ᒐᓂᓯᔅ 20 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᑉᕋᐊᒻ ᑭᔭ ᐊᐱᒪᓕᒃ

¹ ᐱᓯᒧᑕᒡ ᒋ ᐃᓯ ᐊᑐᒐᐤ ᐊᑉᕋᐊᒻ ᑭᔭ ᑎᔅᑐᐎᒡ ᑲᑎᔅ ᑭᔭ ᓱᕐ ᒂ ᐎᒋᑦ, ᑭᕋᕐ ᐛᐃᐱᔅᒋᔅ ᒋ ᑕᐤ,

² ᒪᒂᒡ ᐊᓐᑕ ᑲ ᑕᑦ, ᐊᑉᕋᐊᒻ ᒋ ᐃᑕᐤ ᐃᔪᐛ ᐊᐅᓯᒥᑦ ᐊᓂᔭ ᐎᐛ ᓴᕋᔨᒋ᙮ ᐊᑯ ᐊᐱᒪᓚᒃ, ᑭᕋᕐ ᒋᓴᐅᒋᒪᐤ, ᒋ ᓂᑐᒪᐤ ᓴᕋᔨᒋ ᑭᔭ ᒂ ᐅᑎᓇᑦ ᒐ ᐎᐅᑦ᙮

³ ᐸᐃᒂᐤ ᑕᐱᔅᑲᔨᒡ, ᒋᓴᒪᓂᑐᐤ ᒋ ᓄᑯᓯᔅᑐᐛᐤ ᐊᐱᒪᓕᑲ ᐅᐳᐛᒧᐅᓂᔨᒡ ᑭᔭ ᒂ ᐃᑕᑦ, “ᓂᑐᑕ ! ᒋᑭ ᐳᓂᐱᒪᑎᓯᓐ, ᐛᔅ ᐊᓐ ᐃᔎᐤ ᑲ ᐅᑎᓂᑦ ᓴᔅ ᐊ ᓂᐳᐅᑦ᙮”

⁴ ᒥᒄ ᐊᐱᒪᓕᒃ ᓇᒪ ᐅᒋ ᐎᐸᒪᐤ, ᐊᑯ ᒂ ᐃᔅᒋᔄᑦ, “ᑎᐸᔨᒋᒐᓱᐤ, ᓇᒪ ᓂ ᐅᒋ ᒥᒋᑐᑕᓐ᙮ ᑕᐱᔅᑯᓐ ᐊ ᒋᑭ ᓂᐸᐃᓇᓐ ᓂᔾ ᑭᔭ ᐊᓐᒡ ᐃᔪᒡ ᑕᐸᔨᒋᒐᔭᓐ ?

⁵ ᓇᒪ ᓇ ᓂ ᐅᒋ ᐃᑎᒄ ᐊᑉᕋᐊᒻ, ‘ᓂᓯᒻ ᐊᓐ,’ ᑭᔭ ᓇᒪ ᓇ ᐃᔭᐱᒡ ᐅᒋ ᐃᔅᒋᔄᐤ ᓴᕋ, ‘ᓂᔅᑕᔅ ᐊᓐ᙮’ ᓇᒪ ᓂ ᐅᒋ ᐎ ᒥᒋᑐᑕᓐ, ᑯᐃᔅᒄ ᒐᒂᓐ ᓂᑦ ᐃᑐᑕᓐ ᓂᒋ ᐃᑕᔨᑕᓐ᙮”

⁶ ᒋᓴᒪᓂᑐᐤ ᒂ ᓂᔎᐅᓯᐊᑦ, “ᓂ ᒋᔅᒐᔨᑕᓐ ᑯᐃᔅᒄ ᒐᒂᓐ ᓂᑦ ᐃᑐᑕᓐ ᐊᒋ ᐃᑕᔨᑎᒥᓐ, ᓇᒪ ᒋ ᐅᒋ ᒥᔨᑎᓐ ᒐᒋ ᐎᐸᒥᑦ ᓴᕋ, ᐊᑯ ᑭᔭ ᓂᔾ ᔅᒋ ᓂᑲᓂᑎᓐ ᒐᒋ ᐅᓂᑐᑐᐎᓐ᙮

⁷ ᑲᐤ ᒐ ᒥᔨᑦ ᐅ ᓇᐸᐤ ᐎᐛ, ᐛᔅ ᐎᔾ ᐅᒋᔅᒋᐛᐃᒐᓱᐤ ᑭᔭ ᒋᑭ ᐃᔨᒥᑥᒄ ᐊᑯ ᒪᒃ ᒐ ᐊᑲ ᐳᓂᐱᒪᑎᓯᓐ᙮ ᒥᒄ ᐊᑲ ᒋᐛᑎᓴᐅᑕ ᓴᕋ, ᑕᐱᔅᑯᓐ ᒋᔾ ᑭᔭ ᒋᑦ ᐃᔨᒥᒡ ᒋᑭ ᐳᓂᐱᒪᑎᓯᓇᐛᐤ᙮”

⁸ ᐎᐱᒡ ᒥᓐ ᒋᔭᒋᓴᐸᔭᔨᒡ ᐊᐱᒪᓕᒃ ᒋ ᐎᓴᒪᐤ ᒥᓯᐛ ᐅᑦ ᐊᑐᔅᒐᔭᑭᓇ, ᒋ ᐎᑎᒧᐛᐤ ᒥᓯᐛ ᒐᒂᔪᐤ ᑲ ᐛᐸᑕᐧᒃ ᐅᐳᐛᒧᐅᓂᒡ᙮ ᒋᒋᐛ ᒋ ᑯᔅᑕᒋᔪᐛ᙮

⁹ ᐊᑯ ᐊᐱᒪᓕᒃ ᒂ ᐎᓴᒪᑦ ᐊᑉᕋᐊᒪ ᑭᔭ ᒂ ᐃᑕᑦ, “ᒐᒂᓐ ᐅ ᑲ ᑐᑐᐎᔭᒡ ? ᑭᔭ ᑕᓐ ᑲ ᐃᓯ ᐅᓂᑐᑕᑕᓐ ? ᓇᒪ ᒋ ᐅᓂᑐᑕᑎᓐ, ᐊᑯ ᒐᒂᓐ ᒪᒃ ᐛᒋ ᐸᑐᐎᓐ ᑭᔭ ᓂᑦ ᐃᔨᒥᒡ ᐊ ᒥᓴᒡ ᒥᒋᑐᑎᒧᐅᓐ ? ᔅᒋ ᑐᑐᐅᓐ ᐅ ᒐᒂᓐ ᒐ ᐊᑲ ᒋ ᐃᑐᑐᐛᑦ ᑯᑎᒃ ᐊᐛᓐ ᐊᐛᔪᐛ᙮

¹⁰ ᒐᒂᓐ ᒪᒃ ᐛᒋ ᐎᔭᔨᑎᒥᓐ ᐅ ᒐᒋ ᐃᑐᑎᒥᓐ ?”

¹¹ ᐊᑉᕋᐊᒻ ᒋ ᐃᑕᐤ, “ᓂᒋ ᐃᑕᔨᑕᓐ ᐊ ᐊᑲ ᐊᐛᓐ ᐅᑕ ᒋᔅᑕᔨᒪᑦ ᒋᓴᒪᓂᑐᐛ᙮ ᓂᑭ ᐎ ᓂᐸᐃᑯᒡ ᐃᔪᒡ ᐊᑯ ᒪᒃ ᒐ ᐅᑎᓇᒡ ᓂᐎᒋᒪᑭᓇ ᓂᒋ ᐃᑕᔨᒪᐅᒡ᙮”

¹² ᑭᔭ ᑕᑈᓄᐤ, ᓂᐧᑲᓂᔅ ᐊᓐ᙮ ᓂ ᐸᐃᒂᐊᓇᓐ ᓄᑕᐎᓇᓐ ᒥᒄ ᓇᒪ ᓂ ᐸᐃᒂᐊᓇᓐ ᓂᑲᐎᓇᓐ, ᓇᓇᒐ ᒂ ᐎᒋᒥᒃ᙮

¹³ ᐃᔅᐱ ᑲ ᐃᓯᑦ ᒋᓴᒪᓂᑐᐤ ᒐᒋ ᓂᑭᑎᒧᒡ ᓄᑕᐎᔭ ᐎᒋᔪᐤ, ᓂᒋ ᐃᑕᐤ ᓴᕋ, “ᒪᐅ ᒐ ᐃᓯ ᓄᑯᑕᔨᓐ ᐊ ᓴᒋᐃᔨᓐ, ᒥᓯᐛ ᐊᓐᑕ ᒐ ᐃᑐᑕᔭᐧᒄ, ‘ᓂᔅᑕᔅ ᐊᓐ’ ᒐ ᐃᑕᒋᒥᔨᓐ᙮”

¹⁴ ᐊᐱᒪᓕᒃ ᑲᐤ ᒋ ᒥᔭᐤ ᐊᑉᕋᐊᒪ ᐎᐎᔪᐛ᙮ ᐃᔭᐱᒡ ᑭᔭ ᒥᔨᐛᐅᓇ, ᒋᒡ ᒪᔭᑕᓂᓴ, ᒥᒋᑎᒂ, ᓇᐸᐤ ᐊᐱᒋᐊᑭᓇ ᑭᔭ ᐃᔎᐤ ᐊᐱᒋᐊᑭᓇ᙮

¹⁵ ᒂ ᐃᑕᑦ ᐊᑉᕋᐊᒪ, “ᒪᐅ ᓄᑎᒻ ᓂᑦ ᐊᔅᒋᔾ, ᒐ ᐎᒋᔨᓐ ᐊᓐᑕ ᒥᒄ ᐛᐎᒋᐃᔨᓐ᙮”

¹⁶ ᐊᑯ ᒂ ᐃᑕᑦ ᓴᕋᔨᒋ, “ᐸᐃᒂᐤ ᒐᓯᐱᔪᐤ ᓇᒪᔭᐤ ᐛᐱᓯᐅᓱᓇᔭᐱᔎ ᒋᐧᑲᓂᔅ, ᐊᐅᑯᐤ ᒐᒋ ᐛᐸᑎᔭᑭᓄᐅᒡ ᒥᓯᐛ ᒋᑦ ᐃᔨᒧᐛᐅᒡ ᐊ ᒥᔽᑎᓯᔨᓐ, ᒥᓯᐛ ᐊᐛᓐ ᒋᑭ ᒋᔅᒐᔨᑎᒻ ᐊ ᐊᑲ ᐅᒋ ᒥᒋᑐᑕᒥᓐ᙮”

¹⁷ ᐊᑯ ᐊᑉᕋᐊᒻ ᓇᑐᑕᒧᐛᑦ ᒋᓴᒪᓂᑐᐛ ᑭᔭ ᒋᓴᒪᓂᑐᐤ ᒋ ᒥᓏᒋᐊᐤ ᐊᐱᒪᓕᑲ, ᒋᒡ ᐎᒋᒪᑭᓂᔪᐛ ᑭᔭ ᐅᑦ ᐃᔎᐤ ᐊᐱᒋᐊᑭᓂᔪᐛ, ᐊᑯ ᒪᒃ ᒐᒋ ᒥᓐ ᐅᑦ ᐊᐛᓯᒥᔨᒋ᙮

¹⁸ ᐛᔅ ᑎᐸᔨᒋᒐᓱᐤ ᒋ ᓂᑲᐊᒺᐤ ᒐᒋ ᐅᑦ ᐊᐛᓯᒥᔨᒋ ᒥᓯᐛ ᐊ ᑕᔨᒋ ᐃᔎᐛ ᐊᓐᑕ ᐊᐱᒪᓕᑲ ᐅᒋᓴᐅᒋᒪᐅᒋᐛᐱᒡ, ᐛᔅ ᐊᐱᒪᓕᒃ ᑲᒋ ᐅᑎᓇᑦ ᓴᕋᔨᒋ, ᐊᑉᕋᐊᒪ ᐎᐎᔪᐛ᙮