ᒐᓂᓯᔅ 5 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᑕᒻ ᐅᑦ ᐊᓂᔅᑯᑕᐸᓇ

¹ ᐊᐅᑯᐤ ᐊ ᐃᓯ ᑎᐸᒋᒪᑭᓄᐅᑦ ᐊᑕᒻ ᐅᑦ ᐊᓂᔅᑯᑕᐸᓇ, ᓇᐸᐤ ᒧᔭᒻ ᒋᓴᒪᓂᑐᐛ ᑲ ᐃᓯᓇᑯᔅᑦ ᐅᔅᑭᒡ ᑲ ᐅᓯᐊᑭᓄᐅᑦ᙮

² ᒋᓴᒪᓂᑐᐤ ᒋ ᐅᓯᐊᐤ ᓇᐸᐛ ᑭᔭ ᐃᔎᐛ ᑭᔭ ᒋ ᒥᔭᐤ ᐅᓱᐛᔨᒋᒐᐅᓐ, ᑭᔭ ᐃᔪᐤ ᒋ ᐃᓯᓂᐧᑲᑕᐤ ᐅᔅᑭᒡ ᑲ ᐅᓯᐊᑦ᙮

³ ᐊᑕᒻ ᐸᐃᑯ ᒥᑕᓯᒥᑎᓄᐤ ᐊᓱ ᓂᔅᑐᔪᐤ ᒋ ᐃᑕᑐᐳᓇᓱᐤ ᑲ ᐃᔪᔨᒋ ᐅᑯᓴ ᓴᑦ, ᒧᔭᒻ ᐊᓯᓇᑯᓯᔨᒋ ᐅᑕᐎᔭ ᓴᑦ ᒋ ᐃᓯᓇᑯᓱᐤ᙮

⁴ ᐊᑕᒻ ᒥᓐ ᔭᓇᐤ ᑕᑐᐤ ᒥᑕᓯᒥᑎᓄᐤ ᐱᐳᓇ ᒋ ᐃᔅᐱᔅ ᐱᒪᑎᓯᐤ, ᒋ ᑕᔪᐛ ᑯᑎᑲ ᐅᑯᓴ ᑭᔭ ᐅᑕᓂᓴ,

⁵ ᑭᔭ ᐸᐃᑯᔅᑕᐤ ᑕᑐᐤ ᒥᑕᓯᒥᑎᓄᐤ ᐊᓱ ᓂᔅᑐᔪᐤ ᑲ ᐃᑕᑐᐳᓇᓯᑦ ᒋ ᐳᓂᐱᒪᑎᓯᐤ᙮

⁶ ᓴᑦ ᐸᐃᑯ ᒥᑕᓯᒥᑎᓄᐤ ᐊᓱ ᐱᑕᑕᒡ ᒋ ᐃᑕᑐᐳᓇᓱᐤ ᑲ ᐃᔪᔨᒋ ᐅᑯᓴ ᐃᓄᔅ᙮

⁷ ᔭᓇᐤ ᑕᑐᐤ ᒥᑕᓯᒥᑎᓄᐤ ᐊᓱ ᓂᔄᐅᑕᒡ ᑕᑐᐤ ᐱᐳᓇ ᒥᓐ ᒋ ᐃᔅᐱᔅ ᐱᒪᑎᓯᐤ, ᒋ ᑕᔪᐛ ᑯᑎᑲ ᐅᑯᓴ ᑭᔭ ᐅᑕᓂᓴ,

⁸ ᑭᔭ ᐸᐃᑯᔅᑕᐤ ᑕᑐᐤ ᒥᑕᓯᒥᑎᓄᐤ ᐊᓱ ᓂᓱᓴᑉ ᑲ ᐃᑕᑐᐳᓇᓯᑦ ᒋ ᐳᓂᐱᒪᑎᓯᐤ᙮

⁹ ᐃᓄᔅ ᐸᐃᑯᔅᑕᐤ ᑕᑐᔪᐤ ᒋ ᐃᑕᑐᐳᓇᓱᐤ ᑲ ᐃᔪᔨᒋ ᐅᑯᓴ ᑭᓇᓐ,

¹⁰ ᔭᓇᐤ ᑕᑐᐤ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᓴᑉ ᑕᑐᐤ ᐱᐳᓇ ᒥᓐ ᒋ ᐃᔅᐱᔅ ᐱᒪᑎᓯᐤ, ᒋ ᑕᔪᐛ ᑯᑎᑲ ᐅᑯᓴ ᑭᔭ ᐅᑕᓂᓴ,

¹¹ ᑭᔭ ᐸᐃᑯᔅᑕᐤ ᑕᑐᐤ ᒥᑕᓯᒥᑎᓄᐤ ᐊᓱ ᐱᑕᑕᒡ ᑲ ᐃᑕᑐᐳᓇᓯᑦ ᒋ ᐳᓂᐱᒪᑎᓯᐤ᙮

¹² ᑭᓇᓐ ᓂᔄᐅᑕᒡ ᑕᑐᔪᐤ ᒋ ᐃᑕᑐᐳᓇᓱᐤ ᑲ ᐃᔪᔨᒋ ᐅᑯᓴ ᒪᐊᓚᓕᓪ,

¹³ ᔭᓇᐤ ᑕᑐᐤ ᒥᑕᓯᒥᑎᓄᐤ ᐊᓱ ᓇᐎᔪᐤ ᑕᑐᐤ ᐱᐳᓇ ᒥᓐ ᒋ ᐃᔅᐱᔅ ᐱᒪᑎᓯᐤ, ᒋ ᑕᔪᐛ ᑯᑎᑲ ᐅᑯᓴ ᑭᔭ ᐅᑕᓂᓴ,

¹⁴ ᑭᔭ ᐸᐃᑯᔅᑕᐤ ᑕᑐᐤ ᒥᑕᓯᒥᑎᓄᐤ ᐊᓱ ᐸᐃᑯᔪᐤ ᑲ ᐃᑕᑐᐳᓇᓯᑦ ᒋ ᐳᓂᐱᒪᑎᓯᐤ᙮

¹⁵ ᒪᐊᓚᓕᓪ ᐊᓱᑕᒡ ᑕᑐᔪᐤ ᐊᓱ ᐱᑕᑕᒡ ᒋ ᐃᑕᑐᐳᓇᓱᐤ ᑲ ᐃᔪᔨᒋ ᐅᑯᓴ ᒐᕋᑦ,

¹⁶ ᔭᓇᐤ ᑕᑐᐤ ᒥᑕᓯᒥᑎᓄᐤ ᐊᓱ ᓂᔅᑐᔪᐤ ᑕᑐᐤ ᐱᐳᓇ ᒥᓐ ᒋ ᐃᔅᐱᔅ ᐱᒪᑎᓯᐤ, ᒋ ᑕᔪᐛ ᑯᑎᑲ ᐅᑯᓴ ᑭᔭ ᐅᑕᓂᓴ,

¹⁷ ᑭᔭ ᔭᓇᐤ ᑕᑐᐤ ᒥᑕᓯᒥᑎᓄᐤ ᐊᓱ ᐸᐃᑯᔅᑕᐤ ᑕᑐᔪᐤ ᐊᓱ ᐱᑕᑕᒡ ᑲ ᐃᑕᑐᐳᓇᓯᑦ ᒋ ᐳᓂᐱᒪᑎᓯᐤ᙮

¹⁸ ᒐᕋᑦ ᐸᐃᑯ ᒥᑕᓯᒥᑎᓄᐤ ᐊᓱ ᐊᓱᑕᒡ ᑕᑐᔪᐤ ᐊᓱ ᓂᓱ ᒋ ᐃᑕᑐᐳᓇᓱᐤ ᑲ ᐃᔪᔨᒋ ᐅᑯᓴ ᐃᓄᒃ,

¹⁹ ᔭᓇᐤ ᑕᑐᐤ ᒥᑕᓯᒥᑎᓄᐤ ᑕᑐᐤ ᐱᐳᓇ ᒥᓐ ᒋ ᐃᔅᐱᔅ ᐱᒪᑎᓯᐤ, ᒋ ᑕᔪᐛ ᑯᑎᑲ ᐅᑯᓴ ᑭᔭ ᐅᑕᓂᓴ,

²⁰ ᑭᔭ ᐸᐃᑯᔅᑕᐤ ᑕᑐᐤ ᒥᑕᓯᒥᑎᓄᐤ ᐊᓱ ᐊᓱᑕᒡ ᑕᑐᔪᐤ ᐊᓱ ᓂᓱ ᑲ ᐃᑕᑐᐳᓇᓯᑦ ᒋ ᐳᓂᐱᒪᑎᓯᐤ᙮

²¹ ᐃᓄᒃ ᐊᓱᑕᒡ ᑕᑐᔪᐤ ᐊᓱ ᐱᑕᑕᒡ ᒋ ᐃᑕᑐᐳᓇᓱᐤ ᑲ ᐃᔪᔨᒋ ᐅᑯᓴ ᒪᑐᓴᓚ,

²² ᑲᒋ ᐃᔪᔨᒋ ᐅᑯᓴ ᐃᓄᒃ, ᓂᔅᑐ ᒥᑕᓯᒥᑎᓄᐤ ᑕᑐᐤ ᐱᐳᓇ ᒋ ᐎᒐᐛᐤ ᒋᓴᒪᓂᑐᐛ, ᑭᔭ ᒋ ᑕᔪᐛ ᑯᑎᑲ ᐅᑯᓴ ᑭᔭ ᐅᑕᓂᓴ,

²³ ᐊᑯ ᓂᔅᑐ ᒥᑕᓯᒥᑎᓄᐤ ᐊᓱ ᐊᓱᑕᒡ ᑕᑐᔪᐤ ᐊᓱ ᐱᑕᑕᒡ ᑕᑐᐤ ᐱᐳᓇ ᒥᓐ ᒋ ᐃᔅᐱᔅ ᐱᒪᑎᓯᐤ,

²⁴ ᓇᓂᑎᒻ ᐊ ᒥᔪᐎᒐᐛᑦ ᒋᓴᒪᓂᑐᐛ ᐃᓄᒃ, ᐊᑯ ᓇᒪ ᐅᒋ ᓄᑯᓱᐤ, ᐛᔅ ᒋᓴᒪᓂᑐᐛ ᐊᒋ ᐅᑎᓂᑯᑦ᙮

²⁵ ᒪᑐᓴᓚ ᐸᐃᑯ ᒥᑕᓯᒥᑎᓄᐤ ᐊᓱ ᔭᓇᐤ ᑕᑐᔪᐤ ᐊᓱ ᓂᔄᐅᑕᒡ ᒋ ᐃᑕᑐᐳᓇᓱᐤ ᑲ ᐃᔪᔨᒋ ᐅᑯᓴ ᓚᒪᒃ,

²⁶ ᓂᔄᐅᑕᑕᑐᐤ ᒥᑕᓯᒥᑎᓄᐤ ᐊᓱ ᔭᓇᐤ ᑕᑐᔪᐤ ᐊᓱ ᓂᓱ ᑕᑐᐤ ᐱᐳᓇ ᒥᓐ ᒋ ᐃᔅᐱᔅ ᐱᒪᑎᓯᐤ, ᒋ ᑕᔪᐛ ᑯᑎᑲ ᐅᑯᓴ ᑭᔭ ᐅᑕᓂᓴ,

²⁷ ᑭᔭ ᐸᐃᑯᔅᑕᐤ ᑕᑐᐤ ᒥᑕᓯᒥᑎᓄᐤ ᐊᓱ ᐊᓱᑕᒡ ᑕᑐᔪᐤ ᐊᓱ ᐸᐃᑯᔅᑕᐤ ᑲ ᐃᑕᑐᐳᓇᓯᑦ ᒋ ᐳᓂᐱᒪᑎᓯᐤ᙮

²⁸ ᓚᒪᒃ ᐸᐃᑯ ᒥᑕᓯᒥᑎᓄᐤ ᐊᓱ ᔭᓇᐤ ᑕᑐᔪᐤ ᐊᓱ ᓂᓱ ᒋ ᐃᑕᑐᐳᓇᓱᐤ ᑲ ᐃᔪᔨᒋ ᐅᑯᓴ ᓄᐛᔨᒋ,

²⁹ ᓄᐛ ᒋ ᐃᓯᓂᐧᑲᑕᐤ ᐅᑯᓴ ᓚᒪᒃ, (ᐊᔽᓯᐅᓐ ᐊ ᐃᑥᒥᑲᒡ) ᐛᔅ ᒋ ᐃᔅᒋᔄᐤ, “ᐎᔾ ᒋᑭ ᒥᔨᑯᓄᐤ ᒐᒋ ᐊᔽᓯᐛᐧᒄ ᐊ ᐅᔅᑯᐎᔭᐧᒄ ᐊ ᐎ ᓂᑕᐅᒋᑕᔭᐧᒄ ᒋᒥᒋᒥᓄᐤ ᐊᓐᑕ ᒧᔅᑎᔅᑭᒥᒡ ᒋᓴᒪᓂᑐᐤ ᑲ ᐊᓏᔨᑕᐧᒃ᙮”

³⁰ ᓚᒪᒃ ᐱᑕᑕᒡ ᑕᑐᐤ ᒥᑕᓯᒥᑎᓄᐤ ᐊᓱ ᐸᐃᑯᔅᑕᐤ ᑕᑐᔪᐤ ᐊᓱ ᐱᑕᑕᒡ ᑕᑐᐤ ᐱᐳᓇ ᒥᓐ ᒋ ᐃᔅᐱᔅ ᐱᒪᑎᓯᐤ, ᒋ ᑕᔪᐛ ᑯᑎᑲ ᐅᑯᓴ ᑭᔭ ᐅᑕᓂᓴ,

³¹ ᑭᔭ ᓂᔄᐅᑕᑕᑐᐤ ᒥᑕᓯᒥᑎᓄᐤ ᐊᓱ ᓂᔄᐅᑕᒡ ᑕᑐᔪᐤ ᐊᓱ ᓂᔄᐅᑕᒡ ᑲ ᐃᑕᑐᐳᓇᓯᑦ ᒋ ᐳᓂᐱᒪᑎᓯᐤ᙮

³² ᓄᐛ ᐱᑕᑕᒡ ᑕᑐᐤ ᒥᑕᓯᒥᑎᓄᐤ ᒋ ᐃᑕᑐᐳᓇᓱᐤ ᑭᔭ ᒋ ᓂᔅᑎᔨᐛ ᐅᑯᓴ, ᓴᒻ, ᐊᒻ, ᑭᔭ ᒐᐸᑦ᙮