ᐃᑉᕈᐛ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᒪᓂᑐᐤ ᑲ ᐎᑕᐧᒃ ᑕᓐᑕ ᒐᒋ ᐅᒋ ᐱᒪᒋᐅᓇᓄᐎᒡ

¹ ᐊᐅᒄ ᒪᒃ ᐊᓐ ᐛᒋ ᐃᑕᔨᑕᒂᒡ ᐊᑐᐎᔅ ᒐᒋ ᒥᒪᒋᑯᓂᒪᐧᒄ ᐊᓐ ᑕᑈᐅᓐ ᑲ ᐃᓯ ᐸᑎᒪᐧᒄ ᒐ ᐊᑲ ᒋ ᒋᐛᑲᐳᐅᔭᐧᒄ᙮

² ᐊᓐᑕ ᐛᔅᑭᒡ ᐊᓂᔭᔪᐤ ᑎᐸᒋᒧᐅᓂᔪᐤ ᑲᒋ ᐸᒋ ᐎᑕᒡ ᐊᓐᒋᓐᒡ ᒋ ᑕᑈᒥᑭᓂᔪᐤ᙮ ᐊᓐᒡ ᒪᒃ ᐊᐛᓐᒋ ᐊᑲ ᐅᒋ ᐊᐱᓯᑕᒡ ᒪᒃ ᐊᑲ ᐅᒋ ᓂᓇᐃᑕᒡ, ᒋ ᐛᐛᓯᐊᑭᓄᐅᒡ ᑕᓐ ᑲ ᐃᓯ ᒋᔅᑕᔨᑕᑯᓂᔨᒡ ᒐᒋ ᐃᑐᑐᐛᑭᓄᐛᑯᐱᓇ᙮

³ ᒋᔭᓄᐤ ᒪᒃ ᒧᔭᒻ ᐊᑲ ᐊᐱᑕᔨᑎᒪᒂ ᐊᓐ ᐱᒪᒋᐃᐛᐅᓐ ᐛ ᐃᓯ ᒥᔨᐛᑦ ᒋᓴᒪᓂᑐᐤ ᒋᔭᓄᐤ ᑭᔭ ᒋᑭ ᐛᐛᓯᐃᑯᓇᓄᐤ᙮ ᑕᐸ ᒋᑭ ᒋ ᒋᑎᓯᒧᓇᓄᐤ ᐃᔅᐱ ᐎ ᐛᐛᓯᐃᑯᐅᔭᒂ᙮ ᐎᔾ ᓂᔅᑎᒻ ᐅᑎᐸᔨᒋᒐᐤ ᒋᓴᔅ ᔅᒋ ᐎᑎᒪᑭᓄᐤ ᑕᓐᑕ ᒐᒋ ᐅᒋ ᐱᒪᒋᐅᔭᐧᒄ, ᓇᒪ ᒥᒄ ᐊᓐᒋᓐᒡ ᒋ ᐅᒋ ᐎᑎᒪᑭᓄᐅᒡ᙮ ᓇᓇᒐ ᒪᒃ ᑯᑎᑭᒡ ᐊᐛᓐᒋ ᔅᒋ ᐛᐸᑎᔨᑯᓄᐅᒡ ᐊ ᑕᑈᒥᑭᓂᔨᒡ ᐊᓂᔭ ᒥᔽᒋᒧᐅᓂᔪᐤ, ᐛᔅ ᐎᔨᐛᐤ ᐛᒋᒡ ᒋ ᐸᑐᐛᐅᒡ ᑕᓐ ᑲ ᐃᔅᒋᔄᔨᒋ ᒋᓴᓴ᙮

⁴ ᒋᓴᒪᓂᑐᐤ ᒪᒃ ᑭᔭ ᐎᔾ ᔅᒋ ᐛᐸᑎᔨᑯᓄᐤ ᐊ ᑕᑈᒥᑭᓂᔨᒡ ᐊᓂᔭ ᒥᔽᒋᒧᐅᓂᔪᐤ ᐊ ᒪᒥᔅᑲᒡ ᐃᑎᑦ ᑭᔭ ᒪᒥᔅᑲᒡ ᐛᐸᑎᔨᐛᐅᓇ ᐊ ᐛᐸᑎᔨᐛᑦ ᑭᔭ ᓂᓇᐧᑯᐤ ᐊ ᐃᓯ ᒪᒥᔅᑲᒡ ᐃᑐᑎᒪᒐᑦ᙮ ᑭᔭ ᒋ ᐃᑐᑐᐛᐤ ᑲ ᐸᔭᒋᓯᔨᒋ ᐊᒐᒂ ᒐᒋ ᒥᔭᔨᒋ ᐊᐛᔪᐛ ᓂᓇᐧᑯᐤ ᑭᔅᒋᐅᓇ, ᑕᓐ ᐊᓂᔭᔪᐛ ᐎᔾ ᒋᓴᒪᓂᑐᐤ ᐊ ᐃᑕᔨᑎᒥᐃᑯᑦ ᒐ ᐃᓯ ᒥᔨᐛᑦ᙮

᙭ ᐊᐅᒄ ᒐᒋ ᐱᒪᒋᐃᑕᐧᒄ ᓇᒪ ᐎ ᐊᓐᒋᓐᒡ Hebrews 1.1-4; 2.5-12 (Proper-22 Year B)

⁵ ᒥᓯᐛ ᒐᒂᔪᐛ ᑲ ᐊᔨᒧᑎᒪᓐ ᒐ ᐅᑎᒋᐱᔨᒋ ᓇᒪ ᐎ ᐊᓐᒋᓐᒡ ᒋᑭ ᐅᒋ ᐅᒋᒪᐧᑲᑎᒧᒡ᙮

⁶ ᔅᒋ ᒥᔨᑯᓇᓄᐤ ᒐᒋ ᒐᔅᑎᓇᑕᔨᑎᒪᐧᒄ ᐅ ᐛᔅ ᐃᑎᔅᑕᐤ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᑕᓐ ᐊ ᐃᓯᓇᑯᓯᑦ ᐃᔪᐤ ᐛᒋ ᓇᔅᒡ ᒋᒋᐛ ᐃᑕᔨᒥᑦ, ᒥᒄ ᐃᔪᐤ ᐅᑯᓯᓴᓐ ᐊᓐ, ᐃᔭᐱᒡ ᒪᒃ ᓇᔅᒡ ᒋ ᒥᔪ ᑭᓄᐛᔨᒪᐤ ?

⁷ ᐛᐃᐱᔅᒋᔅ ᔅᒋ ᐃᑐᑐᐛᐤ ᐊᑐᐎᔅ ᒐᒋ ᑎᐱᑕᔨᑕᑯᓯᑦ ᐊ ᐃᑕᔨᑕᑯᓯᔨᒋ ᐊᓐᒋᓇ᙮ ᑭᔭ ᐃᔭᐱᒡ ᔅᒋ ᐃᑐᑐᐛᐤ ᒐᒋ ᒋᔅᑕᔨᑕᑯᓯᑦ᙮

⁸ ᔅᒋ ᒥᔭᐤ ᒐᒋ ᐅᒋᒪᐧᑲᑕᐧᒃ ᒥᓯᐛ ᒐᒂᔪᐤ᙮” ᐊᐅᒄ ᐅ ᐊᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ᙮ ᔅᒋ ᐎᑎᒪᑭᓄᐤ ᒪᒃ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒥᓯᐛ ᒐᒂᔪᐤ ᐊᒋ ᒥᔨᑕᐧᒄ ᒐᒋ ᐅᒋᒪᐧᑲᑎᒪᐧᒄ᙮ ᓇᒪ ᑎᑯᓐ ᒐᒂᓐ ᒐ ᐊᑲ ᒋ ᐅᒋᒪᐧᑲᑎᒪᐧᒄ᙮ ᐊᓄᒡ ᒪᒃ ᐊᔅᒄ ᓇᒪ ᒋ ᐛᐸᑕᓇᓄᐤ ᒥᓯᐛ ᒐᒂᓐ ᒐᒋ ᐅᒋᒪᐧᑲᑎᒪᐧᒄ ᒋᔭᓄᐤ ᑲ ᐃᔪᐎᔭᐧᒄ ᐅᑕ ᐊᔅᒋᒡ᙮

⁹ ᒥᒄ ᒪᒃ ᒋ ᒋᔅᒐᔨᒪᓄᐤ ᐎᔾ ᒋᓴᔅ ᐊ ᐊᔭᑦ ᑎᐸᔨᒋᒐᐅᓂᔪᐤ ᒥᓯᐛ ᒐᒂᔪᐤ ᒐᒋ ᐅᒋᒪᐧᑲᑕᐧᒃ᙮ ᒋ ᐃᑐᑐᐛᑭᓄᐤ ᐛᐃᐱᔅᒋᔅ ᐊᑐᐎᔅ ᒐᒋ ᑎᐱᑕᔨᑕᑯᓯᑦ ᐊ ᐃᑕᔨᑕᑯᓯᔨᒋ ᐊᓐᒋᓇ᙮ ᐅᔭ ᒪᒃ ᒋ ᐃᑐᑐᐛᑭᓄᐤ ᒐᒋ ᓂᒋᔅᑲᐧᒃ ᓂᐳᐅᓂᔪᐤ᙮ ᐊᐅᒄ ᐅᔭ ᐛᒋ ᒥᔭᑭᓄᐅᑦ ᒐᒋ ᒋᔅᑕᔨᑕᑯᓯᑦ ᑭᔭ ᒐᒋ ᐃᔅᐸᔨᑕᑯᓯᑦ ᐊᓂᔭ ᐊᒋ ᓂᒋᔅᑲᐧᒃ ᓂᓇᐧᑲᑕᔨᒧᐅᓂᔪᐤ ᐃᔅᐱ ᑲ ᓂᐸᐊᑭᓄᐅᑦ᙮ ᐊᓂᔭ ᒪᒃ ᒋᓴᒪᓂᑐᐤ ᓇᔅᒡ ᐊᒋ ᓴᒋᐊᑦ ᐊᐛᔪᐛ ᐅᑕ ᐊᔅᒋᒡ ᐊᔪᐅᒄ ᐊᓂᔭ ᐛᒋ ᓂᐱᔅᑎᒧᐛᑦ ᒋᓴᔅ ᒥᓯᐛ ᐊᐛᔪᐛ᙮

¹⁰ ᒋ ᐃᓯᓇᑯᓂᑯᐱᓇ ᑕᑈ ᒐᒋ ᓂᓇᐧᑲᒋᐊᑭᓄᐅᑦ ᒋᓴᔅ, ᐛᔅ ᐊᓂᔭ ᐊᒋ ᓂᓇᐧᑲᑕᔨᒧᑦ ᐊᑯᑕ ᑲ ᐅᒋ ᑐᑕᑯᑦ ᒋᓴᒪᓂᑐᐛ ᓇᔅᒡ ᒐᒋ ᒋᔅᑕᔨᑕᑯᓯᑦ ᒐᒋ ᐛᐸᔨᑎᒪᒐᑦ᙮ ᒋᓴᒪᓂᑐᐤ, ᐊᓐ ᒥᓯᐛ ᒐᒂᔪᐤ ᑲ ᐅᓯᑕᑦ ᑭᔭ ᑲ ᐃᑐᑕᐧᒃ ᒧᔅ ᒐᒋ ᑎᑯᓂᔨᒋ, ᒋ ᐱᔅᑎᓇᐤ ᒋᓴᓴ ᒐᒋ ᓂᓇᐧᑲᒋᐊᑭᓄᔨᒋ ᐛᔅ ᒋ ᓂᑐᐛᔨᒪᐤ ᐅᑯᓴ ᑲ ᒥᒐᑎᔨᒋ ᒐᒋ ᒋᔅᒐᔨᑎᒥᔨᒋ ᑕᓐ ᐊ ᐃᑕᔨᑕᑯᓂᔨᒡ ᐅᒋᔅᑕᔨᑕᑯᓱᐅᓐ᙮ ᒋᓴᔅ ᐊᐅᒄ ᐎᔭᐸᑎᔭᑦ ᐊᐛᔪᐛ ᑕᓐᑕ ᒐᒋ ᐅᒋ ᐱᒪᒋᐅᔨᒋ᙮

¹¹ ᒋᓴᔅ ᐛᐸᔨᑎᒧᐛᐤ ᐊᐛᔪᐛ ᒥᓯᐛ ᐅᒥᒋᑥᐅᓂᔪᐛ᙮ ᐃᑎᓯᓇᐤ ᒪᒃ ᐊᓐᑕ ᒋᓴᒪᓂᑐᐛ ᐊ ᑕᔨᒋ ᒐᒋ ᐃᓯ ᐱᒪᑎᓯᔨᒋ᙮ ᐊᓐᒡ ᒪᒃ ᒋᓴᒪᓂᑐᐛ ᑲ ᐱᒪᑎᓯᔅᑐᐛᒡ ᐸᐃᑯᐊᐅᒡ ᐅᑕᐎᐛᐛ᙮ ᐊᐅᒄ ᒪᒃ ᐊᓂᔭ ᐛᒋ ᐊᑲ ᓯᓴᒂᔨᒧᑦ ᒋᓴᔅ “ᓂᐧᑲᓂᓯᒡ” ᒐᒋ ᐃᓯᓂᐧᑲᑕᑦ ᐊᓂᔭᔪᐛ ᑲ ᐛᐸᔨᑎᒧᐛᑭᓄᐎᒋ᙮

¹² ᒋ ᒋᔅᒐᔨᑕᓇᓄᐤ ᐅ ᐛᔅ ᐎᔾ ᒋᓴᔅ ᒋ ᐃᑕᐤ ᒋᓴᒪᓂᑐᐛ, “ᒋᓴᒪᓂᑐᐤ, ᒋᑭ ᐊᔨᒧᒥᑎᓐ ᐊᓐᑕ ᓂᐧᑲᓂᓯᒡ ᐊ ᑕᒡ᙮ ᓂᑭ ᐎᑕᓐ ᐊᓐᑕ ᒪᒧᐤ ᑲ ᐊᔭᒥᐊᐛᑎᓯᒡ ᐊ ᑕᒡ ᑕᓐ ᑲ ᐃᑎᔨᓐ ᑭᔭ ᒋᑭ ᒪᒥᒋᒥᑎᓐ᙮”

¹³ ᑭᔭ ᒋ ᐃᑕᐤ, “ᓇᔅᒡ ᓂᑭ ᒐᔅᑎᓇᑕᔨᒪᐤ ᒋᓴᒪᓂᑐᐤ᙮” ᐊᑯ ᒥᓐ ᒂ ᐃᔅᒋᔄᑦ, “ᒪᐅᑕ ᐊ ᑕᔭᓐ, ᐊᑯᑕ ᑭᔭ ᐅᑕ ᐊ ᑕᒡ ᓂᑦ ᐊᐛᓯᒥᒡ ᐊᓂᔭᔪᐛ ᒋᓴᒪᓂᑐᐤ ᑲ ᐸᒋ ᒥᔨᑦ᙮”

¹⁴ ᐃᔪᐛ ᐊᓂᔭᔪᐛ ᑲ ᐃᑕᑦ ᐊᓂᔭ ᑲ ᐃᔅᒋᔄᑦ ᓂᑦ ᐊᐛᓯᒥᒡ᙮ ᒋᓴᔅ ᑭᔭ ᐎᔾ ᒋᒋᐛ ᓇᔅᒡ ᐃᔪᐛ ᒋ ᐃᓯᓇᑯᓱᐤ ᑭᔭ ᓇᔅᒡ ᐃᔪᐛ ᒋ ᐃᑕᔨᑕᑯᓱᐤ᙮ ᐊᐅᒄ ᐅᔭ ᐃᔪᐛ ᐛᒋ ᑕᑦ ᒐᒋ ᓂᐱᑦ, ᒐᒋ ᐅᒋ ᓴᐧᑯᒋᐊᑦ ᒥᒋᒥᓂᑐᐛ, ᐊᓂᔭ ᑲ ᑎᐸᔨᑎᒥᔨᒋ ᓂᐳᐅᓂᔪᐤ᙮

¹⁵ ᒋᓴᔅ ᒋ ᓂᐳᐤ ᒐᒋ ᐊᐱᐧᑯᓇᑦ ᒥᒐᑦ ᐊᓂᔭ ᐊᐛᔪᐛ ᑲ ᒪᒋᒂᐱᐧᑲᑎᑯᔨᒋ ᐊ ᑯᔅᑎᒥᔨᒋ ᓂᐳᐅᓂᔪᐤ ᐃᔅᐱ ᑲ ᐱᒪᑎᓯᔨᒋ᙮

¹⁶ ᐛᔅ ᒋ ᒋᔅᒐᔨᑕᓇᓄᐤ ᒋᓴᔅ ᐊᑲ ᐅᒋ ᑎᑯᓯᐧᒃ ᐊᓐᒋᓇ ᒐᒋ ᐸᒋ ᐎᒋᐊᑦ᙮ ᒋ ᑎᑯᓯᓄᐤ ᒐᒋ ᐎᒋᐊᑦ ᐊᐛᔪᐛ, ᐊᓂᔭ ᐊᓂᔅᒐ ᑲ ᐸᒋ ᐱᒪᑎᓯᔨᒋ ᐊᑉᕋᐊᒪ ᐅᒋ ᐊ ᑕᔨᒋ᙮

¹⁷ ᐊᐅᒄ ᐊᓂᔭ ᐛᒋ ᓇᔅᒡ ᐃᔨᒡ ᒋ ᐃᓯᐊᑭᓄᐅᑦ᙮ ᒋ ᓂᑐᐛᔨᑕᑯᓱᐤ ᐎᐧᑲᓂᓴ ᒐᒋ ᓂᔅᐱᑐᐛᑦ ᐊᓐᑕ ᒐᒋ ᐅᒋ ᒋᓴᐊᔭᒥᐊᐅᒋᒪᐅᑦ ᒋᓴᒪᓂᑐᐛ ᐊ ᐊᑐᔅᑯᐛᑦ, ᑭᔭ ᒐᒋ ᐛᐸᔨᑎᒧᐛᑭᓄᔨᒋ ᐊᐛᔪᐛ ᐅᒥᒋᑥᐅᓂᔪᐛ᙮

¹⁸ ᒋᓴᔅ ᒋᑭ ᒋ ᐎᒋᐃᑯᓄᐤ ᒋᔭᓄᐤ ᑲ ᑯᒂᒋᐃᑯᐎᔭᐧᒄ, ᐛᔅ ᑭᔭ ᐎᔾ ᒋ ᓂᓇᐧᑲᑕᔨᒧᐊᑭᓄᐤ ᑭᔭ ᒋ ᑯᒂᒋᐊᑭᓄᐤ᙮