ᒋᒥᔅ ᐅᒥᓯᓇᐊᒪᒐᐅᓐ 5 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᐛᔪᑎᓯᒡ ᑲ ᐃᔭᒂᒪᑭᓄᐎᒡ

¹ ᓂᑐᑐᐅᒄ ᒋᔨᐛᐤ ᑲ ᐛᔪᑎᓯᔭᒄ᙮ ᒐ ᒪᔭᒄ ᑭᔭ ᓂᓇᐧᑲᑕᐅᑎᒧᒄ ᐛᔅ ᒋᑭ ᑎᑯᓐ ᑕᓐ ᒐ ᐃᓯ ᒥᒋᐱᔭᒄ᙮

² ᐊᒂᑯᑎᓇ ᒋᐛᔪᑎᓯᐅᓄᐛᐛ, ᒥᓐᑐᓯᒡ ᒥᒍᐅᒡ ᒋᑦ ᐊᐱᒋᑕᐅᓄᐛᐛ᙮

³ ᒋᐎᔄᐅᓱᓇᔭᐱᔅᑯᒧᐛᐅᒡ ᑭᔭ ᒋᐛᐱᓱᓇᔭᐱᔅᑯᒧᐛᐅᒡ ᐊᒂᒂᐱᔅᒋᓱᐅᒡ᙮ ᐊᓂᔭ ᒪᒃ ᐊᒂᒂᐱᔅᒋᐱᔨᒡ ᐊᐅᑯᓐ ᐊᓐ ᒐ ᒪᒥᓯᒥᑯᔭᒄ ᐃᔅᐱᔅ ᑎᐸᔅᑯᓂᑯᐅᔭᒂ᙮ ᒋᑭ ᒧᐅᑯᓇᐛᐤ ᒋᔭᓱᐛᒡ ᒧᔭᒻ ᐃᔅᑯᑕᐤ ᐊ ᐃᓯ ᓂᓱᐅᓇᒋᐃᐛᒥᑲᒡ᙮ ᐛᔪᑎᓯᐅᓐ ᔅᒋ ᒪᐅᒋᑎᒪᓱᓇᐛᐤ ᐅᔭ ᒪᔅᑕᔾ ᐊ ᒋᓯᑲᒋ᙮

⁴ ᓇᒪ ᒋ ᐅᒋ ᒋᓯᐧᑯᐛᐛᐅᒡ ᐊᓐᒡ ᐊᐛᓐᒋ ᑲ ᐊᑐᔅᒐᒡ ᒋᓂᑕᐅᒋᑕᑭᓐ ᐊᔅᒋᐛᒡ᙮ ᓂᑐᑐᐛᐧᑯᒡ ᒪ ᐊ ᐎᑎᒪᑕᑯᒡ ᐊᑲ ᒥᔽᔨᑕᒡ᙮ ᐅᑎᐸᔨᒋᒐᐤ ᓇᔅᒡ ᑲ ᓱᐧᑲᑎᓯᑦ ᒋ ᐸᑐᐛᐤ ᑕᓐ ᐊ ᐃᓯ ᑕᑈᔨᒋ ᐅᔭ ᑲ ᒪᒧᓴᒋᓂᒥᔨᒋ ᒋᓂᑕᐅᒋᑕᑭᓄᐛᐛ᙮

⁵ ᒋᔨᐛᐤ ᑲ ᐛᔪᑎᓯᔭᒄ, ᒥᓯᐛ ᒐᒂᓐ ᒐᒋ ᐊᔭᔭᒄ ᐊᐅᑯᓐ ᐱᓯᒄ ᐊ ᐃᓯ ᐱᒪᑎᓯᔭᒄ ᐅᑕ ᐊᔅᒋᒡ ᑭᔭ ᒥᒄ ᒋᔨᐛᐤ ᒋ ᐎ ᓂᓇᐊᔨᑎᒥᐃᓱᓇᐛᐤ᙮ ᐊᑯ ᒪᒃ ᒧᔭᒻ ᐊᐛᓯᓯᒡ ᐊ ᑕᒋᐳᒡ ᓴᔅ ᐊ ᐃᓯᓇᑯᓯᒡ ᒐᒋ ᓂᐸᐊᑭᓄᐎᒡ, ᐊᐅᑯᓐ ᐊ ᐃᓯᓇᑯᓯᔭᒄ᙮

⁶ ᔅᒋ ᓂᓱᐅᓇᒋᒪᐛᐅᒡ ᑭᔭ ᔅᒋ ᓂᐸᐊᐛᐅᒡ ᑲ ᑯᐃᔅᑯᑕᑎᓯᒡ᙮ ᓇᒪ ᒪᒃ ᒋᓂᔅᑯᔅᑕᑯᐛᐅᒡ ᐊᓐᒡ ᐊᐛᓐᒋ ᐅᔭ ᑲ ᐃᑐᑐᐛᑯᒡ᙮

ᓯᐱᔨᐛᓯ ᐊ ᐊᓱᐛᐱᒥᑦ ᐅᑎᐸᔨᒋᒐᐤ ᒐ ᑎᑯᓯᐧᒃ James 5.7-10 (Advent-3 Year A)

⁷ ᓂᐧᑲᓂᓯᑐᒄ, ᓯᐱᔪᐛᓯᒄ ᒐ ᐃᔅᐱᔅ ᐊᑲ ᑎᑯᓯᐧᒃ ᐅᑎᐸᔨᒋᒐᐤ᙮ ᒋ ᒋᔅᒐᔨᒪᐤ ᑲ ᓂᑕᐅᒋᑕᑦ ᐊ ᐃᔅᐱᔅ ᓯᐱᔪᐛᓯᑦ ᐊ ᐊᓱᐛᐸᑕᐧᒃ ᒐᒋ ᒋ ᐃᓯ ᓂᑕᐅᒋᓂᔨᒋ ᐊ ᒥᔽᓯᔨᒋ ᓂᑕᐅᒋᑕᑭᓇ ᐊᓐᑕ ᑲ ᓂᑕᐅᒋᑕᑦ᙮ ᓯᐱᔪᐛᓱᐤ ᐊ ᐊᓱᐛᐸᑕᐧᒃ ᒐᒋ ᒋᒧᓂᔨᒡ ᐊ ᓯᑯᓂᔨᒡ ᑭᔭ ᐊ ᑎᒂᒋᓂᔨᒡ᙮

⁸ ᒋᔨᐛᐤ ᒪᒃ ᑭᔭ ᒋᐸ ᐎ ᓯᐱᔪᐛᓯᓇᐛᐤ᙮ ᐊᔨᒋᑲᐳᐅᒄ ᒋᑕᐃᐛᒡ ᐛᔅ ᓴᔅ ᐎᐱᒡ ᒋᑭ ᑎᑯᓯᓐ ᐅᑎᐸᔨᒋᒐᐤ᙮

⁹ ᐊᑲᐎᔾ ᒪᒪᒡ ᐃᑎᑐᒄ, ᓂᐧᑲᓂᓯᑐᒄ, ᑭᔭ ᓇᒪ ᒋᑭ ᐅᒋ ᑎᐸᔅᑯᓂᑯᓇᐛᐤ᙮ ᓴᔅ ᒥᒋᒪ ᐸᒋ ᑕᐤ ᑎᐸᔅᑯᓂᒐᓱᐤ, ᓴᔅ ᒐᑲᑦ ᓄᑯᓱᐤ᙮

¹⁰ ᓂᐧᑲᓂᓯᑐᒄ ᒪᒥᑐᓇᔨᒪᐧᑯᒡ ᒪ ᐅᒋᔅᒋᐛᐃᒐᓱᒡ ᐊᓐᒡ ᒋᓴᒪᓂᑐᐛ ᑲ ᐸᒋ ᐃᑎᓴᐅᑯᒡ ᒐᒋ ᐃᔨᒥᔅᑎᒧᐛᒡ᙮ ᓇᔅᒡ ᑕᑈ ᒋ ᓯᐱᔪᐛᓱᐅᒡ ᐊ ᓂᓇᐧᑲᒋᐊᑭᓄᐅᒡ᙮ ᐊᐅᑯᓐ ᒪᒃ ᒋᐸ ᐃᑎᓇᐛᐤ ᑭᔭ ᒋᔨᐛᐤ᙮

¹¹ ᐛᔅ ᑕᑈ ᓱᐛᔨᑕᑯᓱᐅᒡ ᒋᑦ ᐃᑕᔨᒪᓄᐅᒡ ᐊᓐᒡ ᐊᑲ ᐅᒋ ᐳᓂᒡ᙮ ᔅᒋ ᐸᑕᓇᐛᐤ ᑕᓐ ᑲ ᐃᔅᐱᔅ ᓯᐱᔪᐛᓯᑦ ᒠᑉ ᒪᒂᒡ ᑲ ᐊᔨᒥᐅᑦ᙮ ᒋ ᒋᔅᒐᔨᒪᓄᐤ ᒪᒃ ᑕᓐ ᑲ ᐃᓯ ᒥᔪᐱᔨᑎᒪᑯᑦ ᐅᑎᐸᔨᒋᒐᐛ ᐃᔅᐱ ᑲᒋ ᐃᓯ ᐊᔨᒥᐅᑦ᙮ ᓴᑭᔅᒋᓇᔅᑲᑯᐤ ᒋᓴᐛᑎᓯᐅᓂᔪᐤ ᐅᑎᐸᔨᒋᒐᐤ ᑭᔭ ᓴᑭᔅᒋᓇᔅᑲᑯᐤ ᐊ ᒋᔅᑎᒪᒐᔨᒪᑦ ᐊᐛᔪᐛ᙮

¹² ᓂᐧᑲᓂᓯᑐᒄ, ᐊ ᐃᑎᑦ ᐊᐛᓐ ᒐᔅᑎᓇᔅ ᒐ ᐃᑐᑎᒥᓐ ᒐᒂᓐ, ᐊᑲᐎᔾ ᐎ ᓇᔅᐱᒋᑕᑈ ᒋᓴᒪᓂᑐᐤ ᐅᑦ ᐃᓯᓂᐧᑲᓱᐅᓐ ᐊ ᐊᐱᒋᑕᐅᑦ᙮ ᐊᑲᐎᔾ ᐃᔅᒋᔄ, ᐃᔅᐱᒥᒡ ᐊ ᐃᓯ ᑕᑈᔨᓐ, ᒪᒃ ᑯᑎᒡ ᒐᒂᓐ ᒐᒋ ᐃᔅᒋᔄᔨᓐ ᒐᒋ ᒐᔅᑎᓇᔅᑕᑯᓯᔨᓐ ᑕᓐ ᐊ ᐃᔅᒋᔄᔨᓐ᙮ ᐊ ᐎ ᐃᔅᒋᔄᔨᓐ “ᓂᐦᐃ,” ᒥᒄ “ᓂᐦᐃ” ᒋᐸ ᐃᔅᒋᔄᓐ, ᒪᒃ “ᓇᒪ” ᐊ ᐎ ᐃᔅᒋᔄᔨᓐ, ᒥᒄ “ᓇᒪ” ᒋᐸ ᐃᔅᒋᔄᓐ, ᑭᔭ ᓇᒪ ᒋᑭ ᐅᒋ ᓂᓱᐅᓇᒋᒧᒄ ᒋᓴᒪᓂᑐᐤ᙮

ᑕᓐ ᒐ ᐃᓯ ᐊᔭᒥᐊᔅᑎᒧᐛᑯᒡ ᐊᓐᒡ ᑲ ᐊᐧᑯᓯᒡ James 5.13-20 (Proper-21 Year B)

¹³ ᐊ ᑕᒂ ᐊᐛᓐ ᐊᓐᑕ ᐊ ᑕᔭᒄ ᐊ ᐊᔨᒥᐅᑦ ᒋᐸ ᐊᔭᒥᐊᐤ᙮ ᐊ ᑕᒂ ᐊᐛᓐ ᐊ ᒥᔽᔨᑕᐧᒃ ᒋᐸ ᓂᑭᒧᐤ ᐊ ᒪᒥᒋᒪᑦ ᒋᓴᒪᓂᑐᐛ᙮

¹⁴ ᐊ ᑕᒂ ᐊᐛᓐ ᐊ ᐊᐧᑯᓯᑦ ᒋᐸ ᐎᓴᒪᐤ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐅᒪᒧᐊᔭᒥᐊᐛ ᒐᒋ ᐊᔭᒥᐊᔅᑎᒪᑯᑦ᙮ ᒋᐸ ᑐᒥᓂᑯᐤ ᐅᔭ ᐅᑎᐸᔨᒋᒐᐛ ᐅᑦ ᐃᓯᓂᐧᑲᓱᐅᓂᔪᐤ ᐊ ᐊᐱᒋᑕᔨᒋ᙮

¹⁵ ᐅᒡ ᒪᒃ ᑲ ᐊᔭᒥᐊᒡ ᐊᓂᔭ ᐊ ᑕᑈᔭᔨᒪᒡ ᒋᓴᒪᓂᑐᐛ, ᐊᑯᑕ ᒐ ᐅᒋ ᒥᓏᑎᓯᔨᒋ ᐊᓂᔭ ᑲ ᐊᐧᑯᓯᔨᒋ᙮ ᑎᐸᔨᒋᒐᓱᐛ ᒋᑭ ᐅᓂᔅᑲᓂᑯᐤ ᐊᓐ ᑲ ᐊᐧᑯᓯᑦ ᑭᔭ ᑲ ᒥᒋᑐᑎᒧᒂ ᒋᑭ ᐛᐸᔨᑎᒪᑯᐤ᙮

¹⁶ ᐛᐎᑎᒪᑐᒄ ᒪᒃ ᒋᒥᒋᑐᑎᒧᐅᓄᐛᐛ ᑭᔭ ᐊᔭᒥᐊᔅᑎᒪᑐᒄ ᒐᒋ ᐅᒋ ᒥᓏᑎᓯᔭᒄ᙮ ᐊᓂᔭ ᑕᓐ ᐊ ᐃᓯ ᐊᔭᒥᐊᑦ ᐊᐛᓐ ᐊ ᑯᐃᔅᑯᑕᑎᓯᑦ, ᓇᔅᒡ ᑕᑈ ᓱᒋᐱᔪᐤ ᑕᓐ ᐊ ᐃᓯ ᐃᑐᑕᒐᒥᑭᓂᔨᒡ᙮

¹⁷ ᐊᓂᔭᐧᑲ ᐃᓚᐃᒐ ᒧᔭᒻ ᒋᔭᓄᐤ ᐊ ᐃᑕᔨᑕᑯᓱᐛᐧᒄ ᒋ ᐃᑕᔨᑕᑯᓱᐤ᙮ ᐃᔅᐱ ᓱᐧᒃ ᑲ ᐊᔭᒥᐊᑦ ᒐ ᐊᑲ ᒋ ᒋᒧᓂᔨᒡ ᓇᒪ ᐅᒋ ᒋᒧᓂᔪᐤ ᓂᔅᑐ ᐱᐳᓇ ᒪᒃ ᐳᔅᒄ ᐃᔅᐱᔅ᙮

¹⁸ ᐃᔅᐱ ᒪᒃ ᑲ ᐊᔭᒥᐊᑦ ᒐᒋ ᒋᒧᓂᔨᒡ ᑕᑈ ᒋ ᒋᒧᓂᔪᐤ ᑭᔭ ᒥᓐ ᑲ ᓂᑕᐅᒋᒥᑭᓂᔨᒡ ᒥᓯᐛ ᒐᒂᔪᐤ᙮

ᓴᒋᐊᐧᑯᒡ ᐊᓐᒡ ᑲ ᒋᐛᑲᐳᐅᒡ

¹⁹ ᓂᐧᑲᓂᓯᑐᒄ, ᐸᐃᒄ ᐊᓐᑕ ᐊ ᑎᓯᔭᒄ ᒋᐛᑲᐳᔅᑕᒐ ᑕᑈᐅᓂᔪᐤ, ᐎᒋᐃᑯᒐ ᒪᒃ ᐊᐛᔪᐛ ᒥᓐ ᒐᒋ ᑕᑈᑕᐧᒃ,

²⁰ ᒐ ᐎ ᒋᔅᒋᓯᔭᒄ ᐅ᙮ ᐊᓐ ᐊᐛᓐ ᑲᐤ ᑲ ᐸᓱᐛᑦ ᐊᐛᔪᐛ ᑕᓐ ᐊ ᐃᓯ ᐅᓂᐱᔨᒋ ᐎᐧᑯᒋᐃᒪᐤ ᐅᑦ ᐊᒐᐧᑯᔪᐛ ᓂᐳᐅᓂᒡ ᐅᒋ, ᑭᔭ ᐃᑐᑐᐛᐤ ᒥᒐᑦ ᐅᒥᒋᑥᐅᓂᔪᐛ ᒐᒋ ᐛᐸᔨᑎᒧᐛᑭᓄᔨᒋ᙮