ᒐᓂᓯᔅ 3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊ ᐎᑕᑭᓄᐅᒡ ᐃᔪᒡ ᐊᑲ ᐅᒋ ᑕᑈᑎᒺᒡ ᒋᓴᒪᓂᑐᐛ ᐅᑦ ᐃᑎᓱᐛᐅᓂᔪᐤ Genesis 2.15-17, 3.1-7 (Lent-1 Year A)

¹ ᐊᑎᓯᑦ ᒥᓯᐛ ᐊᐛᓯᔅ ᒋᓴᒪᓂᑐᐤ ᑲ ᐅᓯᐊᑦ, ᒋᓇᐱᒄ ᒥᒄ ᒋ ᐅᒋ ᑭᔅᒋᑕᐤ ᐊ ᐎᔭᓯᒪᑦ ᐊᐛᔪᐛ, ᐃᔅᐱᔅ ᑯᑎᒂ ᐊᐛᓯᓴ, ᐸᐃᒂᐤ ᒋ ᓇᑕᐤ ᐃᔎᐛ ᐊᑯ ᐊᑕᑦ, “ᑕᑈ ᐊ ᒋ ᐃᔅᒋᔄᐤ ᒋᓴᒪᓂᑐᐤ ᒐ ᐊᑲ ᒋ ᒥᒋᔭᒄ ᒥᓂᓴ ᒥᔅᑎᑯᒡ ᐅᒡ ᐅᑕ ᓂᑕᐅᒋᑕᑭᓂᒡ ?”

² ᐊᑯ ᐃᔎᐤ ᐊᑕᑦ, “ᓇᒪ, ᒋᓴᒪᓂᑐᐤ ᓇᒪ ᐅᒋ ᐃᔅᒋᔄᐤ ᐅᔭ, ᒋᓴᒪᓂᑐᐤ ᓂᒋ ᐃᑎᑯᓇᓐ ᒐᒋ ᒥᒍᐅᒋᒡ ᒥᓂᓴ ᒥᓯᐛ ᒥᔅᑎᑯᒡ ᐅᒡ ᐅᑕ ᐊ ᑕᔨᒋ ᓂᑕᐅᒋᑕᑭᓂᒡ᙮

³ ᒥᒄ ᒋᓴᒪᓂᑐᐤ ᒋ ᐃᔅᒋᔄᐤ ᒐ ᐊᑲ ᐅᒋ ᒥᒋᔭᒡ ᒥᓂᓴ ᐊᓐᑕ ᒥᔅᑎᑯᒡ ᑕᑕᐅᒡ ᐊ ᒋᒥᓱᑦ ᓂᑕᐅᒋᑕᑭᓂᒡ, ᒋᓴᒪᓂᑐᐤ ᒋ ᐃᔅᒋᔄᐤ ᒐ ᐊᑲ ᒥᒋᔭᒡ ᐊᓂᔭ ᒥᓂᓴ ᑭᔭ ᒪᒃ ᓇᔅᒡ ᒐ ᐊᑲ ᑕᒋᓂᒪᒡ᙮ ᐃᑐᑎᒪᒐ ᒪᒃ ᐅ, ᓂᑭ ᐳᓂᐱᒪᑎᓯᓇᓐ᙮”

⁴ ᐊᑯ ᒋᓇᐱᒄ ᐊᑕᑦ ᐃᔎᐛ, “ᓇᒪ, ᓇᒪ ᑕᑈᓄᐤ᙮ ᓇᒪ ᒋᑭ ᐳᓂᐱᒪᑎᓯᓇᐛᐤ

⁵ ᒋᓴᒪᓂᑐᐤ ᒋ ᐃᔅᒋᔄᐤ ᐅᔭ ᐅᓴᒻ ᒋᔅᒐᔨᑎᒻ ᒥᒍᐛᒂ ᐊᓂᔭ ᒥᓂᓴ ᒋᑭ ᑭᒐᑕᐛᔨᑕᑯᓯᓇᐛᐤ, ᒋᑭ ᒋᔅᒐᔨᑕᓇᐛᐤ ᐊ ᒥᔽᒡ ᑭᔭ ᒪᔭᑎᓯᐅᓐ, ᒧᔭᒻ ᒋᓴᒪᓂᑐᐤ᙮”

⁶ ᒋ ᐛᐸᑎᒻ ᐃᔎᐤ ᐊᔅᐱᔅ ᒥᔽᓯᔨᒡ ᑭᔭ ᐊ ᒥᔽᔨᒡ ᒐᒋ ᒥᒋᓇᓄᐎᒡ; ᐃᔭᐱᒡ ᒋᔅᒐᔨᑎᒻ ᒥᒋᑦ ᐊᐛᓐ ᐊᓂᔭ ᒥᓂᓴ ᒋᐸ ᑭᒐᑕᐛᔨᑕᑯᓱᐤ ᑭᔭ ᓇᔅᒡ ᒋ ᓇᓂᑐᐛᔨᑎᒻ ᐃᔎᐤ ᒐᒋ ᑭᒐᑕᐛᔨᑕᑯᔅᑦ, ᐊᑯ ᐛᑎᓇᐧᒃ ᐊᓂᔭ ᒥᓂᓴ, ᒂ ᒥᒋᑦ ᑭᔭ ᒂ ᒥᔭᑦ ᐱᔅᒐ ᐅᓇᐸᒪ ᑭᔭ ᐎᔾ ᓇᐸᐤ ᒪᒋᑦ᙮

⁷ ᑲᒋ ᒥᒋᒡ, ᒂ ᑭᒐᑕᐛᔨᑕᑯᓯᒡ ᑭᔭ ᒂ ᒋᔅᒐᔨᑕᒡ ᐊ ᒧᓴᔅᑭᑕᒡ᙮ ᐊᑯ ᐛᑎᓇᒡ ᐊ ᒪᒥᓴᔨᒋ ᓂᐱᔭ ᐊᓐᑕ ᒥᔅᑎᑯᒡ ᐅᒡ ᑭᔭ ᒂ ᒪᒧᒂᑕᒡ ᒐᒋ ᐊᑯᓇᐎᓱᒡ᙮

Genesis 3.8-15 (Proper-5 Year B)

⁸ ᐛᑕᑯᓯᔨᒡ ᐸᑐᐛᐅᒡ ᑎᐸᔨᒋᒐᓱᐤ ᒋᓴᒪᓂᑐᐛ ᐸᒧᑕᔨᒋ ᐊᓐᑕ ᓂᑕᐅᒋᑕᑭᓂᒡ, ᒂ ᒋᒋᐸᔨᑐᒡ ᑭᔭᓱᒡ ᐊᓐᑕ ᒥᓇᔎᒡ ᒐ ᐊᑲ ᒋ ᐛᐱᒥᑯᒡ᙮

⁹ ᐊᑯ ᒋᓴᒪᓂᑐᐤ ᑎᔭᑈᑕᑦ ᓇᐸᐛ ᐊᑕᑦ, “ᐊᑕᒻ, ᑕᓐᑕ ᐊ ᑕᔨᓐ ?”

¹⁰ ᐊᑯ ᓇᐸᐤ ᐊᑕᑦ ᒋᓴᒪᓂᑐᐛ, “ᒋ ᐸᑕᑎᓐ ᒪᒂᒡ ᐸᒧᑕᔨᓐ ᓂᑕᐅᒋᑕᑭᓂᒡ; ᒂ ᑯᔅᑕᒋᔭᓐ ᐛᔅ ᐊ ᒧᓴᔅᑭᑕᔭᓐ, ᒂ ᒋᒋᐸᑕᔭᓐ ᒐᒋ ᑲᓱᔭᓐ᙮”

¹¹ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᑯᒂᒋᒪᑦ ᓇᐸᐛ ᐊᑕᑦ, “ᐊᐛᓐ ᑲ ᐃᑎᔅᒃ ᐊ ᒧᓴᔅᑭᑕᔨᓐ ? ᓇᒪ ᒋ ᐅᒋ ᒥᒋᓇᐛᐤ ᐊ ᒥᓂᓴ ᐊᓐᑕ ᒥᔅᑎᑯᒡ ᐅᒡ ᑲ ᐃᑎᑎᑯᒡ ᒐ ᐊᑲ ᐅᒋ ᒥᒋᔭᒄ ?”

¹² ᐊᑯ ᓇᐸᐤ ᐊᑕᑦ ᒋᓴᒪᓂᑐᐛ, “ᐊᓐ ᐃᔎᐤ ᑲ ᐅᓯᐃᑦ ᑭᔭ ᑲ ᒥᔨᓐ ᒐᒋ ᑕᑦ ᐅᑕ ᐊ ᑕᐅᒡ, ᐊᐅᑯᓐ ᑭᔭ ᒪᔨᑦ ᒐᒋ ᒥᒍᐅᒡ᙮”

¹³ ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᐊᑕᑦ ᐊᓂᔭ ᐃᔎᐛ, “ᒐᒂᓐ ᐅ ᐛᒋ ᐃᑐᑎᒥᓐ ?” ᐃᔎᐤ ᐃᑕᐤ ᒋᓴᒪᓂᑐᐛ, “ᒋᓇᐱᒄ ᐊᓐ ᓂᒋ ᐎᔭᓯᒥᒄ ᐊᑯ ᑭᑈ ᒪᒍᐅᒡ᙮”

¹⁴ ᑎᐸᔨᒋᒐᓱᐤ ᒋᓴᒪᓂᑐᐤ ᐃᑕᐤ ᐊᓂᔭ ᒋᓇᐱᒂ, “ᐅᓴᒻ ᐅ ᑲ ᐃᓯ ᐃᑐᑎᒥᓐ, ᒪᐅ ᒐ ᐃᓯ ᐊᓏᔨᒥᑯᔨᓐ ᒋᔾ ᐊ ᐸᐃᑯᓯᔨᓐ, ᐊ ᑕᑎᓯᑦ ᒥᓯᐛ ᐊᐛᓯᔅ ᒋᔾ ᓇᒪ ᒋᑭ ᒋ ᓇᔅᒡ ᐃᔭᐱᑕᔨᒥᑯᐅᓐ; ᐊᓄᒡ ᑲᓯᑲᒡ ᒋᑭ ᐅᑎᒋᐱᔪᐤ ᒋᔅᑭᑕᒡ ᒋᑭ ᐅᒡ ᓱᔅᑯᐱᔪᓐ, ᑭᔭ ᐊ ᐎᓇᒂᒡ ᐊᔅᒋᔾ ᒋᑭ ᒥᒋᓐ ᒐ ᐃᔅᐱᔅ ᐱᒪᑎᓯᔨᓐ᙮

¹⁵ ᓂᑭ ᑐᑕᓐ ᒋᔾ ᑭᔭ ᐃᔎᐤ ᒐᒋ ᐛᐧᑲᑎᑐᔭᒄ, ᑭᔭ ᒋᑦ ᐊᐛᓯᒥᒡ ᑭᔭ ᐎᔾ ᐅᑦ ᐊᐛᓯᒪ ᒋᑭ ᐛᐧᑲᑎᑐᐅᒡ᙮ ᒥᔅᑲᔎᐛ ᒋᑭ ᐅᑕᒥᔅᑎᒂᓇᐅᑯᒡ᙮ ᑭᔭ ᒋᔾ ᒥᔅᑯᐅᑥᐛ ᒋᑭ ᒪᒂᑎᒺᓐ ᐅᑐᑎᓄᐛᐛ᙮”

¹⁶ ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᔨᒪᐊᑦ ᐃᔎᐛ ᐊᑕᑦ, “ᒪᐅ ᒐ ᐃᓯ ᐊᓏᔨᒥᑯᔨᓐ ᐅᓴᒻ ᐅ ᑲ ᐃᓯ ᐃᑐᑎᒥᓐ, ᑕᑥᐤ ᐊ ᐊᓱᐛᐱᒪᐅᓱᐎᓂ, ᒋᑭ ᐊᐧᑯᓯᓐ ᑭᔭ ᐛᐃᔪᐅᒋ ᒋᑦ ᐊᐛᓯᒻ ᐊᑎᑐᐤ ᒋᑭ ᐊᐧᑯᓯᓐ᙮ ᒥᒄ ᒋᒋᐛ ᒋᑭ ᓂᑐᐛᔨᑕᓐ ᒐᒋ ᑕᐅᑦ ᐊ ᑕᑦ ᒋᓇᐸᒻ, ᑭᔭ ᐎᔾ ᒋᑭ ᐅᒋᒪᐅ᙮”

¹⁷ ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᔨᒪᐊᑦ ᓇᐸᐛ ᐊᑕᑦ, “ᐅᓴᒻ ᒋᔾ ᑲ ᓂᑐᑐᐅᑦ ᒋᐅ ᐊ ᐃᑎᔅᒃ ᑭᔭ ᑲ ᒥᒋᔨᓐ ᒥᓂᓴ ᐊᓐᑕ ᒥᔅᑎᑯᒡ ᐅᒡ ᑲ ᐃᑎᑕᓐ ᒐ ᐊᑲ ᒥᒋᔨᓐ, ᒋᔾ ᑭᔭ ᒋᑭ ᐊᓏᔨᒥᑯᐅᓐ᙮ ᐅᓴᒻ ᐊᑲ ᐅᒋ ᓂᑐᑐᐎᔨᓐ, ᐊᓯᑯᒻ ᒋᓯᑲᐛ ᒐ ᐃᔅᐱᔅ ᐱᒪᑎᓯᔨᓐ, ᓇᒪ ᒋᑭ ᒋ ᒥᔅᑲᓐ ᒥᒋᒻ ᒧᔅᑎᔅᑭᒥᒡ ᒧᔭᒻ ᐅᔅᑭᒡ ᑲᒋ ᐃᑎᔨᓐ᙮

¹⁸ ᒥᒋᒥᔅᑯᓱᐛ ᒥᒄ ᒋᑭ ᓂᑕᐅᒋᓇ ᐊᓐᑕ ᒧᔅᑎᔅᑭᒥᒡ ᐃᔅᐱᔅ ᒪᒃ ᐊ ᒥᔽᒡ ᓂᑕᐅᒋᑕᑭᓐ ᑭᔭ ᒋᑭ ᐱᐸᒧᑕᓐ ᓄᒋᒥᒡ ᐊ ᓇᓂᑐᐛᐸᑎᒥᓐ ᒥᒋᒻ᙮

¹⁹ ᒋᒋᐛ ᒋᑭ ᐅᔅᑯᔨᓐ ᐊᑐᔅᒐᔨᓐ ᒐ ᐅᒋ ᑲᔅᑎᓂᒥᓐ ᒥᒋᒻ ᒐ ᒥᒋᔨᓐ ᐃᔅᐱᔅ ᐅᑎᒋᐱᔨᒐ ᒐ ᐳᓂᐱᒪᑎᓯᔨᓐ ᑭᔭ ᒥᓄᐛᒡ ᒧᔅᑎᔅᑭᒥᓇᑯᓯᔨᓇ᙮ ᒐ ᒋᔅᒋᔨᓐ ᐊᓯᔅᒍᒡ ᑲ ᐅᒋ ᐅᓯᐃᑯᔨᓐ, ᒋᔾ ᐅ ᐊᓯᔅᒍᐤ ᒥᒄ, ᑭᔭ ᐳᓂᐱᒪᑎᓯᓇ, ᐊᓯᔅᒍᐤ ᒥᓐ ᑲᐤ ᒐ ᐃᓯᓇᑯᓯᔨᓐ᙮”

²⁰ ᓂᔅᑎᒻ ᓇᐸᐤ ᐊᑕᒻ ᒋ ᐃᓯᓂᐧᑲᓱᐤ᙮ ᐃᑉ ᒋ ᐃᓯᓂᐧᑲᑕᐤ ᐎᐛ ᐊᑕᒻ; ᐱᒪᑎᓯᐅᓐ ᐃᑥᒥᑭᓐ ᐃᑉ, ᐛᔅ ᐎᔾ ᒋᑭ ᐅᑲᐎᒪᐤ ᒥᓯᐛ ᐊᐛᔪᐛ ᒐ ᐱᒪᑎᓯᔨᒋ᙮

²¹ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐅᑎᓇᑦ ᐊᐛᓯᔅᐅᔭᓇ ᒐᒋ ᐅᓯᑕᑦ ᐊᐱᒋᑕᐅᓇ ᑭᔭ ᒂ ᒥᔭᑦ ᐊᑕᒪ ᑭᔭ ᐎᐎᐛ ᒐᒋ ᐳᔅᑭᒥᔨᒋ᙮

²² ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᔅᒋᔄᑦ, “ᐅᓴᒻ ᑲ ᒥᒋᑦ ᐊᓂᔭ ᒥᓂᓴ ᑲ ᐃᑎᒃ ᒐ ᐊᑲ ᒋ ᒥᒋᑦ᙮ ᐃᔪᐤ ᓴᔅ ᒋᔅᒐᔨᑎᒻ ᐊ ᒥᔽᔨᒡ ᑭᔭ ᒪᔭᑎᓯᐅᓂᔪᐤ ᒧᔭᒻ ᒋᔭᓄᐤ᙮ ᓇᒪ ᒋᑭ ᒋ ᑕᑈᑐᐛᓄᐤ ᒐᒋ ᐅᒋ ᐅᑎᓇᐧᒃ ᒥᓂᓴ ᐊᓐᑕ ᐱᒪᑎᓯᐅ-ᒥᔅᑎᑯᒡ ᐅᒡ ᒐ ᒥᒋᑦ ᑭᔭ ᑲᒋᒡ ᒐᒋ ᐱᒪᑎᓯᑦ᙮”

²³ ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᑲᑎᓴᐛᑦ ᓇᐸᐛ ᑭᔭ ᐃᔎᐛ ᐊᓐᑕ ᐃᑎᓐ ᓂᑕᐅᒋᑕᑭᓂᒡ ᐅᒡ᙮ ᒋ ᐃᑎᓴᐛᐤ ᒐᒋ ᓂᑕᐅᒋᑕᔨᒋ ᐅᒥᒋᒥᔪᐤ᙮ ᒋᓴᒪᓂᑐᐤ ᒋ ᐊᐱᒋᐊᐤ ᐊᓯᔅᒍᐛ ᑲ ᐅᓯᐊᑦ ᓇᐸᐛ, ᒧᔅᑎᔅᑭᒥᔪᐤ ᒋᑭ ᒧᓇᐊᒻ ᒐᒋ ᐅᒋ ᐱᒪᑎᓯᐅᑦ᙮

²⁴ ᑲᒋ ᐃᒐᑎᓴᐛᑦ ᒋᓴᒪᓂᑐᐤ ᓇᐸᐛ ᐊᓐᑕ ᑲ ᑎᔭᑦ, ᐊᓐᒋᓇ ᒋ ᐱᔅᑎᓇᐤ ᒐᒋ ᒋᐱᑲᐳᐎᔨᒋ ᐛᐱᓄᑕᒡ ᐊᓐᑕ ᐛᒋ ᐱᒐᓄᐎᒡ ᓂᑕᐅᒋᑕᑭᓂᒡ ᒐ ᐊᑲ ᐊᐛᓐ ᒋ ᐅᑎᑕᑦ ᐱᒪᑎᓯᐅᐤ ᒥᔅᑎᒂ᙮ ᐃᔭᐱᒡ ᓂᑐᐱᔪᐅ-ᒧᐧᑯᒪᓂᔪᐤ ᒧᔭᒻ ᐊ ᐃᔅᑯᑕᐎᒡ ᒥᓯᐛ ᐊ ᐃᔅᐱᔨᒡ ᒋ ᑎᑎᒻ ᒐ ᐊᑲ ᒋ ᐃᑐᑕᑦ ᐊᓐᑕ ᐊᐛᓐ ᒐᒋ ᐅᒋ ᐅᑎᑕᑦ ᐱᒪᑎᓯᐅᐤ ᒥᔅᑎᒂ᙮