ᐃᑉᕈᐛ 13 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊ ᓇᐊᔨᑎᒥᐊᑭᓄᐅᑦ ᒋᓴᒪᓂᑐᐤ Hebrews 13.1-8,15-16 (Proper-17 Year C)

¹ ᓂᐧᑲᓂᓯᑐᒄ, ᒧᔅ ᐎ ᒥᔪ ᓴᒋᐃᑐᒄ᙮

² ᒋᔅᒋᓯᒄ, ᒧᔅ ᒐᒋ ᐊᔭᔅᑯᐎᔭᒄ ᒐᒋ ᐱᑎᑲᐊᑯᒡ ᒪᓐᑕᐅᒡ ᒋᒋᐛᐛᒡ᙮ ᐱᔅᒐ ᐊᐛᓐᒋ ᓴᔅ ᒋ ᐱᑎᑲᐊᐅᒡ ᒪᓐᑕᐛ ᐊᓐᑕ ᐊ ᑕᒡ, ᓇᒪ ᒪᒃ ᐅᒋ ᒋᔅᒐᔨᒪᐅᒡ ᐱᔅᒐ ᐊᓂᔭ ᒪᓐᑕᐛ ᑲ ᐱᑎᑲᐊᒡ ᐊᒋ ᐊᓐᒋᓄᐎᑯᐱᓇᓂ᙮

³ ᒪᒥᑐᓇᔨᒪᐧᑯᒡ ᐊᓐᒡ ᐊᐛᓐᒋ ᑲᒪᑯᓄᐛᓯᐅᒋᐛᐱᒡ ᐊ ᑕᒡ᙮ ᒧᔭᒻ ᑭᔭ ᒋᔨᐛᐤ ᐊ ᑕᔭᒄ ᐊᓐᑕ ᐊᓂᔭ ᐊ ᑕᒡ ᒐᒋ ᐃᓯ ᒪᒥᑐᓇᔨᑎᒪᒄ᙮ ᒪᒥᑐᓇᔨᒪᐧᑯᒡ ᑭᔭ ᐊᓐᒡ ᑲ ᓂᓇᐧᑲᒋᐊᑭᓄᐎᒡ ᒧᔭᒻ ᑭᔭ ᒋᔨᐛᐤ ᐊ ᓂᓇᐧᑲᒋᐃᑯᔭᒄ ᒧᔭᒻ ᐎᔨᐛᐤ ᐊ ᐃᓯ ᓂᓇᐧᑲᒋᐊᑭᓄᐎᒡ ᒐᒋ ᐃᑕᔨᑎᒪᒄ᙮

⁴ ᑭᔭ ᒥᓐ ᑯᑎᒡ ᒐᒂᓐ ᒐ ᐃᑎᑎᑯᒡ, ᒥᓯᐛ ᐊᐛᓐ ᒋᐸ ᒋᔅᑕᔨᑎᒥᐃᑯᐤ ᓂᐳᐅᓂᔪᐤ᙮ ᐊᓐ ᓇᐸᐤ ᑭᔭ ᐎᐛ ᒥᒄ ᐎᔨᐛᐤ ᒋᐸ ᐎᐸᒥᑐᐅᒡ᙮ ᓇᒪ ᒋᐸ ᐅᒋ ᐱᓯᒂᑎᓯᐅᒡ᙮ ᐛᔅ ᒋᓴᒪᓂᑐᐤ ᒐᔅᑎᓇᔅ ᒋᑭ ᑎᐸᔅᑯᓇᐤ ᐊᓂᔭ ᑲ ᐎᓂᓱᐃᑕᑎᓯᔨᒋ ᑭᔭ ᐊᓂᔭ ᑲ ᐱᓯᒂᑎᓯᔨᒋ᙮

⁵ ᐊᑲ ᐎ ᒋᑭ ᐅᒋ ᐃᓯᓇᑯᓯᓇᐛᐤ ᒐᒋ ᓴᒋᑕᔭᒄ ᓱᓇᔭᐤ᙮ ᒋᐸ ᒥᔽᔨᑕᓇᐛᐤ ᑕᓐ ᐊ ᐃᓯ ᐊᔭᔭᒄ᙮ ᐛᔅ ᒋᓴᒪᓂᑐᐤ ᒋ ᐃᔅᒋᔄᐤ, “ᓇᒪ ᓂᑕ ᒋᑭ ᐅᒋ ᓂᑭᑎᑎᓇᐛᐤ, ᓇᒪ ᓂᑕ ᒋᑭ ᐅᒋ ᐃᓯᓇᑯᓯᓇᐛᐤ ᒐ ᐊᑲ ᒋ ᐃᔭᐱᑕᔨᒥᑎᑯᒡ᙮”

⁶ ᐊᑯ ᒪᒃ ᒐᔅᑎᓇᔅ ᒐᒋ ᐃᔅᒋᔄᔭᐧᒄ, “ᓇᒪ ᓂᑭ ᐅᒋ ᑯᔅᑕᒋᓐ ᐛᔅ ᐅᑎᐸᔨᒋᒐᐤ ᓂ ᐸᒋ ᐎᒋᐃᒄ᙮ ᑕᓐ ᒪᒃ ᒐᒋ ᐸᒋ ᐃᑐᑐᐅᑦ ᐎᔾ ᓇᐸᐤ᙮”

⁷ ᒥᓐ ᑯᑎᒡ ᒐᒂᓐ, ᒪᒥᑐᓇᔨᒪᐧᑯᒡ ᒪ ᐊᓐᒡ ᒪᐅᒡ ᓂᔅᑎᒻ ᑲ ᐛᐎᑎᒪᑕᑯᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ, ᐊᓐᒡ ᑲ ᓂᑲᓂᔅᑲᒡ ᐊᔭᒥᐊᐅᒋᐛᐱᔪᐤ᙮ ᒪᒥᑐᓇᔨᒪᐧᑯᒡ ᑕᓐ ᑲ ᐃᑕᑎᓯᒡ ᑭᔭ ᑲ ᐃᓯ ᐳᓂᐱᒪᑎᓯᒡ ᐊᔅᒄ ᐊ ᑕᑈᔭᔨᒪᒡ ᒋᓴᓴ᙮ ᐊᐅᑯᓐ ᐊᓐ ᒐ ᐎ ᐎᒋᐃᑯᔭᒄ ᒐᒋ ᑕᑈᑎᒪᒄ ᑕᓐ ᑲ ᐃᓯ ᑕᑈᑕᒡ᙮

⁸ ᒋᓴᔅ ᙭ ᓇᒪ ᓂᑕ ᐃᔭᒡ ᒋᑭ ᐅᒋ ᐃᑕᔨᑕᑯᓱᐤ᙮ ᑕᓐ ᑲ ᐃᑕᔨᑕᑯᓯᑦ ᐅᑕᑯᓯᒡ, ᐊᐅᑯᓐ ᐊ ᐃᑕᔨᑕᑯᓯᑦ ᐊᓄᒡ ᑭᔭ ᐊᐅᑯᓐ ᒐ ᐃᑕᔨᑕᑯᓯᑦ ᑲᒋᒡ᙮

⁹ ᐃᔭᒂᒥᒄ ᒐ ᐊᑲ ᒋ ᐎᔭᓯᐃᑯᐅᔭᒄ ᒐᒋ ᐊᑎ ᑕᑈᑎᒪᒄ ᓂᓇᐧᑯᐤ ᓂᑎᒥᒄ ᒋᔅᑯᑎᒪᒐᐅᓇ᙮ ᐛᔅ ᒥᔽᓱᐤ ᒥᑕᐃ ᒐᒋ ᐊᔨᒋᑲᐳᐅᒡ ᓱᐛᔨᒋᒐᐅᓂᒡ, ᓇᒪ ᐎ ᒥᒋᒥᒡ᙮ ᐛᔅ ᓇᒪ ᐎᒋᐃᑯᐤ ᐊᐛᓐ ᒥᒋᒥᔪᐤ ᒐᒋ ᐊᔨᒋᑲᐳᐅᑦ ᑕᑈᑎᒧᐅᓂᒡ ᐃᔅ᙮

¹⁰ ᐊᓐᒡ ᒍᐤ ᐊᔭᒥᐊᐅᒋᒪᐅᒡ ᐊᔅᒄ ᑲ ᒥᑐᔅᑕᐊᒪᒡ ᓇᒪ ᐃᓯᓇᑯᓂᔪᐤ ᒐᒋ ᒥᒋᒡ ᐎᔨᐛᐤ ᐊᓂᔭ ᒥᒋᒥᔪᐤ ᒋᔭᓄᐤ ᒋᐱᔅᑎᓂᒐᐅᓇᐱᔅᑯᓇᒡ ᑲ ᑎᑯᓂᔨᒡ᙮

¹¹ ᐃᔅᐱ ᑲ ᓂᐸᐊᑭᓄᐅᒡ ᐊᓐᒡ ᐊᐛᓯᓯᒡ, ᐊᓐ ᐎᔭᔅ ᐎᐎᑎᒥᒡ ᐊᓐᑕ ᐛᒋᒡ ᐊᓐᒡ ᐃᔪᒡ ᐃᔎᓴᑭᓄᐤ᙮ ᐊᑯ ᐊᓐ ᒋᓴᐊᔭᒥᐊᐅᒋᒪᐤ ᐊᓐᑕ ᒪᐅᒡ ᐊ ᐸᔭᒋᓯᒥᑭᓂᔨᒡ ᑲ ᐃᓯᓂᐧᑲᑕᔨᒡ ᑲᐱᔅᒋᒐᔭᔨᒡ ᐃᑐᑕᐤ ᐊᓂᔭ ᒥᐧᑯᔪᐤ᙮ ᐊᑯ ᐊᓐᑕ ᐸᔅᑎᓇᐧᒃ ᐊᓂᔭᔪᐤ ᒥᐧᑯᔪᐤ ᒋᓴᒪᓂᑐᐛ ᐊ ᑕᔨᒋ ᐊᓐᑕ ᒐᒋ ᐅᒋ ᐛᐸᔨᑎᒧᐛᑭᓄᔨᒋ ᐊᐛᔪᐛ ᐅᒥᒋᑥᐅᓂᔪᐛ᙮

¹² ᒋᓴᔅ ᑭᔭ ᐎᔾ ᐊᓐᑕ ᐎᐎᑎᒥᒡ ᐊᓂᔭ ᐅᑕᓇᔪᐤ ᒋ ᓂᓇᐧᑲᒋᐊᑭᓄᐤ ᑭᔭ ᐊᑯᑕ ᑲ ᓂᐸᐊᑭᓄᐅᑦ᙮ ᐊᑯ ᐊᓂᔭ ᐅᒥᐧᒄ ᐊᑯᑕ ᑲ ᐅᒋ ᐸᔭᒋᐊᑭᓄᐎᒡ ᐊᐛᓐᒋ ᒋᓴᒪᓂᑐᐤ ᐅᑦ ᐃᔨᒪ ᒐᒋ ᐃᓯ ᑭᓄᐛᐱᒪᑭᓄᐎᒡ᙮

¹³ ᐊᑯ ᒪᒃ ᐎᐎᑕᐤ ᐊᓐᑕ ᐅᑕᓇᒡ ᒐ ᓂᑐᐛᐱᒪᐧᒄ ᒋᓴᔅ ᑭᔭ ᒋᔭᓄᐤ ᒐᒋ ᒧᓯᑕᐛᐧᒄ ᑕᓐ ᑲ ᐃᓯ ᒪᔭᔨᒪᑭᓄᐅᑦ᙮

¹⁴ ᐅᑕ ᐊᔅᒋᒡ ᓇᒪ ᑎᑯᓐ ᐅᑕᓇᐤ ᐊᓐᑕ ᑲᒋᒡ ᒐᒋ ᑕᔭᐧᒄ᙮ ᒧᔭᒻ ᒥᒄ ᐊ ᓴᐳᑐᐛᑕᔭᐧᒄ ᒋᑦ ᐃᓯᓇᑯᓯᓇᓄᐤ ᐊ ᐎ ᐃᑐᑕᔭᐧᒄ ᐊᓐᑕ ᐊᓐ ᐅᑕᓇᐤ ᑲᒋᒡ ᒐ ᑎᒂᒡ᙮

Hebrews 13.1-8,15-16 (Proper-17 Year C)

¹⁵ ᒧᔅ ᐱᔅᑕᔨᒥᓱᑕᐤ ᒐᒋ ᒪᒥᒋᒪᐧᒄ ᒋᓴᒪᓂᑐᐤ ᐊᓂᔭ ᐅᒋ ᑕᓐ ᑲ ᐃᓯ ᐃᑐᑎᒪᑕᐧᒄ ᒋᓴᔅ, ᒋᑐᓇᒡ ᐊ ᐅᒋ ᐛᐎᑎᒺᐧᑯᒡ ᐊᐛᓐᒋ ᐊ ᑕᑈᔭᔨᒪᐧᒄ ᒋᓴᔅ᙮

¹⁶ ᐊᑲᐎᔾ ᐳᓂᒄ ᐊ ᒥᔪᑐᑎᒪᒐᔭᒄ ᑭᔭ ᐊ ᒪᑎᓄᐛᐱᔨᑕᑐᔭᒄ ᑕᓐ ᐊ ᐃᓯ ᐊᔭᔭᒄ᙮ ᐛᔅ ᓇᔅᒡ ᐊ ᐱᔅᑕᔨᒥᓱᑦ ᐊᐛᓐ ᐅᔭ ᒐᒋ ᐃᑎᑦ ᓇᐊᔨᑎᒥᐊᐤ ᒋᓴᒪᓂᑐᐛ᙮

¹⁷ ᓂᓇᐃᑐᐛᐧᑯᒡ ᐊᓐᒡ ᑲ ᓂᑲᓂᔅᑲᑕᑯᒡ ᐊᔭᒥᐊᐅᒋᐛᐱᒡ᙮ ᐛᔅ ᒋᐛᐎᒋᐃᑯᐛᐅᒡ ᒋᑕᑈᑎᒧᐅᓄᐛᒡ᙮ ᐊᐅᒄ ᐅᔭ ᐅᑦ ᐊᑐᔅᒐᐅᓄᐛᐤ᙮ ᐛᔅ ᒋᑭ ᓂᑐᐛᔨᑕᑯᓱᐅᒡ ᒐᒋ ᐎᑎᒧᐛᒡ ᒋᓴᒪᓂᑐᐛ ᑕᓐ ᑲ ᐃᑐᐛᒄ᙮ ᒋᑭ ᒥᔽᔨᑎᒧᒡ ᒪᒃ ᒐᒋ ᐃᑐᑕᒡ ᐅᔭ ᐅᑦ ᐊᑐᔅᒐᐅᓄᐛᐤ ᒧᔭᒻ ᒋᔨᐛᐤ ᓂᓇᐃᑐᐛᒂᐛ ᑭᔭ ᒋᔅᑕᔨᑎᒧᐛᒂ ᑕᓐ ᑲ ᐃᓯ ᒥᔭᑭᓄᐎᒡ ᒐᒋ ᓂᑲᓂᔅᑲᑕᑯᒡ᙮ ᐊᑲ ᒪᒃ ᐅ ᑎᔭᒂ ᒋᑭ ᒥᒐᔨᑎᒧᒡ ᑭᔭ ᓇᒪ ᒋᑭ ᒋ ᒥᔪ ᐎᒋᐃᑯᐛᐅᒡ᙮

¹⁸ ᒋ ᐱᑯᓴᔨᒥᑎᓇᓐ ᒐᒋ ᐸᒋ ᐊᔭᒥᐊᔅᑎᒧᐅᔭᒡ᙮ ᒧᔅ ᓂ ᐎ ᐃᑐᑎᒺᓇᓐ ᐊᓂᔭ ᐊ ᐃᑕᔨᑎᒥᐃᑯᑦ ᒋᓴᒪᓂᑐᐤ ᐊ ᑯᐃᔅᑯᓇᑯᓂᔨᒡ᙮ ᐛᔅ ᐊᑯᑕ ᒐ ᐅᒋ ᒋᔅᒐᔨᑎᒪᒡ ᐊᑲ ᒐᒂᓐ ᑎᒂᒡ ᒐᒋ ᒥᒐᔨᑎᒥᐃᑯᔭᒡ᙮

¹⁹ ᒋ ᓂᑐᑎᒪᑎᓇᐛᐤ ᒐᒋ ᐸᒋ ᐊᔭᒥᐊᔅᑎᒧᐅᔭᒄ ᑭᔭ ᒥᓐ ᐎᐱᒡ ᒐᒋ ᓂᑐᐛᐱᒥᑎᑯᒡ᙮

ᐊᔭᒥᐊᔅᑎᒪᒐᐅᓐ

²⁰ ᐊᑯ ᒪᒃ ᓂᑦ ᐊᔭᒥᐊᐤ ᒋᓴᒪᓂᑐᐤ, ᐊᓐ ᑲ ᐃᑐᑕᑕᒄ ᒐᒋ ᐊᔭᐛᒄ ᒋᔭᒪᔨᑎᒧᐅᓂᔪᐤ᙮ ᐎᔾ ᒋ ᐅᓂᔅᑲᓇᐤ ᐊᓂᔭᔪᐛ ᒪᔭᑕᓂᓯᐅ-ᐃᔪᐛ ᑲ ᒋᔅᑕᔨᑕᑯᓯᔨᒋ ᓂᐳᐅᓂᒡ ᐅᒡ, ᐊᐅᒄ ᐅᔭ ᒋᓴᓴ᙮ ᒋ ᐃᑐᑐᐛᐤ ᒐᒋ ᒥᔪ ᑭᓄᐛᔨᒪᔨᒋ ᐅᑦ ᐃᔨᒥᔪᐛ ᒧᔭᒻ ᐊ ᐃᑎᔨᒋ ᒪᔭᑕᓂᓯᐅ-ᐃᔪᐛ ᐊ ᒥᔪ ᑭᓄᐛᔨᒪᔨᒋ ᒪᔭᑕᓂᓴ᙮ ᒋᓴᒪᓂᑐᐤ ᒋ ᐃᑐᑎᒻ ᒐᒋ ᐊᐱᑎᓂᔨᒡ ᐊᓂᔭ ᑲ ᐅᔅᑲᔨᒡ ᓂᔅᑯᒧᐅᓂᔪᐤ ᑲᒋᒡ ᒐ ᑎᑯᓂᔨᒡ ᒋᓴᔅ ᐅᒥᐧᑯᒡ ᐅᒡ᙮

²¹ ᒥᔅᑎ ᔅᒋ ᐃᑐᑎᒪᑯᐛᐤ ᒋᓴᒪᓂᑐᐤ ᒋᓴᓴ ᐅᒋ ᑭᔭ ᓂᑐᑎᒪᒄ ᒐᒋ ᒥᔨᑕᒄ ᒥᓯᐛ ᐊᓂᔭ ᑲ ᒥᔽᔨᒋ ᒐᒂᔪᐛ ᐊ ᐃᓯ ᓂᑐᐛᔨᑎᒪᒄ ᒐᒋ ᐃᑐᑎᒺᒄ ᐅᑦ ᐃᑕᔨᑎᒧᐅᓐ᙮ ᓂᑦ ᐊᔭᒥᐊᐤ ᑭᔭ ᒐᒋ ᐊᑐᔅᒐᑦ ᐊᓐᑕ ᒋᐱᒪᑎᓯᐅᓄᐛᒡ ᑭᔭ ᒐᒋ ᓂᓇᐊᔨᑎᒥᐃᑯᑦ ᐊᓂᔭ ᐊ ᐃᑕᑎᓯᐛᒄ᙮ ᒧᔅ ᒪᒃ ᒪᒥᒋᒪᑕᐤ ᒋᓴᔅ ᙭ ᑲᒋᒡ ᑭᔭ ᑲᒋᒡ᙮ ᐊᒥᓐ᙮

ᒪᔅᑕᔾ ᐊ ᐃᓯ ᐎᑕᒂᒡ

²² ᓂᐧᑲᓂᓯᑐᒄ, ᒋ ᒥᓯᓇᐊᒪᑎᓇᐛᐤ ᐅ᙮ ᓇᒪ ᒥᒄ ᓇᔅᒡ ᒋᓏᐤ᙮ ᔅᒋ ᒥᓯᓇᐊᒪᑎᓇᐛᐤ ᒐᒋ ᒥᔽᔨᒧᐃᑎᑯᒡ ᑕᑈᑎᒧᐅᓂᒡ ᐃᔅ᙮ ᐊᑯ ᒪᒃ ᒋ ᓯᒋᒥᑎᓇᐛᐤ ᓱᒃ ᒐᒋ ᓂᓇᐃᑎᒪᒄ ᑕᓐ ᑲ ᐃᑎᑎᑯᒡ᙮

²³ ᒂᔄᓐ ᔅᒋ ᐸᑕᓇᐛᐛᒐ ᒋᐧᑲᓂᓯᓄᐤ ᑎᒧᑎ ᓴᔅ ᐊᒋ ᐎᐎᑦ ᑲᒪᑯᓄᐛᓯᐅᒋᐛᐱᒡ ᐅᒡ᙮ ᐎᐱᒡ ᑎᑯᓯᒐ ᐅᑕ ᐊ ᑕᐅᒡ ᐊᑯ ᒐ ᐸᓱᐅᒃ ᐊᓐᑕ ᐊ ᑕᔭᒄ ᐃᔅᐱ ᓂᑐᐛᐱᒥᑎᑯᒐ᙮

²⁴ ᐛᒋᔭᒪᐧᑯᒡ ᐊᓐᒡ ᑲ ᓂᑲᓂᔅᑲᑕᑯᒡ ᑭᔭ ᒥᓯᐛ ᐊᓐᒡ ᑲ ᑕᑈᑕᒡ ᐊᓐᑕ ᐊ ᑕᔭᒄ ᐊ ᑕᒡ᙮ ᐊᓐᒡ ᑲ ᑕᑈᑕᒡ ᐊᓐᑕ ᐃᑕᓕ ᐊᔅᒋᒡ ᐊ ᑕᒡ ᑭᔭ ᐎᔨᐛᐤ ᒋ ᐛᒋᔭᒥᑯᐛᐅᒡ᙮

²⁵ ᓂᑦ ᐊᔭᒥᐊᓇᓐ ᒋᓴᒪᓂᑐᐤ ᒥᓯᐛ ᒐᒋ ᒥᔪᑐᑕᑕᒄ᙮ ᐊᒥᓐ᙮