ᒐᓂᓯᔅ 13 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᑉᕋᒻ ᑭᔭ ᓗᑦ ᑎᐸᓐ ᐃᑐᑕᐅᒡ

¹ ᐊᑉᕋᒻ ᑭᔭ ᐎᐛ ᒋ ᓂᑭᑐᒧᒡ ᐃᒋᑉᑦ ᐊᔅᒋᔪᐤ᙮ ᒋ ᔅᑐᑕᐅᒡ ᒥᓯᐛ ᒐᒂᔪᐤ ᑲ ᑎᐸᔨᑕᒡ ᑭᔭ ᑲᐤ ᒋ ᐃᑐᑕᐅᒡ ᐊᓐᑕ ᑲᐃᓇᓐ ᐱᓯᒧᑕᒡ ᐃᑕᒐ᙮ ᓗᑦ, ᐊᑉᕋᒻ ᐅᑐᓯᒪ ᒋ ᐎᒐᒐᐤ᙮

² ᐊᑉᕋᒻ ᒋ ᐛᔪᑎᓯᐤ᙮ ᒋ ᑎᐸᔨᒪᐤ ᒥᒐᑦ ᒥᒋᑎᒂ, ᒪᔭᑕᓂᓴ ᑭᔭ ᒥᔅᑐᓴ ᑭᔭ ᒋ ᒥᔅᑎ ᑭᓄᐛᔨᑎᒻ ᐛᐱᓯᐅᓱᓇᔭᐱᔎ ᑭᔭ ᐎᔄᐅᓱᓇᔭᔪᐤ᙮

³ ᒋ ᐱᐸᒧᑕᐤ ᓇᒐᑉ ᐊ ᐅᒋ ᔅᑐᑕᑦ ᐃᔅᐱᔅ ᐸᑕᓪ, ᐊᓐᑕ ᐅᔅᑭᒡ ᑲ ᒋᒥᑕᑦ ᐅᐱᒍᐎᔭᓂᒋᐛᑉ, ᑎᔅᑐᐎᒡ ᐸᑕᓪ ᐃᑕᐅᓂᔪᐤ ᑭᔭ ᐊᐃ,

⁴ ᐊᓐᑕ ᐅᔅᑭᒡ ᑲ ᐅᓯᑕᑦ ᐱᔅᑎᓂᒐᐅᓇᐱᔅᑯᔪᐤ᙮ ᐊᑯᑕ ᑲ ᓂᑐᑎᒧᐛᑦ ᑎᐸᔨᒋᒐᓱᐛ᙮

⁵ ᓗᑦ ᑭᔭ ᐅᑐᑕᒪ ᑭᔭ ᐅᑦ ᐊᐱᒋᐊᑭᓇ ᒋ ᐱᐸᒧᐎᒐᐛᐅᒡ ᐊᑉᕋᒪ᙮ ᒋ ᑭᓄᐛᔨᒪᐤ ᒪᔭᑕᓂᓴ ᑭᔭ ᒥᒋᑎᒂ᙮

⁶ ᒐᒃ ᑲ ᐅᑎᒋᐱᔨᒡ ᐊᑉᕋᒻ ᑭᔭ ᓗᑦ ᑲ ᒥᔅᑎᑭᓄᐛᔨᒪᒡ ᐊᐛᓯᓴ ᓇᒪ ᐅᒋ ᐃᔅᐱᔪᒡ ᐊᔅᒋᔪᐤ ᒐᒋ ᒪᒧᐤ ᐎᒋᒡ᙮

⁷ ᒂ ᒋᒋᐱᔨᒡ ᐊ ᒋᐧᑲᒥᑐᔨᒋ ᐊᑉᕋᒻ ᑭᔭ ᓗᑦ ᐅᑦ ᐊᐱᒋᐊᑭᓄᐛᐛ, ᑲᐃᓇᓐ ᑭᔭ ᐸᕆᔅ ᐃᔪᒡ ᐃᔭᐱᒡ ᐊᓐᑕ ᒋ ᐎᒍᐅᒡ ᐊᔅᒋᒡ᙮

⁸ ᐊᑯ ᐊᑉᕋᒻ ᐊᑕᑦ ᓗᑕ, “ᐛᐸᑕ ! ᒋ ᐎᐧᑲᓂᓯᑕᑐᓇᓄᐤ, ᐊᑲ ᒥᔭᑕᐅᒋ ᒋᑦ ᐊᐱᒋᐊᑭᓄᐅᒡ ᒐᒋ ᒪᓯᐧᑲᑐᒡ᙮

⁹ ᑎᑯᓐ ᐊᔅᒋᔾ ᒐᔅᑎᓇᔅ ᒐ ᐃᔅᐱᔭᐧᒄ ᐊ ᓂᓯᔭᐧᒄ᙮ ᒋᐸ ᒥᔽᐤ ᒐᒋ ᑎᐸᓂᔭᐧᒄ᙮ ᐛᔭᐸᑕ ᑕᓐᑕ ᒐᐸ ᒥᔽᔨᑕᓐ ᒐᒋ ᐎᒋᔨᓐ ᑭᔭ ᓂᔾ ᐃᔭᒡ ᓂᑭ ᐃᑐᑕᓐ᙮”

¹⁰ ᓗᑦ ᒋ ᓇᓂᑐᐛᐳᐤ ᑭᔭ ᒂ ᐛᐸᑕᐧᒃ ᐊ ᐱᓴᔨᒡ ᒠᕐᑕᓐ ᐊ ᒥᔪ ᓂᐱᐎᒡ, ᒧᔭᒻ ᐃᑎᓐ ᓂᑕᐅᒋᑕᑭᓂᔪᐤ ᑭᔭ ᒧᔭᒻ ᐃᒋᑉᑦ ᐊᔅᒋᔪᐤ, ᓱᐊᕐ ᐃᑕᒐ᙮ ᐊᐅᑯᐤ ᑲ ᐃᔅᐱᔨᒡ ᐊᒺᔭ ᑎᐸᔨᒋᒐᓱᐤ ᓂᓱᐅᓇᒋᑕᑦ ᓱᑕᒻ ᑭᔭ ᑯᒧᕋ ᐅᑕᓇᐛ᙮

¹¹ ᐊᑯ ᓗᑦ ᒂ ᐎᔭᔨᑕᐧᒃ ᒐᒋ ᐎᒋᑦ ᐊᓐᑕ ᐊ ᐱᓴᔨᒡ ᒠᕐᑕᓐ, ᐎᔾ ᑭᔭ ᐅᑦ ᐃᔨᒪ ᐛᐱᓄᑕᒡ ᒋ ᐃᓯ ᐊᑐᒐᐅᒡ᙮ ᐊᐅᑯᐤ ᑲ ᐃᓯ ᑎᐸᓄᑕᒡ ᐊ ᓂᓯᒡ ᓇᐸᐅᒡ᙮

¹² ᑲᐃᓇᓐ ᐊᔅᒋᒡ ᒋ ᐎᒍᐤ ᐊᑉᕋᒻ, ᒥᒄ ᓗᑦ ᒥᒋᒪ ᐅᑕᓇᐛ ᐊᓐᑕ ᐊ ᐱᓴᔨᒡ ᒠᕐᑕᓐ ᒋ ᐃᓯ ᐊᑐᒐᐤ, ᒥᒋᒪ ᓱᑕᒻ ᐅᑕᓇᔪᐤ ᒋ ᐎᒍᐤ᙮

¹³ ᐃᔪᒡ ᑲ ᐎᒋᒡ ᐊᓐᑕ ᓱᑕᒻ ᒋᒋᐛ ᒋ ᒥᒋ ᐃᔪᐎᒡ ᑭᔭ ᐊ ᒥᒋᑐᑕᒡ ᐊᑲ ᑕᑈᑐᐛᒡ ᑎᐸᔨᒋᒐᓱᐛ᙮

¹⁴ ᑎᐸᔨᒋᒐᓱᐤ ᒋ ᐃᑕᐤ ᐊᑉᕋᒪ ᑲᒋ ᓂᑭᑎᑯᑦ ᓗᑕ, “ᑎᔅᑎᓴᐱᔾ ᑭᔭ ᒐ ᐃᑕᐱᔨᓐ ᒋᐛᑎᓄᒡ ᑭᔭ ᐱᓯᒧᑕᒡ, ᐛᐱᓄᑕᒡ ᑭᔭ ᐊᑎᒪᐱᓯᒧᒡ᙮

¹⁵ ᒥᓯᐛ ᐊᓐ ᐎᔭᐸᑎᒥᓐ ᐊᔅᒋᔾ ᒋᑭ ᒥᔨᑎᓐ ᑭᔭ ᒋᓂᑕᐅᒋᐊᑭᓐᒡ, ᒋᔨᐛᐤ ᓇᓂᑎᒻ ᒋᑭ ᑎᐸᔨᑕᓇᐛᐤ᙮

¹⁶ ᓂᑭ ᐃᑐᑐᐛᐅᒡ ᒋᓂᑕᐅᒋᐊᑭᓐᒡ ᒐᒋ ᒥᒐᑎᒡ ᒐ ᐊᑲ ᒋ ᐊᒋᒪᑦ ᐊᐛᓐ᙮ ᐅᔅᑕ ᒋᑭ ᒥᒐᑐᐅᒡ ᐃᔅᐱᔅ ᐊ ᑕᑎᓂᔨᒋ ᐃᔭᑲᐛ ᐅᑕ ᐊᔅᒋᒡ᙮

¹⁷ ᔅᑐᑕ, ᐱᐸᒧᑕ ᒥᓯᐛ ᒐ ᐃᑐᑕᔨᓐ ᐅ ᐊᔅᒋᔾ, ᐛᔅ ᒋᑭ ᒥᔨᑎᓐ ᐅ᙮”

¹⁸ ᐊᑯ ᐊᑉᕋᒻ ᒋ ᐊᑐᒐᐤ ᑭᔭ ᒋ ᐎᒍᐤ ᒥᒋᒪ ᒪᒻᕋ ᒥᔅᑎᒂ ᐊ ᑕᔨᒋ ᐊᓐᑕ ᐃᑉᕈᓐ, ᐊᑯᑕ ᑲ ᐃᑐᑕᐧᒃ ᐱᔅᑎᓂᒐᐅᓇᐱᔅᑯᔪᐤ ᒐᒋ ᓂᑐᑎᒧᐛᑦ ᑎᐸᔨᒋᒐᓱᐛ᙮