂᐸᐊᒥᒄ ᐊᐱᓯᔅ ᒐ ᐃᑐᑐᐛᒄ ᐊᓐ ᒥᑯᓴᐅᒋᒪᐤ᙮” ᐊᐅᑯᓐ ᑭᑈ ᑲ ᐃᑎᔨᒋ᙮

⁹ ᒋ ᑯᒋᔅᑎᒻ ᐊᓐ ᒥᑯᓴᐅᒋᒪᐤ ᐊᓂᔭ ᓂᐱᔪᐤ, ᓴᔅ ᒪᒃ ᓱᒥᓇᐳᒡ ᒋ ᐃᑕᑭᒥᔪᐤ᙮ ᓇᒪ ᐅᒋ ᒋᔅᒐᔨᑎᒻ ᑕᓐᑕ ᑲ ᐅᒋᐱᔨᒡ ᐊᓂᔭ ᓱᒥᓇᐳᔪᐤ᙮ ᐊᓐᒡ ᒪᒃ ᐎ ᐊᐱᒋᐊᑭᓐᒡ ᐊᓂᔭ ᓂᐱᔪᐤ ᑲ ᒂᐸᐊᒡ ᒋ ᒋᔅᒐᔨᑎᒧᒡ ᐎᔨᐛᐤ ᑕᓐᑕ ᑲ ᐅᒋᐱᔨᒡ ᐊᓂᔭ ᓱᒥᓇᐳᔪᐤ᙮ ᐊᑯ ᐊᓐ ᒥᑯᓴᐅᒋᒪᐤ ᒂ ᐎᓴᒪᑦ ᐊᓂᔭ ᐅᔅᒋᓂᐳᐛᓇ,

¹⁰ ᒂ ᐃᑕᑦ, “ᒥᓯᐛ ᐊᐛᓐ ᐊ ᒥᑯᓴᑦ, ᐊᓂᔭ ᒪᐅᒡ ᐊ ᒥᔽᔨᒡ ᓱᒥᓇᐳᔪᐤ ᓂᔅᑎᒻ ᐱᒥᐱᔨᑕᐤ, ᐊᑯ ᐃᔅᐱ ᐊ ᐊᑎ ᒥᔪᐧᑭᓱᔨᒋ ᐊᓂᔭ ᑲ ᐎᓴᒪᑦ, ᐊᑯ ᐊᓂᔭ ᐊᑲ ᐎᐧᑭᓂᔨᒡ ᓱᒥᓇᐳᔪᐤ ᐸᒥᐱᔨᑕᑦ᙮ ᒋᔾ ᒪᒃ ᒐᒂᓐ ᐛᒋ ᒪᔅᑕᔾ ᐱᒥᐱᔨᑕᔨᓐ ᐊᓐ ᑲ ᒥᔽᒡ ᓱᒥᓇᐳᔾ᙮”

¹¹ ᐊᑯᑕ ᒪᒃ ᐊᓐᑕ ᑲᐃᓇᒡ ᐊᓐᑕ ᑲᓕᓕ ᐊᔅᒋᒡ, ᓂᔅᑎᒻ ᑲ ᒪᒥᔅᑲᒡ ᐃᑎᑦ ᒋᓴᔅ, ᐊᑯᑕ ᑲ ᓄᑯᓂᔨᒡ ᐅᒋᔅᑕᔨᑕᑯᓱᐅᓐ᙮ ᐊᑯᑕ ᒪᒃ ᑲ ᐅᒋ ᑕᑈᔭᔨᒥᑯᑦ ᐅᒋᔅᒋᓄᐊᒧᐛᑭᓇ᙮

¹² ᐊᑯ ᒋᓴᔅ ᑭᔭ ᐅᑲᐎᔭ ᑭᔭ ᐎᐧᑲᓂᓴ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓇ ᒋ ᐃᑐᑕᐅᒡ ᐊᓐᑕ ᐅᑕᓇᔪᐤ ᑲᐳᕐᓇᐊᒻ ᑲ ᐃᓯᓂᐧᑲᑕᔨᒡ, ᐊᑯᑕ ᐊᓐᑕ ᑲ ᑕᒡ᙮ ᓇᒪ ᒥᒄ ᓇᔅᒡ ᒥᒐᑐᐤ ᒋᓯᑲᐛ ᐅᒋ ᑕᐅᒡ ᐊᓐᑕ᙮

ᒋᓴᐊᔭᒥᐊᐅᒋᐛᐱᒡ ᑲ ᐃᑐᑕᑦ ᒋᓴᔅ John 2.13-22 (Lent-3 Year B)

¹³ ᓴᔅ ᒪᒃ ᒋ ᐸᓱᓇᑯᓂᔪᐤ ᒍᐤ ᐃᔪᒡ ᑲᒋ ᒥᑯᓴᒡ, ᐎᒪᔅᑲᒐᐅ-ᒥᑯᓴᐅᓐ ᑲ ᐃᓯᓂᐧᑲᑕᔨᒡ, ᐊᑯ ᐊᓐᑕ ᒋᕈᓯᓕᒥᒡ ᒂ ᐃᑐᑕᑦ ᒋᓴᔅ᙮

¹⁴ ᐊᓐᑕ ᒪᒃ ᒋᓴᐊᔭᒥᐊᐅᒋᐛᐱᒡ ᒐ ᐊᑎ ᐱᒐᑦ, ᒋ ᐛᐱᒪᐤ ᓇᐸᐛ ᐊ ᐊᑕᐛᔨᒋ ᒥᔅᑐᓴ ᑭᔭ ᒪᔭᑕᓂᓴ ᑭᔭ ᐱᔭᓯᓴ, ᑭᔭ ᐊᓂᔭ ᑲ ᒥᔅᑯᑐᓇᔨᒋ ᓱᓇᔭᔪᐤ ᐊ ᐊᐱᔨᒋ ᐊᓐᑕ᙮

¹⁵ ᐊᑯ ᒂ ᐅᓯᑕᑦ ᐱᓯᔅᑕᐃᑭᓂᔪᐤ ᐊᐱᓯᔪᐤ ᐊ ᐊᐱᒋᑕᑦ, ᐊᑯ ᒂ ᐎᐎᑎᓴᐛᑦ ᐊᓂᔭᔪᐛ ᑲ ᐊᑕᐛᔨᒋ ᑭᔭ ᐊᓂᔭ ᐊᐛᓯᓴ ᐊᓐᑕ ᒋᓴᐊᔭᒥᐊᐅᒋᐛᐱᒡ, ᑕᐱᔅᑯᓐ ᐊᓂᔭ ᒪᔭᑕᓂᓴ ᑭᔭ ᐊᓂᔭ ᒥᔅᑐᓴ᙮ ᒋ ᒂᑎᐱᐛᐱᓂᒺᐤ ᑭᔭ ᐅᒥᒋᓱᐛᑭᓇᑎᑯᔪᐛ ᐊᓂᔭ ᑲ ᒥᔅᑯᑐᓂᒥᔨᒋ ᓱᓇᔭᔪᐤ, ᒂ ᐃᒐᐛᐱᓂᒺᑦ ᐊᓂᔭ ᐅᓱᓇᔭᓂᒥᔪᐤ᙮

¹⁶ ᒋ ᐃᑕᐤ ᒪᒃ ᐊᓂᔭ ᐱᔭᓯᓴ ᑲ ᐊᑕᐛᒐᔨᒋ, “ᒪᒋᒄ ᓇᑕ ᐎᐎᑕᐊᐧᑯᒡ ᐊᓐᒡ᙮ ᓄᑕᐎᔾ ᐅᔭ ᐎᒡ, ᓇᒪᔭᐤ ᐅ ᐊᑕᐛᐅᒋᐛᑉ᙮ ᐊᑯᓐ ᐊᑯ ᐃᔅᐱᔅ ᐊ ᑕᐛᒄ ᒐᒂᓐ ᐅᑕ᙮”

¹⁷ ᐅᒋᔅᒋᓄᐊᒧᐛᑭᓇ ᒪᒃ ᒋ ᐅᒋ ᒋᔅᒋᓯᔪᐛ ᐊᓐᑕ ᒥᓯᓇᐃᑭᓂᒡ ᑲ ᐃᑎᔅᑕᔨᒡ, ᓇᔅᒡ ᓂᑭ ᓴᐧᑯᒋᐃᑯᓐ ᓇᔅᒡ ᐊ ᓴᒋᑕᔭᓐ ᒋᒡ᙮

¹⁸ ᐊᑯ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ ᒂ ᐸᒋ ᓂᑐᐛᐱᒥᑯᑦ, ᒂ ᐃᑎᑯᑦ, “ᐊᐛᓐ ᑲ ᐃᑎᓱᒥᔅᒃ ᐊᓐ ᑲ ᐃᑐᑎᒥᓐ, ᒐᒄ ᒪᒥᔅᑲᒡ ᐃᑐᐅᓐ ᒐᒋ ᐛᐸᑎᔨᔭᒡ ᑕᑈ ᒋᓴᒪᓂᑐᐤ ᐊᒋ ᐃᑎᓱᒥᔅᒃ ᒐᒋ ᐃᑐᑎᒥᓐ ᐊᓐ ᑲ ᐃᑐᑎᒥᓐ ?”

¹⁹ ᐊᑯ ᒋᓴᔅ ᒂ ᐃᓯ ᐎᑎᒧᐛᑦ, “ᓂᓱᐅᓇᒋᑕᒄ ᐅ ᒋᓴᐊᔭᒥᐊᐅᒋᐛᑉ, ᓂᔅᑐ ᒋᓯᑲᐛ ᒪᒃ ᐃᔅᐱᔅ ᒥᓐ ᑯᑎᒡ ᓂᑭ ᐎᔨᑲᐳᐅᑕᓐ᙮”

²⁰ ᐊᑯ ᒂ ᐃᑕᒡ, “ᓂᔅᑐ ᒋᓯᑲᐛ ᐊ ᐃᔅᐱᔅ ᓴᔅ ᒥᓐ ᒋᑭ ᒋ ᐎᔨᑲᐳᐅᑕᓐ ? ᓇᐎᔪᐤ ᐊᓱ ᐊᓱᑕᒡ ᑕᑐᐤ ᐱᐳᓇ ᒋ ᑎᓯᐧᑲᑭᓄᐤ ᐅ ᒋᓴᐊᔭᒥᐊᐅᒋᐛᑉ ᑲ ᐎᔨᑲᐳᐅᑕᑭᓄᐅᒡ᙮”

²¹ ᐎᔪᐤ ᐊᓂᔭ ᑲ ᐊᔨᒧᑕᐧᒃ ᒋᓴᔅ ᐊᓂᔭ ᑲ ᐃᔅᒋᔄᑦ ᒐᒋ ᐎᔨᑲᐳᐅᑕᑦ ᐊᔭᒥᐊᐅᒋᐛᐱᔪᐤ ᓂᔅᑐ ᒋᓯᑲᐛ ᐃᔅᐱᔅ᙮

²² ᐃᔅᐱ ᒪᒃ ᑲ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒡ, ᐊᑯ ᒂ ᒋᔅᒋᓯᔨᒋ ᐊᓂᔭ ᐅᒋᔅᒋᓄᐊᒧᐛᑭᓇ ᐅᔭ ᑲ ᐃᔅᒋᔄᑦ᙮ ᒋ ᑕᑈᑎᒧᒡ ᒪᒃ ᑕᓐ ᐊ ᐃᑎᔅᑕᔨᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔨᒡ ᑭᔭ ᑕᓐ ᑲ ᐃᔅᒋᔄᔨᒋ ᒋᓴᓴ᙮

ᒋᓴᔅ ᓇᔅᒡ ᒋᔅᒐᔨᒪᐤ ᑕᓐ ᐊ ᐃᑕᔨᑕᑯᓯᔨᒋ ᐊᐛᔪᐛ

²³ ᒪᒂᒡ ᒪᒃ ᒋᓴᔅ ᑲ ᑕᑦ ᐊᓐᑕ ᒋᕈᓯᓕᒥᒡ ᐊᓂᔭ ᒪᒂᒡ ᑲ ᒥᑯᓴᓄᐎᒡ ᐎᒪᔅᑲᒐᐅ-ᒥᑯᓴᓂᔪᐤ, ᒥᒐᑦ ᐊᐛᔪᐛ ᒋ ᑕᑈᔭᔨᒥᑯᐤ ᐎᔾ ᑕᑈ ᐊ ᐊᐎᑦ ᙭ ᐃᔅᐱ ᑲ ᐛᐱᒥᑯᑦ ᐊ ᒪᒥᔅᑲᒡ ᐃᑎᑦ᙮

²⁴ ᒋᓴᔅ ᒪᒃ ᓇᒪ ᐅᒋ ᑕᑈᐅᒐᔨᒪᐤ ᐛᔅ ᒥᓯᐛ ᐊᐛᔪᐛ ᒋ ᒋᔅᒐᔨᒪᐤ ᑕᓐ ᐊᓐ ᐊ ᐃᑕᔨᑕᑯᓯᔨᒋ᙮

²⁵ ᓇᒪ ᑭᔭ ᐅᒋ ᓂᑐᐛᔨᑎᒻ ᒐᒋ ᐎᑎᒪᑯᑦ ᐊᐛᔪᐛ ᑕᓐ ᐊ ᐃᑕᔨᑕᑯᓯᔨᒋ ᐊᐛᔪᐛ ᐛᔅ ᒋ ᒋᔅᒐᔨᒪᐤ ᑕᓐ ᐊᓐ ᐊ ᐃᑕᔨᑕᑯᓯᔨᒋ᙮