ᒐᓂᓯᔅ 23 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᐳᓂᐱᒪᑎᓯᑦ ᑭᔭ ᑲ ᓇᐃᐧᑯᐛᑭᓄᐅᑦ ᓴᕋ

¹ ᑲᒋ ᒥᒐᑐᐳᓂᔨᒡ ᐃᔅᐱ ᓴᕋ ᐸᐃᑯ ᒥᑕᓯᒥᑎᓄᐤ ᐊᓱ ᓂᓱᔪᐤ ᐊᓱ ᓂᔄᐅᑕᒡ ᑲ ᐃᑕᑐᐳᓇᓯᑦ,

² ᒋ ᐳᓂᐱᒪᑎᓯᐤ ᓴᕋ ᐊᓐᑕ ᑲᐃᓇᓐ ᐊᔅᒋᒡ᙮ ᑭᕆᐊᑦ ᐊᕐᐸ ᐅᑕᓇᔪᐤ, ᐊᓐ ᐊᓄᒡ ᐃᑉᕈᓐ ᐊ ᐃᓯᓂᐧᑲᑕᒡ᙮ ᒋ ᓇᐧᑲᑕᔨᒧᐤ ᐊᑉᕋᐊᒻ ᑲ ᐳᓂᐱᒪᑎᓯᔨᒋ᙮

³ ᐊᑯ ᐊᑉᕋᐊᒻ ᓇᑭᑕᐧᒃ ᐊᓐᑕ ᑲ ᐱᒥᓯᓂᔨᒋ ᐎᐛ ᑭᔭ ᐊᑐᑕᑦ ᐅᑕᓇᐤ ᐃᔎᑕᒥᒡ ᐊᓐᑕ ᑲ ᓂᒋᔅᑲᑐᐎᒋ ᐊᑦ ᐃᔪᐛ᙮ ᒋ ᐃᑕᐤ ᒪᒃ,

⁴ “ᓂ ᐎᒋᓐ ᐅᑕ ᒋᑦ ᐊᔅᒋᐛᒡ ᒧᔭᒻ ᒪᓐᑕᐤ ᑭᔭ ᓇᒪ ᓂ ᑎᐸᔨᑕᓐ ᐊᔅᒋᔾ ᐊᓐᑕ ᒐᒋ ᓇᐃᐧᑯᐅᒃ ᓂᐅ᙮ ᐸᒋ ᐊᑕᒥᒄ ᐱᔅᒐ ᒐᒋ ᐊᔭᔭᓐ ᒋᑦ ᐊᔅᒋᐛᐤ᙮”

⁵ ᐊᑉᕋᐊᒻ ᒋ ᐃᑎᑯᐤ ᐊᑦ ᐃᔪᐛ,

⁶ “ᓂᑐᑐᐅᓇᓐ ᒪ ᐅᒋᒪᐤ, ᒋᔅᑕᔨᒥᑯᐅᓐ ᒧᔭᒻ ᐊ ᓱᐧᑲᑎᓯᑦ ᑲᓂᑲᓂᔅᑲᐧᒃ ᐅᑕ ᐊ ᐃᑕᔭᒡ᙮ ᐎᔭᐸᑕ ᒋᐱᐃᒋᐛᑉ ᐊ ᒥᔽᒡ ᒐᒋ ᓇᐃᐧᑯᐅᑦ ᒋᐅ᙮ ᓇᒪ ᐊᐛᓐ ᒋᑭ ᑯᔅᑎᐃᒄ ᒋᐱᐃᒋᐛᐱᔪᐤ ᒐᒋ ᓇᐃᐧᑯᐅᒥᑎ ᒋᐅ᙮”

⁷ ᐊᑯ ᐸᓯᑯᑦ ᐊᑉᕋᐊᒻ ᑭᔭ ᐊ ᒋᔅᑕᔨᒪᑦ ᒋ ᓄᐛᑲᐳᔅᑐᐛᐤ᙮

⁸ ᒂ ᐃᑕᑦ, “ᓂᔭᐃᑎᒧᐛᒂ ᒐᒋ ᓇᐃᐧᑯᐅᒃ ᓂᐅ ᐅᑕ ᒋᑦ ᐊᔅᒋᐛᒡ, ᐊᑯ ᒐᓯᒋᒪᒄ ᐃᑉᕋᓐ, ᓱᐊᕐ ᐅᑯᓴ,

⁹ ᒐᒋ ᐊᑕᒥᑦ ᒪᒃᐱᓚ ᐛᑎᑯᔪᐤ ᐎᔾ ᑕᐱᔨᐛᐅᓯᑦ, ᐊ ᐅᓂᔎᔨᒡ ᐅᓂᑕᐅᒋᑕᑭᓂᒡ ᐊ ᑎᑯᓂᔨᒡ᙮ ᓄᑎᒻ ᐊᑐᑕᒡ ᓂᑭ ᒋᓯᐧᑲᓱᓐ ᐅᓂᒂᔅᑲᓐ ᐊᔅᒋᔾ ᐅᑕ ᒋᑦ ᐊᔅᒋᐛᒡ᙮”

¹⁰ ᐃᑉᕋᓐ ᐎᒡ ᐃᔪᐛ ᒋ ᐎᑎᐱᒪᐤ ᑭᔭ ᒋ ᓂᑐᑐᐛᐤ ᐊ ᐃᔅᒋᔄᔨᒋ ᐊᑉᕋᐊᒪ ᑭᔭ ᒂ ᐃᑕᑦ ᐊ ᐸᑕᑯᑦ ᒥᓯᐛ ᐊᑦ ᐃᔪᐛ ᑲ ᐸᒋ ᐃᑐᑕᔨᒋ ᐊᓐᑕ ᐅᑕᓇᐤ ᐃᔎᑕᒥᒡ᙮

¹¹ “ᓇᒪ ᐅᒋᒪᐤ, ᓂᑐᑐᐎ, ᐊᓂᒪ ᓂᑕᐅᒋᑕᑭᓐ ᑭᔭ ᐊ ᑎᒂᒡ ᐊᓐᑕ ᐛᑎᒄ ᒋ ᒥᔨᑎᓐ᙮ ᐊ ᐛᐱᒥᔅᒡ ᓂᑦ ᐃᔨᒥᒡ ᒋ ᒥᔨᑎᓐ, ᐊᑯ ᒪᒃ ᒐᒋ ᓇᐃᐧᑯᐅᑦ ᒋᐅ᙮”

¹² ᐊᑉᕋᐊᒻ ᒥᓐ ᐸᐃᒂᐤ ᐊ ᒋᔅᑕᔨᒪᑦ ᒋ ᓄᐛᑲᐳᔅᑐᐛᐤ ᐊᑦ ᐃᔪᐛ᙮

¹³ ᒋ ᐃᑕᐤ ᒪᒃ ᐃᑉᕋᓇ ᒥᓯᐛ ᐊᐛᔪᐛ ᐊ ᐸᑕᑯᑦ, “ᒋᑭ ᑯᒂᒋᒥᑎᓐ ᒪ ᒐᒋ ᓂᑐᑐᐎᓐ, ᓄᑎᒻ ᓂᑭ ᐃᔭᓐ ᓂᑕᐅᒋᑕᑭᓐ᙮ ᐅᑎᓇ ᓱᓇᔭᐤ ᐊᑯ ᒪᒃ ᐊᓐᑕ ᒐᒋ ᓇᐃᐧᑯᐅᒃ ᓂᐅ ᑲ ᐳᓂᐱᒪᑎᓯᑦ᙮”

¹⁴ ᐃᑉᕋᓐ ᒋ ᐃᑕᐤ ᐊᑉᕋᐊᒪ,

¹⁵ “ᓂᑐᑐᐎ, ᒥᒄ ᓇᐤ ᒥᑕᓯᒥᑎᓄᐤ ᐛᐱᓯᐅᓱᓇᔭᐱᔎ ᐃᔅᐱᑕᔨᑕᑯᓐ ᐊᓐ ᐊᔅᒋᔾ, ᒥᒄ ᐊᑐᒡ ᔅᒋ ᐎᔭᔨᒪᔨᑎᒥᑯᓇᓄᐤ ᐊ ᐃᑐᑕᒡ᙮ ᒪᒋ ᑭᔭ ᓇᐃᐧᑯᐤ ᒋᐅ᙮”

¹⁶ ᐊᑉᕋᐊᒻ ᒋ ᓂᔅᑯᒪᐤ ᐃᑉᕋᓇ ᑭᔭ ᒋ ᑎᐸᐸᑲᒧᐛᐤ ᐛᐱᓯᐅᓱᓇᔭᐱᔎ ᑲ ᐃᔅᒋᔄᔨᒋ ᑲ ᐸᑎᑯᔨᒋ ᐊᑦ ᐃᔪᐛ ᐊᑐᑕᐃᒡ᙮ ᓇᐤ ᒥᑕᓯᒥᑎᓄᐤ ᐛᐱᓯᐅᓱᓇᔭᐱᔎ᙮ ᒋ ᑎᐸᐸᑲᐃᑭᓄᐤ ᐛᐱᓯᐅᓱᓇᔭᐱᔎ ᒧᔭᒻ ᐊᑕᐛᐤ ᐃᔨᓯᒡ ᑲ ᐃᓯ ᑎᐸᐸᑲᐊᒡ ᐛᐱᓯᐅᓱᓇᔭᐱᔎ ᐊᓐᑕ ᐊᑕᐛᓄᔨᒋ᙮

¹⁷ ᐊᑯ ᐃᑉᕋᓐ ᒪᒃᐱᓚ ᐅᓂᑕᐅᒋᑕᑭᓐ ᐊᓐᑕ ᒪᒻᕋ ᐛᐱᓄᑕᒡ ᑭᔭ ᐊᓐᑕ ᑲ ᑎᑯᓂᔨᒡ ᐛᑎᑯᔪᐤ, ᒋᒡ ᒥᔅᑎᒂ ᓂᑕᐅᒋᑕᑭᓂᒡ ᑲ ᑕᔨᒋ ᒋ ᐱᔅᑎᓂᒧᐛᑭᓄᐤ᙮

¹⁸ ᐊᑉᕋᐊᒻ ᒐᒋ ᑎᐱᔨᐛᐅᓯᑦ ᐊ ᐛᐱᒥᑯᑦ ᐊᑦ ᐃᔪᐛ ᐊᓂᔭ ᑲ ᐸᒋ ᐃᑐᑕᔨᒋ ᐊᓐᑕ ᐅᑕᓇᐤ ᐃᔎᑕᒥᒡ᙮

¹⁹ ᑲᒋ ᐃᔭᑦ ᐊᔅᒋᔪᐤ ᐊᑉᕋᐊᒻ, ᐛᑎᑯᒡ ᐊᓐᑕ ᒋ ᓇᐃᐧᑯᐛᐤ ᐎᐛ ᓴᕋᔨᒋ᙮ ᑲᐃᓇᓐ ᐊᔅᒋᒡ ᑎᒂᓐ ᐊᓐ ᐃᑕᐅᓐ, ᐛᐱᓄᑕᒡ ᒪᒻᕋ ᐅᑕᓇᒡ, ᐊᓄᒡ ᐃᑉᕈᓐ ᐊ ᐃᓯᓂᐧᑲᑕᒡ᙮

²⁰ ᐊᑯ ᐊᑉᕋᐊᒻ ᒋ ᒥᔨᑯᐤ ᐊᑦ ᐃᔪᐛ ᓂᑕᐅᒋᑕᑭᓂᔪᐤ ᒧᔭᒻ ᓂᒂᔅᑲᓐ ᐊᔅᒋᔪᐤ ᑭᔭ ᐛᑎᑯᔪᐤ ᐊᓐᑕ ᑲ ᑎᑯᓂᔨᒡ᙮