ᒐᓂᓯᔅ 22 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᒪᓂᑐᐤ ᑲ ᑯᒂᒐᐊᑦ ᐊᑉᕋᐊᒪ Genesis 22.1-14 (Proper-8 Year A)

¹ ᓇᓇᒐ ᒋᓴᒪᓂᑐᐤ ᒋ ᑯᒂᒐᐊᐤ ᐊᑉᕋᐊᒪ ᑭᔭ ᒂ ᐃᑕᑦ, “ᐊᑉᕋᐊᒻ !” ᐊᑉᕋᐊᒻ ᐊᑕᑦ, “ᒐᒂᓐ ᑎᐸᔨᒋᒐᓱᐤ ? ᒋ ᓂᑐᑕᑎᓐ᙮”

² ᐊᑯ ᒋᓴᒪᓂᑐᐛ ᐊᑎᑯᑦ, “ᐅᑎᓐ ᒋᑯᔅ, ᑲ ᐸᐃᑯᓯᑦ ᒥᒄ ᒋᑯᔅ ᐊᐃᓯᒃ ᐊᓐ ᒪᐅᒡ ᑲ ᓴᒋᐃᑦ ᑭᔭ ᒐ ᐃᑐᑕᔭᒄ ᐊᓐ ᐱᔅᑯᑎᓇᐤ ᒐ ᐛᐸᑎᔨᑕᓐ ᐊᓐᑕ ᒧᕋᔭ ᐊᔅᒋᒡ᙮ ᒐ ᐱᔅᑎᓂᒐᔨᓐ ᒋᑯᔅ ᐊᓐᑕ ᐱᔅᑎᓂᒐᐅᓇᐱᔅᑯᒡ ᒧᔭᒻ ᒥᑐᔅᑕᐊᒪᒐᐅᓐ᙮”

³ ᒥᓐ ᒋᔭᒋᓴᐸᔭᔨᒡ ᐎᐱᒡ ᒋ ᐅᓂᔪᐤ ᐊᑉᕋᐊᒻ ᑭᔭ ᒋ ᐛᑕᔭᐤ ᑲᓂᐧᑲᑎᓯᔨᒋ ᑲᐸᐃᑭᔎᐛ᙮ ᓂᓱ ᒋ ᐅᑎᓇᐤ ᐅᑦ ᐊᐱᒋᐊᑭᓇ ᒐ ᐎᒐᐅᑯᑦ ᑭᔭ ᐅᑯᓴ ᐊᐃᓯᑲ᙮ ᐊᒺᔭ ᔅᑐᑕᑦ, ᐊᑉᕋᐊᒻ ᒋ ᑕᔅᑲᐊᒻ ᒥᑕ ᒐ ᑯᑐᐛᒐᑦ ᑭᔭ ᒋ ᐃᑐᑕᐤ ᐊᓐᑕ ᐃᑕᐅᓂᒡ ᑲ ᐃᑎᑯᑦ ᒋᓴᒪᓂᑐᐛ ᒐᒋ ᐃᑐᑕᑦ᙮

⁴ ᓂᔅᑐ ᒋᓯᑲᐛ ᑲᒋ ᐃᔅᐱᔅ ᐱᒧᑕᒡ, ᐊᑉᕋᐊᒻ ᒋ ᔭᐛᐸᑎᒻ ᐱᔅᑯᑎᓇᔪᐤ᙮

⁵ ᐊᑯ ᐊᑉᕋᐊᒻ ᐊᑕᑦ ᐅᑦ ᐊᐱᒋᐊᑭᓇ, “ᓂᔾ ᑭᔭ ᓂᑯᔅ ᓂᑭ ᐃᑐᑕᓇᓐ ᓇᑕ ᐱᔅᑯᑎᓇᒡ ᑭᔭ ᓂᑭ ᒥᔭᓇᓐ ᒋᓴᒪᓂᑐᐤ ᒥᑐᔅᑕᐊᒪᒐᐅᓂᔪᐤ, ᐊᑯ ᒪᒃ ᑲᐤ ᒐ ᓂᑐᐛᐱᒥᑕᒡ᙮ ᐊᑯ ᑕᒄ ᐅᑕ ᐊᓯᒡ ᑲᓂᐧᑲᑎᓯᑦ ᑲᐸᐃᑭᔎᐤ ᐸᑎᒪ ᑎᑯᓯᓂᔭᒐ᙮”

⁶ ᐊᑉᕋᐊᒻ ᒋ ᒥᔭᐤ ᐅᑯᓴ ᒥᑕ ᒐᒋ ᑕᐧᑯᓂᒥᔨᒋ᙮ ᐎᔾ ᒧᐧᑯᒪᓂᔪᐤ ᑭᔭ ᐃᔎᔅᒐᔪᐤ ᒐ ᑯᑐᐛᒐᑦ ᒋ ᑕᐧᑯᓂᒻ᙮ ᒪᒧᐤ ᐊ ᓂᓯᒡ ᒂ ᔅᑐᑕᒡ᙮

⁷ ᐊᐃᓯᒃ ᒋ ᐃᔨᒧᐤ ᑭᔭ ᒂ ᐃᑕᑦ ᐅᑕᐎᔭ ᐊᑉᕋᐊᒪ, “ᓄᑕ !” ᐊᑉᕋᐊᒻ ᒋ ᐃᑕᐤ, “ᒐᒂᓐ ᓂᑯᓴ ?” ᐊᐃᓯᒃ ᐃᑕᐤ, “ᒋ ᑭᓄᐛᔨᑕᓇᓄᐤ ᒥᑕ ᑭᔭ ᐃᔎᔅᒐᐤ ᒐ ᑯᑐᐛᒐᔭᐧᒄ, ᒥᒄ ᑕᓐ ᐊᓐ ᒪᔭᑕᓂᔅ ᒐ ᒥᑐᔅᑕᐊᒪᒐᔭᐧᒄ ?”

⁸ ᐊᑉᕋᐊᒻ ᐃᑕᐤ᙮ “ᓂᑯᓴ, ᐎᔾ ᑎᐱᔨᐛ ᒋᓴᒪᓂᑐᐤ ᒋᑭ ᐅᑎᓇᐤ ᒪᔭᑕᓂᓴ ᒐ ᒥᑐᔅᑕᐊᒪᒐᐛᐧᒄ᙮” ᐊᑯ ᒪᒧᐤ ᐊᑎ ᐱᒧᑕᒡ᙮

⁹ ᐃᔅᐱ ᐛᑎᑕᒡ ᐃᑕᐅᓂᔪᐤ ᑲ ᐊᔨᒧᑎᒪᑯᑦ ᒋᓴᒪᓂᑐᐛ, ᒋ ᐅᓯᑕᐤ ᒪᒃ ᐊᑉᕋᐊᒻ ᐱᔅᑎᓂᒐᐅᓇᐱᔅᑯᔪᐤ ᑭᔭ ᒋ ᑕᐧᑯᑎᔅᑕᐤ ᐊᓐᑕ ᒥᑕ᙮ ᒋ ᒪᑯᐱᑕᐤ ᐅᑯᓴ ᐊᐃᓯᑲ ᑭᔭ ᐱᔅᑎᓂᒐᐅᓇᐱᔅᑯᒡ ᒂ ᑕᑯᒋᐱᔅᑎᓇᑦ ᒥᑎᒡ᙮

¹⁰ ᐊᑯ ᐛᑎᓇᐧᒃ ᒧᐧᑯᒪᓂᔪᐤ ᒐᒋ ᓂᐸᐊᑦ ᐅᑯᓴ᙮

¹¹ ᓯᔅᒋᑯᒡ ᑎᐸᔨᒋᒐᓱᐛ ᐅᑦ ᐊᓐᒋᓂᒥᔪᐛ ᒋᒋᒋᓯᑯᒡ ᒋ ᐅᒋ ᑕᑈᑎᑯ ᐊ ᐃᑎᑯᑦ, “ᐊᑉᕋᐊᒻ ! ᐊᑉᕋᐊᒻ !” ᐊᑉᕋᐊᒻ ᐃᑕᐤ, “ᓂᑦ ᐃᑕᓐ ᐅᑕ᙮”

¹² ᐊᓐᒋᓇ ᐃᑎᑯᐤ, “ᐊᑲ ᓂᐸᐃ ᒋᑯᔅ, ᐊᑲ ᐃᔭᐱᒡ ᐊᐧᑯᐃᔾ, ᐛᔅ ᐊᓄᒡ ᓂ ᒋᔅᒐᔨᑕᓐ ᐊ ᒋᔅᑕᔨᒥᑦ ᑭᔭ ᓂᔭᐃᑐᐅᑦ ᒋᓴᒪᓂᑐᐤ᙮ ᓇᒪ ᒋ ᐅᒋ ᐊᓏᑕᓐ ᑲ ᐸᐃᑯᓯᑦ ᒋᑯᔅ ᒐᒋ ᐱᔅᑎᓂᒪᒐᔨᓐ᙮”

¹³ ᒋ ᐅᐸᐳᐤ ᐊᑉᕋᐊᒻ ᑭᔭ ᒂ ᐛᐱᒪᑦ ᓇᐸ ᒪᔭᑕᓂᓴ ᐊᓴᑲᔅᑯᒋᒪᔨᒋ ᐅᑦ ᐊᔅᑭᓂᔪᐛ ᐊᓐᑕ ᓯᑲᒡ᙮ ᒋᓇᑕᐤ ᑭᔭ ᒂ ᐅᑎᓇᑦ ᑭᔭ ᐸᔅᑎᓂᒐᑦ ᓇᐸ ᒪᔭᑕᓂᓴ ᒧᔭᒻ ᒥᑐᔅᑕᐊᒪᒐᐅᓂᔪᐤ, ᐊᑲ ᒥᔅᑯᒡ ᐊᓂᔭ ᐅᑯᓴ᙮

¹⁴ ᒪᒃ “ᑎᐸᔨᒋᒐᓱᐤ ᑲ ᐅᑎᓂᒪᒐᑦ,” ᒋ ᐃᓯᓂᐧᑲᑎᒻ ᐊᑉᕋᐊᒻ ᐊᓂᔭ ᐃᑕᐅᓂᔪᐤ ᑭᔭ ᐃᔪᒡ ᐃᔭᐱᒡ ᐊᓄᒡ ᑲᓯᑲᔨᒡ ᒂ ᐃᔅᒋᔄᒡ, “ᐊᓐᑕ ᐅᐱᔅᑯᑎᓇᒥᒡ ᑎᐸᔨᒋᒐᓱᐤ, ᒋᑭ ᐅᑎᓂᒪᒐᐤ᙮”

¹⁵ ᒥᓄᐛᒡ ᒋᒋᒋᓯᑯᒡ ᐛᒋ ᑕᑈᑎᑯᑦ ᑎᐸᔨᒋᒐᓱᐛ ᐅᑦ ᐊᓐᒋᓂᒥᔪᐛ᙮

¹⁶ ᒂ ᐃᑎᑯᑦ, “ᓂᑦ ᐃᓯᓂᐧᑲᓱᐅᓂᒡ ᐅᒡ ᓂ ᑐᑕᓐ ᐊᓱᑎᒪᒐᐎᓐ ᐃᔅᒋᔄᐤ ᐅᑎᐸᔨᒋᒐᐤ, ᐛᔅ ᐊᓐ ᑎᔭᑈᑐᐎᓐ ᑭᔭ ᐊᑲ ᐅᒋᑯᔅᑎᔨᓐ ᑲ ᐸᐃᑯᑦ ᒋᑯᔅ᙮

¹⁷ ᒋᑭ ᒥᔪᑐᑕᑎᓐ, ᓂᑭ ᒥᒐᑐᐛᐅᒡ ᒋᑦ ᐊᐛᓯᒥᒡ ᒧᔭᒻ ᐊᔅᐱᒐᑎᒡ ᐅᒐᑭᑕᐧᑯᒡ ᒋᓯᑯᒡ ᑭᔭ ᒧᔭᒻ ᐃᔭᑲᐤ ᐊᓐᑕ ᓇᓯᐸᑎᒥᒡ᙮ ᒋᑭ ᓴᒂᐅᒡ ᒋᑦ ᐊᐛᓯᒥᒡ ᐊᓂᔭ ᑲ ᐛᐧᑲᑎᑯᒡ ᑭᔭ ᐅᑦ ᐃᑕᐅᓂᔪᐛ ᒋᑭ ᓴᑯᑕᐛᐅᒡ᙮

¹⁸ ᒋᑦ ᐊᐛᓯᒥᒡ ᐅᒡ ᓂᑭ ᒥᔪᑐᑐᐛᐅᒡ ᒥᓯᐛ ᐃᔪᒡ ᐊᓐᑕ ᐊᔅᒋᒡ, ᐊᐅᑯᐤ ᒋᑎᐸᐊᒪᑯᓯᐅᓐ ᐊᒋ ᑕᑈᔭᔨᒥᔨᓐ᙮”

¹⁹ ᐊᑯ ᐊᑉᕋᐊᒻ ᑭᔭ ᐊᐃᓯᒃ ᑲᐤ ᒋ ᓂᑐᐛᐱᒪᐅᒡ ᐊᐱᒋᐊᑭᓇ ᑭᔭ ᒪᒧᐤ ᒋ ᐃᑐᑕᐅᒡ ᐱᕐ-ᓯᐸ ᐊᓐᑕ ᑲ ᐎᒋᑦ ᐊᑉᕋᐊᒻ᙮

ᓇᐅᕐ ᐅᑯᓴ

²⁰ ᓇᓇᒐ ᐊᑉᕋᐊᒻ ᒋ ᐎᑎᒧᐛᑭᓄᐤ ᐎᐧᑲᓂᓴ ᓇᐅᕋ ᑭᔭ ᐎᐛ ᒥᓪᑲ ᔭᓇᐤ ᐊᑕᑎᓯᔨᒋ ᐅᑦ ᐊᐛᓯᒥᔪᐛ᙮

²¹ ᓂᔅᑎᒧᓴᓇ ᐅᔅ, ᐎᐧᑲᓂᓴ ᐳᔅ, ᑭᔭ ᑭᒥᐅᓪ, ᐊᕋᒻ ᐅᑕᐎᔭ᙮

²² ᒐᓯᑦ, ᐊᓱ, ᐱᓪᑕᔅ, ᒋᑦᓚᑉ, ᑭᔭ ᐸᑎᐅᓪ᙮

²³ ᕋᐸᑲ ᒋ ᐅᑕᐎᔪᐤ ᐸᑎᐅᓚ᙮ ᒥᓪᑲ ᔭᓇᐤ ᒋ ᓂᑕᐅᒋᐃᒪᐤ ᓇᐅᕋ ᐅᑯᓯᔪᐛ, ᐊᑉᕋᐊᒪ ᐎᐧᑲᓂᓯᐛ᙮

²⁴ ᒋ ᑕᔪᐛ ᑯᑎᑲ ᐎᐛ ᓇᐅᕐ, ᕈᒪ ᒋ ᐃᓯᓂᐧᑲᓱᔪᐛ᙮ ᓇᐅᕐ ᑭᔭ ᕈᒪ ᒋᓇᐅᔪᐛ ᐅᑯᓱᐛᐛ, ᑎᐸ, ᑲᐊᒻ, ᑕᐊᔅ ᑭᔭ ᒪᐊᑲ᙮