ᒐᓂᓯᔅ 17 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᑉᕋᒻ ᑭᔭ ᒋᓴᒪᓂᑐᐤ ᑲ ᑐᑕᒡ ᓂᓇᔅᑯᒧᐅᓂᔪᐤ Genesis 17.1-7, 15-16 (Lent-2 Year B)

¹ ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᒋ ᐃᑕᑐᐳᓇᓱᐤ ᐊᑉᕋᒻ ᒥᓐ ᑲ ᓄᑯᓯᔅᑕᑯᑦ ᑎᐸᔨᒋᒐᓱᐛ ᑭᔭ ᒂ ᐃᑎᑯᑦ, “ᓂᔾ ᐅ ᒋᓴᒪᓂᑐᐤ ᒥᓯᐛ ᐊ ᐃᓯ ᓱᐧᑲᑎᓯᑦ᙮ ᓂᑐᑐᐎᓇ ᑭᔭ ᓇᓂᑎᒻ ᑯᐃᔅᒄ ᐃᑐᑎᒥᓇ,

² ᓂᑭ ᑐᑕᓐ ᓂᓇᔅᑯᒧᐅᓐ ᑭᔭ ᒋᑭ ᒥᔨᑎᓐ ᒥᒐᑦ ᐊᓂᔅᑯᑕᐸᓐᒡ ᒐ ᐊᑲ ᒋ ᒋᒪᑭᓄᐎᒡ᙮”

³ ᒋ ᓂᐱᔅᑯᐱᔅᑐᐛᐤ ᐊᑉᕋᒻ ᒋᓴᒪᓂᑐᐛ ᐊ ᒋᔅᑕᔨᒪᑦ ᑭᔭ ᒋᓴᒪᓂᑐᐤ ᒂ ᐃᑕᑦ,

⁴ “ᐊᐅᑯᐤ ᐊ ᐃᓯ ᐊᓱᑎᒪᒐᔭᓐ, ᒋᔾ ᒋᑭ ᐅᑕᐎᒪᐅᓐ ᒥᒐᑦ ᒐ ᑕᑐᔅᑲᓇᓯᒡ ᐃᔪᒡ,

⁵ ᓂ ᒥᔅᑯᑐᓇᓐ ᒋᑦ ᐃᓯᓂᐧᑲᓱᐅᓐ᙮ ᓇᒪ ᒋᑭ ᒋ ᓴᔅ ᐃᓯᓂᐧᑲᓱᓐ ‘ᐊᑉᕋᒻ’, ᒥᒄ ‘ᐊᑉᕋᐊᒻ’ ᒋᑭ ᐃᓯᓂᐧᑲᑎᑯᐅᓐ᙮

⁶ ᒋᑭ ᒥᔨᑎᓐ ᒥᒐᑦ ᐊᓂᔅᑯᑕᐸᓐᒡ ᑭᔭ ᓂᑲᓄᒡ ᐊᓐᑕ ᒋᑭ ᒥᒐᑐᔅᑲᓇᓱᐅᒡ᙮ ᐱᔅᒐ ᒋᑭ ᒋᓴᐅᒋᒪᐅᒡ᙮

⁷ ᒧᔅ ᑲᒋᒡ ᓂᑭ ᑭᓄᐛᔨᑕᓐ ᑲ ᐊᓱᑎᒪᑕᓐ ᑭᔭ ᒋᑦ ᐊᓂᔅᑯᑕᐸᓐᒡ ᓂᑲᓐ ᒐ ᐊᑎ ᐊᓂᔅᒐ ᐱᒪᑎᓯᒡ ᒧᔭᒻ ᑲᒋᒡ ᓂᓇᔅᑯᒧᐅᓐ, ᓂᔾ ᒋᑭ ᐅᒋᓴᒪᓂᑐᒥᑐᐅᓐ ᑭᔭ ᒋᑦ ᐊᓂᔅᑯᑕᐸᓐᒡ ᒐ ᐅᒋᓴᒪᓂᑐᒥᒡ᙮

⁸ ᒋᑭ ᒥᔨᑎᓐ ᑭᔭ ᒋᑦ ᐊᓂᔅᑯᑕᐸᓐᒡ ᒐ ᐊᓂᔅᒐ ᐱᒪᑎᓯᒡ ᒥᓯᐛ ᐊᓐ ᑲᐃᓇᓐ ᐊᔅᒋᔾ ᐊᓐᑕ ᐊᓄᒡ ᒥᔭᓂᑕᐎᔭᒄ, ᒋᔨᐛᐤ ᒧᔅ ᑲᒋᒡ ᒋᑭ ᑎᐸᔨᑕᓇᐛᐤ ᑭᔭ ᓂᔾ ᒋᑭ ᐅᒋᓴᒪᓂᑐᒥᑐᓇᐛᐤ᙮”

⁹ ᐊᑯ ᒋᓴᒪᓂᑐᐤ ᐃᔭᐱᒡ ᐊᑕᑦ ᐊᑉᕋᐊᒪ, “ᒋᔾ ᐊᑉᕋᐊᒻ, ᒋᑭ ᐎ ᑕᑈᑕᓐ ᒐᒂᓐ ᐊᑎᑕᓐ ᒐ ᐃᑐᑎᒥᓐ᙮ ᒋᔾ ᑭᔭ ᒋᑦ ᐊᓂᔅᑯᑕᐸᓐᒡ ᒐ ᐊᑎ ᐊᓂᔅᒐ ᐱᒪᑎᓯᒡ᙮

¹⁰ ᒪᐅ ᒐ ᐎ ᐃᓯ ᑭᓄᐛᔨᑎᒪᒄ ᓂᓂᔅᑭᒧᐅᓐ, ᑕᐱᔅᑯᓐ ᒋᔾ ᑭᔭ ᒋᑦ ᐊᓂᔅᑯᑕᐸᓐᒡ᙮ ᒪᐅ ᐊ ᐃᓯ ᓂᑐᐛᔨᒥᑕᓐ ᒐᒋ ᐃᑐᑎᒥᓐ, ᒐ ᒋᔅᒋᓄᐛᒋᔄᑥᐤ ᒥᓯᐛ ᐊ ᓇᐸᓯᐅᒡ ᐊᐛᓯᒡ᙮

¹¹ ᒋᑭ ᐎ ᒋᔅᒋᓄᐛᒋᔄᐅᒡ ᒥᓯᐛ ᓇᐸᐅᒡ ᐊᓐᑕ ᐊ ᐸᐃᑯᐎᔅᒋᔨᓐ᙮

¹² ᒥᓯᐛ ᓂᔭᐸᐅᒡ ᐊᐛᓯᒡ ᐊ ᐃᔪᐅᒡ ᑲᒋ ᔭᓇᐤ ᑕᑐᐤ ᒋᓯᑲᓯᑥᐎ ᒋᑭ ᒋᔅᒋᓄᐛᒋᔄᑭᓄᐎᒡ, ᒋᒡ ᑭᔭ ᒋᓇᐸᐤ-ᐊᐱᒋᐊᑭᓐᒡ, ᒋᒡ ᐊᓐᒡ ᑲ ᐃᔪᐅᒡ ᐊᓐᑕ ᒋᑦ ᐊᔅᒋᒡ ᑭᔭ ᐊᓐᒡ ᓂᔭᐸᐅᒡ ᒪᓐᑕᐛ ᑲ ᐅᒋ ᐃᔭᐅᑥᐤ᙮

¹³ ᒥᓯᐛ ᓂᔭᐸᐅᑦ ᐊᐛᔅ ᒋᑭ ᐎ ᒋᔅᒋᓄᐛᒋᔄᐤ, ᐊᐅᑯᓐ ᒋᔅᒋᓄᐛᒡ ᐛᐸᑎᔨᐛᐅᓐ ᐊᓐ ᓂᓇᔅᑯᒧᐅᓐ ᑲ ᐃᑐᑎᒪᑕᓐ, ᐊᓐ ᒧᔅ ᑲᒋᒡ ᒐ ᑎᒂᒡ᙮

¹⁴ ᒥᒄ ᐊᓐ ᓇᐸᐤ ᐊ ᐊᑲ ᐎ ᒋᔅᒋᓄᐛᒋᐃᑯᓯᑦ ᐱᑯᓂᒻ ᓂᓇᔅᑯᒧᐅᓂᔪᐤ ᑭᔭ ᓇᒪ ᒋᑭ ᒋ ᐃᑎᒋᑕᑯᓱᐤ ᒧᔭᒻ ᐸᐃᒄ ᓂᑦ ᐃᔨᒻ᙮”

Genesis 17.1-7, 15-16 (Lent-2 Year B)

¹⁵ ᐊᑯ ᒥᓐ ᒋᓴᒪᓂᑐᐤ ᐊᑕᑦ ᐊᑉᕋᐊᒪ, “ᒋᐅ ᓴᕋᐃ, ᒐ ᐊᑲ ᐃᓯᓂᐧᑲᑎᑦ ‘ᓴᕋᐃ’, ᒥᒄ ‘ᓴᕋ’ ᒋᑭ ᐃᓯᓂᐧᑲᓱᐤ᙮

¹⁶ ᓂᑭ ᓱᐛᔨᑕᑯᐛᐤ ᓴᕋ ᑭᔭ ᒋᑭ ᐅᑯᓱᐤ ᒋᔾ ᐅᒡ᙮ ᓂᑭ ᓱᐛᔨᑕᑯᐛᐅ ᑭᔭ ᐎᔾ ᒋᑭ ᐅᑲᐎᒪᐤ ᒐ ᑕᑐᔅᑲᓇᓯᓇᓄᐎᒡ; ᐱᔅᒐ ᐅᑦ ᐊᓂᔅᑯᑕᐸᓇ ᒋᑭ ᒋᓴᐅᒋᒪᐎᔪᐛ᙮”

¹⁷ ᒥᓐ ᒋ ᓂᐱᔅᑯᐱᔅᑐᐛᐤ ᐊᑉᕋᐊᒻ ᒋᓴᒪᓂᑐᐛ ᐊ ᒋᔅᑕᔨᒪᑦ, ᒂ ᐸᐱᑦ ᑭᔭ ᒂ ᐃᑎᓱᑦ, “ᒐᑲᑦ ᓂ ᐸᐃᑯ ᒥᑕᓯᒥᑎᓄᐛᐳᓇᓯᓐ, ᑕᓐᑕ ᓂᐸ ᐅᒋ ᐅᑕᐎᒪᐅᓐ ? ᑭᔭ ᓴᕋ ᐸᐃᑯᔅᑕᐤ ᑕᑐᔪᐛᐳᓇᓱᐤ᙮ ᑕᓐᑕ ᒋᐸ ᐅᒋ ᐅᑦ ᐊᐛᓯᒧᐤ ?”

¹⁸ ᐊᑯ ᐊᑉᕋᐊᒻ ᐊᑕᑦ ᒋᓴᒪᓂᑐᐛ, “ᑭᒪ ᒋᓴᐛᑐᑐᐅᑦ ᓂᑯᔅ ᐃᔅᒪᐃᓪ᙮”

¹⁹ ᐊᑯ ᒋᓴᒪᓂᑐᐤ ᐊᑕᑦ, “ᓂᐦᐃ, ᒥᒄ ᒋᐅ ᓴᕋ ᒋᑭ ᒥᔨᒄ ᐅᑯᓯᒪᐛ ᑭᔭ ᐊᐃᓯᒃ ᒋᑭ ᐃᓯᓂᐧᑲᑕᐤ᙮ ᓂᑭ ᐊᔨᒋᑎᒧᐛᐤ ᓂᓇᔅᑯᒧᐅᓂᔪᐤ, ᐊᐅᒄ ᐅᒪ ᓂᓇᔅᑯᒧᐅᓐ ᒐ ᐊᑲ ᓂᑕ ᐃᔎᐱᔨᒡ, ᐎᔾ ᐅᒡ ᑭᔭ ᐅᑦ ᐊᓂᔅᑯᑕᐸᓇ᙮

²⁰ ᒥᒄ ᒋᑯᔅ ᐃᔅᒪᐃᓪ, ᒋᑭ ᒥᔨᑎᓐ ᐊ ᐃᓯ ᓂᑐᐛᔨᑎᒥᓐ, ᓂᑭ ᓱᐛᔨᑕᑯᐛᐤ᙮ ᒥᒐᑦ ᐊᐛᓴ ᓂᑭ ᒥᔭᐤ ᑭᔭ ᒥᒐᑦ ᐊᓂᔅᑯᑕᐸᓇ ᓂᑭ ᒥᔭᐤ᙮ ᐎᔾ ᒋᑭ ᐅᑕᐎᒪᐅ ᐊ ᓂᓱᓴᐳᔨᒋ ᒋᓴᐅᒋᒪᓴ, ᓂᑭ ᑐᑐᒪᐛ ᐅᑦ ᐊᓂᔅᑯᑕᐸᓇ ᒐᒋ ᒥᒐᑐᔅᑲᓇᓯᔨᒋ᙮

²¹ ᒥᒄ ᓂᑭ ᒥᔭᐤ ᓂᓂᔅᑯᒧᐅᓂᔪᐤ ᐊᐃᓯᒃ, ᐊᓂᔭ ᒐ ᓂᑕᐅᒋᔭᑦ ᓴᕋ ᒋ ᐸᐃᑯᐳᓂᔨᒐ᙮”

²² ᒋᓴᒪᓂᑐᐤ ᒋ ᓂᑭᑕᐤ ᐊᑉᕋᐊᒪ ᐃᔅᐱ ᑲᒋ ᐃᓯ ᐃᔨᒪᐊᑦ᙮

²³ ᐊᓂᔭ ᐸᐃᑯᑕᐤ ᒋᓯᑯᔪᐤ, ᐊᑉᕋᐊᒻ ᒋ ᓂᓇᐃᑐᐛᐤ ᑲ ᐃᑎᑯᑦ ᒋᓴᒪᓂᑐᐛ ᑭᔭ ᒂ ᒋᔅᒋᓄᐛᒋᔄᑦ ᐅᑯᓴ ᐃᔅᒪᐃᓚ ᑭᔭ ᒥᓯᐛ ᑯᑎᑲ ᓇᐸᐤ ᐊᐱᒋᐊᑭᓇ ᑲ ᑕᔨᒋ ᐊᓐᑕ ᐎᒋᒡ᙮ ᒋᒡ ᒥᓯᐛ ᐊᐱᒋᐊᑭᓇ ᑲ ᐃᔪᔨᒋ ᐊᓐᑕ ᐅᑦ ᐃᑕᐅᓂᒡ ᑭᔭ ᐊᓂᔭ ᒥᓯᐛ ᑲ ᐃᔭᐛᑦ᙮

²⁴ ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᒋ ᐃᑕᑐᐳᓇᓱᐤ ᑲ ᒋᔅᒋᓄᐛᒋᔄᑭᓄᐅᑦ ᐊᑉᕋᐊᒻ,

²⁵ ᒋ ᓂᔅᑎᓴᐳᓇᓯᔪᐛ ᐅᑯᓴ ᐃᔅᒪᐃᓚ᙮

²⁶ ᐸᐃᑯᑕᐤ ᒋᓯᑯᔪᐤ ᑕᐱᔅᑯᓐ ᐊᑉᕋᐊᒻ ᑭᔭ ᐃᔅᒪᐃᓪ ᒋ ᒋᔅᒋᓄᐛᒋᔄᑭᓄᐛᒡ᙮

²⁷ ᒥᓯᐛ ᓂᔭᐸᐅᑦ ᒋ ᒋᔅᒋᓄᐛᒋᔄᑭᓄᐤ, ᐊᓐ ᑲ ᐃᔪᐅᑦ ᐊᑉᕋᐊᒪ ᐅᑦ ᐃᑕᐅᓂᔨᒡ ᑭᔭ ᒪᒃ ᒪᓐᑕᐛ ᑲ ᐅᒋ ᐃᔭᐛᑭᓄᐅᑦ᙮