ᒐᓂᓯᔅ 32 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑲ ᓂᒋᔅᑲᑐᒡ ᒐᑭᑉ ᑭᔭ ᐃᓴᐅ 1 ᒪᒂᒡ ᐊᑎ ᒋᐛᑦ ᒐᑭᑉ, ᒋ ᓂᒋᔅᑯᒪᐤ ᒋᓴᒪᓂᑐᐛ ᐅᑦ ᐊᓐᒋᓂᒥᔪᐛ᙮ 2 ᐃᔅᐱ ᐎᔭᐱᒪᑦ ᒐᑭᑉ ᒂ ᐃᔅᒋᔄᑦ, “ᐊᐅᑯᔪᐛ ᐅᔭ ᒋᓴᒪᓂᑐᐤ ᐅᓂᑐᐱᔪᐅ-ᐃᔨᒪ,” ᐊᑯ ᒪᐊᓇᐃᒻ ᒂ ᐃᓯᓂᐧᑲᑕᐧᒃ ᐊᓂᔭ ᐃᑕᐅᓂᔪᐤ᙮ 3 ᒪᒂᒡ ᑲ ᑕᒡ ᐊᓐᑕ ᒪᐊᓇᐃᒻ, ᒋ ᐃᑎᓴᐊᒧᐛᐤ ᒐᑭᑉ ᐅᔅᑕᓴ ᐃᓴᐅᐛ ᐅᑦ ᐊᐱᒋᐊᑭᓇ᙮ ᒧᔭᒻ ᓯᐅᕐ ᒋ ᐎᒋᐤ ᐃᓴᐅ, ᐃᑕᒻ ᐊᔅᒋᒡ᙮ 4 ᒋ ᐎᑎᒧᐛᐤ ᐅᑦ ᐊᐱᒋᐊᑭᓇ ᒐᒋ ᒥᔭᔨᒋ ᐅᔅᑕᓴ ᐅᔭ ᐃᔨᒧᐅᓂᔪᐤ, “ᒋᑎᒥᔅᑲᑎᓐ᙮ ᓂᔾ ᐅ ᒐᑭᑉ, ᒋᑦ ᐃᑎᓴᐊᒪᑎᓐ ᐅ ᐃᔨᒧᐅᓐ, ᐃᓴᐅ᙮ ᑕᑈ ᓂ ᐱᑯᓴᔨᑕᓐ ᒐᒋ ᐊᑐᔅᒐᔅᑕᑕᓐ ᑭᔭ ᒐ ᓇᐊᔨᑕᑕᓐ᙮ ᒍᐧᑯᒥᓯᓄᐤ ᓚᐸᓐ ᓂᒋ ᑕᐛᓐ ᐊ ᑕᑦ ᒥᒄ ᐊᓄᒡ ᓂᐸ ᒋᐛᓐ᙮ 5 ᒥᒐᑦ ᐛᔪᑎᓯᐅᓐ ᓂᒋ ᐅᑎᓂᒪᓱᓐ ᒋᒡ ᒥᒋᑎᐧᑯᒡ ᑭᔭ ᑲᓂᐧᑲᑎᓯᒡ ᑲᐸᐃᑭᔎᐅᒡ, ᒪᔭᑕᓂᓯᒡ ᑭᔭ ᒥᔅᑐᓯᒡ, ᓇᐸᐤ ᑭᔭ ᐃᔎᐤ ᐊᐱᒋᐊᑭᓐᒡ᙮ ᒋᑦ ᐃᑎᓴᐊᒪᑎᓐ ᐅ ᐃᔨᒧᐅᓐ, ᐃᓴᐅ᙮ ᒪᐅᒡ ᐊᔅᐱᑕᔨᒥᑕᓐ, ᒐᒋ ᒥᔪ ᐅᑎᓂᔨᓐ ᐃᔅᐱ ᑎᑯᓯᓂᔭᓇ᙮” 6 ᐊᑯ ᒂ ᔅᑐᑕᒡ ᓇᐸᐅᒡ ᒐ ᐃᑐᑐᐛᒡ ᐃᓴᐅᐛ ᐃᔨᒧᐅᓂᔪᐤ᙮ ᓇᓇᒐ ᑲᐤ ᒋ ᑎᑯᓯᓄᐅᒡ ᑭᔭ ᒂ ᐃᑕᒡ ᒐᑭᐸ, “ᓂᒋ ᓂᑐᐛᐱᒪᓇᓐ ᒋᔅᑕᔅ ᐃᓴᐅ ᑭᔭ ᓴᔅ ᐸᒋ ᔅᑐᑕᐤ ᒐᒋ ᓂᒋᔅᑲᔅᒃ᙮ ᓇᐤ ᒥᑕᓯᒥᑎᓄᐤ ᐃᔪᐛ ᐎᒐᐛᐤ᙮” 7 ᒋᒋᐛ ᒋ ᓴᒋᓱᐤ ᒐᑭᑉ ᑭᔭ ᒋ ᒥᑯᔅᑲᑕᔨᑎᒻ᙮ ᒂ ᓂᓱᐎᒡ ᐃᓯ ᑎᐸᓇᐊᑦ ᐃᔪᐛ ᑲ ᐎᒐᑯᑦ ᑭᔭ ᒋᒡ ᐅᒪᔭᑕᓂᓯᒪ, ᒥᔅᑐᓴ, ᒥᒋᑎᒂ ᑭᔭ ᑲᐱᔎᐅᑯᒡ᙮ 8 ᒂ ᐃᔅᒋᔄᑦ, “ᒋᒋᓇᒐ ᐃᓴᐅ ᐊᓂᔭ ᓂᔅᑎᒻ ᑎᐸᓐ ᐊ ᑕᔨᒋ, ᒂᔄᓐ ᑯᑎᑭᒡ ᒋ ᐸᒋ ᒋᑎᓯᒧᐅᒡ᙮” 9 ᐊᑯ ᒐᑭᑉ ᓇᑐᑎᒧᐛᑦ ᒋᓴᒪᓂᑐᐛ, ᐊᑕᑦ, “ᒋᔾ ᐅ ᓂᒧᓱᒻ ᐊᑉᕋᐊᒻ ᐅᒋᓴᒪᓂᑐᒪ ᑭᔭ ᓄᑕᐎᔾ ᐊᐃᓯᒃ ᐅᒋᓴᒪᓂᑐᒪ᙮ ᒋᔾ ᐅ ᒋᓴᒪᓂᑐᐤ, ᐊᓐ ᐊᐛᓐ ᑲ ᐃᓯᑦ ᒐᒋ ᑲᐤ ᒋᐛᔭᓐ ᓂᑦ ᐊᔅᒋᒡ ᑭᔭ ᓂᑐᐛᐱᒥᒂᐤ ᓂᐧᑲᓂᓯᒡ᙮ ᔅᒋ ᐊᓱᑎᒧᐅᓐ ᒐᒋ ᒥᓯᐛ ᒐᒂᓐ ᐃᓯ ᒥᔪᐱᔨᔭᓐ᙮ 10 ᒋᒋᐛ ᒋᔅᑎᒪᒐᔨᒧᐛᓐ᙮ ᓇᓂᑎᒻ ᔅᒋ ᑕᓐ ᒐᒋ ᐎᒋᐃᔨᓐ ᐃᔅᐱ ᓇᑐᐛᔨᒥᑕᓂ᙮ ᓇᒪ ᓂᒋ ᒋᔅᑕᔨᑕᑯᓯᓐ ᑲ ᐃᓯ ᒪᒥᔪᑐᑐᐎᔨᓐ᙮ ᒋᑭ ᐊᑐᔅᒐᔅᑕᑎᓐ ᑭᔭ ᒋᑭ ᓇᐃᑕᑎᓐ᙮ ᐃᔅᐱ ᐅᔅᑭᒡ ᑲ ᑎᔅᑭᒥᑲᓯᔭᓐ ᒠᕐᑕᓐ ᓯᐱᔾ ᐊᕋᓐ ᒐᒋ ᐃᑐᑕᔭᓐ, ᓯᔅᑲᐅᓐ ᒥᒄ ᓂᒋ ᑭᓄᐛᔨᑕᓐ᙮ ᐊᓄᒡ ᑲᐤ ᓂ ᒋᐛᓐ ᒋᒡ ᓂᓱᐎᒡ ᐃᔪᒡ ᑭᔭ ᒥᒐᑦ ᐊᐛᓯᓯᒡ᙮ 11 ᒥᒄ ᓂᔅᑕᔅ ᐸᑐᑕᐤ ᑭᔭ ᓂ ᑯᔅᑕᒋᓐ ᒐ ᐎ ᓂᐸᐃᑦ ᒋᒡ ᓂᔪᐛ ᑭᔭ ᓂᑦ ᐊᐛᓯᒪ᙮ ᒋ ᓂᑐᑎᒪᑎᓐ ᒐ ᐱᒪᒋᐃᔭᒡ᙮ 12 ᒋᔅᒋᓯ ᑲ ᐊᓱᑎᒧᔨᓐ ᒐᒋ ᒥᓯᐛ ᐃᓯ ᒥᔪᐱᔨᔭᓐ ᑭᔭ ᐊᑎᑐᐤ ᒐᒋ ᒥᔨᓐ ᐊᓂᔅᑯᑕᐸᓐᒡ ᒧᔭᒻ ᐊᑕᑎᒡ ᐃᔭᑲᐤ ᓇᓯᐸᑎᒥᒡ ᒐ ᐊᑲ ᐊᐛᓐ ᒋᒋᒪᑦ᙮” 13 ᑲᒋ ᑕᑦ ᐊᓐᑕ ᐸᐃᒄ ᑎᐱᔅᑲᐛ, ᒋ ᐅᑎᓇᐤ ᒐᑭᑉ ᐱᔅᒐ ᐅᑦ ᐊᐛᓯᓯᒪ ᒐᒋ ᒥᔭᑦ ᐅᔅᑕᓴ ᐃᓴᐅᐛ ᒧᔭᒻ ᒥᔨᐛᐅᓂᔪᐤ᙮ 14 ᓂᓱ ᒥᑕᓯᒥᑎᓄᐤ ᓄᓴ ᒥᔅᑐᓴ ᑭᔭ ᓂᓱᔪᐤ ᓇᐸ ᒥᔅᑐᓴ, ᓂᓱ ᒥᑕᓯᒥᑎᓄᐤ ᓄᓴ ᒪᔭᑕᓂᓴ ᑭᔭ ᓂᓱᔪᐤ ᓇᐸ ᒪᔭᑕᓂᓴ, 15 ᓂᔅᑐᔪᐤ ᑲᐱᔎᐅᑭᓂᔨᒋ ᐊᐛᓯᓴ ᐊᓄᒋᒐ ᑲ ᐅᑦ ᐊᐛᓯᒥᔨᒋ ᒋᒡ ᐅᑦ ᐊᐛᓯᒥᔪᐛ, ᓇᐎᔪᐤ ᓄᓴ ᒥᒋᑎᒂ ᑭᔭ ᐸᐃᑯᔪᐤ ᓇᐸ ᒥᒋᑎᒂ, ᓂᓱᔪᐤ ᑲᓂᐧᑲᑎᓯᔨᒋ ᓄᓴ ᑲᐸᐃᑭᔎᐛ ᑭᔭ ᐸᐃᑯᔪᐤ ᑲᓂᐧᑲᑎᓯᔨᒋ ᓇᐸ ᑲᐸᐃᑭᔎᐛ᙮ 16 ᒂ ᑕᐸᓇᐊᑦ ᒐᑭᑉ ᐊᐛᓯᓴ, ᐱᔅᒐ ᒪᔭᑦ ᐅᑦ ᐊᑐᔅᒐᔭᑭᓇ ᑕᑎᐸᓐ ᒐ ᑭᓄᐛᔨᒪᔨᒋ᙮ ᒋ ᐃᑕᐤ ᒐᒋ ᑎᔅᑭᒥᑲᓯᔨᒋ ᓯᐱᔪᐤ ᑭᔭ ᓂᑲᓐ ᒐᔅᑐᑕᔨᒋ, ᒐ ᑕᑎᐸᓄᑕᔨᒋ ᐊᑎ ᐸᐃᑯᑕᐅᓯᔨᒋ ᒐᒋ ᔭᐛᐱᒥᑐᔨᒋ ᐊᐛᓯᓴ᙮ 17 ᐊᑯ ᒐᑭᑉ ᐊᑎᓱᒪᑦ ᐅᑦ ᐊᑐᔅᒐᔭᑭᓇ ᑲᓄᐛᔨᒪᔨᒋ ᓂᔅᑎᒻ ᐊ ᐸᐃᑯᑕᐅᓯᔨᒋ, “ᐃᔅᐱ ᓂᒋᔅᑲᔅᑲ ᓂᔅᑕᔅ ᐃᓴᐅ, ᑯᒂᒋᒥᔅᒐ ᐊᐛᔪᐛ ᐛᒋᒪᒧᐅᑦ ᑭᔭ ᑕᓐᑕ ᐊᑐᑕᐅᑦ ᑭᔭ ᐊᐛᓐ ᑕᐱᔨᐛᐅᓯᑦ ᒥᓯᐛ ᐊᓂᔭ ᐊᐛᓯᓴ ? 18 ᐊᑯ ᒐ ᐃᑎᑦ, ‘ᒋᑦ ᐊᑐᔅᒐᔭᑭᓐ ᒐᑭᑉ ᐅᔭ ᑎᐱᔨᐛᐅᓯᐤ᙮ ᐃᑎᓴᒧᐛᐤ ᐅᔭ ᐅᒋᒪᒪ ᐃᓴᐅᐛ ᐊᑎᒥᔅᑯᐛᑦ᙮ ᒐᑭᑉ ᐎᔾ ᓂᐸ ᒋ ᓇᓴᐅᑯᓇᓐ᙮’ ” 19 ᒥᓯᐛ ᐸᐃᑯᑕᐤ ᒋ ᐃᑎᓱᒪᐤ ᐊᓂᔭ ᓂᓱ ᑭᔭ ᓂᔅᑐ ᐊ ᑕᔨᒋ ᑭᔭ ᒥᓯᐛ ᑯᑎᑲ ᐊᓂᔭ ᑲᓄᐛᔨᒪᔨᒋ ᐊᐛᓯᓴ᙮ “ᐊᐅᑯᔪᐤ ᐅᔭ ᐛᒧᒡ ᐸᐃᑯᑕᐤ ᒐ ᐃᑕᒄ ᐃᓴᐅ ᓂᒋᔅᑯᐛᒂ 20 ᑭᔭ ᒋᑭ ᐎᑕᐛᐤ, ‘ᓂᐦᐃ, ᒋᑦ ᐊᑐᔅᒐᔭᑭᓐ ᒐᑭᑉ ᐅᑕᒡ ᐸᑐᑕᐤ,’ ” ᐛᔅ ᒐᑭᑉ ᒋ ᐃᑕᔨᑎᒻ, “ᓂᑭ ᒥᔽᔨᑎᒪᐊᐤ ᐅᔭ ᒥᔨᐛᐅᓇ ᐅᒡ ᑭᔭ ᐃᔅᐱ ᓂᒋᔅᑯᐅᑲ, ᒂᔄᓐ ᓂᑭ ᐛᐸᔨᑎᒪᒄ᙮” 21 ᒋ ᓂᑲᓂᑎᓴᐊᒻ ᐅᒥᔨᐛᐅᓇ ᑭᔭ ᒋ ᑕᐤ ᐊᓐᑕ ᐸᐃᑯᑎᐱᔅᑲᐛ᙮ ᒐᑭᑉ ᑲ ᒪᓴᐊᑦ ᐊᓐᒋᓇ Genesis 32.22-31 (Proper-13 Year A, C) 22 ᐸᐃᑯᑕᐤ ᐊᓂᔭ ᑕᐱᔅᑲᔨᒡ ᒂ ᐅᓂᑦ ᒐᑭᑉ, ᐛᑎᓇᑦ ᐊ ᓂᓯᔨᒋ ᐎᐛ, ᐊ ᓂᓯᔨᒋ ᐅᑯᐸᓇᔎᒪ ᑭᔭ ᑲ ᐸᐃᑯᓴᐳᔨᒋ ᐅᑦ ᐊᐛᓯᒪ ᑭᔭ ᒂ ᑎᔅᑭᒥᑲᓯᑕᐊᑦ ᐊᓐᑕ ᐊᐃᐛᓯᔨᒡ ᒐᐳᒃ ᓯᐱᔪᐤ᙮ 23 ᑲᐤ ᒂ ᐃᑐᑕᑦ ᐊᓐᑕ ᑲ ᐎᒋᑦ ᑭᔭ ᒂ ᐃᑎᓴᐛᑦ ᐊᐛᓯᓴ ᑭᔭ ᐊᑎᓴᐊᐧᒃ ᑯᑎᑲ ᑲ ᑎᐱᔨᐛᐅᓯᑦ ᒐᒂᓂᔪᐛ ᐊᓐᑕ ᐃᑕᒐᑲᒻ ᑲ ᑕᔨᒋ ᐎᐧᑲᓂᓴ᙮ 24 ᒥᒄ ᐎᔾ ᒂ ᑕᑦ ᐊᓐᑕ ᐊ ᐸᐃᑯᓯᑦ᙮ ᐊᑯ ᑕᑯᓯᓂᔨᒋ ᓇᐸᐛ ᑭᔭ ᒥᔭᓯᐧᑲᑯᑦ ᐃᔅᐱᔅ ᐊᒺᔭ ᐸᑕᐱᓂᔨᒡ᙮ 25 ᐃᔅᐱ ᒐᔅᒐᔨᑕᐧᒃ ᐊᓐ ᓇᐸᐤ ᐊᑲ ᒋ ᑲᓂᔪᐅᑦ ᐊ ᒪᓯᒐᑦ, ᐛᑕᒪᐛᑦ ᒐᑭᐸ ᐅᑐᐧᑭᓂᔨᒡ ᑭᔭ ᒂ ᑯᑎᑯᑕᐛᑦ᙮ 26 ᐊᑯ ᐊᓐ ᓇᐸᐤ ᐊᑕᑦ, “ᐸᔅᑎᓂ ᐛᔅ ᓴᔅ ᒐᑲᑦ ᐛᐱᓐ᙮” ᒐᑭᑉ ᒂ ᐃᑕᑦ, “ᓇᒪ ᒋᑭ ᐱᔅᑎᓂᑎᓐ ᐸᑐᔅ ᒋ ᓱᐛᔨᑕᑯᐎᔨᓇ᙮” 27 ᐊᑯ ᓇᐸᐤ ᐊᑕᑦ, “ᐎᑎᒧᐎ ᒋᑦ ᐃᓯᓂᐧᑲᓱᐅᓐ᙮” ᒐᑭᑉ ᐃᑕᐤ, “ᒐᑭᑉ ᓂᑦ ᐃᓯᓂᐧᑲᑎᑯᐅᓐ᙮” 28 ᐊᑯ ᓇᐸᐤ ᐊᑕᑦ, “ᓇᒪ ᓴᔅ ᒐᑭᑉ ᒋᑭ ᐃᓯᓂᐧᑲᑎᑯᐅᓐ᙮ ᔅᒋ ᒪᓴᐊᐤ ᒋᓴᒪᓂᑐᐤ ᑭᔭ ᐃᔪᒡ ᑭᔭ ᔅᒋ ᑲᓂᔪᐅᓐ; ᐊᑯ ᐃᔅᕋᐃᓪ ᒋᑭ ᐃᓯᓂᐧᑲᓱᓐ᙮” 29 ᐊᑯ ᒐᑭᑉ ᑲ ᑯᒂᒋᒪᑦ, “ᐎᑎᒧᐎ ᒪ ᒋᑦ ᐃᓯᓂᐧᑲᓱᐅᓐ᙮” ᒥᒄ ᒋ ᐃᑎᑯᐤ ᓇᐸᐛ, “ᒐᒂᓐ ᐛᒋ ᐎᔅᒐᔨᑎᒥᓐ ᓂᑦ ᐃᓯᓂᐧᑲᓱᐅᓐ ?” ᐊᑯ ᒂ ᓱᐛᔨᑕᑯᐛᑦ ᒐᑭᐸ᙮ 30 ᒂ ᐃᔅᒋᔄᑦ ᒐᑭᑉ, “ᓂᒋ ᐛᐱᒪᐤ ᒋᓴᒪᓂᑐᐤ ᑭᔭ ᐊᔅᒄ ᓂ ᐱᒪᑎᓯᓐ,” ᐊᑯ ᐱᓂᐊᓪ ᒂ ᐃᓯᓂᐧᑲᑕᐧᒃ ᐊᓂᔭ ᐃᑕᐅᓂᔪᐤ᙮ 31 ᒋᒋᓯᑲᔪᐤ ᐃᔅᐱ ᑲ ᔅᑐᑕᑦ ᐊᓐᑕ ᐱᓇᐃᐅ ᑭᔭ ᐛᔅ ᑲᒋ ᒪᓴᐊᑦ ᐊᓐᒋᓇ, ᒋ ᒪᔅᒋᐱᔪᐤ ᐅᑎ ᐱᒧᑕᐧᒃ᙮ 32 ᐃᔭᐱᒡ ᐊᓄᒡ ᑲᓯᑲᒡ ᐃᔅᕋᐃᓪ ᐅᑦ ᐊᓂᔅᑯᑕᐸᓇ ᓇᒪ ᒥᒋᔪᐛ ᐅᑈᒪᐅᑯᔪᐤ, ᐛᔅ ᐊᑯᑕ ᐊᓐᑕ ᑲ ᐅᑕᒪᐅᑯᑦ ᐊᓐᒋᓇ ᒐᑭᑉ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.