ᒐᓂᓯᔅ 33 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒐᑭᑉ ᑲ ᐛᐱᒪᑦ ᐃᓴᐅᐛ

¹ ᓇᒪ ᓱᐧᒄ ᓇᐅᔅ ᑲᒋ ᓂᑭᑕᐧᒃ ᒐᑭᑉ ᐱᓇᐃᐅ᙮ ᒋ ᐛᐱᒪᐤ ᐃᓴᐅᐛ ᐱᔭᑕᔅᑎᒧᑕᔨᒋ ᓇᐤ ᒥᑕᓯᒥᑎᓄᐤ ᐃᔪᐛ ᐊ ᐎᒐᐅᑯᔨᒋ᙮ ᒂ ᓂᔅᑐᐎᒡ ᐃᓯ ᑎᐸᓇᐊᑦ ᐊᐛᓴ ᐅᑲᐎᔪᐛ ᐊ ᐎᒐᐛᔨᒋ᙮

² ᓂᔅᑎᒻ ᐅᑯᐸᓇᔎᒪ ᒋ ᑎᔭᐤ ᑭᔭ ᐅᑦ ᐊᐛᓯᒥᔪᐛ, ᒂ ᐅᒋ ᓇᓴᐅᑯᒡ ᓕᐊᔨᒋ ᑭᔭ ᐅᑦ ᐊᐛᓯᒥᔪᐛ ᑭᔭ ᒪᔅᑕᔾ ᐛᒋ ᐱᒧᑕᒡ ᕋᐃᒍᓪ ᑭᔭ ᒍᓯᑉ᙮

³ ᐎᔾ ᒋ ᓂᑲᓄᑕᐤ ᒐᑭᑉ ᒐᒋ ᓂᒋᔅᑯᐛᑦ ᐃᓴᐅᐛ᙮ ᓂᔄᐅᑕᒡ ᑕᑥᐤ ᒋ ᓄᐛᑲᐳᔅᑐᐛᐤ ᒪᒂᒡ ᐊᑎ ᐅᑎᑕᑦ ᐅᔅᑕᓴ ᐃᓴᐅᐛ, ᐊ ᐎ ᐛᐸᑎᔭᑦ ᐊ ᒋᔅᑕᔨᒪᑦ᙮

⁴ ᒥᒄ ᐃᓴᐅ ᒋ ᒋᒋᓇᐤ ᒐᒋ ᓂᒋᔅᑯᐛᑦ ᒐᑭᐸ ᑭᔭ ᒂ ᐛᐅᒋᓇᑦ ᑭᔭ ᓴᐛᔨᒪᑦ᙮ ᑕᐱᔅᑯᓐ ᒋ ᒪᐅᒡ ᐊ ᒥᔽᔨᑕᒡ᙮

⁵ ᐃᔅᐱ ᐎᔭᐱᒪᑦ ᐃᓴᐅ ᐃᔎᐛ ᑭᔭ ᐊᐛᓴ, ᒂ ᑯᒂᒋᒪᑦ, “ᐊᐛᓐᒋ ᐅᒡ ᐃᔪᒡ ᑲᒋ ᐎᒐᐛᐅᒋ ?” ᒐᑭᑉ ᒋ ᐃᑕᐤ, “ᓂᒋ ᒥᔪᑐᑕᒄ ᒋᓴᒪᓂᑐᐤ᙮ ᐊᐛᓴ ᓂᒋ ᒥᔨᒄ᙮”

⁶ ᐊᑯ ᑯᐸᓇᔎᐅᒡ ᒂ ᐸᑐᑕᒡ ᐊ ᐎᒐᐅᑯᒡ ᐅᑦ ᐊᐛᓯᒧᐛᐛ ᑭᔭ ᒂ ᓄᐛᑲᐳᔅᑐᐛᒡ ᐊ ᒋᔅᑕᔨᒪᒡ ᐃᓴᐅᐛ᙮

⁷ ᒥᓐ ᓕᐊ ᑭᔭ ᐅᑦ ᐊᐛᓯᒪ ᐱᔭᑐᑕᒡ, ᑭᔭ ᐎᔨᐛᐤ ᓇᐛᑲᐳᔅᑐᐛᒡ ᐊ ᒋᔅᑕᔨᒪᒡ ᐃᓴᐅᐛ᙮ ᒪᔅᑕᔾ ᕋᐃᒍᓪ ᑭᔭ ᒍᓯᑉ ᐱᔭᑐᑕᒡ ᑭᔭ ᓇᐛᑲᐳᔅᑐᐛᒡ ᐃᓴᐅᐛ᙮

⁸ ᐊᑯ ᐃᓴᐅ ᑲ ᑯᒂᒋᒪᑦ ᒐᑭᐸ, “ᒐᒂᓐ ᐛᒋ ᐃᑎᓴᐊᒪᐎᓐ ᐊᐛᓯᓯᒡ ?” ᒐᑭᑉ ᒋ ᐎᑎᒧᐛᐤ ᐊ ᐃᑕᑦ, “ᔅᒋ ᐃᑎᓴᐊᒪᑎᓐ ᐊᓐᒡ ᒧᔭᒻ ᒥᔨᐛᐅᓇ᙮ ᔅᒋ ᐎ ᓇᐊᔨᑎᒥᐃᑎᓐ᙮”

⁹ ᒥᒄ ᐃᓴᐅ ᐃᑕᐤ, “ᓂᑦ ᐃᔅᐱᔨᓐ ᐊᐛᓯᓯᒡ, ᓂᐧᑲᓂᔅ᙮ ᒋᔾ ᒋᐸ ᑭᓄᐛᔨᒪᐅᒡ᙮”

¹⁰ ᒐᑭᑉ ᒂ ᐃᑕᑦ, “ᓇᒪ, ᐅᑎᓇ ᓂᒥᔨᐛᐅᓐ ᐊᑯ ᒐᔅᒐᔨᑎᒪᓐ ᐊᑲ ᓴᔅ ᒋᔄᐱᔅᑐᐎᓐ᙮ ᐊᐅᑯᐤ ᒐ ᐛᐸᑎᐛᔨᓐ ᐊᒋ ᐛᐸᔨᑎᒧᔨᓐ, ᒧᔭᒻ ᒋᓴᒪᓂᑐᐤ ᑲ ᐃᓯ ᐛᐸᔨᑎᒧᐅᑦ᙮

¹¹ ᐅᑎᓇ ᓂᒥᔨᐛᐅᓐ᙮ ᐛᔅ ᓂᒋ ᑐᑕᒄ ᒋᓴᒪᓂᑐᐤ ᒐ ᒥᔪᐱᔪᐅᒡ ᑭᔭ ᓴᔅ ᓂᑦ ᐃᔅᐱᔨᓐ ᐊᐛᓯᓯᒡ᙮” ᐊᑯ ᒐᑭᑉ ᒋ ᓴᐧᑯᒋᒪᐤ ᐅᔅᑕᓴ ᑭᔭ ᐃᓴᐅ ᒐᒃ ᐛᑎᓂᒺᑦ ᐅᒥᔨᐛᐅᓂᔪᐤ᙮

¹² ᐊᑯ ᐃᓴᐅ ᐊᑕᑦ ᒐᑭᐸ, “ᒪᒧᐤ ᐊᑎ ᐱᒧᑕᑕᐤ᙮ ᓂᔾ ᓂᑭ ᓂᑲᓄᑕᓐ᙮”

¹³ ᒐᑭᑉ ᒋ ᐎᑎᒧᐛᐤ, “ᒋᔅᒐᔨᒪᐅᒡ ᐊᑲ ᓴᐱᓯᒡ ᐊᐛᓯᒡ ᒐᒋ ᐱᒧᑕᒡ ᐊᔅᐱᓯᐱᔨᓐ᙮ ᐃᔭᐱᒡ ᓂᑦ ᐊᔨᒪᔨᑎᒥᑯᒡ ᐊᐛᓯᓯᒡ ᐊ ᐊᓯᒪᒡ ᐅᑦ ᐊᐛᓯᒧᐛᐛ᙮ ᑐᑐᐅᒂᐛ ᒐᒋ ᒋᓯᐱᔨᒡ, ᐊᑎᓱᐧᒄ ᐸᐃᑯᒋᓯᑲᐛ᙮ ᒥᓯᐛ ᐊᐛᓯᓯᒡ ᒋᑭ ᐳᓂᐱᒪᑎᓯᐅᒡ᙮

¹⁴ ᓂᑲᓄᑕᒪ ᑭᔭ ᐸᑎᑲᒡ ᒋᑭ ᓇᓴᐅᑎᓐ, ᐊᔅᐱᓯᐱᔨᒡ ᐊᐛᓯᒡ ᑭᔭ ᐊᐛᓯᓯᒡ᙮ ᓇᓇᒐ ᒋᑭ ᓂᒋᔅᑲᑎᓐ ᐊᓐᑕ ᓯᐅᕐ᙮”

¹⁵ ᐊᑯ ᐃᓴᐅ ᐊᑕᑦ, “ᐊᑯ ᓇᐃᒥ ᐱᔅᒐ ᒐᒋ ᓂᑭᑎᒪᑕᓐ ᓂᑦ ᐃᔨᒥᒡ᙮” ᒐᑭᑉ ᐃᑕᐤ, “ᒋ ᓂᔅᑯᒥᑎᓐ, ᒥᒄ ᐃᔅᐱᔪᐤ ᑲᒋ ᐛᐸᑎᔨᓐ ᒋᓴᐛᑎᓯᐅᓐ ᑭᔭ ᑲ ᒥᔪ ᐅᑎᓂᔨᓐ᙮”

¹⁶ ᐊᑯ ᐃᓴᐅ ᒂ ᓂᓇᔅᑯᒧᑦ ᑭᔭ ᐊᓂᔭ ᐸᐃᑯᑕᐤ ᒋᓯᑯᔪᐤ ᒂ ᔅᑐᑕᑦ ᑲᐤ ᓯᐅᕐ ᐊᔅᒋᒡ ᐊᑐᑕᑦ᙮

¹⁷ ᒥᒄ ᒐᑭᑉ ᓱᑯᑦ ᒋ ᐃᑐᑕᐤ ᑭᔭ ᐊᑯᑕ ᑲ ᐃᑐᑕᐧᒃ ᐎᒡ ᑭᔭ ᑲ ᐎᒋᐧᑯᐛᑦ ᐅᑦ ᐊᐛᓯᓯᒪ᙮ ᐊᐅᑯᓐ ᓱᑯᑦ ᑲ ᐅᒋ ᐃᓯᓂᐧᑲᑕᒡ ᐃᔪᒡ ᐊᓂᔭ ᐃᑕᐅᓂᔪᐤ᙮

¹⁸ ᒂ ᓂᑭᑕᐧᒃ ᓱᑯᑦ, ᒐᒃ ᒂ ᑎᑯᓯᐧᒃ ᒐᑭᑉ ᐊᓐᑕ ᑲᐃᓇᓐ ᐊᔅᒋᒡ, ᒋᓴᒪᓂᑐᐛ ᒋ ᒥᔪ ᑎᑯᓯᑕᐃᑯᐤ ᐅᑦ ᐊᔅᒋᒡ ᐸᑕᓐ ᐊᕋᒻ ᐅᒡ᙮ ᒋ ᒪᓂᑲᓱᐅᒡ ᓂᑕᐅᒋᑕᑭᓂᒡ ᐊᓐᑕ ᒥᒋᒪ ᓴᑭᒻ ᐅᑕᓇᔪᐤ᙮

¹⁹ ᒋ ᐃᔭᐤ ᐱᔅᒐ ᓂᑕᐅᒋᑕᑭᓂᔪᐤ ᐦᐊᒧᕋ ᐅᑦ ᐊᐛᓯᒥᔪᐛ ᐅᒡ, ᓴᑭᒪ ᐅᑕᐎᔪᐛ᙮ ᐸᐃᑯ ᒥᑕᓯᒥᑎᓄᐤ ᐛᐱᓯᐅᓱᓇᔭᐱᔎ ᐊᑐᑕᐃᒡ᙮

²⁰ ᐊᑯᑕ ᐊᓐᑕ ᒐᑭᑉ ᑲ ᐅᓯᑕᑦ ᐱᔅᑎᓂᒐᐅᓇᐱᔅᑯᔪᐤ ᑭᔭ ᐃᓪ ᐃᓗᐃ ᐃᔅᕋᐃᓪ ᒂ ᐃᓯᓂᐧᑲᑕᐧᒄ, “ᒋᓴᒪᓂᑐᐤ ᐊᐅᑯᓐ ᐃᔅᕋᐃᓪ ᒋᓴᒪᓂᑐᐤ᙮”