ᒐᓂᓯᔅ 48 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒍᓯᑉ ᒧᐱᔅᑐᐛᐤ ᒐᑭᐸ

¹ ᓇᓇᒐ, ᐃᔅᐱ ᒍᓯᑉ ᑲ ᐃᑕᑦ ᐊᓐᑕ ᒥᔅᑎᐅᑕᓇᒡ, ᒋ ᐎᑎᒧᐛᑭᓄᐤ ᐃᔭᐧᑯᓯᔨᒋ ᐅᑕᐎᔭ ᐊᓐᑕ ᑯᓯᓐ ᑲ ᑕᔨᒋ, ᐊᑯ ᒍᓯᑉ ᓇᑐᐛᐱᒪᑦ ᐅᑕᐎᔭ, ᐊ ᓂᓯᔨᒋ ᐅᑯᓴ, ᒪᓇᓴᔨᒋ ᑭᔭ ᐃᑉᕋᐃᒪ ᒋ ᐎᒐᐛᐤ᙮

² ᐃᔅᐱ ᐛᑎᒧᐛᑭᓄᐅᑦ ᒐᑭᑉ ᓂᔭᒋᐛᐱᒥᑯᑦ ᐅᑯᓴ ᒍᓯᐸ, ᒋᒋᐛ ᒋ ᐅᔅᑯᐎᐤ ᒥᒄ ᒐᒋ ᓴᒥᑎᐱᑦ ᐅᓂᐸᐅᓂᒡ᙮

³ ᒋ ᐛᒋᔭᒪᐤ ᒐᑭᑉ ᒍᓯᐸ ᑭᔭ ᒂ ᐃᑕᑦ, “ᓂᒋ ᓄᑯᓯᔅᑕᒄ ᒥᓯᐛ ᐊᓯ ᓱᐧᑲᑎᓯᑦ ᒋᓴᒪᓂᑐᐤ ᐊᓐᑕ ᓗᔅ ᑲᐃᓇᓐ ᐊᔅᒋᒡ, ᑭᔭ ᐊᑯᑕ ᑲ ᒥᔨᑦ ᐅᓱᐛᔨᒋᒐᐅᓐ᙮

⁴ ᑭᔭ ᓂᒋ ᐃᑎᒄ, ‘ᒥᒐᑦ ᐊᐛᓯᒡ ᒋᑭ ᒥᔨᑎᓐ, ᐊᑯ ᒪᒃ ᒐ ᒥᒐᑐᔅᑲᓇᓯᒡ ᒋᑦ ᐊᓂᔅᑯᑕᐸᓐᒡ; ᓂᑭ ᒥᔭᐅᒡ ᒋᑦ ᐊᓂᔅᑯᑕᐸᓐᒡ ᐅᔭ ᑲᐃᓇᓐ ᐊᔅᒋᔪᐤ ᒧᔅ ᑲᒋᒡ ᐎᔨᐛᐤ ᒐᒋ ᑎᐱᔨᐛᐅᓯᒡ᙮’

⁵ ᐊᓐᒡ ᓂᓱ ᒋᑯᓯᒡ, ᐃᒋᑉᑎᒡ ᑲ ᐃᔪᐅᒡ ᐊᒺᔭ ᐅᒋ ᑎᑯᓯᓂᔭᓐ ᐅᑕ, ᓂᔾ ᑎᐱᔨᐛ ᓂᑦ ᐊᐛᓯᒥᒡ ᓂᑦ ᐃᓯ ᐅᑎᓇᐅᒡ ᒧᔭᒻ ᓂᑯᓯᒡ ᕈᐱᓐ ᑭᔭ ᓯᒥᐅᓐ᙮

⁶ ᑕᑥᐛ ᑯᑎᑭᒡ ᒋᑯᓯᒡ, ᒋᔾ ᒋᑭ ᑎᐸᔨᒪᐅᒡ, ᒥᒄ ᐊᓂᔅᒐ ᐅᑎᐸᔨᑎᒧᐅᓄᐛᐛ ᐃᑉᕋᐃᒪ ᑭᔭ ᒪᓇᓴᔨᒋ ᒋᑭ ᐅᒋᐱᔪᐛ᙮

⁷ ᒋᑲᐎᔾ ᕋᐃᒍᓪ ᐅ ᐛᒋ ᐃᑐᑎᒪᓐ ᐃᔅᐱ ᐸᑕᓐ ᑲ ᐅᒋ ᒋᐛᔭᓐ, ᑲᐃᓇᓐ ᐊᔅᒋᒡ ᒋ ᐳᓂᐱᒪᑎᓯᐤ᙮ ᒋᒋᐛ ᓂᒋ ᓇᐧᑲᑕᔨᑕᓐ᙮ ᑲ ᐸᓱᐛᐸᑎᒪᒡ ᐃᑉᕋᑦ, ᒥᒋᒪ ᐸᑦᓕᔭᒻ, ᒂ ᐳᓂᐱᒪᑎᓯᑦ᙮ ᐅᐱᒪᔅᑭᓇᒡ ᓂᒋ ᓇᐃᐧᑯᐛᐤ᙮”

⁸ ᒋᒋᐛ ᒋ ᒋᓴᐃᔪᐤ ᒐᑭᑉ ᑭᔭ ᒐᑲᑦ ᓇᒪ ᐅᒋ ᐛᐸᑎᒻ, ᓇᒪ ᐅᒋ ᓂᔅᑐᐛᐱᒪᐤ ᐊ ᓂᓯᔨᒋ ᒍᓯᐸ ᐅᑯᓯᔪᐛ, ᐊᑯ ᑭᔭ ᑲ ᑯᒂᒋᒪᑦ ᒍᓯᐸ, “ᐊᐛᓐᒋ ᐅᒡ ᐊᐛᓯᒡ ?”

⁹ ᐊᑯ ᒍᓯᑉ ᐊᑕᑦ ᐅᑕᐎᔭ, “ᐊᐅᑯᓐᒡ ᐅᒡ ᓂᑯᓯᒡ ᐊᓂᔭ ᑲ ᒥᔨᑦ ᒋᓴᒪᓂᑐᐤ ᐅᑕ ᐃᒋᑉᑎᒡ᙮” ᐊᑯ ᒐᑭᑉ ᐃᑕᐤ, “ᐸᓱᐅᒡ ᐅᑕ ᐊᑯ ᒪᒃ ᒐ ᒥᔨᒂᐤ ᓂᓱᐛᔨᒋᒐᐅᓂᔪᐤ᙮”

¹⁰ ᓇᒪ ᐅᒋ ᓂᔅᑐᐛᐱᒪᐤ ᒐᑭᑉ ᓇᐸᓴ ᐛᔅ ᐊ ᒋᓴᐃᔪᑦ ᑭᔭ ᓇᒪ ᓱᒃ ᐅᒋ ᒥᔪᐛᐸᑎᒻ, ᐊᑯ ᒍᓯᑉ ᑲ ᐃᑐᑐᐛᑦ ᐅᑕᐎᔭ ᐅᑯᓴ, ᐊᑯ ᐎᔭᐛᒋᓇᔨᒋ ᑭᔭ ᓴᐛᔨᒪᔨᒋ᙮

¹¹ ᒐᑭᑉ ᒂ ᐃᑕᑦ ᒍᓯᐸ, “ᓇᒪ ᓂ ᐅᒋ ᐸᓱᐛᔨᑕᓐ ᒥᓐ ᒐᒋ ᐛᐱᒥᑕᓐ, ᑭᔭ ᐊᓄᒡ ᒋᓴᒪᓂᑐᐤ ᓂᒋ ᓇᐃᒥᒄ ᒐᒋ ᐛᐱᒥᑎᑯᒡ ᑕᐱᔅᑯᓐ ᒋᔾ ᑭᔭ ᒋᑦ ᐊᐛᓯᒪᒡ᙮”

¹² ᐊᑯ ᒍᓯᑉ ᑲ ᑐᑐᐛᑦ ᐅᑯᓴ ᒐᒋ ᐱᑲᔨᒋ ᑲ ᑕᐧᑯᓇᑭᓄᔨᒋ ᑭᔭ ᓇᐱᔅᑯᐱᑦ᙮

¹³ ᐊᑯ ᒍᓯᑉ ᒥᓐ ᐊ ᐃᑐᑐᐛᑦ ᐅᑕᐎᔭ ᐅᑯᓴ, ᐅᓂᔅᐸᒋᐅᓂᔨᒡ ᐃᑕᒐ ᐊᑯᑕ ᐊᔭᑦ ᐃᑉᕋᐃᒪ, ᐊᑯ ᒪᓇᓴᔨᒋ ᐅᒥᔪᓂᔨᒡ ᐃᑕᒐ᙮

¹⁴ ᒥᒄ ᐊᒺᔭ ᒐᑭᑉ ᒥᔨᐛᑦ ᐅᓱᐛᔨᒋᒐᐅᓐ, ᒋ ᐱᒥᑎᓂᒻ ᐅᔅᐱᑐᓇ, ᐅᒥᔪᐅᓂᒡ ᐃᑕᒐ ᐛᒋ ᓯᑐᔎᓇᑦ ᐃᑉᕋᐃᒪ, ᐊᑎᓱᐧᒄ ᐊᐛᓯᐎᔨᒋ ᑭᔭ ᐅᓂᔅᐸᒋᐅᓂᒡ ᐃᑕᒐ ᐛᒋ ᓯᑐᔎᓇᑦ ᒪᓇᓴᔨᒋ, ᐊᓂᔭ ᒐᓴᐃᔪᔨᒋ᙮

¹⁵ ᐊᑯ ᒂ ᒥᔭᑦ ᐅᓱᐛᔨᒋᒐᐅᓐ ᒐᑭᐸ ᑭᔭ ᐅᑯᓯᔪᐛ ᐊ ᐃᔅᒋᔄᑦ, “ᐅ ᒋᓴᒪᓂᑐᐤ ᒋᔾ ᐅ ᓂᒧᓱᒻ ᐊᑉᕋᐊᒻ ᑭᔭ ᓄᑕᐎᔾ ᐊᐃᓯᒃ ᑲ ᐊᔭᒥᐊᔅᑐᐛᒡ, ᒋᔾ ᐅ ᒋᓴᒪᓂᑐᐤ ᑲ ᐸᒋ ᒥᔪ ᑭᓄᐛᔨᒥᔨᓐ ᒥᓯᐛ ᑕᑐᐤ ᒋᓯᑲᐛ ᑲ ᐃᔅᐱᔅ ᐱᒪᑎᓯᔭᓐ᙮

¹⁶ ᒋᔾ ᐅ ᐃᔭᐱᒡ ᐊᓐᒋᓐ ᐊᓐ ᑲ ᐱᐧᑯᒋᐃᑦ ᒥᓯᐛ ᐊ ᐃᓯᓇᑯᓂᔨᒡ ᑲ ᒪᔭᑎᓂᔨᒡ ᐅᒡ, ᒋᓴᒪᓂᑐᐤ, ᓱᐛᔨᑕᑯᔨᒡ ᐅᒡ ᑲᓂᓯᒡ ᓇᐸᓯᒡ᙮ ᑭᒪ ᐃᔪᒡ ᒋᔅᒋᑕᒡ ᓂᑦ ᐃᓯᓂᐧᑲᓱᐅᓂᔪᐤ ᑭᔭ ᐅᑦ ᐃᓯᓂᐧᑲᓱᐅᓂᔪᐛ ᓄᑕᐎᔭ ᐊᐃᓯᑲ ᑭᔭ ᓂᒧᓱᒪ ᐊᑉᕋᐊᒪ ᐅᔭ ᓇᐸᓴ ᐅᒡ᙮ ᑭᒪ ᐅᒡ ᓇᐸᓯᒡ ᒥᒐᑎᔨᒋ ᐅᑦ ᐊᓂᔅᑯᑕᐸᓄᐛᐛ᙮”

¹⁷ ᓇᒪ ᐅᒋ ᒥᔽᔨᑎᒻ ᒍᓯᑉ ᐎᔭᐱᒪᑦ ᐅᑕᐎᔭ ᐅᒥᔪᓂᔨᒡ ᐃᑕᒐ ᐊ ᐅᒋ ᓯᑐᔎᓇᔨᒋ ᐃᑉᕋᐃᒪ; ᐊᑯ ᐛᐎᐅᑎᓂᒺᑦ ᐅᑕᐎᔭ ᐅᑎᒋᔪᐤ ᐃᑉᕋᐃᒪ ᐅᔅᑎᒂᓂᔨᒡ ᐅᒡ ᑭᔭ ᒪᓇᓴᔨᒋ ᐅᔅᑎᒂᓂᔨᒡ ᒐᒋ ᐊᔅᑕᐛᑦ᙮

¹⁸ ᐊᑯ ᐊᑕᑦ ᐅᑕᐎᔭ, “ᐊᑲ ᐊᓐᑕ ᐃᓯ ᑐᑕ, ᓄᑕ᙮ ᒋᒥᔪᐅᓂᒡ ᑭᑕᐛ ᐊᐅᑯᓐ ᓂᔅᑎᒧᓴᓐ, ᒋᒥᔪᐅᓂᒡ ᐃᑕᒐ ᐅᒋ ᓯᑐᔎᓐ᙮”

¹⁹ ᒥᒄ ᓇᒪ ᐅᒋ ᐎᔭᒋᐱᑕᔪᐛ ᐅᑕᐎᔭ ᐅᑎᒋᔪᐤ ᐊ ᐃᑎᑯᑦ, “ᓂ ᒋᔅᒐᔨᒪᐤ ᑕᓐ ᐅᔅᑭᒡ ᑲ ᐃᔪᑦ ᒋᑯᔅ, ᓂᑯᓴ᙮ ᒪᓇᓴ, ᐊᓐ ᐅᔅᑭᒡ ᑲ ᐃᔪᑦ, ᒋᑭ ᓱᐧᑲᑎᓯᐤ ᑭᔭ ᐅᑦ ᐊᓂᔅᑯᑕᐸᓇ ᒋᑭ ᒥᒐᑦ ᐃᑎᔅᑲᓇᓯᔨᐛ᙮ ᒥᒄ ᐃᑉᕋᐃᒻ ᐊᑎᑐᐤ ᒋᑭ ᓱᐧᑲᑎᓯᐤ ᐃᔅᐱᔅ ᒪᓇᓴᔨᒋ, ᑭᔭ ᐅᑦ ᐊᓂᔅᑯᑕᐸᓇ ᒋᒋᐛ ᒋᑭ ᒥᒐᑎᔨᐛ ᐊᑯ ᒐ ᒥᒐᑦ ᐃᑎᔅᑲᓇᓯᔨᒋ᙮”

²⁰ ᐊᑯ ᐊᓂᔭ ᒋᓯᑯᔪᐤ, ᒐᑭᑉ ᒂ ᒥᔭᑦ ᐅᓱᐛᔨᒋᒐᐅᓐ ᑭᔭ ᒂ ᐃᔅᒋᔄᑦ, “ᐃᔅᕋᐃᓪ ᐃᔪᒡ ᒋᑭ ᐊᐱᒋᑕᐅᒡ ᒋᑦ ᐃᓯᓂᐧᑲᓱᓄᐛᐛ ᐃᔅᐱ ᐎᑕᑥᐛ ᓱᐛᔨᒋᒐᐅᓂᔪᐤ᙮ ᐊᑯ ᒐ ᐃᔅᒋᔄᒡ, ‘ᑭᒪ ᒋᓴᒪᓂᑐᐤ ᒥᔪᐱᔨᑕᒄ ᒧᔭᒻ ᐃᑉᕋᐃᒪ ᑭᔭ ᒪᓇᓴᔨᒋ᙮’ ” ᐊᑯ ᒐᑭᑉ ᐃᑉᕋᐃᒪ ᓂᔅᑎᒻ ᐊᑎᔭᑦ ᐃᔅᐱᔅ ᒪᓇᓴᔨᒋ᙮

²¹ ᐊᑯ ᒐᑭᑉ ᐊᑕᑦ ᒍᓯᐸ, “ᒋ ᐛᐸᑕᓐ ᒐ ᐊᑲ ᓇᐅᔅ ᓴᔅ ᐱᒪᑎᓯᔭᓐ, ᒥᒄ ᒋᓴᒪᓂᑐᐤ ᒋᑭ ᒥᔪ ᑭᓄᐛᔨᒥᑯᐛᐤ ᑭᔭ ᑲᐤ ᒋᑭ ᐃᓯ ᒋᔅᒋᓄᑕᐃᑯᐛᐤ ᐊᓐᑕ ᐊᔅᒋᔪᐤ ᑲ ᐊᓱᑎᒧᐛᑦ ᒋᑦ ᐊᓂᔅᑯᑕᐸᓄᐛᐛ᙮

²² ᐊᑎᑐᐤ ᒋᑭ ᒥᔨᑎᓐ ᐊᔅᒋᔾ ᐃᔅᐱᔅ ᒋᐧᑲᓂᓯᒡ, ᓴᑭᒻ ᐊ ᒥᔽᒡ ᐊᔅᒋᔾ ᒋᔾ ᒋᑭ ᒥᔨᑎᓐ ᐊᒧᕆ ᐃᔪᒡ ᑲ ᐅᒋ ᒪᑯᓂᒪᓐ ᓂᑦ ᐊᒐᐱᔾ ᑭᔭ ᓂᑭᔅᑯᒡ ᑲ ᐊᐱᒋᐃᒂᐤ᙮”