ᒐᓂᓯᔅ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Genesis 1.1-2.4a (Proper-5 Year A)

¹ ᒪᒃ ᒋᓴᒪᓂᑐᐤ ᒋ ᒋᔅᑕᐤ ᑲ ᐅᓯᑕᑦ ᒋᓯᑯᔪᐤ ᑭᔭ ᐊᔅᒋᔪᐤ, ᑭᔭ ᒥᓯᐛ ᒐᒂᔪᐤ ᐊᓐᑕ ᐊ ᑎᑯᓂᔨᒡ᙮

² ᑲ ᐅᑎᒋᐱᔨᒡ ᓂᔄᐅᑕᒡ ᐊ ᒋᓯᑲᔨᒡ, ᒋᓴᒪᓂᑐᐤ ᒋ ᐊᔽᓯᐤ ᑲᒋ ᒥᓯᐛ ᒋᔅᑕᑦ ᐅᑦ ᐊᑐᔅᒐᐅᓐ᙮

³ ᐊᑯ ᒋᓴᒪᓂᑐᐤ ᒂ ᐃᔅᒋᔄᑦ ᒐᒋ ᒋᔅᑕᔨᑕᑯᓂᔨᒡ ᐊᓯᑯᒻ ᓂᔄᐅᑕᒡ ᐊ ᒋᓯᑲᔨᒡ᙮ ᒋ ᐃᑐᑎᒻ ᐅᔭ ᐛᔅ ᒋ ᐊᔽᓯᐤ ᑲ ᓂᔄᐅᑕᒡ ᑕᑐᐤ ᒋᓯᑲᔨᒡ ᑲᒋ ᒋᔅᑕᑦ ᐊ ᐅᓯᑕᑦ ᒥᓯᐛ ᒐᒂᔪᐤ᙮

ᒋᓴᒪᓂᑐᐤ ᑲ ᐃᓯ ᐅᓯᐊᑦ ᓂᔅᑎᒻ ᓇᐸᐛ ᑭᔭ ᓂᔅᑎᒻ ᐃᔎᐛ

⁴ ᐊᐅᑯᐤ ᑲ ᐃᔅᐱᔨᒡ ᒧᔭᒻ ᒋᓴᒪᓂᑐᐤ ᑲ ᐅᓯᑕᑦ ᒋᓯᑯᔪᐤ ᑭᔭ ᐊᔅᒋᔪᐤ᙮

⁵ ᓇᒪ ᐅᒋ ᓂᑕᐅᒋᓐ ᐊᔅᒄ ᒐᒂᓐ ᐅᑕ ᐊᔅᒋᒡ, ᐅᓴᒻ ᑎᐸᔨᒋᒐᓱᐤ ᒋᓴᒪᓂᑐᐤ ᐊᔅᒄ ᓇᒪ ᐅᒋ ᐃᑎᓴᐊᒻ ᐊ ᒋᒧᓂᔨᒡ, ᑭᔭ ᓇᒪ ᐅᒋ ᑕᐤ ᐊᐛᓐ ᒐᒋ ᓂᑕᐅᒋᑕᑦ ᒥᒋᒥᔪᐤ᙮

⁶ ᒥᒄ ᑭᔅᑯᐅᓂᐱᔾ ᒋ ᐸᒋ ᒧᔅᒋᐱᔪᐤ ᐊᓐᑕ ᒧᔅᑎᔅᑭᒥᒡ, ᒐᒋ ᓄᑎᒻ ᓂᐱᐅᔅᑭᒥᑲᒡ᙮

⁷ ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐅᑎᓇᑦ ᐊᓯᔅᒍᐛ ᑭᔭ ᒂ ᐅᓯᐊᑦ ᓇᐸᐛ, ᒋ ᐳᑕᑎᒧᐛᐤ ᐅᔭᔭᐅᓐ ᐅᔅᑯᑎᔨᒡ ᑭᔭ ᒂ ᐃᑐᑐᐛᑦ ᓇᐸᐛ ᒐᒋ ᐱᒪᑎᓯᔨᒋ᙮

⁸ ᑎᐸᔨᒋᒐᓱᐤ ᒋᓴᒪᓂᑐᐤ ᒋ ᓂᑕᐅᒋᑕᐤ ᐊ ᒥᔽᔎᔨᒡ ᓂᑕᐅᒋᑕᑭᓂᔪᐤ ᐊᓐᑕ ᐛᐱᓄᑕᒡ, ᐃᑎᓐ ᐊᓯᓂᐧᑲᑕᔨᒡ᙮ ᐊᑯᑕ ᑲ ᐱᔅᑎᓇᑦ ᐊᓂᔭ ᓇᐸᐛ ᑲ ᐅᓯᐊᑦ᙮

⁹ ᑎᐸᔨᒋᒐᓱᐤ ᒋᓴᒪᓂᑐᐤ ᒋ ᐃᑐᑐᐛᐤ ᒐᒋ ᓂᑕᐅᒋᒋ ᒥᓯᐛ ᑕᑐᐎᒡ ᐊᓯᓇᑯᓯᔨᒋ ᒥᓂᓯᐅ-ᒥᔅᑎᒂ, ᓇᔅᒡ ᐊ ᒥᔪᓯᓯᒡ ᐊ ᒋᑕᐱᒪᑭᓄᐅᒡ ᑭᔭ ᒐᒋ ᓂᑕᐅᒋᒋ ᒥᓂᓴ ᐊ ᒥᔽᒋ ᒐᒋ ᒥᒋᓇᓄᔨᒋ᙮ ᒋ ᐃᑐᑎᒻ ᐃᔭᐱᒡ ᐊᓐᑕ ᑕᑕᐅᒡ ᐊ ᒥᔽᔎᔨᒡ ᓂᑕᐅᒋᑕᑭᓂᔪᐤ ᒐᒋ ᓂᑕᐅᒋᒋ ᐱᒪᑎᓯᔪᐤ ᒥᔅᑎᒂ ᑭᔭ ᒋᔅᒐᔨᑎᒧᐤ ᒥᔅᑎᒂ, ᐃᔪᒡ ᒐ ᐅᒋ ᒋᔅᒐᔨᑕᒡ ᐊ ᒥᔽᔨᒡ ᑭᔭ ᐊ ᒪᔭᑎᓂᔨᒡ᙮

¹⁰ ᒋ ᑎᑯᓐ ᓯᐱᔾ ᐊ ᐱᒥᐱᔨᒡ ᐊᓐᑕ ᐃᑎᓐ ᒐᒋ ᓂᐱᐅᔅᑭᒥᑲᒡ ᒧᔅᑎᔅᑭᒥᔾ, ᒂᔅᑕᒐ ᐃᑎᓐ ᒋ ᓇᐅᔅᑎᒂᐱᔪᐛ᙮

¹¹ ᐊᓂᔭ ᐊ ᓇᐅᔅᑎᒂᒋ, ᐱᓴᓐ ᐃᓯᓂᐧᑲᑕᐤ ᓂᔅᑎᒻ ᓯᐱᔾ᙮ ᑭᔭ ᐱᒪᑭᒥᒍᓱᐤ ᒥᓯᐛ ᐊᓐᑕ ᐦᐊᐱᓚ ᐊᔅᒋᒡ᙮

¹² ᐊᓐᑕ ᐊ ᑎᒂᒡ ᐎᔄᐅᓱᓇᔭᐤ ᓇᔅᒡ ᐊ ᒥᔽᓯᒡ ᑭᔭ ᐊᑲ ᐊᔅᒋᐱᔨᒡ ᒐᒂᓐ ᒐᒋ ᐅᒋ ᐃᔭᔪᐛᒡ, ᑎᑯᓐ ᐃᔭᐱᒡ ᑲᐎᒋᒪᒂᒡ ᐱᒍᐤ ᐊ ᐃᓯᓂᐧᑲᑕᒡ ᑭᔭ ᐊ ᒥᔽᔨᒋ ᐊᓯᓂᓴ ᒧᔭᒻ ᓱᓇᔭᐤ ᐊᓯᓂᓴ ᐊ ᐃᓯᓇᒂᒋ, ᐅᓂᑭᔅ ᐃᓯᓂᐧᑲᑕᐛ᙮

¹³ ᑭᐊᓐ ᐃᓯᓂᐧᑲᑕᑭᓄᐤ ᓂᓱ ᓯᐱᔾ᙮ ᒥᓯᐛ ᐊᓐᑕ ᐃᔅᐱᔪᐤ ᑯᔅ ᐊᔅᒋᒡ᙮

¹⁴ ᑕᐃᑭᕆᔅ ᐃᓯᓂᐧᑲᑕᐤ ᓂᔅᑐ ᓯᐱᔾ, ᐛᐱᓄᑕᒡ ᐊᓐᑕ ᐱᒥᐱᔪᐤ ᐊᓯᕆᔭ ᐊᔅᒋᒡ ᑭᔭ ᔪᑉᕆᑎᔅ ᐃᓯᓂᐧᑲᑕᐤ ᓇᐤ ᓯᐱᔾ᙮

Genesis 2.15-17, 3.1-7 (Lent-1 Year A)

¹⁵ ᑲᒋ ᐅᓯᐊᑦ ᑎᐸᔨᒋᒐᓱᐤ ᒋᓴᒪᓂᑐᐤ ᐊᓂᔭ ᓇᐸᐛ, ᒋ ᐱᔅᑎᓇᐤ ᐊᓐᑕ ᐃᑎᓐ ᓂᑕᐅᒋᑕᑭᓂᒡ ᒐᒋ ᓂᑕᐅᒋᑕᔨᒋ ᑭᔭ ᒐᒋ ᑭᓄᐛᔨᑎᒥᔨᒋ

¹⁶ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᑎᓱᒪᑦ ᓇᐸᐛ, ᐊ ᐃᑕᑦ, “ᒋᑭ ᒋ ᐅᒋ ᒥᒋᓐ ᒥᓂᓴ ᐊᓐᑕ ᒥᓯᐛ ᐊ ᑕᑎᔅᑦ ᒥᔅᑎᒄ ᓂᑕᐅᒋᑕᑭᓂᒡ,

¹⁷ ᒥᒄ ᐊᑲ ᒋᑭ ᒥᒋᓐ ᐅᔭ ᒥᓂᓴ ᐊᓐᑕ ᒋᔅᒐᔨᑎᒧᐤ ᒥᔅᑎᑯᒡ ᑲ ᐅᒋ ᒋᔅᒐᔨᑕᒂᒡ ᐊ ᒥᔽᒡ ᑭᔭ ᐊ ᒪᔭᑎᒡ, ᐊᓐ ᑲᓯᑲᒡ ᒥᒋᔨᓇ ᒐᔅᑎᓇᔅ ᒋᑭ ᐳᓂᐱᒪᑎᓯᓐ᙮”

Genesis 2.18-24 (Proper-22 Year B)

¹⁸ ᒪᒃ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᔅᒋᔄᑦ, “ᓇᒪ ᐃᓯᓇᑯᓐ ᒐᒋ ᐸᐃᑯᓯᑦ ᓇᐸᐤ, ᓂᑭ ᐅᓯᐃᒪᐛ ᐊᐱᒋᐊᑭᓇ ᒐᒋ ᐛᐎᒋᐃᑯᑦ᙮”

¹⁹ ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐅᑎᓇᑦ ᐊᓯᔅᒍᐛ ᑭᔭ ᒂ ᐅᓯᐊᑦ ᒥᓯᐛ ᑕᑐᐎᒡ ᐊᐛᓯᓴ ᑭᔭ ᐱᔭᓱᐛ, ᒂ ᐃᑐᑐᐛᑦ ᐅᔭ ᓇᐸᐛ ᒐᒋ ᐸᑐᐛᑦ ᑕᓐ ᒋᐸ ᐃᓯᓂᐧᑲᑕᔪᐛ᙮ ᐊᓂᔭ ᓇᐸᐤ ᑲ ᐃᓯ ᐎᔭᑦ ᒥᓯᐛ ᐱᒪᑎᓯᐤ ᐊᐛᓯᓴ, ᐊᐅᑯᓐ ᑲ ᐃᓯᓂᐧᑲᑕᑭᓄᔨᒋ᙮

²⁰ ᑲᒋ ᐎᔭᑦ ᓇᐸᐤ ᒥᓯᐛ ᐱᒪᑎᓯᐤ ᐊᐛᓯᓴ ᑭᔭ ᐱᔭᓱᐛ, ᒥᒄ ᐊᓂᔭ ᐊᑎᓯᔨᒋ ᐊᐛᓯᓴ ᑭᔭ ᐱᔭᓱᐛ, ᓇᒪ ᐅᒋ ᑕᔪᐛ ᒐ ᐛᐎᒋᐃᑯᑦ ᑭᔭ ᒐᒋ ᑕᔨᒋ ᐊ ᑕᑦ᙮

²¹ ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐃᑐᑐᐛᑦ ᓇᐸᐛ ᒐᒋ ᒥᔪᒂᒧᐎᒋ, ᒪᒂᒡ ᐅᑎᓂᐸ ᓇᐸᐤ,

²² ᑎᐸᔨᒋᒐᓱᐤ ᒋᓴᒪᓂᑐᐤ ᒋ ᐅᑎᓂᒺᐤ ᐸᐃᒄ ᐅᔅᐱᒐᑭᓂᔪᐤ ᑭᔭ ᑲᐤ ᒂ ᒋᐸᐅᒺᑦ ᐊᓐᑕ ᑲ ᐅᒋ ᐅᑎᓂᒺᑦ᙮ ᒂ ᐅᑎᓇᐧᒃ ᐊᓂᔭ ᐅᔅᐱᒐᑭᓂᔪᐤ ᐊᓐᑕ ᓇᐸᐛ ᐎᔭᔨᒡ ᑲ ᐅᒋ ᐅᑎᓂᒺᑦ, ᒂ ᐃᑐᑕᐧᒃ ᒧᔭᒻ ᐃᔎᒡ ᒐᒋ ᐃᓯᓇᑯᓂᔨᒡ, ᐊᑯ ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐅᑎᓇᑦ ᐃᔎᐛ ᑭᔭ ᒂ ᐛᐸᑎᔭᑦ ᐊᓂᔭ ᓇᐸᐛ᙮

²³ ᐎᔭᐱᒪᑦ ᐃᔎᐛ ᐊᓐ ᓇᐸᐤ, ᒂ ᐃᔅᒋᔄᑦ, “ᐅᒪ ᐊᐛᓐ ᑲ ᐃᓯᓇᑯᔅᑦ ᓂᔾ ᐊᓯᓇᑯᓱᐅᒡ, ᓂᔅᑭᓂᒡ ᐅᒋᐱᔪᐛ ᐅᔅᑭᓇ ᑭᔭ ᓂᔭᒡ ᐅᒋᐱᔪᐤ ᐎᔪᐤ᙮ ᐃᔎᐤ ᒋᑭ ᐃᓯᓂᐧᑲᓱᐤ, ᐛᔅ ᓇᐸᐛ ᐎᔭᔨᒡ ᐅᒋᐱᔪᐤ᙮”

²⁴ ᐊᐅᑯᓐ ᐛᒋ ᐃᓯᓇᒂᒡ, ᒥᓯᐛ ᓇᐸᐤ ᒐ ᓂᑭᑕᑦ ᐅᑕᐎᔭ ᑭᔭ ᐅᑲᐎᔭ ᑭᔭ ᒪᒧᐤ ᒐᒋ ᑕᑦ ᐎᐛ ᐊ ᑕᔨᒋ ᑭᔭ ᒂ ᐃᓯᓇᑯᓯᒡ ᒧᔭᒻ ᐸᐃᒄ ᐊᐛᓐ᙮

²⁵ ᑭᔭ ᓇᐸᐤ ᒪᒃ ᐎᐛ ᒋ ᒧᓴᔅᑭᑕᐅᒡ, ᓇᒪ ᐅᒋ ᑎᑯᓂᔪᐤ ᒐᒋ ᓴᒂᔨᒧᒡ᙮