ᐊᒃᓱᑕᔅ 27 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᑕᓐ ᒐ ᐃᓯᓇᑯᑕᑭᓄᐅᒡ ᐱᔅᑎᓂᒐᐅᓇᐱᔅᒄ 1 ᒂ ᐃᑕᑦ ᑎᐸᔨᒋᒐᓱᐤ ᒧᓱᓴ, “ᒐ ᐎᑎᒧᐅᑥᐤ ᐃᔪᒡ ᐊᑲᓯᔭ ᒥᔅᑎᒂ ᒋᑭ ᐊᐱᒋᐊᒡ ᒐᒋ ᐅᓯᑕᒡ ᐊᑭᔅᑭᒐᔨᒡ ᐱᔅᑎᓂᒐᐅᓇᐱᔅᑯᔪᐤ᙮ ᓂᔄᐅᑕᒡ ᒪᒃ ᐳᔅᒄ ᒥᓯᑦ ᐊᔅᐱᔅ ᒋᓏᔨᒡ ᑭᔭ ᓂᔄᐅᑕᒡ ᒪᒃ ᐳᔅᒄ ᒥᓯᑦ ᐊᔅᐱᔅ ᐃᔨᑭᔅᑲᔨᒡ ᑭᔭ ᓇᐤ ᒪᒃ ᐳᔅᒄ ᒥᓯᑦ ᐊᔅᐱᔅ ᐃᔅᐸᔨᒡ᙮ 2 ᒧᔭᒻ ᐊ ᒋᒥᓱᔨᒋ ᐊᔅᑭᓇ ᐊᓐᑕ ᓇᐤ ᐊ ᒋᒐᔭᒡ ᒋᑭ ᐃᓯᓇᑯᑕᐅᒡ᙮ ᐊᑯ ᐊ ᐸᐃᑯᓂᔨᒡ ᒐ ᐃᓯᓇᑯᓯᔨᒋ ᐊᔅᑭᓇ ᐊᓯᒡ ᐱᔅᑎᓂᒐᐅᓇᐱᔅᑯᔪᐤ᙮ ᑭᔭ ᒥᓯᐛ ᐎᔄᐛᐱᔅᑯᔪᐤ ᒋᑭ ᐎᔎᔭᒋᓂᒧᒡ᙮ 3 ᒋᑭ ᐎ ᐅᓯᑕᐅᒡ ᑭᔅᑭᒋᔭᑭᓇ ᒐᒋ ᐱᑕᐃᑭᓄᔨᒋ ᐊᓐᑕ ᐊ ᐱᒥᐅᒋ ᑭᔅᑕᐛ, ᑭᔭ ᒋᑭ ᐎ ᐅᓯᑕᐅᒡ ᒥᑲᐃᐸᑭᓇ ᒐᒋ ᐛᐸᔨᑭᓄᐅᒋ ᐊ ᐱᒥᐅᒋ ᑭᔅᑕᐛ, ᑭᔭ ᐎᔭᑭᓇ ᒋᑭ ᐅᓯᑕᐅᒡ ᑭᔭ ᒋᔅᑕᒥᒋᓱᐛᑭᓇ ᒐᒋ ᒂᐱᔅᒋᓇᑭᓄᐅᒡ ᐎᔭᔅ ᒪᒂᒡ ᐊ ᑎᑭᔅᑕᒡ ᑭᔭ ᐊᔅᒋᒂ ᒐᒋ ᓱᑕᑭᓄᐅᒋ ᑭᔅᑕᐛ᙮ ᒥᓯᐛ ᐅᔭ ᒐᒂᓇ ᐎᔄᐛᐱᔅᑯᒡ ᒋᑭ ᐎ ᐅᒋ ᐅᓯᑕᑭᓄᐅᐛ᙮ 4 ᒋᑭ ᐅᓯᑕᐅᒡ ᐃᔭᐱᒡ ᐊ ᐎᔄᐛᐱᔅᑯᔨᒡ ᐃᐸᐱᔅᑯᔪᐤ ᒐ ᑕᐧᑯᓯᔅᑕᑭᓄᔨᒋ ᐊ ᐃᔎᑕᒋ ᒥᑕ ᑭᔭ ᑭᔅᑕᐛ᙮ ᒋᑭ ᒋᑭᒧᑕᐅᒡ ᐊᓐᑕ ᐊᒋᒐᔨᒡ ᐊ ᐎᔄᐛᐱᔅᑯᔨᒋ ᐛᐎᔭᐱᔎ ᒐᒋ ᐅᒋ ᑕᐧᑯᓂᑭᓄᔨᒡ ᐱᔅᑎᓂᒐᐅᓇᐱᔅᑯᔪᐤ᙮ 5 ᒋᑭ ᒋᑭᒧᑕᐅᒡ ᐃᐸᐱᔅᑯᔪᐤ ᐊᓐᑕ ᓯᐸ ᐛᔅᑲᔅᑲᐃᑭᓂᒡ ᐛᔅᑲ ᐱᔅᑎᓂᒐᐅᓇᐱᔅᑯᒡ, ᐱᑎᓱᐤ ᒐᒋ ᑎᑭᑯᓂᔨᒡ ᐱᔅᑎᓂᒐᐅᓇᐱᔅᑯᒡ ᐊᐱᑐᒥᐅᑎᒡ ᒐ ᑎᑯᓂᔨᒡ᙮ 6 ᒋᑭ ᐎ ᐅᓯᐊᐅᒡ ᒥᔅᑎᑯᐧᑲᓇ ᐊᑲᓯᔭ ᒥᔅᑎᒂ ᐅᒡ ᒐ ᐅᒋ ᑕᐧᑯᓇᑭᓄᔨᒡ ᐱᔅᑎᓂᒐᐅᓇᐱᔅᑯᔪᐤ ᑭᔭ ᐎᔄᐛᐱᔅᑯᔪᐤ ᒋᑭ ᐎᔎᔭᒋᓇᐅᒡ᙮ 7 ᒋᑭ ᓴᒂᐅᒡ ᒥᔅᑎᑯᐧᑲᓇ ᐊᓐᑕ ᐛᐎᔭᐱᔅᑯᒡ ᐊᔨᑐᐤ ᐱᔅᑎᓂᒐᐅᓇᐱᔅᑯᒡ ᒐᒋ ᐅᒋ ᐸᒧᑕᑭᓄᔨᒡ᙮ 8 ᒥᔅᑎᑯᐅᑦ ᒋᑭ ᐃᓯᓇᑯᓐ ᐊᓐ ᐱᔅᑎᓂᒐᐅᓇᐱᔅᒄ ᐊᑲᐃᓯᔭ ᑲᒥᓴᔪᒋᓯᒡ ᐊ ᐊᐱᒋᐊᑭᓄᐅᒡ ᐊ ᐅᒋ ᐅᓯᑕᑭᓄᐅᒡ ᒧᔭᒻ ᑲ ᐃᓯ ᐛᐸᑎᔨᑕᓐ ᒐ ᐃᓯᓇᑯᑕᑭᓄᐅᒡ ᐅᑕ ᐱᔅᑯᑎᓇᒡ᙮” ᐛᔅᑲ ᐊᑐᐛᒡ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ 9 “ᒐ ᐎᑎᒧᐅᑥᐤ ᒐᒋ ᐅᓯᑕᒡ ᐛᔅᑲ ᐊᑐᐛᔨᒡ ᐊᓐᑕ ᒐ ᑎᑯᓂᔨᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮ ᐱᑕᑕᒡ ᑕᑐᔪᐤ ᑎᐸᔎᐃᑭᓇ ᐊᔅᐱᔅ ᒋᓏᔨᒡ ᐊᓐᑕ ᓴᐅᓄᒡ ᐃᑕᒐ ᑭᔭ ᐊᑯᐛᑲᐃᑭᓇ ᒐ ᑯᑕᒡ ᐊ ᒥᔽᔨᒡ ᐱᒍᐎᔭᓂᔪᐤ ᐊ ᐅᒋ ᐅᓯᑕᒡ᙮ 10 ᐊᓯᒡ ᓂᓱᔪᐤ ᑕᑕᐃᑭᓇ ᑭᔭ ᓂᓱᔪᐤ ᐊ ᐎᔄᐛᐱᔅᑯᔨᒋ ᑕᑕᐃᑭᓇ ᑭᔭ ᐊᓯᒡ ᓯᐸᔅᑯᓂᑭᓇ ᑭᔭ ᐊ ᓱᓇᔭᐱᔅᑯᔨᒋ ᓯᒋᐸᒋᑭᓇ᙮ 11 ᐸᐃᑯᑕᐤ ᒋᑭ ᐎ ᐃᓯᓇᑯᑕᐅᒡ ᐊᑯᐛᑲᐃᑭᓇ ᐊᓐᑕ ᒋᐛᑎᓄᒡ ᐃᑕᒐ ᐛᔅᑲ ᐊᑐᐛᔨᒡ᙮ 12 ᐊᑯ ᐊᓐᑕ ᐊᑐᐛᒡ ᐊᑎᒪᐱᓯᒧᑕᒡ ᐃᑕᒐ ᒋᑭ ᐅᓯᑕᐅᒡ ᐊᑯᐛᑲᐃᑭᓂᔪᐤ ᓂᓱᔪᐤ ᐊᓱ ᐸᑕᑕᒡ ᑎᐸᔎᐃᑭᓇ ᐊᔅᐱᔅ ᒋᓏᔨᒡ ᐊᓯᒡ ᐸᐃᑯᔪᐤ ᑕᑕᐃᑭᓇ ᐊᓐᑕ ᒐ ᐊᑯᑕᔨᒡ ᑭᔭ ᐊᓯᒡ ᐸᐃᑯᔪᐤ ᑕᑕᐃᑭᓇ᙮ 13 ᑭᔭ ᐛᐱᓄᑕᒡ ᐃᑕᒐ ᐊᑐᐛᔨᒡ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᐛᒋᐱᔨᒐᓄᔨᒡ ᓂᓱᔪᐤ ᐊᓱ ᐸᑕᑕᒡ ᑎᐸᔎᐃᑭᓇ ᒋᑭ ᐊᔅᐱᔅ ᐃᔨᑭᔅᒋᑕᐅᒡ᙮ 14 ᒐ ᐎᑎᒧᐅᑥᐤ ᒐᒋ ᐊᑯᑕᒡ ᐊᑯᐛᑲᐃᑭᓂᔪᐤ ᐊᓐᑕ ᐅᐱᒪ ᐛᒋ ᐱᒐᓄᐎᔨᒡ ᓂᔄᐅᑕᒡ ᒪᒃ ᐳᔅᒄ ᑎᐸᔎᐃᑭᓇ ᐊᔅᐱᔅ ᒋᓏᔨᒡ ᐊᓯᒡ ᓂᔅᑐ ᓯᑥᔎᐃᑭᓇ ᑭᔭ ᓂᔅᑐ ᑕᑕᐃᑭᓇ᙮ 15 ᐊᑯ ᐊᓐᑕ ᒂᔅᑕᒐ ᐃᑕᒐ ᓂᔄᐅᑕᒡ ᒪᒃ ᐳᔅᒄ ᑎᐸᔎᐃᑭᓇ ᐊᔅᐱᔅ ᒋᓏᔨᒡ ᐊᑯᐛᑲᐃᑭᓂᔪᐤ ᑭᔭ ᓂᔅᑐ ᓯᑥᔎᐃᑭᓇ ᑭᔭ ᓂᔅᑐ ᑕᑕᐃᑭᓇ᙮ 16 ᒋᑭ ᐅᓯᑕᐅᒡ ᐊᑯᐛᑲᐃᑭᓂᔪᐤ ᐸᐃᑯᔪᐤ ᑎᐸᔎᐃᑭᓇ ᐊᔅᐱᔅ ᒋᓏᔨᒡ ᐊᓐᑕ ᐛᒋ ᐱᒐᓄᔨᒡ ᐊᑐᐛᔨᒡ, ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓯᔨᒋ ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ ᐊ ᐊᐱᒋᐊᒡ ᐊ ᒥᒪᑕᐅᒂᑕᒡ ᑭᔭ ᓇᐤ ᓯᑥᔎᐃᑭᓐᒡ ᐊᓐᑕ ᒐ ᒋᒥᓱᒡ ᓇᐤ ᑕᑕᐃᑭᓐᒡ᙮ 17 ᒥᓯᐛ ᓯᑥᔎᐃᑭᓐᒡ ᐊᓐᑕ ᐛᔅᑲ ᐊᑐᐛᒡ ᓱᓇᔭᐱᔅᑯᐤ ᐃᓴᑯᒡ ᒋᑭ ᐎ ᐊᓂᔅᑯᓯᒪᐅᒡ᙮ ᓱᓇᔭᐱᔅᒄ ᐅᒡ ᒋᑭ ᐎ ᐅᓯᑕᑭᓄᐅᐛ ᓯᒋᐸᒋᑭᓇ ᑭᔭ ᑕᑕᐃᑭᓇ ᐎᔄᐛᐱᔅᑯᒡ ᐅᒡ᙮ 18 ᐱᑕᑕᒡ ᑕᑐᔪᐤ ᑎᐸᔎᐃᑭᓇ ᒋᑭ ᐎ ᐃᔅᐱᔅ ᒋᓏᐤ ᑭᔭ ᓂᓱᔪᐤ ᐊᓱ ᐱᑕᑕᒡ ᑎᐸᔎᐃᑭᓇ ᒋᑭ ᐎ ᐃᔅᐱᔅ ᐃᔨᑭᔅᑲᐤ ᑭᔭ ᓂᓱ ᒪᒃ ᐳᔅᒄ ᑎᐸᔎᐃᑭᓇ ᒋᑭ ᐎ ᐃᔅᐱᔅ ᐃᔅᐸᐤ ᐊᓐᑕ ᐛᔅᑲ ᐊᑐᐛᒡ᙮ ᐊ ᒥᔽᒡ ᐱᒍᐎᔭᓐ ᒋᑭ ᐎ ᐅᒋ ᐅᓯᑕᑭᓄᐅᐛ ᐊᑯᐛᑲᐃᑭᓇ ᑭᔭ ᑕᑕᐃᑭᓐᒡ ᓱᓇᔭᐱᔅᑯᒡ ᐅᒡ᙮ 19 ᒥᓯᐛ ᒐᒂᓐ ᒐ ᐊᐱᑎᒡ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᒋᔅᑕᐸᒋᑭᓐᒡ ᐃᔭᐱᒋᐊᑭᓄᐅᒡ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᐊᓐᑕ ᐛᔅᑲ ᐊᑐᐛᒡ ᑲ ᐎᔄᐛᐱᔅᑯᐅᒡ ᒋᑭ ᐅᒋ ᐅᓯᑕᑭᓄᐅᐛ᙮” ᐊ ᓇᑭᑐᐛᔨᑕᑭᓄᐅᒡ ᐛᔅᑕᓂᐱᒪᑭᓇᑎᒄ 20 “ᒐ ᐃᑎᓱᒥᑥᐤ ᐃᔅᕋᐃᓪ ᐃᔪᒡ ᒐᒋ ᐃᑐᑥᔅᒡ ᓇᔅᒡ ᐛᒋ ᒥᔽᑭᒥᓯᔨᒋ ᐱᒥᔭ ᒐᒋ ᓇᓂᑎᒻ ᐛᔅᑕᒡ ᐛᔅᑕᓂᐱᒪᑭᓇᔅᒄ᙮ 21 ᐊᕋᓐ ᑭᔭ ᐅᑯᓴ ᒋᑭ ᐊᔭᔅᑯᔅᑕᐅᒡ ᐛᔅᑕᓂᐱᒪᑭᓇᔅᑯᔪᐤ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᐎᐎᑎᒥᒡ ᐊᑯᑕᔨᒡ ᐊᑯᐛᑲᐃᑭᓂᔪᐤ ᐅᑎᔅᑯᐤ ᐸᔭᒋ-ᒥᐅᑎᔪᐤ᙮ ᐊᓯᑯᒻ ᑕᐱᔅᑲᐛ ᒋᑭ ᐎ ᐛᔅᑕᐤ ᐛᔅᑕᓂᐱᒪᑭᓇᔅᒄ ᐃᔅᐱᔅ ᒋᔭᒋᓴᐸᔭᒋ᙮ ᒧᔅ ᑲᒋᒡ ᒋᑭ ᐎ ᓇᑭᑐᐛᔨᑎᒧᒡ ᐃᔅᕋᐃᓪ ᐃᔪᒡ ᑭᔭ ᐅᑦ ᐊᓂᔅᑯᑕᐸᓄᐛᐛ ᐅᔭ ᐃᑎᓱᐛᐅᓂᔪᐤ᙮” |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.