ᒐᓂᓯᔅ 28 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᐊᑯ ᐊᐃᓯᒃ ᐊᑎᓴᐛᑦ ᐊᐛᔪᐛ ᒐ ᐎᑎᒧᐛᐎᔨᒋ ᒐᒋ ᓂᑐᐛᐱᒥᑯᑦ ᒐᑭᐸ᙮ ᐃᔅᐱ ᐸᒐᔨᒋ ᒐᑭᐸ ᐅᐱᒍᐎᔭᓂᒋᐛᐱᒡ᙮ ᐊᐃᓯᒃ ᒋ ᐊᑎᒥᔅᑯᐛᐤ ᑭᔭ ᒂ ᐃᑕᑦ, “ᐊᑲᐎᔭ ᒋᑭ ᐎᒋᒪᐤ ᐃᔎᐤ ᑲᐃᓇᓐ ᐊᔅᒋᒡ ᐅᒡ᙮

² ᒥᔅᑯᒡ ᐸᑕᓐ ᐊᕋᒻ ᐃᑐᑕ, ᐸᑎᐅᓪ ᒋᒧᓱᒻ ᐅᑦ ᐃᑕᐅᓂᒡ ᑭᔭ ᐸᐃᒄ ᐊᓐᑕ ᐅᔅᒋᓂᒋᔎᔅ ᒐ ᐎᒋᒥᑦ, ᐸᐃᒄ ᐅᑕᓂᓴ ᓚᐸᓐ ᒍᐧᑯᒥᔅ᙮”

³ ᒂ ᐃᑕᑦ ᐊᐃᓯᒃ, “ᑭᒪ ᒋᓴᒪᓂᑐᐤ ᐊᓐ ᒥᓯᐛ ᐊᓯ ᓱᐧᑲᑎᓯᑦ, ᐃᑐᑕᐧᒃ ᒐᒋ ᐃᔅᐱᔪᑦ ᒥᔪ ᒐᒂᓂᔪᐤ᙮ ᑭᒪ ᒥᒐᑦ ᐊᐛᓴ ᒥᔨᔅᒃ ᑭᔭ ᒥᒐᑎᒡ ᒋᑦ ᐊᓂᔅᑯᑕᐸᓐᒡ ᐊᑯ ᒪᒃ ᒐ ᒥᒐᑐᔅᑲᓇᓯᒡ᙮

⁴ ᑭᒪ ᒋᓴᒪᓂᑐᐤ ᒥᔨᔅᒃ ᑭᔭ ᒋᑦ ᐊᓂᔅᑯᑕᐸᓇ ᐊᓂᔭ ᐊᔅᒋᔪᐤ ᒋᒧᓱᒪ ᐊᑉᕋᐊᒪ ᑲ ᐊᓱᑎᒧᐛᑦ᙮ ᐊᑯ ᒪᒃ ᒐ ᑎᐸᔨᑎᒥᓐ ᐅ ᐊᔅᒋᔾ ᐊᓐᑕ ᐊᓄᒡ ᐛᒋᔨᓐ ᒧᔭᒻ ᒪᓐᑕᐤ᙮”

⁵ ᑲᒋ ᐛᒋᔭᒪᑦ ᐊᐃᓯᒃ, ᐸᑕᓐ ᐊᕋᒻ ᒋ ᐃᑎᓴᐛᐤ ᒐᑭᐸ, ᐊᓐᑕ ᓚᐸᓇ ᐎᒋᔨᒡ ᐅᑲᐎᔭ ᐅᔅᑕᓯᔪᐛ᙮ ᐸᑎᐅᓚ ᒋ ᐅᑯᓯᑕᑯᐤ ᓚᐸᓐ, ᐊᕋᒻ ᐃᔪᐤ ᑲ ᐃᓯᓂᐧᑲᑕᑭᓄᐅᑦ ᐸᐃᒄ ᐃᔪᐤ᙮

ᐃᓴᐅ ᐎᒋᒥᒪᐤ ᐃᔅᒪᐃᓚ ᐅᑕᓂᓯᔪᐛ

⁶ ᐃᓴᐅ ᒋ ᐎᑎᒪᑯ ᐊᐛᔪᐛ ᒐᒂᓂᔪᐤ ᐊᐃᓯᒃ ᑲ ᐃᑕᑦ ᒐᑭᐸ᙮ ᐊᐅᑯᔪᐤ ᐅᔭ ᑲ ᐅᒋ ᒋᔅᒐᔨᑕᐧᒃ ᐅᑕᐎᔭ ᐊᑲ ᐅᒋ ᓂᑐᐛᔨᒪᔨᒋ ᒐᑭᐸ ᒐᒋ ᐎᒋᒪᔨᒋ ᑲᐃᓇᓐ ᐃᔎᐛ ᒧᔭᒻ ᐎᔾ ᑲ ᑐᑕᐧᒃ᙮

⁷ ᒋ ᐸᑎᒻ ᐃᔭᐱᒡ ᒐᑭᐸ ᑲ ᑕᑈᑐᐛᔨᒋ ᐅᓂᒋᐃᑯᔪᐛ ᑭᔭ ᓴᔅ ᑲ ᐃᑐᑕᔨᒋ ᐊᓐᑕ ᐸᑕᓐ ᐊᕋᒻ᙮

⁸ ᒂ ᓂᔅᑐᑕᑎᓱᑦ ᐃᓴᐅ ᐊᓂᔭ ᐅᑕᐎᔭ ᐊᐃᓯᑲ ᐊᑲ ᒥᔽᔨᑕᔨᒋ ᑲᐃᓇᓐ ᐃᔎᐛ

⁹ ᐊᑯ ᓇᑐᐛᐱᒪᑦ ᐃᔅᒪᐃᓚ ᐊᑉᕋᐊᒪ ᐅᑯᓯᔪᐛ ᑭᔭ ᓇᐳᐅᐛᑦ ᐅᑕᓂᓯᔪᐛ ᒪᐊᓚᑕ, ᐊᓂᔭ ᓇᐸᐃᐅᑕ ᐅᓯᒥᔪᐛ᙮

ᒐᑭᑉ ᑲ ᐳᐛᒧᑦ ᐊᓐᑕ ᐸᑕᓪ Genesis 28.10-19a (Proper-11 Year A)

¹⁰ ᐃᔅᐱ ᒐᑭᑉ ᑲ ᓂᑭᑕᐧᒃ ᐱᕐ-ᓯᐸ, ᐦᐊᕋᓐ ᐃᑕᒐ ᒋ ᐃᑐᑕᐤ᙮

¹¹ ᒋ ᐅᑎᑐᒻ ᐸᐃᒄ ᐃᑕᐅᓂᔪᐤ ᑭᔭ ᒂ ᑕᑦ ᐊᓐᑕ ᑕᐱᔅᑲᔨᒡ, ᐛᔅ ᒋ ᐸᒋᓯᒧᔪᐛ ᐱᓯᒺ᙮ ᒋ ᐅᑎᓇᐤ ᐊᓐᑕ ᐸᐃᒄ ᐊᓯᓂᔭ, ᒋ ᐊᔭᐤ ᒪᒃ ᒐᒋ ᐊᔎᓯᒧᑦ᙮ ᐊᑯᑕ ᒪᒃ ᓂᐊᐃᓯᐧᒃ ᒐᒋ ᓂᐸᑦ᙮

¹² ᒋ ᐳᐛᒧᐤ, ᒋ ᐛᐸᑎᒻ ᑕᑕᐧᑯᔅᑲᓇᓇ ᐊ ᐃᔨᑭᔅᑲᔨᒋ ᐊᔅᒋᒡ ᐅᒋ ᐃᔅᐱᒥᒡ ᒋᒋᒋᓯᑯᒡ ᐃᔅ ᐊᑎᒧᐃᒡ᙮ ᒋ ᐛᐱᒪᐤ ᒋᓴᒪᓂᑐᐛ ᐅᑦ ᐊᓐᒋᓂᒥᔪᐛ ᐊ ᓂᑎᒋᐛᔨᒋ ᑭᔭ ᐊ ᓴᑭᒋᐛᔨᒋ ᐊᓐᑕ ᑕᑕᑯᔅᑲᓇᓂᒡ᙮

¹³ ᑎᐸᔨᒋᒐᓱᐤ ᐃᔅᐱᒥᒡ ᒋ ᓂᐳᐤ ᑭᔭ ᒋ ᐃᑕᐤ, “ᓂᔾ ᐊᐅᒄ ᑎᐸᔨᒋᒐᓱᐤ, ᒍᑕᐎᔾ ᐊᑉᕋᐊᒻ ᐅᒋᓴᒪᓂᑐᒪ ᑭᔭ ᐊᐃᓯᒃ ᐅᒋᓴᒪᓂᑐᒪ, ᒋᑭ ᒥᔨᑎᓐ ᐅ ᐊᔅᒋᔾ ᐊᓐᑕ ᐸᒥᓯᓂᔨᓐ, ᒋᔾ ᒋᑭ ᑎᐱᔨᐛᐅᓯᓐ ᑭᔭ ᒋᑦ ᐊᓂᔅᑯᑕᐸᓐᒡ᙮

¹⁴ ᓂᑭ ᒥᒐᑐᐛᐅᒡ ᒋᑦ ᐊᓂᔅᑯᑕᐸᓐᒡ ᒐ ᐊᑲ ᐊᐛᓐ ᒋᒋᒪᑦ, ᒋᑭ ᒥᓯᑕᐱᔪᐅᒡ ᐊᑎᒪᐱᓯᒧᒡ ᑭᔭ ᐛᐱᓄᑕᒡ ᐃᔅ, ᒋᐛᑎᓄᒡ ᑭᔭ ᐱᓯᒧᑕᒡ ᐃᔅ᙮ ᒋᔾ ᐅᒋ ᑭᔭ ᒋᑦ ᐊᓂᔅᑯᑕᐸᓐᒡ ᓂᑭ ᒥᔪᑐᑐᐛᐅᒡ ᒥᓯᐛ ᐊ ᑕᑐᔅᑲᓇᓯᒡ ᐅᑕ ᐊᔅᒋᒡ᙮

¹⁵ ᐛᐸᑕ ᓂᑦ ᐊᓱᑎᒪᒐᓐ ᒐ ᐎᒐᐅᑕᓐ ᑭᔭ ᒐ ᑭᓄᐛᔨᒥᑕᓐ ᒥᒄ ᐊᓐᑕ ᐊ ᐃᑐᑕᔨᓐ ᑭᔭ ᑲᐤ ᒋᑭ ᐸᓱᐅᑎᓐ ᐅᑕ ᐊᔅᒋᒡ᙮ ᓇᒪ ᒋᑭ ᒋ ᓂᑭᑎᑎᓐ ᐸᑎᒪ ᒋ ᐃᑐᑎᒪᓇ ᒥᓯᐛ ᐊᓐ ᑲ ᐊᓱᑎᒪᑕᓐ᙮”

¹⁶ ᒋ ᐸᑯᐱᔪᐤ ᒐᑭᑉ ᑭᔭ ᒂ ᐃᔅᒋᔄᑦ, “ᑕᐤ ᐅᑕ ᑎᐸᔨᒋᒐᓱᐤ᙮ ᑕᐤ ᐅᑕ ᐃᑕᐅᓂᒡ, ᑭᔭ ᓇᒪ ᓂ ᐅᒋ ᒋᔅᒐᔨᑕᓐ᙮”

¹⁷ ᒋ ᑯᔅᑕᒍᐤ ᑭᔭ ᒂ ᐃᔅᒋᔄᑦ, “ᒋᒋᐛ ᓂ ᑯᔅᑕᒋᓐ ᐊ ᑕᔭᓐ ᐅᑕ ᐃᑕᐅᓂᒡ, ᐊᐎᒐ ᐅᔭ ᐎᒡ ᒋᓴᒪᓂᑐᐤ ᑭᔭ ᐊᐅᑯᐤ ᒋᒋᒋᓯᒄ ᐃᔎᑕᒻ᙮”

¹⁸ ᐎᐱᒡ ᒐᒋᓴᐸ ᒋ ᐅᓂᔪᐤ ᒐᑭᑉ, ᒋ ᐅᑎᓇᐤ ᐊᓂᔭ ᐊᓯᓂᔭ ᑲᔎᓯᒧᑦ ᑭᔭ ᒂᒋ ᒥᔭᑦ ᒐᒋ ᒋᔅᒋᓄᐛᒋᑕᑦ ᒧᔭᒻ ᑲ ᓄᑯᓯᔅᑕᑯᑦ ᒋᓴᒪᓂᑐᐛ ᐊᓐᑕ ᐃᑕᐅᓂᒡ, ᒂ ᐳᓇᐧᒃ ᐱᒥᔪᐤ ᐊᓐᑕ ᑕᐧᑯᒡ ᐊᓯᓂᒡ᙮

¹⁹ ᐸᑕᓪ ᒋ ᐃᓯᓂᐧᑲᑎᒻ ᐊᓂᔭ ᐃᑕᐅᓂᔪᐤ, ᒋᓴᒪᓂᑐᐤ ᐎᒡ ᐊ ᐃᑥᒥᑲᒡ᙮ (ᓗᔅ ᐅᔅᑭᒡ ᒋ ᐃᓯᓂᐧᑲᑕᐤ ᒥᒋᒪ ᑲ ᑎᒂᒡ ᐊᓐᑕ ᐅᑕᓇᐤ᙮)

²⁰ ᒂ ᐊᓱᑎᒪᒐᑦ ᒐᑭᑉ, ᐊ ᐃᔅᒋᔄᑦ, “ᐎᒐᐅᒐ ᒋᓴᒪᓂᑐᐤ ᑭᔭ ᓇᑭᑐᐛᔨᒥᒐ ᐊ ᐱᐸᒧᑕᐅᒡ ᑭᔭ ᒥᔨᒐ ᒥᒋᒥᔪᐤ ᒐ ᒥᒍᐅᒡ ᑭᔭ ᐊᐱᒋᑕᐅᓇ ᒐ ᒋᔅᑭᒧᒡ

²¹ ᑭᔭ ᒥᓐ ᑲᐤ ᒥᔪ ᑎᑯᓯᓂᔭᓇ ᐊᓐᑕ ᐛᒋᑦ ᓄᑕᐎᔾ, ᐊᑯ ᒪᒃ ᒐ ᐅᒋᓴᒪᓂᑐᒥᔭᓐ ᐅᑎᐸᔨᒋᒐᐤ᙮

²² ᐅ ᐊᓯᓂᔾ ᑲ ᒋᒥᑕᔭᓐ, ᐊᑯᑕ ᐅᑕ ᐃᑕᐅᓐ ᒐ ᐊᔭᒥᐊᔅᑕᑯᔨᓐ ᑭᔭ ᓂᑦ ᐊᓱᑎᒪᒐᓐ ᐸᐃᑯᔪᐤ ᑕᑐᐤ ᒪᐃᔨᓐ ᒐᒂᓂᔪᐛ ᑲᐤ ᐸᐃᒄ ᒋᑭ ᒥᔨᑎᓐ᙮”