ᒐᓂᓯᔅ 14 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᒪᑯᓇᑭᓄᐅᑦ ᑭᔭ ᑲ ᐱᐧᑯᐊᐛᑭᓄᐅᑦ ᓗᑦ

¹ ᓇᐤ ᒋᓴᐅᒋᒪᐅᒡ, ᐸᐱᓗᓂᔭ ᒋᓴᐅᒋᒪᐤ ᐊᒻᕋᐸᓪ, ᐃᓚᓴᕐ ᒋᓴᐅᒋᒪᐤ ᐊᕆᐅᒃ, ᐃᓚᒻ ᒋᓴᐅᒋᒪᐤ ᑲᑐᓚᐅᒧᕐ ᑭᔭ ᑯᐃᒻ ᒋᓴᐅᒋᒪᐤ, ᑎᑕᓪ ᒋᓴᐅᒋᒪᐤ᙮

² ᒋ ᓂᑐᐱᔨᑐᐛᐅᒡ ᐱᑕᑕᒡ ᑯᑎᑲ ᒋᓴᐅᒋᒪᐛ, ᓱᑕᒻ ᒋᓴᐅᒋᒪᐛ ᐱᕋ, ᑯᒧᕋ ᒋᓴᐅᒋᒪᐛ ᐱᕐᓴ, ᐊᑦᒪ ᒋᓴᐅᒋᒪᐛ ᓯᓇᑉ, ᓴᐳᐃᐃᒻ ᒋᓴᐅᒋᒪᐛ ᓯᒥᐱᕐ ᑭᔭ ᐱᓚ ᒋᓴᐅᒋᒪᐛ (ᑭᔭ ᒪᒃ ᓱᐊᕐ)᙮

³ ᐱᑕᑕᒡ ᒋᓴᐅᒋᒪᐅᒡ ᒋ ᒪᒧᓇᐅᒡ ᐅᓂᑐᐱᔪᐅ-ᐃᔨᒧᐛᐛ ᑭᔭ ᒪᒧᐤ ᒂ ᐃᑐᑕᒡ ᐊᓐᑕ ᓯᑎᒻ ᐊ ᐱᓴᔨᒡ, (ᐊᓄᒡ ᑲ ᓂᐱᒥᑲᒡ ᐎᓂᐸᒄ ᐃᓯᓂᐧᑲᑕᐤ᙮)

⁴ ᓂᓱᓴᑉ ᐱᐳᓇ ᑲᑐᓚᐅᒧᕐ ᒋ ᑎᐸᔨᒪᐤ ᑯᑎᑲ ᒋᓴᐅᒋᒪᐛ, ᒥᒄ ᑲ ᓂᔅᑎᓴᑉ ᐱᐳᓂᔨᒡ ᓇᒪ ᐅᒋ ᑎᐸᔨᑎᒻ᙮

⁵ ᑲᒋ ᐸᐃᑯᐳᓂᔨᒡ, ᑲᑐᓚᐅᒧᕐ ᑭᔭ ᑯᑎᑭᒡ ᒋᓴᐅᒋᒪᐅᒡ ᒋ ᓂᑐᐱᔨᑐᐛᐅᒡ ᑭᔭ ᒋ ᓴᒂᐅᒡ ᕋᐸ ᐃᔪᐛ ᐊᓐᑕ ᐊᔅᑐᕈᑦ ᑲᓇᐃᒻ ᑭᔭ ᓱᓯᒻ ᐃᔪᐛ ᐊᓐᑕ ᐊᒻ ᑭᔭ ᐃᒥᒻ ᐃᔪᐛ ᐊᓐᑕ ᓴᐸ ᑭᕆᐊᑕᐃᒻ,

⁶ ᑭᔭ ᐦᐅᕆ ᐃᔪᐛ ᐊᓐᑕ ᓯᐅᕐ ᐱᔅᑯᑎᓇᒡ, ᐃᓪ ᐸᕋᓐ ᐃᔅᐱᔅ ᒋ ᓇᓴᐛᐅᒡ ᒥᒋᒪ ᐸᐧᑯᑎᔅᑭᒥᑲᒡ᙮

⁷ ᒋ ᒋᐛᐱᔪᐎᒡ ᑭᔭ ᑲᐤ ᒂ ᐃᑐᑕᒡ ᐊᓐᑕ ᑲᑎᔅ (ᐊᓄᒡ ᐃᓐ ᒥᔅᐸᑦ ᐃᓯᓂᐧᑲᑕᐤ) ᑭᔭ ᓄᑎᒻ ᐊᒪᓕᒃ ᐃᔪᐛ ᐅᑦ ᐊᔅᒋᔨᒡ ᒋ ᓴᑯᐎᐛᐅᒡ, ᐃᔭᐱᒡ ᒋ ᓴᒂᐅᒡ ᐊᒧᕆ ᐃᔪᐛ ᑲ ᐎᒋᔨᒋ ᐊᓐᑕ ᐊᓯᓴᓐ ᑕᒪᕐ᙮

⁸ ᐊᑯ ᓱᑕᒻ ᒋᓴᐅᒋᒪᐤ, ᑯᒧᕋ ᒋᓴᐅᒋᒪᐤ, ᐊᑦᒪ ᒋᓴᐅᒋᒪᐤ, ᓴᐳᐃᐃᒻ ᒋᓴᐅᒋᒪᐤ ᑭᔭ ᐱᓚ ᒋᓴᐅᒋᒪᐤ (ᑭᔭ ᒪᒃ ᓱᐊᕐ) ᒋ ᔅᑐᑕᐅᒡ ᑭᔭ ᒋ ᐊᔭᔅᑯᐎᔪᐅᒡ ᒐᒋ ᒪᓯᒐᒡ ᐊᓐᑕ ᓯᑎᒻ ᐊ ᐱᓴᔨᒡ᙮

⁹ ᒐ ᒪᓯᐧᑯᐛᐅᒡ ᐃᓚᒻ, ᑯᐃᒻ, ᓯᓇᕐ ᑭᔭ ᐃᓚᓴᕐ ᒋᓴᐅᒋᒪᐛ᙮ ᐅᒡ ᐱᑕᑕᒡ ᒋᓴᐅᒋᒪᐅᒡ ᑭᔭ ᐅᓂᑐᐱᔪᐅ-ᐃᔨᒧᐛᐛ ᒋ ᓂᑐᐱᔨᑐᐛᐅᒡ ᐊ ᓇᐎᔨᒋ ᐊ ᓱᐧᑲᑎᓯᔨᒋ ᒋᓴᐅᒋᒪᐛ ᑭᔭ ᐅᓂᑐᐱᔪᐅ-ᐃᔨᒥᔪᐛ᙮

¹⁰ ᐃᔅᐱ ᑲ ᐎ ᒋᑎᓯᒧᔨᒋ ᐅᓂᑐᐱᔪᐅ-ᐃᔨᒧᐛᐛ ᓱᑕᒻ ᑭᔭ ᑯᒧᕋ ᒋᓴᐅᒋᒪᐅᒡ, ᐱᔅᒐ ᓇᐸᐅᒡ ᒋ ᐱᑎᓱᐛᐱᔪᒡ ᐊᒂᐃᑕᐅᐧᑲᔨᒡ ᐱᒍᐛ ᐊ ᓴᑭᔅᒋᓇᔨᒋ ᐊᓐᑕ ᓯᑎᒻ ᐊ ᐱᓴᔨᒡ᙮ ᑯᑎᑭᒡ ᐱᔅᑯᑎᓇᒡ ᒋ ᐃᔅᐸᔨᑐᐅᒡ ᒐᒋ ᑲᓱᒡ᙮

¹¹ ᐊᑯ ᐊᓐᒡ ᑲ ᓱᐧᑲᑎᓯᒡ ᓇᐤ ᒋᓴᐅᒋᒪᐅᒡ ᑭᔭ ᐅᓂᑐᐱᔪᐅ-ᐃᔨᒧᐛᐛ ᒋ ᐅᑎᓂᒧᒡ ᒥᓯᐛ ᒐᒂᓂᔪᐤ ᐊᓐᑕ ᓱᑕᒻ ᑭᔭ ᑯᒧᕋ ᐅᑕᓇᐛ, ᒋᒡ ᒥᒋᒥᔪᐤ ᑭᔭ ᒂ ᐊᑎ ᔅᑐᑕᒡ᙮

¹² ᐃᔭᐱᒡ ᓗᑕ ᒋ ᑲᔅᑎᓇᐅᒡ, ᐊᑉᕋᒪ ᐅᑐᓯᒥᔪᐛ ᑭᔭ ᒥᓯᐛ ᐅᐛᔪᑎᓯᐅᓂᔪᐤ᙮

¹³ ᒥᒄ ᐸᐃᒄ ᓇᐸᐤ ᒋ ᒋᑎᓯᒧᐤ ᑭᔭ ᑲ ᐎᑎᒧᐛᑦ ᐊᑉᕋᒪ, ᐃᑉᕈᐤ ᐃᔪᐛ, ᑲ ᐎᒋᔨᒋ ᐊᓐᑕ ᒥᒋᒪ ᐃᓚᓐ ᒥᔅᑎᒂ, ᒪᒻᕋ ᐊᒧᕆ ᐃᔪᐛ ᑲ ᑎᐸᔨᒪᔨᒋ᙮ ᒪᒻᕋ ᒋ ᓂᓯᔪᐛ ᐎᐧᑲᓂᓴ, ᐃᔅᑯᓪ ᑭᔭ ᐊᓄᕐ, ᐅᒡ ᐊ ᓂᔅᑎᒡ ᓇᐸᐅᒡ, ᒋ ᐃᑐᑎᒧᒡ ᐊᓱᑎᒪᒐᐅᓂᔪᐤ ᒐᒋ ᐎᒋᒪᓯᒐᒪᒡ ᐊᑉᕋᒪ ᓇᑐᐱᓇᓄᔨᒋ᙮

¹⁴ ᐃᔅᐱ ᐊᑉᕋᒻ ᐱᔭᑕᐧᒃ ᒥᐊᑯᓇᑭᓄᔨᒋ ᐅᑐᓯᒪ, ᒋ ᐎᓴᒪᐤ ᒪᒧᐤ ᐅᑲᒪᓯᒐᓯᒪ᙮ ᓂᔅᑐ ᒥᑕᓯᒥᑎᓄᐤ ᐊᓱ ᔭᓇᐤ ᑕᑐᓴᑉ ᒋ ᑕᑎᓯᔨᐛ, ᒥᓯᐛ ᑲ ᐃᔪᔨᒋ ᐊᓐᑕ ᐅᑦ ᐊᔅᒋᒡ᙮ ᐊᑯ ᐎᔾ ᑭᔭ ᐅᑦ ᐃᔨᒪ, (ᒋᒡ ᒪᒻᕋ ᑭᔭ ᐎᐧᑲᓂᓴ) ᒪᒧᐤ ᒋ ᓇᓴᐛᐅᒡ ᑲ ᓇᐎᔨᒋ ᒋᓴᐅᒋᒪᐛ ᐃᔅᐱᔅ ᑕᓐ ᐅᑕᓇᔪᐤ᙮

¹⁵ ᐊᑉᕋᒻ ᒋ ᑕᑎᐸᓇᐊᐤ ᐅᑦ ᐃᔨᒪ ᑭᔭ ᒂ ᒋᒋᓇᒡ ᑲ ᐛᐧᑲᑎᑯᒡ ᒪᒂᒡ ᑕᐱᔅᑲᔨᒡ᙮ ᑲ ᓇᐅᒡ ᒋᓴᐅᒋᒪᐅᒡ ᑭᔭ ᐅᓂᑐᐱᔪᐅ-ᐃᔨᒧᐛᐛ ᒋ ᒋᑎᓯᒧᐅᒡ᙮ ᐊᑉᕋᒻ ᑭᔭ ᐅᓂᑐᐱᔪᐅ-ᐃᔨᒪ ᒋ ᓇᓴᐛᐅᒡ ᐃᔅᐱᔅ ᐅᐸ, ᑕᒪᔅᑲᔅ ᒋᐛᑎᓄᒡ᙮

¹⁶ ᐊᑉᕋᒻ ᒋ ᐅᑎᓂᒺᐤ ᒥᓯᐛ ᒐᒂᓂᔪᐤ ᒋᓴᐅᒋᒪᐛ ᑲ ᐅᑎᓂᒥᔨᒋ ᑭᔭ ᑲᐤ ᒋ ᒋᐛᑕᐤ᙮ ᐅᑐᓯᒪ ᓗᑕ ᒋ ᐱᐧᑯᐊᐤ, ᒋᒡ ᑭᔭ ᐃᔎᐛ ᑭᔭ ᒥᓯᐛ ᑲ ᒪᑯᓇᑭᓄᔨᒋ᙮

¹⁷ ᐊᑉᕋᒻ ᑲᐤ ᒋ ᑎᑯᓯᓐ ᑲᒋ ᓴᑯᐛᑦ ᒋᓴᐅᒋᒪᐛ ᑲᑐᓚᐅᒧᕐ ᑭᔭ ᑯᑎᑲ ᒋᓴᐅᒋᒪᐛ᙮ ᓱᑕᒻ ᒋᓴᐅᒋᒪᐤ ᒋ ᐃᑐᑕᐤ ᐊᓐᑕ ᓴᐸ ᐊ ᐱᓴᔨᒡ ᒐᒋ ᓂᒋᔅᑯᐛᑦ ᐊᑉᕋᒪ (ᒋᓴᐅᒋᒪᐅᒡ ᐅᐱᓴᒧᐛᐤ ᐊᓄᒡ ᐃᓯᓂᐧᑲᑕᐤ)᙮

¹⁸ ᒪᓪᑭᓴᑕᒃ, ᓴᓚᒻ ᒋᓴᐅᒋᒪᐤ, (ᑭᔭ ᐎᔾ ᒋ ᑎᑯᓯᓐ ᒐᒋ ᓂᒋᔅᑯᐛᑦ ᐊᑉᕋᒪ)᙮ ᐸᒂᓯᑭᓇ ᑭᔭ ᓱᒥᓇᐳᔪᐤ ᒋ ᐸᑕᐤ᙮ ᐎᔾ ᒋ ᐊᔭᒥᐊᐅᒋᒪᐤ ᒋᓴᒪᓂᑐᐛ ᒪᐅᒡ ᐃᔅᐱᒥᒡ ᐅᒡ᙮

¹⁹ ᒋ ᓱᐛᔨᑕᑯᐛᐤ ᐊᑉᕋᒪ, ᐊ ᐃᔅᒋᔄᑦ, “ᓱᐛᔨᑕᑯᐃᑯᐤ ᐊᑉᕋᒻ ᒋᓴᒪᓂᑐᐛ ᒪᐅᒡ ᐃᔅᐱᒥᒡ, ᑲ ᐅᓯᑕᔨᒋ ᒋᒋᒋᓯᑯᔪᐤ ᑭᔭ ᐊᔅᒋᔪᐤ,

²⁰ ᒋᔅᑕᒋᒪᑕᐤ ᒋᓴᒪᓂᑐᐤ ᒪᐅᒡ ᐃᔅᐱᒥᒡ, ᐊᓐ ᑲ ᒥᔨᑕᒃ ᓴᑯᐎᐛᐅᓂᔪᐤ᙮” ᐊᑯ ᐊᑉᕋᒻ ᒋ ᒥᔭᐤ ᒪᓪᑭᓴᑕᑲ ᐸᐃᒄ ᐊᓂᔭ ᐸᐃᑯᔪᐤ ᒐᒂᓂᔪᐛ ᑲ ᐸᑐᑕᑦ᙮

²¹ ᓱᑕᒻ ᒋᓴᐅᒋᒪᐤ ᐃᑕᐤ ᐊᑉᕋᒪ, “ᐸᒋᒥᔾ ᑲᐤ ᐊᓐᒡ ᓂᑦ ᐃᔨᒥᒡ, ᒥᒄ ᒐ ᑎᐸᔨᑎᒥᓐ ᒥᓯᐛ ᒐᒂᓐ᙮”

²² ᒥᒄ ᐊᑉᕋᒻ ᒋ ᐃᑕᐤ, “ᓂᒋ ᐅᐱᑐᐛᐤ ᓂᑎᒋᔪᐤ ᑎᐸᔨᒋᒐᓱᐤ ᒋᓴᒪᓂᑐᐤ ᒪᐅᒡ ᐃᔅᐱᒥᒡ, ᑲ ᐅᓯᑕᑦ ᒋᒋᒋᓯᑯᔪᐤ ᑭᔭ ᐊᔅᒋᔪᐤ ᑭᔭ ᓂᒋ ᑐᑕᓐ ᑕᑈᐅᓐ,

²³ ᒐ ᐊᑲ ᐅᑎᓂᒪᓐ ᐊᓐ ᒐᒂᓐ ᑕᐱᔨᐛᐅᓯᔨᓐ, ᐊᑎ ᒥᒄ ᓴᔅᑎᒂᔭᐱᔾ ᑭᔭ ᒪᒃ ᒥᔅᒋᓇᔭᐱᔾ, ᐊᑯ ᒐ ᐊᑲ ᓂᑕ ᒋ ᐃᔅᒋᔄᔨᓐ, ‘ᓂᒋ ᐃᑐᑐᐛᐤ ᐊᑉᕋᒻ ᒐᒋ ᐛᔪᑎᓯᑦ᙮’

²⁴ ᓇᒪ ᒐᒂᓐ ᓂᑭ ᐅᑎᓇᓐ ᒥᒄ ᐊᓂᔭ ᓂᑦ ᐃᔨᒥᒡ ᑲ ᒥᒋᒡ, ᒥᒄ ᐊᓄᕐ, ᐃᔅᑯᓪ ᑭᔭ ᒪᒻᕋ ᒋᑭ ᐅᑎᓂᒧᒡ ᐱᔅᒐ ᒐᒂᔪᐛ, ᐅᓴᒻ ᓂᒋ ᐎᒐᐅᑯᒡ᙮”