ᒋᒥᔅ ᐅᒥᓯᓇᐊᒪᒐᐅᓐ 3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒥᑐᓐ ᑕᓐ ᐊ ᐃᓯ ᐅᓂᑐᑕᒐᒥᑲᒡ James 3.1-12 (Proper-19 Year B) 1 ᓂᐧᑲᓂᓯᑐᒄ, ᐊᑲᐎᔾ ᒋᑭ ᐅᒋ ᒥᒐᑎᓇᐛᐤ ᐊ ᒋᔅᑯᑎᒪᒐᔭᒄ᙮ ᒋ ᒋᔅᒐᔨᑕᓇᐛᐤ ᒋᔭᓄᐤ ᑲ ᒋᔅᑯᑎᒪᒐᔭᐧᒄ ᐅᔅᑕ ᒐ ᐊᒂᑕᔨᑕᒂᒡ ᑕᓐ ᒐ ᐃᓯ ᑎᐸᔅᑯᓂᑯᐅᔭᐧᒄ᙮ 2 ᒥᓯᐛ ᐊᐛᓐ ᒥᒐᑥᐤ ᐅᓂᐱᔪᐤ᙮ ᐊᓐ ᐊᐛᓐ ᐊᑲ ᓂᑕ ᐅᓂᐱᔨᑦ ᑕᓐ ᐊ ᐃᔅᒋᔄᑦ ᓇᒪ ᑎᑯᓂᔪᐤ ᒥᒐᑎᓯᐅᓂᔪᐤ ᒐᒋ ᐃᓯ ᐊᑕᒪᔨᑕᑯᓯᑦ, ᑭᔭ ᒋ ᐃᑐᐤ ᒐᒋ ᓂᓇᑭᑐᐛᔨᑕᐧᒃ ᒥᓯᐛ ᑕᓐ ᐊ ᐃᑎᑦ᙮ 3 ᒪᒥᑐᓇᔨᒻ ᒪ ᑲᐸᐃᑭᔎᐤ, ᐃᓴᑯᔪᐤ ᑕᐧᑯᑕᑎᒧᑎᔭᑭᓄᐤ ᒐᒋ ᓂᓇᐃᑕᐧᒃ, ᐃᑐᑕᐤ ᒥᒄ ᑕᓐᑕ ᓇᑐᐛᔨᒪᑭᓄᐅᑦ ᒐ ᐃᑐᑕᑦ᙮ 4 ᒪᒥᑐᓇᔨᑕ ᒪ ᑭᔭ ᐊ ᒥᓴᔨᒋ ᐅᐤᑕ, ᐊᑎ ᐊᓂᔭ ᐊ ᐊᔭᔅᐱᓴᒋ ᑭᔭ ᐊ ᓱᒋᔪᑎᒡ ᐊ ᐅᒋ ᐱᒪᔅᑎᒋ, ᓇᔅᒡ ᐊᐱᓯᓱᐤ ᐊᓐ ᑕᐧᑲᐃᑭᓐ ᐃᔭᐱᒡ ᒪᒃ ᒋ ᒪᒥᓄᐊᔨᑭᓄᐤ᙮ ᒋ ᐃᑐᑎᒻ ᐊᓐ ᑲ ᐱᒥᐱᔨᑕᑦ ᐊᓂᔭ ᐅᐤᑎᔪᐤ ᒐᒋ ᒂᔅᒋᑯᑕᑦ ᐊᓂᔭ ᐅᐤᑎᔪᐤ, ᑕᓐᑕ ᐛ ᐃᑎᑯᑕᑦ ᒐᒋ ᐃᑎᑯᑎᓂᔨᒡ᙮ 5 ᐊᐅᑯᓐ ᒪᒃ ᒧᔭᒻ ᐊ ᐃᑕᔨᑕᒂᒡ ᒥᑕᔨᔾ᙮ ᓇᔅᒡ ᐊᐱᓯᓱᐤ, ᐃᔭᐱᒡ ᒪᒃ ᒥᔅᑎ ᒋᑭ ᒋ ᐅᓂᑐᑕᒐᒥᑭᓐ᙮ ᒪᒥᑐᓇᔨᑕ ᒪᒃ ᑭᔭ ᐃᔅᑯᑕᐤ᙮ ᒥᔅᑎ ᓂᓱᐅᓇᑎᓐ ᒐᒂᓐ ᓄᒋᒥᒡ ᐊ ᐎᐃᑕᒡ, ᒋ ᐊᐱᓯᓱᐤ ᒪᒃ ᓂᔅᑎᒻ ᐊᓐ ᐃᔅᑯᑕᐤ᙮ 6 ᒧᔭᒻ ᐃᔅᑯᑕᐤ ᑲ ᐃᑕᔨᑕᒂᒡ ᐊᐅᑯᓐ ᐊ ᐃᑕᔨᑕᒂᒡ ᒥᑕᔨᔾ᙮ ᒥᓯᐛ ᑕᓐ ᐊ ᐃᓯ ᑎᒂᒡ ᒥᒐᑎᓯᐅᓐ ᐅᑕ ᐊᔅᒋᒡ ᐊᑯᑕ ᒥᑕᔨᔨᒡ ᐊ ᑎᒂᒡ, ᒋᔪᓇᒡ ᒪᒃ ᐊᑯᑕ ᐊ ᑎᒂᒡ᙮ ᓇᔅᒡ ᐎᓂᐃᐛᒥᑭᓐ ᑕᓐ ᐊ ᐃᔅᐱᓴᒡ ᒥᔪᐤ᙮ ᐅᔅᑭᒡ ᐸᒪᑎᓯᑦ ᐊᐛᓐ ᒧᓯᓇᐤ ᐃᔅᑯᑕᐤ ᐃᓯᓇᑯᓂᔪᐤ ᐅᑕᔨᔾ ᐱᐃᒻ ᓇᐱᑦ, ᒥᒋ ᐃᔅᑯᑕᒡ ᒪᒃ ᐊᑯᑕ ᐛᒋ ᓯᔅᑲᐃᑭᓄᐎᒡ᙮ 7 ᑭᔅᒋᐅᐤ ᓇᐸᐤ ᒥᓯᐛ ᐊ ᐃᑕᔨᑕᑯᓯᔨᒋ ᐊᐛᓯᓴ ᒐᒋ ᔪᔅᐸᓴᐊᑦ᙮ ᑯᑎᑲ ᓴᔅ ᒋ ᔪᔅᐸᓴᐊᐤ, ᒧᔭᒻ ᐱᔭᓯᓴ, ᓂᓇᐧᑯᐤ ᒥᓐᑐᓴ, ᑭᔭ ᓂᒪᓴ᙮ 8 ᒥᒄ ᒪᒃ ᓇᒪ ᐊᔅᒄ ᑕᐤ ᐊᐛᓐ ᒐᒋ ᓂᓇᑭᑐᐛᔨᑕᐧᒃ ᑕᓐ ᐊ ᐃᓯ ᐃᔨᒥᑦ᙮ ᓇᒪ ᒋ ᔪᔅᐱᓯᑕᑭᓄᐤ ᐊ ᐃᔅᐱᔅ ᒪᔭᑎᒡ ᒥᑕᔨᔾ᙮ ᓇᔅᒡ ᓴᑭᔅᒋᓇᐤ ᐊᓐᑕ ᐱᒋᐳᔪᐅᓐ ᑲ ᓂᐸᐃᐛᒡ᙮ 9 ᒋᑐᓄᐤ ᒋᑦ ᐊᐱᒋᑕᓇᓄᐤ ᐊ ᒪᒥᒋᒪᐧᒄ ᒋᑎᐸᔨᒋᒐᓯᒥᓄᐤ ᑭᔭ ᒍᑕᐎᓄᐤ, ᐊᐅᑯᓐ ᑭᔭ ᐃᔭᐱᒋᑕᔭᐧᒄ ᐊ ᒥᒋ ᐊᔨᒧᒪᐧᑯᒡ ᐊᐛᓐᒋ, ᐊᓂᔭᔪᐛ ᒋᓴᒪᓂᑐᐤ ᑲ ᐅᓯᐊᑦ ᒧᔭᒻ ᐎᔾ ᐊ ᐃᓯᓇᑯᓯᑦ ᒐᒋ ᐃᓯᓇᑯᓯᔨᒋ᙮ 10 ᐸᐃᑯᓐ ᐊᓐ ᒥᑐᓐ ᐊᓐᑕ ᐛᒋ ᒪᒥᒋᒪᑭᓄᐅᑦ ᒋᓴᒪᓂᑐᐤ ᑭᔭ ᐊ ᐅᒋ ᒥᒋ ᐊᔨᒧᒪᑭᓄᐎᒡ ᐊᐛᓐᒋ᙮ ᓂᐧᑲᓂᓯᑐᒄ, ᓇᒪ ᒋᐸ ᐅᒋ ᐃᓯᓇᑯᓐ ᐅ᙮ 11 ᐊ ᒧᔅᒋᒍᐅᒡ ᓂᐱᔾ ᓇᒪ ᑕᐱᔅᑯᓐ ᐊ ᒥᔽᑭᒥᒡ ᑭᔭ ᐊ ᒥᒐᑭᒥᒡ ᒋᑭ ᒋ ᐅᒋᒍᐅᓐ ᐊᓐᑕ᙮ 12 ᓂᐧᑲᓂᓯᑐᒄ, ᓇᒪ ᐎᓯᒋᒥᓇ ᓂᑕᐅᒋᑕᐤ ᐛᐱᒥᓇᑎᒄ ᑭᔭ ᒪᒃ ᐊᓐᑕ ᒥᓂᓴᑎᑯᒡ ᓇᒪ ᐛᐱᒥᓂᒡ ᒋᑭ ᐅᒋ ᓂᑕᐅᒍᐅᒡ᙮ ᑭᔭ ᐊᓐᑕ ᐊ ᒧᔅᒋᒍᐅᒡ ᓇᒪ ᒋᑭ ᒋ ᐅᒋᐱᔪᐤ ᐊ ᒥᔽᑭᒥᒡ ᓂᐱᔾ ᑭᔭ ᓯᐅᑕᑭᓇᐳᔾ᙮ ᑭᒐᑕᐛᔨᑎᒧᐅᓐ ᒋᓴᒪᓂᑐᐤ ᐊ ᑕᑦ ᐊ ᐅᒋᐱᔨᒡ James 3.13-4.3,7-8a (Proper-20 Year B) 13 ᑕᐤ ᐊ ᐊᐛᓐ ᐊᓐᑕ ᐊ ᑎᓯᔭᒄ ᐊ ᑭᒐᑕᐛᔨᑕᐧᒃ ᑭᔭ ᐊ ᐊᔭᑦ ᓂᔅᑐᑎᒧᐅᓂᔪᐤ ? ᐊᑯᔅ ᒋᑭ ᐛᐸᑎᔨᐛᐤ ᐅᔭ ᑯᐃᔅᒄ ᐊ ᐃᓯ ᐱᒪᑎᓯᑦ ᑭᔭ ᐊ ᐊᑐᔅᒐᑦ ᒋᐸ ᓄᑯᓂᔪᐤ ᐊ ᑭᒐᑕᐛᔨᑕᐧᒃ ᐊᓂᔭ ᐅᒋ ᐊ ᑎᐱᑕᔨᒥᓱᑦ᙮ 14 ᒥᒋ ᐅᑕᔨᑎᒧᐅᓐ ᒪᒃ ᐊ ᐊᔭᐛᒂ ᒋᑕᐃᐛᒡ, ᒪᒃ ᒥᒄ ᒧᔅ ᒋᔨᐛᐤ ᓂᑲᓐ ᐎ ᐃᓯ ᐱᔅᑎᓂᓱᔭᒂ, ᐊᑲᐎᔾ ᒪᒥᒋᒧᒄ ᑭᔭ ᐊᑲᐎᔾ ᒋᑭ ᐅᒋ ᑭᑭᒋᔭᓇᐛᐤ ᐊ ᐎ ᑲᑕᔭᒄ ᑕᑈᐅᓐ᙮ 15 ᓇᒪ ᒋᓴᒪᓂᑐᐤ ᐊ ᑕᑦ ᐅᒋᐱᔪᐤ ᐅ ᑲ ᐃᑕᔨᑕᒂᒡ ᑭᒐᑕᐛᔨᑎᒧᐅᓐ, ᐅᑕ ᐊᔅᒋᒡ ᐅᒋᒥᑭᓐ, ᓇᐸᐤ ᐅᔭ ᐅᑭᒐᑕᐛᔨᑎᒧᐅᓐ, ᒥᒋᒥᓂᑐᐤ ᐊ ᑕᑦ ᐅᒋᐱᔪᐤ᙮ 16 ᐛᔅ ᐊᓐᑕ ᐊ ᑎᒂᒡ ᐅᑕᔨᑎᒧᐅᓐ ᑭᔭ ᒧᔅ ᓂᑲᓐ ᐊ ᐎ ᐃᓯ ᐱᔅᑎᓂᓱᓇᓄᐅᒡ ᐊᑯᑕ ᐊ ᑎᒂᒡ ᐛᐛᓇᔨᑎᒧᐅᓐ ᑭᔭ ᓂᓇᐧᑯᐤ ᒥᒋᐃᑐᐅᓐ᙮ 17 ᐊᓐ ᒪᒃ ᑭᒐᑕᐛᔨᑎᒧᐅᓐ ᐃᔅᐱᒥᒡ ᑲ ᐅᒋᐱᔨᒡ ᓂᔅᑎᒻ ᓇᔅᒡ ᐸᔭᐧᑭᓐ, ᐊᑯ ᒥᓐ ᐊ ᒋᔭᒪᔨᑕᑯᐃᐛᒥᑲᒡ, ᔪᔅᐸᔨᑕᑯᐃᐛᒥᑲᒡ, ᑭᔭ ᐃᑐᑕᑯᐤ ᐊᐛᓐ ᐃᔭᒂ ᒐᒋ ᓂᑐᑐᐛᑦ ᐊᐛᔪᐛ᙮ ᐊᐛᓐ ᐊ ᐊᔭᑦ ᐅᔭ ᑭᒐᑕᐛᔨᑎᒧᐅᓂᔪᐤ ᓇᔅᒡ ᒋᑭ ᐛᔪᒡ ᒋᓴᐛᑐᑐᐛᐤ ᐊᐛᔪᐛ ᑭᔭ ᒥᔅᑎ ᒋᑭ ᒥᔪᑐᑎᒪᒐᐤ, ᐸᐃᑯᓄᒡ ᒋᑭ ᐃᓯ ᑭᓄᐛᐱᒪᐤ ᒥᓯᐛ ᐊᐛᔪᐛ ᑭᔭ ᓇᒪ ᓇᔅᒡ ᒋᑭ ᐅᒋ ᐎ ᑭᑲᑕᐤ ᑕᓐ ᐊᓐ ᐊ ᐃᑕᔨᑕᑯᓯᑦ᙮ 18 ᐅᔭ ᐊ ᐃᓯ ᐱᒪᑎᓯᑦ ᐊᐛᓐ ᐊᔭᐛᐤ ᒋᓴᒪᓂᑐᐛ ᐅᒋᔭᒪᔨᑎᒧᐅᓂᔪᐤ᙮ ᐎᒋᐊᐤ ᑭᔭ ᑯᑎᑲ ᐊᐛᔪᐛ ᒐᒋ ᑯᐃᔅᑯᑕᑎᓯᔨᒋ ᒐᒋ ᐊᔭᔨᒋ ᒋᓴᒪᓂᑐᐛ ᐅᒋᔭᒪᔨᑎᒧᐅᓂᔪᐤ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.