ᒐᓂᓯᔅ 12 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊᑉᕋᒻ ᑲ ᑕᑈᑎᑯᑦ ᒋᓴᒪᓂᑐᐛ Genesis 12.1-9 (Proper-5 Year A) Genesis 12.1-4a (Lent-2 Year A)

¹ ᑎᐸᔨᒋᒐᓱᐤ ᐃᑕᐤ ᐊᑉᕋᒪ, “ᓂᑭᑕ ᒋᑦ ᐊᔅᒋᔾ ᑭᔭ ᒋᐧᑲᓂᓯᒡ ᑭᔭ ᒍᑕᐎᔾ ᐎᒡ, ᐃᑐᑕ ᒪᒃ ᐊᓐᑕ ᐊᔅᒋᔾ ᒐ ᐛᐸᑎᔨᑕᓐ᙮

² ᒋᑭ ᐅᑕᐎᒪᐅᓐ ᐊ ᓱᐧᑲᑎᓯᒡ ᐊ ᐃᑎᔅᑲᓇᓯᒡ, ᒋᑭ ᒥᔪᑐᑕᑎᓐ ᒥᓯᐛ ᒐᒂᓐ ᐅᒡ, ᓂᑭ ᒋᔅᑕᔨᑕᑯᑕᓐ ᒋᑦ ᐃᓯᓂᐧᑲᓱᐅᓐ, ᒋᑭ ᓱᐛᔨᑕᑯᐎᐛᓐ ᒪᒃ᙮

³ ᓂᑭ ᒥᔽᒋᒪᐅᒡ ᐊᓐᒡ ᑲ ᒥᔽᒋᒥᔅᒡ ᑭᔭ ᓂᑭ ᒥᒐᒋᒪᐤ ᐊᓐ ᒪᒐᒋᒥᔅᒃ; ᒋᔾ ᐅᒡ ᒥᓯᐛ ᐊ ᑕᑎᓯᒡ ᐃᔪᒡ ᐅᑕ ᐊᔅᒋᒡ ᒋᑭ ᓱᐛᔨᑕᑯᓱᐅᒡ᙮”

⁴ ᓂᔄᐅᑕᒡ ᑕᑐᔪᐤ ᐊᓱ ᐱᑕᑕᒡ ᒋ ᐃᑕᑐᐳᓇᓱᐤ ᐊᑉᕋᒻ ᑲ ᐃᑎᑯᑦ ᑎᐸᔨᒋᒐᓱᐛ ᒐᒋ ᓂᑭᑕᐧᒃ ᐦᐊᕋᓐ ᐅᑕᓇᔪᐤ᙮ ᒋ ᑕᑈᑐᐛᐤ ᑭᔭ ᒋ ᔅᑐᑕᐤ ᓗᑕ ᐊ ᐎᒐᐅᑯᑦ᙮

⁵ ᐊᑉᕋᒻ ᒋ ᐅᑎᓇᐤ ᐎᐛ ᓴᕋᐃᔨᒋ ᑭᔭ ᐅᑐᓯᒪ ᓗᑕ ᑭᔭ ᒥᓯᐛ ᒐᒂᓂᔪᐤ ᑲ ᒪᐅᒋᑕᑦ ᑭᔭ ᒥᓯᐛ ᐅᑦ ᐊᐱᒋᐊᑭᓇ ᐦᐊᕋᓐ ᑲ ᐅᒋ ᐊᔭᐛᒡ, ᒋ ᔅᑐᑕᐅᒡ ᒐᒋ ᐃᑐᑕᒡ ᑲᐃᓇᓐ ᐊᔅᒋᒡ᙮ ᐊᑯ ᑲ ᑎᑯᓯᒡ ᐊᓐᑕ ᑲᐃᓇᓐ ᐊᔅᒋᒡ᙮

⁶ ᒧᕋᐃ ᒋ ᐃᔅᐱᔅ ᐃᑐᑕᐤ ᐊᑉᕋᒻ ᐊᓐᑕ ᓴᑭᒻ ᐃᑕᐅᓂᒡ᙮ ᑲᐃᓇᓐ ᐃᔪᐛ ᐊᔅᒄ ᒋ ᑕᔪᐛ ᐊᓐᑕ ᐊᔅᒋᒡ᙮

⁷ ᑎᐸᔨᒋᒐᓱᐤ ᒋ ᓄᑯᓯᔅᑐᐛᐤ ᐊᑉᕋᒪ ᑭᔭ ᒂ ᐃᑕᑦ, “ᓂᑭ ᒥᔭᐅᒡ ᒋᑦ ᐊᑐᔅᒐᔭᑭᓐᒡ ᐅᔭ ᑲᐃᓇᓐ ᐊᔅᒋᔪᐤ᙮” ᐊᑯ ᐊᑉᕋᒻ ᒂ ᐃᑐᑎᒧᐛᑦ ᑎᐸᔨᒋᒐᓱᐛ ᐱᔅᑎᓂᒐᐅᓇᐱᔅᑯᔪᐤ ᑲᒋ ᓄᑯᓯᔅᑕᑯᑦ᙮

⁸ ᐊᑉᕋᒻ ᒪᒃ ᒋ ᐃᑐᑕᐤ ᐱᔅᑯᑎᓇᒡ ᐛᐱᓄᑕᒡ ᐸᑕᓪ ᐃᑕᒐ ᑭᔭ ᐊᑯᑕ ᑲ ᒋᒥᑕᑦ ᐅᐱᒍᐎᔭᓂᒋᐛᑉ, ᐸᑕᓪ ᐊᑎᒪᐱᓯᒧᒡ ᐊ ᑎᑯᓂᔨᒡ ᐃᑕᒐ ᑭᔭ ᐊᐃ ᐛᐱᓄᑕᒡ ᐃᑕᒐ᙮ ᐊᑯᑕ ᐱᔅᑎᓂᒐᐅᓇᐱᔅᑯᔪᐤ ᑲ ᐅᓯᑎᒧᐛᑦ ᑎᐸᔨᒋᒐᓱᐛ ᑭᔭ ᒋ ᓂᑐᑎᒧᐛᐤ ᑎᐸᔨᒋᒐᓱᐛ᙮

⁹ ᐊᑯ ᐊᑉᕋᒻ ᐱᓯᒧᑕᒡ ᒋ ᐃᓯ ᔅᑐᑕᐤ ᐃᔅᐱᔅ ᓇᒐᑉ ᐊᔅᒋᒡ᙮

ᐃᒋᑉᑎᒡ ᐊ ᑕᑦ ᐊᑉᕋᒻ

¹⁰ ᒋ ᑎᒂᓐ ᓄᑕᐧᑭᑕᐅᓐ ᐊᓐᑕ ᑲᐃᓇᓐ ᐊᔅᒋᒡ᙮ ᐊᑯ ᐊᑉᕋᒻ ᒂ ᐃᑐᑕᑦ ᐱᓯᒧᑕᒡ ᐃᒋᑉᑎᒡ ᒐᒋ ᑕᑦ ᐊᓐᑕ, ᐅᓴᒻ ᒋ ᐊᔨᒥᓐ ᒐᒋ ᐎᒋᓇᓄᐅᒡ ᐊᓐᑕ ᐊᔅᒋᒡ ᐊᑲ ᑎᒂᒡ ᒥᒋᒻ᙮

¹¹ ᒥᒄ ᐊᔅᒄ ᐊᑲ ᑎᑯᓯᒡ ᐊᓐᑕ ᐃᒋᑉᑎᒡ, ᐊᑯ ᐊᑕᑦ ᐎᐛ ᓴᕋᐃᔨᒋ, “ᓂ ᒋᔅᒐᔨᑕᓐ ᐊᔅᐱᔅ ᒥᔪᔎᐎᓐ,

¹² ᐛᐱᒥᔎᐛ ᐃᒋᑉᑦ ᐃᔪᒡ ᐊᔅᐱᔅ ᒥᔪᔎᐎᓐ, ᓂᑭ ᐎ ᓂᐸᐃᑯᒡ ᐅᓴᒻ ᓂᔾ ᐅ ᒋᓇᐸᒻ᙮ ᒥᒄ ᒋᔾ ᓇᒪ ᒋᑭ ᓂᐸᐃᒂᒡ᙮

¹³ ᒐ ᐃᑎᑥᐤ ᐊ ᐅᓯᒥᑕᑕᓐ᙮ ᐃᑎᑥᐛ ᐅᔭ, ᓂᑭ ᒥᔪᑐᑕᑯᒡ ᑭᔭ ᓇᒪ ᓂᑭ ᓂᐸᐃᑯᒡ᙮”

¹⁴ ᐃᔅᐱ ᑲ ᑎᑯᓯᒡ ᐊᓐᑕ ᐃᒋᑉᑎᒡ, ᒋ ᐛᐱᒪᐅᒡ ᐃᒋᑉᑦ ᐃᔪᒡ ᐊᔅᐱᔅ ᒥᔪᔎᐎᔨᒋ ᐊᓂᔭ ᐃᔎᐛ᙮

¹⁵ ᐃᔅᐱ ᐱᔅᒐ ᒋᓴᐅᒋᒪᐤ ᐅᑯᐸᓇᒪ ᐎᔭᐱᒪᒡ ᐃᔎᐛ, ᒋ ᐎᑎᒧᐛᐅᒡ ᒋᓴᐅᒋᒪᐛ ᐊᔅᐱᔅ ᒥᔪᔎᐎᔨᒋ᙮ ᐊᑯ ᒋᓴᐅᒋᒪᐤ ᑲ ᓂᑐᐛᔨᒪᑦ ᒐᒋ ᐸᓱᐛᑭᓄᔨᒋ ᒐᒋ ᑕᔨᒋ ᐎᒋᒡ᙮

¹⁶ ᒋ ᒥᔪᑐᑐᐛᐤ ᒪᒃ ᐊᑉᕋᒪ, ᐊᒋ ᐃᑕᔨᒪᑦ ᓴᕋᐃᔨᒋ ᐊ ᐅᔅᑕᓯᔨᒋ᙮ ᐊᑉᕋᒻ ᒋ ᒥᔭᑭᓄᐤ ᒪᒃ ᒪᔭᑕᓂᓴ ᑭᔭ ᒥᔅᑐᓴ, ᓇᐸᐤ ᐊᐱᒋᐊᑭᓇ ᑭᔭ ᐃᔎᐤ ᐊᐱᒋᐊᑭᓇ, ᓇᐸ ᐅᐧᑲᓇ ᑭᔭ ᓄᓴ ᐅᐧᑲᓇ, ᑭᔭ ᑲ ᒥᔅᑎ ᐱᔎᐅᑯᓇᔨᒋ ᐊᐛᓯᓴ᙮

¹⁷ ᐅᓴᒻ ᒋᓴᐅᒋᒪᐤ ᑲ ᐅᑎᓇᑦ ᐊᑉᕋᒪ ᐎᐎᐛ, ᑎᐸᔨᒋᒐᓱᐤ ᒋ ᐃᑐᑐᐛᐤ ᒋᓴᐅᒋᒪᐛ ᑭᔭ ᒥᓯᐛ ᑲ ᑕᔨᒋ ᐎᒋᐛᔨᒡ ᒐᒋ ᒥᔅᑎᐊᐧᑯᓯᔨᒋ᙮

¹⁸ ᐊᑯ ᒋᓴᐅᒋᒪᐤ ᒂ ᓂᑐᒪᑦ ᐊᑉᕋᒪ ᑭᔭ ᐊᑕᑦ, “ᒐᒂᓐ ᐅ ᑲ ᐃᑐᑕᐎᓐ ? ᒋᐸ ᐎᑎᒧᐅᓇᐱᓐ ᐅ ᒋᔾ ᐛᐎᓐ᙮

¹⁹ ᒐᒂᓐ ᒪᒃ ᐛᒋ ᐃᔅᒋᔄᔨᓐ ᐊ ᐅᓯᒥᔨᓐ ? ᒪᐅ ᒋᐅ, ᐅᑎᓐ ᑭᔭ ᒐ ᔅᑐᑕᔨᓐ᙮”

²⁰ ᐊᑯ ᒋᓴᐅᒋᒪᐤ ᒂ ᐃᑕᑦ ᐅᓂᑐᐱᔪᐅ-ᐃᔨᒪ ᒐᒋ ᐅᑎᓇᔨᒋ ᐊᑉᕋᒪ ᑭᔭ ᐎᐎᐛ ᑭᔭ ᒥᓯᐛ ᒐᒂᓂᔪᐤ ᑲ ᑎᐱᔨᐛᐅᓯᔨᒋ ᒐᒋ ᐎᐎᑎᓴᐛᔨᒋ ᐊᓐᑕ ᐃᒋᑉᑎᒡ᙮