ᒐᓂᓯᔅ 45 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒍᓯᑉ ᐛᑎᒧᐛᑦ ᐎᐧᑲᓂᓴ ᐊᐛᓐ ᐎᔾ ᐃᔭᐅᑦ Genesis 45.1-15 (Proper-15 Year A)

¹ ᐃᔅᐱ ᒍᓯᑉ ᐱᔭᑕᐧᒃ ᐅᔭ, ᓇᒪ ᐅᒋ ᑭᔅᒋᑕᐤ ᒐᒋ ᒋᐱᒋᐃᑎᓱᑦ ᐊ ᐛᐱᒥᑯᑦ ᐊᓂᔭ ᑲ ᓂᐳᔅᑕᑯᑦ, ᒂ ᐃᔅᒋᔄᑦ᙮ “ᐊᑯᔅ ᒥᓯᐛ ᐊᐱᒋᐊᑭᓐ ᒋᑭ ᐎᐎᔪᐤ ᒐᒋ ᓂᑭᓯᑦ᙮” ᓇᒪ ᐛᔪᐛ ᒋ ᐎᒋᑲᐳᐅᔅᑕᑯᐤ, ᒪᒂᒡ ᑲ ᒋᔅᒐᔨᑕᑯᐃᑎᓱᔅᑐᐛᑦ ᐎᐧᑲᓂᓴ᙮

² ᑲᒋ ᐎᐎᔨᒋ ᐊᐱᒋᐊᑭᓇ, ᒂ ᒪᑦ ᒍᓯᑉ ᐊ ᐸᑕᑯᓯᑦ, ᒋ ᐸᑕᑯᐤ ᒪᒃ ᐊᐱᒋᐊᑭᓇ᙮ ᓇᓇᒐ ᒪᒃ ᒋ ᐸᑎᒥᔪᐛ ᐸᕈᐛ ᑭᔭ ᐊᓂᔭ ᑲ ᐃᑕᔨᒋ ᐎᒋᔨᒡ᙮

³ ᒍᓯᑉ ᒪᒃ ᒋ ᐃᑕᐤ ᐎᐧᑲᓂᓴ, “ᓂᔾ ᐅ ᒍᓯᑉ; ᐊᔅᒄ ᐊ ᐱᒪᑎᓯᐤ ᓄᑕᐎᔾ ?” ᓇᒪ ᐅᒋ ᐎᑎᒪᑯᐤ ᒪᒃ ᐎᐧᑲᓂᓴ, ᐛᔅ ᒋ ᓴᒋᓯᔨᐛ ᐊ ᑭᓄᐛᐱᒪᑦ᙮

⁴ ᐊᑯ ᐊᑕᑦ ᒍᓯᑉ ᐎᐧᑲᓂᓴ, “ᒥᒋᒪ ᐸᒋ ᓇᓯᒄ,” ᒥᒋᒪ ᒪᒃ ᒋ ᐸᒋ ᓇᑎᑯᐤ, ᑭᔭ ᒋ ᐃᑕᐤ; “ᓂᔾ ᐅ ᒍᓯᑉ ᒋᐧᑲᓂᓱᐛᐤ, ᐃᒋᑉᑎᒡ ᑲᒋ ᐊᑕᐛᒐᔭᒄ᙮

⁵ ᐊᑲ ᒥᑯᔅᑲᑕᔨᑎᒥᒄ, ᐊᑲ ᑭᔭ ᒋᔄᐃᓱᒄ ᐅᑕ ᑲᒋ ᐊᑕᐛᓯᔭᒄ; ᐛᔅ ᒋᓴᒪᓂᑐᐤ ᓂᒋ ᓂᑲᓂᑎᓴᐅᒄ ᒐᒋ ᐱᒪᒋᑕᔭᓐ ᐱᒪᑎᓯᐅᓇ᙮

⁶ ᐛᔅ ᓴᔅ ᓂᓱᐳᓇ ᒋ ᑯᐅᐧᑭᑕᓄᐤ ᐅᑕ ᐊᔅᒋᒡ ᑭᔭ ᐊᔅᒄ ᐱᑕᑕᒡ ᑕᑐᐤ ᐱᐳᓇ ᐃᔅᐱᔅ ᒐ ᐊᑲ ᓂᑕᐅᒋᒐᓄᐅᒡ ᑭᔭ ᒪᐛᒋᒐᓄᐅᒡ᙮

⁷ ᓂᒋ ᓂᑲᓂᑎᓴᐅᒄ ᒋᓴᒪᓂᑐᐤ ᒐᒋ ᐱᒪᒋᐊᒂᐤ ᒋᑦ ᐊᐛᓯᒧᐛᐅᒡ ᐊᔅᒋᒡ, ᑭᔭ ᒐᒋ ᐱᒪᒋᑕᔭᓐ ᒋᐱᒪᑎᓯᐅᓄᐛᐛ ᐊᔅᒋᔾ ᐱᒪᑎᓯᐅᓂᒡ᙮

⁸ ᐊᑯ ᓇᒪᔭᐤ ᒋᔨᐛᐤ ᑲᐸᒡ ᐃᑎᓴᐎᔭᒄ ᐅᑕ, ᒥᒄ ᒋᓴᒪᓂᑐᐤ᙮ ᓂᒋ ᐃᓯᐃᒄ ᒐᒋ ᐅᑕᐎᑐᐎᒋ ᐸᕈᐛ, ᑭᔭ ᒐᒋ ᑎᐸᔨᑎᒧᒡ ᒥᓯᐛ ᐎᒋᔨᒡ ᑭᔭ ᒥᓯᐛ ᐊᔅᐱᓴᔨᒡ ᐃᒋᑉᑦ ᐊᔅᒋᔪᐤ᙮

⁹ ᒋᐱᒄ ᑭᔭ ᓂᑐᐛᐱᒥᐧᒄ ᓄᑕᐎᔾ, ᒐ ᐃᑕᒄ ᒪᒃ, ᐊᒂᑎᔅᒃ ᒋᑯᔅ ᒍᓯᑉ, ᒋᓴᒪᓂᑐᐤ ᓂᒋ ᑎᐸᔨᑎᒥᔨᒄ ᒥᓯᐛ ᐃᒋᑉᑦ ᐊᔅᒋᔪᐤ; ᐸᒋ ᓇᓯ, ᑭᔭ ᐊᑲ ᓱᐛᐱᔾ᙮

¹⁰ ᑯᓯᓐ ᐊᔅᒋᒡ ᒋᑭ ᐎᒋᓐ, ᒥᒋᒪ ᐊ ᑕᔭᓐ ᒪᒃ ᒋᑭ ᑕᓐ, ᒋᔾ ᒋᑦ ᐊᐛᓯᒥᒡ ᑭᔭ ᒍᓯᒥᒡ, ᒋᑦ ᐊᐛᓯᓯᒥᒡ ᑭᔭ ᒥᓯᐛ ᒐᒂᓐ ᑲ ᐃᓯ ᐊᔭᔨᓐ᙮

¹¹ ᐊᑯᑕ ᒪᒃ ᒐ ᑭᓄᐛᔨᒥᑕᓐ ᑭᔭ ᓇᒪ ᒋ ᓂᑐᐛᔨᒥᑎᓐ ᒋᔾ ᑭᔭ ᐊᑕᑎᓯᔨᓐ ᑭᔭ ᒋᑦ ᐊᐛᓯᓯᒥᒡ ᒐ ᒋᔅᑎᒪᑎᓯᔭᒄ, ᐛᔅ ᐊᔅᒄ ᐱᑕᑕᒡ ᑕᑐᐤ ᐱᐳᓇ ᒐ ᐃᔅᐱᔅ ᑯᐅᐧᑭᑕᓄᐅᒡ᙮

¹² ᑭᓄᐛᐱᒥᒄ, ᑕᐱᔅᑯᓐ ᒋᔨᐛᐤ ᑭᔭ ᓂᓯᒻ ᐱᓐᒋᒥᓐ ᒋ ᐛᐸᑕᓇᐛᐤ ᐊᐅᒄ ᐅ ᓂᔾ, ᒍᓯᑉ, ᐊ ᐃᒥᔨᑎᑯᒡ᙮

¹³ ᒋᑭ ᐎᑎᒧᐛᐛᐤ ᓄᑕᐎᔾ ᒥᓯᐛ ᓂᒋᔅᑕᔨᑕᑯᓱᐅᓂᔪᐤ ᐊᓐᑕ ᐃᒋᑉᑎᒡ ᑭᔭ ᒥᓯᐛ ᑲ ᐃᓯ ᐛᐸᑎᒪᒄ᙮ ᒋᑭ ᐎ ᒋᐱᓇᐛᐤ ᑭᔭ ᒐᒋ ᐸᓱᐛᒄ ᐅᑕ ᓄᑕᐎᔾ᙮”

¹⁴ ᐊᑯ ᒍᓯᑉ ᐎᔭᐛᒋᓇᑦ ᐅᓯᒪ ᐱᓐᒋᒥᓇ ᑭᔭ ᒥᔭᑦ᙮ ᑭᔭ ᐎᔾ ᐱᓐᒋᒥᓐ ᒋ ᒪᐤ ᑭᔭ ᒋ ᐛᐅᒋᓇᐤ᙮

¹⁵ ᑭᔭ ᓴᐛᔨᒪᑦ ᒥᓯᐛ ᐎᐧᑲᓂᓴ ᑭᔭ ᒥᔭᑐᐛᑦ᙮ ᐊᑯ ᒪᒃ ᐊᔨᒥᐃᑯᑦ ᐎᐧᑲᓂᓴ᙮

¹⁶ ᐃᔅᐱ ᑕᐸᒋᒧᓇᓄᐎᒡ ᐸᕈᐤ ᐎᒋᒡ ᑲ ᑎᑯᓯᓂᔨᒋ ᒍᓯᑉ ᐎᐧᑲᓂᓴ, ᐸᕈᐤ ᑭᔭ ᐅᑦ ᐊᑐᔅᒐᔭᑭᓇ ᒋ ᒥᔽᔨᑎᒧᒡ᙮

¹⁷ ᐊᑯ ᐸᕈᐤ ᐊᑕᑦ ᒍᓯᐸ, “ᐃᓯᒡ ᐅᔭ ᒋᐧᑲᓂᓯᒡ, ᐎᐅᓴᐧᑯᒡ ᑲᓂᐧᑲᑎᓯᒡ ᒋᑲᐸᐃᑭᔎᒧᐛᐅᒡ ᐸᒂᓯᑭᓂᒥᓇ ᑭᔭ ᑲᐤ ᐃᑐᑕᒄ ᑲᐃᓇᓐ ᐊᔅᒋᒡ᙮

¹⁸ ᐸᓱᐎᐧᒄ ᒪᒃ ᒍᑕᐎᐛᐤ ᑭᔭ ᑲ ᐃᑎᓯᒡ ᑭᔭ ᒐ ᐸᒋ ᓇᓯᔭᒄ᙮ ᒋᑭ ᒥᔨᑎᓇᐛᐤ ᒪᒃ ᐊ ᐃᓯ ᒥᔽᓯᒡ ᐃᒋᑉᑦ ᐊᔅᒋᒡ, ᐊᓐᑕ ᒐ ᒥᒋᔭᒄ ᐊ ᐃᓯ ᐎᔪᐃᒥᑲᒡ ᐊᔅᒋᔾ᙮

¹⁹ ᐃᔭᐱᒡ ᒐ ᐃᑎᑥᐤ, ᐅᑎᓇᐧᑯᒡ ᑎᑎᐱᑕᐸᓇᔅᑯᒡ ᐃᒋᑉᑦ ᐊᔅᒋᒡ ᐅᒡ, ᒐ ᐊᐱᒋᐊᒡ ᒋᑦ ᐊᐛᓯᒧᐛᐅᒡ ᑭᔭ ᒋᐅᐛᐅᒡ᙮ ᐸᓱᐎᐧᒄ ᒪᒃ ᒍᑕᐎᐛᐤ ᑭᔭ ᒐ ᐸᒋ ᑎᑯᓯᓂᔭᒄ᙮

²⁰ ᒐ ᐊᑲ ᒪᒃ ᐅᑎᒪᔨᑎᒪᒄ ᒐᒂᓐ ᑲ ᐃᓯ ᑎᐸᔨᑎᒪᒄ, ᐛᔅ ᒋᔨᐛᐤ ᒋᑭ ᑎᐸᔨᑕᓇᐛᐤ ᐊ ᐃᓯ ᒥᔽᓯᒡ ᐃᒋᑉᑦ ᐊᔅᒋᒡ᙮”

²¹ ᒐᑭᑉ ᐅᑯᓴ ᒋ ᐃᑐᑎᒥᔪᐛ ᑲ ᐃᑕᑭᓄᔨᒋ᙮ ᒧᔭᒻ ᑲ ᐃᑎᑯᑦ ᐸᕈᐛ, ᒍᓯᑉ ᒋ ᒥᔭᐤ ᑎᑎᐱᑕᐸᓇᔎ, ᑭᔭ ᒋᓂᒪᐊᐤ᙮

²² ᒥᓯᐛ ᐊ ᐃᑎᓯᔨᒋ ᒋ ᒥᔭᐤ ᐅᔅᒋ ᐊᐱᒋᑕᐅᓇ, ᒥᒄ ᐱᑕᑕᒡ ᑕᑥᐤ ᐊ ᐃᑕᔅᐱᓱᓇᓄᐎᒡ ᐊᐱᒋᑕᐅᓇ ᒋ ᒥᔭᐤ ᐱᓐᒋᒥᓇ ᑭᔭ ᓂᔅᑐ ᒥᑕᓯᒥᑎᓄᐤ ᓱᓇᔭᐱᔎ᙮

²³ ᐅᑕᐎᔭ ᒪᒃ ᒋ ᐃᑎᓴᐊᒧᐛᐤ ᐸᐃᑯᔪᐤ ᑲᓂᐧᑲᑎᓯᔨᒋ ᑲᐸᐃᑭᔎᐛ ᐊ ᐎᐅᓯᔨᒋ ᑲ ᒥᔽᓯᔨᒋ ᒐᒂᓇ ᐃᒋᑉᑎᒡ ᐅᒡ, ᑭᔭ ᐸᐃᑯᔪᐤ ᑲᓂᐧᑲᑎᓯᔨᒋ ᓄᓴ ᑲᐸᐃᑭᔎᐛ ᐊ ᐎᐅᓯᔨᒋ ᐸᒂᓯᑭᓂᒥᓇ ᑭᔭ ᐸᒂᓯᑭᓇ ᑭᔭ ᒥᒋᒥᔪᐤ ᒐ ᐸᒋ ᓂᒪᔨᒋ᙮

²⁴ ᐊᑯ ᒐ ᑎᓴᐛᑦ ᐎᐧᑲᓂᓴ, ᑭᔭ ᒪᒂᒡ ᐊᑎ ᔅᑐᑕᔨᒋ, ᒋ ᐃᑕᐤ, “ᐊᑲᐎᔾ ᑎᓯᐧᑲᑐᒄ ᒐ ᐊᑎ ᔅᑐᑕᔭᒄ᙮”

²⁵ ᐊᑯ ᐎᐧᑲᓂᓯᒪᐅᒡ ᐃᒋᑉᑎᒡ ᒋ ᐅᒋ ᔅᑐᑕᐅᒡ ᑭᔭ ᐃᔅᐱ ᐛᑎᑕᒡ ᐅᑕᐎᐛᐛ ᒐᑭᐸ ᐊᓐᑕ ᑲᐃᓇᓐ ᐊᔅᒋᒡ᙮

²⁶ ᐊᑯ ᐛᑎᒧᐛᒡ ᐊ ᐃᑕᒡ, “ᒍᓯᑉ ᐊᔅᒄ ᐱᒪᑎᓯᐤ ! ᒥᓯᐛ ᐃᒋᑉᑦ ᐊᔅᒋᔪᐤ ᑎᐸᔨᑎᒻ !” ᒋ ᓯᔅᒋᑯᒋᐃᑯᐤ ᒐᑭᑉ ᐛᔅ ᓇᒪ ᐅᒋ ᑕᑈᑐᐛᐤ᙮

²⁷ ᒋ ᐎᑎᒧᐛᐅᒡ ᒥᓯᐛ ᑲ ᐃᑎᑯᒡ ᒍᓯᐸ ᑭᔭ ᐃᔅᐱ ᒐᑭᑉ ᐎᔭᐸᑕᐧᒃ ᐊᓂᔭ ᑎᑎᐱᑕᐸᓇᔎ ᒍᓯᐸ ᑲ ᐃᑎᓴᐊᒪᑯᑦ ᒐ ᐃᑐᑕᐃᑯᑦ ᐃᒋᑉᑎᒡ, ᒋ ᐊᒂᑕᔨᑎᒻ ᑭᔭ ᑎᔭᑈᑕᐧᒃ ᐊᔅᒋᔄᔨᒋ᙮

²⁸ ᐊᑯ ᒐᑭᑉ ᐊᔅᒋᔄᑦ, “ᓂ ᓯᔅᒋᑯᒋᒥᑯᐅᓐ, ᒍᓯᑉ ᓂᑯᔅ ᐊᔅᒄ ᐸᒪᑎᓯᑦ ! ᓂᑭ ᓂᑐᐛᐱᒪᐤ ᐊᒺᔭ ᓂᐱᔭᓐ᙮”