ᐊᒃᓱᑕᔅ 39 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᐊ ᐅᓯᑕᑭᓄᐅᒋ ᐊᔭᒥᐊᐅ-ᐊᐱᒋᑕᐅᓇ 1 ᐱᓴᓕᓪ ᑭᔭ ᐅᐦᐅᓕᐊᑉ ᑭᔭ ᑯᑎᑭᒡ ᐊᐛᓐᒋ ᑲ ᑭᔅᒋᐅᒡ ᐊᐅᓯᑕᒡ ᒐᒂᔪᐛ; ᒋ ᐅᓯᑕᐛᐅᒡ ᐊᔭᒥᐊᐅᒋᒪᐛ ᐅᑦ ᐊᔭᒥᐊᐅ-ᐊᐱᒋᑕᐅᓂᔨᐛ᙮ ᒋ ᐅᓯᑕᐛᐅᒡ ᐊᕋᓇ ᐊ ᒥᔽᔨᒋ ᐊᐱᒋᑕᐅᓇ ᐊ ᐱᔅᑭᓂᓯᔨᒋ, ᐊ ᐱᒋᒥᓇᑯᓯᔨᒋ ᑭᔭ ᐊ ᒥᐧᑯᓯᔨᒋ ᐊᓯᑭᓇᔭᐱᔭ ᐅᒡ ᒐᒋ ᒋᔅᑭᒥᔨᒋ ᒪᒂᒡ ᐊᑐᔅᒐᔨᒋ ᐊ ᐊᔭᒥᐊᐅᒋᒪᐎᔨᒋ ᐊᓐᑕ ᑲ ᐸᔭᒋ-ᐱᔅᒋᒐᔨᒡ, ᒧᔭᒻ ᑎᐸᔨᒋᒐᓱᐤ ᑲ ᐃᑎᓱᒪᑦ ᒧᓱᓴ᙮ ᐊᔅᐱᒋᑯᓇᐅᓐ 2 ᒋ ᐅᓯᑕᐅᒡ ᓇᔅᒡ ᐛᒋ ᒥᔽᓯᔨᒡ ᐊᔅᐱᒋᑯᓇᐅᓂᔪᐤ ᐊ ᐱᔅᑭᓇᔨᒡ, ᐊ ᐱᒋᒥᓇᔨᒡ ᑭᔭ ᐊ ᒥᒂᔨᒡ ᑭᔭ ᓇᔅᒡ ᐛᒋ ᒥᔽᓯᔨᒡ ᐊ ᒥᔽᔨᒋ ᐱᒍᐎᔭᓂᔪᐤ ᐅᒡ᙮ 3 ᒋ ᐱᐱᒂᐊᒧᒡ ᐎᔄᐅᓱᓇᔭᐱᔅᑯᔪᐤ ᑭᔭ ᒋ ᐱᐱᒋᓯᒧᒡ ᒂ ᐊᑎ ᒥᒪᑕᐅᒂᑕᒡ ᐊᓐᑕ ᐛᒋ ᒥᔽᓯᔨᒡ ᐱᒍᐎᔭᓂᔪᐤ ᑭᔭ ᐊᓐᑕ ᐊ ᐱᔅᑭᓂᓇᔨᒡ, ᐊ ᐱᒋᒪᓇᔨᒡ ᑭᔭ ᐊ ᒥᒂᔨᒡ ᐱᒍᐎᔭᓂᒡ᙮ 4 ᒋ ᓂᓯᓂᔪᐛ ᓂᓱ ᒥᑎᑎᒥᓂᒡ ᒪᑯᐱᓱᐅᓇ ᐊᓂᔅᑯᑎᒋ ᐊᓐᑕ ᓂᓱ ᐊ ᒋᒐᔭᒋ ᒐᒋ ᒪᒧᑯᒧᒋ ᓂᑲᓐ ᑭᔭ ᐅᑕᒡ ᒥᑎᑎᒥᓂᒡ᙮ 5 ᑭᔭ ᐱᒂᑕᐅᓐ ᐸᐃᑯᑕᐤ ᒋᑭ ᐅᒋ ᐅᓯᑕᑭᓄᐤ ᑭᔭ ᒐ ᐊᓂᔅᑯᑎᓐ ᐊᓐᑕ ᐊᔅᐱᒋᑯᓇᐅᓂᒡ ᐊ ᐸᐃᒂᒡ ᒐᒋ ᐃᓯᓇᒂᒡ, ᒧᔭᒻ ᑎᐸᔨᒋᒐᓱᐤ ᑲ ᐃᑎᓱᒪᑦ ᒧᓱᓴ᙮ 6 ᓂᓱ ᒋ ᒪᑎᓱᐛᐅᒡ ᑲ ᓱᓇᔭᐎᒋ ᐊᓯᓂᔭ ᐅᓂᒃᔅ ᐊᓯᓂᐧᑲᑕᒋ (ᐊ ᐎᐸᔨᒋ ᐊᓯᓂᔭ), ᐊᑯ ᐛᔅᑲ ᐊᓐᑕ ᒋᒡ ᒋ ᐎᔎᔭᒋᓂᒧᒡ ᐎᔄᐅᓱᓇᔭᔪᐤ ᑭᔭ ᐊᓐ ᐊᐛᓐ ᑲᔅᒋᑕᑦ ᐊ ᒪᑎᓴᐧᒃ ᐊᓯᓂᔭ ᒋ ᐎᓯᓇᑕᐊᒺᐤ ᐊᓐᑕ ᓂᓴᑉ ᒐᑭᐸ ᐅᑭᔅᒋᔪᐛ ᐅᑦ ᐃᓯᓂᐧᑲᓱᓂᔪᐛ᙮ 7 ᒋ ᒋᑭᒧᑕᐅᒡ ᐊᓯᓂᔭ ᐊᓐᑕ ᒥᑎᑎᒥᓂᒡ ᒪᑯᐱᓱᐅᓂᒡ ᐸᔭᒋ ᐊᔅᐱᒋᑯᓇᐅᓂᒡ ᐊ ᒋᔅᒋᑐᐛᑭᓄᐎᒋ ᓂᓴᑉ ᐃᔅᕋᐃᓪ ᐃᔪᐛ ᐊ ᐃᑎᔅᑲᓇᓯᔨᒋ, ᒧᔭᒻ ᑎᐸᔨᒋᒐᓱᐤ ᑲ ᐃᑎᓱᒪᑦ ᒧᓱᓴ᙮ ᒥᔅᑲᔅᒋᑭᓐ ᐱᑕᓱᐅᓐ 8 ᒋ ᐅᓯᑕᐅᒡ ᐸᔭᒋ ᒥᔅᑲᔅᒋᑭᓂ ᐱᑕᓱᐅᓂᔪᐤ᙮ ᐸᐃᑯᑕᐤ ᒐᒂᔪᐤ ᒋ ᐊᐱᒋᑕᐅᒡ ᑲ ᐅᓯᑕᒡ ᐸᔭᒋ ᐊᔅᐱᒋᑯᓇᐅᓂᔪᐤ ᑭᔭ ᐸᐃᑯᑕᐤ ᒋ ᐃᓯ ᒥᒪᑕᐅᒂᑎᒧᒡ᙮ 9 ᒋ ᑭᒋᒐᔭᐤ ᑭᔭ ᒋ ᓂᔄᒋᓇᑭᓄᐤ ᐊᓐ ᒐᒂᓐ ᑲ ᐅᒋ ᐅᓯᑕᑭᓄᐅᒡ ᐊᑯ ᐸᐃᑯᔅᑕᐤ ᒥᒋᒋᓐ ᒐᒋ ᐃᔅᐱᔅ ᒋᓏᒡ ᑭᔭ ᐸᐃᑯᔅᑕᐤ ᒥᒋᒋᓐ ᒐᒋ ᐃᔅᐱᔅ ᐃᔨᑭᔅᑲᒡ᙮ 10 ᒋ ᒋᑭᒧᑕᐅᒡ ᓇᐛᐤ ᐊᐱᒧᒂᑕᔨᒋ ᐊ ᒥᔅᑎ ᒥᔪᓯᓯᔨᒋ ᐊᓯᓂᔭ: ᐅᔅᑭᒡ ᕈᐱᔾ (ᑲ ᒥᒂᒡ ᐊᓯᓂᔾ), ᓂᓱ ᐛᒋ ᑎᒂᒡ ᐎᔄᐅᐤ ᐊᓯᓂᔾ ᑐᐸᔅ (ᑲ ᐎᔄᐅᓇᒂᒡ ᐊᓯᓂᔾ), ᐊᑯ ᓂᔅᑐ ᐛᒋ ᑎᒂᒡ ᑲᐊᕐᓂᑦ (ᑲ ᒥᒂᒡ ᐊᓯᓂᔾ)᙮ 11 ᐊᑯ ᑎᐛᒡ ᒥᓐ ᐊᓐᑕ ᐊᓇᒡ, ᐊᒥᕋᓪᑦ (ᑲ ᓯᐸᑯᓇᒂᒡ ᐊᓯᓂᔾ), ᑭᔭ ᓴᐸᐃᕐ (ᑲ ᐱᔅᑭᓇᒂᒡ ᐊᓯᓂᔾ), ᑭᔭ ᓱᓇᔭᐤ ᐊᓯᓂᔅ (ᐊ ᓴᐳᓇᒂᒡ ᐊᓯᓂᔾ)᙮ 12 ᐊᑯ ᐊᓐᑕ ᒐᑲᑦ ᒪᔅᑕᔾ: ᒐᓴᓐᑦ (ᑲ ᒥᒂᒡ ᐊᓯᓂᔾ), ᑭᔭ ᐊᑲᑦ (ᑲ ᐛᐸᒡ ᐊᓯᓂᔾ), ᒥᓐ ᐊᒪᑎᔅᑦ (ᑲ ᐸᔅᒍᓴᐅᓇᒂᒡ ᐊᓯᓂᔾ)᙮ 13 ᐊᑯ ᒪᔅᑕᔾ, ᐸᕆᓪ (ᑲ ᐎᔄᐅᓇᒂᒡ ᐊᓯᓂᔾ), ᑲᕐᓂᓕᔭᓐ (ᑲ ᒥᒂᒡ ᐊᓯᓂᔾ), ᒐᔅᐸᕐ (ᑲ ᓯᐸᑯᓇᒂᒡ ᐊᓯᓂᔾ)᙮ ᒥᓯᐛ ᐅᒡ ᐊ ᒥᔪᓯᓯᒡ ᐊᓯᓂᔨᒡ ᒋ ᒋᑭᒺᑭᓄᐎᒡ ᐎᔄᐅᐤ ᐊᓯᑭᓇᔭᐱᔨᒡ᙮ 14 ᒥᓯᐛ ᐊᓐᑕ ᐸᐸᐃᒄ ᐊᓂᓴᐳᒡ ᐊᓯᓂᔨᒡ ᒋ ᒥᓯᓇᑕᐃᑭᓄᔪᐛ ᒐᑭᑉ ᑲ ᓂᓴᐳᔨᒋ ᐅᑯᓴ ᐅᑦ ᐃᓯᓂᐧᑲᓱᐅᓂᔨᐛ ᓇᑲᓂᔅᑯᐛᔨᒋ ᓂᓴᑉ ᐊ ᐃᑎᔅᑲᓇᓯᔨᒋ ᐃᔅᕋᐃᓪ ᐃᔪᐛ᙮ 15 ᓂᓱ ᒋ ᐅᓯᑕᐅᒡ ᐊ ᐎᔄᐅᓱᓇᔭᐱᔅᑯᐅᒋ ᐃᓴᒂᔭᐱᔭ ᐊ ᐱᐧᑲᑕᔨᒋ ᒐ ᒋᑭᒧᒋ ᐊᓐᑕ ᐱᑕᓱᐅᓂᒡ᙮ ᒐ ᒪᒧᑭᒧᐎᔨᒋ ᐊᓐᑕ ᐊᔅᐱᒋᑯᓇᐅᓂᒡ᙮ 16 ᓂᓱ ᐊ ᐎᔄᐅᓱᓇᔭᐱᔅᑯᐅᒋ ᓯᒋᐸᒋᑭᓇ ᒋ ᐅᓯᐊᐅᒡ ᑭᔭ ᒋ ᒋᑭᒺᐅᒡ ᐊᓐᑕ ᐃᔅᐱᒥᒡ ᐊ ᒋᒐᔭᒡ ᐊᔅᐱᒋᑯᓇᐅᓂᒡ᙮ 17 ᒋ ᒪᑯᐱᑎᒧᒡ ᓂᓱ ᐊ ᐎᔄᐛᐱᔅᑯᔨᒋ ᐃᓴᒂᔭᐱᔭ ᐊᓐᑕ ᓂᓱ ᐛᐎᔭᐱᔅᑯᒡ᙮ 18 ᒋ ᒪᑯᐱᑎᒧᒡ ᐊᔨᑐᐤ ᐊᓐᑕ ᐛᔅᑲ ᐎᔄᐅᓱᓇᔭᒡ ᐊᓯᓂᒡ ᐊᑯ ᐱᑕᓱᐅᓐ ᒐ ᒋᑭᒧᒡ ᐊᔅᐱᒋᑯᓇᐅᓂᒡ ᒥᑎᑎᒥᓂᒡ ᒪᑯᐱᓱᐅᓇᓂᒡ᙮ 19 ᓂᓱ ᒥᓐ ᐊ ᐎᔄᐅᓱᓇᔭᐱᔅᑯᐅᒋ ᓯᒋᐸᒋᑭᓇ ᒋ ᐅᓯᐊᐅᒡ ᐊᑯ ᒐ ᑭᒺᐊᒡ ᐊᓇᒡ ᐃᑕᒐ ᐸᔭᒋ ᐱᑕᓱᐅᓄᑎᒡ ᐊᓐᑕ ᒋᒡ ᐱᑎᓱᐤ ᒥᒋᒪ ᐊᔅᐱᒋᑯᓇᐅᓂᒡ᙮ 20 ᓂᓱ ᒥᓐ ᐊ ᐎᔄᐅᓱᓇᔭᐱᔅᑯᐅᒋ ᓯᒋᐸᒋᑭᓇ ᒋ ᐅᓯᐊᐅᒡ ᐊᑯ ᒂ ᒋᑭᒧᐛᒡ ᐊᓐᑕ ᔭᓯᒄ ᓂᑲᓐ ᐸᔭᒋ ᐱᑕᓱᐅᓂᒡ ᒥᑎᑎᒥᓂ ᒪᑯᐱᓱᐅᓂᒡ ᒥᒋᒪ ᐊᓐᑕ ᐊᐱᒥᒂᑕᔨᒡ ᑭᔭ ᑕᐧᑯᒡ ᐱᒂᑕᐅᓂᔪᐤ᙮ 21 ᒧᔭᒻ ᑎᐸᔨᒋᒐᓱᐤ ᑲ ᐃᑎᓱᒪᑦ ᒧᓱᓴ, ᒋ ᒪᑯᐱᑕᐅᒡ ᓂᓱ ᓯᒋᐸᒋᑭᓇ ᐸᔭᒋ ᐱᑕᓱᐅᓂᒡ ᐊᓐᑕ ᓯᒋᐸᒋᑭᓇ ᐊᔅᐱᒋᑯᓇᐅᓂᒡ ᐊᐱᔅᑭᓇᐸᑭᓂᔨᒡ ᐊᐱᓯᔪᐤ, ᐊᑯ ᑕᐧᑯᒡ ᒐ ᐊᑯᑕᒡ ᐸᔭᒋ ᐱᑕᓱᐅᓄᐅᑦ ᐱᒂᑕᐅᓂᒡ ᑭᔭ ᒐ ᐊᑲ ᐱᓯᑯᐱᔨᒡ ᐊᔅᐱᒋᑯᓇᐅᓂᒡ ᐅᒡ᙮ ᑯᑎᑲ ᒐᒂᔪᐛ ᐊᔭᒥᐊᐅᐊᐱᒋᑕᐅᓂᒡ 22 ᒋ ᐅᓯᑕᐅᒡ ᐊᔭᒥᐊᐤ ᐊᑯᐱᔪᐤ ᑕᒥᒡ ᐊᔅᐱᒋᑯᓇᐅᓂᒡ ᒐᒋ ᒋᔅᑲᑭᓄᐎᔨᒡ ᐊ ᐱᔅᑭᓂᓯᔨᒋ ᐊᓯᑭᓂᔭᐱᔭ ᐅᒋ᙮ 23 ᐊᑯ ᐊᓐᑕ ᑕᑕᐅᒡ ᐛᒋ ᐱᑯᓇᐃᔨᒡ ᐊᓐᑕ ᐅᔅᑎᒂᓂᒡ ᒐ ᐅᒋ ᐳᔅᑲᐧᒃ ᐊᔭᒥᐊᐅᒋᒪᐤ ᒋ ᑭᔅᒋᒂᑎᒧᒡ ᐱᒍᐎᔭᓂᔪᐤ ᐊ ᓱᒋᓇᑯᑕᒡ ᐊᓐᑕ ᐛᔅᑲ ᒐ ᐊᑲ ᐱᑯᐱᔨᒡ᙮ 24 ᐊᓇᒡ ᐊᓐᑕ ᐊ ᐅᓂᔎᑭᓂᔨᒡ ᐊᑯᐱᔪᐤ ᒐ ᒥᒪᑕᐅᒂᑎᒧᒡ ᑲ ᒥᒂᔨᒋ ᒥᔅᑎᒥᓇ ᑲ ᐱᔅᑭᓂᓯᔨᒋ, ᑲ ᐱᒋᒥᓇᑯᓯᔨᒋ, ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ ᐊᐱᒋᐊᒡ᙮ 25 ᒋ ᒋᑭᒧᑕᐅᒡ ᑲ ᐎᔄᐅᓱᓇᔭᐱᔅᑯᐎᒋ ᒥᑥᐃᑭᓂᓴ ᐊᓐᑕ ᑎᔅᑐᐎᒡ ᒥᔅᑎᒥᓇ ᐊ ᑎᑯᓂᔨᒋ ᐊᓐᑕ ᐊᔅᐱᒂᓱᐅᓂᒡ ᐊ ᐅᓂᔎᑭᓂᔨᒡ ᐊᑯᐱᔪᐤ᙮ 26 ᒐᒋ ᐳᔅᑲᐧᒃ ᐊᕈᓐ ᒪᒂᒡ ᐊᑐᑕᒋ ᐅᑦ ᐊᑐᔅᒐᐅᓐ ᐊᔭᒥᐊᐅᒋᒪᐅᑦ᙮ ᒥᓯᐛ ᐅᔭ ᒐᒂᔪᐛ ᓇᐊᐤ ᒋ ᐃᓯᓇᑯᑕᑭᓄᔪᐛ ᒧᔭᒻ ᑎᐸᔨᒋᒐᓱᐤ ᑲ ᐃᑎᓱᒪᑦ ᒧᓱᓴ᙮ 27 ᒋ ᐅᓯᑎᒧᐛᐅᒡ ᐱᒍᐎᔭᓇ ᐊᕋᓇ ᑭᔭ ᐅᑯᓯᔨᐛ᙮ 28 ᑭᔭ ᐃᔭᐱᒡ ᐅᐎᔎᔭᔅᑎᒂᓇᐱᓱᐅᓂᔨᐛ ᐱᒍᐎᔭᓂᔪᐤ ᐅᒡ ᒐᒋ ᒋᔅᑯᐛᔨᒋ ᐊᕈᓇ ᐅᔅᑎᒂᓂᔨᒡ᙮ ᒋ ᐅᓯᑎᒧᐛᐅᒡ ᐊᕈᓇ ᐅᑯᓯᔨᐛ ᐊᑯᓂᔎᐅᓇ ᑭᔭ ᐱᑐᑭᔅᒋᐱᓱᓇᓇ ᐱᒍᐎᔭᓂᔪᐤ ᐅᒡ᙮ 29 ᑭᔭ ᐱᒂᑕᐅᓂᔪᐤ ᐱᒍᐎᔭᓂᔪᐤ ᑭᔭ ᐊ ᐱᔅᑭᓂᓯᔨᒋ, ᐊ ᐱᒋᒥᓇᑯᔨᒋ ᑭᔭ ᐊ ᒥᐧᑯᓯᔨᒋᑦ ᐊᓯᑭᓂᔭᐱᔭ ᒋ ᐅᒋ ᐅᓯᑕᐅᒡ ᑭᔭ ᒋ ᒥᒪᑕᐅᒂᑎᒧᒡ, ᒧᔭᒻ ᑎᐸᔨᒋᒐᓱᐤ ᑲ ᐃᑎᓱᒪᑦ ᒧᓱᓴ᙮ 30 ᒋ ᐅᓯᑕᐅᒡ ᐊᐱᓴᓯᔨᒡ ᐛᐛᓯᐅᓂᔪᐤ ᐎᔄᐅᓱᓇᔭᔪᐤ ᐅᒡ ᑭᔭ ᐊᐛᓐ ᑲ ᑭᔅᒋᐅᑦ ᐊᐅᓯᑕᑦ ᒐᒂᔪᐤ ᒋ ᐎᓯᓇᑕᐊᒻ, “ᐊ ᐸᔭᒋᓯᑦ ᑎᐸᔨᒋᒐᓱᐛ ᐃᔅ,” ᐊ ᐃᑎᔅᑕᔨᒡ᙮ 31 ᓂᑲᓐ ᐊᓐᑕ ᐅᐎᔎᔭᔅᑎᒂᓇᐱᓱᐅᓂᔨᒡ ᒋ ᒪᑯᐱᑎᒧᒡ ᐊ ᐱᔅᑭᓇᔨᒡ ᐊᐱᓯᔪᐤ ᒧᔭᒻ ᒥᓯᐛ ᑎᐸᔨᒋᒐᓱᐤ ᑲ ᐃᑎᓱᒪᑦ ᒧᓱᓴ᙮ ᑲ ᒋᓯᑕᑭᓄᐅᒡ ᐊᑐᔅᒐᐅᓐ ᐊ ᐅᓯᑕᑭᓄᐅᒡ ᐸᔭᒋ-ᐱᒍᐎᔭᓂᒋᐛᑉ 32 ᒥᓯᐛ ᐊᑐᔅᒐᐅᓐ ᑲ ᐃᑐᑕᑭᓄᐅᒡ ᐸᔭᒋ-ᐱᒍᐎᔭᓂᒋᐛᑉ ᒋ ᒋᓯᑕᑭᓄᐤ᙮ ᒥᓯᐛ ᒐᒂᔪᐤ ᒋ ᐃᑐᑎᒥᒡ ᐃᑉᕈᐤ ᐃᔪᒡ ᒧᔭᒻ ᑎᐸᔨᒋᒐᓱᐤ ᑲ ᐃᑎᓱᒪᑦ ᒧᓱᓴ᙮ 33 ᒥᓯᐛ ᒐᒂᔪᐤ ᒋ ᐃᑐᑐᐛᐅᒡ ᒧᓱᓴ: ᓯᒋᐸᒋᑭᓇ, ᐛᔅᑲᔭᔅᑯᓂᑭᓇ, ᓯᐸᔅᑯᓂᑭᓇ, ᓯᑥᔎᐃᑭᓇ ᑭᔭ ᑕᑕᐃᑭᓇ᙮ 34 ᓇᐸ ᒪᔭᑕᓂᓱᔭᓇ ᐊ ᒋᓯᓇᑭᓄᔨᒋ ᑭᔭ ᐊ ᒥᔽᔨᒡ ᐱᓴᑭᓂᔪᐤ ᐊᑯᓇᐃᑭᓇ ᑭᔭ ᐊᑯᐛᑲᐃᑭᓇ, 35 ᐸᔭᒋ-ᒥᐅᑎᔪᐤ ᐊᓐᑕ ᐸᒋᑎᓂᔨᒋ ᐊᓯᓂᔭ ᐎᓱᐛᐅᓇ ᑲ ᒥᓯᓇᑕᔨᒋ ᑭᔭ ᒥᔅᑎᒂ ᑭᔭ ᒋᐸᐃᑭᓂᔪᐤ; 36 ᑭᔭ ᒥᒋᓱᐛᑭᓇᑎᑯᔪᐤ ᑭᔭ ᒥᓯᐛ ᒐᒂᔪᐤ ᐊ ᐃᑕᐱᑎᓂᔨᒡ ᒥᒋᓱᐛᑭᓇᑎᑯᒡ ᑭᔭ ᐸᒂᓯᑭᓇ ᑲ ᐱᔅᑎᓂᒧᐛᑭᓄᐅᑦ ᒋᓴᒪᓂᑐᐤ; 37 ᑲ ᐎᔄᐅᓱᓇᔭᐅᔨᒡ ᐛᔅᑕᓂᐱᒪᑭᓇᑎᑯᔪᐤ ᐊᓯᒡ ᐛᔅᑕᓂᐱᒪᑭᓇ, ᑭᔭ ᒥᓯᐛ ᐊ ᐃᑕᐱᑎᓂᔨᒡ ᑭᔭ ᐱᒥᔭ ᒐ ᐛᔅᑕᓂᑲᐛᒐᓄᐎᒋ; 38 ᑭᔭ ᐎᔄᐅᓱᓇᔭᐤ ᐱᔅᑎᓂᒐᐅᓇᐱᔅᒄ ᐊᓐᑕ ᒐ ᓯᔅᑲᐃᑭᓂᔨᒋ ᑲ ᐎᒋᒪᑯᓯᔨᒋ ᑭᔭ ᑐᒥᓂᒐᐅ-ᐱᒥᔭ ᑭᔭ ᐎᒋᒪᓯᑭᓂᔪᐤ, ᑭᔭ ᐊᑯᐛᑲᐃᑭᓂᔪᐤ ᐊᓐᑕ ᒐ ᐊᑯᑕᔨᒡ ᐛᒋ ᐱᔨᒐᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮ 39 ᑲ ᐎᔄᐛᐱᔅᑯᔨᒡ ᐱᔅᑎᓂᒐᐅᓇᐱᔅᑯᔪᐤ ᐊᓯᒡ ᐃᐸᐱᔅᑯᔪᐤ ᑭᔭ ᒥᔅᑎᒂ ᑭᔭ ᒥᓯᐛ ᐊ ᐃᑕᐱᑎᓂᔨᒡ ᑭᔭ ᐛᐸᑲᐅᓱᔭᑭᓂᔪᐤ ᑭᔭ ᐊᓂᔭ ᐊᓐᑕ ᐊ ᑕᐧᑯᑎᔅᑕᔨᒡ᙮ 40 ᐊᑯᐛᑲᐃᑭᓇ ᒐ ᐊᑯᑕᔨᒋ ᐊᑐᐛᒡ ᐛᔅᑲ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᓯᑥᔎᐃᑭᓇ ᑭᔭ ᑕᑕᐃᑭᓇ, ᐊᑯᐛᑲᐃᑭᓂᔪᐤ ᒐ ᐊᑯᑕᔨᒡ ᐊᓐᑕ ᐛᒋ ᐱᒐᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᑭᔭ ᐊᐱᓴ, ᒋᔅᑕᐸᒋᑭᓇ ᑭᔭ ᒥᓯᐛ ᒐᒂᔪᐛ ᒐ ᐊᐱᑎᓂᔨᒋ ᐸᔭᒋ-ᐱᒍᐎᔭᓂᒋᐛᐱᒡ᙮ 41 ᑭᔭ ᑲ ᒥᔽᓯᔨᒋ ᐊᔭᒥᐅ-ᐊᐱᒋᑕᐅᓇ ᐊᕋᓐ ᑭᔭ ᐅᑯᓴ ᒐ ᒋᔅᑲᒡ ᑐᑕᐧᑲᐛ ᐅᑦ ᐊᔭᒥᐊᐅ-ᐊᑐᔅᒐᐅᓄᐛᐤ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ᙮ 42 ᒥᓯᐛ ᒐᒂᔪᐤ ᒋ ᐃᑐᑎᒥᒡ ᐃᑉᕈᐤ ᐃᔪᒡ ᒧᔭᒻ ᑎᐸᔨᒋᒐᓱᐤ ᑲ ᐃᑎᓱᒪᑦ ᒧᓱᓴ᙮ 43 ᒥᓯᐛ ᒐᒂᔪᐤ ᒋ ᓂᑐ ᒋᔅᒐᔨᑎᒻ ᒧᓱᔅ, ᒋ ᐛᐱᑎᒻ ᒥᓯᐛ ᓇᐊᐤ ᑲ ᐃᑐᑎᒥᔨᒋ ᒐᒂᔪᐤ ᒧᔭᒻ ᑲ ᐃᑎᓱᐛᔨᒋ ᑎᐸᔨᒋᒐᓱᐛ, ᐊᑯ ᒧᓱᔅ ᒂ ᓱᐛᔨᑕᑯᑕᑦ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.