ᐃᑉᕈᐛ 4 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑕᓐᑕ ᒐᒋ ᐅᒋ ᐅᑎᑎᒪᐧᒄ ᒋᓴᒪᓂᑐᐤ ᐅᑦ ᐊᔪᐛᐳᐅᓐ 1 ᒋᓴᒪᓂᑐᐤ ᒪᒃ ᒋ ᐃᔅᒋᔄᐤ ᒐᔅᑎᓇᔅ ᒐ ᐊᔭᔅᑯᔅᑎᒧᐛᑦ ᐅᑦ ᐃᔨᒪ ᑕᓐᑕ ᒐ ᐊᔽᐱᔨᒋ᙮ ᐊᔅᒄ ᒪᒃ ᐅ ᐊᓄᒡ ᒐᓯᑲᒡ ᒋᑭ ᒋ ᐱᒐᓇᓄᐤ ᑭᔭ ᒋᔭᓄᐤ ᐊᓐᑕ ᒐᒋ ᐊᔽᐱᔭᐧᒄ᙮ ᐊᑯ ᒪᒃ ᐃᔭᒂᒥᑕᐤ ᒐ ᐊᑲ ᒋ ᐃᓯ ᐱᒪᑎᓯᔭᐧᒄ ᒐᒋ ᐅᒋ ᐃᑕᔨᒥᑕᐧᒄ ᒋᓴᒪᓂᑐᐤ ᐊᑲ ᒋᔅᑕᔨᑕᑯᓱᐛᐧᒄ ᐊᓐᑕ ᒐᒋ ᐱᒐᐛᐧᒄ᙮ 2 ᐊᑯ ᒪᒃ ᔅᒋ ᐸᑕᓇᓄᐤ ᐊᓐ ᒥᔽᒋᒧᐅᓐ ᐊᓐᑕ ᑲ ᐊᔨᒧᑕᒡ ᐊᓐᑕ ᒐ ᐊᔽᐱᔨᒋ ᒋᓴᒪᓂᑐᐤ ᐅᑦ ᐃᔨᒪ᙮ ᐊᔪᐅᒄ ᐅᔭ ᒥᔽᒋᒧᐅᓂᔪᐤ ᑲ ᐃᓯ ᐸᑕᒡ ᐊᓂᔭᐧᑲ ᒋᐛᐧᑯᒪᑭᓄᐎᒡ᙮ ᒥᒄ ᒪᒃ ᓇᒪ ᐅᒋ ᐱᒐᐅᒡ ᐊᓐᑕ ᐛᔅ ᓇᒪ ᐅᒋ ᑕᑈᑎᒧᒡ ᑕᓐ ᑲ ᐃᓯ ᐎᑎᒧᐛᑭᓄᐎᒡ᙮ 3 ᒋᔭᓄᐤ ᒪᒃ ᔅᒋ ᑕᑈᑕᓇᓄᐤ ᐊᐅᒄ ᒪᒃ ᐅ ᐛᒋ ᐱᒐᔭᐧᒄ ᐊᓐᑕ ᒐ ᐊᔽᐱᔭᐧᒄ᙮ ᒧᔭᒻ ᑲ ᐃᑎᔅᑕᔨᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᒪᒂᒡ ᑲ ᒋᔄᓯᔭᓐ, ᓂᒋ ᒐᔅᑎᓇᒡ ᐃᔅᒋᔄᓐ ᒐ ᐊᑲ ᓂᑕ ᐅᒋ ᐱᒐᒡ ᐊᓐᑕ ᑲ ᐊᔭᔅᑯᔅᑎᒧᐅᒂᐤ ᒐ ᐊᔽᐱᒡ᙮” ᐊᔪᐅᒄ ᐅᔭ ᑲ ᐃᔅᒋᔄᑦ ᐊᑎ ᓴᔅ ᐊᒋ ᒋᔅᑕᑦ ᐅᑦ ᐊᑐᔅᒐᐅᓐ ᐃᔅᐱ ᑲ ᐅᓯᑕᑦ ᐅᔭ ᐊᔅᒋᔪᐤ᙮ 4 ᒋ ᒋᔅᒐᔨᑕᓇᓄᐤ ᐅ ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᒋᓴᒪᓂᑐᐤ ᒋ ᐊᔪᐛᐳᐤ ᐃᔅᐱ ᑲ ᒋᔅᑕᑦ ᐅᑦ ᐊᑐᔅᒐᐅᓐ, ᐃᔅᐱ ᑲ ᓂᔄᐅᑕᒡ ᒋᓯᑲᔨᒡ᙮ 5 ᒥᓐ ᐃᔭᐱᒡ ᐊᔨᒧᑕᐤ ᐊᓐᑕ ᐊᑎᔅᑕᒡ, ᓇᒪ ᓂᑕ ᓂᑭ ᐅᒋ ᐱᔅᑎᓇᐅᒡ ᒐᒋ ᐱᒐᒡ ᐊᓐᑕ ᑲ ᐊᔭᔅᑯᔅᑎᒧᐅᒂᐤ ᒐᒋ ᐊᔽᐱᒡ᙮ 6 ᐊᑎ ᐊᒋ ᐃᓯᓇᑯᓯᒡ ᐊᓐᒡ ᓂᔅᑎᒻ ᑲ ᐎᑎᒧᐛᑭᓄᐎᒡ ᒥᔽᒋᒧᐅᓂᔪᐤ ᐊᑲ ᐅᒋ ᐎ ᑕᑈᑕᒡ ᑭᔭ ᐊᑲ ᐅᒋ ᐊᐱᓯᑕᒡ ᑭᔭ ᑭᑈ ᓇᒪ ᐛᐛᒡ ᐅᒋ ᐅᑎᓴᐸᑎᒧᒡ᙮ ᐊᔅᒄ ᒪᒃ ᓇᐃᐱᔪᐤ ᒐᒋ ᐱᒐᓄᐅᒡ ᐊᓐᑕ ᒐᒋ ᐊᔽᐱᓇᓄᐅᒡ᙮ 7 ᒋ ᒐᔅᑎᓇᑕᔨᑎᒥᐃᑯᓇᓄᐤ ᒪᒃ ᐅ ᐛᔅ ᒋᓴᒪᓂᑐᐤ ᒥᓐ ᒋ ᒥᔨᐛᐤ ᐊ ᒋᓯᑲᔨᒡ ᒐᒋ ᐱᒐᓄᐎᒡ ᐊᓐᑕ, ᐊᐅᒄ ᐊᓄᒡ ᒐᓯᑲᒡ᙮ ᐊᔪᐅᒄ ᐅᔭ ᑲ ᐃᓯ ᐎᑎᒧᐛᑯᐱᓇ ᒋᓴᒪᓂᑐᐤ ᐊᓂᔭᐧᑲ ᒋᐛᐧᑯᒪᑭᓄᐛ ᒪᒂᒡ ᐸᐧᑯᑎᔅᑭᒥᑲᒡ ᑲ ᑕᔨᒋ᙮ ᒥᒐᑐᐤ ᐱᐳᓇ ᒪᒃ ᐊᓐᑕ ᐃᔅ ᓂᔅᑕᒥᒡ ᑎᐱᑦ ᒋ ᐊᐱᒋᐃᑯᐤ ᒋᓴᒪᓂᑐᐛ ᐅᔭ ᒐᒋ ᐃᑕᔨᒋ ᐅᑦ ᐃᔨᒥᔪᐛ, “ᐊᓄᒡ ᒐᓯᑲᒡ ᐸᑐᐛᒂ ᒋᓴᒪᓂᑐᐤ ᐊ ᐃᔨᒥᐃᑕᒄ ᐊᑲᐎᔾ ᓱᒐᔨᒧᒄ᙮ ᐊᑲᐎᔾ ᐃᑎᒄ ᒐ ᐊᑲ ᒋ ᓂᑐᑐᐛᒄ᙮” 8 ᐊᓂᔭ ᐊᔅᒋᔪᐤ ᐊᓐᑕ ᑲ ᐃᑐᑕᐃᒪᑦ ᒋᓴᒪᓂᑐᐛ ᐅᑦ ᐃᔨᒥᔪᐛ ᐊᓂᔭᐧᑲ ᒐᓱᐛ, ᓇᒪᔭᐤ ᐊᓐᑕ ᑲ ᑎᑯᓂᔨᒡ ᒋᒋᐛ ᒐ ᐊᔽᐱᔨᒋ᙮ ᐊᑯ ᒪᒃ ᐸᑎᒪ ᐊᓐᑕ ᒋᓴᒪᓂᑐᐤ ᒋ ᐃᑕᐤ ᐊᔅᒄ ᒐ ᐅᑎᒋᐱᔨᒡ ᐊᓂᔭ ᐊ ᒋᓯᑲᔨᒡ ᒐ ᐱᒐᔨᒋ ᐅᑦ ᐃᔨᒪ ᐊᓐᑕ ᒋᒋᐛ ᒐ ᐊᔽᐱᔨᒋ᙮ 9 ᐃᔭᐱᒡ ᒪᒃ ᒋᑭ ᐅᑎᒋᐱᔪᐤ ᒐᒋ ᐊᔽᐱᔨᒋ ᒋᓴᒪᓂᑐᐤ ᐅᑦ ᐃᔨᒪ ᒧᔭᒻ ᑲ ᐃᓯ ᐊᔽᐱᔨᒋ ᒋᓴᒪᓂᑐᐛ ᐃᔅᐱ ᑲ ᓂᔄᐅᑕᒡ ᒋᓯᑲᔨᒡ᙮ 10 ᐊᓐ ᒪᒃ ᐊᐛᓐ ᑲ ᒥᔅᑲᐧᒃ ᒋᓴᒪᓂᑐᐛ ᐅᑦ ᐊᔪᐛᐳᐅᓂᔪᐤ ᒋᑭ ᐊᔅᑕᔭᔅᑯᐃᓱᐤ ᑕᓐ ᑲ ᐃᑕᐱᑎᓯᑦ ᒧᔭᒻ ᒋᓴᒪᓂᑐᐛ ᑲ ᐃᑎᔨᒋ᙮ 11 ᐊᑯ ᒪᒃ ᓱᒃ ᑯᒋᑕᑕᐤ ᒐᒋ ᐱᒐᔭᐧᒄ ᐊᓐᑕ ᐊ ᑎᒂᒡ ᐊᔪᐛᐳᐅᓐ᙮ ᓱᒃ ᐃᔭᒂᒥᑕᐤ ᒐ ᐊᑲ ᒋ ᓄᑕᔅᑭᒪᐧᒄ ᒐᒋ ᐱᒐᔭᐧᒄ ᐊᓐᑕ ᐊ ᑎᒂᒡ ᐊᔪᐛᐳᐅᓐ᙮ ᐊᑲ ᓂᓇᐃᑐᐛᒂ ᒋᓴᒪᓂᑐᐤ ᒋᑭ ᓄᑕᔅᑲᓇᓄᐤ ᐊᓐᑕ ᒐᒋ ᐱᒐᔭᐧᒄ ᒧᔭᒻ ᐊᓂᔭᐧᑲ ᐃᔅᕋᐃᓪ ᐃᔪᒡ ᐊᓐᑕ ᐸᒋ ᐅᑕᒡ ᑲ ᐃᓯ ᓄᑕᔅᑲᒡ᙮ ᑕᓐ ᐊ ᐃᑕᔨᑕᑯᓂᔨᒡ ᒋᓴᒪᓂᑐᐤ ᐅᑦ ᐃᔨᒧᐅᓐ Hebrews 4.12-16 (Proper-23 Year B) 12 ᒋᓴᒪᓂᑐᐤ ᐅᑦ ᐃᔨᒧᐅᓐ ᐊᐸᑎᓂᔪᐤ᙮ ᓱᒃ ᐊᑐᔅᒐᒥᑭᓂᔪᐤ᙮ ᐅᔅᑕ ᑲᓴᔪᐤ ᐃᔅᐱᔅ ᓂᑐᐱᔪᐅ-ᒧᐧᑯᒪᓂᔪᐤ ᐊ ᐃᑐᐤ ᐊ ᐃᓯ ᑲᓴᔨᒡ᙮ ᓇᔅᒡ ᒋᑦ ᐊᒐᐧᑯᓇᒡ ᑭᔭ ᒋᒥᑐᓇᔨᒋᑭᓇᒡ ᐃᓯ ᐊᑐᔅᒐᒥᑭᓂᔪᐤ᙮ ᓇᔅᒡ ᑭᔭ ᐊ ᓴᓴᐳᑎᓂᔨᒡ ᐊᓂᔅᑯᑭᓇᓂᒡ ᑭᔭ ᐅᔅᑭᓐ ᐱᒥᒡ ᐊᐅᑯᓐ ᐊ ᐃᑕᔨᑕᑯᓂᔨᒡ᙮ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐊᑯᑕ ᓇᔅᒡ ᐎᔭᐸᑎᔨᑯᐅᔭᐧᒄ ᑕᓐ ᐊᓐ ᐊ ᐃᑕᔨᑎᒪᐧᒄ ᑭᔭ ᑕᓐ ᐊᓐ ᐊ ᐃᓯ ᐱᑯᓴᔨᒧᔭᐧᒄ ᒋᑕᐃᓇᒡ᙮ 13 ᒥᓯᐛ ᒐᒂᔪᐤ ᒧᓴ ᐛᐸᑎᒻ ᒋᓴᒪᓂᑐᐤ᙮ ᒥᓯᐛ ᐊᐛᔪᐛ ᓇᔅᒡ ᐛᐱᒪᐤ ᑭᔭ ᒥᓯᐛ ᒐᒂᔪᐤ ᓇᔅᒡ ᐛᐸᑎᒻ᙮ ᐎᔾ ᒪᒃ ᒋᑭ ᐎᑎᒧᐛᓄᐤ ᒐᒂᓐ ᐛᒋ ᐃᓯ ᐱᒪᑎᓯᔭᐧᒄ ᑕᓐ ᐊ ᐃᓯ ᐱᒪᑎᓯᔭᐧᒄ᙮ ᒋᓴᔅ ᐊᐅᒄ ᐛᒋᑲᐳᐅᔅᑕᑕᐧᒃ 14 ᓱᒃ ᒪᒃ ᒪᒥᒋᒥᓇᑕᐤ ᐊᓐ ᑲ ᐃᓯ ᐛᐎᑎᒪᐧᒄ ᐊ ᐃᓯ ᑕᑈᑎᒪᐧᒄ ᐛᔅ ᒋ ᑭᓄᐛᔨᒪᓄᐤ ᐊ ᒋᔅᑕᔨᑕᑯᓯᑦ ᒋᓴᐊᔭᒥᐊᐅᒋᒪᐤ ᓴᔅ ᐊᓐᑕ ᒋᓴᒪᓂᑐᐛ ᐊ ᑕᔨᒋ ᐊ ᑕᑦ, ᐊᐅᒄ ᒋᓴᔅ, ᒋᓴᒪᓂᑐᐤ ᐅᑯᓴ᙮ 15 ᐛᔅ ᐊᓐ ᒋᒋᓴᐊᔭᒥᐊᐅᒋᒪᒥᓄᐤ ᒋᔅᑎᒪᒐᔨᒥᑯᓄᐤ᙮ ᓇᔅᒡ ᒋ ᒋᔅᒐᔨᒥᑯᓄᐤ ᐊᑲ ᓇᔅᒡ ᓱᒋᑲᐳᐅᔭᐧᒄ ᐃᔅᐱ ᐊ ᑯᒂᒋᐃᑯᔭᐧᑯ ᒐᒋ ᒥᒋᑐᑎᒪᐧᒄ᙮ ᐛᔅ ᑭᔭ ᐎᔾ ᒋ ᑯᒂᒋᐊᑭᓄᐤ ᒐᒋ ᒥᒋᑐᑕᐧᒄ ᒧᔭᒻ ᒋᔭᓄᐤ ᐊ ᐃᑐᑕᑯᐅᔭᐧᒄ, ᒥᒄ ᒪᒃ ᐎᔾ ᓇᒪ ᐅᒋ ᒥᒋᑐᑎᒻ᙮ 16 ᐊᑲ ᓄᒋᑕᐤ ᒐ ᐸᒋ ᓇᑎᒪᐧᒄ ᐊᓐ ᒥᔪᐧᑲᒐᐅ-ᒋᒋᑕᑎᐳᐛᑭᓐ, ᒐᒋ ᒋᓴᐛᑐᑕᑯᐅᔭᐧᒄ, ᑭᔭ ᒐᒋ ᒥᔨᑯᐅᔭᐧᒄ ᒥᔪᐧᑲᒐᐅᓐ ᒐ ᐎᒋᐃᑯᔭᐧᒄ ᐸᒋ ᑲᑯᐃᑐ ᑎᔭᒂ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.