ᐊᒃᓱᑕᔅ 20 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐸᐃᑯᔪᐤ ᐃᑎᓱᐛᐅᓇ Exodus 20.1-4, 7-10, 12-20 (Proper-22 Year A) Exodus 20.1-17 (Lent-3 Year B)

¹ ᒋᓴᒪᓂᑐᐤ ᐎᔾ ᒋ ᐸᒋ ᐸᑕᑯᓂᒐᐤ ᐅᔭᔪᐛ ᐃᔨᒧᐅᓇ, ᐊᑯ ᐃᔭᑦ:

² “ᓂᔾ ᐊᐅᒄ ᑎᐸᔨᒋᒐᓱᐤ ᒋᒋᓴᒪᓂᑐᒻ, ᑲ ᐅᒋ ᐸᒋ ᐎᐎᑕᐃᔅᒃ ᐃᒋᑉᑦ ᐊᔅᒋᒡ, ᐊ ᐛᐧᑲᑎᑯ-ᐊᔅᒋᒡ ᐅᒡ᙮

³ ᐊᑲᐎᔾ ᒋᑭ ᐅᒋᓴᒪᓂᑐᒥᓐ ᑯᑎᑭᒡ ᒥᓂᑐᐅᒡ ᓂᔾ ᒥᒄ᙮

⁴ ᐊᑲᐎᔾ ᐛᐛᒡ ᐸᐃᒄ ᒥᓂᑐᐧᑲᓐ ᒋᑭ ᐅᒋ ᐅᓯᑥᓱᓐ᙮ ᐊᑲᐎᔾ ᑭᔭ ᒐᒂᓐ ᐊᓂᔅᐱᑕᒧᒥᑲᒡ ᒋᒋᒋᓯᑯᒡ ᐃᔅᐱᒥᒡ ᐊ ᑎᒂᒡ ᑭᔭ ᐊᔅᒋᒡ ᑕᐱᓯᔅ ᑭᔭ ᓂᐱᒡ ᑕᒥᐸᑯᒡ᙮

⁵ ᐊᑲᐎᔾ ᒋᑭ ᐅᒋᒋᐧᑯᓂᐱᔅᑐᐛᐛᐅᒡ, ᐛᔅ ᓂᔾ ᑎᐸᔨᒋᒐᓱᐤ ᒋᒋᓴᒪᓂᑐᒻ ᓄᒋᐃᐛᐤ ᒋᓴᒪᓂᑐᐅᓐ; ᓂᑦ ᐊᔨᒥᐊᐅᒡ ᒪᒃ ᐊᐛᓯᒡ ᐅᑕᐎᐛᐛ ᐅᒥᒋᑥᐅᓂᔪᐛ ᐅᒡ ᐱᐃᒻ ᓂᔅᑐ ᑭᔭ ᓇᐤ ᒐ ᐊᑎ ᐊᓂᔅᒐ ᐱᒪᑎᓯᒡ ᐊᓐᒡ ᐎᔭᐧᑲᓯᒡ;

⁶ ᓂ ᒋᓴᐛᑐᑐᐛᐅᒡ ᒪᒃ ᒥᒐᑥᐤ ᒐᓯᐱᔪᐤ ᒥᑕᑐᒥᑎᓄᐤ ᒐ ᐊᓂᔅᒐ ᐱᒪᑎᓯᒡ ᐊᓐᒡ ᓯᐊᒋᐃᒡ, ᑭᔭ ᓂᔭᑭᑐᐛᔨᑕᒡ ᐊᑎᓱᐛᐅᒡ᙮

Exodus 20.1-4, 7-10, 12-20 (Proper-22 Year A)

⁷ ᐊᑲᐎᔾ ᓂᑐᐎᔾ ᒋᑭ ᐃᓯ ᐎᔭᐤ ᑎᐸᔨᒋᒐᓱᐤ ᒋᒋᓴᒪᓂᑐᒻ ᐛᔅ ᑎᐸᔨᒋᒐᓱᐤ ᓇᒪᐎᔾ ᒋᑭ ᒥᔪᑥᐛᔨᒪᐤ ᐊᓂᔭᔪᐛ ᓂᑐᐎᔾ ᐊᓯ ᐎᔨᑯᑦ᙮

⁸ ᒧᔅ ᒋᔅᒋᔾ ᒐ ᐸᔭᒋ ᓇᑭᑐᐛᔨᑎᒥᓐ ᐊᔽᓯᐅᒋᓯᑲᒡ᙮

⁹ ᐊᓱᑕᒡ ᑕᑐᐤ ᒋᓯᑲᐛ ᒋᑭ ᐊᐱᑎᓯᓐ ᒋᑭ ᑐᑕᓐ ᑭᔭ ᒥᓯᐛ ᐊ ᑎᒂᒡ ᒐᒂᓐ ᒐ ᐃᑐᑎᒥᓐ᙮

¹⁰ ᒥᒄ ᓂᔄᐅᑕᒡ ᐊ ᒋᓯᑲᒡ ᐎᔾ ᐊᔪᐅᒄ ᐅᑦ ᐊᔽᓯᐅᒋᓯᑲᒻ ᑎᐸᔨᒋᒐᓱᐤ ᒋᒋᓴᒪᓂᑐᒻ᙮ ᐊᓐ ᒐᓯᑲᒡ ᐊᑲᐎᔾ ᐎᔭᔅᑦ ᒋᑭ ᐃᑕᐱᑎᓯᓐ, ᒋᔾ ᑭᔭ ᒋᑯᔅ ᑭᔭ ᒋᑕᓂᔅ, ᑭᔭ ᒋ ᓇᐸᐤ-ᐊᑐᔅᒐᔭᑭᓐ, ᑭᔭ ᒋᑦ ᐊᑐᔅᒐᔭᑭᓂᔎᒻ, ᑭᔭ ᒋᑦ ᐊᐛᓯᓯᒥᒡ, ᑭᔭ ᐊᓐ ᒪᓐᑕᐤ ᒋᑦ ᐃᑕᐅᓂᒡ ᐊᑕᑦ᙮

¹¹ ᐛᔅ ᐊᓱᑕᒡ ᑕᑐᐤ ᒋᓯᑲᐛ ᒋ ᐃᔅᐱᔅ ᐅᓯᑕᑕᑯᐱᓐ ᑎᐸᔨᒋᒐᓱᐤ ᒋᒋᒋᓯᑯᔪᐤ ᑭᔭ ᐊᔅᒋᔪᐤ, ᐎᓂᐸᑯᔪᐤ ᑭᔭ ᒥᓯᐛ ᒐᒂᔪᐤ ᐊᓐᑕ ᐊ ᑎᑯᓂᔨᒡ, ᒋ ᐊᔽᓯᑕᑯᐱᓐ ᒪᒃ ᓂᔄᐅᑕᒡ ᐊ ᒋᓯᑲᔨᒡ; ᐊᔪᐅᒄ ᐛᒋ ᒥᔪ ᐃᑐᑎᒥᑯᐱᓇ ᑎᐸᔨᒋᒐᓱᐤ ᐊᓂᔭᔪᐤ ᓂᔄᐅᑕᒡ ᐊ ᒋᓯᑲᔨᒡ, ᑭᔭ ᐛᒋ ᐸᔭᒋ ᒋᓯᑲᒐᑕᒧᑯᐱᓇ᙮

Exodus 20.1-4, 7-10, 12-20 (Proper-22 Year A)

¹² ᒋᔅᑕᔨᒻ ᒍᑕᐎᔾ ᑭᔭ ᒋᑲᐎᔾ, ᐊᑯ ᒪᒃ ᓇᐅᔅ ᒐᒋ ᑕᔨᓐ ᐊᓐᑕ ᑲ ᐅᑦ ᐊᔅᒋᒥᑲᔅᒃ ᑎᐸᔨᒋᒐᓱᐤ ᒋᒋᓴᒪᓂᑐᒻ᙮

¹³ ᐊᑲᐎᔾ ᒋᑭ ᓂᐸᐃᔨᐛᓐ᙮

¹⁴ ᐊᑲᐎᔾ ᒋᑭ ᐱᓯᒂᑎᓯᓐ᙮

¹⁵ ᐊᑲᐎᔾ ᒋᑭ ᑭᒐᒧᑎᓐ᙮

¹⁶ ᐊᑲᐎᔾ ᒋᑭ ᑭᒋᔭᐛᑕᒋᒪᐤ ᒋᒡ ᐃᔪᐤ᙮

¹⁷ ᐊᑲᐎᔾ ᒋᑭ ᒧᔅᑕᓂᒧᐛᐤ ᒋᒡ ᐃᔪᐤ ᐎᒡ, ᐊᑲᐎᔾ ᒋᑭ ᒧᔅᑕᓂᒧᐛᐤ ᒋᒡ ᐃᔪᐤ ᐎᐛ, ᐊᑲᐎᔾ ᑭᔭ ᐅᑦ ᐊᑐᔅᒐᔭᑭᓂᒪ, ᑭᔭ ᐅᑦ ᐊᑐᔅᒐᔭᑭᓂᔎᒪ, ᑭᔭ ᐅᓇᐸᒥᔅᑐᓯᒪ ᑭᔭ ᑲᓂᐧᑲᑎᓯᔨᒋ ᐅᑲᐸᐃᑭᔎᒪ ᑭᔭ ᒥᒄ ᒐᒂᔪᐤ ᑕᐱᔨᐛᐅᓯᑦ᙮”

¹⁸ ᐃᔅᐱ ᐱᔭᑐᐛᒡ ᐃᔪᒡ ᓂᒥᔅᒍᐛ ᑭᔭ ᐱᔭᑕᒡ ᐊ ᒋᔄᐛᒥᑭᓂᔨᒡ ᐳᑕᒋᑭᓂᔪᐤ ᑭᔭ ᐎᔭᐸᑕᒡ ᐊᐱᒋᑐᐛᔨᒡ ᐱᔅᑯᑎᓇᔪᐤ, ᒋ ᓇᓇᒥᐱᐅᒡ ᐊ ᑯᔅᑕᒋᒡ ᑭᔭ ᐛᔪᐤ ᒋ ᓂᐳᐅᐎᒡ᙮

¹⁹ ᐊᑯ ᐃᔪᒡ ᐃᑕᐅᒡ ᒧᓱᓴ, “ᒋᔾ ᐃᔨᒥᐃᓇᓐ ᑭᔭ ᓂᑭ ᓂᑐᑕᓇᓐ; ᒥᒄ ᐊᑲ ᓇᐃᒻ ᒐᒋ ᐃᔨᒥᔨᒥᑦ ᒋᓴᒪᓂᑐᐤ, ᓂᑭ ᓂᐳᐛᓇᓐ ᐃᔨᒥᔨᒥᒐ᙮”

²⁰ ᐊᑯ ᒧᓱᔅ ᐊᑕᑦ ᐃᔪᐛ, “ᐊᑲ ᑯᔅᑕᒋᒄ, ᐛᔅ ᒋᓴᒪᓂᑐᐤ ᔅᒋ ᐸᒋ ᓂᑐᐛᐱᒥᑯᐛᐤ ᒐᒋ ᑯᒂᒋᐃᑕᒄ ᑭᔭ ᐃᑐᑕᑕᒄ ᒐᒋ ᓇᓂᑎᒻ ᓂᓇᐃᑐᐛᒄ, ᐊᑯ ᒪᒃ ᒐ ᐊᑲ ᒥᒋᑐᑎᒪᒄ᙮”

²¹ ᐊᑯ ᐃᔪᒡ ᐛᔪᐃᔅ ᒋ ᓂᐳᐅᐎᒡ ᐊᓐᑕ ᐊ ᑕᔨᒋ ᒋᓴᒪᓂᑐᐛ, ᒪᒂᒡ ᒧᓱᔅ ᐊᑐᑕᑦ ᒥᒋᒪ ᐊ ᑕᔨᒋ ᒋᓴᒪᓂᑐᐛ᙮

ᒥᓂᑐᐧᑲᓐᒡ ᑭᔭ ᐱᔅᑎᓂᒐᐅᓇᐱᔎ᙮

²² ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ ᒐᒋ ᐃᑕᔨᒋ ᐃᔅᕋᐃᓪ ᐃᔪᐛ: ᒋᔨᐛᐤ ᓇᔅᒡ ᒋ ᐛᐸᑕᓇᐛᐤ ᒋᔅᒋᓯᑯᐛᒡ, ᑲ ᐃᔨᒥᑎᑯᒡ ᒋᒋᒋᓯᑯᒡ ᐅᒡ᙮

²³ ᒐ ᐊᑲ ᐅᓯᐊᑯᒡ ᒥᓂᑐᐧᑲᓐᒡ ᐊ ᓱᓇᔭᐱᔅᑯᐅᒡ ᑭᔭ ᒪᒃ ᐊ ᐎᓴᐅᓱᓇᐱᔅᑯᐅᒡ ᒐᒋ ᐊᔭᒥᐊᔅᑐᐛᑯᒡ ᒥᔅᑯᒡ ᓂᔾ᙮

²⁴ ᒐ ᐛᓯᑕᔭᒄ ᐱᔅᑎᓂᒐᐅᓇᐱᔅᒄ ᐊᔅᒋᒡ ᐅᒡ ᑭᔭ ᒐ ᐱᔅᑎᓇᑯᒡ ᐊᓐᑕ ᒪᔭᑕᓂᓯᒡ, ᑲ ᐅᑦ ᐊᔅᑭᓂᓯᒡ ᑭᔭ ᒥᔅᑐᓯᒡ ᒥᑐᔅᑕᐊᒪᒐᐅᓇ ᒥᓯᐛ ᒐᒋ ᐃᔎᓱᒡ ᑭᔭ ᒧᔭᒻ ᒋᔭᒪᔨᑎᒧᐅ ᐱᔅᑎᓂᒐᐅᓇ᙮ ᑕᓐᑕ ᒥᒄ ᒐ ᐎᔭᔨᑎᒪᓐ ᒐᒋ ᐊᔭᒥᐊᔅᑕᑯᐅᔭᓐ, ᓂᑭ ᑎᑯᓯᓐ ᒐᒋ ᓱᐛᑕᑯᐎᑎᑯᒡ᙮

²⁵ ᒐᒄ ᐛᓯᑕᔭᒂ ᐱᔅᑎᓂᒐᐅᓇᐱᔅᒄ ᐊᓯᓂᔭ ᐅᒡ, ᒐ ᐊᑲ ᒪᑎᓯᒪᒄ ᐊᓯᓂᔭ ᒐᒋ ᒥᔪᓇᑯᑕᔭᒄ ᐛᔅ ᓇᒪ ᒋᑭ ᒥᔽᐤ ᒐᒋ ᐸᔭᒋ-ᐊᐱᒋᑕᑭᓄᐅᒡ᙮

²⁶ ᒐ ᐊᑲ ᐃᓯᓇᑯᑕᔭᒄ ᒐᒋ ᑕᑕᐧᑯᔅᑲᓇᓄᐅᒡ, ᐃᑐᑎᒪᒂ ᐅ ᒋᑭ ᓄᑯᓯᓇᐛᐤ ᐊ ᒧᓴᓯᔭᒄ ᐃᔅᐱ ᓴᑭᒋᐛᔭᒂ᙮