ᒋᒥᔅ ᐅᒥᓯᓇᐊᒪᒐᐅᓐ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒥᓯᐛ ᐊᐛᓐ ᐸᐃᑯᓄᒡ ᒐᒋ ᐃᓯ ᑭᓄᐛᐱᒪᑭᓄᐅᑦ James 2.1-10,14-17 (Proper-18 Year B)

¹ ᓂᐧᑲᓂᓯᑐᒄ, ᐊ ᑕᑈᔭᔨᒪᒄ ᐅᑎᐸᔨᒋᒐᐤ ᒋᓴᔅ ᙭ ᐊᓐ ᒪᐅᒡ ᒐᔅᑕᔨᑕᑯᓯᑦ, ᐊᑲᐎᔾ ᐊᑐᐛᔨᒪᐧᒄ ᐊᐛᓐ, ᒥᓯᐛ ᐊᐛᓐ ᐸᐃᑯᓄᒡ ᒋᐸ ᐃᑕᔨᒪᐛᐤ᙮

² ᐅᑎᑎᑕᒄ ᐊᓐ ᐊ ᐛᔪᑎᓯᑦ ᓇᐸᐤ ᒪᒂᒡ ᐊ ᒪᒧᐎᔭᒄ ᐊ ᐊᔭᒥᐊᔭᒄ, ᐊ ᐎᔄᐅᓱᓇᔭᐱᔅᑯᔨᒋ ᒪᒃ ᑕᐱᒋᒐᐱᓱᓇ ᐊ ᒋᔅᑯᐛᑦ, ᑭᔭ ᓇᔅᒡ ᒥᔽᓯᔨᒋ ᐅᑦ ᐊᐱᒋᑕᐅᓇ, ᒐᒃ ᒪᒃ ᒥᓐ ᑯᑎᒃ ᓇᐸᐤ ᐅᒋ ᐱᒐᑦ, ᓇᔅᒡ ᐊ ᒋᔅᑎᒪᑎᓯᑦ ᑭᔭ ᓇᔅᒡ ᐊ ᒋᔅᑎᒪᓯᓇᑯᓂᔨᒋ ᐅᑦ ᐊᐱᒋᑕᐅᓇ,

³ ᒋᔅᑕᔨᒥᑦ ᒪᒃ ᐊᓐ ᑲ ᐛᔪᑎᓯᑦ ᓇᐸᐤ ᐊ ᐃᑎᑦ, “ᐊᔅᑎᒻ ᒪ, ᐅᑕ ᐊ ᒥᔽᒡ ᐸᒋ ᐊᐱᔾ᙮” ᑭᔭ ᐃᑎᑦ ᐊᓐ ᑲ ᒋᔅᑎᒪᑎᓯᑦ ᓇᐸᐤ, “ᓇᑕ ᓂᐳᐎ,” ᒪᒃ ᐃᑎᑦ, “ᐅᑕ ᓂᓯᑎᒡ ᐸᒋ ᐊᐱᔾ,”

⁴ ᑯᐃᔅᒄ ᐊ ᒋᑦ ᐃᑎᓇᐛᐛᐤ ᐅ ᐊ ᐃᑎᔭᒄ ? ᒋ ᒥᔪ ᐃᑐᑐᐛᐛᐤ ᐸᐃᒄ ᐊᑯ ᐊᓐ ᑯᑎᒃ ᓇᒪ ᒧᔭᒻ ᒋ ᐃᑐᑐᐛᐤ ᒥᒄ ᐊᓂᔭ ᐊ ᐃᓯᓇᑯᓯᑦ ᐅᔅᒡ᙮ ᒋ ᐅᓂᐱᔨᓇᐛᐤ ᐊᓂᔭ ᐊ ᐃᓯ ᑭᓄᐛᐱᒪᑯᒡ᙮

⁵ ᐃᔭᒂ ᓂᑐᑎᒧᒄ ᓂᐧᑲᓂᓯᑐᒄ᙮ ᓇᒪᔭᐤ ᐊ ᐊᓂᔭ ᑲ ᒋᔅᑎᒪᑎᓯᔨᒋ ᐅᑕ ᐊᔅᒋᒡ ᐊ ᑕᔨᒋ ᐅᒋ ᐃᑕᔨᒪᐤ ᒋᓴᒪᓂᑐᐤ ᒥᔅᑎ ᒐᒋ ᐊᔭᔨᒋ ᑕᑈᑎᒧᐅᓂᔪᐤ ᑭᔭ ᒐᒋ ᐊᔭᔨᒋ ᒋᓴᐅᒋᒪᐅᓂᔪᐤ ᐊᓂᔭ ᑲ ᐃᔅᒋᔄᑦ ᒐᔅᑎᓇᔅ ᒐ ᒥᔭᑦ ᐊᓂᔭ ᑲ ᓴᒋᐃᑯᑦ ?

⁶ ᐊᑯ ᒪᒃ ᒋᔨᐛᐤ ᓇᒪ ᒋ ᒋᔅᑕᔨᒪᐛᐅᒡ ᐊᓐᒡ ᑲ ᒋᔅᑎᒪᑎᓯᒡ᙮ ᒥᒄ ᒪᒃ ᓇᒪᔭᐅᒡ ᐊ ᐊᓐᒡ ᑲ ᐛᔪᑎᓯᒡ ᓇᔅᒡ ᑲ ᐎ ᐃᑐᑕᑕᑯᒡ, ᒪᒃ ᑎᐸᔅᑯᓂᒐᐅᒋᐛᐱᒡ ᐊ ᐃᑐᑕᐃᑕᑯᒡ ?

⁷ ᐊᐅᑯᓐᒡ ᐅᒡ ᑲ ᐛᔪᑎᓯᒡ ᓇᔅᒡ ᒥᔭᔭᔨᑕᒡ ᐊᓂᔭ ᐃᓯᓂᐧᑲᓱᐅᓂᔪᐤ ᑲ ᒋᔅᑕᔨᑕᑯᓂᔨᒡ᙮ ᐊᔪᐅᒄ ᐅᔭ ᐃᓯᓂᐧᑲᓱᐅᓂᔪᐤ ᑲ ᐅᒋ ᐃᑕᔨᒥᑕᒄ ᒋᓴᒪᓂᑐᐤ ᒐᒋ ᑎᐱᔨᐛᐅᓯᑐᑕᑯᐛᒄ᙮

⁸ ᑕᑈ ᒪᒃ ᒋᑭ ᒥᔪᑐᑕᓇᐛᐤ ᓂᓇᐃᑎᒪᒂ ᐊᓐ ᒪᐅᒡ ᑲ ᒋᔅᑕᔨᑕᒂᒡ ᐎᓱᐛᐅᓐ, ᐊᓐ ᑲ ᐃᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᓴᒋᐃ ᒋᒡ ᐃᔪᐤ ᒧᔭᒻ ᒋᔾ ᐊ ᐃᔅᐱᔅ ᓴᒋᐃᓱᔨᓐ᙮”

⁹ ᒧᔭᒻ ᒪᒃ ᐃᔭᒡ ᐃᑕᔨᒪᒂ ᐸᐃᒄ ᐊᐛᓐ ᑕᓐ ᐊ ᐃᑕᔨᒪᒄ ᑯᑎᒃ ᒋ ᒥᒋᑐᑕᓇᐛᐤ᙮ ᒋ ᑕᑈᒥᑯᐅᓇᐛᐤ ᐊ ᒥᒋᑐᑎᒪᒄ ᐎᓱᐛᐅᓐ ᐅᒡ᙮

¹⁰ ᐛᔅ ᐊᓐ ᐊᐛᓐ ᒥᓯᐛ ᐊᓂᔭ ᐎᓱᐛᐅᓂᔪᐤ ᑲ ᓂᓇᐃᑕᐧᒃ ᒥᒄ ᒪᒃ ᐸᐃᒄ ᒐᒂᔪᐤ ᐊᓐᑕ ᑕᓐ ᐊ ᐃᑎᔅᑕᔨᒡ ᐱᑯᓇᒐ ᒥᓯᐛ ᐊᓂᔭ ᐎᓱᐛᐅᓂᔪᐤ ᐊ ᐱᑯᓇᐧᒃ ᐃᓯᓇᑯᓱᐤ᙮

¹¹ ᐊᓐ ᐊᐛᓐ ᑲ ᐃᔅᒋᔄᑦ, “ᐊᑲᐎᔾ ᐱᓯᒂᑎᓯ,” ᒋ ᐃᔅᒋᔄᐤ ᑭᔭ, “ᐊᑲᐎᔾ ᓂᐸᐃ ᐊᐛᓐ᙮” ᐊᑎ ᒪᒃ ᐊᑲ ᐸᓯᒂᑎᓯᐎᓇ ᑲ ᓂᐸᐊᐅᑕ ᒪᒃ ᐊᐛᓐ ᒋ ᐱᑯᓇᓐ ᒥᓯᐛ ᐎᓱᐛᐅᓐ᙮

¹² ᒋᐸ ᐃᓯ ᐃᔨᒥᓇᐛᐤ ᒪᒃ ᑭᔭ ᒋᐸ ᐃᑎᓇᐛᐤ ᒧᔭᒻ ᐊᐛᓐᒋ ᐊᔅᒄ ᒐ ᑎᐸᔅᑯᓇᑭᓄᐎᒡ ᐊᓂᔭ ᐎᓱᐛᐅᓂᔪᐤ ᑲ ᐊᐱᐧᑯᓂᐛᒥᑭᓂᔨᒡ ᐅᒡ᙮

¹³ ᐊᐛᓐ ᐊᑲ ᒋᔅᑎᒪᒐᔨᒪᑦ ᑯᑎᑲ ᐊᐛᔪᐛ ᓇᒪ ᑭᔭ ᐎᔾ ᒋᑭ ᐅᒋ ᒋᔅᑎᒪᒐᔨᒪᑭᓄᐤ ᐃᔅᐱ ᑎᐸᔅᑯᓇᑭᓄᒐ᙮ ᒥᒄ ᒪᒃ ᐊᓐ ᐊᐛᓐ ᑲ ᒋᔅᑎᒪᒐᔨᒪᑦ ᑯᑎᑲ ᐊᐛᔪᐛ ᓇᒪ ᒋᑭ ᐅᒋ ᑯᔅᑕᒍᐤ ᒐᒋ ᑎᐸᔅᑯᓇᑭᓄᐅᑦ᙮

ᑕᑈᑎᒧᐅᓐ ᑭᔭ ᓴᒋᐃᐛᐅᓐ James 2.1-10,14-17 (Proper-18 Year B)

¹⁴ ᓂᐧᑲᓂᓯᑐᒄ, ᑕᓐ ᐃᓯ ᐎᔭᐱᒡ ᐊᐛᓐ ᐊ ᐃᔅᒋᔄᑦ, ᓂ ᑕᑈᔭᔨᒪᐤ ᒋᓴᒪᓂᑐᐤ, ᐊᑲ ᒪᒃ ᒥᔪᑐᑎᒧᐛᑦ ᐊᐛᔪᐛ᙮ ᒋᑭ ᒋ ᐱᒪᒋᐃᑯᐤ ᐊ ᒥᒄ ᐊ ᐃᔅᒋᔄᑦ, ᓂ ᑕᑈᑕᓐ ?

¹⁵ ᑕᑦ ᐊᓐ ᒋᐧᑲᓂᓯᓄᐤ ᐊ ᓂᑐᐛᔨᑕᐧᒃ ᒐᒂᔪᐤ ᒐ ᒋᔅᑲᐧᒃ, ᒪᒃ ᒥᒋᒥᔪᐤ ᐊ ᓄᑕᐱᔨᑦ,

¹⁶ ᑕᓐ ᐃᓯ ᐎᔭᐱᒡ ᒥᒄ ᐊ ᐃᑎᑦ, “ᒋᓴᒪᓂᑐᐤ ᒋᑭ ᓱᐛᔨᒧᒄ᙮ ᒋᓱᐛᔅᐱᓱᐤ ᑭᔭ ᒋᔅᐳᐃᓱᐤ,” ᐊᑲ ᒪᒃ ᒥᔨᑕ ᐊᓂᔭᔪᐛ ᒐᒂᔪᐛ ᑕᓐ ᐊ ᐃᓯ ᓂᑐᐛᔨᑕᐧᒃ᙮

¹⁷ ᐊᐅᑯᓐ ᒪᒃ ᒧᔭᒻ ᐊ ᐃᓯᓇᒂᒡ ᐊᐛᓐ ᐊ ᐃᔅᒋᔄᑦ, “ᓂ ᑕᑈᔭᔨᒪᐤ ᒋᓴᒪᓂᑐᐤ,” ᐊᑲ ᒪᒃ ᓄᑯᓂᔨᒡ ᑕᓐ ᐊ ᐃᓯ ᒥᔪᑐᑕᐧᒃ, ᓇᒪ ᐊᐱᑎᓂᔪᐤ ᐅᑕᑈᑎᒧᐅᓐ᙮

¹⁸ ᒋᑭ ᒋ ᐃᓯᓇᑯᓐ ᐱᔅᒐ ᐊᐛᓐᒋ ᒐᒋ ᐃᔅᒋᔄᒡ, “ᒋ ᑭᓄᐛᔨᑕᓐ ᒋᔾ ᑕᑈᑎᒧᐅᓐ, ᐊᑯ ᓂᔾ ᓂ ᒥᔪ ᐊᑐᔅᒐᓐ᙮” ᓂᐸ ᐃᑕᐤ ᐅ ᐊᐛᓐ, “ᐸᒋ ᐛᐸᑎᔨ ᐊᓐ ᒋᑕᑈᑎᒧᐅᓐ ᐊᑲ ᐊᔅᑎᓂᒥᓐ ᒋ ᒥᔪ ᐊᑐᔅᒐᐅᓐ ᑭᔭ ᒐ ᐛᐸᑎᔨᑕᓐ ᓂᔾ ᓂ ᒥᔪ ᐊᑐᔅᒐᐅᓐ ᐊ ᐊᔅᑎᓂᒪᓐ ᐊᓐᑕ ᓂᑕᑈᑎᒧᐅᓐ᙮”

¹⁹ ᒋ ᑕᑈᑕᓐ ᐊ ᒥᒄ ᐊ ᐸᐃᑯᓯᑦ ᒋᓴᒪᓂᑐᐤ ? ᒥᔽᓱᐤ ᐅ ᐊ ᑕᑈᑎᒥᓐ᙮ ᑭᔭ ᐎᔨᐛᐤ ᒥᒋ ᐊᒐᐧᑯᒡ ᑕᑈᑎᒧᒡ ᐅᔭ, ᓂᓇᒥᐱᔪᐅᒡ ᒪᒃ ᐊ ᐃᔅᐱᔅ ᓴᒋᓯᒡ᙮

²⁰ ᒋ ᓂᑐᐛᔨᑕᓐ ᐊ ᒐᒋ ᐛᐸᑎᔨᑯᔨᓐ, ᒋᔾ ᒋᔎᐧᑲᓐ, ᐊᑲ ᒐᒂᓐ ᐃᓯᓇᑯᓂᔨᒡ ᐊᐛᓐ ᐅᑕᑈᑎᒧᐅᓐ ᐊᑲ ᓄᑯᓂᔨᒐ ᐅᑦ ᐊᑐᔅᒐᐅᓐ ?

²¹ ᑕᓐᑕ ᑲ ᐅᒋ ᑯᐃᔅᑯᓇᑯᐊᑭᓄᐅᑦ ᐎᔾ ᐊᓂᔭᐧᑲ ᒍᑕᐎᓄᐤ ᐊᑉᕋᐊᒻ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᓇᒪᔭᐤ ᐊ ᐊᓂᔭ ᐊᒋ ᐱᔅᑕᔨᒪᑦ ᐅᑯᓴ ᐊᐃᓯᑲ ᒋᓴᒪᓂᑐᐛ ᐃᔅ ᐊ ᑕᔨᒋ ᐛᒋ ᑯᐃᔅᑯᓇᑯᐊᑭᓄᐅᑦ, ᐱᔅᑎᓂᒐᐅᓇᐱᔅᑯᒡ ᑲ ᐱᔅᑎᓇᑦ᙮

²² ᒋ ᐛᐸᑎᒺᓐ ᐊ ᑕᓐ ᑲ ᐃᓯ ᒪᒧᐤ ᐊᑐᔅᒐᒥᑭᓂᔨᒡ ᐅᑕᑈᑎᒧᐅᓐ ᑭᔭ ᐅᑦ ᐊᑐᔅᒐᐅᓐ᙮ ᐊᓂᔭ ᐅᑕᑈᑎᒧᐅᓐ ᒋ ᒥᑐᓇᑯᓂᔪᐤ ᐅᑦ ᐊᑐᔅᒐᐅᓂᒡ ᐅᒡ᙮

²³ ᒋ ᑎᐱᐱᔪᐤ ᒪᒃ ᐊᓐ ᑲ ᐃᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᐊᑉᕋᐊᒻ ᒋ ᑕᑈᔭᔨᒪᐤ ᒋᓴᒪᓂᑐᐛ ᐊᐅᒄ ᒪᒃ ᐛᒋ ᐃᑕᔨᒥᑯᑦ ᐊ ᑯᐃᔅᑯᑕᑎᓯᑦ᙮ ᐊᑉᕋᐊᒻ ᒪᒃ ᒋᓴᒪᓂᑐᐤ ᐅᐎᒐᐛᑭᓇ ᒋ ᐃᓯᓂᐧᑲᑕᑭᓄᐤ᙮

²⁴ ᒋ ᐛᐸᑕᓐ ᒪᒃ, ᑯᐃᔅᑯᓇᑯᐊᑭᓄᐤ ᐊᐛᓐ ᐊᑐᔅᒐᐅᓂᒡ ᐅᒡ, ᓇᒪ ᒥᒄ ᑕᑈᑎᒧᐅᓂᒡ ᐅᒡ᙮

²⁵ ᒧᔭᒻ ᐊᓐ ᐱᓯᒂᑎᓯᔎᐤ ᕋᐊᑉ ᓇᒪᔭᔪᐤ ᐊ ᐛᒋ ᑯᐃᔅᑯᓇᑯᐊᑭᓄᐅᑦ ᐊᓂᔭ ᐅᒋ ᑕᓐ ᑲ ᐃᑎᑦ ? ᒋ ᐎᒋᐊᐤ ᒍᐤ ᐊᓯᒪᑭᓂᓴ ᐊᒋ ᐱᑎᑲᐊᑦ ᐎᒋᒡ ᑭᔭ ᐊᒋ ᒋᑎᓴᐛᑦ ᑯᑎᒋᔪᐤ ᒪᔅᑭᓇᔪᐤ ᐊᒋ ᐛᐸᑎᔭᑦ ᒐ ᐊᐱᒋᑕᔨᒋ᙮

²⁶ ᐛᔅ ᐊᑲ ᑕᑦ ᐊᒐᐧᒄ ᒥᔭᒡ, ᓂᐱᒥᑭᓐ ᐊᓐ ᒥᔪᐤ᙮ ᐊᐅᑯᓐ ᒧᔭᒻ ᐊ ᐃᓯᓇᒂᒡ ᑕᑈᑎᒧᐅᓐ, ᐊᑲ ᐊ ᐊᓯᒡ ᑎᒂᒡ ᒥᔪ ᐊᑐᔅᒐᐅᓐ ᓂᐱᒥᑭᓐ ᐊᓐ ᑕᑈᑎᒧᐅᓐ᙮