ᐊᒃᓱᑕᔅ 22 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᐊ ᐃᓯ ᓇᑭᑐᐛᔨᑕᑭᓄᐅᒋ ᑎᐸᐃᑎᒧᐅᓇ 1 ᑎᐸᔨᒋᒐᓱᐤ ᐃᔭᐱᒡ ᒋ ᐃᔅᒋᔄᐤ, “ᒋᒧᑎᒐ ᐊᐛᓐ ᓇᐸ ᒥᔅᑐᓴ ᑭᔭ ᒪᒃ ᒪᔭᑕᓂᓴ, ᑭᔭ ᒂ ᓂᐸᐊᑦ ᑭᔭ ᒪᒃ ᒂ ᑕᐛᒐᑦ᙮ ᒋᑭ ᐎ ᒋᓯᐧᑲᓱᐤ ᐱᑕᑕᒡ ᓇᐸ ᒥᔅᑐᓴ ᐊᓂᔭ ᐸᐃᒄ ᓇᐸ ᒥᔅᑐᓴ ᑲ ᒋᒧᑎᑦ ᑭᔭ ᓇᐤ ᒪᔭᑕᓂᓴ ᒋᑭ ᐎ ᒋᓯᐧᑲᓱᐤ ᐊᓂᔭ ᒪᔭᑕᓂᓴ ᑲ ᒋᒧᑎᑦ᙮ 2 ᒐᔅᑎᐱᑕᑭᓄᒐ ᐊᐛᓐ ᐊᐱᒂᔎᐊᒺᑦ ᑯᑎᑲ ᐊᐛᔪᐛ ᐎᒋᔪᐤ ᐊ ᑎᐱᔅᑲᔨᒡ, ᑭᔭ ᐊᓐ ᐊᐛᓐ ᑲ ᒐᔅᑎᐱᑕᑦ ᑲ ᓂᑕᐅᒋᒧᑎᔨᒋ ᓂᐸᐊᒐ ᒪᒃ, ᓇᒪ ᒋᑭ ᑕᒪᔨᒪᑭᓄᐤ ᐊᓂᔭ ᑲ ᓂᐸᐊᑦ᙮ 3 ᒥᒄ ᐃᔅᐱᔨᒐ ᐅ ᒪᒂᒡ ᐊ ᒋᓯᑲᒡ ᒋᑭ ᑕᒪᔨᒪᑭᓄᐤ ᐊᓂᔭ ᑲ ᓂᐸᐊᑦ᙮ ᒥᒄ ᐊᑲ ᓂᐱᒐ ᐊᓐ ᑲ ᓂᑕᐅᒋᒧᑎᑦ, ᒋᑭ ᐎ ᒋᓯᐧᑲᓱᐤ ᐊᓂᔭ ᒐᒂᔪᐤ ᑲ ᒋᒧᑎᑦ᙮ ᐊᑲ ᑭᓄᐛᔨᑕᒐ ᒐᒂᔪᐤ, ᒋᑭ ᐎ ᑕᐛᒐᓄᐤ ᒧᔭᒻ ᐊᐱᒋᐊᑭᓐ ᒐᒋ ᒋᓯᐧᑲᓱᑦ ᐊᓂᔭ ᑲᒋᒧᑎᑦ᙮ 4 ᐊᔅᒄ ᑭᓄᐛᔨᒪᒐ ᐊᓂᔭ ᒥᒄ ᐊᓯᓇᑯᓯᔨᒋ ᐊᐛᓯᓴ ᑲ ᒋᒧᑎᑦ ᐃᔅᐱ ᑲ ᒐᔅᑎᐱᑕᑭᓄᐅᑦ ᑭᔭ ᐊᔅᒄ ᐃᔪᐎᒐᓂ, ᑲᐤ ᒋᑭ ᐎ ᐱᔅᑎᓇᐤ ᐊᓂᔭ ᐊᐛᓯᓴ ᑲ ᒋᒧᑎᑦ ᐊᓯᒡ ᓂᓱ ᐊᐛᓯᓴ ᒋᑭ ᐎ ᒋᓯᐧᑲᓱᐤ ᐊᓂᔭ ᐸᐃᒄ ᑲ ᒋᒧᑎᑦ᙮ 5 ᐊᑯ ᓇᐊᔨᒪᒐ ᐊᐛᓐ ᐅᑦ ᐊᐛᓯᓯᒪ ᒐᒋ ᒥᒋᓱᐎᔨᒋ ᐊᓐᑕ ᐅᓂᑕᐅᒋᒋᑭᓂᒡ, ᑭᔭ ᒂ ᔅᑐᑕᔨᒋ ᑭᔭ ᒂ ᒥᒋᔨᒋ ᑯᑎᑲ ᐊᐛᔪᐛ ᑲ ᓂᑕᐅᒋᑕᔨᒋ ᒥᒋᒥᔪᐤ ᐊᓐᑕ ᐅᓂᑕᐅᒋᒋᑭᓂᔨᒡ, ᐊᐛᓐ ᐊ ᑕᐸᔨᒪᑦ ᐊᓂᔭ ᐊᐛᓯᓴ ᒋᑭ ᐎ ᒋᓯᐧᑯᐛᐤ ᐊᓂᔭ ᑯᑎᑲ ᑲ ᑎᐸᔨᑎᒥᔨᒋ ᓂᑕᐅᒋᒋᑭᓂᔪᐤ, ᒋᑭ ᐎ ᒥᔭᐤ ᐊᓂᔭ ᐛᒋ ᒥᔽᔨᒋ ᓂᑕᐅᒋᑕᑭᓇ ᐅᓂᑕᐅᒋᒋᑭᓂᒡ ᐅᒡ᙮ 6 ᐃᔅᐱ ᑯᑐᐛᒐ ᐊᐛᓐ ᐊᓐᑕ ᐅᓂᑕᐅᒋᒋᑭᓂᒡ ᑭᔭ ᒂ ᐃᔅᐱᔨᒡ ᐊᓂᔭ ᐃᔅᑯᑕᔪᐤ ᐊᓐᑕ ᑯᑎᑲ ᐊᐛᔪᐛ ᐅᓂᑕᐅᒋᒋᑭᓂᔨᒡ ᑭᔭ ᒂ ᐃᔎᑕᔨᒡ ᐊᓂᔭ ᐅᒥᒋᒥᔪᐤ ᑲ ᓂᑕᐅᒋᑕᔨᒋ, ᐊᑯ ᐊᓐ ᐊᐛᓐ ᑲ ᒋᒋᐱᔨᑕᑦ ᐊᓂᔭ ᐃᔅᑯᑕᔪᐤ ᒋᑭ ᐎ ᒋᓯᐧᑲᓱᐤ ᐊᓂᔭ ᑲ ᐃᔅᐱᔅ ᐅᓂᑕᔨᒋ ᑕᐸᔨᑎᒥᔨᒋ ᐊᓂᔭ ᓂᑕᐅᒋᒋᑭᓂᔪᐤ᙮ 7 ᓇᐸᐤ ᑯᒂᒋᒪᒐ ᑯᑎᑲ ᐊᐛᔪᐛ ᒐᒋ ᐛᐃᐱᔅᒋᔅ ᑭᓄᐛᔨᑎᒥᔨᒋ ᐅᓱᓇᔭᓂᒻ ᑭᔭ ᒪᒃ ᐊ ᓱᓇᔭᐎᒋ ᒐᒂᔪᐛ᙮ ᐊᑯ ᒋᒧᑎᓇᓄᐎᔨᒐᓂ ᐊᓂᔭ ᒐᒂᔪᐛ ᐊᓐᑕ ᑲ ᑭᓄᐛᔨᑕᑭᓄᐎᒡ, ᐊᑯ ᒐᔅᑎᐱᑕᑭᓄᒐ ᐊᓐ ᐊᐛᓐ ᑲ ᑭᒐᒧᑎᑦ, ᐛᒧᒡ ᓂᔄᐤ ᐃᔅᐱᔅ ᒋᑭ ᐎ ᒋᓯᐧᑲᓱᐤ ᐊᓂᔭ ᑲ ᒋᒧᑎᑦ᙮ 8 ᐊᑯ ᐊᑲ ᒐᔅᑎᐱᑕᑭᓄᒐ ᐊᓐ ᐊᐛᓐ ᑲ ᑭᒐᒧᑎᑦ, ᒋᑭ ᐎ ᓂᑐᐛᐱᒪᐤ ᑎᐸᔅᑭᓂᒐᓱᐛ ᐊᓐ ᑲ ᑭᓄᐛᔨᑎᔭᑭᓄᐅᑦ, ᐊᑯ ᒐ ᐎ ᒋᔅᒐᔨᑎᒥᔨᒋ ᐊᓂᔭ ᑎᐸᔅᑭᓂᒐᓱᐛ ᐎᔾ ᐊᓂᔭ ᐊᑲ ᐅᒋ ᐅᑎᓂᒧᒂ ᐊᓂᔭ ᒐᒂᔪᐛ ᑲ ᑭᓄᐛᔨᑎᔭᑭᓄᐅᑦ᙮ 9 ᐊᑯ ᒥᒋᐱᔨᑐᑥᐛ ᓂᓱ ᐊᐛᓐᒋ, ᒋᐧᑲᒥᑐᑥᐛ ᐊᐛᓐ ᐊᓂᔭ ᑕᐸᔨᑕᐧᒃ ᒐᒂᔪᐛ ᑲᒋ ᐅᓂᑕᑭᓄᐎᒋ, ᒋᑭ ᐎ ᐅᑎᔅᑯᑲᐳᔅᑐᐛᐅᒡ ᑎᐸᔅᑯᐅᓂᒐᓱᐛ, ᐊᑯ ᐊᓐ ᐊᐛᓐ ᐊ ᐃᔨᑎᑯᑦ ᑎᐸᔅᑯᓂᒐᓱᐛ ᐊ ᑭᑭᒋᔭᑦ, ᓂᔄᐤ ᐃᔅᐱᔅ ᒋᑭ ᐎ ᒋᓯᐧᑯᐛᐤ ᐊᓂᔭ ᑯᑎᒂ ᐊᐛᔪᐛ᙮ 10 ᐊᑯ ᑭᓄᐛᔨᑎᔭᒐ ᐊᐛᓐ ᑯᑎᒂ ᐊᐛᔪᐛ ᐅᑦ ᐊᐛᓯᓯᒪ ᑭᔭ ᒂ ᓂᐱᔨᒋ ᑭᔭ ᒪᒃ ᐊᐧᑯᓯᔪᐛ ᑭᔭ ᒪᒃ ᑲ ᒋᒧᑎᓇᓄᐎᒋ ᐊᑲ ᐅᒋ ᐛᐱᒪᔨᒋ ᐊᐛᔪᐛ᙮ 11 ᐊᑯ ᐊᓐ ᑲ ᑭᓄᐛᔨᑎᐊᑭᓄᐅᑦ ᐊᓂᔭ ᐊᐛᓯᓴ ᐛᒧᒡ ᒋᑭ ᐎ ᐎᑎᒻ ᐊᑲ ᐅᒋ ᒋᒧᑎᑦ ᐊᓂᔭ ᐊᐛᓯᓴ ᐅᑎᔅᑯᐤ ᑎᐸᔨᒋᒐᓱᐛ᙮ ᒋᑭ ᐎ ᑕᑈᑎᒻ ᐊᓐ ᑲ ᑎᐸᔨᒪᑦ ᐊᓂᔭ ᐊᐛᓯᓴ, ᑭᔭ ᓇᒪ ᒋᑭ ᒋ ᒋᓯᐧᑲᑯᐤ ᐊᓂᔭ ᑲ ᑭᓄᐛᔨᑎᔭᑦ ᐊᐛᓯᓴ᙮ 12 ᒥᒄ ᑲ ᒋᒧᑎᓇᓄᐎᒂᓂ ᐊᓂᔭ ᐊᐛᓯᓴ ᑲ ᑭᓄᐛᔨᑎᔭᑭᓄᐅᑦ, ᒋᑭ ᐎ ᒋᓯᐧᑯᐛᐤ ᐊᓂᔭ ᑕᐸᔨᒪᔨᒋ ᐊᐛᓯᓴ᙮ 13 ᑲ ᓂᐸᐃᑯᐎᒂᓂ ᑲ ᑯᔅᑕᑎᑯᓯᔨᒋ ᐊᐛᓯᓴ, ᒋᑭ ᐎ ᐸᓱᐛᐤ ᐊᓂᔭ ᐊᔅᑯᐱᔨᒋ ᐊᐛᓯᓴ ᑲ ᓂᐸᐊᑭᓄᐎᒋ ᒐᒋ ᐛᐸᑎᔭᑦ ᐊᓂᔭ ᑕᐸᔨᒪᔨᒋ᙮ ᑐᑕᒐ ᒪᒃ ᐅᔭ, ᓇᒪ ᒋᑭ ᐎ ᒋᓯᐧᑲᓱᐤ ᐊᓂᔭ ᐊᐛᓯᓴ᙮ 14 ᐊᐛᓐ ᐅᐛᐊᓱᒐ ᐊᐛᓯᓴ, ᐊᑯ ᒂ ᐊᐧᑯᓯᔨᒋ ᑭᔭ ᒪᒃ ᒂ ᓂᐱᔨᒋ, ᐊᑲ ᑕᔨᒋ ᐊᓂᔭ ᑕᐸᔨᒪᔨᒋ ᐊᐛᓯᓴ, ᒋᑭ ᐎ ᒋᓯᐧᑲᓱᐤ ᐊᓐ ᐊᐛᓐ ᑲ ᐅᐛᐊᓱᐅᑦ᙮ 15 ᒥᒄ ᑕᔨᒐᓂᔾ ᐊᓂᔭ ᑕᐸᔨᒪᔨᒋ ᐊᓂᔭ ᐊᐛᓯᓴ, ᐊᑯ ᐊᓐ ᑲ ᐅᐛᐊᓱᐅᑦ ᓇᒪ ᒋᑭ ᒋᓯᐧᑲᓱᐤ᙮ ᒥᒄ ᐅᐛᐊᓱᒐ ᐊᓂᔭ ᐊᐛᓯᓴ ᐊ ᒋᓯᐧᑲᓱᑦ, ᓴᔅ ᐊᓂᔭ ᑎᐸᐊᒻ ᑲ ᓂᐱᔨᒋ ᑭᔭ ᒪᒃ ᑲ ᐊᐧᑯᓯᔨᒋ᙮” ᐊᓯᑯᒻ ᒋᓯᑲᐛ ᐎᓱᐛᐅᓇ 16 “ᐊᑯ ᓴᐧᑯᒋᒪᒐ ᓇᐸᐤ ᐅᔅᒋᓂᒋᔎᓴ ᐊᒋ ᒋᔅᒋᓄᐛᒋᐊᑭᓄᐎᒋ ᒐᒋ ᓂᐳᐎᒋ ᒐᒋ ᐎᐸᒥᑯᑦ, ᒋᑭ ᐎ ᒋᓯᐧᑯᐛᐤ ᐅᓂᒋᐃᑯᔪᐛ ᑭᔭ ᒋᑭ ᐎ ᓂᐳᐤ ᐊᓂᔭ ᐃᔎᓴ, 17 ᒥᒄ ᐊᑲ ᑕᑈᑎᒥᒐᓂᔾ ᐊᓂᔭ ᐅᑕᐎᒪᐛ ᒐᒋ ᓂᐳᐅᑦ ᐊᓂᔭ ᐃᔎᓴ, ᐃᔭᐱᒡ ᒋᑭ ᐎ ᒋᓯᐧᑯᐛᐤ ᐊᓂᔭ ᐅᑕᐎᒪᐛ᙮ 18 ᒋᑭ ᐎ ᓂᐸᐊᑭᓄᐤ ᐃᔎᐤ ᐊ ᒥᑕᐅᑦ᙮ 19 ᒋᑭ ᐎ ᓂᐸᐊᑭᓄᐤ ᐊᐛᓐ ᐊ ᐎᒋ ᐱᓯᒂᑎᓯᒪᑦ ᐊᐛᓯᓴ (ᐊ ᒥᒋᑐᑐᐛᑦ ᐊᐛᓯᓴ)᙮ 20 ᐊᐛᓐ ᐊ ᒥᑐᔅᑕᐊᒧᐛᑦ ᑯᑎᑲ ᒥᓂᑐᐧᑲᓇ, ᐊ ᐊᑲ ᓂᔾ ᐅᑎᐸᔨᒋᒐᐤ, ᒥᑐᔅᑕᐊᒧᐅᑦ ᒋᑭ ᓂᐸᐊᑭᓄᐤ᙮ 21 ᒐ ᐊᑲ ᒋᔅᑎᒪᐊᑯᒡ ᑭᔭ ᒪᒃ ᓂᓇᐧᑲᒋᐊᑯᒡ ᒪᓐᑕᐅᒡ ᐛᒋᒡ ᐊᓐᑕ ᐊ ᑕᐛᒄ᙮ ᒐ ᒋᔅᒋᔭᒄ ᑲ ᒪᓐᑕᐅᑯᔭᒃ ᑭᔭ ᒋᔨᐛᐤ ᐊᓐᑕ ᐃᒋᑉᑎᒡ᙮ 22 ᒐ ᐊᑲ ᒋᔅᑎᒪᐊᑯᒡ ᑲ ᐸᐃᑯᓯᒡ ᐃᔎᐅᒡ ᑭᔭ ᒪᒃ ᒋᐅᓴᓂᓯᒡ᙮ 23 ᐃᑐᑎᒪᒂ ᐅ, ᑕᑈᓯᑥᐛ ᐊ ᐎᐎᒋᐃᑯᓯᒡ ᓂᑭ ᐸᑐᐛᐅᒡ᙮ 24 ᑭᔭ ᓇᔅᒡ ᒋᑭ ᒋᔄᐃᓇᐛᐤ ᑭᔭ ᒋᑭ ᑐᑕᑎᓇᐛᐤ ᒐᒋ ᓂᐸᐃᑯᐅᔭᒄ ᐊᓐᑕ ᐊ ᓂᑐᐱᔨᓇᓄᐅᒡ᙮ ᒋᑭ ᐸᐃᑯᓱᐅᒡ ᒋᐅᐛᐅᒡ ᑭᔭ ᓇᒪ ᒋᑭ ᐅᑕᐎᔪᐅᒡ ᒋᑦ ᐊᐛᓯᒧᐛᐅᒡ᙮ 25 ᐅᐛᐊᒂᐛ ᐊᐛᓐ ᓱᓇᔭᔪᐤ ᐊ ᒋᔅᑎᒪᑎᓯᒡ, ᒐ ᐊᑲ ᐃᑎᔨᓐ ᒧᔭᒻ ᐊᐛᓐ ᑲ ᐎᐃᐛᑦ ᓱᓇᔭᔪᐤ, ᑕᐧᑯᒡ ᒐᒋ ᓂᑐᐛᔨᒧᐅᑦ᙮ 26 ᒥᔨᔅᒐ ᐊᐛᓐ ᐅᑦ ᐊᑯᑉ ᐊ ᐊᓱᑎᒪᒐᑦ ᒐᒋ ᒋᓯᐧᑲᔅᒃ ᐊ ᒥᓯᓇᐊᒪᔅᒃ, ᑲᐤ ᐊᓂᔭ ᒋᑭ ᐎ ᒥᔭᐛᐤ ᐅᑦ ᐊᑯᑉ ᐊᔅᒃ ᐊᑲ ᐸᒋᓱᒧᐎᒋ ᐱᓯᒧᐛ᙮ 27 ᐛᔅ ᒋᑭ ᓄᑕᐱᔪᐤ ᐊᓂᔭ ᐅᑦ ᐊᑯᑉ ᒐᒋ ᒋᓱᓂᑯᑦ ᑎᐸᔅᑲᔨᒐ᙮ ᐛᔅ ᐊᐅᑯᔪᐤ ᒥᒄ ᑭᓄᐛᔨᑕᐧᒃ ᐊᐛᓐ ᐊ ᒋᔅᑎᒪᑎᓯᑦ᙮ ᐃᔅᐱ ᑕᑈᓯᒐ ᒐᒋ ᐎᒋᐃᒄ, ᓂᑭ ᐸᑐᐛᐤ ᐛᔅ ᓂ ᒋᔅᑎᒪᒐᔨᒧᐛᓐ᙮ 28 ᒐ ᐊᑲ ᒥᒋ ᐛᐎᔭᒄ ᒋᓴᒪᓂᑐᐤ ᑭᔭ ᐊᑲᐎᔾ ᒋᑭ ᐅᒋ ᒥᒋ ᐊᔨᒧᒪᐛᐤ ᐊᐛᓐ ᐊ ᓂᑲᓂᔅᑯᐛᑦ ᒋᑦ ᐃᔨᒧᐛᐛ᙮ 29 ᒐ ᐊᑲ ᑎᔭᒄ ᒐᒋ ᒥᔨᔭᒄ ᐛᒋ ᒥᔽᒋ ᒋᓂᑕᐅᒋᒋᑭᓄᐛᐛ ᑭᔭ ᐱᒥᔾ ᑭᔭ ᓱᒥᓇᐳᐎᔾ᙮ ᒐ ᒥᔨᔭᒄ ᒋᓂᔅᑎᒧᓴᓄᐛᐅᒡ ᐊ ᓇᐸᓯᐅᒡ᙮ 30 ᑭᔭ ᓂᔅᑎᒻ ᑲ ᐃᔪᐅᒡ ᒋᓇᐸ ᐊᐛᓯᓯᒧᐛᐅᒡ᙮ ᒐ ᒥᔭᑯᒡ ᒐᒋ ᑕᒡ ᐊᓐᑕ ᐅᑲᐎᐛᐛ ᐊ ᑕᔨᒋ ᓂᔄᐅᑕᒡ ᑕᑐᐤ ᒋᓯᑲᐛ ᐃᔅᐱᔅ ᐊᑯ ᔭᓇᐤ ᐊ ᒋᓯᑲᔨᒡ ᒐ ᐸᓯᐛᑯᒡ ᒐᒋ ᒥᔨᔭᒄ᙮ 31 ᒋᔨᐛᐤ ᐅ ᓂᑦ ᐃᔨᒥᒡ, ᒐ ᐊᑲ ᒥᒋᔭᒄ ᐎᔭᔅ ᐊᐛᓯᔅ ᑲᒋ ᓂᐸᐃᑯᑦ ᑲ ᐊᒂᑎᓯᒋ ᑯᑎᑲ ᐊᐛᓯᓴ, ᒥᒄ ᒐ ᒥᔭᑯᒡ ᐊᑎᒧᒡ ᒐᒋ ᒥᒋᒡ᙮” |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.