ᐊᒃᓱᑕᔅ 31 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐸᓴᓕᓪ ᑭᔭ ᐅᐦᐅᓕᐊᑉ

¹ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ,

² “ᓂᒋ ᐅᑎᓇᐤ ᐸᓴᓕᓪ, ᔪᕆᔨᒋ ᐅᑕᐎᔪᐤ, ᐦᐅᕐ ᐅᒧᓱᒧᐤ, ᒍᑕ ᐅᒡ ᑲ ᐃᑎᔅᑲᓇᓯᑦ᙮

³ ᓂᒋ ᑐᑐᐛᐤ ᒐᒋ ᓴᑭᔅᒋᓇᔅᑲᑯᑦ ᑲ ᐸᔭᒋᓯᔨᒋ ᐊᒐᒂ ᐸᓴᓕᓪ ᑭᔭ ᓂᒋ ᑐᑐᐛᐤ ᒐᒋ ᑭᔅᒋᑕᑦ ᐊ ᐅᓯᑕᑦ ᐊ ᒋᔅᑕᔨᑕᑯᓂᔨᒋ ᒐᒂᔪᐛ ᒐ ᐊᐱᑎᓂᔨᒋ ᐊᓐᑕ ᐸᔭᒋ ᐱᒍᐎᔭᓂᒋᐛᐱᒡ᙮

⁴ ᒋᑭ ᒋ ᒥᒪᑕᐅᓯᓇᑕᐊᒻ ᒐᒂᔪᐛ ᐎᔄᐅᓱᓇᔭᒡ, ᓱᓇᔭᐱᔅᑯᒡ ᑭᔭ ᑲ ᐎᔄᐛᐱᔅᑯᔨᒡ ᐃᓴᑯᔪᐤ ᐅᒡ᙮

⁵ ᒋᑭ ᒋ ᒪᑎᓱᒻ ᑲ ᓱᓇᔭᐎᔨᒋ ᐊᓯᓂᔭ ᒐᒋ ᒋᑭᒧᑕᑦ ᐎᔄᐅᓱᓇᔭᒡ ᐊᓐᑕ ᐛᔅᑲ ᐊᓯᓂᒡ ᑭᔭ ᐊ ᒧᐧᑯᑕᑦ ᒥᔅᑎᒂ ᑭᔭ ᒐᒋ ᑐᑕᐧᒄ ᐊᑭᔅᒋᑕᑦ ᐊᐅᓯᑕᑦ ᒐᒂᔪᐛ᙮

⁶ ᓂᒋ ᐅᑎᓇᐤ ᐃᔭᐱᒡ ᐅᐦᐅᓕᐊᑉ, ᐊᐦᐃᓴᒪᒃ ᐅᑯᓴ ᑕᐊᓐ ᐃᔪᐛ ᐅᑎᔅᑲᓇᓱᐤ ᒐᒋ ᐎᒋ ᐊᑐᔅᒐᒥᑯᑦ ᐸᓴᓚᓪ᙮ ᐃᔭᐱᒡ ᑭᔅᒋᐅᓂᔪᐤ ᓂᒋ ᒥᔭᐅᒡ ᑯᑎᑭᒡ ᓇᐸᐅᒡ ᒐᒋ ᐅᓯᑕᒡ ᒥᓯᐛ ᒐᒂᔪᐛ ᑲ ᐃᑎᓱᒥᑕᓐ ᒐᒋ ᐅᓯᑕᑭᓄᐅᒋ᙮

⁷ ᐊᓯᒡ ᐸᔭᒋ ᐱᒍᐎᔭᓂᒋᐛᐱᔪᐤ ᑭᔭ ᐸᔭᒋ-ᒥᐅᑎᔪᐤ ᑭᔭ ᒋᐸᐃᑭᓂᔪᐤ ᑭᔭ ᒥᓯᐛ ᒐ ᐃᑕᐱᑎᓂᔨᒋ ᒐᒂᔪᐛ ᐊᓐᑕ ᐸᔭᒋ ᐱᒍᐎᔭᓂᒋᐛᐱᒡ,

⁸ ᒥᒋᓱᐛᑭᓇᑎᑯᔪᐤ ᑭᔭ ᑲ ᐎᔄᐅᓱᓇᔭᐱᔅᑯᔨᒋ ᐛᔅᑕᓂᐱᒪᑭᓇᑎᒂ ᑭᔭ ᐊᓂᔭ ᒐ ᐃᑕᐱᑎᓂᔨᒋ ᒐᒂᔪᐛ ᒐ ᓇᑭᑐᐛᔨᑎᑭᓄᐎᔨᒡ ᑭᔭ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᒐ ᐃᔎᓴᑭᓄᐎᔨᒋ ᑲ ᐎᒋᒪᑯᓯᔨᒋ᙮

⁹ ᑭᔭ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᒐ ᒥᑐᔅᑕᐊᒪᒐᓄᐎᔨᒡ ᑭᔭ ᒐ ᐃᑕᐱᑎᓂᔨᒋ ᒐᒂᔪᐛ ᑭᔭ ᐛᐸᑲᐅᓱᔭᑭᓂᔪᐤ ᑭᔭ ᐊᓐᑕ ᒐ ᐅᒋ ᑕᐧᑯᑎᔅᑕᔨᒡ ᐛᐸᑲᐅᓱᔭᑭᓂᔪᐤ᙮

¹⁰ ᑭᔭ ᒥᓯᐛ ᑲ ᒥᔽᓯᔨᒋ ᐅᑦ ᐊᔭᒥᐊᐅ-ᐊᐱᒋᑕᐅᓂᔨᐛ ᐊᕋᓇ ᑭᔭ ᐅᑯᓯᔨᐛ ᒐ ᐳᔅᑲᒥᔨᒋ ᐃᔅᐱ ᐊᑐᔅᒐᔨᒐᓂ ᐊᔭᒥᐊᐅᒋᒪᐅᐎᔨᒋ᙮

¹¹ ᑭᔭ ᑐᒥᓂᒐᐅ-ᐱᒥᔭ ᑭᔭ ᑲᐎᒋᒪᑯᓯᒡ ᒐ ᐊᐱᑎᓂᔨᒡ ᐊᓐᑕ ᑲ ᐸᔭᒋᒥᑭᓂᔨᒡ ᑲᐱᔅᒋᒐᔭᔨᒡ᙮ ᒥᓯᐛ ᓇᐊᐤ ᒋᑭ ᐎ ᐃᓯᓇᑯᑕᐅᒡ ᒐᒂᔪᐛ ᐊᓐᒡ ᐊᔭᒡ ᑭᔅᒋᐅᓂᔪᐤ ᒧᔭᒻ ᑲ ᐃᑎᓱᒥᑕᓐ᙮”

ᐊᔭᒥᐊᐅᒋᓯᒄ

¹² ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ,

¹³ “ᒐ ᐃᑎᑥᐤ ᐃᔅᕋᐃᓪ ᐃᔪᒡ ᒐᒋ ᓇᐃᑕᒡ ᐊᓂᔭ ᑲ ᐃᑐᓱᒥᒂᐤ ᒐ ᓇᑭᑐᐛᔨᑕᒡ ᐊᔽᓯᐅᒋᓯᑲᔨᒡ ᒐᒋ ᒋᔅᒋᑎᒪᒄ ᒋᔾ ᑭᔭ ᒋᑦ ᐊᔭᓂᔅᒐ ᐊᓂᔅᑯᑕᐸᓐᒡ ᑲᒋ ᐅᑎᓂᑎᑯᒡ ᒐ ᐅᑦ ᐃᔨᒥᑕᑎᑯᒡ᙮

¹⁴ ᒋᑭ ᐎ ᓇᐃᑕᓐ ᓂᑦ ᐃᑎᓱᐛᐅᓇ ᐊ ᓇᑭᑐᐛᔨᑕᑭᓄᐅᒡ ᐊᔽᓯᐅᒋᓯᑲᒡ ᐛᔅ ᒋᒋᐛ ᐸᔭᐧᑭᓐ᙮ ᐊᐛᓐ ᐊᑲ ᓇᓴᐊᐧᒃ ᓂᑦ ᐃᑎᓱᐛᓂᔪᐤ ᑭᔭ ᒐ ᐊᑐᔅᒐᒂ ᐊᓂᔭ ᒋᓯᑯᔪᐤ, ᒋᑭ ᓂᐸᐊᑭᓄᐤ᙮

¹⁵ ᐊᓱᑕᒡ ᑕᑐᐤ ᒋᓯᑲᐛ ᒋᑭ ᐊᑐᔅᒐᓐ, ᒋᑭ ᑐᑕᓐ ᑭᔭ ᒥᓯᐛ ᒐᒂᓐ ᐊ ᑎᒂᒡ ᒐ ᐃᑐᑎᒥᓐ, ᒥᒄ ᓂᔄᐅᑕᒡ ᐊ ᒋᓯᑲᒡ ᐊᔪᐅᒄ ᐅᑦ ᐊᔽᓯᐅᒋᓯᑲᒻ ᑎᐸᔨᒋᒐᓱᐤ ᒋ ᒋᓴᒪᓂᑐᒻ, ᐊᐛᓐ ᒐ ᐊᑐᔅᒐᒂ ᐅᔭ ᒋᓯᑯᔪᐤ ᒋᑭ ᓂᐸᐊᑭᓄᐤ᙮

¹⁶ ᒥᓯᐛ ᐊᐛᓐ ᒐ ᐊᑎ ᐊᓂᔅᒐ ᐱᒪᑎᓯᑦ ᐃᔅᕋᐃᓪ ᐊ ᐃᑎᔅᑲᓇᓯᑦ ᒋᑭ ᐎ ᒋᔅᑕᔨᑎᒻ ᐅᔭ ᒋᓯᑯᔪᐤ ᒐᒋ ᒋᔅᒋᑎᒪᒄ ᓂᔅᑯᒧᐅᓐ ᑲ ᐃᑐᑎᒪᑎᑯᒡ ᒧᔅ ᑲᒋᒡ ᒐ ᑎᒂᒡ᙮

¹⁷ ᐊᐅᒄ ᐅ ᒐᒋ ᐅᒋ ᒋᔅᒋᑎᒪᒄ ᓂᔾ ᑎᐸᔨᒋᒐᓱᐤ ᐊᓱᑕᒡ ᑕᑐᐤ ᒋᓯᑲᐛ ᐃᔅᐱᔅ ᑲ ᐅᓯᑕᔭᓐ ᒋᒋᒋᓯᒄ ᑭᔭ ᐊᔅᒋᔾ ᒥᒄ ᐊᓐ ᓂᔄᐅᑕᒡ ᒋᓯᒄ ᓂᒋ ᐊᔅᑕᔭᔅᑯᓯᓐ᙮”

¹⁸ ᐃᔅᐱ ᒋᓴᒪᓂᑐᐤ ᑲᒋ ᐃᓯ ᐃᔨᒪᐊᑦ ᒧᓱᓴ ᐊᓐᑕ ᓴᐃᓇᐃ ᐱᔅᑯᑎᓇᒡ᙮ ᒂ ᒥᔭᑦ ᓂᓱ ᐊᓯᓂᔭ ᐊᓐᑕ ᑲ ᒥᓯᓇᐊᐧᒃ ᐅᑦ ᐃᑎᓱᐛᐅᓇ ᐅᑎᒋᒡ ᐅᒡ᙮