ᐊᒃᓱᑕᔅ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑲ ᐃᔪᑦ ᒧᓱᔅ Exodus 1.8-2.10 (Proper-16 Year A)

¹ ᐊᑯ ᓇᐸᐤ ᐊᓐᑕ ᓕᐸᐃ ᐃᔪᐛ ᒋ ᐎᒋᒪᐤ ᐃᔎᐛ ᓕᐸᐃ ᐅᒡ᙮

² ᐊᑯ ᐃᔎᐤ ᒂ ᐊᓱᐛᐱᒪᐅᓱᑦ ᑭᔭ ᒋ ᐅᑯᓱᐤ᙮ ᐃᔅᐱ ᐎᔭᐱᒪᑦ ᓇᔅᒡ ᐊᒋ ᒥᔪᓇᑯᓯᔨᒋ, ᓂᔅᑐ ᐱᓯᒺ ᒋ ᐃᔅᐱᔅ ᑲᔭᐤ᙮

³ ᒥᒄ ᐃᔅᐱ ᐛᑎᒋᐱᔨᒡ ᒐ ᐊᑲ ᓇᐅᔅ ᒋ ᑲᔭᑦ, ᒂ ᐅᓯᑕᐛᑦ ᐅᑎᐱᐅᑎᔪᐤ ᐱᒍᐛ ᐊᐱᒋᐊᑦ ᒐ ᐊᑲ ᓴᑈᐸᐛᔨᒡ᙮ ᒂ ᐱᑕᐛᑦ ᐊᐛᓴ ᐊᓐᑕ ᐅᑎᐱᐅᑎᒡ ᑭᔭ ᐸᔅᑎᓇᑦ ᐊᓐᑕ ᐊ ᒋᓏᔅᑯᓂᔨᒋ ᒥᔅᑯᓱᐛ ᐊᓐᑕ ᔭᔭᐤ ᓇᐃᔭᓪ ᓯᐱᔪᐤ᙮

⁴ ᐊᑯ ᐊᓐ ᐊᐛᔅ ᐅᒥᓴ, ᐛᔪᐎᔅ ᒋ ᓂᐳᔪᐛ ᐛᒋ ᑭᓄᐛᐱᒪᑯᑦ ᑕᓐ ᒐ ᐃᔅᐱᔨᒂ᙮

⁵ ᐊᑯ ᒋᓴᐅᒋᒪᐤ ᐅᑕᓂᓴ ᒂ ᐃᑐᑕᔨᒋ ᐊᓐᑕ ᓇᐃᔭᓪ ᓯᐱᒡ ᒐ ᒋᔅᑕᐸᐅᐎᓱᔨᒋ, ᑭᔭ ᐅᑯᐸᓇᔎᒪ ᒂ ᐱᐸᒧᑕᔨᒋ ᐊᓐᑕ ᓯᓱᒡ ᓇᐃᔭᓪ ᓯᐱᒡ᙮ ᒂ ᐛᐸᑕᐧᒃ ᐅᑎᐱᐅᑎᔪᐤ ᐊᓐᑕ ᐊ ᒋᓏᔅᑯᓂᔨᒋ ᒥᔅᑯᓯᒡ ᑭᔭ ᒂ ᐃᑎᓴᐛᑦ ᐅᑯᐸᓇᔎᒪ ᒐᒋ ᓂᑐᐛᐸᑎᒥᔨᒋ᙮

⁶ ᐃᔅᐱ ᒋᓴᐅᒋᒪᐤ ᐅᑕᓂᓴ ᓯᔭᓇᐧᒃ ᐅᑎᐱᐅᑎᔪᐤ ᑭᔭ ᐎᔭᐱᒪᑦ ᐊᐛᓴ ᐊ ᑕᔨᒋ᙮ ᒋᒋᐛ ᒋᔅᑎᒪᒐᔨᒪᐤ, ᐛᔅ ᒋ ᒪᔪᐛ᙮ ᐊᑯ ᐊᔅᒋᔄᑦ, “ᐊᐅᑯᐤ ᐸᐃᒄ ᐃᑉᕈᐤ ᐊᐛᔅ !”

⁷ ᐊᑯ ᐊᓐ ᐊᐛᔅ ᐅᒥᓴ ᑲ ᑯᒂᒋᒪᑦ ᒋᓴᐅᒋᒪᐛ ᐅᑕᓂᓯᔪᐛ ᑭᔭ ᐊᑕᑦ, “ᓂᑭ ᓂᑐᐛᐱᒪᐤ ᐊ ᐃᑉᕈᐤ ᐃᔎᐤ ᒐᒋ ᑭᓄᐛᔨᑎᒪᔅᒃ ᐅᔭ ᐊᐛᓴ ?”

⁸ ᐊᑯ ᐊᑎᑯᑦ ᒋᓴᐅᒋᒪᐛ ᐅᑕᓂᓯᔪᐛ, “ᓂᐦᐃ, ᒪᒋ᙮” ᐊᑯ ᐊᓐ ᐃᔎᔅ ᒐ ᑐᑕᑦ ᑭᔭ ᓇᑐᐛᐱᒪᑦ ᐊᐛᓴ ᐅᑲᐎᔪᐛ᙮

⁹ ᐊᑯ ᒋᓴᐅᒋᒪᐤ ᐅᑕᓂᓴ ᐊᑕᑦ, “ᐅᑎᓐ ᐅ ᐊᐛᔅ, ᒐ ᐃᑐᑐᐅᑦ ᑭᔭ ᒋᑭ ᒋᓯᐧᑲᑎᓐ᙮” ᐊᑯ ᐊᓐ ᐃᔎᐤ ᒐ ᐛᑕᐊᑦ ᐅᑦ ᐊᐛᓯᒪ ᑭᔭ ᐊ ᐃᑐᑐᐛᑦ᙮

¹⁰ ᐃᔅᐱ ᒐ ᐃᓯ ᓂᑕᐅᒋᔨᒋ ᐊᐛᓴ, ᐊᑯ ᐊᓐ ᐅᑲᐎᒪᐤ ᒂ ᐃᑐᑐᐛᑦ ᒋᓴᐅᒋᒪᐛ ᐅᑕᓂᓯᔨᐛ ᑭᔭ ᒂ ᐱᒥᓇᔨᒋ᙮ ᒧᓱᔅ ᒂ ᐃᓯᓂᐧᑲᑕᑦ ᒋᓴᐅᒋᒪᐤ ᐅᑕᓂᓴ ᐊ ᐃᔅᒋᔄᑦ, “ᐛᔅ ᓂᔾ ᓂᐱᒡ ᓂᒋ ᐅᒋ ᐅᑎᓇᐤ᙮”

ᒧᓱᔅ ᑲ ᐃᑎᓯᒧᑦ ᐊᓐᑕ ᒥᑎᐊᓐ ᐊᔅᒋᒡ

¹¹ ᑲᒋ ᒥᒐᑐᐱᐳᓂᔨᒡ, ᒧᓱᔅ ᑲᒋ ᒋᓴᐸᐅᑦ, ᒂ ᓇᒋ ᒧᐱᔅᑐᐛᑦ ᐅᑦ ᐃᔨᒪ ᐃᑉᕈᐤ ᐃᔪᐛ ᐊᓐᑕ ᐊᑐᔅᑲᐊᑭᓂᔨᒋ, ᑭᔭ ᒂ ᐛᐱᒪᑦ ᐊ ᒥᔅᑎᑐᔅᒐᔨᒋ᙮ ᒋ ᐛᐱᒪᐤ ᐃᒋᑉᑦ ᐃᔪᐛ ᑲ ᒪᓯᐧᑯᐛᔨᒋ ᐃᑉᕈᐤ ᐃᔪᐛ᙮

¹² ᐊᑯ ᒂ ᓇᓂᑐᐛᐱᑦ ᒐ ᐊᑲ ᑕᔨᒂᓂ ᐊᐛᔪᐛ ᐊᑯ ᒂ ᓂᐸᐊᑦ ᐃᒋᑉᑦ ᐃᔪᐛ ᑭᔭ ᐊᑎ ᐃᔨᑲᑕᑦ ᒥᔭᔪᐤ᙮

¹³ ᐎᔭᐱᓂᔨᒡ, ᒧᓱᔅ ᒥᓐ ᒋ ᓇᒋ ᒧᐱᔅᑐᐛᐤ ᐅᑦ ᐃᔨᒪ, ᒂ ᐛᐱᒪᑦ ᓂᓱ ᐃᑉᕈᐤ ᐃᔪᐛ ᐊ ᒪᓯᐧᑲᑐᔨᒋ᙮ ᒧᓱᔅ ᑲ ᐃᑕᑦ, “ᑕᓐ ᐊ ᐃᑎᔭᒄ ᐊᓐ ? ᐊᑯ ᒐᒂᓂᔪᐤ ᐛᒋ ᐅᑕᒧᐅᑦ ᒋᐎᒐᐛᑭᓐ ? ᓇᒪ ᒥᔽᐤ ᒐᒋ ᐃᑐᑕᔭᒄ ᐊᓐ᙮”

¹⁴ ᓇᐸᐛ ᐃᑎᑯᐤ, “ᐊᐛᓐ ᑲ ᒥᔨᔅᒃ ᒐᒋ ᐅᒋᒪᐎᓐ ᑭᔭ ᒐᒋ ᑎᐸᔅᑯᓂᔭᒡ ? ᒋᑦ ᐃᑕᔨᑕᓐ ᐊ ᒐᒋ ᓂᐸᐃᔨᓐ ᒧᔭᒻ ᑲ ᓂᐸᐃᑦ ᐃᒋᑉᑦ ᐃᔪᐤ ᐅᑕᑯᓯᒡ ?” ᒧᓱᔅ ᒂ ᓴᒋᓯᑦ ᑭᔭ ᒂ ᐃᑕᔨᑕᐧᒃ ᓄᑎᒻ ᓴᔅ ᒐᔅᒐᔨᑕᑭᓄᐎᒡ᙮

¹⁵ ᐊᑯ ᒋᓴᐅᒋᒪᐤ ᐱᔭᑕᐧᒃ ᐅᔭ, ᒋ ᐃᑎᓱᐛᐤ ᒐᒋ ᒪᑯᓇᑭᓄᔨᒋ ᑭᔭ ᓂᐸᐊᑭᓄᔨᒋ ᒧᓱᓴ᙮ ᒂ ᒋᑎᓯᒪᑦ ᒧᓱᔅ ᒥᑎᐊᓐ ᐊᔅᒋᒡ ᐃᔅ᙮ ᒧᓱᔅ ᑲ ᑎᑯᓯᒃ ᐊᓐᑕ ᒥᑎᐊᓐ ᐊᔅᒋᒡ, ᒂ ᓇᐃᐱᑦ ᐊᓐᑕ ᒥᒋᒪ ᐅᑕᐃᐸᓂᒡ᙮

¹⁶ ᐊᑯ ᐊᔭᒥᐊᐅᒋᒪᐤ ᐊᓐᑕ ᒥᑎᐊᓐ, ᒐᑎᕈᐤ ᑲ ᐃᓯᓂᐧᑲᓱᑦ, ᓂᔄᐅᑕᒡ ᒋ ᐃᑕᑎᓯᔪᐛ ᐅᑕᓂᓴ, ᑭᔭ ᒂ ᑎᑯᓯᓂᔨᒋ ᐊᓐᑕ ᐅᑕᐃᐸᓂᒡ ᒐᒋ ᒥᓇᔨᒋ ᐊᓂᔭ ᐅᑕᐎᐛᐛ ᐅᒪᔭᑕᓂᓯᒥᔪᐛ᙮

¹⁷ ᐊᑯ ᒪᔭᑕᓂᓯᐅ-ᐃᔪᒡ ᒂ ᑎᑯᓯᓂᒡ ᐊᓐᑕ ᐅᑕᐃᐸᓂᒡ ᑭᔭ ᒂ ᐃᑐᑐᐛᒡ ᒐᒋ ᔅᑐᑕᔨᒋ ᐃᔎᓴ, ᐊᑯ ᒧᓱᔅ ᒂ ᐎᒐᐊᑦ ᐃᔎᓴ ᑭᔭ ᒂ ᒥᓇᐃᒪᑦ ᐅᒪᔭᑕᓂᓯᒥᔪᐛ᙮

¹⁸ ᐊᑯ ᐃᔎᓯᒡ ᒂ ᐊᑎ ᒋᐛᒡ, ᐊᑯ ᒂ ᐃᑎᑯᒡ ᐅᑕᐎᐛᐛ, “ᑕᓐ ᐊ ᐃᑎᔭᒄ ᐅ ᐎᐱᒡ ᐛᒋ ᑎᑯᓯᓂᔭᒄ ?”

¹⁹ ᒂ ᐃᑕᒡ ᐅᑕᐎᐛᐛ, “ᐃᒋᑉᑦ ᐃᔪᐤ ᓂᒋ ᐎᒋᐃᑯᓇᓐ ᒪᔭᑕᓂᓯᐅ-ᐃᔪᐛ ᐅᒡ, ᑭᔭ ᒋ ᒂᐱᒐᐤ ᑭᔭ ᒋ ᒥᓇᐊᐤ ᐊᓂᔭ ᒋᒪᔭᑕᓂᓯᒥᓄᐛ᙮”

²⁰ ᒂ ᐊᑎ ᑯᒂᒋᒪᑦ ᐅᑕᓂᓴ, “ᑕᓐᑕ ᐊ ᑕᑦ ? ᐊᑯ ᒐᒂᓂᔪᐤ ᐛᒋ ᓂᑭᑕᒄ ? ᒪᒋᒄ, ᒐ ᐎᓴᒪᒄ ᒐᒋ ᓇᒋ ᐅᑕᑯᓯᐅᒥᒋᓱᑦ᙮”

²¹ ᒧᓱᔅ ᒋ ᓂᔅᑯᒧᐤ ᒐᒋ ᑕᐛᑦ ᐊᓐᑕ ᒐᑎᕈᐛ ᐊ ᑕᔨᒋ᙮ ᐊᑯ ᒐᑎᕈᐤ ᒋ ᒥᔭᐤ ᐊᓂᔭ ᒧᓱᓴ ᐸᐃᒄ ᐅᑕᓂᓴ ᒐᒋ ᐎᒋᒪᔨᒋ᙮ ᓯᐳᕋ ᒋ ᐃᓯᓂᐧᑲᓱᔨᐛ ᐊᓂᔭ ᐅᑕᓂᓴ᙮

²² ᐊᑯ ᒋ ᐅᑯᓱᐤ ᓯᐳᕋ, ᑭᕐᓱᒻ ᒋ ᐃᓯᓂᐧᑲᑕᑭᓂᔨᐛ, (ᒪᓐᑕᐤ ᐃᔅᒋᔄᒥᑯᓂᔪᐤ) ᐛᔅ ᒧᓱᔅ ᒋ ᐃᔅᒋᔄᐤ, “ᓂᔾ ᓂ ᒪᓐᑕᐅᓐ ᐅᑕ ᒪᓐᑕᐤ ᐊᔅᒋᒡ᙮”

²³ ᓇᓇᒐ ᑲᒋ ᒥᒐᑐᐱᐳᓂᒡ ᒋ ᐳᓂᐱᒪᑎᓯᐤ ᐊᓐ ᐃᒋᑉᑦ ᒋᓴᐅᒋᒪᐤ, ᐃᔅᕋᐃᓪ ᐃᔪᒡ ᒋ ᓂᓇᐧᑲᒋᒧᐅᒡ ᐊᔅᒄ ᐊ ᒪᑯᓇᑭᓄᐅᒡ ᐊᓐᑕ ᐃᒋᑉᑎᒡ᙮ ᒋ ᐸᑕᑯᐅᒡ ᒋᓴᒪᓂᑐᐛ ᐊ ᓂᓇᐧᑲᒋᒧᒡ᙮

²⁴ ᒂ ᐊᑎ ᒋᔅᒋᑐᐛᑦ ᐊᓂᔭ ᐊᑉᕋᐊᒪ, ᐊᐃᓯᑲ ᑭᔭ ᒐᑭᐸ ᑲ ᐃᑕᑦ ᒐ ᒋᐛᑕᐊᑦ ᐊᓂᔭ ᐅᑦ ᐊᓂᔅᑯᑕᐸᓂᔪᐛ ᓇᑕ ᑲᐃᓇᓐ ᐊᔅᒋᒡ᙮

²⁵ ᒋᔅᒐᔨᒪᐤ ᑕᓐ ᑲ ᐃᔅᐱᔨᒋ ᐅᑦ ᐃᔨᒪ ᑭᔭ ᒋᔅᑎᒪᒐᔨᒪᐤ᙮