ᐊᒃᓱᑕᔅ 33 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᓂᑭᑕ ᐅ ᐃᑕᐅᓐ, ᒋᔾ ᑭᔭ ᐃᔅᕋᐃᓪ ᐃᔪᒡ ᐊᓐᒡ ᑲ ᐎᐎᑕᐃᑥᐤ ᐊᓐᑕ ᐃᒋᑉᑎᒡ ᐅᒡ᙮ ᒐ ᐃᑐᑕᐃᑥᐤ ᐊᓐᑕ ᑲ ᐊᓱᑎᒧᐅᒂᐤ ᐊᔅᒋᔪᐤ ᒐᒋ ᒥᔨᒂᐤ ᐊᑉᕋᐊᒻ, ᐊᐃᓯᒃ ᑭᔭ ᒐᑭᑉ, ᑭᔭ ᐅᑦ ᐊᓂᔅᑯᑕᐸᓄᐛᐛ᙮

² ᓂᑭ ᐃᑎᓴᐛᐤ ᓂᑦ ᐊᓐᒋᓂᒻ ᒐᒋ ᒋᔅᒋᓄᑕᔨᑕᒄ, ᑭᔭ ᓂᑭ ᐎᐎᑎᓴᐛᐅᒡ ᑲᐃᓇᓐ ᐃᔪᒡ, ᐊᒧᕆ ᐃᔪᒡ, ᐊᑦ ᐃᔪᒡ, ᐸᕆᔅ ᐃᔪᒡ, ᐃᑉ ᐃᔪᒡ, ᑭᔭ ᒐᐱᐅᔅ ᐃᔪᒡ ᐊᓐᑕ ᐊᔅᒋᒡ ᐅᒡ᙮

³ ᒋᑭ ᐃᑐᑕᓇᐛᐤ ᐊᔅᒋᒡ ᐊᓐᑕ ᐊ ᐛᔪᑎᓯᒡ ᒋᒋᓇᐳᔭᐎᒡ ᑭᔭ ᑲᓯᐛᓯᐛᐳᔾ, ᒥᒄ ᓇᒪ ᒋᑭ ᒋ ᐎᒐᐅᑎᓇᐛᐤ ᐅᓴᒻ ᒋᔨᐛᐤ ᐅ ᑲ ᒥᔅᑯᔅᑎᒂᓇᒡ ᐃᔪᒡ ᑭᔭ ᒂᔄᓐ ᒋᑭ ᒋ ᓂᓱᐅᓇᒋᐃᑎᓇᐛᐤ ᒪᒂᒡ ᐊᑎ ᐱᒧᑕᔭᒄ᙮”

⁴ ᐃᔅᐱ ᐱᔭᑕᒡ ᐃᔪᒡ ᐅᔭ ᐊᒥᔅᑲᑕᔨᑕᑯᓂᔨᒡ ᐃᔨᒧᐅᓂᔪᐤ, ᒂ ᓂᓇᐧᑲᒋᒧᒡ ᑭᔭ ᓇᒪ ᐅᒋ ᐳᔅᑭᒧᒡ ᐛᐛᓯᐅᓇᐱᔎ᙮

⁵ ᐛᔅ ᑎᐸᔨᒋᒐᓱᐤ ᒋ ᐃᑎᓱᒪᐤ ᒧᓱᓴ ᒐᒋ ᐃᑕᔨᒋ ᐃᔪᐛ, “ᒋᔨᐛᐤ ᐅ ᑲ ᒥᔅᑯᔅᑎᒂᓇᒡ ᐃᔪᒡ, ᐊᑎᓱᐧᒄ ᐸᐃᒄ ᐊᒐᐧᑭᔅᑕᒡ ᐎᒐᐅᑎᑯᒡ, ᓇᔅᒡ ᒋᐸ ᓂᓱᐅᓇᒋᐃᑎᓇᐛᐤ᙮ ᐊᑯ ᒥᓂᒥᒄ ᐊᓂᔭ ᐛᐛᓯᐅᓇᐱᔎ, ᑭᔭ ᓂᑭ ᐎᔭᔨᑕᓐ ᒐᒂᓐ ᒐ ᐃᑐᑕᑎᑯᒡ᙮”

⁶ ᐊᑯ ᑲᒋ ᓂᑭᑕᒡ ᓴᐃᓇᐃ ᐱᔅᑯᑎᓇᔪᐤ, ᓇᒪ ᓴᔅ ᐅᒋ ᐳᔅᑭᒧᒡ ᐃᔅᕋᐃᓪ ᐃᔪᒡ ᐛᐛᓯᐅᓇᐱᔎ᙮

ᑲ ᓂᒋᔅᑲᑐᑕᓄᐅᒡ ᐸᔭᒋ ᐱᒍᐎᔭᓂᒥᒋᐛᑉ

⁷ ᐃᔅᐱ ᒥᔭᓂᑲᓱᑥᐎ ᐃᔅᕋᐃᓪ ᐃᔪᒡ, ᒧᓱᔅ ᒋ ᐅᑎᓂᒻ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ ᑭᔭ ᐛᔪᐎᔅ ᐊᓐᑕ ᐛᒋᓇᓄᐎᒡ ᐅᒡ ᒋ ᒋᒥᑕᐤ᙮ ᐊᑯ ‘ᑲ ᓂᒋᔅᑲᑎᓇᓄᐅᒡ ᐸᔭᒋ ᐱᒍᐎᔭᓂᒥᒋᐛᑉ,’ ᒋ ᐃᓯᓂᐧᑲᑎᒻ᙮ ᒥᒄ ᐊᐛᓐ ᐛ ᐃᔨᒪᐊᑦ ᑎᐸᔨᒋᒐᓱᐛ ᐊᑯᑕ ᑲ ᐃᑐᑕᑦ᙮

⁸ ᑕᑥᐤ ᐊ ᑐᑕᒋ ᒧᓱᔅ ᐊᓐᑕ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ, ᒥᓯᐛ ᐊᐛᓐ ᒋᐱᔎᒡ ᑎᐱᔨᐛ ᐅᐱᒍᐎᔭᓂᒋᐛᐱᒡ ᒋ ᓇᓂᐳᐤ ᐊ ᑭᓄᐛᐱᒪᑦ ᒧᓱᓴ ᐸᑐᔅ ᑲᒋ ᐱᒐᔨᒋ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ᙮

⁹ ᐃᔅᐱ ᑲ ᐱᒐᑦ ᒧᓱᔅ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ ᒂ ᐸᒋ ᔭᓯᐱᔨᒋ ᑭᔅᑯᐅᓇ ᒧᔭᒻ ᐃᔅᑯᑕᔪᐤ ᐊ ᐃᓯᓇᑯᓯᔨᒋ, ᐊᓐᑕ ᐊ ᐅᒋ ᐱᒐᓄᐎᒡ ᐃᔅ ᐱᒍᐎᔭᓂᒋᐛᐱᒡ, ᐊᑯᑕ ᒂ ᐅᒋ ᐃᔨᒥᑯᑦ ᒧᓱᔅ ᑎᐸᔨᒋᒐᓱᐛ᙮

¹⁰ ᐃᔅᐱ ᐎᔭᐱᒪᑥᐎ ᐃᔪᒡ ᐊᓂᔭ ᑭᔅᑯᐅᓇ ᐊᓐᑕ ᐊ ᐅᒋ ᐱᒐᓄᐎᒡ ᐸᔭᒋ ᐱᒍᐎᔭᓂᒋᐛᐱᒡ ᒂ ᓂᐱᔅᑯᐱᒡ ᐊᓐᑕ ᒋᐱᔎᒡ ᑎᐱᔨᐛ ᐅᐱᒍᐎᔭᓂᒋᐛᐳᐛᐛᒡ ᑭᔭ ᒂ ᐊᔭᒥᐊᔅᑐᐛᒡ ᑎᐸᔨᒋᒐᓱᐛ᙮

¹¹ ᑎᐸᔨᒋᒐᓱᐤ ᐅᑎᔅᑯᐤ ᒋ ᐃᔨᒪᐤ ᒧᓱᓴ ᒧᔭᒻ ᐊᐛᓐ ᐊ ᐃᓯ ᐃᔨᒪᒋ ᐎᒐᐛᑭᓇ᙮ ᐊᑯ ᒧᓱᔅ ᑲᐤ ᐊᑐᑕᑦ ᐊᓐᑕ ᐛᒋᓇᓄᐎᒡ᙮ ᒥᒄ ᐊᓂᔭ ᐅᑯᐸᓇᒪ ᒐᓱᐛᔨᒋ ᓇᓐ ᐅᑯᓯᔨᐛ, ᓇᒪ ᐅᒋ ᓂᑭᑎᒥᔪᐛ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ᙮

ᑎᐸᔨᒋᒐᓱᐤ ᑲ ᐊᓱᑎᒪᒐᑦ ᒐ ᑕᐛᑦ ᐊ ᑕᔨᒋ ᐅᑦ ᐃᔨᒪ Exodus 33.12-23 (Proper-24 Year A)

¹² ᒧᓱᔅ ᒪᒃ ᒋ ᐃᑕᐤ ᐅᑎᐸᔨᒋᒐᐛ, “ᐛᐸᑕ, ᒋᒋ ᐃᓯᓐ, ‘ᐸᓱᐅᒡ ᐊᑯ ᐃᔪᒡ᙮’ ᓇᒪ ᒪᒃ ᒋ ᒋᔅᒐᔨᑎᒥᔨᓐ ᐊᐛᓐ ᒐ ᐃᑎᓴᐅᑦ ᒐᒋ ᐎᒐᐅᑦ᙮ ᐊᔪᐛᒡ ᒪᒃ ᔅᒋ ᐃᔅᒋᔄᓐ, ‘ᒋ ᒋᔅᒐᔨᒥᑎᓐ ᒋᑦ ᐃᓯᓂᐧᑲᓱᐅᓐ ᐅᒡ, ᑭᔭ ᔅᒋ ᒥᔅᑲᓐ ᓱᐛᔨᑕᑯᓱᐅᓐ ᐊ ᐸᑕᔅᑎᒥᐱᔭᓐ᙮’

¹³ ᐊᐅᒄ ᐛᒋ ᒪᒃ, ᒋ ᐱᑯᓴᔨᒥᑎᓐ, ᒧᔭᒻ ᑲ ᒥᔅᑯᒧᐛᓇ ᓱᐛᔨᑕᑯᓱᐅᓐ ᐊ ᐸᑕᔅᑎᒥᐱᔨᓐ, ᐛᐸᑎᔨ ᐊᑯ ᒋᑦ ᐃᓯᑥᐅᓐ, ᒐᒋ ᐊᑎᑐᐤ ᒋᔅᒐᔨᒥᑕᓐ, ᒐᒋ ᒥᔅᑲᒪᓐ ᓱᐛᔨᑕᑯᓱᐅᓐ ᐊ ᐸᑕᔅᑎᒪᐱᔨᓐ; ᑭᔭ ᒪᒥᑐᓇᔨᑕ, ᐊᐅᑯᐤ ᐅᒡ ᐊ ᐃᑎᔅᑲᓇᓯᒡ ᐃᔪᒡ ᑲ ᐎᔭᔨᒥᑥᐤ ᒐ ᐅᑦ ᐃᔨᒥᔨᓐ᙮”

¹⁴ ᒋ ᐃᔅᒋᔄᐤ ᒪᒃ ᑎᐸᔨᒋᒐᓱᐤ, “ᒋᑭ ᐎᒐᐅᑎᓐ, ᑭᔭ ᒋᑭ ᒥᔨᑎᓐ ᒐᒋ ᐊᔽᓯᔨᓐ᙮”

¹⁵ ᒋ ᐃᑎᑯᐤ ᒪᒃ ᒧᓱᓴ, “ᒧᔭᒻ ᐊᑲ ᐎᒐᐎᓇ, ᐊᑲᐎᔾ ᒋᑎᓴᐅᓇᓐ ᐅᑕ ᐅᒋ᙮

¹⁶ ᐛᔅ ᑕᓐᑕ ᒐ ᐅᒋ ᒋᔅᒐᔨᑕᒂᒡ ᓂᔾ ᑭᔭ ᒋᑦ ᐃᔨᒥᒡ ᐊᒋ ᒥᔅᑲᒪᒡ ᓴᐛᔨᑕᑯᓯᐅᓐ ᐊ ᐸᑕᔅᑎᒪᐱᔨᓐ ᐊᑲ ᐎᒐᐎᔭᒐ ? ᐊᑯ ᐃᔭᒡ ᒐ ᐃᑎᔅᑲᓂᓯᔭᒡ, ᓂᔾ ᑭᔭ ᒋᑦ ᐃᔨᒥᒡ, ᒥᓯᐛ ᐃᔪᒡ ᐅᒋ ᒥᓯᐛᔅᑭᒥᒡ ᑲ ᐃᑕᒡ᙮”

¹⁷ ᑎᐸᔨᒋᒐᓱᐤ ᒪᒃ ᒋ ᐃᑕᐤ ᒧᓱᓴ, “ᐅᒪ ᑭᔭ ᓂᑭ ᑐᑕᓐ ᑲᒋ ᐃᔅᒋᔄᔨᓐ: ᐛᔅ ᔅᒋ ᒥᔅᑲᓐ ᓱᐛᔨᑕᑯᓱᐅᓐ ᐊ ᐸᑕᔅᑎᒥᐱᔭᓐ, ᒋ ᒥᔪ ᒋᔅᒐᔨᒥᑎᓐ᙮”

¹⁸ ᒋ ᐃᑎᑯᐤ ᒪᒃ ᒧᓱᓴ, “ᒋ ᐱᑯᓴᔨᒥᑎᓐ, ᐛᐸᑎᔨ ᒋ ᒋᓴᒪᓂᑐᓇᑯᓯᐅᓐ᙮”

¹⁹ ᑎᐸᔨᒋᒐᓱᐤ ᒪᒃ ᒋ ᐃᑕᐤ, “ᓂᑭ ᑐᑕᓐ ᒥᓯᐛ ᓂᒥᔽᑎᓯᐅᓐ ᒐᒋ ᐎᒪᐱᔨᔅᑕᑯᔨᓐ ᐅᑎᔅᑯᐤ ᐊᑕᔨᓐ ᑭᔭ ᓂᑭ ᐎᑕᒺᓐ ᑎᐸᔨᒋᒐᓱᐤ ᐅᑦ ᐃᓯᓂᐧᑲᓱᐅᓐ: ᓂᑭ ᒋᔅᑎᒪᒐᔨᒪᐤ ᒪᒃ ᐊᐛᓐ ᐛ ᒋᔅᑎᒪᒐᔨᒥᒃ ᑭᔭ ᓂᑭ ᓱᐛᔨᒪᐤ ᐊᐛᓐ ᐛ ᓱᐛᔨᒥᒃ᙮

²⁰ ᒥᒄ ᓇᒪᐎᔾ ᒋᑭ ᒋ ᐛᐸᑕᓐ ᓂᑕᔅᑎᒥᐧᒄ: ᐛᔅ ᓇᒪ ᐎ ᐊᐛᓐ ᓂᑭ ᐛᐱᒥᒄ, ᐃᔭᐱᒡ ᒐ ᐱᒪᑎᓯᑦ᙮

²¹ ᐊᑯᑕ ᐅᑕ ᐃᑕᐅᓐ ᒐ ᑕᔭᓐ, ᒋᑭ ᓂᐳᐅᓐ ᒪᒃ ᑕᐧᑯᒡ ᒋᔅᑕᐱᔅᑯᒡ᙮

²² ᒋᑭ ᐃᔨᓐ ᒪᒃ, ᒪᒂᒡ ᐊ ᐎᒪᐱᔨᒡ ᓂᒋᓴᒪᓂᑐᓇᑯᓯᐅᓐ, ᒋᑭ ᐊᐃᑎᓐ ᐊᓐᑕ ᐊᐱᓴᐱᔅᒋᐱᔨᒡ ᐊᓯᓂᔾ: ᒋᑭ ᐊᑯᐛᓇᐅᑎᓐ ᒪᒃ ᓂᑎᒋᔾ ᐅᒋ ᒪᒂᒡ ᐊ ᐎᒪᔅᑲᑕᓐ᙮

²³ ᓂᑭ ᐅᒋᐱᔨᑕᓐ ᒪᒃ ᓂᑎᒋᔾ, ᐊᑯ ᒪᒃ ᒐ ᐛᐱᒥᔨᓐ ᓂᔅᐱᔅᑯᓂᒡ ᐃᑕᒐ: ᒪᒃ ᓂᑕᔅᑎᒥᐧᒄ ᓇᒪᐎᔾ ᒋᑭ ᒋ ᐛᐸᑕᑭᓄᐤ᙮”