ᒐᓂᓯᔅ 15 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᓂᔅᑯᒧᑐᐅᓂᔪᐤ ᑲ ᐃᑐᑎᒪᑐᒡ ᒋᓴᒪᓂᑐᐤ ᑭᔭ ᐊᑉᕋᒻ Genesis 15.1-12, 17-18 (Lent-2 Year C) Genesis 15.1-6 (Proper-14 Year C)

¹ ᓇᓇᒐ ᑎᐸᔨᒋᒐᓱᐤ ᒋ ᓄᑯᓯᔅᑐᐛᐤ ᐊᑉᕋᒪ ᑭᔭ ᒋ ᐃᑕᐤ, “ᐊᑲ ᑯᔅᑕᒋ, ᐊᑉᕋᒻ᙮ ᓂᔾ ᐅ ᒋᑦ ᐊᒂᓇᐅᓱᐛᑭᓐ, ᒋᒋᐛ ᒋᑭ ᒥᓴᐤ ᒋᑎᐸᒪᑯᓯᐅᓐ᙮”

² ᒥᒄ ᐊᑉᕋᒻ ᐃᑕᐤ, “ᑎᐸᔨᒋᒐᓱᐤ ᒋᓴᒪᓂᑐᐤ, ᒐᒂᓐ ᒐ ᒥᔨᓐ ? ᐊᔅᒄ ᓇᒪ ᓂ ᐅᑦ ᐊᐛᓯᒥᓐ᙮ ᐃᓕᐃᓱᐤ ᑕᒪᔅᑲᔅ ᑲ ᐅᒋᑦ ᐊᐅᑯᓐ ᒐ ᑎᐸᔨᑕᐧᒃ ᓂᑎᐸᔨᑎᒧᐅᓇ ᐃᔅᐱ ᐳᓂᐱᒪᑎᓯᔭᓇ᙮”

³ ᑭᔭ ᐊᑉᕋᒻ ᐃᑕᐤ, “ᓇᒪ ᒋ ᐅᒋ ᒥᔨᓐ ᐊᐛᓯᒡ, ᐊᑯ ᓂᒋᒡ ᐊᐱᒋᐊᑭᓐ ᒋᑭ ᑎᐸᔨᑎᒻ ᓂᑎᐸᔨᑎᒧᐅᓇ᙮”

⁴ ᑎᐸᔨᒋᒐᓱᐤ ᒋ ᐃᔨᒪᐊᐤ ᒥᓄᐛᒡ ᐊᑉᕋᒪ ᐊ ᐃᑕᑦ, “ᐃᓕᐃᓱᐤ ᒋᑦ ᐊᐱᒋᐊᑭᓐ ᓇᒪᔭᐤ ᐎᔾ ᒐ ᑎᐸᔨᑕᐧᒃ ᒋᑎᐸᔨᑎᒧᐅᓇ ! ᒋᑭ ᑕᐤ ᑎᐱᔨᐛ ᒋᑯᔅ ᑭᔭ ᐎᔾ ᒋᑭ ᑎᐸᔨᑎᒻ ᒋᑎᐸᔨᑎᒧᐅᓇ᙮”

⁵ ᐊᑯ ᑎᐸᔨᒋᒐᓱᐤ ᐎᐎᑎᒥᒡ ᐊ ᑐᑕᐊᑦ ᐊᑉᕋᒪ ᑭᔭ ᒋ ᐃᑕᐤ, “ᒋᓯᑯᒡ ᐃᑕᐱᔾ ᑭᔭ ᑯᒋᑕ ᒐᒋ ᐊᒋᒥᑥᐤ ᐅᒐᑭᑕᐧᑯᒡ,” ᐊᑯ ᑎᐸᔨᒋᒐᓱᐤ ᐊᑕᑦ, “ᐊᐅᑯᓐ ᒐ ᐃᔅᐱᒐᑎᒡ ᒋᓂᑕᐅᒋᐊᑭᓐᒡ ᒐ ᑭᓄᐛᔨᒥᑥᐤ᙮”

⁶ ᐊᑉᕋᒻ ᒋ ᑕᑈᐅᒐᔨᒪᐤ ᑎᐸᔨᒋᒐᓱᐛ ᑭᔭ ᑎᐸᔨᒋᒐᓱᐤ ᒂ ᐃᑎᒋᒪᑦ ᒧᔭᒻ ᐊ ᑯᐃᔅᑯᑕᑎᓯᑦ ᐃᔪᐤ᙮

⁷ ᐊᑯ ᒋᓴᒪᓂᑐᐤ ᐊᑕᑦ ᐊᑉᕋᒪ, “ᓂᔾ ᐅ ᑎᐸᔨᒋᒐᓱᐤ, ᑲ ᐎᐎᑕᐃᑕᓐ ᐅᕐ ᐅᒡ ᐊᓐᑕ ᑲᓪᑎᔭ, ᒐᒋ ᒥᔨᑕᓐ ᐅ ᐊᔅᒋᔾ ᒐᒋ ᑎᐸᔨᑎᒥᓐ᙮”

⁸ ᐊᑉᕋᒻ ᒋ ᑯᒂᒋᒪᐤ, “ᐅ ᑎᐸᔨᒋᒐᓱᐤ ᒋᓴᒪᓂᑐᐤ, ᑕᓐᑕ ᒐᒋ ᐅᒋ ᒋᔅᒐᔨᑎᒪᓐ ᓂᔾ ᒐ ᑎᐸᔨᑎᒧᐛᓇ ᐅ ᐊᔅᒋᔾ ?”

⁹ ᐊᑯ ᑎᐸᔨᒋᒐᓱᐤ ᐊᑕᑦ ᐊᑉᕋᒪ, “ᒐ ᐸᑐᐎᓐ ᐊ ᓂᔅᑐᐳᓇᓯᑦ ᓄᓴ ᒥᔅᑐᓯᔅ, ᐊ ᓂᔅᑐᐳᓇᓯᑦ ᓇᐸ ᒪᔭᑕᓂᔅ ᑭᔭ ᐊ ᓂᔅᑐᐳᓇᓯᑦ ᓇᐸ ᒪᔭᑕᓂᔅ, ᐛᐱᓯᐤ ᐱᔭᓯᔅ ᑭᔭ ᐅᔅᑎᓂᒋᐅ-ᐱᔭᓯᔅ᙮”

¹⁰ ᐊᑉᕋᒻ ᒋ ᐸᑐᐛᐤ ᑎᐸᔨᒋᒐᓱᐛ ᒥᓯᐛ ᐅᔭ ᐊᐛᓯᓴ, ᒂ ᓂᐸᐊᑦ᙮ ᒂ ᑕᔅᒍᐛᑦ ᑭᔭ ᒂ ᑕᐱᔅᑯᒐᔭᑦ ᐊᓐᑕ ᒧᔅᑎᔅᑭᒥᒡ᙮ ᒥᒄ ᓇᒪ ᐅᒋ ᑕᔅᒍᐛᐤ ᐊᓂᔭ ᐱᔭᓯᓴ᙮

¹¹ ᐊᑯ ᐱᔅᒐ ᐱᔭᓱᐅᒡ ᐱᔭᒋᓂᓯᐱᔪᐅᒡ ᒐᒋ ᒧᐛᒡ ᐊᓂᔭ ᐊᐛᓯᓴ, ᒥᒄ ᐊᑉᕋᒻ ᒋ ᐅᐸᐎᔭᐤ᙮

¹² ᐃᔅᐱ ᐱᔭᒋᓯᒧᑦ ᐱᓯᒻ, ᐊᑉᕋᒻ ᒋ ᓂᐸᐤ ᒧᔭᒻ ᐳᓂᐱᒪᑎᓯᔨᒋ ᒋ ᐃᓯᓇᑯᓱᐤ ᑭᔭ ᓯᔅᒋᑯᒡ ᒋ ᐅᑎᑎᑯᐤ ᑯᔅᑕᒋᐅᓂᔪᐤ᙮

¹³ ᐊᑯ ᑎᐸᔨᒋᒐᓱᐛ ᐊᑎᑯᑦ, “ᒐ ᐎ ᓂᔅᑐᑎᒥᓐ ᒐᒂᓐ ᒐ ᐎᑎᒪᑕᓐ, ᒋᓂᑕᐅᒋᐊᑭᓐᒡ ᒋᑭ ᐎᒍᐅᒡ ᐊᓐᑕ ᐊᔅᒋᒡ ᐊᑲ ᑎᐸᔨᑕᒡ᙮ ᒋᑭ ᓯᒋᒪᐅᒡ ᐃᔪᒡ ᐛᑎᔅᒋᒡ ᒐᒋ ᐊᑐᔅᒐᔅᑕᑯᒡ ᒋᓂᑕᐅᒋᐊᑭᓇ ᑭᔭ ᓇᐤ ᒥᑕᓯᒥᑎᓄᐛᐳᓇ ᐃᔅᐱᔅ ᒋᑭ ᐱᐛᔨᒪᑭᓄᐎᒡ᙮

¹⁴ ᒥᒄ ᓂᑭ ᐊᓏᔨᒪᐛ ᐊᓂᔭ ᐊ ᐸᐃᑯᔅᑲᓇᓯᔨᒋ ᐊᑐᔅᒐᔅᑐᐛᒡ᙮ ᐊᑯ ᒋᓂᑕᐅᒋᐊᑭᓐᒡ ᒋᑭ ᓂᑭᑎᒧᒡ ᐊᓂᔭ ᒪᓐᑕᐤ ᐊᔅᒋᔪᐤ ᐛᔪᑎᓯᐅᓂᔪᐤ ᐊ ᔅᑐᑕᒡ᙮

¹⁵ ᒥᒐᑐᐳᓇ ᒋᑭ ᐱᒪᑎᓯᓐ, ᒋᔭᒪᔨᑎᒧᐅᓂᒡ ᒋᑭ ᐳᓂᐱᒪᑎᓯᓐ ᑭᔭ ᒋᑭ ᓇᐃᐧᑲᑯᐅᓐ᙮

¹⁶ ᐸᑎᒪ ᓇᐤ ᐊᓂᔅᒐ ᐱᒪᑎᓯᓇᓄᒐ, ᒋᓂᑕᐅᒋᐊᑭᓐᒡ ᑲᐤ ᒋᑭ ᑎᑯᓯᓄᐅᒡ ᐅᑕ ᑭᔭ ᒋᑭ ᐅᑎᓂᒧᒡ ᐅᔭ ᐊᔅᒋᔪᐤ, ᐛᔅ ᐊᒧᕆ ᐃᔪᒡ ᐊᔅᒄ ᓇᒪ ᐃᔅᐱᔅ ᒪᔭᑎᓯᐅᒡ ᓂᔾ ᒐᒋ ᐊᓏᔨᒥᒂᐤ᙮”

Genesis 15.1-12, 17-18 (Lent-2 Year C)

¹⁷ ᐃᔅᐱ ᑲᒋ ᐸᒋᓯᒧᑦ ᐱᓯᒻ ᑭᔭ ᓇᔅᒡ ᐃᔭᒋᑲᒡ, ᐊᑉᕋᒻ ᓯᔅᒋᑯᒡ ᒋ ᐛᐱᒪᐤ ᐊ ᐱᒋᑥᔨᒋ ᐃᔅᑯᑕᐤ ᐊᔅᒋᒂ ᑭᔭ ᐊ ᐛᔭᑕᔨᒡ ᐃᔅᑯᑕᔪᐤ ᑲ ᐱᒥᐱᔨᒡ ᐊᓐᑕ ᑎᔅᑐᐎᒡ ᑲ ᑕᔅᒍᐛᑦ ᐊᐛᓯᓴ᙮

¹⁸ ᐊᓂᔭ ᑲ ᒋᓯᑲᔨᒡ, ᑎᐸᔨᒋᒐᓱᐤ ᑭᔭ ᐊᑉᕋᒻ ᒋ ᐃᑐᑎᒧᒡ ᓂᔅᑯᒥᑐᐅᓂᔪᐤ ᑭᔭ ᑎᐸᔨᒋᒐᓱᐤ ᒂ ᐃᑕᑦ, “ᓂᒋ ᐊᓱᑎᒪᒐᓐ ᒐᒋ ᒥᔨᒂᐤ ᒋᓂᑕᐅᒋᐊᑭᓐᒡ ᒥᓯᐛ ᐅᔭᔪᐤ ᐊᔅᒋᔪᐤ, ᐃᒋᑉᑎᒡ ᓯᐱᒡ ᐛᒋᒋᐱᔨᒡ ᐃᔅᐱᔅ ᔪᑉᕆᑎᔅ ᓯᐱᒡ᙮

¹⁹ ᑭᓂ ᐃᔪᒡ ᐅᑦ ᐊᔅᒋᐛᐤ, ᑭᓇᔅ ᐃᔪᒡ, ᑲᑦᒧᓐ ᐃᔪᒡ,

²⁰ ᐊᑦ ᐃᔪᒡ, ᐸᕆᔅ ᐃᔪᒡ, ᕋᐸ ᐃᔪᒡ,

²¹ ᐊᒧᕆ ᐃᔪᒡ, ᑲᐃᓇᓐ ᐃᔪᒡ, ᑯᑲᓯ ᐃᔪᒡ ᑭᔭ ᒐᐳᔅ ᐃᔪᒡ᙮”