ᐊᒃᓱᑕᔅ 5 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒧᓱᔅ ᑭᔭ ᐊᕋᓐ ᑲ ᓂᑐᐛᐱᒪᒡ ᒋᓴᐅᒋᒪᐛ

¹ ᐸᑐᔅ ᑲᒋ ᐛᐸᑎᔭᒡ ᐊᓂᔭ ᒋᓴᐃᔪᐛ ᒐᒂᔪᐤ, ᐊᐅᑯᔪᐤ ᒧᓱᔅ ᑭᔭ ᐊᕋᓐ ᒂ ᓂᑐᐛᐱᒪᒡ ᒋᓴᐅᒋᒪᐛ᙮ ᒂ ᐃᑕᒡ, “ᐊᐅᑯᔪᐤ ᑎᐸᔨᒋᒐᓱᐤ, ᐃᔅᕋᐃᓪ ᐅᒋᓴᒪᓂᑐᒧᐛᐛ ᑲ ᐃᔅᒋᔄᔨᒋ, ‘ᐱᔅᑎᓂᒡ ᓂᑦ ᐃᔨᒥᒡ ᒐᒋ ᔅᑐᑕᒡ, ᒋᑭ ᐃᑐᑕᐅᒡ ᐊᓐᑕ ᐸᐧᑯᑎᔅᑭᒥᑲᒡ ᒐᒋ ᒥᑯᓴᒡ ᑭᔭ ᒐᒋ ᐊᔭᒥᐊᔅᑐᐅᒡ᙮’ ”

² ᐊᑯ ᒋᓴᐅᒋᒪᐤ ᒂ ᐃᑕᑦ, “ᐊᐛᓐ ᐊᓐ ᑎᐸᔨᒋᒐᓱᐤ ᒐᒋ ᓂᑐᑐᐅᒄ ᑭᔭ ᒐᒋ ᐱᔅᑎᓂᒥᒋ ᐃᔅᕋᐃᓪ ᐃᔪᐛ ᒐᒋ ᔅᑐᑕᔨᒋ ?”

³ ᐊᑯ ᒂ ᐃᑕᒡ, “ᐃᑉᕈᐤ ᐃᔪᒡ ᐅᒋᓴᒪᓂᑐᒧᐛᐛ ᓂᒋ ᓄᑯᓯᔅᑕᑯᐱᓇᓂ, ᓇᐃᒥᓇᓐ ᒐᒋ ᐱᒧᑕᔭᒡ ᓂᔅᑐ ᒋᓯᑲᐛ ᐃᔅᐱᔅ ᐊᓐᑕ ᐸᐧᑯᑎᔅᑭᒥᑲᒡ, ᑭᔭ ᒐᒋ ᒥᔨᒋᒡ ᒥᑐᔅᑕᐊᒪᒐᐅᓂᔪᐤ ᑎᐸᔨᒋᒐᓱᐤ ᓂᒋᓴᒪᓂᑐᒥᓇᓐ, ᐊᑲ ᑕᑈᑐᔭᒐ ᐊᐧᑯᓱᐅᓐ ᓂᑭ ᓂᐸᐃᑯᓇᓐ ᑭᔭ ᒪᒃ ᓂᑐᐱᔪᐅ-ᒧᐧᑯᒪᓐ᙮”

⁴ ᒋᓴᐅᒋᒪᐤ ᒂ ᐃᑕᑦ, “ᒧᓱᔅ ᑭᔭ ᐊᕋᓐ, ᐊᑯ ᒐᒂᓐ ᐛᒋ ᑯᔅᑎᔭᑯᒡ ᐃᔪᒡ ᒐᒋ ᐊᑐᔅᒐᒡ ? ᒪᒋᒄ ᑲᐤ ᐊᓐᑕ ᐊᑐᔅᒐᒄ !

⁵ ᐛᐸᑎᒧᒄ ! ᒋᒋᐛ ᒋ ᒥᒐᑎᓇᐛᐤ ᐃᔅᐱᔅ ᐃᒋᑉᑦ ᐃᔪᒡ᙮ ᐊᓄᒡ ᒋ ᐎ ᑯᔅᑎᔭᐛᐅᒡ ᒐᒋ ᐊᑐᔅᒐᒡ᙮”

⁶ ᐊᓂᔭ ᐸᐃᑯᑕᐤ ᒋᓯᑯᔪᐤ ᒋᓴᐅᒋᒪᐤ ᒋ ᐃᑎᓱᒪᐤ ᐅᑯᐸᓇᒪ ᓂᔭᑭᑐᐛᔨᒪᔨᒋ ᐃᔅᕋᐃᓪ ᑲ ᐊᑐᔅᒐᓯᔨᒋ ᐊ ᐃᑕᑦ᙮

⁷ “ᐊᑲ ᒥᔭᐧᑯᒡ ᐃᔪᒡ ᒥᔅᑯᓱᐛ ᒐᒋ ᐅᓯᐊᒡ ᐊᓯᔅᒍᐤ ᐊᓯᓂᔭ᙮ ᐎᔪᐛᐤ ᒋᑭ ᐅᑎᓂᒪᓱᐅᒡ᙮

⁸ ᒥᒄ ᒧᔭᒻ ᐸᐃᑯᑕᐤ ᒋᑭ ᐎ ᐃᔅᐱᔅ ᐅᓯᐊᒡ ᐊᓯᔅᒍᐤ ᐊᓯᓂᔭ ᒐ ᐊᑲ ᒋ ᓄᑕᐱᔨᒡ᙮ ᒋᑎᒧᐅᒡ ᐊᓐᒡ, ᑭᔭ ᒪᒃ ᓇᒪ ᓂᐸ ᐅᒋ ᓂᑐᐛᔨᑎᒪᐧᑯᐱᓐᒡ ᒐᒋ ᔅᑐᑕᒡ ᒐᒋ ᒥᔭᒡ ᒥᑐᔅᑕᐊᒪᒐᐅᓇ ᐅᒋᓴᒪᓂᑐᒧᐛᐛ᙮

⁹ ᒐ ᐎ ᒥᔅᑎ ᐊᑐᔅᑲᑯᒡ ᒐ ᐊᑲ ᓂᑐᑕᒡ ᐅᔭ ᐊ ᐃᓯ ᐎ ᑭᑭᒋᔭᒥᑯᒡ ᐅᒋᒪᒧᐛᐛ᙮”

¹⁰ ᐅᒋᒪᐅᒡ ᑲ ᓇᑭᑐᐛᔨᒪᒡ ᑲ ᐊᑐᔅᒐᓯᔨᒋ ᒋ ᓂᑐᐛᐱᒪᐅᒡ ᐃᔪᐛ ᑭᔭ ᒋ ᐃᑕᐅᒡ᙮ “ᐊᐅᒃ ᐅᔭ ᒋᓴᐅᒋᒪᐤ ᑲ ᐃᔅᒋᔄᑦ, ‘ᓇᒪ ᒋᑭ ᒋ ᒥᔨᑎᓇᐛᐤ ᒥᔅᑯᓱᐛ᙮

¹¹ ᒋᔨᐛᐤ ᒋᑭ ᐎ ᓂᑐᐛᐸᑎᒪᓱᓇᐛᐤ᙮ ᒋᔨᐛᐤ ᒋᑭ ᐎ ᒥᔅᑲᓇᐤ ᑕᓐᑕ ᒐ ᐅᑎᓂᒪᒄ᙮ ᒥᒄ ᐸᐃᑯᑕᐤ ᒋᑭ ᐎ ᐃᔅᐱᔅ ᐅᓯᐊᐅᒡ ᐊᓯᔅᒍᐤ ᐊᓯᓂᔨᒡ ᑲ ᐃᔅᐱᔅ ᐅᓯᐊᑯᒡ᙮’ ”

¹² ᐊᑯ ᐃᔅᕋᐃᓪ ᐃᔪᒡ ᒥᓯᐛ ᐃᒋᑉᑦ ᐊᔅᒋᒡ ᒋ ᐃᑐᑕᐅᒡ ᐊ ᓇᓂᑐᐛᐸᑕᒡ ᒥᔅᑯᓱᐛ᙮

¹³ ᐅᒋᒪᐅᒡ ᑲ ᓇᑭᑐᐛᔨᒪᒡ ᑲ ᐊᑐᔅᒐᓯᔨᒋ ᒋ ᐃᔨᒧᐅᒡ ᐃᔪᐛ ᐊ ᐃᑕᒡ, “ᐊᓯᑯᒻ ᒋᓯᑲᐛ ᒋᑭ ᐎ ᐃᔅᐱᔅ ᐅᓴᐛᐅᒡ ᐊᓯᔅᒍᐤ ᐊᓯᓂᔨᒡ ᒧᔭᒻ ᑲ ᐃᔅᐱᔅ ᐅᓯᐊᑯᒡ ᑲ ᒥᔨᑯᐅᔭᒄ ᒥᔅᑯᓱᐛ᙮”

¹⁴ ᐃᒋᑉᑦ ᐅᒋᒪᐅᒡ ᒂ ᐱᓯᔅᑕᐛᒡ ᐃᔅᕋᐃᓪ ᐅᒋᒪᐛ ᐊᓂᔭ ᑲ ᓇᑭᑐᐛᔨᒪᒋ ᑲ ᐊᑐᔅᒐᓯᔨᒋ᙮ ᒂ ᐃᑕᒡ, “ᐊᑯ ᒐᒂᓐ ᐛᒋ ᐊᑲ ᐅᒋ ᓯᒋᒪᑯᒡ ᐃᔪᒡ ᒐᒋ ᐃᔅᐱᔅ ᐅᓯᐊᒡ ᐊᓯᔅᒍᐤ ᐊᓯᓂᔭ ᒧᔭᒻ ᑲᒋ ᐃᑎᒡ ?”

¹⁵ ᐊᑯ ᐃᔅᕋᐃᓪ ᐅᒋᒪᐅᒡ ᒂ ᓂᑐᐛᐱᒪᒡ ᒋᓴᐅᒋᒪᐛ ᑭᔭ ᒂ ᐃᑕᒡ, “ᒐᒂᓐ ᐅ ᐛᒋ ᐃᑐᑐᐅᔭᒡ ?

¹⁶ ᓇᒪ ᓂ ᒥᔨᑯᐅᓇᓐ ᒥᔅᑯᓱᐛ, ᑭᔭ ᐃᔭᐱᒡ ᓂᑦ ᐃᑐᑕᑯᐅᓇᓐ ᒐᒋ ᐅᓯᔨᒋᒡ ᐊᓯᔅᒍᐤ ᐊᓯᓂᔨᒡ ᒧᔭᒻ ᑲᒋ ᐃᔅᐱᔅ ᐅᓯᔨᒋᒡ᙮ ᓴᒐᔾ ᓂ ᐱᓯᔅᑕᐅᑯᓇᓐ, ᓇᒪᔭᐤ ᐅ ᓂᔭᓐ ᑲ ᐃᑐᑎᒪᒡ᙮ ᒋᐅᒋᒪᒧᐛᐅᒡ ᐊᓂᔭ ᐃᑐᑎᒧᒡ ᐊ ᒥᔅᑎᓂᑐᐛᔨᑕᒡ ᒐᒂᔪᐤ᙮”

¹⁷ ᒋᓴᐅᒋᒪᐛ ᒂ ᐃᑎᑯᒡ, “ᓇᒪ ᒋᑦ ᐃᔅᐱᔅ ᐊᑐᔅᒐᓇᐛᐤ ᒋᔨᐛᐤ ᑭᔭ ᒪᒃ ᓇᒪ ᒋᐸ ᐃᓯᓇᐤ, ‘ᐱᔅᑎᓇᓐ, ᓂ ᐎ ᔅᑐᑕᓇᓐ ᒐᒋ ᒥᔨᒋᒡ ᒥᑐᔅᑕᐊᒪᒐᐅᓂᔪᐤ ᑎᐸᔨᒋᒐᓱᐤ᙮’

¹⁸ ᒪᒋᒄ ᑲᐤ ᐊᑐᔅᒐᒪᒃ᙮ ᓇᒪ ᒋᑭ ᒋ ᒥᔨᑯᐅᓇᐛᐤ ᒥᔅᑯᓱᐛ, ᑭᔭ ᓇᔅᒡ ᒋᑭ ᐎ ᐅᓴᐛᐅᒡ ᐊᓯᔅᒍᐤ ᐊᓯᓂᔨᒡ ᒧᔭᒻ ᑲᒋ ᐃᔅᐱᔅ ᐅᓯᐊᑯᒡ ᐸᐃᑯᒋᓯᑲᐛ !”

¹⁹ ᓇᐸᐅᒡ ᒋᔅᒐᔨᑎᒧᒡ ᐊ ᒥᔅᑎ ᒋᔄᐃᐛᒡ ᑭᔭ ᑲ ᐃᑎᓱᒪᑭᓄᐅᒡ ᒐᒋ ᐅᓯᐊᒡ ᐊᓯᔅᒍᐤ ᐊᓯᓂᔭ ᒧᔭᒻ ᑲᒋ ᐃᔅᐱᔅ ᐅᓯᐊᒡ ᐸᐃᑯᒋᓯᑲᐛ᙮

²⁰ ᑲᒋ ᓂᑐᐛᐱᒪᒡ ᒋᓴᐅᒋᒪᐛ᙮ ᒂ ᓂᑐᐛᐱᒪᒡ ᒧᓱᓴ ᑭᔭ ᐊᕋᓇ, ᑲ ᐊᓱᐛᐱᒥᑯᒡ ᐊᓐᑕ ᐎᐎᑎᒥᒡ ᒋᓴᐅᒋᒪᐛ ᐎᒋᔨᒡ᙮

²¹ ᒂ ᐃᑕᒡ ᒧᓱᓴ ᑭᔭ ᐊᕋᓇ, “ᑭᒪ ᑎᐸᔨᒋᒐᓱᐤ ᑎᐸᔅᑯᓂᑕᒄ ᐊᑐᑐᐅᔭᒡ ᒐᒋ ᐛᐧᑲᓯᔨᒥᑦ ᒋᓴᐅᒋᒪᐤ, ᑭᔭ ᐅᔅᑦ ᒐᒋ ᓂᐸᐃᑯᐅᔭᒡ᙮”

ᑎᐸᔨᒋᒐᓱᐤ ᐊᓱᑎᒧᐛᐤ ᐃᔅᕋᐃᓪ ᐃᔪᐛ᙮

²² ᐊᑯ ᒧᓱᔅ ᑲᐤ ᒂ ᓂᑐᐛᐱᒪᑦ ᑎᐸᔨᒋᒐᓱᐛ ᑭᔭ ᒂ ᐃᑕᑦ, “ᐅᑎᐸᔨᒋᒐᐤ, ᐊᑯ ᒐᒂᓐ ᐛᒋ ᓂᓇᐧᑲᒋᐃᑥᐤ ᐅᒡ ᐃᔪᒡ ? ᐊᑯ ᒐᒂᓐ ᐛᒋ ᐃᑎᓴᐎᓐ ?

²³ ᐃᔅᐱ ᑲᒋ ᓂᑐᐛᐱᒥᒃ ᒋᓴᐅᒋᒪᐤ, ᑲ ᐃᔨᒥᐃᒃ ᒋᑦ ᐃᓯᓂᐧᑲᓱᐅᓂᒡ ᐅᒡ, ᒋ ᐊᐧᑯᐊᐤ ᐃᔪᐛ᙮ ᑭᔭ ᓇᒪ ᒐᒂᓐ ᒋ ᐅᒋ ᑐᑕᓐ ᒐᒋ ᐎᒋᐃᑥᐤ᙮”