ᒐᓂᓯᔅ 7 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᐃᔅᒋᐸᒡ

¹ ᐊᑯ ᑎᐸᔨᒋᒐᓱᐤ ᐊᑕᑦ ᓄᐛᔨᒋ, “ᐳᓯᒃ ᒋᔾ ᑭᔭ ᐊ ᐸᐃᑯᔅᑲᓇᓯᔨᓐ ᐊᓐᑕ ᐅᐤᑎᒡ, ᒋᔾ ᒥᒄ ᒋ ᐸᐃᑯᓯᓐ ᐊ ᑯᐃᔅᑯᑕᑎᓯᓐ ᐅᑕ ᐊᔅᒋᒡ᙮

² ᒐ ᐅᑎᓂᑥᐤ ᓇᓂᔄᐅᑕᒡ ᑕᑐᐎᒡ ᒥᓯᐛ ᐊ ᐃᓯᓇᑯᓯᒡ ᐊᐛᓯᓯᒡ, ᒐᒋ ᒧᐛᑭᓄᐅᒡ ᑭᔭ ᒐᒋ ᒥᑐᔅᑕᐊᒪᒐᓄᐅᒡ ᑭᔭ ᓇᓂᓱ ᐊᓐᒡ ᑯᑎᑭᒡ, ᐸᐃᒄ ᓇᐸ ᐊᐛᓯᔅ ᑭᔭ ᐸᐃᒄ ᓄᓴ ᐊᐛᓯᔅ,

³ ᑭᔭ ᒐ ᐅᑎᓂᑥᐤ ᓇᓂᔄᐅᑕᒡ ᑕᑐᐎᒡ ᒥᓯᐛ ᐊ ᐃᓯᓇᑯᓯᒡ ᐱᔭᓱᐅᒡ, ᐱᔅᒐ ᓇᐸᔭᓱᐅᒡ ᑭᔭ ᐃᔎᔭᓱᐅᒡ᙮ ᒐ ᐃᑐᑎᒥᓐ ᐅ ᒐᒋ ᓇᓂᑎᒻ ᐃᑕᒡ ᐊᐛᓯᓯᒡ ᑭᔭ ᐱᔭᓱᐅᒡ ᐊᔅᒋᒡ᙮

⁴ ᒋ ᓂᔄᐅᑕᒡ ᑕᑐᐤ ᒋᓯᑲᒐ ᓂᑭ ᐃᑎᓴᐊᓐ ᐊ ᒋᒺᒡ ᐃᔅᐱᔅ ᓇᐅᐎᔪᐛ ᒋᓯᑲᐛ ᑭᔭ ᓇᐅᐎᔪᐛ ᑎᐱᔅᑲᐛ, ᑭᔭ ᓂᑭ ᓂᓱᐅᓇᒋᑕᓐ ᒥᓯᐛ ᐊ ᐱᒪᑎᓯᒥᑲᒡ ᒐᒂᓐ ᐅᑕ ᐊᔅᒋᒡ᙮”

⁵ ᑭᔭ ᓄᐛ ᒋ ᐃᑐᑎᒺᐤ ᒥᓯᐛ ᒐᒂᔪᐤ ᑲ ᐃᑎᑯᑦ ᒐ ᐃᑐᑕᐧᒃ᙮

⁶ ᓄᐛ ᐊᓱᑕᒡ ᑕᑐᐤ ᒥᑕᓯᒥᑎᓄᐤ ᒋ ᐃᑕᑐᐳᓇᓱᐤ ᑲ ᒋᒋᐱᔨᒡ ᐊ ᐃᔅᒋᐸᔨᒡ᙮

⁷ ᓄᐛ, ᐎᐛ, ᐅᑯᓴ, ᑭᔭ ᐅᓇᐊᑭᓂᔎᒪ ᒥᓯᐛ ᒋ ᐎᒋᐳᓯᒥᑯᐤ ᐅᐤᑎᒡ, ᒐᒋ ᒋᑎᓯᑕᒡ ᐊ ᐃᔅᒋᐸᔨᒡ᙮

⁸ ᒥᓯᐛ ᑕᑐᐎᒡ ᐊ ᐃᓯᓇᑯᓯᔨᒋ ᐊᐛᓯᓴ ᐊ ᒥᔪᓯᔨᒋ ᒐᒋ ᒧᐛᑭᓄᔨᒋ ᑭᔭ ᐊ ᒥᑐᔅᑕᐊᒪᒐᐅᓄᔨᒋ ᑭᔭ ᐊᑲ ᒥᔪᓯᔨᒋ ᒐᒋ ᒧᐛᑭᓄᔨᒋ ᑭᔭ ᐱᔭᓱᐅᒡ ᑭᔭ ᒥᓐᑐᓯᒡ,

⁹ ᒥᓯᐛ ᐊᐛᓯᓯᒡ ᒋ ᓇᑕᐅᒡ ᓄᐛᔨᒋ ᑭᔭ ᒂ ᐳᓯᒡ ᐅᐤᑎᔪᐤ ᐊ ᓇᓂᓱᑕᒡ ᒧᔭᒻ ᒋᓴᒪᓂᑐᐤ ᑲ ᐃᑎᓱᒪᑦ ᓄᐛᔨᒋ᙮

¹⁰ ᑲᒋ ᓂᔄᐅᑕᒡ ᑕᑐᐤ ᒋᓯᑲᒡ ᒂ ᐸᐱᔨᒡ ᓂᐱᔾ ᒐᒋ ᐃᔅᒋᐸᒡ ᐊᔅᒋᔾ᙮

¹¹ ᓄᐛ ᒋ ᐊᓱᑕᒡ ᑕᑐᐤ ᒥᑕᓯᒥᑎᓄᐛᐳᓇᓱᐤ ᐊᓱ ᓂᓱᐱᓯᒺ ᐊᓱ ᓂᔄᐅᑕᒡ ᑕᑐᓴᑉ ᒋᓯᑲᐛ, ᒥᓯᐛ ᐅᑕᐃᐸᓇ ᑕᒥᔅᑭᒥᑲᒡ ᑲ ᔪᑕᐱᔨᒋ, ᒋᓯᑯᔭᓐ ᒋ ᑕᑐᐱᔪᐤ,

¹² ᑭᔭ ᒂ ᒋᒋᐱᔨᒡ ᐊ ᒋᒺᒡ ᐃᔅᐱᔅ ᓇᐎᔪᐛ ᒋᓯᑲᐛ ᑭᔭ ᓇᐎᔪᐛ ᑎᐱᔅᑲᐛ᙮

¹³ ᐊᓂᔭ ᒋᓯᑯᔪᐤ, ᓄᐛ ᑭᔭ ᐎᐛ ᒋ ᐳᓱᐅᒡ ᐅᐤᑎᔪᐤ ᒋᒡ ᐊ ᓂᔅᑎᔨᒋ ᐅᑯᓱᐛᐛ ᓴᒻ, ᐊᒻ ᑭᔭ ᒐᐸᑦ, ᑭᔭ ᐎᐛᐛ᙮

¹⁴ ᒥᓯᐛ ᑕᑐᐤ ᐊ ᐃᓯᓇᑯᓯᔨᒋ ᐊᐛᓯᓴ, ᐊ ᒪᒥᓯᑎᔨᒋ ᑭᔭ ᐊᔭᐱᓯᓯᔨᒋ, ᐊ ᑭᓄᐛᔨᒪᑭᓄᐅᒡ ᐊᐛᓯᓯᒡ ᑭᔭ ᒥᓇᔎᒡ ᑲ ᑕᑦ, ᒋᒡ ᐱᔭᓱᐛ ᒋ ᐅᑎᓇᐅᒡ᙮

¹⁵ ᓄᐛ ᒋ ᐅᑎᓇᐤ ᐸᐃᑯ ᓇᐸ ᐊᐛᓯᓴ ᑭᔭ ᓄᓴ ᐊᐛᓯᓴ ᒥᓯᐛ ᑕᑐᐤ ᐊ ᐃᓯᓇᑯᓯᔨᒋ,

¹⁶ ᒧᔭᒻ ᑲ ᐃᑎᓱᒥᑯᑦ ᒋᓴᒪᓂᑐᐛ ᒐ ᐃᑐᑕᐧᒃ᙮ ᑲᒋ ᒥᓯᐛ ᐳᓯᒡ ᐅᐤᑎᔪᐤ, ᒋᓴᒪᓂᑐᐤ ᒋ ᒋᐸᐛᐤ ᔅᑐᐧᑭᓇ᙮

¹⁷ ᓇᐎᔪᐛ ᒋᓯᑲᐛ ᒋ ᐃᔅᐱᔅ ᒥᔅᑎ ᒋᒧᓐ ᐊᑲ ᓂᑕ ᒋᒺᑕᒡ᙮ ᒐᒃ ᒋ ᑎᒥᐤ ᑭᔭ ᒋ ᐅᐸᐸᐛᐤ ᐅᐤᑦ᙮

¹⁸ ᒋᒋᐛ ᒋ ᒥᓯᐸᔭᐤ ᑭᔭ ᒋ ᒋᔅᑲᑎᒥᐤ, ᒋ ᐱᐸᒪᐊᓐ ᐅᐤᑦ ᐃᔅᐱᒥᒡ ᐊᔅᒋᒡ᙮

¹⁹ ᐊᔭᔅᒃ ᒋ ᒥᓯᐸᔭᐤ ᓂᐱᔾ ᑭᔭ ᐱᔅᑯᑎᓇᐛ ᓯᐸ ᒋᓯᑯᒡ ᓇᒪ ᐅᒋ ᓄᑯᓇ᙮

²⁰ ᐅᔅᑕ ᓂᓱᔪᐤ ᐊᓱ ᐱᑕᑕᒡ ᑕᑐᐤ ᒥᓯᑦ ᒋ ᐃᔅᐱᓯᐸᔭᐤ ᓂᐱᔾ ᑕᐧᑯᒡ ᐊ ᐃᔅᐱᑎᓇᒡ᙮

²¹ ᒥᓯᐛ ᑲ ᐱᒪᑎᓯᒥᑲᒡ ᒐᒂᓐ ᐊᔅᒋᒡ ᒋ ᓂᓱᐅᓇᑕᓐ, ᐱᔭᓱᐤ ᑭᔭ ᐊᐛᓯᔅ ᑲ ᑭᓄᐛᔨᒪᑭᓄᐅᑦ ᑭᔭ ᒥᓇᔎᒡ ᑲ ᑕᑦ ᐊᐛᓯᔅ ᑭᔭ ᒥᓯᐛ ᐃᔪᐤ᙮

²² ᒥᓯᐛ ᑲ ᐊᔭᑦ ᐱᒪᑎᓯᐤ ᔭᔭᐅᓂᔪᐤ ᑭᔭ ᑲ ᐎᒋᑦ ᐸᒂᔅᑭᒥᑲᒡ ᒋ ᓂᐱᒥᑭᓐ᙮

²³ ᒋᓴᒪᓂᑐᐤ ᒋ ᓂᓱᐅᓇᒋᑕᐤ ᒥᓯᐛ ᑲ ᐱᒪᑎᓯᒥᑭᓂᔨᒡ ᒐᒂᔪᐤ ᐊᓐᑕ ᐊᔅᒋᒡ, ᐃᔪᐛ ᑭᔭ ᐊᐛᓯᓴ, ᑭᔭ ᐊ ᔭᔭᒋᒥᑭᓂᔨᒡ ᒐᒂᔪᐤ ᒧᔅᑎᔅᑭᒥᒡ, ᑭᔭ ᐱᔭᓱᐛ ᐃᔅᐱᒥᒡ, ᒥᓯᐛ ᒋ ᓂᓱᐅᓇᒋᐊᑭᓄᐎᒡ ᐅᑕ ᐊᔅᒋᒡ᙮ ᒥᒄ ᓄᐛ ᒋ ᑕᐤ ᑭᔭ ᐊᓐᒡ ᑲ ᑕᒡ ᐊᓐᑕ ᑲ ᒥᓴᔨᒡ ᐅᐤᑎᔪᐤ᙮

Genesis 6.9-22; 7.24; 8.14-19 (Proper-4 Year A)

²⁴ ᑭᔭ ᐸᐃᑯ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᔪᐛ ᒋᓯᑲᐛ ᒋ ᐃᔅᐱᔅ ᑎᑯᓐ ᓂᐱᔾ ᐊᑲ ᓄᒂᒡ ᐊᔅᒋᔾ᙮