ᐊᒃᓱᑕᔅ 7 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒧᓱᔅ ᒋᓇᐱᑯᒡ ᑲ ᐃᓯᓇᑯᓂᔨᒡ ᐅᓯᔅᑲᐅᓐ

¹ ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᓂᑭ ᒥᔭᐤ ᒋᔅᑕᔅ ᐊᕋᓐ ᒐᒋ ᐃᔨᒥᔅᑎᒪᔅᒃ, ᒧᔭᒻ ᐅᒋᔅᒋᐛᐃᒐᓱᐤ ᐊᔨᒧᑎᒧᐛᒋ ᓂᑦ ᐃᔨᒧᓂᔪᐤ ᐊᓂᔭ ᐃᔪᐛ᙮

² ᒐ ᐎᑎᒧᐅᑦ ᐊᕋᓐ ᓄᑎᒻ ᒐᒂᔪᐤ ᑲ ᐃᑎᑕᓐ ᑭᔭ ᒐ ᐃᑎᓱᒪᑦ ᒋᓴᐅᒋᒪᐛ ᒐᒋ ᐱᔅᑎᓇᔨᒋ ᓂᑦ ᐃᔨᒪ ᒐᒋ ᓂᑭᑎᒥᔨᒋ ᐊᓂᔭ ᐅᑦ ᐊᔅᒋᔪᐤ᙮

³ ᑭᔭ ᓂᑭ ᐃᑐᑐᐛᐤ ᒐᒋ ᒥᔅᑯᔅᑎᒂᓇᑦ᙮ ᓇᒪ ᒋᑭ ᓂᑐᑕᒃ ᐊᑎᓱᐧᒄ ᒥᔅᑎ ᐊᓏᔨᒥᑲ ᑭᔭ ᐅᑦ ᐃᔨᒪ᙮

⁴ ᐊᑯ ᒐ ᐃᑐᑎᒪᓐ ᓂᓱᐧᑲᑎᓯᐅᓐ ᒪᔅᑕᔾ ᒐ ᒥᔅᑎ ᐊᓏᔨᒥᒂᐤ ᐊᓐ ᐃᒋᑉᑦ ᐃᔪᒡ, ᐊᑯ ᒐ ᒋᔅᒋᓄᑕᐃᒂᐤ ᓂᑦ ᐃᔨᒥᒡ ᐃᒋᑉᑎᒡ ᐅᒡ᙮

⁵ ᐅ ᒋ ᐃᔅᐱᔨᒐ ᐊᑯ ᐃᒋᑉᑦ ᐃᔪᒡ ᒐ ᒋᔅᒐᔨᑕᒡ, ᓂᔾ ᐅ ᑎᐸᔨᒋᒐᓱᐤ᙮”

⁶ ᐊᑯ ᒧᓱᔅ ᑭᔭ ᐊᕋᓐ ᒂ ᑐᑕᒡ ᑲ ᐃᑎᓱᒪᑯᒡ ᑎᐸᔨᒋᒐᓱᐛ᙮

⁷ ᔭᓇᐤ ᑕᑐᔪᐤ ᒋ ᐃᑕᑐᐳᓇᓱᐤ ᒧᓱᔅ ᑭᔭ ᔭᓇᐤ ᑕᑐᔪᐤ ᐊᓱ ᓂᔅᑐ ᒋ ᐃᑕᑐᐳᓇᓱᐤ ᐊᕋᓐ, ᑲ ᓂᑐᐛᐱᒪᒡ ᑭᔭ ᑲ ᐃᔨᒪᐊᒡ ᒋᓴᐅᒋᒪᐛ᙮

⁸ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ ᑭᔭ ᐊᕋᓇ,

⁹ “ᐃᑎᑕᒂ ᒋᓴᐅᒋᒪᐤ, ‘ᒐ ᐃᑐᑎᒪᒄ ᒪᒥᔅᑲᒡ ᐃᑐᐅᓐ,’ ᒐ ᐃᑎᑦ ᐊᕋᓐ, ‘ᐅᑎᓇ ᒋᓯᔅᑲᐅᓐ ᑭᔭ ᒐ ᐛᐱᓂᒥᓐ ᐊᓐᑕ ᓂᑲᓐ ᐊᑕᑦ ᒋᓴᐅᒋᒪᐤ ᐊᑯ ᒋᓇᐱᑯᒡ ᒐ ᐃᓯ ᒥᔅᑯᒋᐱᔨᒡ᙮’ ”

¹⁰ ᐊᑯ ᒧᓱᔅ ᑭᔭ ᐊᕋᓐ ᒂ ᓂᑐᐛᐱᒪᒡ ᒋᓴᐅᒋᒪᐛ, ᒂ ᑐᑕᒡ ᑲ ᐃᑎᓱᒪᑯᒡ ᑎᐸᔨᒋᒐᓱᐛ᙮ ᐊᕋᓐ ᒂ ᐛᐱᓇᐧᒃ ᐅᓯᔅᑲᐅᓐ ᐊᓐᑕ ᓂᑲᓄᒡ ᑭᔭ ᒋᓇᐱᑯᒡ ᒂ ᐃᓯ ᒥᔅᑯᒋᐱᔨᒡ᙮

¹¹ ᒋᓴᐅᒋᒪᐤ ᒂ ᐎᓴᒪᑦ ᐅᑲᒥᓂᑐᐅᓯᒪ ᑭᔭ ᒂ ᐃᑐᑎᒥᔨᒋ ᒧᔭᒻ ᑲ ᑐᑕᒡ ᑭᔭ ᐎᔨᐛᐤ᙮

¹² ᒂ ᐛᐱᓇᒡ ᐅᓯᔅᑲᐅᓄᐛᐛ ᑭᔭ ᒋᓇᐱᑯᒡ ᒂ ᐃᓯ ᒥᔅᑯᒋᐱᔨᒋ, ᒥᒄ ᐊᕋᓐ ᐅ ᒋᓇᐱᑯᒪ ᑲ ᑯᒋᐱᔭᔨᒋ ᐊᓂᔭ ᑯᑎᑲ ᒋᓇᐱᒂ᙮

¹³ ᒋᓴᐅᒋᒪᐤ ᐊᔅᒄ ᐃᔭᐱᒡ ᒋ ᒥᔅᑯᔅᑎᒂᓇᐤ ᑭᔭ ᓇᒪ ᐅᒋ ᐎᓂᑐᑎᒻ ᐃᔭᐱᒡ, ᒧᔭᒻ ᑎᐸᔨᒋᒐᓱᐛ ᑲ ᐃᔅᒋᔄᔨᒋ᙮

ᓂᐱᔾ ᒥᐧᑯᒡ ᑲ ᐃᓯᓇᒂᒡ

¹⁴ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒋᒋᐛ ᐃᔭᐱᒡ ᒥᔅᑯᔅᑎᒂᓇᐤ ᒋᓴᐅᒋᒪᐤ, ᑭᔭ ᓇᒪ ᑕᑈᑎᒻ ᒐᒋ ᐱᔅᑎᓇᑦ ᓂᑦ ᐃᔨᒪ᙮

¹⁵ ᒐᒋᓴᐸᔭᒐ, ᒐ ᑕᐧᑯᓂᒥᓐ ᒋᓯᔅᑲᐅᓐ ᒋᓇᐱᑯᒡ ᑲ ᐃᓯ ᒥᔅᑯᒋᐱᔨᒡ, ᑭᔭ ᓯᓱᒡ ᓇᐃᔭᓪ ᓯᐱᒡ, ᐊᑯᑕ ᒐ ᐊᓱᐛᐱᒥᑦ ᐊᓐ ᒋᓴᐅᒋᒪᐤ᙮

¹⁶ ᑭᔭ ᒐ ᐎᑎᒧᐅᑦ, ‘ᑎᐸᔨᒋᒐᓱᐤ, ᐃᑉᕈᐤ ᐅᒋᓴᒪᓂᑐᒧᐛᐛ, ᓂᒋ ᐃᑎᓴᐅᒃ ᒐᒋ ᐃᑎᓱᒥᑕᓐ, ᐱᔅᑎᓇᐧᑯᒡ ᓂᑦ ᐃᔨᒥᒡ ᒐᒋ ᐊᔭᒥᐊᔅᑐᐅᒡ ᐊᓐᑕ ᐸᐧᑯᑎᔅᑭᒥᑲᒡ᙮ ᒥᒄ ᐊᔅᒄ ᐃᔭᐱᒡ ᐊᓄᒡ, ᓇᒪ ᒋ ᐅᒋ ᓂᑐᑐᐛᐤ᙮

¹⁷ ᑎᐸᔨᒋᒐᓱᐤ ᐃᔅᒋᔄᐤ, “ᐊᑯ ᒐᔅᒐᔨᑎᒥᓐ ᐊᐛᓐ ᐊᓐ ᐎᔾ ᐊᓂᔭ ᒐᒂᔪᐤ ᒐ ᐃᑐᑕᐧᒃ ᐅᒡ: ᐅ ᓂᓯᔅᑲᐅᓐ ᐅᒡ ᓂᑭ ᑕᐧᑲᑭᒪᐊᓐ ᓇᐃᔭᓪ ᓯᐱᔾ, ᐊᑯ ᒥᐧᑯᒡ ᒐ ᐃᓯᓇᒂᒡ᙮

¹⁸ ᒥᓯᐛ ᓂᒪᓯᒡ ᒋᑭ ᓂᐳᐅᒡ, ᑭᔭ ᓇᐃᔭᓪ ᓯᐱᔾ ᒋᑭ ᒥᒋᒪᑯᓐ᙮ ᐃᒋᑉᑦ ᐃᔪᒡ ᓇᒪ ᒋᑭ ᒋ ᒥᓄᐅᒡ ᐊᓂᔭ ᓂᐱᔪᐤ ᐊᓐᑕ ᓯᐱᒡ ᐅᒡ᙮” ’ ”

¹⁹ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᐃᑎᑦ ᐊᕋᓐ, ‘ᐅᑎᓇ ᒋᓯᔅᑲᐅᓐ ᑭᔭ ᓂᐱᒡ ᐊᓐᑕ ᒐ ᐃᔅᐱᑕᔨᓐ, ᒥᓯᐛ ᓯᐱᓴ, ᑭᔭ ᒥᓯᐛ ᓂᐱᔭ,’ ᒥᐧᑯᒡ ᒐ ᐃᓯᓇᒂᒋ᙮ ᒥᓯᐛ ᓂᐱᔾ ᐊᓐᑕ ᐃᒋᑉᑎᒡ ᒥᐧᑯᒡ ᒋᑭ ᐃᓯᓇᑯᓐ ᐃᔭᐱᒡ ᐊᓐᑕ ᐛᐱᑎᓂᔅᒋᐳᑕᒡ ᑭᔭ ᒥᓯᐛ ᒐᒂᓂᒡ ᑲ ᐊᓱᐅᑕᒡ ᓂᐱᔾ᙮”

²⁰ ᒧᓱᔅ ᑭᔭ ᐊᕋᓐ ᒂ ᑐᑕᒡ ᑎᐸᔨᒋᒐᓱᐛ ᑲ ᐃᑎᑯᒡ᙮ ᐊᕋᓐ ᒂ ᐅᐱᑕᐧᒃ ᐅᓯᔅᑲᐅᓐ ᑭᔭ ᒂ ᑕᐧᑲᑭᒪᐊᐧᒃ ᓇᐃᔭᓪ ᓯᐱᔪᐤ, ᐊᑯ ᒥᐧᑯᒡ ᒂ ᐃᓯᓇᑯᓂᔨᒡ ᓄᑎᒻ ᓂᐱᔪᐤ᙮

²¹ ᓂᒪᓯᒡ ᒋ ᓂᐳᐅᒡ ᑭᔭ ᓂᐱᔾ ᒋᑭ ᒥᒋᒪᑯᓐ, ᐃᒋᑉᑦ ᐃᔪᒡ ᓇᒪ ᒋ ᐅᒋ ᒥᓄᐅᒡ ᐊᓂᔭ ᓂᐱᔪᐤ᙮ ᒥᓯᐛ ᐊᓐᑕ ᒥᐧᒄ ᒋ ᑎᑯᓐ ᐃᒋᑉᑦ ᐊᔅᒋᒡ᙮

²² ᒋᓴᐅᒋᒪᐤ ᐅᑲᒥᓂᑐᓯᒪ ᐸᐃᑯᑕᐤ ᒂ ᐃᑐᑎᒥᔨᒋ᙮ ᐊᑯ ᒋᓴᐅᒋᒪᐤ ᐃᔭᐱᒡ ᒋ ᒥᔅᑯᔅᑎᒂᓇᐤ, ᓇᒪ ᐅᒋ ᐎ ᓂᑐᑐᐛᐤ ᒧᓱᓴ ᑭᔭ ᐊᕋᓇ ᒧᔭᒻ ᑎᐸᔨᒋᒐᓱᐤ ᑲ ᐃᔅᒋᔄᑦ᙮

²³ ᒋᓴᐅᒋᒪᐤ ᑲᐤ ᒂ ᒋᐛᑦ ᐊᓐᑕ ᐅᒋᓴᒋᒪᐅᒋᐛᐱᒡ ᐊᑲ ᐅᒋ ᒪᒥᑐᓇᔨᑕᐧᒃ ᐅᔭ ᑲ ᐃᔅᐱᔨᒡ ᒐᒂᔪᐤ᙮

²⁴ ᐃᒋᑉᑦ ᐃᔪᒡ ᒋ ᒧᓇᐃᒐᐅᒡ ᐊᓐᑕ ᓯᓱᒡ ᓯᐱᒡ ᐊ ᓇᓂᑐᐛᐸᑕᒡ ᐊ ᒥᔽᑭᒥᔨᒡ ᓂᐱᔪᐤ ᒐᒋ ᒥᓂᒡ, ᐛᔅ ᓇᒪ ᐅᒋ ᒥᓄᐅᒡ ᓂᐱᔪᐤ ᐊᓐᑕ ᓯᐱᒡ ᐅᒡ᙮

²⁵ ᓂᔄᐅᑕᒡ ᑕᑐᐤ ᒋᓯᑲᐛ ᐃᔅᐱᔅ ᑎᐸᔨᒋᒐᓱᐤ ᑲ ᐅᑕᒪᑭᒪᐊᐧᒃ ᓇᐃᔭᓪ ᓯᐱᔪᐤ᙮