ᒋᒥᔅ ᐅᒥᓯᓇᐊᒪᒐᐅᓐ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒋᒥᔅ ᓂᔾ, ᒋᓴᒪᓂᑐᐤ ᑭᔭ ᐅᑎᐸᔨᒋᒐᐤ ᒋᓴᔅ ᙭ ᐅᑦ ᐊᐱᒋᐊᑭᓄᐛᐛ᙮ ᒥᓯᐛ ᓂ ᐛᒋᔭᒪᔪᐛ ᒋᓴᒪᓂᑐᐤ ᐅᑦ ᐃᔨᒪ ᐸᐱᐛ ᐊ ᑕᔨᒋ ᒥᓯᐛ ᐊ ᐃᔅᐱᑎᔅᑭᒥᑲᔨᒡ ᐅᔭ ᐊᔅᒋᔪᐤ᙮ ᑕᑈᑎᒧᐅᓐ ᑭᔭ ᐊᓏᑎᒧᐅᓐ 2 ᓂᐧᑲᓂᓯᑐᒄ, ᒥᔽᔨᑎᒧᒄ ᓂᓇᐧᑯᐤ ᐊ ᐃᓯ ᑯᒂᒋᐃᑯᐅᔭᒄ᙮ 3 ᐛᔅ ᒋ ᒋᔅᒐᔨᑕᓇᐛᐤ ᐊ ᑯᒂᒋᑕᑭᓄᐅᒡ ᒋᑕᑈᑎᒧᐅᓄᐛᐤ ᐊᑯᑕ ᐛᒋ ᐊᔭᔭᒄ ᓯᐱᔪᐛᓯᐅᓐ᙮ 4 ᔭᐃᑕᔾ ᒋᑭ ᐎ ᐃᑐᑕᑯᓇᐛᐤ ᓯᐱᔪᐛᓯᐅᓐ ᓇᔅᒡ ᒐᒋ ᓴᐳᔅᑭᒪᒄ ᑕᓐ ᒐ ᐃᓯ ᓂᓂᒋᔅᑭᒧᐛᒂ᙮ ᐊᑯ ᒪᒃ ᒐ ᒋᔭᒪᐅᓯᔭᒄ, ᐊ ᒥᓯᑐᐛᓯᔭᒄ ᒋᑭ ᐃᓯᓇᑯᓯᓇᐛᐤ, ᓇᒪ ᓇᔅᒡ ᒋᑭ ᐅᒋ ᓄᑕᔅᑲᓇᐛᐤ ᑕᓐ ᒋᐸ ᐃᑕᔨᑕᑯᓯᓇᐛᐤ᙮ 5 ᐊ ᑕᒂ ᐊᐛᓐ ᐊᑲ ᒋᔅᒐᔨᑕᐧᒃ ᑕᓐ ᐊᓐ ᒐ ᐃᓯᑲᐳᔅᑕᐧᒃ ᒐᒂᔪᐤ ᐊ ᓂᒋᔅᑲᐧᒃ ᒋᓴᒪᓂᑐᐛ ᒋᐸ ᓂᑐᑎᒧᐛᐤ ᑭᒐᑕᐛᔨᑎᒧᐅᓂᔪᐤ᙮ ᒋᑭ ᒥᔨᑯᐤ ᒪᒃ᙮ ᐛᔅ ᒋᓴᒪᓂᑐᐤ ᐛᔪᐅᒡ ᒥᔭᐤ ᒥᓯᐛ ᐊᐛᔪᐛ ᑕᓐ ᐊ ᐃᓯ ᓂᑐᐛᔨᑎᒪᑯᑦ ᒐᒂᔪᐤ᙮ 6 ᒥᒄ ᒪᒃ ᐊᑲᐎᔾ ᒋᑭ ᐅᒋ ᐊᓏᑎᒻ ᐊᓐ ᐊᐛᓐ ᑲ ᓂᑐᑎᒪᑦ᙮ ᐛᔅ ᐊᓐ ᐊᐛᓐ ᑲ ᐊᓏᑕᐧᒃ ᒧᔭᒻ ᑭᔅᑭᓐ ᐊᓐᑕ ᓴᑲᐃᑭᓂᒡ ᐊᐅᑯᓐ ᐊ ᐃᓯᓇᑯᓯᑦ, ᒥᒄ ᑕᓐᑕ ᐊ ᐃᓯ ᔪᑎᓂᔨᒡ ᐊᑯᑕ ᐊ ᐃᑕᐅᑯᑦ᙮ 7 ᓇᒪ ᒋ ᐛᑕᔨᑎᒻ ᐅ ᐊᐛᓐ ᑕᓐ ᐊᓐ ᒐ ᐃᑎᑦ᙮ 8 ᐅ ᒪᒃ ᐊ ᐃᓯᓇᑯᓱᐎᓇ ᐊᑲᐎᔾ ᐱᑯᓴᔨᒻ ᒋᓴᒪᓂᑐᐤ ᒐᒋ ᒥᔨᔅᒃ ᒐᒂᔪᐤ᙮ ᑲ ᐛᔪᑎᓯᒡ ᑭᔭ ᑲ ᒋᔅᑎᒪᑎᓯᒡ 9 ᒋᐧᑲᓂᓯᓄᐤ ᑲ ᒋᔅᑎᒪᑎᓯᑦ ᒋᐸ ᒥᔽᔨᑎᒻ ᒋᓴᒪᓂᑐᐛ ᐊ ᒋᔅᑕᔨᑕᑯᐃᑯᑦ᙮ 10 ᐊᑯ ᐊᓐ ᐊᐛᓐ ᑲ ᐛᔪᑎᓯᑦ ᒋᐸ ᒥᔽᔨᑎᒻ ᐊ ᑎᐱᑕᔨᑕᑯᐃᑯᑦ ᒋᓴᒪᓂᑐᐛ᙮ ᐛᔅ ᑭᔭ ᐎᔾ ᒋᑭ ᐃᔎᐱᔪᐤ ᐅᐱᒪᑎᓯᐅᓐ ᒧᔭᒻ ᓂᑕᐅᒋᑕᑭᓐ ᐊ ᐛᐱᑯᓄᐅᒡ ᐊ ᐃᔅᐱᔨᒡ᙮ 11 ᐃᔅᐱ ᒋᒋᐛ ᐊ ᐊᑎ ᓴᑲᔅᑐᐛᑦ ᐱᓯᒻ ᒂ ᐊᑎ ᐃᔎᓴᐧᒃ ᓂᑕᐅᒋᑕᑭᓇ ᐊᑯ ᐱᔭᐸᒋᑎᓂᔨᒋ ᐊᓂᔭᔪᐛ ᐛᐱᑯᓇ᙮ ᐛᓂᑎᒡ ᐊᓐ ᑕᓐ ᑲ ᐃᓯ ᒥᔽᓯᒡ᙮ ᐊᐅᑯᓐ ᒪᒃ ᒧᔭᒻ ᑭᔭ ᐎᔾ ᒐ ᐃᓯᓇᑯᓯᑦ ᐊᓐ ᐊᐛᓐ ᑲ ᐛᔪᑎᓯᑦ, ᒋᑭ ᐳᓂᐱᒪᑎᓯᐤ ᑭᔭ ᐎᔾ, ᒐ ᓂᑭᑕᐧᒃ ᒥᓯᐛ ᐅᑦ ᐊᑐᔅᒐᐅᓐ᙮ ᑕᓐᑕ ᐛᒋᐱᔨᒡ ᑯᒂᒋᐃᐛᐅᓐ 12 ᓱᐛᔨᑕᑯᓱᐤ ᐊᓐ ᐊᐛᓐ ᐊᑲ ᓴᐧᑯᒋᐃᑯᑦ ᑕᓐ ᐊ ᐃᓯ ᑯᒂᒋᐊᑭᓄᐅᑦ᙮ ᐛᔅ ᓴᐳᔅᑲᒐ ᑕᓐ ᐊ ᐃᓯ ᑯᒂᒋᐊᑭᓄᐅᑦ ᒋᑭ ᒥᔨᑯᐤ ᒋᓴᒪᓂᑐᐛ ᐊ ᐛᔪᒡ ᒥᔽᔨᑕᑯᓂᔨᒡ ᐱᒪᑎᓯᐅᓂᔪᐤ, ᐊᓂᔭ ᑲ ᐃᔅᒋᔄᔨᒋ ᒐᔅᑎᓇᔅ ᒐ ᒥᔭᔨᒋ ᐊᓂᔭ ᑲ ᓴᒋᐃᑯᑦ᙮ 13 ᐊᓐ ᐊᐛᓐ ᑲ ᑯᒂᒋᐊᑭᓄᐅᑦ ᓇᒪ ᒋᐸ ᐅᒋ ᐃᔅᒋᔄᐤ, “ᒋᓴᒪᓂᑐᐤ ᓂ ᐸᒋ ᑯᒂᒋᐃᒄ᙮” ᑕᐸ ᒋᑭ ᒋ ᑯᒂᒋᐃᑯᐤ ᒥᒋᑥᐅᓂᔪᐤ ᒋᓴᒪᓂᑐᐤ ᑭᔭ ᓇᒪ ᑯᒂᒋᐊᐤ ᐊᐛᔪᐛ ᒐᒋ ᒥᒋᑐᑎᒥᔨᒋ᙮ 14 ᑯᒂᒋᐊᑭᓄᐤ ᐊᐛᓐ ᒐᒋ ᒥᒋᑐᑕᐧᒃ ᐃᔅᐱ ᐸᔅᒐᐱᑎᑯᒋ ᐎᔾ ᑎᐱᔨᐛ ᐅᒥᒋ ᓂᑐᐛᔨᑎᒧᐅᓐ ᑭᔭ ᐊ ᑯᒂᑕᔨᑕᐧᒃ ᒐᒋ ᒥᒋᑐᑕᐧᒃ᙮ 15 ᐃᔅᐱ ᒪᒃ ᓯᔭᑯᒋᐃᑯᒋ ᐊᑲ ᓂᔅᑯᔅᑕᐧᒃ, ᐊᑯ ᑕᑈ ᐊ ᐊᑎ ᐃᑐᑕᐧᒃ ᐊᓂᔭ᙮ ᐃᔅᐱ ᒪᒃ ᐊ ᐃᑎᑦ ᐊᓂᔭ ᑕᓐ ᑲ ᐃᓯ ᒥᒋᓂᑐᐛᔨᑕᐧᒃ, ᓂᐳᐅᓂᒡ ᐃᑐᑕᐃᑯᐤ᙮ 16 ᓂᐧᑲᓂᓯᑐᒄ ᑲ ᓴᒋᐃᑎᑯᒡ ᓱᒃ ᑯᐃᔅᒄ ᐅ ᐎ ᐃᓯ ᓂᔅᑐᑎᒧᒄ᙮ James 1.17-27 (Proper-17 Year B) 17 ᒥᓯᐛ ᒥᔨᐛᐅᓐ ᑲ ᒥᔽᓯᒡ ᑭᔭ ᑲ ᒋᔭᒪᐅᓯᒥᑲᒡ ᐊᓐᑕ ᐃᔅᐱᒥᒡ ᐅᒋᐱᔪᐤ, ᐊᓐᑕ ᒋᓴᒪᓂᑐᐤ ᐊ ᑕᑦ᙮ ᐊᐅᒄ ᒋᓴᒪᓂᑐᐤ ᑲ ᐅᓯᑕᑦ ᒥᓯᐛ ᐛᔅᑕᐅᓂᔪᐤ ᐊᓐᑕ ᒋᓯᑯᒡ᙮ ᒧᔅ ᐸᐃᑯᓄᒡ ᐃᑕᔨᑕᑯᓱᐤ, ᓇᒪ ᐃᓯᓇᑯᓱᐤ ᒧᔭᒻ ᐊ ᑎᑲᔅᑕᑎᒡ ᒐᒂᓐ ᐛᐃᐱᔅᒋᔅ ᒥᒄ ᒐᒋ ᓄᒂᒡ᙮ 18 ᔅᒋ ᒥᔨᑯᓄᐤ ᐱᒪᑎᓯᐅᓂᔪᐤ ᐊᓐᑕ ᐅᒋ ᐊᓂᔭ ᐅᑦ ᐃᔨᒧᐅᓐ ᑲ ᑕᑈᒥᑭᓂᔨᒡ ᒋᔭᓄᐤ ᓂᔅᑎᒻ ᒐᒋ ᐎᐧᑯᒋᐃᑕᐧᒄ ᐅᑕ ᐅᔭ ᐊᔅᒋᔪᐤ᙮ ᐊ ᐸᑕᑭᓄᐎᒡ ᑭᔭ ᐊ ᑐᑕᑭᓄᐎᒡ ᒋᓴᒪᓂᑐᐤ ᐅᑦ ᐃᔨᒧᐅᓐ 19 ᐊᑲᐎᔾ ᐅᓂᒋᔅᒋᓯᒄ ᐅ ᓂᐧᑲᓂᓯᑐᒄ ᑲ ᓴᒋᐃᑎᑯᒡ᙮ ᒥᓯᐛ ᐊᐛᓐ ᓱᒃ ᒧᔅ ᐃᔭᒂ ᒋᐸ ᐎ ᓂᑐᑎᒻ, ᒋᐸ ᒪᒥᑐᓇᔨᑎᒻ ᑭᔭ ᑕᓐ ᐛ ᐃᔅᒋᔄᑦ ᑭᔭ ᓇᒪ ᑎᐛᒡ ᒋᐸ ᐅᒋ ᒋᔄᓱᐤ᙮ 20 ᐊ ᒋᔄᓯᑦ ᐊᐛᓐ ᓇᒪ ᑯᐃᔅᒄ ᒋ ᐃᑐᑎᒻ ᐊᓂᔭ ᑲ ᐃᓯ ᓂᑐᐛᔨᒥᑯᑦ ᒋᓴᒪᓂᑐᐛ ᒐᒋ ᐃᑐᑕᐧᒃ᙮ 21 ᐛᐱᓂᒧᒄ ᒥᓯᐛ ᐎᓂᓱᐅᓐ ᑭᔭ ᒥᓯᐛ ᒥᒐᑎᓯᐅᓐ᙮ ᐱᔅᑎᓂᓱᒄ ᒋᓴᒪᓂᑐᐤ ᐊ ᑕᑦ, ᑎᑎᒺᐧᒄ ᐅᑦ ᐃᔨᒧᐅᓐ ᒋᑕᐃᐛᒡ ᑲ ᐱᑕᐊᐧᒃ ᐊᓂᔭ ᒐᒋ ᐱᒪᒋᐃᑯᐛᒄ᙮ 22 ᒥᒄ ᓂᑐᑎᒧᑕ ᒋᓴᒪᓂᑐᐤ ᐅᑦ ᐃᔨᒧᐅᓐ ᐊᑲ ᒪᒃ ᐃᑐᑎᒧᑕ, ᒋᐎᔭᓯᐃᓱᓐ᙮ ᐃᑐᑎᒻ ᑕᓐ ᐊ ᐃᑎᔅᑕᔨᒡ᙮ 23 ᐊᓐ ᐊᐛᓐ ᒥᒄ ᑲ ᓂᑐᑎᒺᑦ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᐊᑲ ᒪᒃ ᐃᑐᑕᐧᒃ ᑕᓐ ᐊ ᐃᑎᔅᑕᔨᒡ ᒧᔭᒻ ᐊᓐ ᐊᐛᓐ ᑲ ᑭᓄᐛᐱᒥᓱᑦ ᐛᐱᒥᓱᐅᓂᒡ ᐃᓯᓇᑯᓱᐤ᙮ 24 ᐃᔅᐱ ᑲ ᑭᓄᐛᐱᒥᓱᔨᒋ, ᔅᑐᑕᐤ ᐊᑯ ᑎᐛᒡ ᐅᓂᒋᔅᒍᐤ ᑕᓐ ᐊ ᐃᓯᓇᑯᓯᑦ᙮ 25 ᒋᓴᒪᓂᑐᐤ ᐅᐎᓱᐛᐅᓐ ᓇᔅᒡ ᑕᑈ ᒥᔽᔨᑕᑯᓂᔪᐤ ᑭᔭ ᐊᐱᐧᑯᓂᑯᐅᒡ ᐊᐛᓐᒋ᙮ ᐊᓐ ᒪᒃ ᐊᐛᓐ ᐃᔭᒂ ᑲ ᓂᑐ ᒋᔅᒐᔨᑕᐧᒃ ᐅᔭ ᐎᓱᐛᐅᓂᔪᐤ ᐊᑲ ᒪᒃ ᐳᓂᑦ ᐅᔭ ᐊ ᐃᑎᑦ, ᐊᑲ ᐅᓂᒋᔅᒋᓯᑦ ᑕᓐ ᑲ ᐃᓯ ᐸᑕᐧᒃ, ᐃᑐᑕᒐ ᑕᓐ ᐊ ᐃᑎᔅᑕᔨᒡ ᐊᓐᑕ, ᐊᐅᒄ ᒐ ᓱᐛᔨᒥᑯᑦ ᒋᓴᒪᓂᑐᐛ ᒥᓯᐛ ᑕᓐ ᐊ ᐃᑎᑦ᙮ 26 ᐊᐛᓐ ᐊ ᐃᑕᔨᒥᓱᑦ ᐊ ᑯᐃᔅᑯᑕᑎᓯᑦ ᒥᒄ ᒪᒃ ᐊᑲ ᒋ ᓂᓇᑭᑐᐛᔨᑕᐧᒃ ᑕᓐ ᐊ ᐃᔅᒋᔄᑦ, ᐎᔭᓯᐃᓱᐤ ᐊᓐ ᐊᐛᓐ᙮ ᓇᒪ ᒐᒂᔪᐤ ᐃᑕᐱᑎᓂᔪᐤ ᐅᑦ ᐊᔭᒥᐊᐅᓐ᙮ 27 ᐊᓐ ᐊᔭᒥᐊᐅᓐ ᑲ ᐃᑕᔨᑕᐧᒃ ᒋᓴᒪᓂᑐᐤ ᑲ ᐅᑕᐎᒪᐅᑦ ᐊ ᑯᐃᔅᑯᓇᑯᓂᔨᒡ ᑭᔭ ᐊ ᐸᔭᒋᓇᑯᓂᔨᒡ ᒪᐅ ᐊ ᐃᓯᓇᒂᒡ, ᐃᑐᑕᑯᐤ ᐊᐛᓐ ᒐᒋ ᒥᔪ ᐎᒋᐊᑦ ᒋᐅᓴᓂᓴ ᑭᔭ ᑲ ᐸᐃᑯᓯᔨᒋ ᐃᔎᐛ ᒪᒂᒡ ᐊ ᐊᔨᒥᐅᔨᒋ ᑭᔭ ᐃᑐᑕᑯᐤ ᐊᐛᓐ ᐊᑲ ᓇᔅᒡ ᒐᒋ ᐎᓂᐃᑯᑦ ᒥᒐᑎᓯᐅᓂᔪᐤ ᑕᓐ ᐊ ᐃᓯ ᑎᑯᓂᔨᒡ ᐅᑕ ᐊᔅᒋᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.