ᐃᑉᕈᐛ 5 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Hebrews 5.1-10 (Proper-24 Year B)

¹ ᒥᓯᐛ ᒋᓴᐊᔭᒥᐊᐅᒋᒪᐤ ᒪᒂᒡ ᐅᑦ ᐃᔨᒪ ᐊ ᑕᔨᒋ ᒋ ᐅᒋ ᐅᑎᓇᑭᓄᐤ ᒐᒋ ᐊᑐᔅᑯᐛᑦ ᒋᓴᒪᓂᑐᐛ ᐎᔨᐛᐤ ᐅᒋ᙮ ᒋ ᐱᔅᑎᓂᒐᔅᑎᒧᐛᐤ ᐊᓂᔭᔪᐛ ᐃᔪᐛ ᑭᔭ ᒋ ᒥᑐᔅᑕᐊᒪᐤ ᒐᒋ ᐛᐸᔨᑎᒧᐛᑭᓄᔨᒋ ᐊᓂᔭᔪᐛ ᐃᔪᐛ ᐅᒥᒋᑥᐅᓂᔪᐛ᙮

² ᐊᓐ ᐊᐛᓐ ᑲ ᒋᓴᐊᔭᒥᐊᐅᒋᒪᐅᑦ ᒋᔅᒐᔨᑎᒻ ᑭᔭ ᐎᔾ ᑕᓐ ᐊ ᐃᑕᔨᑕᑯᓂᔨᒡ ᐊ ᓂᒋᔅᑲᑭᓄᔨᒋ ᑯᒂᒋᐃᐛᐅᓂᔪᐤ᙮ ᐊᑯ ᒪᒃ ᒐᔅᒐᔨᒪᑦ ᐃᔭᒂ ᒐᒋ ᐃᑐᑐᐛᑦ ᐊᓂᔭ ᐅᑦ ᐃᔨᒪ ᐊᑲ ᐃᑈᐧᑲᔨᒋ ᐊᑲ ᑯᐃᔅᒄ ᑎᔨᒋ᙮

³ ᐊᓐ ᒋᓴᐊᔭᒥᐊᐅᒋᒪᐤ ᒥᑐᔅᑕᐊᒪᐤ ᒐᒋ ᐛᐸᔨᑎᒧᐛᑭᓄᐅᑦ ᐅᒥᒋᑥᐅᓇ ᑭᔭ ᐊᓂᔭ ᐃᔪᐛ ᒐᒋ ᐛᐸᔨᑎᒧᐛᑭᓄᔨᒋ ᐅᒥᒋᑥᐅᓂᔪᐛ᙮

⁴ ᓇᒪ ᐊᐛᓐ ᒋᑭ ᒋ ᐎᔭᔨᑎᒻ ᒐᒋ ᒋᔅᑕᔨᑕᑯᐃᓱᑦ ᐊ ᒋᓴᐊᔭᒥᐊᐅᒋᒪᐅᑦ᙮ ᒋᓴᒪᓂᑐᐤ ᐊᐅᒄ ᐛᑎᓇᑦ ᐊᐛᔪᐛ ᒐ ᒋᓴᐊᔭᒥᐊᐅᒋᒪᐎᔨᒋ, ᒧᔭᒻ ᑲ ᐃᓯ ᐅᑎᓇᑦ ᐊᕋᓇ ᒐᒋ ᒋᓴᐊᔭᒥᐊᐅᒋᒪᐎᔨᒋ᙮

Hebrews 5.5-10 (Lent-5 Year B)

⁵ ᐊᐅᑯᓐ ᒪᒃ ᒧᔭᒻ ᑭᔭ ᐎᔾ ᙭᙮ ᓇᒪ ᐎᔾ ᐅᒋ ᐎᔭᔨᑎᒻ ᒐᒋ ᒋᔅᑕᔨᑕᑯᐃᓱᑦ ᐊ ᒋᓴᐊᔭᒥᐊᐅᒋᒪᐅᑦ᙮ ᒋᓴᒪᓂᑐᐛ ᒋ ᐃᑎᑯᐤ, “ᒋᔾ ᓂᑯᔅ, ᓂᔾ ᒍᑕᐎᒪᐅᑐᐅᓐ ᐊᓄᒡ ᐅ ᒐᓯᑲᒡ᙮”

⁶ ᒥᓐ ᑎᑯᓂᔪᐤ ᐊᓐᑕ ᐅᑦ ᐃᔨᒧᐅᓂᒡ ᒋᓴᒪᓂᑐᐤ ᐊᒋ ᐃᔅᒋᔄᑦ, “ᑲᒋᒡ ᒋ ᒋᓴᐊᔭᒥᐊᐅᒋᒪᐅᓐ, ᒧᔭᒻ ᒪᓪᑭᓴᑕᒃ᙮”

⁷ ᒪᒂᒡ ᐅᑕ ᐊᔅᒋᒡ ᑲ ᐱᐸᒧᑕᑦ ᒋᓴᔅ ᒥᒐᑥᐤ ᒋ ᐃᓯᓇᑯᓱᐤ ᓱᒃ ᐊ ᓂᑐᑎᒧᐛᑦ ᐊᓂᔭᔪᐛ ᑲ ᒋᔅᒐᔨᒪᑦ ᒐᒋ ᐎᒋᐃᑯᑦ ᒐ ᐊᑲ ᒋ ᓂᐸᐊᑭᓄᐅᑦ᙮ ᒋ ᐸᑕᑯᐤ ᒪᒃ ᐛᔅ ᒋ ᓂᓇᐃᑐᐛᐤ᙮

⁸ ᐊᑎ ᐊᒋ ᐅᑯᓯᑐᑕᑯᑦ ᒋᓴᒪᓂᑐᐛ ᒋᓴᔅ, ᐃᔭᐱᒡ ᒋ ᓂᑐᐛᔨᑕᑯᓂᔪᐤ ᒐᒋ ᒋᔅᒐᔨᑎᒥᐊᑭᓄᐅᑦ ᓇᔅᒡ ᒐᒋ ᓂᓇᐃᑐᐛᑦ ᐊ ᐱᔅᑕᔨᒥᑎᓱᔅᑎᒺᑦ ᐅᑦ ᐃᑕᔨᑎᒧᐅᓂᔪᐤ ᒐᒋ ᓂᓇᐧᑲᒋᐊᑭᓄᐅᑦ᙮ ᐊᑯᑕ ᑲ ᐅᒋ ᒋᔅᒐᔨᑎᒥᐊᑭᓄᐅᑦ ᒐᒋ ᓂᓇᐃᑐᐛᑦ ᒋᓴᒪᓂᑐᐛ᙮

⁹ ᐊᓂᔭ ᒪᒃ ᓇᔅᒡ ᐊᒋ ᓂᓇᐃᑕᐧᒃ ᒋᓴᔅ ᒐᒋ ᓂᓇᐧᑲᒋᐊᑭᓄᐅᑦ, ᐊᑯᑕ ᑲ ᐅᒋ ᒥᔭᑭᓄᐅᑦ ᑲᒋᒡ ᒐᒋ ᐱᒪᒋᐊᑦ ᒥᓯᐛ ᐊᓂᔭᔪᐛ ᑲ ᓂᓇᐃᑕᑯᑦ᙮

¹⁰ ᐊᑯ ᒪᒃ ᒋᓴᒪᓂᑐᐛ ᑲ ᐅᑎᓂᑯᑦ ᒐᒋ ᒋᓴᐊᔭᒥᐊᐅᒋᒪᐅᑦ ᒧᔭᒻ ᒪᓪᑭᓴᑕᑲ ᐊ ᐃᓯ ᒋᓴᐊᔭᒥᐊᐅᒋᒪᐎᔨᒋ᙮

ᓱᒃ ᐎ ᐃᑐᑕᑕᐤ ᒐᒋ ᐃᓯ ᓂᑕᐅᒋᔭᐧᒄ ᐅᑎᐸᔨᒋᒐᐤ ᐊ ᑕᑦ

¹¹ ᐊᔅᒄ ᒥᔅᑎ ᑎᑯᓐ ᑕᓐ ᒐᒋ ᐃᓯ ᐎᑎᒪᑎᑯᒡ ᒥᒄ ᒪᒃ ᓇᔅᒡ ᓂᑦ ᐃᔨᒥᐃᑯᓐ ᒥᓐ ᐊᑐᐎᔅ ᒐᒋ ᐎᑎᒪᑎᑯᒡ, ᐛᔅ ᓇᔅᒡ ᑕᑈ ᓇᒪ ᔅᒋ ᓂᔅᑐᑕᓇᐛᐤ᙮

¹² ᓴᔅ ᒋᐸ ᒋᔅᑯᑎᒧᐛᐛᐅᒡ ᐊᐛᓐᒋ ᑕᓐ ᐊ ᐃᓯ ᑕᑈᒥᑭᓂᔨᒡ ᒋᓴᒪᓂᑐᐤ ᐅᑦ ᐃᔨᒧᐅᓐ ᐛᔅ ᓴᔅ ᐛᔅᑭᒡ ᑲ ᐅᒋ ᑕᑈᑎᒪᒄ ᒋᔨᐛᐤ ᒥᔽᒋᒧᐅᓐ᙮ ᒥᒄ ᒪᒃ ᓇᑐᐛᔨᑕᑯᓂᒂ ᒥᓐ ᒐᒋ ᒋᔅᑯᑎᒪᑯᐅᔭᒄ ᑕᓐ ᑲ ᐃᓯ ᒋᔅᑯᑎᒪᑯᐅᔭᒄ ᐅᔅᑭᒡ ᑲ ᒋᒋ ᑕᑈᑎᒪᒄ ᒧᔭᒻ ᐅᔅᒋᐛᓯᒡ ᒥᒄ ᒋᒋᓇᐳᔭ ᑲ ᒥᓂᐊᑭᓄᐎᒡ ᒋᑦ ᐃᑕᔨᑕᑯᓯᓇᐛᐤ᙮ ᐛᔅ ᓇᒪ ᒋ ᒥᒍᐅᒡ ᐎᔭᓯᔪᐤ ᐅᔅᒋᐛᓯᒡ᙮

¹³ ᐊᓐᒡ ᐊᐛᓐᒋ ᒧᔅ ᑲ ᐎ ᐸᑕᒡ ᐊᓂᔭ ᑕᑈᐅᓂᔪᐤ ᐅᔅᑭᒡ ᑲ ᒋᔅᑯᑎᒧᐛᑭᓄᐎᒡ, ᐊᑲ ᒪᒃ ᐊᐱᑕᔨᑕᒡ ᒐᒋ ᒋᔅᒐᔨᑕᒡ ᑕᓐ ᒐᒋ ᐃᓯ ᑯᐃᔅᑯᑕᑎᓯᒡ, ᓇᒪ ᓂᔅᑐᑎᒧᒡ ᑕᓐ ᐊᓐ ᐊ ᐃᑕᔨᑕᑯᓂᔨᒡ ᐊ ᒂᔅᑲᑎᓯᓇᓄᐎᒡ᙮ ᐅᒡ ᒪᒃ ᐊᐛᓐᒋ ᑲ ᐃᑕᔨᑕᑯᓯᒡ ᒧᔭᒻ ᐅᔅᒋᐛᓯᒡ ᐃᑕᔨᑕᑯᓱᐅᒡ ᒥᒄ ᒋᒋᓇᐳᔭ ᐊ ᒥᓂᐊᑭᓄᐎᒡ᙮

¹⁴ ᐊᑯ ᐊᓐᒡ ᑲ ᒋᓴᐃᔪᐛᔨᑕᒡ ᓴᔅ ᐎᔭᓯᔪᐤ ᒥᒍᐅᒡ᙮ ᒋ ᒋᔅᑯᑎᒪᓱᐅᒡ ᑯᐃᔅᑯᑕᑎᓯᐅᓂᒡ ᒐᒋ ᐃᓯ ᐱᒪᑎᓯᒡ ᐊᓯᑯᒻ ᒋᓯᑲᐛ ᐊ ᑯᒋᑕᒡ ᑯᐃᔅᒄ ᒐᒋ ᐃᓯ ᐱᒪᑎᓯᒡ᙮ ᐊᐅᒄ ᒪᒃ ᐛᒋ ᓂᔅᑐᐅᓇᒡ ᑯᐃᔅᑯᑕᑎᓯᐅᓂᔪᐤ ᑭᔭ ᒥᒐᑎᓯᐅᓂᔪᐤ᙮