ᒐᓂᓯᔅ 9 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᒪᓂᑐᐤ ᑭᔭ ᓄᐛ ᐅᓂᔅᑯᒥᑐᐅᓄᐛᐤ

¹ ᒋᓴᒪᓂᑐᐤ ᒋ ᓱᐛᔨᑕᑯᐛᐤ ᑭᔭ ᒋ ᐃᑕᐤ ᓄᐛᔨᒋ ᑭᔭ ᐅᑯᓯᔪᐛ, “ᓇᑐᐛᔨᑕᓐ ᒥᓯᐛ ᒐᒂᓐ ᒐᒋ ᐃᓯ ᒥᔪᐱᔨᔭᒄ᙮ ᒐ ᒥᒐᑥᐊᑯᒡ ᒋᑦ ᐊᐛᓯᒧᐛᐅᒡ ᑭᔭ ᒍᓯᒧᐛᐅᒡ, ᐊᑯ ᒐᒋ ᒥᒐᑎᒡ ᐃᔪᒡ ᐅᑕ ᐊᔅᒋᒡ᙮

² ᒥᓯᐛ ᐊᐛᓯᓯᒡ, ᐱᔭᓱᐅᒡ, ᒥᓐᑐᓯᒡ, ᑭᔭ ᓂᒪᓯᒡ ᒋᑭ ᑯᔅᑎᑯᐛᐅᒡ᙮ ᒋ ᐱᔅᑎᓂᒪᑎᓇᐛᐤ ᒐᒋ ᑎᐸᔨᒪᑯᒡ,

³ ᑭᔭ ᒋ ᒥᔨᑎᓇᐛᐤ ᐅᒡ ᒐ ᐅᒥᒋᒥᔭᒄ᙮ ᒋᑭ ᒋ ᒧᐛᐛᐅᒡ ᐅᒡ, ᒧᔭᒻ ᑲ ᐃᓯ ᒥᔨᑎᑯᒡ ᑲ ᓯᐸᑯᐅᒋ ᓂᐱᔭ᙮

⁴ ᒥᒄ ᑕᐸ ᒋᑭ ᒋ ᒥᒍᐛᓇᐛᐤ ᐎᔭᔅ ᐊᐛᓯᔅ ᐊᔅᒄ ᐊᑲ ᓯᑯᓂᒺᒄ ᐅᒥᐧᒄ, ᐛᔅ ᐊᐅᑯᔪᐤ ᐊᓂᔭ ᐅᑦ ᐃᔪᐎᓐ᙮

⁵ ᓂᒋ ᐃᓯᓇᒂᐅᒡ ᐃᔪᒡ ᒧᔭᒻ ᓂᔾ ᐊᓯᓇᑯᓯᔭᓐ, ᑭᔭ ᓂᑭ ᐊᓏᔨᒪᐤ ᓂᑐᐎᔾ ᐊᐛᓯᔅ ᑭᔭ ᒪᒃ ᐃᔪᐤ ᐅᑎᓇᒐ ᐃᔪᐅᓂᔪᐤ᙮ ᒥᓱᐤ ᐊᐛᓯᔅ ᓂᐸᐊᒐ ᐊᐛᔪᐛ, ᐊᐛᓯᔅ ᒋᑭ ᓂᐸᐊᑭᓄᐤ,

⁶ ᑭᔭ ᒥᓱᐤ ᐊᐛᓐ ᐅᑎᓂᒺᒐ ᑯᑎᑲ ᐊᐛᔪᐛ ᐅᑦ ᐃᔪᐅᓂᔪᐤ, ᐊᓐ ᐊᐛᓐ ᒋᑭ ᐱᔅᑎᓇᑭᓄᐤ ᓂᐳᐅᓂᒡ; ᐛᔅ ᒋ ᐃᑐᑐᐛᐤ ᒋᓴᒪᓂᑐᐤ ᐊᐛᔪᐛ ᒐ ᓂᔅᐱᑕᑯᑦ᙮

⁷ ᒋ ᓂᑐᐛᔨᒥᑎᓇᐛᐤ ᒋᔾ ᑭᔭ ᒋᑐᑕᒥᒡ ᒐᒋ ᒥᒐᑐᓴᔭᒃ, ᐊᑯ ᒐ ᑕᒡ ᐃᔪᒡ ᒥᓯᐛ ᐅᑕ ᐊᔅᒋᒡ᙮”

Genesis 9.8-17 (Lent-1 Year B)

⁸ ᒥᓐ, ᒋᓴᒪᓂᑐᐤ ᐃᑕᐤ ᓄᐛᔨᒋ ᑭᔭ ᐅᑯᓯᔪᐛ,

⁹ “ᓂᑭ ᑐᑕᓐ ᐊᓱᑎᒪᒐᐅᓐ ᒋᔨᐛᐤ ᐅᒡ, ᑭᔭ ᒥᓯᐛ ᐊᐛᓐ ᒐ ᐱᒪᑎᓯᑦ,

¹⁰ ᒋᒡ ᐱᔭᓱᐅᒡ ᑭᔭ ᐊᐛᓯᓯᒡ ᐅᐤᑎᒡ ᑲ ᐅᒋ ᐎᐎᒡ᙮

¹¹ ᓂᑦ ᐊᓱᑎᒪᒐᓐ ᒥᓯᐛ ᐱᒪᑎᓯᐤ ᐊᐛᓯᔅ ᑭᔭ ᐊᓐᒡ ᐊᑕᒡ ᐅᑕ ᐊᔅᒋᒡ ᒐ ᐊᑲ ᒥᓐ ᐃᔅᒋᐸᒡ ᒐᒋ ᓂᓱᐅᓇᑎᒡ᙮”

¹² ᒥᓐ, ᒋᓴᒪᓂᑐᐤ ᐃᑕᐤ, “ᓂ ᐱᔅᑎᓇᓐ ᐎᐧᑯᐱᓴᑭᓐ ᐊᓐᑕ ᒋᓯᑯᒡ ᒐᒋ ᐛᐸᑎᔨᑎᑯᒡ ᑭᔭ ᒥᓯᐛ ᐱᒪᑎᓯᐤ ᐊᐛᓯᓯᒡ,

¹³ ᒐᒋ ᒋᔅᒋᔭᒄ ᓇᓂᑎᒻ ᒐ ᑭᓄᐛᔨᑎᒪᓐ ᐅ ᐊᓱᑎᒪᒐᐅᓐ ᐊ ᐃᑐᑎᒪᓐ᙮

¹⁴ ᐃᑎᓴᐅᒂᐛ ᑭᔅᑯᐅᓐᒡ ᐃᔅᐱᒥᒡ ᐊᔅᒋᒡ, ᑭᔭ ᐎᐧᑯᐱᓴᑭᓐ ᓄᒂᒐ ᒋᓯᑯᒡ,

¹⁵ ᓂᑭ ᒋᔅᒋᑕᓐ ᐊᓱᑎᒪᒐᐅᓐ ᑲ ᐃᑐᑎᒪᑎᑯᒡ ᑭᔭ ᒥᓯᐛ ᑯᑎᑭᒡ ᐱᒪᑎᓯᐤ ᐊᐛᓯᓯᒡ᙮ ᓇᒪ ᓂᑕ ᒥᓐ ᒋᑭ ᒋ ᐃᔅᒋᐸᐤ ᒐᒋ ᓂᓱᐅᓇᑎᒡ ᐱᒪᑎᓯᐅᓐ᙮

¹⁶ ᐛᐸᑎᒪᓇ ᐎᐧᑯᐱᓴᑭᓐ ᒋᓯᑯᒡ, ᓂᑭ ᒋᔅᒋᑕᓐ ᓇᓂᑎᒻ ᒐ ᑎᑯᓂᔨᒡ ᐊᓱᑎᒪᒐᐅᓂᔪᐤ ᒥᓯᐛ ᑲ ᐃᑐᑎᒧᐅᒂᐤ ᑲ ᐱᒪᑎᓯᒡ ᐃᔪᒡ᙮”

¹⁷ ᒥᓐ, ᒋᓴᒪᓂᑐᐤ ᐃᑕᐤ ᓄᐛᔨᒋ, “ᐎᐧᑯᐱᓴᑭᓐ ᒋᑭ ᒋᔅᒋᓄᐛᓯᓇᑯᓐ ᐊᓐ ᓂᑦ ᐊᓱᑎᒪᒐᐅᓐ᙮”

ᓄᐛ ᑭᔭ ᐅᑯᓴ

¹⁸ ᓄᐛ ᐊ ᓂᔅᑎᔨᒋ ᐅᑯᓴ ᐅᐤᑎᒡ ᑲ ᐅᒋ ᐎᐎᔨᒋ ᓴᒻ, ᐊᒻ ᑭᔭ ᒐᐸᑦ ᐃᓯᓂᐧᑲᓱᔪᐛ᙮ ᐊᒻ ᓇᓇᒐ ᒋ ᐅᑯᓱᐤ ᑲᐃᓇᓐ ᒋ ᐃᓯᓂᐧᑲᑕᑭᓄᐅᔪᐛ᙮

¹⁹ ᐅᔭ ᐊ ᓂᔅᑎᔨᒋ ᓄᐛ ᐅᑯᓴ ᐊᑯᑕ ᑲ ᐅᒋᐱᔨᒡ ᒥᓯᐛ ᐃᔪᒡ ᐅᑕ ᐊᔅᒋᒡ᙮

²⁰ ᓄᐛ ᒂ ᐃᑕᐱᑎᓯᑦ ᐊ ᓂᑕᐅᒋᑕᑦ ᒥᒋᒥᔪᐤ ᑭᔭ ᐎᔾ ᓂᔅᑎᒻ ᒋ ᓂᑕᐅᒋᑕᐤ ᓱᒥᓇᑎᑯ ᓂᑕᐅᒋᑕᑭᓂᔪᐤ᙮

²¹ ᐸᐃᒂᐤ ᒋ ᒥᔪᑯᓱᐤ ᐅᓴᒻ ᐊᒋ ᒥᔅᑎᒥᓂᑦ ᑲ ᒥᒂᑭᒥᔨᒡ ᑭᔭ ᑲ ᐱᒥᓯᐧᒃ ᐊ ᒧᓴᔅᑭᑕᑦ ᐊᓐᑕ ᐅᐱᒍᐎᔭᓂᒋᐛᐱᒡ᙮

²² ᐊᒻ, ᑲᐃᓇᓐ ᐅᑕᐎᔭ, ᒂ ᐱᒐᑦ ᐱᒍᐎᔭᓂᒋᐛᐱᒡ, ᐎᔭᐱᒪᑦ ᐊ ᒧᓴᔅᑭᑕᔨᒋ, ᒂ ᐎᑎᒧᐛᑦ ᐎᐧᑲᓂᓴ᙮

²³ ᓴᒻ ᑭᔭ ᒐᐸᑦ ᒂ ᐅᑎᓇᒡ ᐊᑯᐱᔪᐤ ᐅᑎᑎᒥᓄᐛᒡ ᐊᔅᑕᒡ ᑭᔭ ᒂᓴᑕᒡ ᐊ ᐱᒐᒡ ᐱᒍᐎᔭᓂᒋᐛᐱᒡ᙮ ᐊᑯ ᐊᑯᓇᐛᒡ ᐅᑕᐎᐛᐛ ᐊᑲ ᒋᑕᐱᒪᒡ᙮

²⁴ ᑲᒋ ᐅᓂᑦ ᓄᐛ ᑭᔭ ᑲ ᒋᔅᒐᔨᑕᐧᒃ ᐊᐛᓯᐎᔨᒋ ᐅᑯᓴ ᐊᒻ ᑲ ᐃᑐᑎᒥᔨᒋ,

²⁵ ᒂ ᐃᔅᒋᔄᑦ, “ᓂᑦ ᐊᓏᔨᒪᐤ ᑲᐃᓇᓐ ! ᐅᔅᑕᓴ ᐅᑯᐸᓇᒥᔪᐛ ᒋᑭ ᐅᑯᐸᓇᒥᑕᑯᐤ᙮”

²⁶ ᑭᔭ ᒂ ᐃᔅᒋᔄᑦ, “ᒪᒃ ᓂᑐᐛᔨᑎᒧᐛᐤ ᑎᐸᔨᒋᒐᓱᐤ, ᓂᒋᓴᒪᓂᑐᒻ, ᒐᒋ ᓱᐛᔨᒪᑦ ᓴᒪ ᑭᔭ ᒐᒋ ᐃᑐᑐᐛᑦ ᑲᐃᓇᓇ ᒐᒋ ᑯᐸᓇᐎᔨᒋ᙮

²⁷ ᑭᒪ ᒥᓐ ᑎᐸᔨᒋᒐᓱᐤ ᒥᔭᑦ ᒐᐸᑕ ᐊᔅᒋᔪᐤ; ᑭᔭ ᐃᑐᑐᐛᑦ ᒐᒋ ᐅᑎᓂᒺᑦ ᓴᒪ ᐅᑎᐸᔨᑎᒧᐅᓂᔪᐤ, ᑭᔭ ᑲᐃᓇᓇ ᒐ ᐅᑯᐸᓇᒥᔨᒋ᙮”

²⁸ ᓄᐛ ᓂᔅᑐ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᔪᐤ ᐱᐳᓇ ᒋ ᐃᔅᐱᔅ ᐱᒪᑎᓯᐤ ᑲᒋ ᐃᔅᒋᐸᔨᒡ,

²⁹ ᑭᔭ ᐸᐃᑯᔅᑕᐤ ᑕᑐᐤ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᔪᐤ ᒋ ᐃᑕᑐᐳᓇᓱᐤ ᑲ ᐳᓂᐱᒪᑎᓯᑦ᙮