ᐃᑉᕈᐛ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑕᓐ ᑲ ᐃᓯ ᐸᒋ ᐃᔨᒥᐃᑕᐧᒃ ᒋᓴᒪᓂᑐᐤ ᐅᑯᓴ ᐅᒋ Hebrews 1.1-4; 2.5-12 (Proper-22 Year B)

¹ ᐊᓐᑕ ᐛᔅᑭᒡ ᒋᓴᒪᓂᑐᐤ ᒥᒐᑥᐤ ᒋ ᐃᔨᒪᐊᐤ ᐊᓂᔭᐧᑲ ᐊᓂᔅᒐ ᒍᑕᐎᓄᐛ᙮ ᒋ ᐊᐱᒋᐊᐤ ᐊᓂᔭ ᐅᒋᔅᒋᐛᐃᒐᓱᐛ ᓂᓇᐧᑯᐤ ᒐᒋ ᐃᓯ ᐎᑎᒥᔨᒋ ᑕᓐ ᑲ ᐸᒋ ᐃᔅᒋᔄᑦ᙮

² ᐊᓄᒡ ᒪᒃ, ᐅᔭ ᒪᔅᑕᔾ ᐊ ᒋᓯᑲᔨᒋ ᐅᑯᓴ ᐅᒋ ᐊᑯᑕ ᐛᒋ ᐃᔨᒥᐃᑕᐧᒄ᙮ ᐊᐅᒄ ᐅᔭ ᐅᑯᓴ ᒋᓴᒪᓂᑐᐤ ᑲ ᐊᐱᒋᐊᑦ ᒥᓯᐛ ᒐᒂᔪᐤ ᑲ ᐅᓯᑕᑦ ᑭᔭ ᐊᐅᒄ ᐅᔭ ᑲ ᐅᑎᓇᑦ ᒥᓯᐛ ᒐᒂᔪᐤ ᒐ ᐃᓯ ᒥᔭᑦ᙮

³ ᐊᓐ ᐅᑯᓯᓯᒪᐤ ᐊ ᑕᑦ ᐊᑯᑕ ᐛᒋ ᒋᔅᒐᔨᑕᑯᓂᔨᒡ ᒋᓴᒪᓂᑐᐤ ᐅᒋᔅᑕᔨᑕᑯᓱᐅᓐ, ᑭᔭ ᐅᑯᓯᓯᒪᐤ ᓇᔅᒡ ᓂᔅᐱᑐᐛᐤ ᑕᓐ ᐊ ᐃᑕᔨᑕᑯᓯᔨᒋ᙮ ᐎᔾ ᐅᑯᓯᓯᒪᐤ ᐅᒋᒪᐧᑲᑎᒻ ᐊᔅᒋᔪᐤ ᑭᔭ ᒥᓯᐛ ᒐᒂᔪᐤ ᐃᔅᐱᒥᒡ ᐊ ᑎᑯᓂᔨᒡ᙮ ᐅᑦ ᐃᔨᒧᐅᓐ ᑲ ᓱᒐᔨᑕᑯᓂᔨᒡ ᐅᒋ ᐅᒋᒪᐧᑲᑎᒻ ᒥᓯᐛ ᐅᔭ᙮ ᒋ ᐱᔅᑕᔨᒥᑎᓱᐤ ᒐᒋ ᓂᐸᐊᑭᓄᐅᑦ ᒐᒋ ᐅᒋ ᐸᔭᒋᐊᑭᓄᔨᒋ ᐊᐛᔪᐛ ᐊ ᐛᐸᔨᑎᒧᐛᑭᓄᔨᒋ ᐅᒥᒋᑥᐅᓂᔪᐛ᙮ ᐃᔅᐱ ᑲ ᒋᔅᑕᑦ ᐅᔭ ᑲ ᐃᓯ ᐱᔅᑕᔨᒥᑎᓱᑦ ᐊᑯ ᒂ ᐅᑎᓇᑭᓄᐅᑦ ᐊᓐᑕ ᐅᒥᔪᓂᔨᒡ ᒋᓴᒪᓂᑐᐛ ᐊ ᑕᔨᒋ ᐊᓂᔭ ᒪᐅᒡ ᐊ ᐃᔅᐸᔨᑕᑯᓯᔨᒋ ᒋᒋᒋᓯᑯᒡ᙮

ᒋᓴᒪᓂᑐᐤ ᐅᑯᓴ ᐊᑐᐎᔅ ᒋᔅᑕᔨᑕᑯᓯᔪᐛ ᐃᔅᐱᔅ ᐎ ᐊᓐᒋᓇ

⁴ ᐊᐅᒄ ᒪᒃ ᐊᓂᔭ ᐛᒋ ᐎᔾ ᐊᑐᐎᔅ ᒋᔅᑕᔨᑕᑯᓯᑦ ᐅᑯᓯᓯᒪᐤ ᐃᔅᐱᔅ ᐎ ᐊᓐᒋᓇ᙮ ᒋᓴᒪᓂᑐᐛ ᒋ ᒥᔨᑯᐤ ᐅᔭ ᒐᒋ ᐃᔅᐱᔅ ᒋᔅᑕᔨᑕᑯᓯᑦ᙮ ᐊᓂᔭ ᒪᒃ ᐊ ᐃᓯᓂᐧᑲᑕᑭᓄᐅᑦ ᒋᓴᒪᓂᑐᐤ ᐅᑯᓴ ᐊᑯᑕ ᐛᒋ ᓄᑯᓂᔨᒡ ᑕᑈ ᐎᔾ ᐊᑐᐎᔅ ᐊ ᒋᔅᑕᔨᑕᑯᓯᑦ ᐃᔅᐱᔅ ᐎ ᐊᓐᒋᓇ᙮

⁵ ᒋᓴᒪᓂᑐᐤ ᓇᒪ ᓂᑕ ᐅᒋ ᐃᑕᐤ ᐊᓐᒋᓇ ᐊ ᐃᔨᒪᐊᑦ, “ᒋᔾ ᓂᑯᔅ, ᐊᓄᒡ ᐅ ᑲ ᒋᓯᑲᒡ ᓂᔾ ᒍᑕᐎᑐᑕᐅᓐ᙮” ᑭᔭ ᓇᒪ ᓂᑕ ᐅᒋ ᐃᑕᐤ ᐊᓐᒋᓇ ᐊ ᐊᔨᒧᒪᑦ, “ᓂᔾ ᓂᑭ ᐅᑕᐎᑐᑕᒄ ᑭᔭ ᐎᔾ ᒐ ᐅᑯᓯᔭᓐ᙮”

⁶ ᐃᔅᐱ ᑲ ᐸᒋ ᐃᑎᓴᐛᑦ ᒋᓴᒪᓂᑐᐤ ᐅᓂᔅᑎᒧᓴᓇ ᐅᑕ ᐊᔅᒋᒡ, ᒋ ᐃᔅᒋᔄᐤ, “ᒥᓯᐛ ᒋᓴᒪᓂᑐᐛ ᐅᑦ ᐊᓐᒋᓂᒥᔪᐛ ᒋᑭ ᐊᔭᒥᐊᔅᑕᑯᐤ᙮”

⁷ ᒋᓴᒪᓂᑐᐤ ᑲ ᐊᔨᒧᒪᑦ ᐊᓐᒋᓇ, ᒋ ᐃᔅᒋᔄᐤ, “ᓂ ᐃᑐᑐᐛᐅᒡ ᓂᑦ ᐊᐱᒋᐊᑭᓐᒡ ᐊᓐᒋᓐᒡ ᒧᔭᒻ ᐊ ᔪᑎᒡ ᑭᔭ ᒧᔭᒻ ᐃᔅᑯᑕᒡ ᒐᒋ ᐃᑕᔨᑕᑯᓯᒡ᙮”

⁸ ᐅᑯᓯᓯᒪᐛ ᒪᒃ ᐊ ᐊᔨᒧᒪᑦ ᒋ ᐃᔅᒋᔄᐤ, “ᒋᔾ ᒋᓴᒪᓂᑐᐤ, ᒋᐅᒋᒪᐅᓐ ᑲᒋᒡ ᒋᑭ ᑎᑯᓐ, ᑯᐃᔅᒄ ᒋᑦ ᐃᑎᓐ ᐊ ᐅᒋᒪᐎᔨᓐ ᐊᓐᑕ ᒋᐅᒋᒪᐅᓂᒡ᙮

⁹ ᔅᒋ ᓴᒋᑕᓐ ᑯᐃᔅᑯᑕᑎᓯᐅᓐ ᐊᑯ ᒥᒐᑎᓯᐅᓐ ᔅᒋ ᐛᐧᑲᑕᓐ᙮ ᐊᐅᒄ ᒪᒃ ᐛᒋ ᐎᔭᐱᒥᑕᓐ ᓂᔾ ᒋᒋᓴᒪᓂᑐᒻ, ᑭᔭ ᑲ ᒋᔅᑕᔨᑕᑯᐃᑕᓐ ᐊ ᑐᒥᔅᑯᓂᑕᓐ ᒐᒋ ᐃᔭᔨᓐ ᒧᒋᒐᔨᑎᒧᐅᓐ᙮ ᒋᔾ ᒪᐅᒡ ᒋ ᒋᔅᑕᔨᑕᑯᐃᑎᓐ ᐃᔅᐱᔅ ᐎ ᒋᐎᒐᐛᑭᓂᒡ᙮”

¹⁰ ᒋᓴᒪᓂᑐᐤ ᑭᔭ ᒥᓐ ᒋ ᐃᑕᐤ ᐅᑯᓴ, “ᒋᔾ, ᐅᑎᐸᔨᒋᒐᐤ, ᑲ ᐅᓯᑕᔨᓐ ᐊᔅᒋᔾ ᐊᓐᑕ ᐸᒋ ᐛᔅᑭᒡ, ᔅᒋ ᐅᓯᑕᓐ ᐊᔅᒋᔾ ᐊᔅᒄ ᐊᑲ ᐛᐛᒡ ᐅᒋ ᑎᒂᒡ ᒐᒂᓐ ᑭᔭ ᒋᔾ ᒋᑎᒋᒡ ᔅᒋ ᐅᒋ ᐅᓯᑕᓐ ᒋᒋᒋᓯᒄ᙮

¹¹ ᐅᔭ ᒪᒃ ᑲ ᐃᓯ ᐅᓯᑕᔨᓐ ᐊᔅᒄ ᐸᐃᒂᐤ ᐊ ᒋᓯᑲᒡ ᒋᑭ ᐃᔎᐱᔪᐛ ᒥᒄ ᒪᒃ ᒋᔾ ᑲᒋᒡ ᒋᑭ ᑕᓐ᙮ ᒋᒋᒋᓯᒄ ᑭᔭ ᐊᔅᒋᔾ ᒋᑭ ᐊᑎ ᐛᔅᑲᒍᐅᓇ ᒧᔭᒻ ᐊᐱᒋᑕᐅᓐ ᐊ ᒪᔅᑕᔅᑲᑭᓄᐅᒡ᙮

¹² ᐊᔅᒄ ᐸᐃᒂᐤ ᐊ ᒋᓯᑲᒡ ᒋᑭ ᒂᔅᒋᓇᑯᑕᓐ ᒋᒋᒋᓯᒄ ᑭᔭ ᐊᔅᒋᔾ᙮ ᒧᔭᒻ ᐊᑯᐱᔅᒋᔅ ᐊ ᓄᑎᒪᒋᓂᑭᓄᐅᒡ ᐊᐅᑯᓐ ᒐ ᐃᑐᑎᒥᓐ᙮ ᒥᒄ ᒪᒃ ᒋᔾ ᒧᔅ ᐸᐃᑯᓄᒡ ᒋᑭ ᐃᑕᔨᑕᑯᓯᓐ, ᓇᒪ ᓂᑕ ᒋᑭ ᐅᒋ ᐃᔎᐱᔪᐤ ᒋᐱᒪᑎᓯᐅᓐ᙮”

¹³ ᓇᒪ ᒪᒃ ᓂᑕ ᐅᒋ ᐃᑕᐤ ᒋᓴᒪᓂᑐᐤ ᐊᓐᒋᓇ ᑕᓐ ᑲ ᐃᑕᑦ ᐅᑯᓴ᙮ ᒋ ᐃᑕᐤ ᐅᑯᓴ, “ᐊᔅᑎᒻ ᐸᒋ ᐊᐱᔾ ᐅᑕ ᓂᒥᔪᐅᓂᒡ᙮ ᓂᑭ ᓴᐧᑯᒋᐊᐅᒡ ᐊᓐᒡ ᑲ ᐛᐧᑲᑎᔅᒡ᙮ ᓂᑭ ᐃᑐᑐᐛᐅᒡ ᒐᒋ ᐱᔅᑕᔨᒧᑎᓱᔅᑕᔅᒡ᙮”

¹⁴ ᐊᓐᒋᓐᒡ ᒥᒄ ᐊᒐᐧᑯᐎᒡ᙮ ᒋᓴᒪᓂᑐᐛ ᐃᑎᓴᐅᑯᒡ ᒐᒋ ᐛᐎᒋᐊᒡ ᐊᓂᔭ ᒐ ᐱᒪᒋᐊᑭᓄᔨᒋ᙮