ᒐᓂᓯᔅ 47 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒐᑭᑉ ᐊᑐᑕᐊᑭᓄᐅᑦ ᒐᒋ ᐛᐱᒪᑦ ᐸᕈᐛ 1 ᑲᒋ ᐃᔨᒪᐊᑦ ᐎᐧᑲᓂᓴ, ᒍᓯᑉ ᑲᐤ ᒋ ᐃᑐᑕᐤ ᒋᓴᐅᒋᒪᐅᒋᐛᐱᒡ ᑭᔭ ᓇᑐᐛᐱᒪᑦ ᒋᓴᐅᒋᒪᐛ ᒐᒋ ᐃᔨᒪᐊᑦ ᑭᔭ ᒂ ᐃᑕᑦ, “ᓄᑕᐎᔾ ᑭᔭ ᓂᐧᑲᓂᓯᒡ ᓴᔅ ᒋ ᑎᑯᓯᓄᐅᒡ ᑲᐃᓇᓐ ᐊᔅᒋᒡ ᐅᒡ ᐊᓯᒡ ᐅᒪᔭᑕᓂᓯᒧᐛᐛ, ᐅᒥᔅᑐᓯᒧᐛᐛ, ᐅᒥᒋᑎᐧᑯᒧᐛᐛ ᑭᔭ ᒥᓯᐛ ᒐᒂᔪᐤ ᑕᐱᔨᐛᐅᓯᒡ, ᑯᓯᓐ ᐊᔅᒋᒡ ᐊᓄᒡ ᑕᐅᒡ᙮” 2 ᒍᓯᑉ ᒂ ᐎᓴᒪᑦ ᐅᑕᐎᔭ ᑭᔭ ᐎᐧᑲᓂᓴ᙮ ᐱᑕᑕᒡ ᐎᐧᑲᓂᓴ ᒋ ᐅᑎᓇᐤ ᒐᒋ ᓂᑐᐛᐱᒪᔨᒋ ᒋᓴᐅᒋᒪᐛ᙮ ᐃᔅᐱ ᑕᑯᓯᓂᔨᒋ, ᒂ ᐛᐸᑎᔭᑦ ᒋᓴᐅᒋᒪᐛ᙮ 3 ᐊᑯ ᒋᓴᐅᒋᒪᐤ ᑲ ᑯᒂᒋᒪᑦ, “ᑕᓐ ᐊᓯ ᐊᑐᔅᒐᔭᒄ ?” ᒂ ᐃᑕᒡ, “ᒋᑦ ᐊᐱᒋᐊᑭᓐᒡ ᒋ ᓇᑭᑐᐛᔨᒪᐅᒡ ᐊᐛᓯᓴ ᐊ ᐅᔅᑎᓂᒋᐅᒡ ᐅᒡ ᐃᔅᐱᔅ ᐊᓄᒡ, ᑕᐱᔅᑯᓐ ᓂᔭᓐ ᑭᔭ ᓂᑦ ᐊᓂᔅᑯᑕᐸᓇᓐᒡ᙮ 4 ᓂᒋ ᐸᒋᑎᑯᓯᓇᓐ ᒐᒋ ᐛᐃᐱᔅᒋᔅ ᐅᑕ ᐎᒋᔭᒡ, ᐛᔅ ᓴᔅ ᓇᒪ ᑎᑯᓐ ᐊ ᒥᔅᑯᓯᐅᔅᑭᒥᑲᒡ ᒐ ᐅᒋ ᒥᒋᓱᒡ ᓂᑦ ᐊᐛᓯᓯᒥᓇᓐᒡ, ᐛᔅ ᒋᒋᐛ ᐊᔨᒥᓐ ᐊᑲ ᑎᒂᒡ ᒥᒋᒻ ᐊᓐᑕ ᑲᐃᓇᓐ ᐊᔅᒋᒡ᙮ ᐊᑯ ᒪᒃ, ᒋ ᓂᑐᐛᔨᒥᑎᓇᓐ ᒐᒋ ᓇᐃᒥᔭᒡ ᒐᒋ ᐎᒋᔭᒡ ᐊᓐᑕ ᑯᓯᓐ ᐊᔅᒋᒡ᙮” 5 ᐊᑯ ᒋᓴᐅᒋᒪᐤ ᐸᕈᐤ ᐊᑕᑦ ᒍᓯᐸ, “ᐊᓄᒡ ᓴᔅ ᑲᒋ ᐸᒋᓂᑐᐛᐱᒥᔅᒡ ᒍᑕᐎᔾ ᑭᔭ ᒋᐧᑲᓂᓯᒡ, ᒋᑭ ᐎᒍᐅᒡ ᑕᓐᑕ ᒥᒄ ᐊᓯ ᒥᔽᔨᑎᒥᓐ᙮ ᓇᐃᒥᒡ ᒐᒋ ᐎᒋᒡ ᐊᓐᑕ ᐊ ᒥᔽᔨᒡ ᐊᔅᒋᔪᐤ᙮ ᑯᓯᓐ ᐊᔅᒋᒡ ᒥᔨᒡ ᒐᒋ ᐎᒋᒡ᙮ 6 ᐊᑕᒂᓐᒋ ᒪᒃ ᐊ ᐃᑎᓯᒡ ᐊ ᑭᔅᒋᑕᒡ ᐊ ᑭᓄᐛᔨᒪᒡ ᐊᐛᓯᓴ, ᒐ ᓇᑭᑐᐛᔨᑎᔨᑥᐤ ᓂᑦ ᐊᐛᓯᓯᒪ᙮” 7 ᐊᑯ ᒍᓯᑉ ᐱᔭᓱᐛᑦ ᐅᑕᐎᔭ ᒐᑭᐸ ᒐᒋ ᐛᐱᒪᔨᒋ ᒋᓴᐅᒋᒪᐛ᙮ ᒐᑭᑉ ᒋ ᐃᔨᒥᑐᐛᐤ ᒐᒋ ᒥᔪᐱᔨᒋ ᒋᓴᐅᒋᒪᐛ᙮ 8 ᐊᑯ ᒋᓴᐅᒋᒪᐤ ᑲ ᑯᒂᒋᒪᑦ ᒐᑭᐸ, “ᑕᓐ ᐊ ᐃᑕᑐᐳᓇᓯᔨᓐ ?” 9 ᒐᑭᑉ ᒋ ᐎᑎᒧᐛᐤ, “ᓂ ᐸᐃᑯ ᒥᑕᓯᒥᑎᓄᐛᐳᓇᓯᓐ ᐊᓱ ᓂᔅᑐᔪᐤ᙮ ᐊᔅᒄ ᓇᒪ ᓇᐅᔅ ᓂ ᐱᒪᑎᓯᓐ ᒥᒄ ᓂᑦ ᐊᔨᒥᔪᐅᓐ ᓂᐱᒪᑎᓯᐅᓂᒡ᙮ ᐊᑎᑐᐤ ᓇᐅᔅ ᒋ ᐱᒪᑎᓯᐅᒡ ᓂᑦ ᐊᓂᔅᑯᑕᐸᓐᒡ ᐃᔅᐱᔅ ᓂᔾ᙮” 10 ᐊᑯ ᒐᑭᑉ ᒥᓐ ᐊᔨᒥᑐᐛᑦ ᒋᓴᐅᒋᒪᐛ ᒐᒋ ᒥᔪᐱᔨᒋ, ᐊᒺᔭ ᓂᑭᑕᑦ᙮ 11 ᐊᑯ ᒍᓯᑉ ᒋ ᐃᑐᑎᒺᐤ ᑲ ᐃᑎᓱᒥᑯᑦ ᒋᓴᐅᒋᒪᐛ᙮ ᒋ ᒥᔭᐤ ᐅᑕᐎᔭ ᑭᔭ ᐎᐧᑲᓂᓴ ᐊ ᒥᔽᔨᒡ ᐊᔅᒋᔪᐤ ᐃᒋᑉᑎᒡ ᐊᓐᑕ ᒥᒋᒪ ᕋᒪᓯᔅ ᐅᑕᓇᒡ᙮ 12 ᒍᓯᑉ ᐃᔭᐱᒡ ᒥᒋᒥᔪᐤ ᒋ ᒥᔭᐤ ᒥᓯᐛ ᐎᐧᑲᓂᓴ, ᒋᒡ ᓇᔅᒡ ᑲ ᐊᐛᓯᐎᔨᒋ᙮ ᓄᑕᐧᑭᑕᐅᓐ 13 ᒋᒋᐛ ᒋ ᐊᔨᒥᓐ ᓄᑕᐧᑭᑕᐅᓐ ᓇᒪ ᐅᒋ ᑎᑯᓐ ᒥᒋᒻ ᒐ ᒥᒋᓇᓄᐅᒡ ᐊᓐᑕ ᒥᓯᐛ ᐊᔅᒋᒡ, ᐊᑯ ᐃᒋᑉᑦ ᑭᔭ ᑲᐃᓇᓐ ᐃᔪᒡ ᓇᒪ ᐅᒋ ᓴᐱᓯᐅᒡ ᐊ ᓯᐛᔨᒡ᙮ 14 ᐃᔅᐱ ᐃᔪᒡ ᐊᑲ ᐅᒋ ᑭᓄᐛᔨᑕᒡ ᒥᒋᒥᔪᐤ, ᒍᓯᐸ ᐅᒡ ᒋ ᐅᒋ ᐃᔭᐅᒡ ᐸᒂᓯᑭᓂᒥᓇ, ᒥᓯᐛ ᒋ ᐅᑎᓂᒻ ᓱᓇᔭᔪᐤ ᒍᓯᑉ ᑭᔭ ᒋᓴᐅᒋᒪᐛ ᐎᒋᔨᒡ ᒋ ᐃᑐᑐᐛᐤ᙮ 15 ᑲᒋ ᒥᓯᐛ ᒪᔅᑎᓇᒡ ᐅᓱᓇᔭᓂᒧᐛᐤ ᐃᒋᑉᑦ ᑭᔭ ᑲᐃᓇᓐ ᐃᔪᒡ ᐊ ᐃᔭᒡ ᐸᒂᓯᑭᓂᒥᓇ, ᒥᓯᐛ ᐃᒋᑉᑦ ᐃᔪᒡ ᑲᐤ ᒋ ᓂᑐᐛᐱᒪᐅᒡ ᒍᓯᐸ, ᑭᔭ ᒂ ᐃᑕᒡ, “ᓴᔅ ᓇᒪ ᓂ ᑭᓄᐛᔨᑕᓇᓐ ᓱᓇᔭᐤ᙮ ᐸᒋ ᒥᔨᓇᓐ ᒥᒋᒻ ᑭᔭ ᒪᒃ ᓂᑭ ᑯᐧᑭᑕᓇᓐ ᐅᑎᔅᑯᐤ ᐅᑕ ᐊ ᑕᔨᓐ !” 16 ᐊᑯ ᒍᓯᑉ ᐊᑕᑦ, “ᐊᑲ ᑭᓄᐛᔨᑎᒧᐛᒂ ᓱᓇᔭᐤ, ᐸᓱᐛᑯᒡ ᒋᑦ ᐊᐛᓯᓯᒧᐛᐅᒡ ᑭᔭ ᒋᑭ ᒥᔨᑎᓇᐛᐤ ᒥᒋᒻ ᒥᔅᑯᒡ ᒋᑦ ᐊᐛᓯᓯᒧᐛᐅᒡ᙮” 17 ᐊᑯ ᐃᔪᒡ ᒍᓯᐸ ᒋ ᐸᑐᐛᐅᒡ ᐅᑲᐸᐃᑭᔎᒧᐛᐛ, ᐅᒪᔭᑕᓂᓯᒧᐛᐛ ᑭᔭ ᐅᒥᔅᑐᓯᒧᐛᐛ, ᐅᒥᒋᑎᐧᑯᒧᐛᐛ ᒥᔅᑯᒡ ᒥᒋᒥᔪᐤ᙮ ᒪᒂᒡ ᐊᓂᔭ ᐱᐳᓂᔪᐤ, ᒥᓯᐛ ᒍᓯᐸ ᒋ ᐸᑐᐛᐅᒡ ᐅᑦ ᐊᐛᓯᓯᒧᐛᐛ ᑭᔭ ᒋ ᐅᑎᓂᒪᑯᐅᒡ ᒥᒋᒥᔪᐤ᙮ 18 ᑲᒋ ᐸᐃᑯᐳᓂᔨᒡ, ᑲᐤ ᓇᑐᐛᐱᒪᒡ ᐃᔪᒡ ᒍᓯᐸ ᑭᔭ ᒋ ᐃᑕᐅᒡ, “ᐅᒋᒪᐤ, ᓴᔅ ᓇᒪ ᓂᐅᓱᓇᔭᓂᒥᓇᓐ ᒐᒋ ᐃᔭᔭᒡ ᒥᒋᒻ ᑭᔭ ᒥᓯᐛ ᓴᔅ ᒋ ᑎᐸᔨᒪᐅᒡ ᓂᑦ ᐊᐛᓯᓯᒥᓇᓐᒡ᙮ ᓇᒪ ᒐᒂᓐ ᓂᑦ ᐃᔅᑯᐱᔨᓇᓐ ᒥᒄ ᓂᑦ ᐊᔅᒋᓇᓇ ᑭᔭ ᑎᐱᔨᐛ ᓂᔭᓇᓇ᙮ 19 ᓂᑭ ᐳᓂᐱᒪᑎᓯᓇᓐ ᑭᔭ ᒋᑭ ᒧᓱᐛᐛ ᓂᑦ ᐊᔅᒋᓇᓇ᙮ ᐃᔭᐅᓇᓐ ᑭᔭ ᓂᑦ ᐊᔅᒋᓇᓇ ᒥᔅᑯᒡ ᒥᒋᒻ᙮ ᓂᑭ ᐅᑦ ᐊᐱᒋᐊᑭᓂᒥᑕᑯᓇᓐ ᐸᕈᐤ᙮ ᒋᑭ ᑎᐸᔨᑎᒻ ᓂᑦ ᐊᔅᒋᓇᓇ᙮ ᐸᒂᓯᑭᓂᒥᓇ ᐸᒋ ᒥᔨᓇᓐ ᐊᑯ ᒪᒃ ᒐ ᑭᓄᐛᔨᑎᒪᒡ ᒥᒋᒻ ᒐ ᒥᒋᔭᒡ ᑭᔭ ᒐ ᐊᑲ ᐳᓂᐱᒪᑎᓯᔭᒡ᙮ ᓂᑭ ᓂᑕᐅᒋᐊᓇᓐᒡ ᓯᒥᓐᒡ ᐊᑯ ᒪᒃ ᒐ ᓂᑕᐅᒋᒋ ᐸᒂᓯᑭᓂᒥᓇ ᓂᑕᐅᒋᑕᑭᓂᒡ ᑭᔭ ᒐ ᐊᑲ ᒧᓱᐛᒋ᙮” 20 ᐊᑯ ᒍᓯᑉ ᒂ ᓂᓇᔅᑯᒧᑦ ᒐᒋ ᐃᔭᐛᑦ ᐅᑦ ᐊᔅᒋᔪᐛ᙮ ᒪᒃ ᒥᓯᐛ ᐃᒋᑉᑦ ᐃᔪᐤ ᒂ ᑕᐛᒐᑦ ᐅᑦ ᐊᔅᒋᔾ, ᐛᔅ ᒋᒋᐛ ᒋ ᐊᔨᒥᐅᐎᒡ ᐊᑲ ᐅᒋ ᑎᑯᓂᔨᒡ ᒥᒋᒥᔪᐤ᙮ ᐊᐅᑯᔪᐤ ᐊᓂᔭ ᒋᓴᐅᒋᒪᐤ ᑲ ᐅᒋ ᒥᓯᐛ ᑎᐸᔨᑕᐧᒄ ᐃᒋᑉᑦ ᐊᔅᒋᔪᐤ᙮ 21 ᐊᑯ ᒍᓯᑉ ᒂ ᑐᑐᐛᑦ ᐃᔪᐛ ᐊᓐᑕ ᐊ ᒥᔅᑎ ᐅᑕᓇᐎᔨᒋ ᒐᒋ ᐃᓯ ᐊᑎᐱᔨᒋ ᒐᒋ ᐊᑐᔅᑯᐛᔨᒋ ᒋᓴᐅᒋᒪᐛ᙮ ᐊᐅᑯᐤ ᑲ ᐃᔅᐱᔨᒡ ᐊᓐᑕ ᒥᓯᐛ ᐃᒋᑉᑦ ᐊᔅᒋᒡ᙮ 22 ᒥᒄ ᒍᓯᑉ ᓇᒪ ᐅᒋ ᐃᔭᐛᐤ ᐃᒋᑉᑎᒡ ᐊᔭᒥᐊᐅᒋᒪᐛ ᐅᑦ ᐊᔅᒋᔪᐛ᙮ ᓇᒪ ᐅᒋ ᓂᑐᐛᔨᑕᑯᓱᐅᒡ ᒐᒋ ᑕᐛᒐᒡ ᐊᔭᒥᐊᐅᒋᒪᐅᒡ ᐅᑦ ᐊᔅᒋᐛᐛ ᐛᔅ ᒋ ᒥᔨᑯᐅᒡ ᒋᓴᐅᒋᒪᐛ ᒥᒋᒥᔪᐤ᙮ 23 ᐊᑯ ᒍᓯᑉ ᐊᑕᑦ ᐃᒋᑉᑦ ᐃᔪᐛ, “ᐛᐸᑎᒥᒄ, ᐊᓄᒡ ᓴᔅ ᔅᒋ ᐅᑎᓂᑎᓇᐛᐤ ᑭᔭ ᒋᑦ ᐊᔅᒋᐛᐛ, ᒋᓴᐅᒋᒪᐤ ᐊᓄᒡ ᒋ ᑎᐸᔨᒥᑯᐛᐤ ᑭᔭ ᒋᑦ ᐊᔅᒋᐛᐛ᙮ ᐊᓄᒡ ᒋᑭ ᒥᔨᑎᓇᐛᐤ ᓯᒥᓐᒡ ᐊᑯ ᒪᒃ ᒐᒋ ᓂᑕᐅᒋᑕᔭᒄ ᐸᒂᓯᑭᓂᒥᓇ᙮ 24 ᐃᔅᐱ ᐅᑎᒋᐱᔨᒐ ᒐ ᒪᐛᒋᒐᓄᐅᒡ, ᐱᑕᑕᒡ ᑕᑐᐤ ᐊ ᒪᐛᒋᒐᔭᒄ, ᐸᐃᒄ ᒋᑭ ᐎ ᒥᔭᐛᐤ ᒋᓴᐅᒋᒪᐤ, ᐊᑯ ᐊᔅᑯᐱᔨᒋ ᒋᔨᐛᐤ ᒐ ᑎᐸᔨᑎᒪᒄ ᒐᒋ ᓂᑕᐅᒋᒐᔭᒄ ᒋᓂᑕᐅᒋᑕᑭᓂᐛᒡ ᑭᔭ ᒐᒋ ᐊᓯᒥᑎᓱᔭᒄ ᑭᔭ ᒋᑦ ᐊᐛᓯᒧᐛᐅᒡ ᑭᔭ ᒥᓯᐛ ᑲ ᑕᒡ ᐊᓐᑕ ᒋᒋᐛᐛᒡ᙮” 25 ᐊᑯ ᐃᔪᒡ ᐊᑕᒡ ᒍᓯᐸ, “ᐅᒋᒪᐤ, ᓂ ᓂᔅᑯᒧᓇᓐ ᒐᒋ ᐅᑦ ᐊᐱᒋᐊᑭᓂᑐᐎᒥᑦ ᒋᓴᐅᒋᒪᐤ, ᐛᔅ ᔅᒋ ᒥᔪᑐᑐᐅᓇᓐ ᑭᔭ ᔅᒋ ᐱᒪᒋᑕᓐ ᓂᐱᒪᑎᓯᐅᓇᓇ !” 26 ᐊᑯ ᒍᓯᑉ ᐊᑐᑕᐧᒃ ᐎᓱᐛᐅᓂᔪᐤ ᐊᓐᑕ ᐃᒋᑉᑦ ᐊᔅᒋᒡ ᒐᒋ ᓇᓴᐊᒡ ᒥᓯᐛ ᐃᒋᑉᑦ ᐃᔪᒡ, ᐱᑕᑕᒡ ᑕᑐᐤ ᐊᒪᐛᒋᒐᓄᐎᒡ, ᐸᐃᒄ ᒐᒋ ᒥᔭᑭᓄᔨᒋ ᒋᓴᐅᒋᒪᐛ᙮ ᐊᔅᒄ ᐊᓄᒡ ᐱᒥᐱᔪᐤ ᐊᓐ ᐎᓱᐛᐅᓐ᙮ ᒥᒄ ᐊᔭᒥᐊᐅᒋᒪᐛ ᐅᑦ ᐊᔅᒋᔪᐤ ᓇᒪ ᐅᒋ ᑎᐸᔨᑎᒺᐤ ᒋᓴᐅᒋᒪᐤ᙮ ᒐᑭᑉ ᒪᔅᑕᔾ ᐅᐱᑯᓴᔨᑎᒧᐅᓐ 27 ᐊᑯ ᐃᔅᕋᐃᓪ ᐃᔪᒡ ᒂ ᐎᒋᒡ ᐊᓐᑕ ᑯᓯᓐ ᐊᔅᒋᒡ ᐊᓐᑕ ᐃᒋᑉᑎᒡ᙮ ᒋ ᒥᔪᐱᔪᐅᒡ ᑭᔭ ᒥᒐᑦ ᒋ ᑕᔪᐛ ᐅᑦ ᐊᐛᓯᒧᐛᐛ ᑭᔭ ᒂ ᒥᒐᑎᒡ ᐊ ᐃᔅᐱᒐᑎᒡ᙮ 28 ᓂᔄᐅᑕᒡ ᑕᑐᓴᐱᐳᓇ ᒋ ᐎᒍᐤ ᒐᑭᑉ ᐊᓐᑕ ᐃᒋᑉᑎᒡ, ᐊᑯ ᒪᒧᐤ ᐸᐃᑯ ᒥᑕᓯᒥᑐᓄᐤ ᐊᓱ ᓇᐎᔪᐤ ᐊᓱ ᓂᔄᐅᑕᒡ ᑕᑐᐱᐳᓇ ᒋ ᐃᔅᐱᔅ ᐱᒪᑎᓯᐤ᙮ 29 ᐃᔅᐱ ᒐᑭᑉ ᒐᔅᒐᔨᑕᐧᒃ ᒐ ᐊᑲ ᓇᐅᔅ ᓴᔅ ᐱᒪᑎᓯᑦ, ᒋ ᐎᓴᒪᐤ ᐅᑯᓴ ᒍᓯᐸ ᒐᒋ ᓂᑐᐛᐱᒥᑯᑦ᙮ ᐃᔅᐱ ᑕᑯᓯᓂᔨᒋ, ᒐᑭᑉ ᒋ ᐃᑕᐤ, “ᓇᔅᒡ ᑕᑈ ᓯᔭᒋᐅᓇ, ᒐ ᐊᓱᑎᒧᐎᔨᓐ᙮ ᐛᐸᑎᔾ ᐊ ᒋᓴᐛᑐᑐᐎᔨᓐ ᑭᔭ ᐊ ᑕᑈᔭᔨᒥᔨᓐ᙮ ᐃᔅᐱ ᐳᓂᐱᒪᑎᓯᔭᓇ, ᒐ ᐊᑲ ᐱᒥᓯᒥᔨᓐ ᐅᑕ ᐃᒋᑉᑎᒡ᙮ ᐊᓱᑎᒧᐎᔾ ᐊ ᐃᔅᒋᔄᔨᓐ ᒐ ᐃᑐᑎᒥᓐ ᐅ ᐊ ᐃᓯ ᓂᑐᐛᔨᑎᒪᑕᓐ᙮ 30 ᐳᓂᐱᒪᑎᓯᔭᓇ, ᑲᐃᓇᓐ ᒐ ᐃᑐᑕᔨᓐ ᓂᔪᐤ ᑭᔭ ᐊᓐᑕ ᐸᒥᓯᒡ ᓂᑦ ᐊᓂᔅᑯᑕᐸᓐᒡ ᐊᑯᑕ ᑭᔭ ᒐ ᐱᒥᓯᒥᔨᓐ᙮ ᒐ ᐊᑲ ᐱᒥᓯᒥᔨᓐ ᐅᑕ ᐃᒋᑉᑎᒡ᙮” ᐊᑯ ᒍᓯᑉ ᐊᑕᑦ, “ᓂᑭ ᑐᑕᓐ ᐊᓯ ᓂᑐᐛᔨᑎᒥᓐ᙮” 31 ᐊᑯ ᒐᑭᑉ ᐊᑕᑦ, “ᐊᓱᑎᒪᒐ ᐅᑦ ᐃᓯᓂᐧᑲᓱᐅᓂᒡ ᐅᒡ ᒋᓴᒪᓂᑐᐤ, ᐅ ᒐ ᐃᑐᑎᒥᓐ,” ᐊᑯ ᒍᓯᑉ ᐊᑐᑕᐧᒃ ᒋᒋ ᐊᓱᑎᒪᒐᐅᓂᔪᐤ᙮ ᐊᑯ ᒐᑭᑉ ᓇᐛᔎᔨᑦ ᑭᔭ ᐊᔭᒥᐊᑦ ᐊᓐᑕ ᐊ ᐅᔅᑎᒂᓄᐎᒡ ᐅᓂᐸᐅᓂᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.