ᐊᒃᓱᑕᔅ 24 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐃᔅᕋᐃᓪ ᐃᔪᒡ ᑲ ᑕᑈᑕᒡ ᑎᐸᔨᒋᒐᓱᐛ ᐅᓂᔅᑯᒧᐅᓂᔪᐤ᙮

¹ ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᐸᒋ ᓴᑭᒋᐛ ᐅ ᐱᔅᑯᑎᓇᐤ, ᒐ ᐸᓱᐅᑥᐤ ᐊᕋᓐ ᑭᔭ ᐊᓂᔭ ᓂᓱ ᐅᑯᓴ, ᓇᑕᑉ ᑭᔭ ᐊᐱᐦᐅ ᑭᔭ ᐊᓐᒡ ᓂᔄᐅᑕᒡ ᑕᑐᔪᐤ ᐃᔅᕋᐃᓪ ᐅᒋᒪᐅᒡ᙮ ᐛᔪᐎᔅ ᓂᑭ ᐅᒋ ᐊᔭᒥᐊᔅᑕᑯᒡ᙮

² ᒥᒄ ᒋᔾ ᒥᒋᒪ ᒐ ᐸᒋᓇᓯᔨᓐ, ᒐ ᐊᑲ ᑕᑈᑐᐅᑦ ᑯᑎᒃ ᐊᐛᓐ ᒐᒋ ᑎᑯᓯᐧᒄ᙮”

³ ᒧᓱᔅ ᒂ ᒥᔭᑦ ᐃᔪᐛ ᑎᐸᔨᒋᒐᓱᐛ ᐅᑦ ᐃᑎᓱᐛᐅᓂᔪᐛ, ᑭᔭ ᒋ ᐊᓱᑎᒪᒐᐅᒡ ᐃᔪᒡ ᐊ ᐃᔅᒋᔄᒡ, “ᒥᓯᐛ ᒐᒂᓐ ᓂᑭ ᑐᑕᓇᓐ ᑲ ᐃᑎᓱᒥᔨᒥᑦ ᑎᐸᔨᒋᒐᓱᐤ !”

⁴ ᐊᑯ ᒧᓱᔅ ᒋ ᒥᓯᓇᑕᐊᒻ ᒐᒂᔪᐤ ᑎᐸᔨᒋᒐᓱᐛ ᑲ ᐃᔅᒋᔄᔨᒋ᙮ ᐎᐱᒡ ᒋᔭᒋᓴᐸᔭᐱᓂᔨᒡ ᒋ ᐅᓂᔪᐤ᙮ ᒋ ᐅᓯᑕᐤ ᐱᔅᑎᓂᒐᐅᓇᐱᔅᑯᔪᐤ ᓂᑕᒥᑎᓇᒡ ᑭᔭ ᒂ ᒋᒥᑐᐛᑦ ᓂᓴᑉ ᐊ ᒪᒥᓴᔨᒋ ᐊᓯᓂᔭ, ᐸᐸᐃᒄ ᐊᓂᔭ ᒥᓯᐛ ᓂᓴᑉ ᐊ ᐃᑎᔅᑲᓇᓯᔨᒋ ᐃᔅᕋᐃᓪ ᐃᔪᐛ᙮

⁵ ᒋ ᐃᑎᓴᐛᐤ ᐱᔅᒐ ᐅᔅᒋᓂᒋᓱᐛ ᒐᒋ ᒥᑐᔅᑕᐊᒪᒐᔨᒋ ᒥᔨᐛᐅᓇ ᑭᔭ ᒥᔅᑐᓴ ᒐᒋ ᐱᔅᑎᓂᒧᐛᔨᒋ ᑎᐸᔨᒋᒐᓱᐛ ᒧᔭᒻ ᐊ ᒋᔅᑕᔨᑕᑯᓂᔨᒡ ᐱᔅᑎᓂᒐᐅᓂᔪᐤ᙮

⁶ ᒧᓱᔅ ᒂ ᐅᑎᓇᐧᒄ ᐊᐱᑐᐤ ᐊᐛᓯᓴ ᐅᒥᐧᑯᔪᐤ ᑭᔭ ᒂ ᐊᓱᑕᑦ ᐊᓐᑕ ᓱᐸᐳᐎᔭᑭᓂᒡ ᐊᑯ ᒂ ᓱᐎᐧᑯᑕᑦ ᐱᔅᑎᓂᒐᐅᓇᐱᔅᑯᔪᐤ ᐊᓂᔭ ᑲ ᐃᔅᑯᐱᔨᒡ ᐊᐱᑐᐤ ᒥᐧᑯᔪᐤ᙮

⁷ ᒂ ᐃᔨᒥᑐᐛᑦ ᐃᔪᐛ ᐊᓂᔭ ᑲ ᒥᓯᓇᑕᐊᐧᒃ ᒥᓯᐛ ᑎᐸᔨᒋᒐᓱᐛ ᐅᑦ ᐃᑎᓱᐛᐅᓂᔨᐛ ᑭᔭ ᐅᑦ ᐊᓱᑎᒪᒐᐅᓂᔨᐛ, ᐊᑯ ᒂ ᐃᔅᒋᔄᒡ ᐊᓐᒡ ᐃᔅᕋᐃᓪ ᐃᔪᒡ, “ᓂᑭ ᓇᐃᑐᐛᓇᓐ ᑎᐸᔨᒋᒐᓱᐤ ᑭᔭ ᒥᓯᐛ ᓂᑭ ᐃᑐᑎᒺᓇᓐ ᑲ ᐃᑎᓱᒥᔨᒥᑦ !”

⁸ ᒧᓱᔅ ᒂ ᐅᑎᓇᐧᒃ ᒥᐧᑯᔪᐤ ᒂ ᐱᓂᐱᔨᑐᐛᑦ ᐃᔪᐛ᙮ ᒥᓐ ᒂ ᐃᑕᑦ, “ᐅ ᒥᐧᒄ ᐅᒡ, ᐊᐅᑯᔪᐤ ᐅᔭ ᑎᐸᔨᒋᒐᓱᐤ ᐊᑐᑕᐧᒃ ᓂᔅᑯᒧᐅᓂᔪᐤ ᓯᒡ ᒋᔨᐛᐤ᙮”

⁹ ᒧᓱᔅ ᑭᔭ ᐊᕋᓐ, ᒪᒧᐤ ᓯᒡ ᓇᑕᑉ ᑭᔭ ᐊᐱᐦᐅ ᑭᔭ ᓂᔄᐅᑕᒡ ᑕᑐᔪᐤ ᐃᔅᕋᐃᓪ ᐅᒋᒪᐅᒡ ᒂ ᓴᑭᒋᐛᒡ ᐱᔅᑯᑎᓇᔪᐤ᙮

¹⁰ ᑭᔭ ᒂ ᐛᐱᒪᒡ ᐃᔅᕋᐃᓪ ᒋᓴᒪᓂᑐᐛ, ᐊᓂᔭ ᐃᔅᕋᐃᓪ ᐃᔪᒡ ᑲ ᐊᔭᒥᐊᔅᑐᐛᒡ᙮ ᓴᑯ ᐅᓯᑎᔨᒡ ᒋᑎᑯᓂᔪᐤ ᒐᒂᔪᐤ ᒧᔭᒻ ᐊ ᐱᔅᑭᓇᔨᒡ ᒪᔅᑭᓇᔪᐤ ᐊ ᓴᐳᓄᑯᓂᔨᒡ ᐊ ᐃᓯᓇᑯᓂᔨᒡ᙮

¹¹ ᐊᑯ ᒋᓴᒪᓂᑐᐤ ᓇᒪ ᐅᒋ ᐊᓏᔨᒪᐤ ᐊᓂᔭ ᐅᒋᒪᐛ ᐊᑎᓱᐧᒄ ᒋ ᐛᐱᒥᑯᑦ᙮ ᐊᑯ ᒪᒧᐤ ᒋ ᒥᒋᓱᐅᒡ ᑭᔭ ᒋ ᒥᓄᐅᒡ᙮

Exodus 24.12-18 (Transfiguration Year A)

¹² ᐊᑯ ᑎᐸᔨᒋᒐᓱᐤ ᐊᑕᑦ ᒧᓱᓴ, “ᐸᒋ ᓴᑭᒋᐛ ᐱᔅᑯᑎᓇᐤ ᑭᔭ ᐛᐃᐱᔅᒋᔅ ᐅᑕ ᒐ ᑕᔨᓐ᙮ ᓂᓱ ᑲ ᐱᐱᒋᓯᒡ ᐊᓯᓂᔨᒡ ᒋᑭ ᒥᔨᑎᓐ ᐊᓐᑕ ᑲ ᒥᓯᓇᐊᒪᓐ ᐃᑎᓱᐛᐅᓇ ᓂᑦ ᐃᔨᒥᒡ ᒐ ᐎ ᓇᓴᐊᒡ᙮”

¹³ ᒧᓱᔅ ᑭᔭ ᐊᓂᔭᔪᐛ ᐎᔭᐎᒋᐃᑯᑦ ᒐᓱᐛᔨᒋ ᒋ ᐊᔭᔅᑯᐎᔪᒡ᙮ ᐊᑯ ᒧᓱᔅ ᐊᑎ ᓴᑭᒋᐛᑦ ᐱᔅᑯᑎᓇᔪᐤ ᒐᒋ ᓂᒋᔅᑯᐛᑦ ᒋᓴᒪᓂᑐᐛ᙮

¹⁴ ᐊᑯ ᒧᓱᔅ ᐊᑕᑦ ᐊᓂᔭ ᐃᔅᕋᐃᓪ ᐅᒋᒪᐛ, “ᐊᑯᑕ ᐅᑕ ᐊᓱᐛᐱᒥᓇᓐ ᐸᑎᒪ ᑲᐤ ᓂᑐᐛᐱᒥᑕᒐ᙮ ᐊᕋᓐ ᑭᔭ ᐦᐅᕐ ᒋᑭ ᑕᐅᒡ ᐊ ᑕᐛᒄ, ᑭᔭ ᒥᒄ ᐊᐛᓐ ᐊᑕᒪᔨᒪᒐ ᑯᑎᑲ ᐊᐛᔪᐛ, ᐊᐅᑯᔪᐛ ᒐ ᓇᑕᒡ᙮”

¹⁵ ᐃᔅᐱ ᒧᓱᔅ ᓯᔭᑭᒋᐛᑦ ᐱᔅᑯᑎᓇᔪᐤ, ᑭᔅᑯᐅᓂᒡ ᒋ ᐊᑯᓇᐃᐱᔪᐤ᙮

¹⁶ ᑭᔭ ᐊᑯᑕ ᑲ ᑎᑯᓂᔨᒡ ᐊ ᒋᐧᑲᔭᔅᑕᔨᒡ ᑎᐸᔨᒋᒐᓱᐤ ᐅᒋᔅᑕᔨᑕᑯᓱᐅᓐ ᓴᐃᓇᐃ ᐱᔅᑯᑎᓇᒡ᙮ ᐊᓱᑕᒡ ᑕᑐᐤ ᒋᓯᑲᐛ ᐃᔅᐱᔅ ᐊᑯᓇᐃᐱᔪᐤ ᐱᔅᑯᑎᓇᔪᐤ ᑭᔅᑯᐅᓂᒡ ᑭᔭ ᐊᓂᔭ ᓂᔄᐅᑕᒡ ᒋᓯᑯᔪᐤ ᑎᐸᔨᒋᒐᓱᐤ ᒋ ᑕᑈᑕᐤ ᒧᓱᓴ ᑭᔅᑯᐅᓂᒡ ᐅᒡ᙮

¹⁷ ᐃᔅᐱ ᐃᔅᕋᐃᓪ ᐃᔪᒡ ᐊᑕᐱᒡ ᑕᐧᑯᒡ ᐱᔅᑯᑎᓇᒡ, ᒧᔭᒻ ᐊ ᒥᔅᑎ ᐃᔅᑯᑕᔨᒡ ᒋ ᐃᓯᓂᒧᐛᐅᒡ ᑎᐸᔨᒋᒐᓱᐛ ᐅᒋᔅᑕᔨᑕᑯᓱᐅᓂᔪᐤ᙮

¹⁸ ᐊᑯ ᒧᓱᔅ ᓯᔭᑭᒋᐛᑦ ᑲ ᑭᔅᑯᐅᓄᐎᒡ ᐱᔅᑯᑎᓇᔪᐤ ᑭᔭ ᓇᐎᔪᐛ ᒋᓯᑲᐛ ᑭᔭ ᓇᐎᔪᐛ ᑎᐱᔅᑲᐛ ᒋ ᐃᔅᐱᔅ ᑕᐤ ᐊᓐᑕ ᐱᔅᑯᑎᓇᒡ᙮