ᑲᓚᓯᔭᓇ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑈᓪ ᑲ ᓂᒋᔅᑯᐛᑦ ᒋᓴᓴ ᐅᒋᔅᒋᓄᐊᒧᐛᑭᓂᔪᐛ

¹ ᓇᐅᓴᑉ ᐱᐳᓇ ᐸᑎᒪ ᐊᑯ ᒥᓐ ᒋᕈᓯᓕᒥᒡ ᑲ ᐃᑐᑕᔭᓐ᙮ ᐸᕐᓇᐸᔅ ᑭᔭ ᑕᐃᑕᔅ ᓂᒋ ᐎᒐᐅᑯᒡ᙮

² ᒋᓴᒪᓂᑐᐤ ᓂᒋ ᐛᐸᑎᔨᒄ ᐊ ᓂᑐᐛᔨᒥᑦ ᐊᓐᑕ ᒐᒋ ᐃᑐᑕᐅᒡ᙮ ᑲ ᑎᑯᓯᓂᔭᓐ ᒪᒃ ᐊᓐᑕ ᓂᔾ ᑭᔭ ᐊᓐᒡ ᑲ ᓂᑲᓂᐊᑭᓄᐎᒡ ᑲ ᑕᑈᑕᒡ ᑎᐸᓐ ᓂᒋ ᒪᒧᐎᓇᓐ᙮ ᓂᒋ ᐎᑎᒧᐛᐅᒡ ᑕᓐ ᐊᓐ ᑲ ᐃᔅᒋᔄᐅᒡ ᑲ ᐛᐎᑎᒪᒥᒋ ᒥᔽᒋᒧᐅᓂᔪᐤ ᐊᓂᔭᔪᐛ ᐊᑲ ᑕᑈᑎᒥᔨᒋ᙮ ᓂᒋ ᐎ ᒋᔅᒐᔨᒪᐅᒡ ᑕᓐ ᐊ ᐃᑕᔨᑎᒥᐃᑯᐛᒂ ᐊᓂᔭ ᑲ ᐃᓯ ᐛᐎᑎᒧᒡ᙮ ᐛᔅ ᒋ ᑎᑯᓂᑯᐱᓇ ᒐᒂᔪᐤ ᐊᑲ ᐅᒋ ᓇᐊᔨᑎᒥᐃᑯᒡ ᒐᔅᑲ ᒋᐸ ᐃᓯᓇᑯᓐ ᑕᓐ ᑲ ᐃᓯ ᐸᒋ ᐛᐎᑎᒪᓐ ᐊᓐᑕ ᐅᑕᒡ᙮ ᓇᒪ ᒪᒃ ᓂ ᐅᒋ ᓂᑐᐛᔨᑕᓐ ᒐᔅᑲ ᒐᒋ ᐃᓯᓇᒂᒡ᙮

³ ᑕᐃᑕᔅ ᒪᒃ, ᐊᓐ ᑲ ᐸᒋ ᐎᒐᐅᑦ ᐊᓐᑕ ᐊᑲᔭ ᑲ ᐃᓯᓂᐧᑲᑕᔨᒡ ᐊᔅᒋᔪᐤ ᐊᑯᑕ ᐛᒋᑦ᙮ ᓇᒪ ᒍᐤ ᐃᑎᔅᑲᓇᓱᐤ᙮ ᐊᑎ ᒪᒃ ᐊᑲ ᒍᐤ ᐊ ᐃᑎᔅᑲᓇᓯᑦ ᓇᒪ ᐅᒋ ᐊᔨᐧᑭᒥᐃᑯᐤ ᐊᓂᔭᔪᐛ ᑲ ᓂᑲᓂᐊᑭᓄᔨᒋ ᒐᒋ ᒋᔅᒋᓄᐛᒋᔄᑭᓄᐅᑦ᙮

⁴ ᒥᒄ ᒪᒃ ᒋ ᑕᐅᒡ ᓇᐸᐅᒡ ᒋᒧᑦ ᐊᒋ ᐸᒋ ᐱᑕᐱᔪᐅᒡ ᐊᓐᑕ ᐊ ᐃᑕᐅᒋᑦ ᒧᔭᒻ ᐊ ᑕᑈᔭᔨᒪᒡ ᑭᔭ ᐎᔨᐛᐤ ᒋᓴᓴ ᐊ ᐃᑎᒡ᙮ ᓂᒋ ᐎ ᓇᓂᑐ ᒋᔅᒐᔨᒥᑯᓇᓂᒡ ᑕᓐ ᐊ ᐃᓯ ᑎᐸᒋᒥᒋᒋ ᒋᓴᔅ ᙭ᑕ ᐊ ᐎᒐᐅᒥᒋᒋ, ᐊᓐ ᑲ ᐊᐱᐧᑯᓂᔨᒥᑦ᙮ ᐊᔪᐅᒄ ᐅᔭ ᑲ ᐃᑎᒡ ᐊᒋ ᐎ ᐃᑐᑐᐎᒥᒡ ᑲᐤ ᒐᒋ ᒪᒋᒂᐱᐧᑲᑎᑯᔭᒡ ᐎᓱᐛᐅᓐ᙮

⁵ ᓇᒪ ᒪᒃ ᓇᔅᒡ ᓂ ᐅᒋ ᓂᔅᑯᒺᓇᓐ ᒐᒋ ᐃᑐᐅᒋᑦ ᐊᓂᔭ ᑲ ᐃᓯ ᓂᑐᐛᔨᒥᔨᒥᒡ ᒐᒋ ᐃᑐᐅᒋᑦ ᐛᔅ ᓂ ᐎ ᒥᔪ ᑭᓄᐛᔨᑕᓇᓐ ᑕᓐ ᐊ ᐃᓯ ᑕᑈᒥᑲᒡ ᒥᔽᒋᒧᐅᓐ ᒋᔨᐛᐤ ᒐᒋ ᒋᔅᒐᔨᑎᒪᒄ᙮

⁶ ᐊᓐᒡ ᑲ ᓂᑲᓂᔅᑲᒐᒡ, ᒋᔅᑕᔨᑕᑯᓱᐅᒡ ᒋ ᐃᑕᔨᒪᑭᓄᐎᒡ᙮ ᓇᒪ ᒪᒃ ᒐᒂᓐ ᑕᓐ ᐊ ᐃᑕᔨᒪᑭᓄᐎᒡ ᓂᑦ ᐃᑕᔨᑕᓐ ᓂᔾ ᐎ᙮ ᐛᔅ ᒥᓯᐛ ᐊᐛᔪᐛ ᐸᐃᑯᓄᒡ ᐃᑕᔨᒪᐤ ᐎᔾ ᒋᓴᒪᓂᑐᐤ᙮ ᒋ ᓇᐊᔨᑎᒧᒡ ᐊ ᐛᐎᑎᒧᒡ ᒥᔽᒋᒧᐅᓂᔪᐤ, ᓇᒪ ᐅᒋ ᑎᑯᓂᔪᐤ ᐊᑐᐎᔅ ᒐᒋ ᐃᓯ ᐸᒋ ᐎᑎᒧᐅᑥᐤ᙮

⁷ ᑭᔭ ᒋ ᓂᔅᑐᑎᒧᒡ ᒋᓴᒪᓂᑐᐛ ᐊᒋ ᒥᔨᒋ ᒐᒋ ᐊᑐᔅᒐᔅᑎᒧᒡ ᒥᔽᒋᒧᐅᓂᔪᐤ ᐊ ᐛᐎᑎᒪᒥᒋ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ, ᒧᔭᒻ ᑕᓐ ᑲ ᐃᓯ ᒥᔭᔨᒋ ᐱᑕᕋ ᐊᑐᔅᒐᐅᓂᔪᐤ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᒐᒋ ᐛᐎᑎᒧᐛᔨᒋ ᒥᔽᒋᒧᐅᓂᔪᐤ᙮

⁸ ᒋᓴᒪᓂᑐᐤ ᒋ ᒥᔭᐤ ᐱᑕᕋ ᑭᔅᒋᐅᓂᔪᐤ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᒐᒋ ᐛᐎᑎᒧᐛᔨᒋ ᒥᔽᒋᒧᐅᓂᔪᐤ ᒧᔭᒻ ᑲ ᐃᓯ ᒥᔨᑦ ᑭᔅᒋᐅᓂᔪᐤ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒡ ᒐᒋ ᐛᐎᑎᒪᒥᒋ ᒥᔽᒋᒧᐅᓂᔪᐤ᙮

⁹ ᒋᒥᔅ, ᐱᑕᕐ ᑭᔭ ᒠᓐ, ᐊᓐᒡ ᑲ ᓂᑲᓂᐊᑭᓄᐎᒡ ᑭᔭ ᒪᐅᒡ ᑲ ᒋᔅᑕᔨᒪᑭᓄᐎᒡ ᒋ ᒋᔅᒐᔨᑎᒧᒡ ᒋᓴᒪᓂᑐᐛ ᐊᒋ ᒥᔨᒋ ᐅᔭ ᒐᒋ ᐃᑕᐱᑎᓯᐅᒡ᙮ ᐊᑯ ᒪᒃ ᐸᕐᓇᐸᔅ ᐊ ᓂᓯᔭᒡ ᑲ ᐊᑎᒥᔅᑯᐎᔨᒥᒡ ᐅᒡ ᐊ ᓂᔅᑎᒡ᙮ ᐊ ᓄᑯᑕᔭᒡ ᐸᐃᑯᓄᒡ ᐊ ᐃᓯᑲᐳᐅᔭᒡ᙮ ᒪᐅ ᒪᒃ ᑲ ᐃᓯ ᓂᔅᑯᒧᔭᒡ᙮ ᐸᕐᓇᐸᔅ ᐊ ᓂᓯᔭᒡ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᒐ ᐛᐎᑎᒧᐅᒋᒡ ᒥᔽᒋᒧᐅᓂᔪᐤ ᑭᔭ ᐎᔨᐛᐤ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᒐ ᐛᐎᑎᒧᐛᒡ᙮

¹⁰ ᒥᒄ ᐸᐃᒄ ᒐᒂᔪᐤ ᓂᒋ ᐱᑯᓴᔨᒥᑯᓇᓂᒡ᙮ ᓂᒋ ᓂᑐᐛᔨᒥᑯᓇᓂᒡ ᒐᒋ ᐛᐎᒋᐃᒥᒋᒋ ᐊᓂᔭᔪᐛ ᑲ ᑕᑈᑎᒥᔨᒋ ᐊᓐᑕ ᒋᕈᓯᓕᒥᒡ ᑲ ᑕᔨᒋ ᑲ ᒋᔅᑎᒪᑎᓯᔨᒋ᙮ ᐊᐅᒄ ᒪᒃ ᐅ ᓇᔅᒡ ᑲ ᐃᑕᔨᑎᒥᐃᑯᔭᓐ ᒐᒋ ᐃᑎᔭᓐ᙮

ᑈᓪ ᑲ ᐊᓏᔨᒪᑦ ᐱᑕᕋ ᐊᓐᑕ ᐊᓐᑎᔭᑭᒡ

¹¹ ᐊᓐᑎᔭᑭᒡ ᒪᒃ ᑲ ᑎᑯᓯᐧᒃ ᐱᑕᕐ ᒋ ᑎᑯᓂᔪᐤ ᑲ ᐃᓯ ᐊᓏᔨᒥᒃ᙮ ᐛᔅ ᒋ ᑎᑯᓂᔪᐤ ᑕᑈ ᑕᓐ ᑲ ᐃᓯ ᐅᓂᐱᔨᑦ᙮

¹² ᒪᐅ ᑲ ᐃᑎᑦ᙮ ᑲ ᑎᑯᓯᐧᒃ ᐊᓐᑕ ᐊᓐᑎᔭᑭᒡ ᓇᒪᐎᔾ ᒐᒂᔪᐤ ᐅᒋ ᐃᑕᔨᑎᒻ ᐊ ᐎᒋᒥᒋᓱᒪᑦ ᒪᓐ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᑲ ᑕᑈᑎᒥᔨᒋ᙮ ᒐᒃ ᒋᒥᔅ ᒋ ᐸᒋ ᐃᑎᓴᐛᐤ ᐱᔅᒐ ᒍᐤ ᐃᔪᐛ ᑲ ᑕᑈᑎᒥᔨᒋ᙮ ᓇᔅᒡ ᐃᔭᒂ ᒋ ᐃᑕᔨᑎᒥᐃᑯᐅᒡ ᒍᐤ ᐊᔭᒥᐊᐅ ᐎᓱᐛᐅᓇ ᐅᒡ᙮ ᒥᓯᐛ ᐊᐛᔪᐛ ᑲ ᑕᑈᑎᒥᔨᒋ ᒋ ᐃᑕᐅᒡ ᒐᒋ ᒋᔅᒋᓄᐛᒋᔄᑭᓄᔨᒋ᙮ ᐱᑕᕐ ᒪᒃ ᒋ ᑯᔅᑕᐤ ᐅᔭ ᒍᐤ ᐃᔪᐛ ᐊᑯ ᓇᒪ ᒥᓐ ᐅᒋ ᐎᒋᒥᒋᓱᒪᐤ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ᙮

¹³ ᐊᑯ ᒪᒃ ᐊᓐᒡ ᑯᑎᑭᒡ ᐃᔪᒡ ᒍᐤ ᑲ ᐃᑎᔅᑲᓇᓯᒡ ᐊᓐᑕ ᑲ ᑕᒡ ᐊᐅᑯᓐ ᒧᔭᒻ ᑲ ᐃᑎᒡ, ᐊ ᒋᔅᒋᓄᐛᐱᒪᒡ ᐱᑕᕋ ᑕᓐ ᐊ ᐃᑎᔨᒋ᙮ ᒋ ᒋᔅᒐᔨᑎᒧᒡ ᒪᒃ ᐊᑲ ᐅᔭ ᒋᐸ ᐅᒋ ᐃᑐᐅᒡ᙮ ᐛᐛᒡ ᐸᕐᓇᐸᔅ ᒋ ᐊᑎ ᐊᔅᒋᐱᔭᑭᓄᐤ ᑭᔭ ᐎᔾ ᐅᔭ ᒐᒋ ᐃᑎᑦ᙮

¹⁴ ᐎᔭᐱᒥᒂᐤ ᒪᒃ ᐊᑲ ᑯᐃᔅᒄ ᐃᑎᒡ ᑕᓐ ᐊ ᐃᑎᔅᑕᔨᒡ ᒋᓴᒪᓂᑐᐛ ᐅᒥᔽᒋᒧᐅᓂᔪᐤ ᑲ ᑕᑈᒥᑭᓂᔨᒡ ᓂᒋ ᐊᓏᔨᒪᐤ ᐱᑕᕐ ᒥᓯᐛ ᐊᓂᔭᔪᐛ ᑲ ᑕᑈᑎᒥᔨᒋ ᐊ ᓂᑐᑎᒥᔨᒋ᙮ ᓂᒋ ᐃᑕᐤ, “ᒍᐤ ᒋᑦ ᐃᑎᔅᑲᓇᓯᓐ᙮ ᒥᒄ ᒪᒃ ᓇᒪ ᒥᓯᐛ ᒋ ᓂᓇᐃᑕᓐ ᒍᐤ ᐊᔭᒥᐊᐅ ᐎᓱᐛᐅᓇ᙮ ᒐᒂᓐ ᒪᒃ ᐛᒋ ᓯᒋᒥᑥᐤ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᒍᐤ ᐊᔭᒥᐊᐅ ᐎᓱᐛᐅᓇ ᒐᒋ ᓂᓇᐃᑕᒡ᙮”

ᑕᐱᔅᑯᓐ ᒍᐤ ᐃᔪᒡ ᑭᔭ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᐱᒪᒋᐅᒡ ᐊ ᑕᑈᐅᒐᔨᒪᒡ ᒋᓴᔅ ᙭ᑕ Galatians 2.15-21 (Proper-6 Year C)

¹⁵ ᒍᐤ ᓂᑦ ᐃᑎᔅᑲᓇᓯᓇᓐ, ᓇᒪᔭᐅᒡ ᓂᔭᓐ ᐃᔭᒡ ᑲ ᐃᑎᔅᑲᓇᓯᒡ ᐊᐛᓐᒋ ᑲ ᒥᒐᑎᓯᒡ᙮

¹⁶ ᐃᔭᐱᒡ ᒪᒃ ᓂ ᒋᔅᒐᔨᑕᓇᓐ ᐊ ᑕᑈᔭᔨᒪᑦ ᐊᐛᓐ ᒋᓴᔅ ᙭ᑕ᙮ ᐊᑯᑕ ᐛᒋ ᐅᑯᐃᔅᑯᑕᑎᓯᐤ ᐃᓯ ᑭᓄᐛᐱᒥᑯᑦ ᒋᓴᒪᓂᑐᐛ, ᓇᒪ ᐎ ᐊᓂᔭ ᐅᒋ ᐊ ᓂᓇᐃᑕᐧᒃ ᐎᓱᐛᐅᓇ᙮ ᐊᑯ ᒪᒃ ᑭᔭ ᓂᔭᓐ ᑎᔭᑈᔭᔨᒥᒋᒡ ᒋᓴᔅ ᙭, ᐊ ᑕᑈᔭᔨᒥᒋᒡ ᒪᒃ ᙭ ᐊᑯᑕ ᐛᒋ ᐅᑯᐃᔅᑯᑕᑎᓯᐅᒡ ᐃᓯ ᑭᓄᐛᐱᒥᔨᒥᑦ ᒋᓴᒪᓂᑐᐤ᙮ ᓇᒪ ᐎ ᐊᓐ ᐊ ᓂᓇᐃᑎᒪᒡ ᒍᐤ ᐊᔭᒥᐊᐅ ᐎᓱᐛᐅᓇ ᐛᒋ ᐃᓯ ᑭᓄᐛᐱᒥᔨᒥᑦ᙮ ᑕᐸ ᐊᐛᓐ ᐅᑯᐃᔅᑯᑕᑎᓯᐤ ᒋᑭ ᐅᒋ ᐃᓯ ᑭᓄᐛᐱᒥᑯᐤ ᒋᓴᒪᓂᑐᐛ ᒥᒄ ᐊᓂᔭ ᐊ ᓂᓇᐃᑕᐧᒃ ᒍᐤ ᐊᔭᒥᐊᐅ ᐎᓱᐛᐅᓇ᙮

¹⁷ ᒪᒂᒡ ᑲ ᓇᓂᑐᐛᔨᑎᒪᒡ ᑕᓐᑕ ᒐᒋ ᐅᒋ ᓂᓇᐊᔨᑎᒥᐃᒋᑦ ᒋᓴᒪᓂᑐᐤ, ᐃᔅᐱ ᑎᔭᑈᔭᔨᒥᒋᒡ ᙭, ᐊᑯᑕ ᑲ ᐅᒋ ᒋᔅᒐᔨᑎᒪᒡ ᑭᔭ ᓂᔭᓐ ᐊ ᒥᒐᑎᓯᔭᒡ ᒧᔭᒻ ᑕᓐ ᐊ ᐃᓯ ᒥᒐᑎᓯᒡ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ᙮ ᙭ ᐊ ᒪᒃ ᐃᑐᑐᐛᐤ ᐊᐛᔪᐛ ᒐᒋ ᒥᒐᑎᓯᔨᒋ ? ᓇᒪᐎᔾ ᑭᑈ᙮

¹⁸ ᐛᔅ ᐛᐛᓯᑎᒪᓇ ᒐᒂᓐ ᐊᒋ ᐱᑯᐱᑎᒪᓐ ᐊᑯᑕ ᒐ ᐅᒋ ᒋᔅᒐᔨᑕᑯᓯᔭᓐ ᐊᒋ ᐅᓂᐱᔨᓱᔭᓐ᙮

¹⁹ ᒪᒂᒡ ᓱᒃ ᑲ ᐎ ᓂᓇᐃᑎᒪᓐ ᒍᐤ ᐊᔭᒥᐊᐅ ᐎᓱᐛᐅᓇ ᒐᒃ ᓂᒋ ᓂᔅᑐᑕᓐ ᐊᑲ ᐊᓐ ᒍᐤ ᐊᔭᒥᐊᐅ ᐎᓱᐛᐅᓐ ᐊ ᓂᓇᐃᑎᒪᓐ ᒐ ᐅᒋ ᐅᑯᐃᔅᑯᑕᑎᓯᐤ ᐸᒋ ᐃᓯ ᑭᓄᐛᐱᒥᑦ ᒋᓴᒪᓂᑐᐤ᙮ ᐊᑯ ᒪᒃ ᐊᓄᒡ ᒧᔭᒻ ᐊ ᓂᐱᔭᓐ ᑭᔭ ᐊᑲ ᐊᑯ ᒪᑎᑯᔅᑲᑯᔭᓐ ᐊᓂᔭᔪᐛ ᐎᓱᐛᐅᓇ ᓂᑦ ᐃᓯᓇᑯᓯᓐ᙮ ᐊᑯ ᒪᒃ ᑕᑈ ᒐᒋ ᐱᒪᑎᓯᔅᑐᐅᒃ ᒋᓴᒪᓂᑐᐤ᙮

²⁰ ᐛᔅ ᒧᔭᒻ ᑕᑈ ᐊᒋ ᐎᒋ ᓂᐱᒥᒃ ᒋᓴᔅ ᑲ ᒋᔅᑕᔎᑕᑭᓄᐅᑦ ᐃᓯᓇᑯᓐ᙮ ᐊᓄᒡ ᒪᒃ ᓇᒪᐎᔾ ᐊᑯ ᓂᔾ ᓂ ᒋᔅᒋᓄᐱᔨᑕᓐ ᓂᐱᒪᑎᓯᐅᓐ᙮ ᐎᔾ ᒋᓴᔅ ᒋᔅᒋᓄᐱᔨᑕᐤ ᓂᐱᒪᑎᓯᐅᓂᔪᐤ ᐛᔅ ᓂ ᐱᒋᔅᑲᒄ᙮ ᐊᑯ ᒪᒃ ᐅ ᐊᓄᒡ ᐊ ᐃᓯ ᐱᒪᑎᓯᔭᓐ ᓂ ᐱᒪᑎᓯᓐ ᐊ ᑕᑈᔭᔨᒥᒃ ᐊᓐ ᑲ ᓴᒋᐃᑦ ᑭᔭ ᑲ ᐱᔅᑎᓂᓱᑦ ᒐᒋ ᓂᐸᐊᑭᓄᐅᑦ ᓂᔾ ᐅᒋ, ᐊᐅᒄ ᒋᓴᒪᓂᑐᐤ ᐅᑯᓴ᙮

²¹ ᓇᒪ ᓂᑦ ᐃᒐᓂᒺᓐ ᒋᓴᒪᓂᑐᐤ ᐅᓱᐛᔨᒋᒐᐅᓐ᙮ ᐛᔅ ᒧᔭᒻ ᐊᐛᓐ ᐅᑯᐃᔅᑯᑕᑎᓯᐤ ᐃᓯ ᑭᓄᐛᐱᒥᑯᑦ ᒋᓴᒪᓂᑐᐛ, ᒥᒄ ᐊ ᓂᓇᐃᑕᐧᒃ ᒍᐤ ᐊᔭᒥᐊᐅ ᐎᓱᐛᐅᓇ ᐊᑯ ᑭᑈ ᒧᔭᒻ ᒐᔅᑲ ᐊᒋ ᓂᐸᐊᑭᓄᐅᑦ ᒋᓴᔅ ᒋᐸ ᐃᓯᓇᑯᓐ᙮