ᒐᓂᓯᔅ 8 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᐳᓂ ᐃᔅᒋᐸᒡ

¹ ᒋᓴᒪᓂᑐᐤ ᒋ ᒋᔅᒋᓯᑐᐛᐤ ᓄᐛᔨᒋ ᑭᔭ ᒥᓯᐛ ᐊᐛᓯᓴ ᐊᓐᑕ ᑲ ᑕᔨᒋ ᐅᐤᑎᒡ᙮ ᐊᑯ ᒋᓴᒪᓂᑐᐤ ᒂ ᐃᑐᑕᐧᒃ ᒐᒋ ᔪᑎᓂᔨᒡ, ᑭᔭ ᒋ ᐊᒍᐸᐱᔪᐤ᙮

² ᒋᓴᒪᓂᑐᐤ ᒋ ᒋᐸᐊᒻ ᐅᑕᐃᐸᓇ ᑕᒥᔅᑭᒥᑲᒡ ᐊᓐᑕ ᑲ ᐅᒋᐱᔨᒡ ᓂᐱᔪᐤ᙮ ᐃᔭᐱᒡ ᒋ ᐅᓯᐊᐤ ᒋᒋᒋᓯᑯᔭᓇ ᑲ ᑕᑐᐱᔨᒋ ᑭᔭ ᒂ ᒋᒺᑕᑎᓂᔨᒡ᙮

³ ᒪᑎᐧᑲᒡ ᒋ ᐊᒍᐸᐱᔪᐤ ᓂᐱᔾ ᐃᔅᐱᔅ ᐸᐃᑯ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᔪᐛ ᒋᓯᑲᐛ᙮

⁴ ᐊᑯ ᐊᕋᕋᑦ ᐱᔅᑯᑎᓇᒡ ᒋ ᓂᑲᑎᓐ ᐅᐤᑦ ᑲᒋ ᓂᔄᐅᑕᒡ ᑕᑐᓴᑉ ᒋᓯᑲᒡ ᐊᓐ ᓂᔄᐅᑕᒡ ᐱᓯᒻ ᐸᐃᑯᑕᐤ ᐱᐳᓐ᙮

⁵ ᐊᔅᒄ ᒋ ᐊᒍᐸᐱᔪᐤ ᓂᐱᔾ, ᑲᒋ ᓂᔅᑐᐱᓯᒺᔭᒡ ᑕᐧᑯᒡ ᐱᔅᑯᑎᓇᐛ ᒋ ᓄᑯᓇ᙮

⁶ ᑲᒋ ᓇᐎᔪᐛ ᒋᓯᑲᔨᒡ, ᓄᐛ ᒋ ᔪᑕᓂᒻ ᐛᒋ ᓴᒋᐛᐱᓇᓄᐎᒡ ᑲ ᐅᓯᑕᑦ ᐅᐤᑎᒡ᙮

⁷ ᐊᑯ ᒂ ᐃᑎᓴᐛᑦ ᑲᐧᑲᒍᐛ, ᒥᒄ ᒋ ᐱᐸᒥᔭᔪᐛ ᐸᑐᔅ ᑲᒋ ᐸᒂᔅᑭᒥᑲᔨᒡ᙮

⁸ ᓄᐛ ᒋ ᐎ ᓂᑐ ᒋᔅᒐᔨᑎᒻ ᑲᒋ ᒍᐱᔨᒂ ᓂᐱᔪᐤ, ᐊᑯ ᒂ ᐃᑎᓴᐛᑦ ᐛᐱᓯᐤ ᐱᔭᓯᓴ᙮

⁹ ᒥᒄ ᐛᐱᓯᐤ ᐱᔭᓯᔅ ᓇᒪ ᐅᒋ ᒥᔅᑭᒻ ᒐ ᑥᐅᑦ, ᐊᑯ ᑲᐤ ᒋ ᒋᐛᐱᔪᐤ ᐊᓐᑕ ᐅᐤᑎᒡ᙮ ᐊᔅᒄ ᒋ ᑎᑯᓂᔪᐤ ᓂᐱᔪᐤ ᐃᔅᐱᒥᒡ ᐊᔅᒋᒡ᙮ ᐊᑯ ᒂ ᓱᐅᓂᔅᒐᔨᑦ ᓄᐛ ᑭᔭ ᒂ ᐱᑎᑲᐊᑦ ᐊᓐᑕ ᐅᐤᑎᒡ᙮

¹⁰ ᓂᔄᐅᑕᒡ ᑕᑐᐤ ᒋᓯᑲᐛ ᒋ ᐊᓯᓄᐛᐸᑎᒻ, ᒥᓐ ᒂ ᐃᑎᓴᐛᑦ ᐛᐱᓯᐤ ᐱᔭᓯᓴ᙮

¹¹ ᐛᑕᑯᓯᔨᒡ ᒋ ᒋᐛᐱᔪᐛ ᐛᐱᓯᐤ ᐱᔭᓯᓴ, ᐊ ᑕᐧᑯᑕᑎᒥᔨᒋ ᓯᐸᑯᓂᐱᔪᐤ ᒥᔅᑎᑯᒡ ᐛᑎᓂᒥᔨᒋ᙮ ᓄᐛ ᒋᔅᒐᔨᑎᒻ ᐊᒍᐱᔨᒡ ᓂᐱᔪᐤ᙮

¹² ᓂᔄᐅᑕᒡ ᑕᑐᐤ ᒋᓯᑲᐛ ᒥᓐ ᒋ ᐊᓯᓄᐛᐸᑎᒻ ᑭᔭ ᒋ ᐃᑎᓴᐛᐤ ᐛᐱᓯᐤ ᐱᔭᓯᓴ᙮ ᒥᒄ ᑲᐤ ᓇᒪ ᐅᒋ ᐸᐱᔪᐛ᙮

¹³ ᐊᓱᑕᒡ ᑕᑐᐤ ᒥᑕᓯᒥᑎᓄᐤ ᐊᓱ ᐸᐃᒄ ᒋ ᐃᑕᑐᐳᓇᓱᐤ ᓄᐛ, ᑭᔭ ᓂᔅᑎᒻ ᒋᓯᑯᔪᐤ ᐊᓂᔭ ᑯᑎᒃ ᐱᐳᓂᔪᐤ, ᑲ ᐊᒍᐱᔨᒡ ᓂᐱᔪᐤ᙮ ᓄᐛ ᒋ ᔪᑕᓇᐤ ᔅᑐᐧᑭᓇ ᐅᐤᑎᒡ ᒐᒋ ᐃᑕᐱᑦ ᑭᔭ ᒋ ᐛᐸᑎᒻ ᒐᑲᑦ ᐱᔭᐧᑯᔅᑭᒥᑲᔨᒡ᙮

Genesis 6.9-22; 7.24; 8.14-19 (Proper-4 Year A)

¹⁴ ᐊᓂᔭ ᓂᓱ ᐱᓯᒺ, ᓂᓱᔪᐤ ᐊᓱ ᓂᔄᐅᑕᒡ ᒋᓯᑯᔪᐤ, ᓄᑎᒻ ᒋ ᐸᒂᔪᐤ ᐊᔅᒋᔪᐤ᙮

¹⁵ ᐊᑯ ᒋᓴᒪᓂᑐᐤ ᐊᑕᑦ ᓄᐛᔨᒋ,

¹⁶ “ᒋᔾ, ᑭᔭ ᒋᐅ, ᑭᔭ ᒋᑯᓯᒡ ᑭᔭ ᒋᓇᐊᑭᓂᔎᒥᒡ ᐎᐎᒄ ᐊᓐᑕ ᐅᐤᑎᒡ᙮

¹⁷ ᐎᐎᑕᐃᐧᑯᒡ ᐱᔭᓱᐅᒡ, ᐊᐛᓯᓯᒡ ᑭᔭ ᒥᓐᑐᓯᒡ, ᐊᑯ ᒐᒋ ᐅᑦ ᐊᐛᓯᒥᒡ ᑭᔭ ᒐᒋ ᒥᒐᑎᒡ ᐅᑕ ᒥᓯᐛ ᐊᔅᒋᒡ᙮”

¹⁸ ᐊᑯ ᓄᐛ ᐛᔪᐎᑦ ᐅᐤᑎᒡ ᐊ ᐎᒐᐅᑯᑦ ᐅᑯᓴ ᑭᔭ ᐎᐛ ᑭᔭ ᐅᓇᐊᑭᓂᔎᒪ᙮

¹⁹ ᒥᓯᐛ ᐊᐛᓯᓯᒡ, ᒥᓯᐛ ᐱᔭᓱᐅᒡ ᑭᔭ ᒥᓯᐛ ᒥᓐᑐᓯᒡ, ᒋ ᐎᐎᐅᒡ ᐅᐤᑎᒡ ᑭᔭ ᒋ ᔅᑐᑕᐅᒡ ᐊᑎ ᐱᐸᐃᑯᑕᐅᓯᒡ᙮

ᓄᐛ ᐅᒥᑐᔅᑕᐊᒪᒐᐅᓇ

²⁰ ᒋ ᐃᑐᑎᒧᐛᐤ ᓄᐛ ᐅᑎᐸᔨᒋᒐᐛ ᐱᔅᑎᓂᒐᐅᓇᐱᔅᑯᔪᐤ ᑭᔭ ᒂ ᓂᐸᐊᑦ ᐊᓐᑕ ᐱᔅᒐ ᐊ ᒥᔪᓯᔨᒋ ᐊᐛᓯᓴ ᑭᔭ ᐱᔭᓱᐛ ᑭᔭ ᒋ ᒥᑐᔅᑕᐊᒪᒐᐤ ᐱᔅᑎᓂᒐᐅᓇᐱᔅᑯᒡ ᐊ ᓂᑐᑎᒪᑦ᙮

²¹ ᒋ ᓇᐊᔨᑎᒥᐃᑯᐤ ᑎᐸᔨᒋᒐᓱᐤ ᐊ ᒥᔪᒪᑯᓂᔨᒡ ᒥᑐᔅᑕᐊᒪᒐᐅᓂᔪᐤ, ᑭᔭ ᑎᐸᔨᒋᒐᓱᐤ ᒂ ᐃᔅᒋᔄᑦ, “ᓇᒪ ᓂᑕ ᒥᓐ ᓂᑭ ᐊᓏᔨᑕᓐ ᐊᔅᒋᔾ ᒥᒋᑐᑎᒧᐅᓂᔪᐤ ᐊ ᐃᑐᑕᐧᒃ ᐃᔪᐤ᙮ ᒥᓯᐛ ᐎᔨᐛᐤ ᒋ ᐅᒋ ᒥᒋᒪᒥᑐᓇᔨᑎᒧᒡ ᑲ ᐸᒋ ᐅᔅᑎᓂᒋᐅᒡ, ᒥᒄ ᓇᒪ ᓂᑕ ᓂᑭ ᓂᓱᐅᓇᒋᑕᓐ ᒥᓯᐛ ᒐᒂᓐ ᑲ ᐱᒪᑎᓯᒥᑲᒡ ᒧᔭᒻ ᑲ ᐃᓯ ᐃᑐᑎᒪᓐ᙮

²² ᒐ ᐃᔅᐱᔅ ᑎᒂᒡ ᐊᔅᒋᔾ, ᓇᒪ ᓂᑕ ᒋᑭ ᐃᔎᐱᔪᐛ ᐊ ᒥᔪᔅᑭᒥᒡ ᑭᔭ ᐊ ᒪᒧᓴᒋᓂᑭᓄᐅᒡ ᑲ ᓂᑕᐅᒋᒡ ᒥᒋᒻ, ᐊ ᑕᐧᑲᒡ ᑭᔭ ᐊ ᒋᓯᑕᒡ, ᐊ ᐱᐳᒡ ᑭᔭ ᐊ ᓂᐱᒡ, ᐊ ᒋᓯᑲᒡ ᑭᔭ ᐊ ᑎᐱᔅᑲᒡ᙮”